Kotou ʼOfa Ki Te ʼAtua ʼAē ʼe ʼOfa Kiā Koutou

“ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou laumālie kātoa.”​—Mateo 22:​37, MN.

1, 2. Koteā ʼapē te tupuʼaga ʼaē neʼe lagaʼi ai te fehuʼi ʼaenī: ko te folafola fea ʼaē ʼe lahi tokotahi?

KO TE fehuʼi ʼaē neʼe lagaʼi, lagi neʼe ko he fehuʼi maʼuhiga neʼe fakafihiʼi e te kau Faliseo ʼi te temi ʼo Sesu. ʼI te ʼu lao e 600 tupu ʼaē neʼe natou faʼufaʼu te Lao ʼa Moisese, ko te lao fea ʼaē neʼe maʼuhiga age? Neʼe ko he lao koa neʼe fakamaʼua kiai he sākilifisio? ʼI tona fakahagatonu, neʼe fai te ʼu sākilifisio moʼo maʼu ia te fakamolemole ki te ʼu agahala pea mo fai ni ʼu fakafetaʼi ki te ʼAtua. Peʼe ko te lao ʼaē neʼe maʼuhiga age, lagi ko te lao ʼo ʼuhiga mo te silikosisio? Neʼe toe maʼuhiga foki mo te lao ʼaia, heʼe ko te silikosisio neʼe ko te fakaʼiloga ʼo te fuakava ʼaē neʼe fai e Sehova pea mo Apalahamo.​—Senesi 17:​9-13.

² Tahi ʼaē, lagi ko nātou ʼaē neʼe natou fia taupau te ʼu lao neʼe natou ʼui ʼe maʼuhiga te ʼu lao fuli ʼaē neʼe foaki e te ʼAtua​—logolā ko ʼihi lao lagi neʼe mole faʼa maʼuhiga​—ʼe mole lelei anai hona faka maʼuhiga age ʼi he tahi age ʼu lao. Neʼe fakatotonu e te kau Faliseo ke natou tuku te fihifihia kiā Sesu. Lagi ʼe ina ʼui age anai he meʼa moʼona faka lakahalaʼi ʼo ia totonu pē. Ko te tahi Faliseo neʼe fakaōvi age kiā Sesu pea mo fehuʼi fēnei age: “Ko te folafola fea ʼaē ʼe lahi tokotahi ʼo te Lao?”​—Mateo 22:​34-36, MN.

3. Koteā ʼaē neʼe ʼui e Sesu ʼo ʼuhiga mo te folafola ʼaē ʼe lahi tokotahi?

³ Ko te tali ʼaē neʼe fai e Sesu, ʼe maʼuhiga ʼaupitō kiā tātou iā ʼaho nei. ʼI tana tali, neʼe ina fakatahiʼi te meʼa ʼaē neʼe fakatafito tuʼumaʼu kiai pea ʼe ko te fakatafito tuʼumaʼu pē anai ʼaia ʼo te tauhi moʼoni. Neʼe fakaʼaogaʼi e Sesu ia Teutalonome 6:​5, ʼo ʼui maʼana: “ ‘ ʼE tonu ke ke ʼofa kiā Sehova tou ʼAtua, ʼaki tou loto kātoa, pea mo tou nefesi kātoa, pea mo tou laumālie kātoa.’ Koʼenā te folafola ʼaē ʼe lahi tokotahi pea mo ʼuluaki.” Logolā neʼe fakalavelave pē e te Faliseo ʼo ʼuhiga mo te folafola e tahi, kae ko Sesu neʼe ina foaki age ia te tahi folafola. Neʼe ina fakaʼaogaʼi ia Levitike 19:​18, ʼo ʼui maʼana: “Ko te lua folafola, ʼaē ʼe tatau mo te ʼuluaki, ʼe ʼui fēnei: ‘ ʼE tonu ke ke ʼofa ki tou kāiga ohagē pē ko tau ʼofa kiā koe totonu.’ ” ʼOsi ʼaia, neʼe fakahā age e Sesu ko te ʼu folafola ʼaia e lua neʼe fakatafito kiai te tauhi maʼa. ʼI tana ʼiloʼi ʼaē ʼe natou loto anai ke ina fakahā age te fakahoahoa ʼo te ʼu lao ʼaē ʼe maʼuhiga age ʼi ʼihi age lao, neʼe ina ʼui fakaʼosi age: “Ki te ʼu folafola ʼaia e lua ʼe tautau kiai te Lao kātoa, pea mo te kau Polofeta.” (Mateo 22:​37-40, MN ) ʼI te ʼalatike ʼaenī, ʼe tou vakaʼi anai te folafola ʼaē ʼe lahi tokotahi ʼi te ʼu folafola ʼaia e lua. He koʼe koa ʼe tonu ke tou ʼoʼofa ki te ʼAtua? ʼE feafeaʼi hatatou fakahā totatou ʼofa ʼaē ki te ʼAtua? Pea ʼe tou lava fakatuputupu feafeaʼi ia te ʼofa ʼaia? ʼE maʼuhiga ke tou ʼiloʼi te ʼu tali ki te ʼu fehuʼi ʼaia, heʼe ke leleiʼia tātou e Sehova, ʼe tonu ke tou ʼofa kiā te ia mo totatou loto kātoa, mo totatou nefesi kātoa, pea mo totatou ʼatamai kātoa.

