Te ʼOfa (Agapê): Tona ʼUhiga Hāla Mo Tona ʼUhiga Tonu
“Hilifaki ki takotou (...) agalelei fakatautehina te ʼofa.” — 2 Petelo 1:5, 7.
1. a) Ko te kalitate fea ʼaē ʼe tuku ki muʼa e te Tohi-Tapu? b) Koteā te ʼu kupu faka keleka e fā ʼe fakaliliu ʼaki te kupu ʼaē ko te “ ʼofa”, pea ko te kupu fea ʼaē ʼe fakaʼaogaʼi ia 1 Soane 4:8?
KAPAU ʼe ʼi ai he kalitate ʼe tuku ki muʼa e te Folafola ʼa te ʼAtua, te Tohi-Tapu, ko te ʼofa pe. ʼI te faka keleka, te ʼuluaki lea ʼo te ʼu Tohi faka kilisitiano, ʼe ʼi ai te ʼu kupu e fā ʼe tau fakaliliu ʼaki te “ ʼofa”. ʼIo, ko te ʼofa ʼaē ʼe tou talanoa kiai ʼe mole ko te éros (ko he kupu ʼe mole maʼu ʼi te ʼu Tohi faka keleka faka kilisitiano), ʼaē ʼe fakatafito ki te holi fakasino; ʼe mole ko te storgê, ʼaē ʼe fakatafito ki te felogoi mai he haʼuʼaga e tahi ʼi te faʼahi faka famili; ʼe mole ko te philia, ko he feʼofaʼaki fakaloto māfana ʼo ni ʼu kaumeʼa, ʼe fakatafito ki he fefakaʼapaʼapaʼaki, ʼe talanoa kiai te ʼuluaki alatike. Kae, ko te agapê — ko te ʼofa ʼe fakatafito ki te ʼu moʼoni, ʼaē ʼe feala pe ke faka ʼuhiga tahi mo te mole tokaga pe ʼaē kia kita, ko te faʼahiga ʼofa ʼaia ʼaē ʼe talanoa kiai ia te ʼapositolo ko Soane ʼi tana ʼui ʼaē: “Ko te ʼAtua ʼe ʼofa.” — 1 Soane 4:8.
2. Koteā te meʼa ʼaē neʼe ʼui tonu ʼo ʼuhiga mo te ʼofa (agapê)?
2 ʼO ʼuhiga mo te ʼofa ʼaia (agapê), ʼe ʼui fēnei e te polofesea ko William Barclay ʼi tana tohi (New Testament Words): “Ko te kupu agapê ʼe ʼi ai tona pikipikiga mo te ʼatamai: ʼe mole faka ʼuhiga pe ki he meʼa ʼe hoʼi malaga pe ʼi totatou loto [ohage pe ko te meʼa ʼe feala ke hoko ʼaki te philia]; ʼe ko he moʼoni ia ʼe tou fakahoko he neʼe tou fili ʼi te hili ʼo tona fakakaukauʼi. Ko te agapê e lahi tona pikipikiga mo te finegalo. Ko he meʼa neʼe kita lavaʼi, neʼe kita mālo ai, peʼe ko he meʼa neʼe kita lava ʼo fakahoko. ʼE mole he tahi ʼi te agamāhani ʼe ʼofa ki tona ʼu fili. Ko te ʼofa ki to kita ʼu fili ʼe ko he mālo ia ʼi totatou ʼu agaaga māhani pea mo te ʼu meʼa māhani ʼo totatou loto. Ko te kupu agapê (...) ʼi tona fakahagatonu, ʼe ko te lavaʼi ʼaē ʼo ʼofa ki ʼaē ʼe fehiʼaʼinaʼi, ko te ʼofa ki te hahaʼi ʼaē ʼe mole tou fia ʼolo ki ai.”
