“Ko Te Fili Fakaʼosi” ʼe Lavā Anai!

ʼI TE temi ʼaē neʼe koutou tamasiʼi ai, e lagi neʼe koutou matataku ki te fakapōʼuli. Ko te ʼu hisitolia fakatemonio pea mo ʼihi ʼatu fakamatala ʼe feala ai ke ia koutou he tuʼania lahi. ʼE ko he meʼa fakafimālie mokā ʼe tuku mū e takotou faʼe peʼe ko takotou tāmai te mālama ke feala ai hakotou momoe!

ʼO feiā aipe mo te tokolahi ʼe matataku ki te mate. Kae, ʼe mole tonu ia ke feiā. Koteā tona tupuʼaga? ʼUhi ko te ʼuhiga moʼoni ʼaē ʼo te mate.

Ke koutou ʼiloʼi tokotou fili

Ko te hau poto ʼo Iselaele ko Salomone neʼe ina ʼui fēnei: “Ko te kau maʼuʼuli ʼe nātou ʼiloʼi ʼe nātou mamate anai; kae ko te hahaʼi kua mamate, mole kei nātou ʼiloʼi he meʼa e tahi.” (Tagata Tānaki 9:5). ʼI te manatu ʼa te ʼAtua ʼe koutou maʼu ʼi takotou Tohi-Tapu, ko te mate ʼe ko he fakafeagai ki te maʼuli. Ko te kau mate ʼe nātou liliu ʼo pulinoa.

ʼO talanoa ki te mate ʼi he lea fakatātā, neʼe tohi fēnei e te ʼapositolo ko Paulo: “Mate, ʼe ʼifea tau mālo? Mate, ʼe ʼifea tau ʼakau taki?” Koteā koa te ʼakau taki ʼaē ʼe tupu ai te mate? ʼE tala e Paulo: “Ko te ʼakau taki ʼaē ʼe tupu ai te mate ko te agahala.” (1 Kolonito 15:55, 56; Osea 13:14). Koteā koa te ʼakau taki ʼaē ʼe tupu ai te mate? ʼI te tahi faʼahi ʼo te Tohi-Tapu, ʼe ʼui fēnei e Paulo: “ ʼAki te tagata pe e tahi ko te agahala neʼe hū ki te malamanei, pea ʼaki te agahala te mate, pea ko te mate neʼe mafola leva ki te tagata fuli koteʼuhi ko te hahaʼi fuli kua agahala.” (Loma 5:12). Ko te ʼapositolo ʼe mole ina tuku mai he fakamahalo ʼo ʼuhiga mo tana fakamahino ia “te tagata” ʼi tana ʼui ʼaē: “ ʼAki ia Atama neʼe tupu mai ai te mate.” (1 Kolonito 15:22). ʼIo, ko te talagataʼa ʼo totatou ʼuluaki tāmai, ia Atama, neʼe tou maʼu fuli ai ia te ʼakau taki ʼo te mate. — Senesi 3:1-19.

ʼAki he maʼuli mālōlō pea mo he fīmālie ʼi te famili ʼi he faʼahi tokalelei, ʼe mole he tahi ia tatou ʼe ina fili anai te mate. Kae ohage ko te fakahā mai e te Tohi-Tapu, “ko te ʼu temi pea mo te ʼu meʼa fakafokifā” ʼe feala ke ina pulihi totatou maʼuli (Tagata Tānaki 9:11). Pea, ʼe mole tou ʼiloʼi te meʼa ka hoko anai ki totatou maʼuli ʼi te ʼapogipogi (Sake 4:14). Ko te meʼa pe e tahi ʼe tou ʼiloʼi papau — neʼe tou maʼu fuli ia te agahala pea mo te mate. Koia, ko te mate ʼe ia tatou pea ʼe fakafeagai ohage he fili.