Te Maʼuhiga ʼo Te ʼOfa

4, 5. (a) He koʼe neʼe mole punamaʼuli te Faliseo ki te meʼa ʼaē neʼe ʼui age e Sesu? (b) Ko te meʼa fea ʼaē ʼe maʼuhiga age ki te ʼAtua ʼi te ʼu sākilifisio pea mo te ʼu holokoseta?

⁴ ʼE ʼiloga ia ko te Faliseo ʼaē neʼe ina fakafehuʼi ia Sesu neʼe mole hoha, peʼe mo punamaʼuli ki te tali ʼaē neʼe fai age e Sesu kiā te ia. Neʼe ina ʼiloʼi, ko te koga maʼuhiga ʼo te tauhi moʼoni neʼe ko te ʼofa ʼo te ʼAtua, logolā neʼe tokolahi ia nātou ʼaē neʼe mole natou ʼoʼofa kiā te ia. ʼI te ʼu sinakoka, neʼe ko te agamāhani ia te lau leʼo lahi ʼo te Shema, peʼe ko te faikole Faka Hepeleo, pea neʼe lau ai mo te koga tohi ʼo Teutalonome 6:​4-9, ʼaē neʼe fakaʼaogaʼi e Sesu. Ohagē ko te fakamatala ʼaē ʼe fai e Maleko, neʼe ʼui e te Faliseo kiā Sesu: “Faiako, kua ke ʼui tonu e koe te meʼa ʼaē ʼe moʼoni, ‘ ʼE ko Ia tokotahi pē, pea ʼe mole ʼi ai he tahi age ia te Ia’; pea ko te ʼofa ʼaē kiā te ia ʼaki te loto kātoa pea mo te ʼatamai kātoa pea mo te mālohi kātoa pea mo te ʼofa ʼaē ki te kāiga ohagē pē ko kita totonu, ʼe maʼuhiga ake ia ʼi te ʼu holokoseta pea mo te ʼu sākilifisio fuli.”​—Maleko 12:​32, 33, MN.

