Te Ala Fāveliveli ʼAē ʼe Fakatau Ki Te ʼĀteaina
KO ʼIHI hahaʼi popoto ʼe nātou fihi ʼo ʼuhiga mo te ʼatulaulau, ʼo nātou ʼui ʼe puleʼi e te ʼu lao. Ko te ʼu lao ʼaia ʼe nātou takitaki ia meʼa fuli mai te kiʼi atome ki te ʼu foʼi galaxies lalahi ʼaē ʼe faʼufaʼu e te ʼu lauʼi miliale fetuʼu. Kanapaula neʼe mole ʼi ai he ʼu lao, neʼe mole feala anai ia ke fai he fakatuʼutuʼu pea mole maʼu he mahino; neʼe mole feala anai ia ke ʼi ai he maʼuli. ʼAki te ʼiloʼi ʼo te ʼu lao ʼaia pea mo tonatou fakaʼaogaʼi, neʼe feala ki te tagata ke ina fakahoko te ʼu gāue fakaofoofo, ohage ko te haʼele ʼi te māhina pea mo te sio ʼi tatatou ʼu televisio ki te lanu ʼo te ʼu paki ʼo te ʼu potu kehekehe ʼo te kele pea mo te ʼu meʼa ʼaē ʼe tuʼu mamaʼo ʼi te lagi.
Kae e feafeaʼi ki te ʼu lao ʼaē ʼo ʼuhiga mo te ʼu aga ʼaē ʼe tonu ke tou fai? Ko te mulimuli ki te ʼu aga ʼaia ʼe maʼu pe koa te fua manuʼia pea mo te fua lelei? Tokolahi ʼe hage kia nātou ʼe mole ʼi ai pe la he ʼu lao ʼo ʼuhiga mo te ʼu aga ʼaē ʼe tonu ke fai, pea ʼe nātou fili he filosofia ʼe ina fakagafua ia meʼa fuli peʼe ko he lotu ʼe ʼalutahi mo te ʼu meʼa ʼaē ʼe nātou holi kiai.
Kae ʼe ʼi ai ʼihi ʼe nātou fili te tahi age ala, te ‘ala fāveliveli ʼaē ʼe fakatau ki te maʼuli’ ohage ko tona fakahā ʼi te Tohi-Tapu. ʼAua naʼa tou punamaʼuli anai mo kapau e tokosiʼi ia nātou ʼaē ka nātou fili te ala ʼaia, he neʼe ʼui fēnei e Sesu ʼo ʼuhiga mo te ala fāveliveli ʼaia: “Tokosiʼi ia nātou ʼe nātou maʼu.” (Mateo 7:14) He koʼe ko te tokosiʼi pe?
Koteʼuhi ko te ala fāveliveli ʼe faka tuʼakoi ʼaki te ʼu lao pea mo te ʼu pelesepeto ʼa te ʼAtua. Ko nātou pe ʼaē ʼe nātou faiga fakamalotoloto ke nātou maʼuliʼi te ʼu lekula ʼa te ʼAtua, ʼaē ʼe haʼele ʼi te ala fāveliveli. ʼE kehekehe ʼosi ia mo te ala laulahi, ʼaē ʼe ina foaki he faʼahiga ʼāteaina kae ʼi tona fakahagatonu ʼe ko he ʼāteaina ia ʼe ina fakapōpulaʼi te hahaʼi, kae ki te ala fāveliveli, ʼe hage ʼe faka tuʼakoi, kae ʼe ina faka ʼāteaina he tahi ki te ʼu faʼahi ʼaē ʼe maʼuhiga kiai. Ko tona ʼu tuʼakoi ʼe fai ʼaki pe “te lao haohao ʼaē ʼa te ʼāteaina.”—Sake 1:25.
E Feafeaʼi Te Faka ʼĀteaina ʼa Te Ala Fāveliveli?
ʼE moʼoni, ʼe mole faigafua tuʼumaʼu te nofo ʼi te ala fāveliveli. Ko te tagata fuli ʼe heʼe haohaoa pea kua māhani kia ia te fai ʼo te meʼa ʼaē ʼe kovi. Koia e lagi feala ki he tahi ke ina tuku ia ia ke hēʼia. Pea tahi ʼaē meʼa, ko te ʼu fua lelei ʼaē ʼe kita maʼu ʼi te ‘ala lauveliveli’ ʼe ʼaoga kiai he faʼahiga akonakiʼi ʼo kita totonu peʼe ko he ʼu fakatonutonu, heʼe ko te ʼAtua ʼe ina ‘akoʼi tatou ke ʼaoga kia tatou totonu.’—Isaia 48:17; Loma 3:23.