3. Neʼe feafeaʼi te faka maʼuhiga e Sesu Kilisito pea mo Paulo te ʼofa?
3 ʼIo, ʼi te ʼu meʼa ʼaē ʼe nātou fakakeheʼi te tauhi maʼa kia Sehova ʼAtua mai te ʼu faʼahiga tauhi ʼaē ʼo ʼuhiga mo te meʼa ʼaia. Neʼe tala tonu e Sesu Kilisito te ʼu folafola e lua ʼe maʼuhiga ʼaupito: “Ko te ʼuluaki ʼaenī: ‘ ʼE maʼua ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou ʼatamai katoa pea mo tou mālohi katoa.’ Pea koʼeni tona lua: ‘ ʼE tonu ke ke ʼofa ki tou kāiga ohage pe ko tau ʼofa ʼaē kia te koe totonu.’ ʼE mole ʼi ai he tahi folafola ʼe lahi age ʼi te ʼu folafola ʼaia.” (Maleko 12:29-31). ʼE toe faka maʼuhigaʼi pe foki la e te ʼapositolo ko Paulo ʼi te kapite 13 ʼo 1 Kolonito. Hili pe ʼaē tana faka maʼuhigaʼi ko te ʼofa ko te ʼuluaki kalitate maʼuhiga, ʼe ina fakaʼosi ʼo ina ʼui fēnei: “Kae ʼi te temi nei, ʼe maʼu te tui, te ʼamanaki, te ʼofa, ko te ʼu meʼa ʼaia e tolu; kae ko ʼaē ʼe lahi ake ia nātou toko tolu, ko te ʼofa.” (1 Kolonito 13:13). Neʼe ʼui tonu e Sesu ko te ʼofa ʼe tonu ko te fakaʼiloga makehe ʼaia ʼo tana kau tisipulo. — Soane 13:35.
Ko te ʼu meʼa ʼaē ʼe faka ʼuhiga hāla ko te ʼofa
4. Ko faʼahi kovi mo faʼahi lelei e fia ʼe fakahā e Paulo ia 1 Kolonito 13:4-8?
4 Ko te puani neʼe fakatokagaʼi ʼe faigafua age te talanoa ki te meʼa ʼaē ʼe mole faka ʼuhiga ko te ʼofa ʼi te talanoa ʼaē ki te meʼa ʼaē ʼe faka ʼuhiga ko te ʼofa. ʼE ʼi ai te faʼahi ʼe moʼoni ʼi te potu ʼaia, koteʼuhi ko te ʼapositolo ko Paulo ʼi tana kapite ʼaē ki te ʼofa, ia 1 Kolonito 13, ʼi te ʼu vaega 4 ʼo kaku ki te 8, ʼe talanoa kia meʼa e hiva ʼe mole ko te ʼofa pea mo meʼa e fitu ʼe faka ʼuhiga ko te ʼofa ʼaia.
5. E feafeaʼi te faka ʼuhiga ʼo te “fuaʼā”, pea ʼe feafeaʼi tona fakaʼaogaʼi lelei ʼi te Tohi-Tapu?
5 Ko te ʼuluaki meʼa ʼaē ʼe ʼui e Paulo ʼe mole faka ʼuhiga ko te ʼofa, “ ʼe mole fuaʼā”. Ko te meʼa ʼaia ʼe fakanounou tana fakamahino koteʼuhi ʼe ʼi ai te ʼu faʼahi ʼe lelei mo te ʼu faʼahi ʼe kovi ʼo te fuaʼā. ʼE fakamahino fēnei e te tikisionalio ko te “fuaʼā” ko te “mole tali ʼo he fefihiʼaki” pea mo “he pipiki ʼāteaina pe ki ai”. Koia, neʼe tala e Moisese ia Ekesote 34:14: “ ʼAua naʼa ke punou ʼi muʼa ʼo he tahi ʼatua, koteʼuhi ko Sehova, ʼaē ko tona huafa ko Fuaʼā, ʼe ko he ʼAtua fuaʼā.” Ia Ekesote 20:5, ʼe ʼui fēnei e Sehova: “Ko ʼau ia Sehova, tou ʼAtua, ko ʼau ko te ʼAtua ʼe ʼau fakamaʼua ke pipiki ʼāteaina pe kia te ʼau.” ʼI he ʼaluʼaga ʼe tatau, neʼe tohi fēnei e te ʼapositolo ko Paulo: “ ʼE ʼau fuaʼā ʼo ʼuhiga mo koutou, ʼi he fuaʼā faka lotu.” — 2 Kolonito 11:2.