⁵ Koia, logolā neʼe fakamaʼua ʼi te Lao te ʼu holokoseta pea mo te ʼu sākilifisio, kae ko te meʼa ʼaē neʼe maʼuhiga tāfito ki te ʼAtua ʼe ko te ʼofa ʼo tana ʼu kaugana. Neʼe maʼuhiga age ki te ʼAtua he pāsele ʼe foaki age ʼaki te ʼofa pea mo he tauhi fakamālotoloto, ʼi he momoli age ʼo he ʼu matuaʼi ʼakeno e lauʼi afe kae mole ʼi ai te ʼofa. (Mikea 6:​6-8) Kotou manatuʼi te hisitolia ʼa te fafine vītua masiva ʼi te fale lotu ʼi Selusalemi ʼaē neʼe talanoa kiai Sesu. Ko te ʼu kiʼi foʼi piesi e lua ʼaē neʼe ina tuku ki te puha tānaki paʼaga neʼe mole pē lā feʼauga moʼo totogi ʼaki he pāsele e tahi. Kae ko te meʼa ʼofa ʼaia ʼaē neʼe foaki kiā Sehova ʼaki he ʼofa kātoa, neʼe maʼuhiga age ia kiā te ia, ʼi te ʼu tuʼuga meʼa ʼofa ʼaē neʼe foaki age e te hahaʼi maʼu koloa ʼi tanatou paʼaga ʼaē neʼe mole loko ʼaoga kiā nātou. (Maleko 12:​41-44) ʼI meʼa fakaloto mālohi hata ʼiloʼi ʼe maʼuhiga ʼaupitō kiā Sehova te meʼa ʼaē ʼe tou lavaʼi fuli logolā totatou ʼu ʼaluʼaga​—totatou ʼofa kiā te ia!

6. Koteā ʼaē neʼe tohi e Paulo ʼo ʼuhiga mo te maʼuhiga ʼo te ʼofa?

⁶ ʼI tana fia fakahā ia te maʼuhiga ʼo te ʼofa ʼi te tauhi moʼoni, neʼe tohi fēnei e te ʼapositolo ko Paulo: “Kapau e au lea ki te u lea a te tagata mo te kau aselo, kae e mole au mau te ofa, e au tatau mo te tagi a te kapa, pe ko te logoaʼa o te simepale. Pea kapau e au mau te meaofa o te talaki fakapolofeta mo te mahino ki te u misitelio fuli, mo te poto fuape, pea kapau e au mau te katoa o te tui, te tui e ina amo te u mouga, kae e mole au mau te ofa pea ko au e ko te mea noa. Kapau e au tufa oku koloa fuape ki te hahai halofia, pea kapau e au tukuʼage toku sino ke tutu anai, kae e mole au mau te ofa, pea e mole hona aoga kia te au.” (1 Kolonito 13:​1-3) ʼE hā lelei, ko te ʼofa ʼe maʼuhiga mo kapau ʼe tou loto ke leleiʼia e te ʼAtua ia tatatou tauhi age kiā te ia. ʼE feafeaʼi hatatou fakahā totatou ʼofa ʼaē kiā Sehova?

Tou Fakahā Totatou ʼOfa ʼAē Kiā Sehova

7, 8. ʼE feafeaʼi hatatou lava fakahā totatou ʼofa ʼaē kiā Sehova?

⁷ Tokolahi ʼe natou manatu, ko te ʼofa ʼe ko he meʼa pē ʼi te loto pea ʼe mole tou lava puleʼi; ʼe talanoa te hahaʼi ki te ʼofa ʼaē mokā kita manako ki he tahi. Kae ko te ʼofa moʼoni ʼe mole ko he meʼa ia ʼe tou logoʼi pē ʼi tota loto. ʼE hā te ʼofa ʼaia ʼi te ʼu aga pea mo fakalogo ki te ʼu gāue ʼaē ʼe kita fai, kae ʼe mole ko he meʼa pē ʼi tota loto. ʼI te Tohi-Tapu ʼe talanoa ki te ʼofa ohagē ko “he ala takimua aupito” pea ohagē he meʼa ʼe tou “fekumi.” (1 Kolonito 12:31; 14:1) ʼE fakaloto mālohiʼi te kau Kilisitiano ke natou ʼofa, pea mole gata pē ʼi “te lea mo te alelo, kae i te u gaue mo te mooni.”​—1 Soane 3:18.

