Koteā ʼAē ʼe Ina Uga Ai Koutou Ke Koutou Tauhi Ki Te ʼAtua?

“ ʼE tonu ke ke ʼofa kia Sehova tou ʼAtua ʼaki tou loto katoa pea mo tou nefesi katoa pea mo tou laumālie katoa pea mo tou mālohi katoa.”—Maleko 12:30.

1, 2. Koteā te ʼu meʼa fakaofoofo ʼaē kua fakahoko ʼo ʼuhiga mo te gāue fai faka mafola?

ʼE MOLE gata pe ki te meʼa ʼaē ʼe hā ki tuʼa ʼo he motokā ʼe tou ʼiloʼi ai ʼe haʼele lelei. ʼE faka maʼuhigaʼi e te pena te ʼu meʼa ʼaē ʼe ʼi tuʼa, pea ko nātou ʼaē ʼe fia toʼo motokā, ʼe nātou tokagaʼi anai te agaaga ʼo te motokā ʼaia. Kae ko te ʼu faʼahi ʼaē ʼe maʼuhiga age ko te ʼu meʼa ʼaē ʼe ū—te mālohi ʼo te masini, pea mo te ʼu meʼa ʼaē ʼe nātou fakahaʼele lelei.

² ʼE toe feiā mo te tauhi faka Kilisitiano ki te ʼAtua. ʼE lahi te ʼu gāue faka lotu ʼe fakahoko e te kau Fakamoʼoni ʼa Sehova. ʼI te taʼu fuli, ʼe fakalaka ʼi te miliale te ʼu hola ʼaē ʼe nātou faka mafola ai te logo lelei ʼo te Puleʼaga ʼo te ʼAtua. Pea tahi, neʼe nātou taki te ʼu ako faka Tohi-Tapu e toko miliona tupu, pea neʼe lauʼi teau afe ia nātou ʼaē neʼe papitema. Kapau ko koutou ko he tagata fai faka mafola ʼo te logo lelei, neʼe koutou kau mo koutou—logope pe veliveli—ki te ʼu tānaki gāue ʼaia. Pea ʼe feala ke koutou falala “ ʼe mole heʼe agatonu te ʼAtua ʼo galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.”—Hepeleo 6:10.

3. ʼO mole gata ʼaki pe te ʼu gāue, koteā tahi meʼa ʼe maʼuhiga ki te kau Kilisitiano, pea koteā tona tupuʼaga?

³ Kae, ko te maʼuhiga moʼoni ʼo tatatou tauhi—ʼo fakatahi mo ʼihi peʼe tou fai tokotahi—ʼe mole mulimuli pe ia ki he ʼu tānaki. Ohage ko te ʼui e Samuele, “heʼe sio te tagata ki te meʼa ʼaē ʼe hā ki te ʼu mata; kae kia Sehova ʼe ina sioʼi te ʼuhiga ʼo te loto.” (1 Samuele 16:7) Ei, ʼe maʼuhiga age ki te ʼAtua te meʼa ʼaē ʼi ʼotatou ʼu loto. ʼE moʼoni, ʼe maʼuhiga te ʼu gāue. Ko te ʼu aga faka lotu ʼe nātou fakamataleleiʼi te akonaki ʼa Sehova pea ʼe ina fakaliliu te ʼu hahaʼi ke liliu ko ni ʼu tisipulo. (Mateo 5:14-16; Tito 2:10; 2 Petelo 3:11) Kae, ʼe mole gata ʼaki pe ʼi totatou ʼu gāue. Neʼe ʼi ai te tupuʼaga ʼo te fakatokagaʼi e Sesu te kokelekasio ʼo Efesi—logo aipe te lahi ʼo tona ʼu gāue lelei. Neʼe ina ʼui fēnei age kia nātou: “ ʼE ʼau ʼiloʼi te ʼu meʼa ʼaē neʼe ke fai . . . Kae, koʼeni te meʼa ʼaē ʼe ʼau koviʼia ai, ia koe, heʼe kua ke līaki te ʼofa ʼaē neʼe ia koe ʼi te kamata.”—Fakahā 2:1-4.

4. (a) ʼE lava feafeaʼi ke liliu tatatou tauhi ki te ʼAtua ko he meʼa kua tou fai ohage ko he agamāhani ka mole kei ʼalu ai totatou loto? (b) He koe ʼe ʼaoga ke tou sivisivi ia tatou takitokotahi?