Tou toʼo he fakatātā: Ko te ʼu mātuʼa poto ʼe nā fai he polokalama ʼo ʼuhiga mo te ʼu meʼa ʼaē ʼe tonu ke kai e tanā fānau. ʼE feala pe ʼi ʼihi temi ke uga fakamālohi ke muliʼi te polokalama ʼaia ʼi te ʼu temi kai. Kae ka lalahi age leva te ʼu tamaliki, ʼe nātou fakafetaʼi anai ki te akonaki ʼofa ʼaē ʼa tanatou ʼu mātuʼa. ʼI tanatou lalahi age leva, ʼe nātou maʼu anai te aga fakapotopoto ʼo ʼuhiga mo he meʼa kai ki tonatou maʼuli mālōlō. Pea ʼe mole hage anai kia nātou ʼe faka tuʼakoi tanatou kai, koteʼuhi ʼe mahu ʼaupito te ʼu faʼahiga meʼa kai kehekehe.
ʼI hona ʼaluʼaga fakalaumālie, ko te ʼAtua ʼe ina toe fai feiā kia nātou ʼaē ʼi te ala lauveliveli ʼaē ʼe fakatau ki te maʼuli. ʼE ina fakatuputupu ʼi te loto ʼo te hahaʼi agavaivai te ʼu holi ʼe lelei, ʼe fakatau ki te manuʼia pea mo te ʼāteaina moʼoni. ʼE ina fai te faʼahi ʼaia ʼo ina foaki mai tana Folafola, ia te Tohi-Tapu. Pea tahi ʼaē meʼa, ʼe ina fakaafe tatou ke tou kole ki te laumālie ke ina tokoniʼi tatou, pea ʼe ina fakatotonu mai ke tou fakatahi mo totatou ʼu tēhina Kilisitiano, ʼaē ʼe feala ke nātou fakaloto mālohiʼi ia tatou ke tou nonofo maʼu ʼi te ala lauveliveli. (Hepeleo 10:24, 25) Ei, ko te ʼAtua ʼe ʼofa, pea ko te kalitate māʼoluga ʼaia ʼe ina faka maʼuhigaʼi tana ʼu fakatuʼutuʼu pea mo tana ʼu puleʼaki fuli.—1 Soane 4:8.
Kapau ʼe maʼu te ʼofa, te tokalelei, te agalelei, te lolomi ʼo kita, pea mo te tahi ʼu fua ʼo te laumālie ʼo te ʼAtua, pea ʼe mole hage te ala lauveliveli ia ʼe faka tuʼakoi. Ohage ko tona ʼui e te Tohi-Tapu, “ki te taʼi ʼu meʼa ʼaia ʼe mole he lao.” (Kalate 5:22, 23) “ ʼI te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe nofo ai te ʼāteaina.” (2 Kolonito 3:17) Tatau aipe la mo te temi nei, ko te kau Kilisitiano moʼoni kua nātou maʼu te kiʼi faʼahi veliveli ʼo te ʼāteaina ʼaia. ʼE nātou ʼāteaina mai te ʼu lotomamahi lahi ʼaē ʼe tau mo te hahaʼi ia ʼaho nei, ohage la ko te mataku ki te temi ka haʼu pea mo te mataku noa pe ki te mate. ʼI meʼa taulekaleka anai hakita mamata ki te temi ka haʼu ʼi te temi ʼaē ka “fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai”! (Isaia 11:9) ʼO toe feiā aipe ko te mataku ʼaē ki te fakapō ʼe puli anai ia. Ko te ʼu loka pea mo te ʼu ʼā ʼe mole toe ʼi ai anai ia. ʼE logoʼi anai e te hahaʼi fuli kua nātou ʼāteaina pea mo fīmālie, ʼi te ʼaho mo te po, ʼi fale pea mo tuʼa. ʼE hoko moʼoni ai leva te ʼāteaina!
ʼE Tokoni Moʼoni Anai Te ʼAtua Kia Tatou
ʼI tona fakahagatonu, ko te maʼuli ʼaē ʼo mulimuli ki te ʼu lekula ʼa te ʼAtua ʼe fakamaʼua te toe faiga lahi, kae ko “tana ʼu fakatotonu ʼe mole mamafa,” kia tatou, logope la totatou ʼuhiga heʼe haohaoa. (1 Soane 5:3) Ka tou mulimuli ki te ala fāveliveli pea mo logoʼi te ʼu lelei ʼi te haʼele ʼi te ala ʼaia, ʼe tou fakatuputupu te loto fehiʼa ki te ʼu aga pea mo te manatu ʼaē ʼe ʼiloga ia nātou ʼaē ʼi te ala laulahi. (Pesalemo 97:10) Ko te fakalogo ki te lao ʼa te ʼAtua ʼe fakamaʼua ke tou foaki te meʼa lelei fuli ʼaē ia tatou. ʼO kehekehe ia mo “te mamahi ʼo te loto” pea mo te “holo ʼo te laumālie” ʼaē ko he ʼu fakaʼiloga ʼi te tokolahi, ʼe ʼui fakapapau fēnei e te ʼAtua: “Koʼeni ko ʼaku tagata kaugana ʼe nātou kalaga fakafiafia anai, ʼuhi ko te lelei ʼo te loto.” ʼIo, ko he loto ʼe akoʼi e Sehova ʼe fiafia pea mo ʼāteaina.—Isaia 65:14.