⁸ Ko te ʼofa ʼo te ʼAtua ʼe ina uga tātou ke tou fai ia te meʼa ʼaē ʼe ina leleiʼia, pea mo tou lagolago pea mo faka tapuhā tona ʼuhiga pule faʼitaliha, ʼaki tatatou ʼu palalau pea mo tatatou ʼu gāue. ʼE ina uga tātou ke mole tou manako ki te mālamanei pea mo tana ʼu aga heʼe faka lotu. (1 Soane 2:​15, 16) Ko nātou ʼaē ʼe natou ʼofa ki te ʼAtua, ʼe natou fehihiʼa ki te meʼa ʼaē ʼe kovi. (Pesalemo 97:10) Ko te ʼofa ʼo te ʼAtua, ʼe ina toe fakamaʼua kiā tātou ke tou ʼoʼofa ki totatou tatau, pea ʼe tou vakaʼi anai te faʼahi ʼaia ʼi te ʼalatike kā hoa mai. Koia, ko te ʼofa ʼo te ʼAtua, ʼe ina fakamaʼua mai kiā tātou ke tou fakalogo. ʼE ʼui fēnei ʼi te Tohi-Tapu: “Koʼenī te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu.”​—1 Soane 5:​3, MN.

9. Neʼe fakahā feafeaʼi e Sesu tona ʼofa ʼaē ki te ʼAtua?

⁹ Neʼe fakahā lelei e Sesu ʼi tona maʼuli ia te faka ʼuhiga ʼo te ʼofa ʼaē ki te ʼAtua. Ko te ʼofa neʼe ina uga ia ia ke ina tuku tona nofoʼaga ʼi te lagi kae hifo mai ki te kele ʼo tupu tagata. Ko te ʼofa ʼaia, neʼe ina toe uga ia ia ke ina faka kolōliaʼi tana Tamai ʼaki te ʼu meʼa ʼaē neʼe ina fai pea mo akoʼi. Ko te ʼofa neʼe ina uga ke “fakalogo o kaku ki te mate.” (Filipe 2:8) Ko te fakalogo ʼaia​—ko he faʼahiga fakahā ʼo tona ʼofa​—neʼe ina tofa ai te ala ki te kau agatonu ke natou faitotonu ʼi muʼa ʼo te ʼAtua. Neʼe tohi fēnei e Paulo: “Aki te talagataa a te tagata e tahi [ia Atama] nee [“liliu,” MN ] te tokolahi o agahala; pea e feiape, aki te fakalogo a te tagata e tahi [ia Kilisito Sesu], e [“liliu,” MN ] anai te tokolahi o agatonu.”​—Loma 5:19.

10. He koʼe ko te ʼofa ʼaē ki te ʼAtua ʼe ina fakamaʼua ke tou fakalogo?

¹⁰ Ohagē ko Sesu, tou fakahā totatou ʼofa ʼaki tatatou fakalogo ki te ʼAtua. Neʼe tohi fēnei e te ʼapositolo ʼofaina ʼa Sesu: “Koʼenī te faka ʼuhiga ʼo te ʼofa: ke tou haga haʼele ʼo mulimuli ki tana ʼu fakatotonu.” (2 Soane 6, MN ) Ko nātou ʼaē ʼe natou ʼofa moʼoni kiā Sehova ʼe natou manako ki tana takitaki. ʼE mahino kiā nātou ʼe mole feala hanatou taki ʼāteaina tonatou ʼu ala mai te ʼAtua, kae ʼe natou falala ki te poto ʼo te ʼAtua pea mo fakalogo ki tana takitaki ʼofa. (Selemia 10:23) ʼE natou hagē ko te kau Pelea ʼo te temi muʼa ʼaē neʼe lelei tonatou loto, ʼaē neʼe natou tali te logo ʼa te ʼAtua ʼaki he “fia ʼiloʼi” ʼo te folafola, ʼo natou holi mālohi ke natou fai ia te finegalo ʼo te ʼAtua. (Gaue 17:​11, MN ) Neʼe natou vakavakaʼi lelei te Tohi-Tapu ke lahi age tanatou mahino ki te finegalo ʼo te ʼAtua, pea mo tokoni kiā nātou ke natou fakahā tonatou ʼofa ʼaki he fakalogo lahi.