⁴ ʼE ʼi ai te tuʼutāmaki. Hili kiai te temi, ʼe feala ke liliu totatou tauhi ki te ʼAtua ko he faʼahi kua tou fai māhani ka mole ʼalu ai totatou loto. ʼE fakamatala e te fafine Kilisitiano, kua ʼohoana, tona maʼuli ʼi te faʼahi ʼaia: “Neʼe ʼau faka mafola, mo ʼau kau ki te ʼu fono, neʼe ʼau ako, pea mo faikole—kae neʼe ʼau fai te ʼu meʼa fuli ʼaia ohage ko he masini kua ʼosi fakatotonu age te ʼu meʼa ʼaia ke ina fai, ʼo mole kei ʼau logoʼi he meʼa ʼi toku loto.” ʼE moʼoni, ʼe maʼua ke vikiʼi te ʼu kaugana ʼo te ʼAtua mokā ʼe nātou fai lelei tanatou gāue, logope la ʼe “fakatō [ai nātou] ki lalo” peʼe ʼi te ʼu temi ʼaē ʼe “līaki [ai nātou] ki lalo.” (2 Kolonito 4:9; 7:6) Kae, kapau kua liliu tatatou ʼu gāue faka Kilisitiano ʼaē ʼe tou fai māhani, ko he ʼu meʼa pe ia ʼe tou fai ka mole kei ʼi ai hona ʼuhiga loloto, pea ʼe ʼaoga ke loloto age tatatou vakaʼi te masini, ohage ko te palalau fakatātā ʼaē ʼi te ʼuluaki palakalafe. ʼE ʼaoga ki te motokā ʼaē ʼe lelei ke vakaʼi tuʼumaʼu; ʼo toe feiā foki, ʼe ʼaoga ki te kau Kilisitiano ke nātou fai tuʼumaʼu he sivisivi ʼo nātou takitokotahi. (2 Kolonito 13:5) ʼE feala ke sio niʼihi ki totatou ʼu gāue, kae ʼe mole feala ia ke nātou ʼiloʼi papau pe koteā ʼaē ʼe ina uga tatou ke tou fakahoko te ʼu gāue ʼaia. Koia la ʼaē, ʼe tonu ai ke tou fai kia tatou takitokotahi te fehuʼi ʼaenī: ‘Koteā ʼaē ʼe ina uga ai ʼau ke ʼau tauhi ki te ʼAtua?’

Ko Te ʼu Fakafeagai Ki He Fakatuʼutuʼu Lelei

5. Koteā te lao ʼaē neʼe ʼui e Sesu ʼe ko te ʼuluaki lao ʼi te ʼu lao fuli?

⁵ ʼI te temi ʼaē neʼe ina fehuʼi ai pe koteā te ʼuluaki ʼo te ʼu lao fuli ʼaē neʼe foaki ki Iselaele, neʼe talanoa ia Sesu ʼo ʼuhiga mo te fakatotonu ʼaē ʼe mole ina fakatokagaʼi te ʼu meʼa ʼaē ʼe hā ki tuʼa, kae ko te ʼu meʼa ʼaē ʼi te loto: “ ʼE tonu ke ke ʼofa kia Sehova tou ʼAtua ʼaki tou loto katoa pea mo tou nefesi katoa pea mo tou laumālie katoa pea mo tou mālohi katoa.” (Maleko 12:28-30) Koia neʼe ʼiloʼi e Sesu te mālohi ʼaē ʼe tonu ke ina uga tatou ʼi tatatou gāue ki te ʼAtua—ko te ʼofa.

6, 7. (a) ʼAki he aga fakakākā, neʼe faiga feafeaʼi ia Satana ke ina tauʼi te famili, koteā tona tupuʼaga? (2 Kolonito 2:11) (b) ʼE feala feafeaʼi ke lave he ako ʼo he tahi ki tana agaaga ʼo ʼuhiga mo te pule fakaʼatua?