Neʼe mate ia Sesu moʼo faka fealagia te ʼāteaina moʼoni kia tatou. ʼE ʼui fēnei e te Tohi-Tapu: “Ko te ʼAtua ʼi tona ʼofa lahi ʼaē ki te malamanei neʼe ina foaki mai tona ʼAlo ʼulu tokotahi, koteʼuhi ke feala kia ia ʼaē ʼe haga tui kia te ia ke ʼaua naʼa fakaʼauha, kae ke ina maʼu te maʼuli heʼegata.” (Soane 3:16) ʼI te temi nei, ʼi tona ʼuhiga Hau ʼo te Puleʼaga ʼo te ʼAtua ʼi selo, ʼe lolotoga foaki e Sesu te ʼu lelei ʼo te sakilifisio ʼaia. ʼI te hili pe ʼo “te mamahi lahi,” mokā fakaʼauha anai te ala laulahi pea mo nātou ʼaē ʼe ʼolo ʼi ai, ʼaki he lotoʼutaki ʼe ina kamata taki anai te toe ʼo te hahaʼi fakalogo ʼaē neʼe nātou haʼele ʼi te ala lauveliveli, ʼo ina taki nātou ki te maʼuli haohaoa. (Fakahā 7:14-17; Mateo 24:21, 29-31) ʼI te temi leva ʼaia ʼe tou ʼiloʼi anai te fakahoko ʼo te fakapapau lahi ʼaenī: “Ko te ʼu meʼa ʼaē neʼe fakatupu ʼe faka ʼāteaina anai mo nātou mai te popūla ʼo te maʼuli popo ke nātou maʼu te ʼāteaina faka kolōlia ʼo te fānau ʼa te ʼAtua.” Ko te ʼāteaina ʼaē ʼe foaki e te ʼAtua ʼe mole feala ke puli ʼi he temi. Kae ko te mate ʼe pulihi anai.—Loma 8:21; Fakahā 21:3, 4.
Kapau ʼe sio pea mo mahino lelei he tahi peʼe fakatau kifea te ala fāveliveli, ʼe feala anai kia ia ke ina fili te ala ʼaia pea mo haga haʼele ai. Tāfito la ki te kau tūpulaga, ʼe tokoniʼi nātou, ke nātou maʼu te fakasiosio poto pea mo nātou muliʼi te ʼu lekula ʼa te ʼAtua ʼaē ʼe nātou faka ʼuhiga ohage ko he ʼu tapu ki te ʼu meʼa ʼaē ʼe nātou fia fai kiai. ʼE akoʼi age kia nātou ke nātou mahino ko te ʼu meʼa ʼaia ko he fakamoʼoni ʼo te ʼofa ʼo te ʼAtua pea ko he puipui maʼa nātou mai te ʼu meʼa kovi ʼo te ala laulahi. (Hepeleo 12:5, 6) ʼIo, ʼe ʼaoga ke tou faʼa kātaki, ʼo tou manatuʼi ʼe tonu ke maʼu he temi fualoa moʼo fakatuputupu he ʼu kalitate pea mo he ʼu holi fakaʼatua, ohage pe ko he fuʼu ʼakau, ʼe hoki maʼu hona ʼu fua lelei ʼaki te temi. Kae ʼe fua anai te fuʼu ʼakau ʼaia mo kapau ʼe gaohi fakalelei pea mo fakavai.
Koia koutou ako te Folafola ʼa te ʼAtua, koutou fakakaugā mo niʼihi Kilisitiano, pea mo koutou “kole tuʼumaʼu” te laumālie maʼoniʼoni. (1 Tesalonika 5:17) Koutou falala ko te ʼAtua ʼe tokoni anai kia koutou ki te “fakatonutonu [ʼo tokotou] ʼu ala.” (Tāʼaga Lea 3:5, 6) Kae ʼe ʼaoga fuli koa te ʼu faʼahi ʼaia? ʼE ʼi ai moʼoni koa hona ʼu fua? Ei, neʼe fua lelei kia Tom pea mo Malia, ʼaē neʼe tou talanoa kiai ʼi te alatike kua ʼosi.