11. Koteā te faka ʼuhiga ʼo te ʼofa ʼaē ki te ʼAtua mo totatou loto kātoa, mo totatou ʼatamai kātoa, mo totatou nefesi kātoa, pea mo totatou mālohi kātoa?

¹¹ Ohagē ko te ʼui ʼa Sesu, ko te ʼofa ʼaē ki te ʼAtua ʼe fakamaʼua kiai totatou loto kātoa, mo totatou ʼatamai kātoa, mo totatou nefesi kātoa, pea mo totatou mālohi kātoa. (Maleko 12:30) Ko te taʼi ʼofa ʼaia ʼe haʼu mai te loto, tatatou ʼu manatu, mo totatou ʼu holi, pea mo te ʼu meʼa loloto ʼaē iā tātou, pea ʼe tou holi fakamālotoloto ke leleiʼia tātou e Sehova. ʼE tou toe ʼofa foki ʼaki totatou ʼatamai. ʼE mole kivi te ʼofa ʼaē ʼe tou maʼu; ʼe tou ʼiloʼi lelei ia Sehova​—tona ʼu kalitātē, mo tana ʼu lēkula, pea mo tana ʼu fakatuʼutuʼu. ʼE tou fakaʼaogaʼi totatou nefesi, mo totatou ʼulugaaga kātoa pea mo totatou maʼuli moʼo tauhi pea mo fakafetaʼi kiā te ia. Pea ʼe tou fakaʼaogaʼi totatou mālohi ʼo aʼu ki tona gataʼaga.

ʼE Tonu Ke Tou ʼOfa Kiā Sehova

12. He koʼe ʼe fakamaʼua mai e te ʼAtua ke tou ʼofa age kiā te ia?

¹² Ko te tahi tupuʼaga ʼe tonu ke tou ʼofa kiā Sehova, heʼe ina fakamaʼua mai ke tou maʼu tona ʼu kalitātē. Ko te ʼAtua ʼe ko te matapuna pea mo te faʼifaʼitaki māʼoluga ʼo te ʼofa. Neʼe tohi fēnei e te ʼapositolo ko Soane ʼaki te takitaki ʼa te laumālie: “Ko te ʼAtua ʼe ʼofa.” (1 Soane 4:​8, MN ) Neʼe fakatupu te tagata ki te pāki ʼo te ʼAtua; koia neʼe faʼu tātou ke tou ʼofa. ʼIo, ʼe fakatafito ki te ʼofa ia te pule faʼitaliha ʼa Sehova. ʼE ina loto ki tana ʼu hahaʼi fakalogo pē ʼaia ʼaē ʼe tauhi age kiā te ia, koteʼuhi ʼe natou ʼofa pea mo loto ki tana takitaki faitotonu. ʼE mahino ia, ko te ʼofa ʼe maʼuhiga ki te tokalelei pea mo te felōgoi ʼa te ʼu meʼa maʼuli fuli neʼe ina fakatupu.

13. (a) He koʼe neʼe ʼui ki te kau Iselaele: “ ʼOfa kiā Sehova tou ʼAtua”? (b) He koʼe ʼe matatonu ke loto e Sehova ke tou toe ʼoʼofa mo tātou kiā ia?