⁶ ʼE mole loto e Satana ke tou maʼu te kalitate maʼuhiga ʼaē ko te ʼofa. Moʼo fakahoko te faʼahi ʼaia, ʼe ina tauʼi te famili. Koteā tona tupuʼaga? Koteʼuhi ʼe faʼufaʼu ʼi te loto famili te ʼu ʼuluaki agaaga pea mo tologa ʼo te ʼofa. ʼE ʼiloʼi lelei e Satana ko te fakatuʼutuʼu faka Tohi-Tapu ʼaē ko te akoʼi ʼo he tahi ʼi tana kei veliveli, ʼe feala ke liliu ʼo maʼuhiga mokā lahi anai. (Tāʼaga Lea 22:6) ʼAki he aga fakakākā, ʼe ina faigaʼi ʼi tatatou kei veliveli ke ina fetogi tatatou faʼahiga sio ʼo ʼuhiga mo te ʼofa. ʼI tona ʼuhiga “ ʼatua ʼo te tuʼu ʼo te ʼu faʼahiga meʼa ʼaenī,” ʼe sio ia Satana ki te fua lelei ʼo tana ʼu fakatuʼutuʼu mokā lahilahi he tokolahi ʼi he ʼu loto fale ʼe mole maʼu ai te fīmālie pea mo te ʼofa kae ko te ʼu kē, mo te ʼita, pea mo te ʼu tauvele.—2 Kolonito 4:4; Efesi 4:31, 32; 6:4, nota ʼi te lalo pasina; Kolose 3:21.

⁷ ʼE fakahā e te tohi Comment sʼassurer une vie de famille heureuse ko te ala ʼaē ka fakaʼaoga e he tāmai ʼi tona ʼuhiga pule “ ʼe feala ke ʼi ai hona ʼuhiga ki te aga ki ʼamuli ʼo te fānau, ʼo ʼuhiga mo tana fakalogo ki te tagata pea mo tana fakalogo ki te ʼAtua.”a ʼE ʼui e te tagata Kilisitiano, ʼaē neʼe maʼuli mo tana tāmai aga fefeka: “ ʼE faigafua taku fakalogo kia Sehova; kae ʼe faigataʼa age taku ʼofa kia te ia [Sehova].” ʼE moʼoni, ʼe maʼuhiga te fakalogo, heʼe kia mata ʼo te ʼAtua “ko te fakalogo ʼe lelei age ia ʼi he mōlaga.” (1 Samuele 15:22) Kae koteā ʼaē ka tokoni mai kia tatou ke mole gata ʼaki pe tatatou fakalogo, kae ke tou maʼuliʼi te ʼofa ʼaē kia Sehova ohage ko he mālohi ʼe ina uga tatou ʼi tatatou tauhi?

“Ko Te ʼOfa ʼAē ʼo Sesu ʼe Ina Fakamaʼuaʼi Tatou”

8, 9. ʼE uga feafeaʼi e te sakilifisio faitotogi ʼo Sesu totatou ʼofa ʼaē kia Sehova?

⁸ Ko te loto fakafetaʼi ʼaē ʼe ina uga tatou ke tou ʼofa kia Sehova ʼaki totatou loto katoa, ʼe ko te fakahā ʼaia ʼo tatatou leleiʼia te sakilifisio faitotogi ʼo Sesu Kilisito. “Koʼeni te meʼa ʼaē neʼe fakahā ai te ʼofa ʼo te ʼAtua kia tatou: he neʼe fekauʼi mai e te ʼAtua tona ʼAlo ʼulu tokotahi ki te malamanei, ke feala ʼaki ia ia ke tou maʼu te maʼuli.” (1 Soane 4:9) ʼI tatatou kua mahino pea mo leleiʼia te faʼahi ʼaia, ko te agaʼofa ʼaia ʼe ina fakatupu he agaʼofa. “ ʼE tou ʼofa, he neʼe ko [Sehova] ʼaē neʼe ʼuluaki ʼofa kia tatou.”—1 Soane 4:19.

⁹ Neʼe lotolelei ia Sesu ke liliu ko he Fakamaʼuli. “ ʼAki te faʼahi ʼaenī neʼe tou akoʼi te ʼiloʼi ʼo te ʼofa: koteʼuhi neʼe foaki e ia ʼaenī tona nefesi maʼa tatou.” (1 Soane 3:16; Soane 15:13) Ki te sakilifisio ʼofa ʼo Sesu ʼe tonu ke tou tali ʼaki he loto fakafetaʼi. Ohage ko te fakatā ʼaenī: Neʼe hāofaki koutou e he tahi mai te malemo. ʼE feala koa ke koutou liliu ki tokotou ʼapi, ʼo koutou fakamoamoa, pea mo koutou galoʼi te meʼa ʼaē neʼe hoko? Kailoa ia! ʼE koutou logoʼi tokotou maʼua kia ia ʼaē neʼe ina hāofaki koutou. ʼI tokotou maʼuli, ʼe ʼi ai tokotou maʼua kia ia. ʼE ʼi ai koa hotatou maʼua kia Sehova ʼAtua pea mo Sesu Kilisito? Ka na pau la neʼe mole foaki he totogi, ka na ʼaua la ʼe tou mamate fuli ʼuhi ko te agahala pea mo te mate. Kae, ʼaki te ʼofa lahi ʼaia, ʼe tou maʼu ia te ʼamanaki ʼaē ko te maʼuli ʼo heʼegata ʼi te kele kua liliu ko he palatiso.—Loma 5:12, 18; 1 Petelo 2:24.

