“Mālo Te Maʼuli! ʼE Koutou ʼIloʼi Koa Te Huafa ʼo Te ʼAtua?”
NEʼE maʼu e te filiale ʼa te kau Fakamoʼoni ʼa Sehova ʼi Pelesile te tohi mai te māhaga fafine ʼi te kolo ʼo Fortaleza:
“ ʼI muʼa atu ʼi te taʼu 1990 ʼi tamā kei ako ʼi te kalasi nima, neʼe fakatuʼutuʼu e tamā fale ako te fakahāhā ʼo te ʼu faʼahiga ʼaluʼaga ʼo te agaʼi fenua, mo te ʼu faʼahiga faiva, ʼo feiā mo te ʼatu faʼahiga ako. Neʼe ma fakamahino ki tamā fafine fai ako neʼe ma loto ke kehe te ʼaluʼaga ʼo te meʼa ʼe ma teuteuʼi ʼi te faʼahi ʼaē ʼe ʼamanaki fai e te kau ako. Pea ʼi tana kua logope kia māua tamā palalau ʼo ʼuhiga pea mo Sehova pea mo te Tohi-Tapu ʼi muʼa atu, neʼe fēnei leva tana ʼui mai: ‘Kapau koia ʼaia, ʼe feala hakolua tohi ʼo ʼuhiga mo tokolua ʼAtua!’
“Neʼe ko he fealagia ʼaia kia māua ke ma fagonogono pea neʼe ma fakamaʼopoʼopo ai te ʼu tohi faka tohi-tapu ʼe nātou talanoa ki te huafa ʼo Sehova. Neʼe ma ta fakalahi te ʼu palalau ʼaē ia Pesalemo 83:18 pea neʼe ma fakapipiki te paki ki te loto Tohi-Tapu ʼo tuku ava. Pea neʼe ma tuku foki ʼi te fuga laupapa te ʼu faʼahiga Tohi-Tapu ʼe tuʼu ai te huafa Sehova. ʼI te laupapa pe ʼaia, neʼe ma fakahāhā ai te ʼu faʼahiga tohi faka tohi-tapu. ʼI te muliʼi laupapa, neʼe ma fakatuʼu ai te foʼi viteo pea mo te televisio moʼo fakahā ki te hahaʼi he ʼata ʼi te ʼu ʼata ʼiloa ʼe fakaʼaogaʼi ai te huafa ʼo Sehova.
“Lolotoga te fakahāhāʼaga, ka haʼu he tahi ki tamā laupapa, pea ma ʼui age: ‘Mālo te maʼuli! ʼE koutou ʼiloʼi koa te huafa ʼo te ʼAtua?’ ʼI te ʼosi tuku age te fealagia ke fai hana tali, ʼe fēnei tamā hoko atu: ‘Koutou sio ʼi heni! ʼE lahi te ʼu Tohi-Tapu ʼe nātou fakahā ko tona huafa ko Sehova’, ohage la ko te fakaliliu ʼa João Ferreira de Almeida, Te Tohi Tapu ʼo Selusalemi, pea mo te Traduction du monde nouveau. Pea ma fakahā ai leva te ʼata ʼe ina fakaʼilo ai ko te huafa ʼo te ʼAtua ko Sehova. Ka leleiʼia e te hahaʼi, pea ma fakatoʼo age leva he nusipepa peʼe ko he kiʼi pepa lotu ʼaki ai he tahi ʼu fakamatala.
“Ko te tūpulaga neʼe haʼu ʼo faka ʼui mai te tohi Les Jeunes sʼinterrogent — Réponses pratiques. Ko tamā fafine fai ako neʼe ina vakaʼi te tohi Te fakatuʼu ke maʼu ʼo he maʼuli faka famili fīmālie pea neʼe kalaga: ‘Ê! Hokie te tohi lelei!’ ʼI te ʼosi ʼo te fakahāhā ʼo te ʼu meʼa ʼo te fale ako, neʼe ma tufa te ʼu tohi e 7, pea mo kiʼi pepa lotu e 18, pea mo nusipepa e 67. Neʼe ma tuʼulaga tolu ʼi te fakahāhā ʼo te ʼu meʼa ʼo te faleʼako. Kae laka ia meʼa fuli, neʼe ma fiafia lahi ki te pilivilesio ʼaē ko te fakaʼilo ʼo te huafa ʼo te ʼAtua, ʼaē ko Sehova.”