ʼE Tali Te ʼAtua Ki Te ʼu Faikole
Ko Kolenelio neʼe ko he tagata neʼe faikole tuʼumaʼu ki te ʼAtua ʼaki tona loto katoa. Tahi ʼaē meʼa, neʼe ina fakaʼaogaʼi lelei tona tuʼulaga ofisie ʼi te solia. Ohage ko tona ʼui e te Tohi-Tapu, “nee lahi tana faiofa” ki te hahaʼi ʼaē neʼe nonofo ʼi te faigataʼaʼia.—Gaue 10:1, 2.
ʼI TE temi ʼaia, neʼe faʼufaʼu te kokelekasio faka Kilisitiano e te kau Sutea, mo te kau poloselite, pea mo te kau Samalitana. Ko Kolenelio neʼe ko he Senitile neʼe mole silikosisioʼi pea neʼe mole kau ʼi te kokelekasio faka Kilisitiano. Ko tona faka ʼuhiga koa neʼe vaʼiganoa tana ʼu faikole? Kailoa. Neʼe tokagaʼi e Sehova ʼAtua ia Kolenelio pea mo tana ʼu gāue agatonu.—Gaue 10:4.
ʼAki te takitaki ʼa te ʼaselo, neʼe maʼu e Kolenelio te kokelekasio faka Kilisitiano. (Gaue 10:30-33) Pea ko ia mo tona famili neʼe nātou maʼu te pilivilesio ʼaē ke nātou liliu ko te ʼu ʼuluaki Senitile neʼe mole silikosisioʼi ʼaē neʼe tali ʼi te kokelekasio faka Kilisitiano. Neʼe loto e Sehova ʼAtua ke tohi ʼi te Tohi-Tapu te meʼa ʼaē neʼe hoko kia Kolenelio. ʼE mahino ia, neʼe lahi te ʼu fetogi ʼaē neʼe ina fai ʼi tona maʼuli ke ʼalutahi mo te ʼu lekula ʼa te ʼAtua. (Isaia 2:2-4; Soane 17:16) Ko te meʼa ʼaē neʼe hoko kia Kolenelio, ʼe tonu ke liliu ko he fakaloto mālohi ki te hahaʼi ʼo te ʼu puleʼaga fuli ʼaē ʼe nātou kumi te ʼofa ʼo te ʼAtua ia ʼaho nei. Tou vakaʼi he ʼu faʼifaʼitaki.
Te ʼu Faʼifaʼitaki ʼi Totatou Temi
Neʼe ʼaoga ʼaupito he fakaloto fīmālie ki te fafine Initia. Neʼe ʼohoana ʼi tona taʼu 21, pea neʼe ʼi ai tanā ʼu toe e lua. Kae ʼi tana fānauʼi ake tana lua tamasiʼi, neʼe mate tona ʼohoana. ʼI tona taʼu 24, neʼe mole kei hona ʼohoana pea neʼe tonu ke ina taupau tana taʼahine neʼe māhina 2 pea mo tana tama neʼe māhina 22. ʼE mahino papau ia neʼe ʼaoga ʼaupito kia ia he fakaloto fīmālie! Ko ai ʼaē neʼe feala ke haga ki ai? ʼI te tahi po, ʼi tona lotomamahi ʼaupito, neʼe faikole ʼo ina ʼui fēnei: “Tāmai ʼi selo, fakalelei siʼou loto, kae ke fakaloto fīmālie ʼau ʼaki tau Folafola.”
ʼI te uhu ake, neʼe ʼaʼahi ia ia e te Fakamoʼoni ʼa Sehova. ʼI te ʼaho ʼaia, neʼe faigataʼa tana fai faka mafola ʼi te ʼu ʼapi he neʼe tokosiʼi te hahaʼi ʼaē neʼe nātou avahi age tonatou matapā. Neʼe gaʼegaʼe pea mo lotovaivai ai, pea neʼe tonu ke toe liliu ki tona ʼapi, kae neʼe fia ʼalu ʼo fai te tahi ʼapi pe e tahi. Neʼe felāveʼi ai mo te fafine vitua ʼaia. Neʼe fakaafe ia ia e te fafine ki tona ʼapi pea neʼe ina tali te tohi neʼe fakamahino ai te Tohi-Tapu. Neʼe maʼu e te fafine he fakaloto fīmālie lahi ʼi tana lau te tohi, pea mo tana ʼu fai palalau mo te Fakamoʼoni. Neʼe ina ʼiloʼi ai te fakapapau ʼa te ʼAtua ke ina fakatuʼuake te kau mate, pea mo te Puleʼaga ʼa te ʼAtua, ʼaē ka ina ʼamanaki fakaliliu te kele ko he palatiso. Kae tāfito, neʼe ina ako ke ina ʼiloʼi pea mo ʼofa ki te ʼAtua moʼoni e tahi, ko Sehova, ʼaē neʼe tali ki tana faikole.