10. (a) ʼE lava feafeaʼi hatatou faka ʼuhiga kia tatou takitokotahi te totogi? (b) E feafeaʼi te fakamaʼuaʼi ʼo tatou e te ʼofa ʼo Kilisito?

¹⁰ Koutou metitasio ki te totogi. Ke koutou faka ʼuhiga te faʼahi ʼaia kia koutou totonu, ohage ko te ʼui e Paulo: “Ei, ko toku maʼuli ʼi te temi nei ʼi te kakano, ʼe ʼau maʼuliʼi ʼaki te tui ʼaē ki te ʼAlo ʼo te ʼAtua, ʼaē neʼe ʼofa kia te ʼau pea mo ina foaki ia ia ʼuhi ko ʼau.” (Kalate 2:20) ʼE fakatupu anai e te taʼi metitasio ʼaia he ʼofa ʼe haʼu mai te loto, he neʼe tohi fēnei e Paulo ki te kau Kolonito: “Ko te ʼofa ʼo Kilisito ʼe ina fakamaʼuaʼi tatou, he . . . neʼe mate maʼa te hahaʼi fuli ke feala kia nātou ʼaē ʼe maʼuʼuli, ke mole kei nātou maʼuʼuli maʼa nātou totonu, kae ke nātou maʼuʼuli maʼa ia ʼaē neʼe mate maʼa nātou pea kua fakatuʼuake.” (2 Kolonito 5:14, 15) ʼE ʼui e te Tohi-Tapu (La Bible de Jérusalem) ko te ʼofa ʼa Sesu ʼe ina “fakakinauʼi tatou.” ʼI tatatou vakavakaʼi fakalelei te ʼofa ʼo Kilisito, ʼe fakamaʼua tatou, ʼe lave loloto kia tatou, tatau aipe pe ko he meʼa ʼe fai fakakinau. ʼE lave ki totatou loto pea ʼe ina uga tatou ke tou fakahā ʼaki he ʼu gāue. Ohage ko tona fakaliliu e J. B. Phillips te vaega ʼaia, “ko te tupuʼaga moʼoni ʼo tatatou ʼu gāue ʼe ko te ʼofa ʼo Kilisito.” ʼE ʼi ai te tahi ʼofa ʼe mole tologa tona ʼu fua ia tatou, ohage ko tona fakahā e te faʼifaʼitaki ʼo te kau Faliseo.

“Koutou Nofo Tokaga Ki Te Meʼa Fakatupu ʼa Te Kau Faliseo”

11. Koutou fakamatala te aga ʼo te kau Faliseo ʼo ʼuhiga mo te ʼu gāue faka lotu.

¹¹ Neʼe pulihi e te kau Faliseo te faka ʼuhiga moʼoni ʼo te tauhi ʼaē ki te ʼAtua. Neʼe mole nātou faka maʼuhigaʼi te ʼofa ʼaē kia Sehova, kae neʼe nātou faka maʼuhigaʼi te ʼu gāue ohage ko he fakafuafua ʼo te ʼu meʼa ʼi te faʼahi fakalaumālie. Neʼe nātou faka maʼuhigaʼi fau te ʼu lekula kehekehe, ʼo nātou hage ai ki tuʼa ko nātou ko te ʼu hahaʼi faitotonu, kae ʼi loto neʼe “fonu ko te hui ʼo te hahaʼi mate pea mo te faʼahiga meʼa heʼemaʼa kehekehe.”—Mateo 23:27.

12. ʼI te ʼosi fakamālōlō e Sesu te tagata, neʼe fakahā feafeaʼi e te kau Faliseo tonatou loto fefeka?

