ʼE Pulihi Feafeaʼi Anai Ia Te Mate?
ʼE TOU agahala mo mamate fuli ʼuhi ko te talagataʼa ʼo ʼatatou ʼuluaki matuʼā, ia Atama mo Eva. Kae ʼe heʼeki fetogi te fakatuʼutuʼu ʼa te ʼAtua ʼo ʼuhiga mo te tagata. Ko te manatu ʼaia ʼae neʼe tau fakaha e te ʼAtua ʼi tana Folafola, te Tohi-Tapu.
“E mau anai e te kau agatonu te fenua, pea e natou nonofo anai i ai o heegata.”—Pesalemo 37:29.
“E ina folo anai te mate o talu osi, pea e holoholoi anai e te Aliki, te Eteleno, te u loimata ia mata fuli.”—Esaia 25:8.
“Ko te fili fakamuli, ia te mate, ʼe pulihi anai ia.”—1 Kolonito 15:26.
“ ʼE mole toe ʼi ai anai te mate, mo te putu, mo te lauga pea mo te mamahi.”—Fakaha 21:4.
Kae ʼe pulihi feafeaʼi anai e te ʼAtua ia te mate? ʼE ui ʼi te Tohi-Tapu ʼe maʼuʼuli anai ia te kau agatonu ʼi te kele ki te heʼe gata. Kae ʼe toe ui ai pe “e mole mau i te kele he tagata agatonu e tahi ae e ina fai te lelei.” (Ekelesiasi 7:20) Ko tona ʼuhiga koa ʼe mole toe fakamaʼua mai anai e te ʼAtua ke tou mulimuli ki ʼana pelesepeto? ʼE ina fakafealagia mai koa ke tou maʼu ia te maʼuli heʼe gata logo pe la ʼe tou agahala? Kailoa. ʼE mole fai anai e te ʼAtua ia te faʼahi ʼaia koteʼuhi ‘ ʼe mole feala ia ke loi.’ (Tito 1:2) Kae kotea la ʼae ka ina fai ke hoko ai tana fakatuʼutuʼu ki te tagata?
ʼE PULIHI ANAI E TE ʼATUA IA “TE MATE O TALU OSI.”—ESAIA 25:8
NEʼE INA FOAKI HE TOTOGI
Neʼe fai e Sehova ʼAtua he fakatuʼutuʼu ʼofa ke puli ai ia te mate. Neʼe ina foaki ia he totogi. Kotea ia te totogi? ʼI te agamahani ʼe ko he vaega falā peʼe ko he koloa ʼe foaki ki he tahi moʼo totogi ʼaki he maʼua. Pea mai tona aluʼaga ʼae ʼe agahala mo mamate ia te hahaʼi fuli, ʼe ui ʼi te Tohi-Tapu: “E mole pe feala ke totogi e he tagata he tahi tagata, pee ke foaki e he tagata ki te Atua te totogi o tona laumalie. Koteuhi e mamafa osi te totogi o onatou laumalie, pea e mole feala ke hoko te mea aena i he aho.”—Pesalemo 49:8, 9.
ʼE mate he tagata mo ʼana agahala ʼa ia totonu. ʼE mole ina lava haofaki ia ia peʼe ko he tahi age kilisitiano mai te mate. (Loma 6:7) Koia neʼe tonu ke sakilifisioʼi e he tahi tona maʼuli haohaoa moʼo totogi ʼaki ʼatatou agahala.—Hepeleo 10:1-4.
Koʼena la te fakatuʼutuʼu ʼae neʼe teuteuʼi e te ʼAtua. Neʼe ina momoli ifo tona ʼAlo ko Sesu ʼae neʼe ʼi selo ke tupu tagata ʼi te kele. Pea neʼe haohaoa ia Sesu. (1 Petelo 2:22) Koia neʼe ui tonu e Sesu neʼe ina “foaki tona maʼuli ko he totogi maʼa te tokolahi.” (Maleko 10:45) Neʼe ina totogi ai ʼatatou agahala mo ina fakaʼateainaʼi tatou mai te mate.—Soane 3:16.
KO ʼAFEĀ KOA ʼAE KA PULI AI IA TE MATE?
Kua hoko moʼoni ia ʼaho nei te lea fakapolofeta ʼo te Tohi-Tapu. ʼE tou lolotoga maʼuʼuli nei ʼi “he ʼu temi makehe pea mo faigataʼa.” ʼE tou iloʼi ʼe ko “te ʼu ʼaho fakamuli” ʼo te malama agakovi ʼaeni. (2 Timoteo 3:1) Pea ʼe hoko anai “te ʼaho ʼo te fakamau pea mo te fakaʼauha ʼo te hahaʼi aga heʼe lotu.” (2 Petelo 3:3, 7) ʼE mole fakaʼauha anai te hahaʼi ʼae ʼe ʼoʼofa ki te ʼAtua kae ʼe natou maʼu anai “te maʼuli heʼe gata.”—Mateo 25:46.
Neʼe haʼu ia Sesu ʼo “foaki tona maʼuli ko he totogi maʼa te tokolahi.”—Maleko 10:45
ʼE fakatuʼuake anai te toko lauʼi miliona hahaʼi neʼe kua mamate ʼo feala ke natou maʼu ia te maʼuli heʼe gata. Neʼe fakatuʼuake e Sesu te tama ʼulu tokotahi ʼo te fafine vitua ʼi te kolo ʼo Naini. “Neʼe ʼofa mamahi” ia ki ai pea neʼe ina toe fakamaʼuli ake. (Luka 7:11-15) Neʼe ui fenei e te apositolo ko Paulo: “ ʼE au falala ki te ʼAtua . . . ʼe ʼi ai anai he fakatuʼuake ʼo te kau faitotonu pea mo te kau heʼe faitotonu.” ʼE ko te ʼamanaki ʼaia ʼe foaki mai e te ʼAtua, pea ʼe ha ai ia tona ʼofa ʼae kia tatou.—Gaue 24:15.
ʼE maʼu anai e te toko lauʼi miliale hahaʼi ia te fealagia ʼae ke natou maʼuʼuli ʼo heʼe gata. ʼE ui ʼi te Tohi-Tapu: “E mau anai e te kau agatonu te fenua, pea e natou nonofo anai i ai o heegata.” (Pesalemo 37:29) ʼE natou sisio tonu anai ki te hoko ʼo te ʼu palalau ʼae neʼe fai e te apositolo ko Paulo kua hili ki ai taʼu ʼe 2 000: “Mate, ʼe ʼifea tau malo? Mate, ʼe ʼifea tou kafokona?” (1 Kolonito 15:55) ʼE puli anai ia te mate ʼo talu ai!