Ko te mate ʼo he tahi neʼe kita ʼofa ai

Ko te mate ʼe ko te fili tāfito mokā hoko ki he tahi ʼe tou ʼofa ai. “ ʼE kovi anai ia kia koe”, ko te ʼui fakaʼosi ʼaia ʼa te fafine ki tona ʼohoana ʼi tana kua vave mate. He koʼe ʼe ina ʼui age feiā? Koteʼuhi ʼe tala fēnei e te Tohi-Tapu: “Ko te meʼa fuli ʼe maʼu ʼe tou nima ke ina fai, fai koe ʼaki tou mālohi, heʼe mole he gāue, he fai puleʼaki, he mālama, he poto ʼi te Seole, [te faitoka fakatahi ʼo te tagata fuli pe], te potu ʼaē ʼe ke ʼalu ki ai.” (Tagata Tānaki 9:10). Ko te kau mate ʼe mole nātou toe mamahi. Kae ko te kavega ʼaē ko te mamahi ʼe tau mo te kāiga pea mo te ʼu kaumeʼa ʼe kei maʼuʼuli. ʼE feala koa hakotou fai he meʼa ʼo ʼuhiga mo te taʼi mamahi ʼaia?

ʼE lahi te ʼu palalau fakaloto fīmālie ʼe tuʼu ʼi te Folafola ʼa te ʼAtua, ia te Tohi-Tapu. Ohage la, ko te lau pea mo te metitasioʼi ʼo te ʼu pesalemo ʼe ko he matapuna moʼoni ʼo te maʼuli fīmālie. ʼIo, ʼe fakaloto mālohi ia te taʼi palalau ʼaē: “Fakafetaʼi kia Sehova ʼaē ʼe ina ʼamo te kavega maʼa tatou ʼi te ʼaho fuli, te ʼAtua moʼoni ʼo totatou hāofakiʼaga.” — Pesalemo 68:19.

Ko te tahi matapuna ʼo te maʼuli fīmālie ʼe ko te kokelekasio faka kilisitiano. ʼI te ʼuluaki sēkulō, neʼe tohi e te ʼapositolo ko Paulo: “Fakaʼapaʼapa ki te ʼu fafine vitua, ia nātou ʼaē ko te ʼu vitua moʼoni. ʼIo, kapau ʼe ʼi ai he fānau ʼa te fafine vitua peʼe ko he ʼu mokopuna, [ʼe feala tanatou tokakaga ki ai ʼi te faʼahi fakasino], ke nātou ako muʼa ʼo maʼuliʼi te aga faka lotu ʼi tonatou loto fale pea mo foaki ʼi te temi fuli pe ki ʼanatou ʼu mātuʼa pea mo ʼanatou ʼu kui te totogi ʼaē ʼe tau mo nātou, heʼe ko te meʼa ʼaia ʼe lelei kia mata ʼo te ʼAtua. Ke tohi ki he lisi he fafine vitua kua taʼu onogofulu, ʼe ʼohoana mo te tagata e tahi, ʼe maʼu te fakamoʼoni ʼo ʼuhiga mo tana ʼu gāue matalelei, mo kapau neʼe ina gaohi he ʼu tamaliki, mo kapau neʼe tali kāiga ki te ʼu matāpule, mo kapau neʼe ina fufulu te ʼu vaʼe ʼo te kau maʼoniʼoni, mo kapau neʼe tokoni kia nātou ʼaē ʼe maʼuʼuli ʼi te mamahi, mo kapau neʼe tokaga tuʼumaʼu ki te ʼu gāue lelei fuli.” (1 Timoteo 5:3, 4, 9, 10). ʼO feiā aipe mo te kau Fakamoʼoni ʼa Sehova ia ʼaho nei ʼe nātou tokoni pea mo fakaloto mālohiʼi te hahaʼi ʼaē ʼe tui.

ʼI te ʼu meʼa ʼaē ʼe tautau hoko, ʼe tonu ke fai ʼe ia ʼaē ʼe mamahi he fakatotonu lahi ʼo ʼuhiga mo te ʼu meʼa ʼaē ʼi tona loto. “Neʼe ʼau ʼofa mamahi ki toku ʼohoana”, ko te tohi ʼaia ʼa te tagata neʼe mate tona ʼohoana kua ʼosi kiai taʼu e lua. “Ko te meʼa ʼaia ʼe fakatupu mamahi ki toku maʼuli, pea ʼi taku manatu ʼe faigataʼa ia tona ʼutaki.” Ko he tahi neʼe nofo ʼohoana lolotoga he temi neʼe ina maʼuliʼi te potu loloto ʼo te ʼu felogoi fakatagata. Kapau ʼe mate he tahi ʼi te taumatuʼa, ko ia ʼaē ʼe kei maʼuli ʼe ina logoʼi leva te meʼa maʼuhiga ʼaē kua puli. Ko ai koa ʼaē ʼe feala ke haga ki ai moʼo maʼu ʼo he tokoni?