¹² ʼI te tahi lakaga, ko Sesu, ʼi tona manavaʼofa, neʼe ina fakamālōlō te tagata neʼe mahaki. Ko he fiafia lahi neʼe lagi maʼu e te tagata, ʼi te fakamālōlō fakafokifā ʼo te mahaki neʼe lagi tupu mai te ʼu mahaki fakasino, pea mo te lotohoha ʼo te ʼu meʼa ʼo tona loto! Kae, neʼe mole fiafia te kau Faliseo mo ia. Neʼe lahi ʼaupito tanatou valokiʼi te meʼa ʼaē neʼe fai e Sesu lolotoga te Sapato. ʼI tanatou tokakaga fau ki tanatou fakamahino ʼo te Lao, neʼe galo ki te kau Faliseo te faka ʼuhiga moʼoni ʼo te Lao. Koia, ʼe mole ko he meʼa fakapuna’maʼuli mo kapau neʼe “lotomamahi ʼaupito ia [Sesu], ʼi te fefeka ʼo tonatou loto”! (Maleko 3:1-5) Tahi ʼaē meʼa, neʼe ina fakatokagaʼi tana ʼu tisipulo: “Koutou nofo tokaga ki te meʼa fakatupu ʼo te kau Faliseo pea mo te kau Satuseo.” (Mateo 16:6) Neʼe tohi tanatou ʼu gāue pea mo tanatou ʼu aga ʼi te Tohi-Tapu, heʼe ʼi ai tona ʼaoga kia tatou.

13. Koteā te ako ʼe tou maʼu maʼa tatou mai te faʼifaʼitaki ʼo te kau Faliseo?

¹³ ʼE akoʼi mai e te faʼifaʼitaki ʼo te kau Faliseo ʼe tonu ke tou maʼu he fakasiosio lelei ʼo ʼuhiga mo te ʼu gāue. ʼE moʼoni, ko te ʼu gāue ʼe maʼuhiga, he “ko te tui ka mole ʼi ai he ʼu gāue ʼe mate ia.” (Sake 2:26) Kae, ʼi te agamāhani ko te tagata agahala ʼe ina fakamāuʼi te hahaʼi ʼo mulimuli ki te ʼu meʼa ʼaē ʼe nātou fai kae mole nātou fakamāuʼi nātou ʼo mulimuli ki tonatou ʼuhiga totonu. ʼI ʼihi lakaga, e lagi feala pe ke tou fakamāuʼi feiā ia tatou totonu. ʼE feala ke tou lotohoha ʼo ʼuhiga mo te ʼu gāue, ohage ko te meʼa pe ʼaia e tahi ʼe maʼuhiga ʼi te faʼahi fakalaumālie. E lagi feala ke galo kia tatou te vakaʼi ʼo te ʼu meʼa ʼaē ʼi totatou loto. (Vakaʼi ia 2 Kolonito 5:12.) ʼE feala ke koutou hage ko nātou ʼaē ʼe tokakaga fau ki te mulimuli lelei ʼo te lao, ʼo nātou ‘tāʼofi te foʼi namu ʼaki te fakaoʼo kae nātou folo te kamelo,’ ʼo nātou maʼuliʼi te lao katoa kae nātou lākahala ʼi tona ʼuhiga totonu.—Mateo 23:24.

14. Neʼe feafeaʼi te hoko ʼa te kau Faliseo ki he ipu pe ko he pa ʼe ʼuli?

¹⁴ Neʼe mole mahino ki te kau Faliseo ko ʼaē ʼe ʼofa moʼoni kia Sehova ʼe ina fai he ʼu aga faka lotu. ʼE hā ki tuʼa te ʼu meʼa ʼaē ʼi te loto ʼi faʼahi fakalaumālie. Neʼe tala fakamālohi e Sesu te manatu hala ʼa te kau Faliseo ʼo ʼuhiga mo te faʼahi ʼaia, ʼo ina ʼui fēnei: “Malaʼia kia koutou, kau sekelipa mo koutou kau Faliseo, kau malualoi! koteʼuhi ʼe koutou fakamaʼa te tuʼa ʼo te ipu pea mo te pa, kaʼe ʼi loto ʼe fonu ko te kaihaʼa mo te fakavalevale. ʼAē Faliseo kivi, fakamaʼa muʼa ia te loto ipu pea mo te loto pa, koteʼuhi ke toe maʼa ai foki mo tuʼa.”—Mateo 23:25, 26.

15. Koutou fakamatala he ʼu faʼifaʼitaki ʼe fakahā ai ʼe mole gata pe te sio ʼa Sesu ki te ʼu meʼa ʼaē ʼe hā, kae ʼe toe sio foki ki te ʼu meʼa ʼaē ʼi te loto.

