Te Tuʼania Ki Te Nukeleʼea—ʼE Toʼo Anai ʼo Talu Ai ʼOsi!
KO TE maʼuli ʼaē ʼi te mataku mate ʼe mole ko te meʼa ia ʼaē ʼe loto kiai te ʼAtua ʼo ʼuhiga mo te tagata. ʼI tona ʼuhiga “ ʼAtua fiafia,” ʼe ina toe loto pe foki ke maʼuli te tagata ʼi te tokalelei pea mo te fīmālie—ko tona fakanounou pe, ke maʼuli fiafia. (1 Timoteo 1:11) ʼI he mālama ʼe lahi ai te tuʼania ʼo ʼuhiga mo te nukeleʼea, ʼe mahino ia ʼe mole ko he meʼa ʼe feala.
“Te Tokalelei Pea Mo Te Fīmālie”—Loi
ʼE mahino ia, ko te tuʼania ʼo ʼuhiga mo te nukeleʼea ʼe mole heʼeki ōviōvi ia ke puli. Kae, logope la te ʼu faigataʼaʼia faka politike, faka ekonomike, pea mo faka sosiale, ʼe hage ia ʼe loto falala pe te ʼatu puleʼaga ʼi hona ʼaluʼaga lahi. Moʼo fakaleluʼi te tuʼania ʼaia ko he manatu tahi neʼe ʼiloga lelei talu mai te taʼu 1986, ʼaē neʼe ʼui e te O.N.U. ko te Taʼu ʼo Te Tokalelei Ki Te ʼAtu Puleʼaga.
ʼI te lolotoga ʼo te ʼu taʼu ʼaenī e hogofulu kua hili, neʼe toe fakaholomuli e te tohi (The Bulletin of the Atomic Scientists) te hola ʼo te fakamāu fakaʼosi—ko tana faʼahiga fai ʼaia moʼo fakahā te feala ʼaē ke hoko he tau faka nukeleʼea—mai te ʼu minuta e 3 ʼaē neʼe kei toe ki te māʼupō kua toe liliu ki te toe 17 ki te māʼupō. ʼI te taʼu 1989 neʼe fakatokagaʼi fēnei e te Kautahi ʼo Stockholm ʼAē ʼe Faiga ki te Tokalelei ʼo te ʼatu Puleʼaga “ ʼe mole ʼi ai he taʼu talu mai te fakaʼosi ʼo te Lua Tau Faka Malamanei ʼe lelei age ʼi te taʼu ʼaenī moʼo fakatafito kiai te ʼamanaki ʼaē ke maʼu he puleʼaki tokalelei ki te tau.”
ʼI te ʼu taʼu pe ʼaenī kua hili ko te Kautahi ʼo te ʼatu ʼu Puleʼaga ʼaē neʼe Fakatahiʼi neʼe maʼua foki ke ina maʼu he ʼu puleʼaki ki te ʼu fenua ʼaē neʼe tau hoko ai te ʼu tau. Ko tana mālo, māʼiape la mo kapau neʼe mole katoa, neʼe feʼauga pe ia moʼo faka mafola he loto falala ʼi hona ʼaluʼaga lahi. Ko te ka haʼu e lagi ina toe ʼaumai pe anai he ʼu meʼa foʼou pea mo he tahi age ʼu mālo. Ko te ʼu kalaga ʼo ʼuhiga mo te “tokalelei pea mo te maʼuli fīmālie” ʼe liliu anai ʼo mālohi age pea mo maʼuhiga age. ʼE feala pe ke ʼāsili age tanatou maʼu te falala ʼa te hahaʼi.
Kae ke koutou tokakaga! ʼE fakatokagaʼi mai e te Tohi-Tapu: “Ka nātou ʼui anai: ‘Tokalelei pea mo fīmālie,’ pea ʼe tonu anai ke hoko fakafokifā he fakaʼauha kia nātou, ohage ko te ʼu nunuʼa ʼo te tuʼania ki te fafine; pea ʼe mole nātou hāo anai.” Koia la ʼaē, ko te ʼu kalaga “tokalelei pea mo fīmālie” ʼe nātou fakaʼiloga anai te temi ʼaē ʼe tonu ai ki te ʼAtua ke ina “fakaʼauha ia nātou [ʼaē ʼaki te ʼu meʼa kona, te ʼu ʼotaʼota faka nukeleʼea] ʼaē ʼe nātou fakaʼauha te kele.”—1 Tesalonika 5:3, 4; Fakahā 11:18.