6. Koteā te ʼu faʼifaʼitaki faka tohi-tapu ʼe fakahā ʼaki te tupuʼaga ʼo te mole fuaʼā ʼaē ʼo te ʼofa?
6 Kae, ʼi tona ʼuhiga māhani, ko te “fuaʼā” ʼe faka ʼuhiga kovi, ko te tupuʼaga ʼaia ʼo tana tuʼu ʼi te ʼu gāue ʼo te kakano ia Kalate 5:20. ʼIo, ko te fuaʼā ʼaia ʼe manatu pe kia ia pea ʼe fakatupu fehiʼa, pea ko te fehiʼa ʼe fakafeagai ki te ʼofa. Ko te fuaʼā neʼe ina fakatupu te fehiʼa ʼa Kaino kia Apele, ʼo kaku ai mo tana fakapogi, pea ko te faʼahi ʼaia ʼaē neʼe ina ʼeke te toko hogofulu ʼi te ʼu tēhina ʼo Sosefo ke nātou fia fakapogi ia ia. Ko te ʼofa ʼe mole mānumānu ʼaki te loto fuaʼā ki ʼihi ʼuhi ko ʼonatou ʼu koloā peʼe ko te ʼu lelei ʼo nātou, ohage ko te mānumānu ʼa te hau ko Akape ʼaki te loto fuaʼā ki te vite ʼa Naboth. — 1 Hau 21:1-19.
7. a) Koteā te meʼa neʼe hoko ʼe ina fakahā ko Sehova ʼe mole fiafia ʼi te laupisi? b) He koʼe koa ʼe mole laupisi te ʼofa, tatau aipe pe ko he meʼa neʼe mole kita loto kiai?
7 ʼE tala mai leva e Paulo ko te ʼofa “ ʼe mole laupisi”. Ko te laupisi ʼe ina fakahā ʼe mole kita ʼofa, koteʼuhi ʼe ina fakatuʼu kita ki he tuʼulaga māʼoluga ʼi ʼihi. ʼE mole fiafia ia Sehova ia nātou ʼaē ʼe laupisi, ohage ko tatatou sio ki tana fakatō laloʼi ia Nepukanesa ʼi tana laupisi (Taniela 4:30-35). Ko te laupisi ʼe tau fai kae mole fakakaukauʼi, ʼuhi ko he fiafia ʼi he meʼa neʼe kita kaku kiai peʼe ko he ʼu koloā ʼe kita maʼu. E lagi ko he agamāhani ʼa ʼihi ke nātou laupisiʼi te fua lelei ʼo tanatou gāue ʼi te minisitelio faka kilisitiano. Ko ʼihi ʼe nātou hage ko te tagata ʼāfea neʼe telefoni ki ʼana ʼu kaumeʼa moʼo fakahā age neʼe ina totogi te motokā foʼou ko tana fakatau e tehiʼi pe ke 5 000 000 falā CFP. Ko te ʼu aga fuli ʼaia ʼe mole ko he ʼofa koteʼuhi ʼe ina hikihiki ia ia ʼaē ʼe laupisi ke māʼoluga age ia nātou ʼaē.
8. a) Koteā te aga ʼa Sehova ʼo ʼuhiga mo nātou ʼaē ʼe fialahi? b) He koʼe koa mole aga feiā te ʼofa?
8 ʼE ʼui mai foki ko te ʼofa ʼe “mole fialahi”. Ko ia ʼaē ʼe fialahi ʼe mole ia ia te ʼofa pea ʼe ina viki ia ia totonu ʼo māʼoluga age ia nātou ʼaē. Ko te taʼi aga ʼaia ʼe mole ko he aga fakapotopoto koteʼuhi “ko te ʼAtua ʼe fakafeagai ki te kau fialahi, kae ʼe ina foaki te ʼofa ʼe mole hona tau ki te kau agavaivai”. (Sake 4:6.) ʼE kehe te aga ia ʼa te ʼofa; ʼe ina faka māʼoluga age nātou ʼaē ia ia, ohage ko te meʼa neʼe tohi e Paulo ia Filipe 2:2, 3: “Koutou fakafonu toku fiafia ʼaki te meʼa ʼaenī: Koutou loto tahi pea ke ia koutou te ʼofa e tahi, ʼo koutou fakatahi ʼi te nefesi, ʼo koutou manatu ki te meʼa e tahi; ʼaua naʼa koutou fai he meʼa ʼaki he loto fefihiʼaki, mo he loto fialahi, kae, ʼaki te loto fia mālalo, koutou tokagaʼi nātou ʼaē ohage ʼe nātou māʼoluga age ia koutou.” Ko te faʼahiga aga ʼaia ʼe fakaloto fīmālie, kae ko ia ʼaē ʼe fialahi ʼaki tana aga ʼaia ʼe fakaloto mamahiʼi.