¹⁵ Ko te tuʼa ʼo he ipu, ʼo he pa, peʼe ʼo he fale laufata, ʼe mole nātou fakahā te ʼu meʼa fuli ʼaē ʼi loto. Neʼe ōfo te ʼu tisipulo ʼa Sesu ʼi te matalelei ʼo te fale lotu ʼo Selusalemi, kae neʼe fakahigoa ia e Sesu “ko he ʼana ʼo he kau kaihaʼa” ʼuhi ko te ʼu meʼa ʼaē neʼe fai ʼi loto. (Maleko 11:17; 13:1) Ko te meʼa ʼaē neʼe moʼoni ʼo ʼuhiga mo te fale lotu, ʼe toe moʼoni foki ʼo ʼuhiga mo te toko miliona hahaʼi ʼaē ʼe nātou ʼui ʼe nātou Kilisitiano, ohage ko tona fakahā e te faʼahiga maʼuli ʼa te Keletiate. Neʼe ʼui fēnei e Sesu ʼe ina fakamāu anai ia nātou ʼaē ʼe nātou “fai te ʼu gāue mālohi” ʼaki tona huafa ohage ko ni ʼu “tagata ʼe nātou manuki ki te lao.” (Mateo 7:22, 23) ʼO mole tatau mo nātou, neʼe ina ʼui ʼo ʼuhiga mo te fafine vitua ʼaē neʼe ina momoli te ʼu kiʼi foʼi piesi neʼe mole faʼa maʼuhiga ki te fale lotu: “Ko te fafine vitua masiva ʼaenī, kua lahi age te meʼa ʼofa ʼaē neʼe ina foaki, ia nātou fuli ʼaē neʼe nātou tuku paʼaga ki te puha tānaki paʼaga . . . Ko ia, ʼi tona masiva, neʼe ina tuku kiai te meʼa katoa ʼaē neʼe ina maʼu, tana ʼu paʼaga fuli.” (Maleko 12:41-44) ʼE hala koa tana ʼu fakamāu? Kailoa. ʼI te ʼu ʼaluʼaga ʼaia e lua, neʼe fakahā e Sesu te manatu ʼa Sehova. (Soane 8:16) Neʼe sio ia ki te ʼu meʼa ʼaē neʼe nātou uga ke fai he ʼu gāue pea neʼe ina fakamāu ʼo mulimuli kiai.

“ ʼO Mulimuli Ki Te Meʼa ʼe Lavaʼi e Te Tagata Takitokotahi”

16. He koe ʼe mole ʼaoga ke tou fakatatau tuʼumaʼu tatatou gāue mo te gāue ʼa he tahi Kilisitiano?

¹⁶ Kapau ʼe lelei te ʼu meʼa ʼaē ʼi totatou loto, ʼe mole ʼaoga ke fai tuʼumaʼu he fakatatau. Ohage la, ʼe mole ʼaoga ki he Kilisitiano ke ina fakaʼaoga he temi ʼe tatau ʼi te minisitelio mo he tahi Kilisitiano pe ke tatau tana ʼu gāue ʼi te fai faka mafola mo te Kilisitiano ʼaia. Neʼe ʼui e Sesu ke koutou ʼofa ki te ʼAtua ʼaki tokotou loto katoa, mo tokotou laumālie, mo tokotou nefesi, pea mo tokotou mālohi—ʼo mole tou fai ke tatau mo he tahi kehe. E tahi ʼalu pe te tagata mo te kehekehe ʼo te ʼu meʼa ʼe ina lavaʼi, mo tona mālohi pea mo tona ʼu ʼaluʼaga. Kapau ʼe feala, ko te ʼofa ʼe ina uga anai koutou ke lahi age takotou minisitelio—lagi ke koutou liliu ko he minisi ʼe gāue pionie. Kae, kapau ʼe koutou lolotoga tau mo he mahaki, e lagi veliveli te temi ʼaē ʼe koutou gāue ai ʼi te minisitelio logope la takotou fakaʼamu ʼaē ke lahi age takotou gāue. ʼAua naʼa koutou lotovaivai. Ko te agatonu ki te ʼAtua ʼe mole fakalogo ia ki he ʼu hola. ʼE koutou maʼu anai he ʼuhiga ki takotou fiafia mo kapau ʼe maʼa te ʼu meʼa ʼaē ʼi tokotou loto. Neʼe tohi fēnei e Paulo: “Ke tahi vakaʼi e te tagata takitokotahi ia tana gāue, pea ʼe fakafiafia anai ʼuhi pe ko ia totonu, kae ʼe mole fakafiafia anai ʼuhi he neʼe fakatatau mo he tahi.”—Kalate 6:4.

