Te ʼu Fehuʼi ʼa Te Kau Lautohi
ʼI te temi ʼaē neʼe kakai ai te kau solia ʼa Saulo ki te kanoʼi manu ʼaki te toto, he koʼe koa neʼe mole matehi ia nātou, koteʼuhi neʼe ko te fakatūʼa neʼe tuʼu ʼi te Lao ʼa te ʼAtua?
Ko te ʼu tagata ʼaia neʼe nātou holoʼi te lao ʼa te ʼAtua ʼo ʼuhiga mo te toto, kae lagi neʼe fakamolemole age kia nātou koteʼuhi neʼe nātou fakaʼapaʼapa ki te toto, logo aipe neʼe tonu ke lahi age te fakaʼapaʼapa ʼa nātou ki te faʼahi ʼaia.
Koutou fakakaukauʼi te ʼaluʼaga ʼaē neʼe hoko ai te faʼahi ʼaia. Ko te kau Iselaele ʼaē neʼe takitaki e te Hau ko Saulo pea mo tona foha ko Sonatane neʼe nātou tau mo te kau Filisitini. ʼI te tahi lakaga ʼi te temi ʼaē “neʼe mamahi lahi ai te kau tagata ʼo Iselaele” ʼi te tau, neʼe fakatuʼu e Saulo te fuakava neʼe mole fakakaukauʼi neʼe mole tonu ke kakai ʼana ʼu hahaʼi ʼo aʼu ki te lavā ʼo te kau fili. (1 Samuele 14:24) Neʼe mole tuai pea neʼe malaga te fihifihia ʼi te fuakava ʼaē neʼe ina fakatuʼu.
Ko ʼana ʼu hahaʼi neʼe nātou mālo ʼi te tau ʼaē neʼe faigataʼa, kae neʼe ko te faiga mālohi ʼaia neʼe fakatupu kovi. Neʼe nātou pakupaku pea mo gaʼegagaʼe. Koteā te meʼa neʼe nātou fai ʼi tanatou kaku ki te ʼaluʼaga ʼaia? “Neʼe kamata ʼoho fakavale te hahaʼi ki te ʼu meʼa ʼaē neʼe maʼu, pea neʼe nātou toʼo te ʼu ōvi pea mo te ʼu manu lalahi pea mo te ʼu manu liliki, pea neʼe nātou tāmateʼi ki te kele, pea ko te hahaʼi neʼe nātou kakai ʼaki te toto.”—1 Samuele 14:32.
Neʼe ko he holoʼi ia ʼo te lao ʼa te ʼAtua ʼo ʼuhiga mo te toto, ohage ko tana ʼui age e ʼihi hahaʼi ʼa Saulo: “Koʼeni! Ko te hahaʼi ʼe nātou agahala kia Sehova, ʼi tanatou kai ʼaē ʼaki te toto.” (1 Samuele 14:33) ʼIo, neʼe ʼui e te Lao ka tāmateʼi he ʼu manu, neʼe tonu ke fakaʼalu te toto ʼi muʼa ʼo te kai ʼo te kanoʼi manu. Neʼe mole fakaʼui ia e te ʼAtua ke fai he ʼu fakatuʼutuʼu mamafa ʼo ʼuhiga mo te liligi ʼo te toto. ʼAki tanatou toʼo ʼo he ʼu fakatuʼutuʼu fakapotopoto ʼo ʼuhiga mo te faʼahi ʼaia, neʼe feala ai ke fakahā e tana ʼu kaugana he fakaʼapaʼapa ki te ʼuhiga ʼo te toto. (Teutalonome 12:15, 16, 21-25) Neʼe feala ke fakaʼaogaʼi te toto ʼo te ʼu manu ki te ʼu sakilifisio ʼi te ʼaletale, kae neʼe mole tonu ia ke kai. Ko he maumauʼi ʼo te lao ʼaki te loto katoa neʼe ko te fakatūʼa ki te mate, koteʼuhi neʼe ʼui fēnei ki te hahaʼi ʼa te ʼAtua: “ ʼE mole tonu anai ke koutou kai ki te toto ʼo he kanoʼi manu, koteʼuhi ko te nefesi ʼo te kanoʼi manu fuli pe e ʼi tona toto. Ko ʼaē ka ina kai anai kiai ʼe matehi anai ia.”—Levitike 17:10-14.