Ko Nora, ʼe nofo ʼi te kolo ʼo George, ʼi Afelika Saute, pea neʼe ina fakatuʼutuʼu ʼi te tahi māhina ke pionie katoa. ʼI muʼa ʼo tana kamata gāue pionie, neʼe faikole fakamalotoloto kia Sehova ke tokoni age kia ia ke ina maʼu he tahi ʼe ina fia ako moʼoni te Tohi-Tapu. ʼI te telituale ʼaē neʼe tonu ke ina gāueʼi, neʼe ʼi ai te ʼapi neʼe mole tali lelei ai ʼi tana ʼu ʼuluaki ʼaʼahi. ʼAki he lototoʼa, neʼe toe ʼalu ia Nora kiai. Neʼe punamaʼuli ai he neʼe ina maʼu atu te tahi fafine, ʼe higoa ko Noleen, neʼe ko ia ʼaē neʼe kua ina maʼu te ʼapi. Tahi ʼaē meʼa, ko Noleen pea mo tana faʼe neʼe nā faikole ki te ʼAtua ke tokoni age kia nāua ke nā mahino ki te Tohi-Tapu. ʼE fakamahino fēnei e Nora: “Neʼe nā fiafia ʼi taku fakaafe nāua ke nā ako te Tohi-Tapu.” Neʼe vave te tuputupu fakalaumālie ʼa Noleen pea mo tana faʼe. ʼAki te temi, neʼe nā kau toko lua mo Nora ʼi te gāue ʼaē ʼe ina foaki te fakamālōlō fakalaumālie.
Ko te tahi faʼifaʼitaki ʼaē ʼe hā ai te mālohi ʼo te faikole, ʼe ko te faʼifaʼitaki ʼo te taumatuʼa ʼe nonofo ʼi Afelika Saute, ʼi te kolo ʼo Johannesburg. ʼI te po ʼo te Moeaki ʼo te taʼu 1996, neʼe ʼamanaki mavete ia Dennis pea mo Carol. ʼI tanā puleʼaki fakamuli, neʼe nā faikole liuliuga ai ʼi te po katoa. ʼI te uhu ake, ʼi te matahi, neʼe fisifisi tonā matapā e te ʼu Fakamoʼoni ʼa Sehova e toko lua. Neʼe avahi e Dennis te matapā pea neʼe ina ʼui age ke nā talitali kae ʼalu ʼo pāuiʼi mai tona ʼohoana. Pea neʼe ʼui age e Dennis kia Carol, kapau ʼe ina fakaafe te ʼu Fakamoʼoni ki tonā loto fale, pea ʼe faigataʼa anai hanā ʼui age ke ʼolo. Neʼe fakamanatuʼi e Carol kia Dennis neʼe nā kumi tokoni ʼi te faikole, pea neʼe ina ʼui age ʼe ko te lagi tali ʼaia ʼa te ʼAtua ki tanā ʼu faikole. Koia neʼe nā fakahū ai te ʼu Fakamoʼoni ki tonā loto fale, pea neʼe kamata ai tanā ako Tohi-Tapu ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe fiafia ʼaupito ia Dennis pea mo Carol ʼi te ʼu meʼa ʼaē neʼe nā ako. ʼI te hili hoʼatā pe ʼaia, neʼe nā kau ai ki tanā ʼuluaki fono ʼi te Fale ʼo te Puleʼaga ʼa te kau Fakamoʼoni ʼa Sehova. ʼI tanā maʼuliʼi te meʼa ʼaē neʼe nā ako ʼi te Tohi-Tapu, neʼe maʼu ai e Dennis pea mo Carol te ʼu puleʼaki moʼo fakatokatoka ʼo tonā ʼu fihifihia faka taumatuʼa. Kua nā fiafia ʼi te temi nei, mo papitema, pea ʼe nā fakavikiviki kia Sehova pea ʼe nā faka mafola tuʼumaʼu ki te hahaʼi te ʼu meʼa ʼaē neʼe nā ako ʼi te Tohi-Tapu.
E Feafeaʼi Mokā Koutou Manatu ʼe Mole Tau Mo Feʼauga Ke Koutou Faikole?