17. ʼAki hakotou faʼahiga palalau, koutou fakamatala fakanounou te lea fakatātā ʼo te ʼu taleta.

¹⁷ Koutou vakaʼi te lea fakatātā ʼo Sesu ʼo ʼuhiga mo te ʼu taleta, ʼaē ʼe fakamatala ia Mateo 25:14-30. Ko te tagata ʼaē neʼe tonu ke folau ki he tahi fenua, neʼe ina pāuiʼi tana ʼu tagata kaugana pea ina tuku kia nātou tana ʼu meʼa. “Ki te tahi neʼe ina tuku ki ai ia taleta e nima, pea lua ki te tahi, pea tahi pe ki te tahi ake, ʼo mulimuli pe ki te meʼa ʼe lavaʼi e te tagata takitokotahi.” ʼI te temi ʼaē neʼe toe liliu mai ai te pule ʼo vakaʼi tana ʼu meʼa mo tana ʼu tagata kaugana, koteā ʼaē neʼe ina maʼu? Ko te tagata kaugana ʼaē neʼe tuku age ki ai te ʼu taleta e nima neʼe ina maʼu te tahi ʼu taleta e nima. ʼO toe feiā aipe mo te tagata kaugana ʼaē neʼe tuku age ki ai te ʼu taleta e lua neʼe ina maʼu te tahi ʼu taleta e lua. Ko te tagata kaugana ʼaē neʼe tuku age te taleta e tahi neʼe ina tanu ia ʼi te kele pea neʼe mole ina gāueʼi ia ke tuputupu te koloā ʼo te pule. Neʼe koteā te tonu ʼo te pule ʼi te ʼaluʼaga ʼaia?

18, 19. (a) He koe neʼe mole fakatatau e te pule te tagata kaugana ʼaē neʼe ina maʼu te ʼu taleta e lua mo te tagata kaugana ʼaē neʼe ina maʼu te ʼu taleta e nima? (b) Koteā ʼaē ʼe akoʼi mai kia tatou e te lea fakatātā ʼo te ʼu taleta ʼo ʼuhiga mo te vikiʼi pe ko te fakatatau ʼo te ʼu gāue? (c) He koʼe neʼe kehekehe te fakamāu ʼo te toko tolu tagata kaugana?

¹⁸ ʼUluaki, tou vakaʼi age muʼa te ʼu tagata kaugana ʼaē neʼe tuku age kiai te ʼu taleta e nima pea mo te ʼu taleta e lua. Neʼe ʼui fēnei e te pule ki te ʼu tagata kaugana takitokotahi ʼaia: “ ʼE lelei, tagata kaugana agalelei pea mo agatonu!” Neʼe feala koa ke ina ʼui te faʼahi ʼaia ki te tagata kaugana ʼaē neʼe ina maʼu te ʼu taleta e nima mo kapau neʼe maʼu e te tahi tagata kaugana he ʼu taleta pe e lua? Kailoa! Kae neʼe mole ina ʼui ki te tagata kaugana ʼaē neʼe ina maʼu te ʼu taleta e lua: ‘He koe koa neʼe mole ke maʼu he ʼu taleta e nima? Koteā tona tupuʼaga, sio ki te tagata ʼaē ʼe kaugā popūla mo koe pe ko te fia ʼaē neʼe ina maʼu maʼa ʼaku!’ Kailoa, ko te pule manavaʼofa, ʼaē ʼe ina fakatātā ia Sesu, neʼe mole ina fai he ʼu fakatatau. Neʼe ina tuku age te ʼu taleta “ ʼo mulimuli ki te meʼa ʼe lavaʼi e te tagata takitokotahi,” pea neʼe mole fakaʼamu ia ke toe foaki age he meʼa ʼi te ʼu meʼa ʼaē neʼe ina tuku age kia nātou takitokotahi. Neʼe tatau te fakavikiviki ʼaē neʼe fai kia nāua, he neʼe nā gāue ʼaki tona loto katoa maʼa tanā pule. ʼE feala ke tou maʼu he ako mai te faʼahi ʼaia.