ʼI te ʼu taʼi ʼaluʼaga ʼaia, ko te ʼu kaugā fagona kilisitiano lelei ʼe feala ke fakatupu lotomālohi. “Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tēhina neʼe fānauʼi ki te temi ʼaē ʼe hoko ai te mamahi”, ko te ʼui ʼaia ʼa te tāʼaga lea (Tāʼaga Lea 17:17). Ko he tagata vitua peʼe ko he fafine vitua ʼe ʼaoga ke tokoniʼi — ko te ʼu kaumeʼa ʼe nātou foaki ia te tokoni lelei. Ko te ʼu kaumeʼa agapoto ʼe nātou fakaloto mālohiʼi he tahi ke palalau, tatau aipe peʼe tagi. E lagi ko he kilisitiano kua tau mo te mamahi pea mo te lotovaivai ʼi te mate ʼo tona hoa ʼe feala ke ina foaki he tokoni manavaʼofa. “Ke ia koutou he ʼu palalau fakafimālie kia nātou ʼaē ʼe mamahi”, ko te tokoni mai ʼaia ʼa te Tohi-Tapu (1 Tesalonika 5:14). Kae koutou manatuʼi ko te ʼu tagata vitua pea mo te ʼu fafine vitua ʼe nātou logoʼi te puli ʼo tonatou hoa. Koia ko nātou ʼaē ʼe mamahi ʼe tonu anai ke nātou palalau ki niʼihi mokā ʼe faka fealagia e te ʼu ʼaluʼaga ke nātou taupau he aga maʼa. — 1 Petelo 2:12.

Ko te tokoni ʼaē ʼe lelei ʼi te mamahi ʼuhi ko te mate ko te nofo maʼumaʼua ʼo tokoni ki niʼihi — ʼe ko he meʼa ia ʼe mole faigafua kia nātou fuli ʼaē ʼe ʼui maʼa nātou ʼe ʼaoga kia nātou he tokoni! Ko te agaʼofa ʼe maʼuhiga. ʼAki te agaʼofa ʼe tonu ke fai he ʼu meʼa ʼe ʼaoga moʼo tokoni ki niʼihi ke puli ia nātou te mamahi pea mo te lotovaivai, neʼe ʼui e Sesu: “ ʼE lahi age te manuʼia ia ʼo tata foaki ʼi ʼaē ia ʼo tata tali.” — Gāue 20:35.

Ko te mālo ʼi te mate

Ko te mataʼi kai ʼo he foʼi pī ʼe feala ke mamahi, mo fakatupu tuʼutāmaki. Kae ʼi te agamāhani, ko te toʼo ʼo te talaʼi pī ʼaē neʼe loloto tana hū ki tokotou kili ʼe ina foaki atu anai he fīmālie. Kae koteā te ʼu ʼamanaki ʼe fai moʼo fakafimālieʼi ʼo te foʼi huki ʼaē ʼe feala ai te mate?

ʼI tana ʼosi fakahā ko te agahala ʼaē ʼe tupu ai te mate, ʼe tala e Paulo: “Fakamālo ki te ʼAtua, ʼi tana foaki mai kia tatou te mālo ʼaki totatou ʼAliki ko Sesu Kilisito!” (1 Kolonito 15:57). E feafeaʼi te mālo ʼi te mate ʼaki ia Kilisito? Neʼe fakahā e Sesu ko te meʼa ʼaia ʼe hoko ʼi tana ʼui ʼo ʼuhiga mo ia totonu: “Ko te Foha ʼo te tagata, neʼe mole haʼu ke tauhi ia ia, kae ke tauhi pea mo ina foaki tona maʼuli ko he totogi moʼo fetogi ʼaki ʼo te tokolahi.” (Mateo 20:28). ʼIo, ʼo ʼuhiga mo nātou ʼaē ʼe haga tui ki te ʼAlo ʼo te ʼAtua, ia Sesu Kilisito, pea mo te sakilifisio ʼaē neʼe fakatuʼutuʼu e Sehova ʼo ʼuhiga mo ia, ko te mate ʼaē mai ʼa Atama ʼe pulihi anai ʼo talu ai. — Soane 3:16.