9. He koʼe koa ko te ʼofa ʼe mole ina fai he aga fakavale?
9 Ki muli age, ʼe ʼui e Paulo ko te ʼofa “ ʼe mole aga fakavale”. ʼE faka ʼuhiga e te tikisionalio te “fakavale” ki he “agatuʼu ʼi he aga ʼe mole tau peʼe lave mamahi ki te ʼu aga māhani peʼe ki te ʼu aga ʼaē ʼe tonu ke fai”. Ko he tahi ʼe ina fai he aga fakavale (ʼe mole agalelei), ʼe ina meʼa noaʼi te ʼu meʼa ʼaē ʼe loto kiai ʼihi. Ko ʼihi Tohi-Tapu ʼe nātou fakaliliu te faka keleka ki te kupu “ ʼe mole fakapoipoi”. Ko he tahi ʼe aga feiā ʼe fehiʼa ki te meʼa ʼaē ʼe maʼa pea mo te meʼa ʼaē ʼe lelei. ʼE mahino ia, ko te tokaga ʼaki te ʼofa ki niʼihi ʼe faka ʼuhiga ko te tekeʼi te ʼu meʼa fuli ʼaia ʼe fakavale peʼe mole ina fai he meʼa ʼe pauʼu, ko he ʼu meʼa fakamamahi pea mo fakaloto mamahi.
Ko ʼihi meʼa ʼe faka ʼuhiga hāla ko te ʼofa
10. E feafeaʼi koa te mole kumi e te ʼofa te meʼa ʼaē ʼe mole ʼaoga pe kia te ia?
10 Hili ʼaia pea ʼe ʼui mai kia tatou ko te ʼofa “ ʼe mole tokaga pe ki te ʼu meʼa ʼa kita”, mokā tou talanoa ki te ʼu meʼa ʼa tatou mo te ʼu meʼa ʼa ʼihi. Pea tahi ʼaē meʼa, ʼe tala fēnei e te ʼapositolo ko Paulo: “Mole heʼeki ʼi ai he tahi kua fehiʼa ki tona sino; kailoa ia, ʼe ina fafaga pea ina fakapelepeleʼi.” (Efesi 5:29). Ka fakafeagai tatatou ʼu manatu ki te ʼu manatu ʼa ʼihi kae mole ʼi ai he fakatuʼutuʼu faka tohi-tapu ʼe pipiki kiai, ʼe tonu ke tou fai ohage ko Apalahamo pea mo Lote, ʼaki te ʼofa, tou tuku te tonu kia ia ʼaē ʼe fihi mo tatou. — Senesi 13:8-11.
11. Koteā te faka ʼuhiga ʼo te ʼui ʼaē ko te ʼofa ʼe mole ʼita?
11 Ko te ʼofa ʼe mole ʼita vave. Koia, ʼe ʼui mai e Paulo ko te ʼofa “ ʼe mole ʼita ia”. ʼE mole hoko ʼita. ʼE ina maʼuliʼi te loto lolomi. ʼE tonu tāfito ki te ʼu taumatuʼa ke nātou taupau fakalelei te tokoni ʼaenī ʼo tokakaga ke ʼaua naʼa fepākalagaʼaki peʼe felealalahiʼaki. ʼE ʼi ai te ʼu ʼaluʼaga ʼe faigafua ta kita ʼita, koia ko te tupuʼaga ʼaia ʼo te fia tokoni ʼa Paulo kia Timoteo: “Ko he kaugana ʼa te ʼAliki ʼe mole tonu ke fekēʼaki mo he tahi, kae ʼe tonu ke agamālū ki te hahaʼi fuli, faiva ʼi te fai akonaki, pea mo lava lolomi ʼo ia ʼi te agakovi — ʼio ʼe mole ʼita — ʼe ina akonakiʼi ʼaki te agamālū ia nātou ʼaē ʼe mole nonofo mo he ʼu fakatuʼutuʼu lelei.” — 2 Timoteo 2:24, 25.
12. a) E feafeaʼi te mole tokagaʼi e te ʼofa te kovi ʼaē neʼe hoko age kiai? b) He koʼe koa ʼe mole ko he agapoto te tokagaʼi ʼo he kovi neʼe hoko?