¹⁹ ʼE moʼoni, neʼe mole fai he fakavikiviki ki te tolu tagata kaugana. ʼI tona fakahagatonu, neʼe lī ia ki te fakapōʼuli ʼo tuʼa. ʼI tana maʼu te taleta pe e tahi, neʼe mole manatu ia ke ina fakatuputupu ke lahi age tana ʼu taleta ʼi te tagata kaugana ʼaē neʼe foaki age ki ai te ʼu taleta e nima. Kailoa, neʼe mole ina faigaʼi pe la ke ina fakatuputupu. Neʼe kovi ʼaupito tona fakamāuʼi, he ko tona loto neʼe “agakovi pea mo piko,” ʼo hā ʼaki ai tana mole ʼofa ʼaē ki tona pule.

20. E feafeaʼi te sio ʼa Sehova ki ʼotatou ʼu tuʼakoi?

²⁰ ʼE loto e Sehova ke tou ʼofa kia ia ʼaki totatou mālohi katoa, pea ko te tahi meʼa ʼaē ʼe fakaloto fīmālie heʼe “ina ʼiloʼi lelei pe te meʼa ʼaē neʼe gaohi ʼaki ia tatou, ʼe ina manatuʼi ko tatou ko te efu pe”! (Pesalemo 103:14) ʼE ʼui ia Tāʼaga Lea 21:2 ko “Sehova ʼe ina fuafua totatou ʼu loto”—kae mole ina fuafua te ʼu hola ʼaē ʼe tou fai. ʼE mahino kia ia ʼe ʼi ai tatatou ʼu tuʼakoi, ohage ko te faʼahi ʼo te paʼaga, mo te faʼahi fakasino, mo te faʼahi ʼo te loto, pe ko te tahi age ʼu faʼahi. (Isaia 63:9) Kae ʼe toe fakaʼamu pe foki e Sehova ke tou fakaʼaogaʼi fakalelei te ʼu meʼa fuli ʼaē ʼe tou maʼu, totatou temi, te malave ʼo tatatou gāue ki niʼihi, pea mo totatou ʼu paʼaga, ʼo mulimuli ki tatatou ʼu fealagia. Ko Sehova ʼe haohaoa, kae ʼi tana ʼu felogoi mo tana kau atolasio heʼe haohaoa, ʼe mole ina fakamaʼua ke nātou haohaoa mo nātou. ʼI tana ʼu felogoi mo tana kau atolasio, neʼe mole heʼeki ina fai he ʼu fakatuʼutuʼu pe ko he ʼu fakaʼamu ka mole feala ke hoko.

21. Kapau ʼe tou fai totatou tauhi kia Sehova ʼaki te ʼofa, koteā te ʼu fua lelei ʼaē ka tou maʼu?

²¹ Ko te ʼofa kia Sehova mo totatou loto katoa, mo totatou nefesi katoa, mo totatou laumālie katoa, pea mo totatou mālohi katoa, “ ʼe maʼuhiga ake ia ʼi te ʼu holokoseta pea mo te ʼu sakilifisio fuli.” (Maleko 12:33) Kapau ʼe uga tatou e totatou ʼofa, pea ʼe tou fai anai ia meʼa fuli ʼaē ʼe feala ke tou fai ʼi te selevisi ʼo te ʼAtua. Neʼe tohi e Petelo, kapau ko te ʼu kalitate ʼaē ʼe nātou fakahā te aga faka lotu, ʼo kau ai mo te ʼofa, “ ʼe maʼu ia koutou pea ʼe mahu ai, ʼe nātou tāʼofi anai koutou mai te liliu ʼo fakaʼaoga noa peʼe noa ʼo ʼuhiga mo te ʼatamai mālama totonu ʼo totatou ʼAliki ko Sesu Kilisito.”—2 Petelo 1:8.

[Nota ʼi te lalo pasina]

Toe Vakaʼi

◻ Ko te mālohi fea ʼaē ʼe tonu ke ina taki tatatou tauhi ki te ʼAtua?

◻ E feafeaʼi te fakamaʼua ʼo tatou e te ʼofa ʼa Kilisito ke tou tauhi kia Sehova?

◻ Ko te hele fea ʼo te kau Faliseo ʼaē ʼe tonu ke tou tekeʼi?

◻ He koe ʼe mole ko he aga fakapotopoto ke fakatatau ʼo tatatou tauhi mo te tauhi ʼo he tahi Kilisitiano?

[Paki ʼo te pasina 16]

Ko te ʼu meʼa ʼe lavaʼi, mo te mālohi, pea mo te ʼaluʼaga ʼo te hahaʼi takitokotahi ʼe kehekehe