¹³ Ko te tahi tupuʼaga ke tou ʼofa kiā Sehova, heʼe tou loto fakafetaʼi ki te ʼu meʼa ʼaē neʼe ina fai maʼa tātou. Tou manatuʼi te meʼa ʼaē neʼe ʼui e Sesu ki te kau Sutea: “ ʼE tonu ke ke ʼofa kiā Sehova tou ʼAtua.” Neʼe mole natou ʼoʼofa nātou ki he ʼatua ʼe mamaʼo iā nātou pea ʼe mole natou ʼiloʼi. Neʼe tonu ke natou ʼofa kiā Ia ʼaē neʼe ina fakahā age kiā nātou tona ʼofa. Ko Sehova neʼe ko tonatou ʼAtua. Neʼe ko Ia ʼaē neʼe ina haofaki nātou mai Esipito ʼo fakahū ki te Kele ʼo Te Fakapapau, ia Ia ʼaē neʼe ina puipui nātou, neʼe tokoni kiā nātou, pea mo fakapelepeleʼi nātou, ʼaē neʼe ina akonakiʼi nātou ʼaki te ʼofa. Pea iā ʼaho nei, ko Sehova ʼe ko totatou ʼAtua, ia ia ʼaē neʼe ina foaki mai tona ʼAlo ko he totogi ke feala ai hatatou maʼu te maʼuli heʼegata. ʼE matatonu ke loto e Sehova ke tou toe ʼoʼofa mo tātou kiā ia! Ko totatou ʼofa ʼaē ki te ʼAtua ʼe pipiki ki te maʼua, pea ʼe kole mai ke tou ʼofa ki te ʼAtua ʼaē ʼe ʼofa kiā tātou. ʼE tou ʼofa kiā Ia ʼaē neʼe “uluaki ofa . . . kia tatou.”​—1 Soane 4:19.

14. Ko te ʼu ʼaluʼaga fea ʼaē ʼe hagē te ʼofa ʼo Sehova ko te ʼofa ʼa he tamai peʼe ko he faʼē?

¹⁴ Ko te ʼofa ʼa Sehova ki te mālamanei ʼe hagē ko te ʼofa ʼa he tamai peʼe ko he faʼē ki tana fānau. Logolā tonatou heʼe haohaoa, kae ko te ʼu mātuʼa ʼofa ʼe natou gāue kinakina lolotoga ni ʼu taʼu moʼo pusiaki tanatou fānau, ʼo natou fai ni ʼu sākilifisio lahi ʼi te faʼahi fakasino pea mo ʼihi faʼahi. Ko te ʼu mātuʼa ʼe natou akoʼi tanatou fānau, mo fakaloto mālohiʼi, mo tokoniʼi, mo lagolago, pea mo akonakiʼi nātou koteʼuhi ʼe natou loto ke maʼuli fiafia pea mo tuputupu lelei tanatou fānau. Koteā ʼaē ʼe fakaʼamu kiai te ʼu mātuʼa ʼi tanatou fai ia te faʼahi ʼaia? ʼE natou fakaʼamu ke ʼoʼofa age tanatou fānau kiā nātou pea mo fakaʼaogaʼi lelei te ʼu meʼa ʼaē neʼe natou akoʼi age ke feala hanatou maʼuli fiafia. ʼE mole matatonu koa lā ki tatatou Tamai haohaoa ʼaē ʼe ʼi selō ke ina fakaʼamu ke tou fakahā age he loto fakafetaʼi ʼofa ki te ʼu meʼa fuli ʼaē neʼe ina fai maʼa tātou?

Tou Fakatuputupu Totatou ʼOfa ʼAē Ki Te ʼAtua

15. Koteā te ʼuluaki meʼa ʼe tou fai moʼo fakatuputupu totatou ʼofa ʼaē ki te ʼAtua?

¹⁵ Neʼe heʼeki tou sio mata ki te ʼAtua peʼe tou logo ki tona leʼo. (Soane 1:18) Kae ʼe ina fakaafe tātou ke tou felōgoi ʼofa mo ia. (Sakopo 4:8) ʼE feafeaʼi hatatou lava fai te faʼahi ʼaia? Ko te ʼuluaki meʼa ʼe tou fai ki he tahi ʼe ʼofa, ke tou feʼiloʼiʼaki; ʼe faigataʼa hatatou ʼoʼofa lahi ki he tahi ʼe mole tou ʼiloʼi. Neʼe foaki mai e Sehova tana Folafola, ia te Tohi-Tapu, ke tou ʼiloʼi ai ia ia. Koia lā ʼaē ʼaki tana kautahi, ko Sehova ʼe ina fakaloto mālohiʼi tātou ke tou lau tuʼumaʼu te Tohi-Tapu. ʼE ko te Tohi-Tapu ʼaē ʼe ina akoʼi tātou ʼo ʼuhiga mo te ʼAtua, mo tona ʼu kalitātē, mo tona ʼulugaaga, ʼo feiā mo tana ʼu felōgoi mo te hahaʼi lolotoga ni ʼu taʼu e lauʼi afe. Kā tou metitāsioʼi te ʼu hisitolia ʼaia, ʼe tuputupu anai totatou loto fakafetaʼi pea mo totatou ʼofa ʼaē kiā te ia.​—Loma 15:4.