Neʼe Nā Tuku Tanā Haʼele ʼi Te Ala Laulahi
ʼE tohi fēnei e Tom: “ ʼI te vaelua ʼo te ʼu taʼu ʼaē neʼe kamata mai te 1970 ki te 1979, neʼe ma felāveʼi mo te kau Fakamoʼoni ʼa Sehova ʼi te tahi ʼaho neʼe ʼaʼahi ai māua e te Fakamoʼoni. Neʼe iku te felogoi ki te ako faka Tohi-Tapu. Neʼe ʼau kamata fakamaʼa māmālie toku maʼuli. Neʼe ʼau papitema ʼi te 1982 pea ʼe ʼau gāue nei ʼi te kokelekasio ʼo toku kolo. Kua papitema mo tamā tama. ʼE ʼau fakamālo ki toku ʼohoana ʼi tana kātakiʼi ʼau ʼi te ʼu taʼu ʼaenī kua hili ia muʼa ʼo taku akoʼi te moʼoni. Pea ia meʼa fuli, ʼe ʼau fakafetaʼi kia Sehova pea mo tona ʼAlo, ia Kilisito Sesu, ʼo ʼuhiga mo te ʼu meʼa fuli ʼaē neʼe nā foaki mai kia tatou pea mo te falala ʼaē ʼe tou maʼu nei ʼo ʼuhiga mo te temi ka haʼu.”
Pea e feafeaʼi kia Malia? ʼI tana ia manatu ʼe mole fakamolemole anai ia ia e te ʼAtua ʼi he temi, kae neʼe fia ako ia ʼuhi ko tana ʼu tamaliki. ʼI tana logo ʼaē ʼe ako te kau Fakamoʼoni ʼa Sehova pea mo te hahaʼi ʼo tona vāhaʼa fale ia te Tohi-Tapu, neʼe ina kole mo ia ke fai age he tokoni ki ai. Kae, neʼe faigataʼa tana tuputupu ʼuhi ko tana ʼu agamāhani ʼaē ʼe kovi. Neʼe tuputupu te ako ʼi ʼihi temi pea toe homuli ʼi ʼihi temi. Kae ko tana kiʼi taʼahine ʼe taʼu fitu, neʼe fēnei tana fakaloto mālohiʼi ʼo tana faʼe: “ ʼAua naʼa ke tuku tau ako, Mama. ʼE feala pe ke ke hoko atu!” ko tana ʼui ʼaia. Pea neʼe toe hoko atu e Malia tana ako.
ʼI te temi ʼaē neʼe toe liliu mai ai te tagata ʼaē neʼe nā nonofo fakatahi, mo ia pe foki neʼe ko he tagata toloke ʼi muʼa atu, neʼe haʼu mo ia ʼo kau fakatahi ki te ako. Pea neʼe nā mālo ʼi tanā ʼu agamāhani ʼaē ʼe kovi. Ki muli age, ʼi tanā ʼosi ʼohoana ʼi te puleʼaga pea mo nā papitema, neʼe nā maʼu te toe fiafia lahi pea ko tanā hoki logoe ki tonā maʼuli ʼe hage ko he foʼi famili moʼoni. Meʼa fakaʼofaʼofa, neʼe maʼu e Malia te SITA, kae neʼe mate ʼaki pe tana tui moʼoni ki te fakapapau ʼa te Tohi-Tapu ʼo ʼuhiga mo te fakatuʼuake pea mo te maʼuli ʼi te palatiso kua fakamaʼa ʼi te ʼu fakaʼiloga fuli ʼo te ala laulahi kākā.
Ei, ʼe feala hakita mole mavae ʼi te ala laulahi pea mo ʼātea ʼaē ʼe fakatau ki te fakaʼauha. Neʼe ʼui maʼa Kilisito Sesu: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, ʼaē ko te ʼAtua moʼoni pe e tahi pea mo ia ʼaē neʼe ke fekauʼi mai, ia Sesu Kilisito.” (Soane 17:3) Koia he koʼe koa ʼe mole koutou fakatotonu ke koutou haʼele ʼi te ala lauveliveli ʼaē ʼe fakatau ki te maʼuli? Kapau ʼe koutou fai fakamalotoloto pea mo muliʼi te ʼu meʼa ʼaē ʼe koutou ako ʼi te Folafola ʼa te ʼAtua, ʼe feala anai kia koutou takitokotahi ke koutou maʼu te fakapapau ʼofa ʼaenī ʼa te Tohi-Tapu: “ ʼE koutou ʼiloʼi ai anai te moʼoni, pea ko te moʼoni ʼe ina faka ʼāteaina anai koutou.”—Soane 8:32.