ʼIo ʼe fakaloto mālohi te ʼu palalau ʼaenī ʼa Sesu: “ ʼE hoko mai te hola ʼaē ʼe ko nātou fuli ʼe nonofo ʼi te loto faitoka ʼe nātou logo anai ki tona leʼo, pea nātou hū mai anai ki tuʼa, ko nātou ʼaē neʼe nātou fai te ʼu meʼa lelei, ko te fakatuʼuake ki te maʼuli, ko nātou ʼaē neʼe nātou fai te ʼu meʼa ʼaē ʼe kovi, ko te fakatuʼuake ki te fakamāu.” — Soane 5:28, 29.

ʼI te ʼu sēkulō ʼaē kua hili, neʼe fakakikite e te polofeta ʼa te ʼAtua ko Isaia: “ ʼE ina [Sehova ʼAtua] fakaʼauha moʼoni anai te mate ke talu ai, pea ʼe ko totatou Tuʼi ʼAliki ʼaē ko Sehova ʼe ina haga anai ʼo holoholoʼi te ʼu loʼimata ʼi te ʼu fofoga fuli pe.” (Isaia 25:8). ʼO toe fakahā e te Tohi-Tapu ia Fakahā 21:4, te ʼu ʼamanaki fakafiafia: “Ko te [ʼAtua] ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.” ʼI te fakaloto mālohiʼi ʼonatou e te ʼamanaki faka tohi-tapu ʼo ʼuhiga mo nātou ʼaē ʼe takokoto ʼi te mate, ko nātou ʼaē ʼe mamahi ʼe mole tonu ke nātou “lotomamahi ohage ko nātou ʼaē ʼe mole honatou falalaʼaga”. — 1 Tesalonika 4:13.

Vakaʼi fakalelei pe koteā te meʼa neʼe fakatuʼutuʼu e te ʼAtua maʼa te malamanei, ohage ko tona tuʼu ʼi te Tohi-Tapu. Ko te “mamahi lahi” ko tona ʼuhiga ko te tautea ʼo te faʼahiga meʼa ʼo te tuʼu ʼaenī (Fakahā 7:14). Ko nātou ʼaē ʼe kau ki te lotu loi ʼe nātou talitali ki tonatou fakaʼauha. Ko te ʼu faʼahiga meʼa fakakoloa pea mo te holi fakavale ʼi te faʼahi faka politike ʼe nā fakatupu ia te hoge pea mo te tau ʼaē ka pulihi. Ko Sesu Kilisito ka ina lī ki te fakapōʼuli ia Satana te Tevolo, ʼaē neʼe ina fakatupu te mate ʼa te hahaʼi. Pea kamata hau ia Kilisito ia taʼu e afe, lolotoga te temi ʼaia ʼe ina fakahoko anai te maʼuhiga ʼo tona sakilifisio ki te malamanei. Ko te kau mate ʼaē neʼe falala ki te toe tuʼuake ʼe fakatuʼuake nātou, pea ʼi te gigila age ʼo te Folafola ʼo te ʼAtua, ʼe pulihi ʼosi ai te ʼu mataku ki te mate, ia te fili ʼo te malamanei. Pea ko nātou ʼaē ʼe maʼuʼuli ʼe nātou maʼu anai te fealagia ʼaē ko te akoʼi ʼo te ʼu ala ʼo te ʼAtua pea mo mulimuli ki tana ʼu lekula faitotonu. — Tāʼaga Lea 4:18; Gāue 24:15; Hepeleo 2:14, 15; Fakahā 18:4-8; 19:19-21; 20:1-3.