12 ʼI tana hoko atu ʼaki te ʼu meʼa ʼaē ʼe mole ko te ʼofa, ʼe tokoni fēnei e Paulo: “Ko te ʼofa (...) ʼe mole ina tokagaʼi te meʼa kovi ʼaē neʼe fai mai.” Ko te meʼa ʼaia ʼe mole faka ʼuhiga ʼaki leva ko te ʼofa ʼe mole malave kia ia he kovi neʼe fai age ki ai. Neʼe fakahā e Sesu te ʼaluʼaga ʼo te fakatokatokaʼi ʼo he ʼu fihifihia mokā neʼe lave mamahi he meʼa kia tatou (Mateo 18:15-17). Kae ko te ʼofa ʼe mole ina faka fealagia te hoko atu ʼo te ʼita, te fakamaʼumaʼu ʼo he lotokovi. Ko te mole tokagaʼi ʼo he meʼa kovi neʼe hoko ʼe faka ʼuhiga ko te fakamolemole pea mo te galoʼi ʼo te fihifihia ʼaia ʼi te ʼosi pe ʼo te fakatokatoka ʼo te fihifihia ʼaki te Tohi-Tapu. ʼIo, ʼaua naʼa koutou lotomamahi peʼe koutou fakamamahiʼi ia koutou ʼaki hakotou haga manatuʼi aipe he meʼa ʼe kovi, ʼo koutou tokagaʼi he meʼa ʼe kovi neʼe hoko!
13. Koteā te faka ʼuhiga ta kita mole fakafiafia ʼi te heʼe agatonu, pea koteā te tupuʼaga ʼo te mole aga feiā ʼo te ʼofa?
13 Tahi ʼaē meʼa, ʼe ʼui mai ko te ʼofa “ ʼe mole fakafiafia ʼi te heʼe faitotonu”. Ko te malamanei ʼe fakafiafia ʼi te heʼe faitotonu, ohage ko te meʼa ʼe feala ke tou tokagaʼi ʼi te lahi ʼo te sioʼi ʼo te ʼu tohi, mo te ʼu ʼata pea mo te ʼu polokalama ʼi te televisio ʼe hā ai te aga mālohi pea mo te ʼu felāveʼi fakasino heʼeʼaoga. Ko te taʼi fakafiafia fuli ʼaia ʼe faʼifaʼitaliha pe tona fai, ʼe mole ina tokagaʼi te ʼu fakatuʼutuʼu faitotonu ʼa te ʼAtua ʼo feiā mo te maʼuli fiafia ʼa ʼihi. Ko te taʼi fakafiafia faʼifaʼitaliha ʼaia ʼe lolotoga tō ʼi te kakano, pea ʼe ina utu pe anai ʼi te kakano te malaʼia ʼi tona lakaga tonu. — Kalate 6:8.
14. He koʼe koa ʼe feala te ʼui, ʼaki te loto falala, ko te ʼofa ʼe molemo puli ia ʼi he lakaga?
14 Koʼeni leva te meʼa fakaʼosi ʼaē ʼe mole fai e te ʼofa: “Ko te ʼofa ʼe molemo puli ʼi he lakaga.” ʼUluaki, ko te ʼofa ʼe molemo puli ia peʼe gata ʼi he lakaga, koteʼuhi ko te ʼAtua ʼe ʼofa, pea ko ia ko te “Hau ʼo te heʼegata”. (1 Timoteo 1:17.) Ia Loma 8:38, 39, ʼe fakaloto mālohiʼi tatou heʼe ko te ʼofa ʼa Sehova kia tatou ʼe molemo puli ʼi he lakaga: “ ʼE ʼau ʼiloʼi fakapapau ʼe mole ʼi ai he mate, he maʼuli, he kau ʼaselo, he ʼu puleʼaga, mo he ʼu meʼa ʼo te temi nei, mo he ʼu meʼa ʼo te temi ka haʼu, mo he mālohi, mo he māʼoluga, mo he loloto, mo he tahi age meʼa ʼe ina faʼa fakamavae anai tatou mai te ʼofa ʼo te ʼAtua, ʼaē ʼe ia Sesu Kilisito totatou ʼAliki.” Pea tahi, ko te ʼofa ʼe molemo puli ʼi he lakaga koteʼuhi ʼe mole feala ia ke kovi ʼi he temi. Ko te ʼofa ʼe ina lavaʼi pe te ʼatu ʼu faʼahiga ʼaluʼaga kehekehe mo te ʼu faʼahiga mamahi fuli.