Neʼe haga koa te kau solia ʼa te Hau ko Saulo ʼo maumauʼi te Lao ʼaki tonatou loto katoa? Neʼe nātou meʼa noaʼi katoa koa te lao fakaʼatua ʼo ʼuhiga mo te toto?—Vakaʼi ia Faka au 15:30.
ʼE mole tonu ke tou manatu feiā. ʼE fakamatala fēnei neʼe nātou ‘tāmateʼi te ʼu manu ki te kele, pea neʼe nātou kai ki te toto.’ Koia neʼe lagi nātou faigaʼi ke nātou fakaʼalu te toto. (Teutalonome 15:23) Kae ʼi tanatou gaʼegagaʼe pea mo pakupaku, neʼe mole nātou tautau te ʼu manu ʼaē neʼe tāmateʼi pea mo nātou tuku he temi feʼauga moʼo fakaʼalu lelei ʼo te toto. Neʼe nātou matehi te ʼu ōvi pea mo te ʼu manu lalahi “ki te kele,” ʼaē neʼe feala ai ke fakatuatuai te fakaʼalu ʼo te toto. Pea neʼe nātou foimo tuʼusi te ʼu koga ʼo te ʼu manu ʼaē neʼe lagi tuku ʼi te toto. Koia, tatau aipe peʼe ʼi tanatou manatu neʼe nātou talagafua ki te lao ʼa te ʼAtua, neʼe mole nātou mulimuli ki te ʼu aga ʼaē neʼe tonu ke fai ʼo feiā mo te temi feʼauga ʼaē ki te fakaʼalu ʼo te toto.
Ko te meʼa ʼaē neʼe hoko, ʼaē “ko te hahaʼi neʼe nātou kakai ʼaki te toto,” neʼe ko he agahala ia. Neʼe fakamoʼoni e Saulo te faʼahi ʼaia pea neʼe ina fakatotonu ke fuli age he foʼi maka lahi. Neʼe ina fakatotonu ki te kau solia: “Koutou fakaōvi mai kia te ʼau takitahi tana vitulo pea mo takitahi tana ōvi, pea ʼe tonu anai ke koutou tāmateʼi ʼi te koga meʼa ʼaenī pea mo kai kiai, pea ʼe mole tonu anai ke koutou agahala kia Sehova, ʼo koutou kai ʼaki te toto.” (1 Samuele 14:33, 34) Ko te kau solia ʼaē neʼe nātou lākahala neʼe nātou fakalogo kiai, pea “neʼe fakatuʼu e Saulo te ʼaletale kia Sehova.”—1 Samuele 14:35.
Ko te tāmateʼi ʼo te ʼu manu ʼi te maka neʼe lagi fakatupu ai he fakaʼalu lelei ʼo te toto. Neʼe tonu ke kai te kanoʼi manu ʼaia ʼi he tahi age koga meʼa, ʼi tuʼa atu ʼo te koga meʼa ʼaē neʼe hoko ai te matehi ʼo te ʼu manu. Neʼe lagi fakaʼaogaʼi e Saulo he koga ʼo te toto ʼaē neʼe liligi, ki he toʼotoʼoga ʼi te ʼaletale, ko te kumi ʼaia ʼo te fakamolemole ʼa te ʼAtua maʼa nātou ʼaē neʼe agahala. ʼE ʼiloga ia neʼe fakahā e Sehova tona manavaʼofa, koteʼuhi neʼe ina ʼiloʼi te ʼu faiga ʼa te kau solia logo aipe tanatou gaʼegagaʼe pea mo tanatou pakupaku. Neʼe lagi toe fakatokagaʼi foki e te ʼAtua te fuakava mamafa ʼaē ʼa Saulo ʼaē neʼe ina taki ai tana ʼu hahaʼi ki he ʼaluʼaga faigataʼa ʼaupito.
ʼE fakahā mai e te fakamatala ʼaenī ko he ʼaluʼaga neʼe mole kita ʼamanaki kiai ʼe mole ko he takuʼaki moʼo meʼa noaʼi ia te lao fakaʼatua. ʼE tonu foki ki te faʼahi ʼaia ke toe tokoni mai kia tatou ke tou mahino ki te ʼaoga ʼaē ʼo he fakakaukau fakapotopoto ʼi muʼa ʼo he fai ʼo he fuakava, koteʼuhi ko he fuakava mamafa ʼe feala ke ina fakatupu ai he ʼu fihifihia kia tatou takitokotahi ʼo feiā pe mo ʼihi.—Tagata Tānaki 5:4-6.