16. ʼE hikihiki feafeaʼi totatou ʼofa ʼaē ki te ʼAtua ʼi tatatou fakakaukauʼi te minisitelio ʼa Sesu?

¹⁶ Ko he faʼahi maʼuhiga ʼe tou lava fai moʼo fakatuputupu totatou ʼofa ʼaē kiā Sehova, ʼe tonu ke tou fakakaukauʼi te maʼuli ʼo Sesu pea mo tana minisitelio. ʼI tona fakahagatonu, ko Sesu neʼe ina faʼifaʼitakiʼi lelei tana Tamai, ʼo feala ai hana ʼui fēnei: “Ko ae kua mamata kia te au, kua mamata ia ki te Tamai.” (Soane 14:9) ʼE mole malave koa lā iā koutou te manavaʼofa ʼo Sesu ʼi tana toe fakatuʼuake te tama ʼulu tokotahi ʼa te fafine vītua? (Luka 7:​11-15) ʼE mole tou fia fakaōvi koa lā kiā te ia ʼi tata kua ʼiloʼi ko ia​—te ʼAlo ʼo te ʼAtua pea mo te tagata lahi ʼo te ʼu temi fuli​—ʼaē neʼe agavaivai ʼo fufulu te ʼu vaʼe ʼo tana ʼu tisipulo? (Soane 13:​3-5) ʼE mole kotou fia ʼiloʼi koa lā ia ia ʼaē, logolā neʼe lahi age pea mo poto age ʼi te tagata fuli, kae neʼe ina faka faigafua he fakaōvi age kiā te ia ʼo te hahaʼi fuli, ʼo kau ai mo te tamaliki? (Maleko 10:​13, 14) Kapau ʼe tou fakafetaʼi ʼo metitāsio ki te ʼu meʼa ʼaia, ʼe tou hagē anai ko te kau Kilisitiano ʼaē neʼe tohi fēnei kiai e Petelo: “Iaʼia e koutou oʼofa ai, kae nee heeki koutou mamata kia te ia [ia Sesu].” (1 Petelo 1:8) Kapau ʼe tuputupu totatou ʼofa ʼaē kiā Sesu, pea ʼe toe tuputupu mo totatou ʼofa ʼaē kiā Sehova.

17, 18. Koteā te ʼu fakatuʼutuʼu ʼofa ʼa Sehova ʼe tonu ke tou metitāsioʼi ke tou fakatuputupu ai totatou ʼofa ʼaē kiā te ia?

¹⁷ Ko te tahi faʼahi ʼe tou lava fakatuputupu ai totatou ʼofa ʼaē ki te ʼAtua, ʼe ko te metitāsioʼi ʼo te ʼu fakatuʼutuʼu ʼofa ʼaē neʼe ina fai ke tou fakafiafia ai ki te maʼuli​—te matalelei ʼo te ʼu meʼa ʼaē neʼe ina fakatupu, te ʼu meʼa kai lelei kehekehe, te felōgoi lelei mo totatou ʼu kaumeʼa, pea mo te ʼu tuʼuga tapuakina ʼaē ʼe tou fakafiafia ai pea mo feʼauga ai. (Gaue 14:17) Kā lahi te ʼu meʼa ʼaē ʼe tou ako ʼo ʼuhiga mo totatou ʼAtua, pea ʼe toe lahi age mo te ʼu tupuʼaga ʼaē ke tou fakafetaʼi ai ki tona manavaʼofa lahi pea mo tona loto fia foaki. Kotou fakakaukauʼi age muʼa te ʼu meʼa ʼaē neʼe fai e Sehova maʼa tātou takitokotahi. ʼE tuha mo ia ke kotou ʼoʼofa kiā te ia!