Ko te ʼu meʼa ʼe faka ʼuhiga tonu ko te ʼofa
15. He koʼe koa ʼe ʼuluaki lau e Paulo te loto faʼa kātaki ʼi te ʼu faʼahi lelei ʼo te ʼofa?
15 ʼI te aʼu mai leva ki te faʼahi lelei ʼo te ʼofa, ʼe kamata fēnei ia Paulo: “Ko te ʼofa ʼe loto faʼa kātaki.” Neʼe ʼui ʼe mole pe feala ia ke ʼi ai he felogoi lelei ʼi te kau kilisitiano mo kapau ʼe mole ʼi ai te loto faʼa kātaki, ko tona ʼuhiga ke kātakiʼi ʼaki he loto fakatokatoka. Ko te meʼa ʼaia ʼe tupu mai tatatou ʼuhiga agahala ʼa tatou fuli, pea ko ʼatatou ʼu hāla mo agahala ʼe ko he ʼu fili ia ki ʼihi. ʼE mole he fakapuna’maʼuli ʼi te ʼuluaki lau e te ʼapositolo ko Paulo te faʼahi ʼaia ʼi te ʼuhiga tonu ʼo te ʼofa!
16. E feafeaʼi koa ʼo he fealagia ki he ʼu hahaʼi ʼo he famili hanatou feagaleleiʼaki?
16 ʼE tala e Paulo ko te ʼofa ʼe toe “agalelei”. Ko tona ʼuhiga ko te ʼofa fia tokoni, ʼe lototokaga, ʼe aga fakapoipoi. Ko te agalelei ʼe ʼiloga ʼi te ʼu meʼa lalahi feiā mo te ʼu meʼa liliki. ʼE mahino papau ia, neʼe fakahā e te Samalita ʼofa kāiga te agalelei ki te tagata ʼaē neʼe tāmateʼi e te kau tagata kaihaʼa (Luka 10:30-37). ʼE fiafia te ʼofa ʼi te ʼui ʼaē “fakalelei si ʼou loto”. Ko te ʼui ʼaē: “Mai te foʼi pane” ʼe ko he fakatotonu ia. Ko te kamata ʼaki te “fakalelei siʼi ʼou loto” ʼe faka ʼuhiga ko he kolekole fakalelei. Ko te ʼu tagata ʼe nātou agalelei ki ʼonatou ʼu ʼohoana mokā nātou mulimuli ki te tokoni ia 1 Petelo 3:7: “Kia koutou tagata, ke koutou toe feiā pe, koutou haga nonofo mo nātou ʼo mulimuli pe ki te ʼatamai mālama, ʼo tuku kia nātou te fakaʼapaʼapa ohage ki he ipu ʼe vaivai age, te ipu fakafafine, heʼe ko koutou, ʼe koutou fakatahi mo nātou ko he kau maʼu tōfiga ʼo te ʼofa ʼe mole hona tau ʼaē ʼo te maʼuli, ke ʼaua naʼa tāʼofi ʼakotou faikole.” Ko te ʼu fafine ʼe nātou agalelei ki ʼonatou ʼu ʼohoana mokā nātou fakahā age kia nātou he “fakaʼapaʼapa loloto”. (Efesi 5:33.) Ko te ʼu tāmai ʼe nātou agalelei ki ʼonatou ʼu fānau mokā nātou muliʼi te tokoni ia Efesi 6:4: “ ʼU tāmai, ʼaua naʼa koutou fakaʼita takotou fānau, kae ke koutou haga taupau ʼakotou ʼu tamaliki ʼi te ʼu lekula pea mo te ako ʼo te ʼatamai ʼo Sehova.”