‘Pea, ko te fakaʼosi’, ko te ʼui ʼaia ʼa Paulo, ‘mokā tuku anai e Kilisito te puleʼaga ki tona ʼAtua pea mo Tāmai. ʼE tonu ke hau ʼo aʼu ki te temi ʼaē ka tuku ai e te ʼAtua tona ʼu fili ki ʼona ʼu lalo vaʼe. Pea ko te fili fakaʼosi, ia te mate ʼe pulihi anai ʼo talu ai’. (1 Kolonito 15:24-26.) Ko te ʼu mahaki ʼuhi ko te agahala ʼa Atama ʼe pulihi ʼosi ia. ʼI te ʼahiʼahi fakaʼosi ka hoko, ko nātou ʼaē ʼe ʼoʼofa ki te ʼAtua ʼe nātou ʼōmai kia ia ʼi te agatonu (Fakahā 20:4-10). ʼO nātou maʼu te maʼuli haohaoa, ko te ʼu hahaʼi fakalogo ʼaia ʼe maʼuʼuli, ʼo mole gata pe ʼi he ʼu taʼu e fitugofulu peʼe teau hogofulu, kae ʼo tuʼumaʼu. Ko he toe meʼa ʼofa ʼe haʼu mai te ʼAtua pea mo tona ʼAlo ʼofaina! — Loma 6:23.

Pea, ko temi koa e fia ʼe koutou fia maʼuʼuli ai? Ko te loaloaga ʼo takotou maʼuli ʼe feala ia ke heʼegata. Ko takotou maʼuli ohage ko takotou fai ʼi te temi ʼaenī “te temi fakamuli”, ʼe feala anai ke ʼaua naʼa koutou mamate (Taniela 12:4; Soane 11:25, 26; 17:3). Kapau ʼe koutou fai te finegalo ʼo te ʼAtua, ʼe feala ke koutou maʼuli totonu ʼi te mālama foʼou ʼaē neʼe ina fakapapau mai. — 2 Petelo 3:13.

Kapau kua koutou matutuʼa, ʼe ʼaoga ke koutou fakatokagaʼi ia te fealagia ʼaē ʼo te mate. ʼIo, ko te ʼamanaki ki te toe tuʼuake ʼe fakatupu fiafia. Kae e lagi ʼe punamaʼuli ʼi te fakatuʼutuʼu anai e Sehova he maʼuli famili fīmālie ʼi te mālama foʼou ʼo te ʼu faʼahiga meʼa ʼo te tuʼu ʼaenī. Ke ʼaua naʼa koutou fakamamaʼo te taʼi meʼa ʼaia ʼe ʼaoga kia koutou, ko te finegalo ʼo Sehova, ko te foaki ʼo te fiafia heʼegata kia nātou fuli ʼaē ʼe agatonu ki ai.

Ohage ko te ʼu palalau ʼaenī ko “te ʼu ʼaho fakamuli” ʼo te tuʼu agakovi ʼa Satana ʼe hoholo atu tana gāue, ke ʼaua naʼa koutou tuku te manavasiʼi ʼaē ki te mate ke ina toʼo ia koutou te pilivilesio ʼaē ko te kaugana kia Sehova ʼaki te faitotonu ʼi te temi nei (2 Timoteo 3:1). Kapau ʼe mate he tahi ʼe koutou ʼoʼofa ki ai, koutou fakafiafia ʼuhi ko te mate ʼe faka temi pe (Fakahā 20:13, 14). Koutou falala ki te ʼamanaki ʼo te toe tuʼuake. Koia, peʼe koutou fakalaka maʼuli ʼi te toe mamahi lahi pea koutou hū ki te mālama foʼou peʼe ʼi te toe fakatuʼuake, ʼe koutou fakafiafia ki te fakapapau ʼaē ʼo ʼuhiga mo te mate, te fili fakaʼosi, ʼe tonu ke fakaʼauha. — Fakahā 7:9, 14.

[Paki ʼo te pasina 5]

Ko te ʼu kaugā fagona faka kilisitiano ʼaē ʼe lelei ʼe feala ke fakaloto mālohi kia ia ʼaē ʼe mamahi.

[Paki ʼo te pasina 7]

Ko te nofo maʼumaʼua ʼo tokoni ki niʼihi ʼe ina fakasiʼisiʼi te mamahi ʼaē neʼe tupu mai te mate ʼo he tahi ʼe tou ʼofa ai.