Ko ʼihi ʼe lagi nātou manatu ʼe mole tau mo feʼauga ke nātou faikole he neʼe kovi tonatou faʼahiga maʼuli. Neʼe fai e Sesu te fakamatala ʼo ʼuhiga mo te tagata neʼe feiā tona maʼuli, ko te tagata tānaki tukuhau pea mo fehiʼaʼinaʼi. ʼI tana hū ki te malaʼe ʼo te fale lotu, neʼe manatu e te tagata ʼaia ʼe mole tāu mo ia ke ʼalu ki te faʼahi ʼaē ʼe faikole māhani ai te hahaʼi. “Kae nee tuu mamao . . . [ʼo] tuki fatafatape mo ui maʼana: ‘E Atua, ofa mai kia te au ko te tagata agahala.’ ” (Luka 18:13) ʼE ʼui e Sesu, neʼe tali e Sehova te faikole ʼa te tagata ʼaia, pea ʼe ko he fakamoʼoni ʼaia, ko Sehova ʼAtua ʼe fakamolemole gafua pea ʼe fia tokoni ki te kau agahala ʼaē ʼe nātou fakahemala moʼoni.
Tou talanoa ki te tama tūpulaga ʼi Afelika Saute, ʼe higoa ko Paul. ʼI tana kei veliveli, neʼe ʼalu Paul ʼo fono mo tana faʼe. Kae ʼi tana ako ʼi te lisē, neʼe kamata fakakaugā mo te kau tūpulaga ʼaē neʼe mole nātou mulimuli ki te ʼu ala ʼo te ʼAtua. ʼI tana ʼosi mavae ʼi te faleako, neʼe hū ki te solia ʼo te puleʼaga ʼāfea ʼo te apartheid ʼo Afelika Saute. Pea fokifā pe, ko te taʼahine ʼaē neʼe nā nonofo neʼe ina fakagata tanā fakatahi. Neʼe lotomamahi ʼaupito ai Paul ʼi te taʼi maʼuli ʼaia. ʼE ina manatuʼi fēnei: “ ʼI te tahi po, neʼe ʼau faikole kia Sehova ke tokoni mai, logola kua lauʼi taʼu taku mole heʼeki toe faikole kia te ia.”
Mole fualoa ʼi tana ʼosi faikole ʼaia, neʼe fakaafe ia ia e tana faʼe ki te Fakamanatu ʼo te mate ʼa Kilisito, ʼaē ʼe fai ʼi te taʼu fuli. (Luka 22:19) Neʼe mata faikehe kia Paul te fakaafe ʼaia ʼo tana faʼe, he neʼe maʼuli fakavale pea neʼe mole ina fia ako te Tohi-Tapu. “Maʼa ʼaku, ko te fakaafe ʼaia neʼe ko te tali ʼa Sehova ki taku faikole pea neʼe ʼau manatu ai ʼe tonu ke ʼau tali kiai.” Talu mai te temi ʼaia, neʼe kamata ʼalu ai Paul ki te ʼu fono fuli. ʼI tana ʼosi ako te Tohi-Tapu ia māhina e fā, neʼe feala ai leva ke papitema. Tahi ʼaē meʼa, neʼe ina fakaʼosi tana ako gāue, pea neʼe ina filifili ke kau ki te gāue fai faka mafola ʼi te temi katoa. ʼI te temi nei, ko Paul ʼe ko he tagata fiafia, ʼe mole kei lotomamahi ʼo ʼuhiga mo tona faʼahiga maʼuli ʼāfea. ʼI te ʼu taʼu fakamuli ʼaenī e 11, ʼe gāue ʼi te filiale ʼo te Sosiete Watch Tower ʼi Afelika Saute.
Koia, ʼe tali fakalelei e Sehova ʼAtua ki te ʼu faikole pea “e ina fakapale natou e natou kumi iaʼia.” (Hepeleo 11:6) Kua vave hoko mai te ʼaho lahi ʼa Sehova ʼaē ka ina fakagata ai te agakovi fuape. ʼO talitali ki te temi ʼaia, ʼe tali Sehova ki te ʼu faikole ʼo tana hahaʼi, ʼo ina foaki kia nātou tona mālohi pea mo tana takitaki, ʼi tanatou kau lahi ki te gāue maʼuhiga ʼaē ko te fai faka mafola. Ko te ʼu lauʼi miliona hahaʼi mai te ʼu fenua fuli ʼe nātou felogoi mo te kokelekasio faka Kilisitiano, pea ʼe tapuakina nātou ʼaki te ʼatamai mālama ʼo te Tohi-Tapu ʼaē ʼe ina taki ki te maʼuli heʼegata.—Soane 17:3.
[Paki ʼo te pasina 5]
Neʼe ʼaʼahi ia Kolenelio e te ʼapositolo ko Petelo, he neʼe faikole fakamalotoloto
[Paki ʼo te pasina 6]
Neʼe tokoni te faikole ki te tokolahi ʼi tonatou ʼu temi faigataʼa
[Paki ʼo te pasina 7]
ʼE lelei hakita faikole ke kita maʼu he tokoni moʼo mahino ki te Tohi-Tapu
[Paki ʼo te pasina 7]
ʼE feala ki te ʼu taumatuʼa ke nātou faikole ke nātou maʼu he tokoni moʼo fakamālohiʼi tanatou nofo ʼohoana