17. Ko te ʼu potu fea e lua ʼaē ʼe fakafiafia ai te ʼofa ʼaki te moʼoni?
17 ʼE mole fakafiafia te ʼofa ʼi te heʼe agatonu, kae “ ʼe fakafiafia mo te moʼoni”. ʼE ʼalu fakatahi te ʼofa mo te moʼoni. Ko te ʼAtua ʼe ʼofa, pea ʼi te tahi faʼahi, ko ia “ko te ʼAtua ʼo te moʼoni”. (Pesalemo 31:5.) ʼE fakafiafia te ʼofa ʼi tana sio ʼaē ki te mālo ʼo te moʼoni pea mo tana fakaʼasi te loi; ko te tupuʼaga ʼo te toe tuputupu ʼe hoko ʼi te hahaʼi ʼo te kau tauhi kia Sehova ʼi te temi nei. Kae, koteʼuhi ko te moʼoni ʼe fakafeagai ki te heʼe faitotonu, ʼe feala pe te manatu ko te ʼofa ʼe fakafiafia ʼi te faitotonu. Ko te ʼofa ʼe fakafiafia ʼi te mālo ʼo te faitotonu, ohage pe ko te fakatotonu ʼaē ki te kau atolasio ʼa Sehova ke nātou fakafiafia ʼi te tō ʼa Papiloni Lahi. — Fakahā 18:20.
18. ʼE faka ʼuhiga feafeaʼi ko te ʼofa ʼe ina ʼamo te meʼa fuli?
18 ʼE toe ʼui mai foki e Paulo ko te ʼofa ʼe ina “ ʼamo te meʼa fuli”. Ohage ko tana fakahā ʼi te tohi (Kingdom Interlinear), ko te manatu ko te ʼofa ʼe ina ʼuʼufi te meʼa fuli. ʼE mole ina “fakahāhā he hāla” ʼo he tēhina, ohage ko tana fai māhani e te kau agakovi (Pesalemo 50:20; Tāʼaga Lea 10:12; 17:9). ʼIo, ko te manatu ʼaenī ʼe tatau mo ʼaē ia 1 Petelo 4:8: “Ko te ʼofa ʼe ina ʼuʼufi he tuʼuga agahala.” ʼE moʼoni, ko te agatonu ʼe ina tāʼofi anai he tahi mai te ʼuʼufi ʼo te ʼu agahala mamafa kia Sehova pea mo te kokelekasio faka kilisitiano.
19. E mahino feafeaʼi koa te ʼui ʼaē ko te ʼofa ʼe tui kia meʼa fuli?
19 Ko te ʼofa ʼe “tui kia meʼa fuli”. Ko te ʼofa ʼe lotolelei kae ʼe mole lotokovi. ʼE mole faka ʼuhiga ʼaki leva ko te ʼofa ʼe hoko tui. ʼE mole higa gafua ʼi he talanoa fakaofoofo. Kae ki he tahi ʼe liliu ʼo tui ki te ʼAtua, ʼe tonu ke haga tui aipe. Koia ko te ʼofa ʼe mole mahalohalo, pea mo fai fatufatu noa pe. ʼE mole fakafifihi ia ki te tui ohage ko tona fai e ia ʼaē ʼe mole tui, ʼaē ʼe ina tala ʼe mole he ʼAtua, peʼe ohage ko ia ʼaē ʼe ina ʼui kua mate te ʼAtua, ʼe ina fakamatalatala ʼe mole pe feala ia ke tou ʼiloʼi totatou haʼuʼaga, te tupuʼaga ʼo tatatou ʼi henī, pea mo te agaaga ʼo te ka haʼu. ʼE foaki mai e te Folafola ʼa te ʼAtua he fakamoʼoni ʼo ʼuhiga mo te ʼu meʼa fuli ʼaia. Ko te ʼofa ʼe tui foki la heʼe falala, kae mole mahalohalo.
20. E mahino feafeaʼi koa he pipiki ʼa te ʼofa ki te ʼamanaki?
20 Hili ʼaia ʼe fakaloto mālohiʼi tatou e te ʼapositolo ko Paulo, ko te ʼofa “ ʼe falala kia meʼa fuli”. Koteʼuhi ko te ʼofa ʼaē ʼe lotolelei, kae ʼe mole lotokovi, ʼe falala mālohi ki te ʼu fakapapau ʼi te Folafola ʼa te ʼAtua. ʼE ʼui mai fēnei: “Ko ia ʼaē ʼe fuli kele ʼe tonu ke fuli kele ʼi te ʼamanaki pea ko ia ʼaē ʼe ina haha te pulapula ʼe tonu ke ina fai ʼaki te ʼamanaki ʼaē ʼe ina maʼu hana vahe.” (1 Kolonito 9:10). Ohage pe ko te ʼofa ʼe falala, ʼe toe ʼamanaki foki, ʼo ʼamanaki tuʼumaʼu ki te meʼa ʼaē ʼe lelei age.