¹⁸ ʼI te ʼu tuʼuga meʼa ʼofa ʼaē neʼe foaki mai e te ʼAtua, ʼe ʼi ai te faigamālie ʼaē ke tou fakaōvi age kiā te ia ʼi te faikole ʼi te temi fuli pē, heʼe tou ʼiloʼi ko ia ʼaē “ ʼe fagono ki te faikole,” ʼe fakalogo mai. (Pesalemo 65:2) Neʼe tuku e Sehova ki tona ʼAlo ʼofaina ia te mālohi moʼo takitaki pea mo fakamāu. Kae neʼe mole ina tuku te tuʼulaga ʼaia ki he tahi age, māʼiapē lā mo tona ʼAlo, ke fakalogo ki te ʼu faikole. Ko Sehova totonu ʼaē ʼe fakalogo ki tatatou ʼu faikole. Ko te tokaga ʼofa ʼa Sehova ʼe ina taki ai tātou ke tou fakaōvi age kiā te ia.

19. Ko te ʼu fakapapau fea ʼa Sehova ʼaē ʼe tupu ai tatatou fia fakaōvi kiā te ia?

¹⁹ ʼE tou toe fia fakaōvi kiā Sehova mokā tou tokagaʼi te ʼu meʼa ʼaē neʼe ina fakatuʼutuʼu maʼa te mālamanei. Neʼe ina fakapapau ʼe ina pulihi anai te mahaki, mo te mamahi, pea mo te mate. (Apokalipesi 21:​3, 4) ʼI te temi leva ʼaē kā haohaoa ai te mālamanei, ʼe mole toe ʼi ai anai te mahaki ʼulu, mo te lotovaivai, mo te ʼu tuʼutāmaki. Ko te pakupaku, mo te masiva pea mo te tau ʼe pulihi anai ia. (Pesalemo 46:9; 72:16) ʼE liliu anai te kele ko he palatiso. (Luka 23:43) ʼE ʼaumai anai e Sehova ia te ʼu tapuakina ʼaia, ʼe mole ina fai fakakinau te faʼahi ʼaia, kae ʼuhi heʼe ʼofa kiā tātou.

20. Koteā ʼaē neʼe ʼui e Moisese ʼo ʼuhiga mo te ʼu fua lelei ʼo te ʼofa ʼaē kiā Sehova?

²⁰ Koia, ʼe ʼi ai te ʼu tupuʼaga tāfito ke tou ʼoʼofa ai ki totatou ʼAtua pea mo fakatuputupu totatou ʼofa ʼaia. ʼE kotou haga fakatuputupu anai koa tokotou ʼofa ʼaē ki te ʼAtua ke mālohi age, ʼo kotou tuku ke ina takitaki koutou? ʼE fakalogo te faʼahi ʼaia kiā koutou takitokotahi. Neʼe mahino kiā Moisese te ʼu lelei ʼo te gāueʼi pea mo te taupau ʼo te ʼofa ʼaē kiā Sehova. Neʼe ʼui fēnei e Moisese ki te kau Iselaele ʼo te temi muʼa: “ ʼE tonu ke ke fili te maʼuli ke feala ai hau maʼuli, ia koe pea mo tou hōloga, ʼo ke ʼofa kiā Sehova, tou ʼAtua, ʼo ke fakalogo ki tona leʼo pea mo ke pipiki maʼu kiā te ia, heʼe ko ia tou maʼuli pea mo te loaloaga ʼo tou ʼu ʼaho.”​—Teutalonome 30:​19, 20.

ʼE Kei Kotou Manatuʼi Koa?

• He koʼe ʼe maʼuhiga ke tou ʼofa kiā Sehova?

• ʼE feafeaʼi hatatou lava fakahā totatou ʼofa ʼaē ki te ʼAtua?

• Ko te ʼu tupuʼaga fea ʼaē ke tou ʼofa ai kiā Sehova?

• ʼE tou lava fakatuputupu feafeaʼi te ʼofa ʼo te ʼAtua?