Koutou fakatokagaʼi ʼi henī ʼe mole ʼui e te Tohi-Tapu ʼe fakahoko anai e te ʼu puleʼaga “te tokalelei pea mo te fīmālie.” ʼE hage anai ʼe nātou faifaitahi ʼi tanatou talanoa kiai, ʼo fakahā he loto falala pea mo he lotomālohi ʼe mole heʼeki ʼi ai hona fakatatau. Ko te ʼu fealagia ʼaē moʼo fakahoko te tokalelei pea mo te fīmālie ʼe hage mai anai kua fakaōviōvi pe tona hoko. Logope la te hoholo ʼo te tuʼania ʼo ʼuhiga mo te nukeleʼea, ʼe māʼumoea anai te ʼu puleʼaga ʼi he faʼahiga tokalelei loi.
Kae, ko te kau Kilisitiano moʼoni, ʼe mole fakahalaʼi anai nātou. ʼAki he lototokaga ʼe loloto ʼaupito ʼe nātou sisio anai ki he meʼa ʼe laka age ʼi te tokalelei pea mo te fīmālie fakatagata!
“Te Tokalelei Pea Mo Te Fīmālie”—Moʼoni
ʼO mulimuli pe ki te Pesalemo 4:8, ko te tokalelei pea mo te fīmālie moʼoni ʼe hoki maʼu pe ʼi te fakatuʼutuʼu ʼa te ʼAtua: “ ʼI te tokalelei ʼe ʼau takoto anai pea ʼe ʼau moe ai anai, he ko koe tokotahi pe, Ê Sehova, e ke fakanofo ʼau ʼi te fīmālie.” Ko te kalaga fuli ʼo ʼuhiga mo te “tokalelei pea mo te fīmālie” neʼe fai ʼi tuʼa ʼo te fakatuʼutuʼu ʼo te Puleʼaga ʼo Sehova ʼe loi. ʼE mole feala ke tologa.
Ko te Puleʼaga ʼo Kilisito ʼe mole ina leleiʼia te ʼu puleʼaki ʼaē ʼe fai faka vaelua pe. Ko te Puleʼaga ʼo te ʼAtua ʼe mole ina fakasiʼisiʼi pe anai te ʼu mahafu tau faka nukeleʼea kae ʼe ina maumauʼi katoa anai te ʼu mahafu tau faka nukeleʼea pea mo te ʼatu ʼu mahafu tau fuli. ʼE fai te fakapapau ʼaenī e te Pesalemo 46:9: “ ʼE ina fakagata te ʼu tau ʼo aʼu ki te potu taupotu ʼo te kele. ʼE ina maumauʼi te kalolo pea mo maumauʼi te tao; ʼo ina tutu te ʼu tānike ʼi te afi.”
ʼO toe feiā aipe, ko te ʼu tuʼania faka nukeleʼea ʼuhi ko te haʼele kovi ʼo te ʼu masini faʼu nukeleʼea peʼe ko te ʼu ʼotaʼota ʼaē fakatupu mate ʼe mole toe maʼu anai. Koteʼuhi kapau ʼe mole hoko te ʼu faʼahi ʼaia pea ʼe mole moʼoni anai te ʼu palalau ʼaenī: “Pea ʼe nātou tahi heka anai ʼi tona fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou, he ko te gutu ʼaē ʼo Sehova ʼo te kautau ʼaē neʼe lea kiai.” Ko te ʼAtua ʼe mole feala ke loi. ʼE mole tonu ke tou lotolotolua ʼo ʼuhiga mo tana ʼu folafola.—Mikea 4:4; Tito 1:2.
ʼE koutou fiafia anai koa ʼi hakotou maʼu te ʼamanaki ʼaē ke koutou maʼuʼuli ʼi he mālama neʼe kua toʼo kehe mai ai te tuʼania ʼo ʼuhiga mo te nukeleʼea ʼo talu ai ʼosi? ʼE feala, heʼe fakahā fakalelei e te Folafola ʼa te ʼAtua te ʼu fakamaʼua ki te faʼahi ʼaia. ʼAki hakotou ako te ʼu fakamaʼua ʼaia pea mo hakotou maʼuliʼi, ʼe feala anai ʼi he ʼaho ke koutou ʼui ʼaki he loto fiafia: “Te tuʼania ki te nukeleʼea—kua puli ia!”
[Paki ʼo te pasina 7]
Ko te tokalelei ʼe maʼu anai ʼi te mālama foʼou ʼa te ʼAtua, ʼaia ʼe mole ʼi ai he ʼu tuʼania ʼo ʼuhiga mo te nukeleʼea
[Haʼuʼaga ʼo te paki]
M. Thonig/H. Armstrong Roberts
[Haʼuʼaga ʼo te paki pasina 6]
U.S. National Archives photo