21. Koteā te fakamoʼoni faka tohi-tapu ʼaē ko te ʼofa ʼe faʼa kātaki?
21 Moʼo fakaʼosi, ʼe fakamoʼoni mai kia tatou ko te ʼofa “ ʼe ina kātakiʼi meʼa fuli”. ʼE feala ke ina fai te meʼa ʼaia koteʼuhi ʼe ʼui mai fēnei e te ʼapositolo ko Paulo ia 1 Kolonito 10:13: “ ʼE mole he ʼahiʼahi kua hoko kia koutou neʼe mole hāo ai he tagata, kae ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe koutou lavaʼi tona tali, kae ʼaki te fakahala ʼe ina toe teuteuʼi foki mo tona holaʼaga, ke feala ai hakotou kātakiʼi.” ʼE toe ʼeke anai tatou e te ʼofa ke tou vakaʼi te ʼu tuʼuga faʼifaʼitaki ʼi te Tohi-Tapu, ʼo te kau kaugana ʼa te ʼAtua ʼaē neʼe nātou kātakiʼi, pea ko tanatou pule ko Sesu Kilisito, ohage ko tona fakamanatu mai ia Hepeleo 12:2, 3.
22. ʼI totatou ʼuhiga fānau ʼa te ʼAtua, ko te kalitate māʼoluga fea ʼaē ʼe tonu ke tou tokakaga tuʼumaʼu ʼo fakahā?
22 ʼE moʼoni, ko te ʼofa (agapê) ʼe ko te kalitate takimuʼa ʼaia ʼaē ʼe tonu kia tatou ʼaenī kilisitiano, te kau Fakamoʼoni ʼa Sehova, ke tou gāueʼi te meʼa ʼaē ʼe mole faka ʼuhiga ko te ʼofa mo ʼaē ʼe faka ʼuhiga kiai. ʼI totatou ʼuhiga fānau ʼa te ʼAtua, ʼofa pe ke tou tokakaga tuʼumaʼu ʼo maʼuliʼi te kalitate ʼaia ʼo te fua ʼo te laumālie ʼa te ʼAtua. Manatuʼi e tatou, ko te fai ʼo te faʼahi ʼaia ko te faʼifaʼitaki ki te ʼAtua, koteʼuhi “ko te ʼAtua ʼe ʼofa”.
Kei koutou manatuʼi koa?
◻ E feafeaʼi te fakahā e Sesu Kilisito pea mo Paulo te takimuʼa ʼo te ʼofa?
◻ ʼE mahino feafeaʼi koa ko te ʼofa ʼe mole fuaʼā ia?
◻ E feafeaʼi koa te ʼamo e te ʼofa te meʼa fuli?
◻ He koʼe koa ʼe feala te ʼui ko te ʼofa ʼe molemo puli ʼi he lakaga?
◻ Ko te ʼu ʼaluʼaga lua fea ʼaē ʼe fakafiafia ai te ʼofa mo te moʼoni?
[Talanoa ʼo te pasina 21]
TE ʼOFA (AGAPÊ)
Tona ʼuhiga hāla Tona ʼuhiga tonu
1. ʼE mole fuaʼā 1. ʼE loto faʼa kātaki
2. ʼE mole laupisi 2. ʼE agalelei
3. ʼE mole fialahi 3. ʼE fakafiafia mo te moʼoni
4. ʼE mole aga fakavale 4. ʼE ina maʼu meʼa fuli
5. ʼE mole tokaga pe ki 5. ʼE tui kia meʼa fuli
te meʼa ʼa kita
6. ʼE mole ʼita ia 6. ʼE falala kia meʼa fuli
7. ʼE mole ina tokagaʼi te 7. ʼE ina kātakiʼi meʼa fuli
meʼa kovi ʼaē neʼe fai mai
8. ʼE mole fakafiafia ia ʼi
te heʼe faitotonu
9. ʼE molemo puli ia ʼi he lakaga
[Paki ʼo te pasina 18]
Neʼe fakatō laloʼi ia Nepukanesa e Sehova ʼi tana laupisi.