Ko Te Kau Faka Mafola ʼo Te Puleʼaga ʼe Nātou Fakamatala
“Koutou Fakafeagai Ki Te Tevolo, Pea ʼe Hola Mamaʼo Anai Ia Ia Koutou”
ʼI TE ʼuluaki sēkulō, neʼe tali e te kūtuga ʼe fia fai mālohi ki “te ʼu meʼa fakatemonio” ʼi Efesi, te logo faka Kilisitiano ʼo nātou tutu ʼi muʼa ʼo te kaugamālie ʼanatou ʼu tohi fakatemonio. (Gāue 19:19) Neʼe lau te totogi ʼo te ʼu tohi ʼaia, ko te 50 000 piesi siliva. Kapau ʼe talanoa te Tohi-Tapu ki te tenalio, ko he foʼi piesi siliva Loma, e lagi feala pe ke faka au tona paʼaga ki te falā e 3 700 000 FCFP!
ʼI te temi nei, ʼe hahaʼi ia nātou ʼi te lakaga ʼaē neʼe nātou nonofo mo te ʼu tohi ʼe ʼi ai tona pikipikiga mo te gaohi meʼa fakatemonio kae neʼe nātou fakahā he loto faiga ʼe tatau mo ʼaē ʼo te hahaʼi ʼo Efesi ʼo te temi muʼa. Koutou fakatokagaʼi te fakamatala ʼaenī ʼe hoa mai neʼe hoko ʼi Kanata.
Lagi kua hili te ʼu taʼu e nima, neʼe fai faka mafola te fafine Fakamoʼoni ʼa Sehova ʼi te ʼu ʼapi pea neʼe felāveʼi ai mo te fafine ko Nora neʼe ina toho fakakinau ia ia ki tona loto fale. Lolotoga te ʼu taʼu fualoa ʼo tana kumi ʼo te ʼu meʼa fakalaumālie, neʼe ina tānaki te ʼu tohi lotu pea mo te ʼu tohi fakatemonio ʼe lauʼi teau, kae neʼe ina fia ʼiloʼi te meʼa ʼaē ʼe ʼui e te Tohi-Tapu ʼo ʼuhiga mo te ʼamanaki ʼo te kau mate. Neʼe foaki age e te Fakamoʼoni te kiʼi pepa lotu Koteā Te ʼAmanaki Ki ʼOtatou ʼu Hahaʼi Neʼe Tou ʼOʼofa Ai Kua Mamate? Neʼe fai age kia Nora te ʼu tali ʼo tana ʼu fehuʼi, pea neʼe ina tali te ʼu apone ki te ʼu nusipepa Te Tule Leʼo pea mo te Réveillez-vous!
Ki muli age neʼe mavae ki te tahi nofoʼaga pea neʼe mole toe felāveʼi ai mo te kau Fakamoʼoni ʼa Sehova. Kae, neʼe hoko atu pe tana maʼu ʼo te ʼu nusipepa ki tona nofoʼaga foʼou ʼi te laposi. Neʼe ina fakaʼui ai foki mo ʼihi tohi faka Tohi-Tapu ʼaē neʼe tuʼu ʼi te ʼu nusipepa. Hili ʼaia te temi mole faʼa fualoa, neʼe haʼu te Fakamoʼoni ʼa Sehova ki tona ʼapi. ʼI tana ōfo ʼaē ʼi te fakahā age e te Fakamoʼoni te Tohi-Tapu moʼo tali ʼaki ki ʼana ʼu fehuʼi, neʼe tali lelei e Nora te fafine Fakamoʼoni pea mo ina fakaafe ke toe haʼu ki he tahi ʼu fai palalau.
Kae, neʼe faigataʼaʼia ki te Fakamoʼoni hana toe felāveʼi mo Nora. Neʼe mole maʼu he fua ʼi te ʼu tuʼuga ʼaʼahi ʼaē neʼe ina fai ʼi te hola kehekehe pea mo te ʼu ʼaho kehekehe ʼo te vāhaʼa. Kae, ʼaki te temi, neʼe fakapale leva te faiga ʼa te Fakamoʼoni, pea neʼe ina maʼu ai te ʼu fua lelei. Neʼe kamata te ako faka Tohi-Tapu, pea ʼaki te tau fakaʼui mālohi ʼa Nora neʼe hoko ʼo tuʼa tolu ʼi te vāhaʼa. Ko te ʼu meʼa ʼaē neʼe ina ako neʼe ina uga ia ia ke palalau ki ʼona ʼu kaumeʼa pea mo te ʼu hahaʼi ʼo tona famili, ʼo tupu ai te fakaʼui e te toko tolu ia nātou he ʼu ako faka Tohi-Tapu mo te kau Fakamoʼoni ʼa Sehova.
ʼAki tana ako, neʼe mahino ai kia Nora ʼe fonu te ʼu lotu hala pea mo hahaʼi te ʼu polofeta loi kae ko te ala pe e tahi ʼe ina taki ki te maʼuli. Lolotoga te ʼu taʼu e fualoa, neʼe ina kumi te ʼu tali ki tana ʼu fehuʼi ʼi te ʼu lotu hala, kae ʼi tana ako ʼaē te meʼa ʼaē ʼe ʼui e te Tohi-Tapu ʼo ʼuhiga mo te kau temonio, neʼe ina fai te ʼu fakatuʼutuʼu ohage ko te hahaʼi ʼo Efesi ʼo te temi ʼāfea ʼaē ʼe tuʼu ia Gāue 19:19. Neʼe ina fakamaʼa tana tānakiʼaga tohi pea, lolotoga ʼo te ʼu ʼaho, neʼe ina maumauʼi te ʼu tohi e afe tupu ʼe ʼi ai tonatou pikipikiga mo te gaohi meʼa fakatemonio pea mo te ʼu akonaki faka lotu loi. ʼI te ʼu tohi ʼaia neʼe ina maumauʼi, neʼe ʼi ai te ʼu tohi e fā ʼe fakatahi neʼe fakalaka tona totogi ʼi te falā 80 000 FCFP!
ʼI tanatou mole fiafia ʼaē ki te ʼu meʼa ʼaē neʼe fai e Nora, neʼe fakakinakinaʼi ia ia e te kau temonio ʼo lagi vāhaʼa lua. Kae, neʼe mole lavaʼi e te ʼu laumālie agakovi ʼaia hanatou fakalotoʼi ia ia ke gata la te hoholo ʼo tana ako faka Tohi-Tapu pea mo tana fakatahi mo te kautahi ʼa Sehova ʼo te temi nei.
ʼE fakahā lelei e te ʼu fakamatala ʼaia te moʼoni ʼo te ʼu palalau ʼaenī ʼa te Tohi-Tapu: “Koutou fakalogo foki ki te ʼAtua; kae koutou fakafeagai ki te Tevolo, pea ʼe hola mamaʼo anai ia ia koutou.”—Sake 4:7.