ʼE Nonofo Koa Te Kau ʼAselo Mo Tatou?
ʼE ko he meʼa neʼe hoko fakavilivili. ʼI te lahi fau ʼo tana fakakaukauʼi ʼo te ʼu meʼa ʼaē ʼe hoko kia ia, neʼe mole fakatokagaʼi e Marilynn neʼe lolotoga haʼele ia ʼi te ala ʼaē ʼe fakalaka ai te ʼu saliote afi. Fokifā pe, neʼe logo ki te toe gugulu. Neʼe fakasiosio ki te ala ʼaē ʼe haʼele ai, ʼo ina fakatokagaʼi ʼe tuʼu ʼi te ala ʼaē ʼe haʼu tonu ai te saliote afi! Kua tete ʼosi ia Marilynn, kua mate noa te ʼu koga ʼo tona sino ʼi te lahi fau ʼo tona mataku. ʼI te kua ōvi fau mai ʼo te saliote afi neʼe mole kei feala hana sio ki te ʼu mata ʼo te tagata ʼaē ʼe ina taki te saliote afi ʼaia, pea mo te mataku ʼaupito ʼaē neʼe hā ʼi te fofoga ʼo te tagata ʼaia. Neʼe mole heʼeki galo ia Marilynn te meʼa ʼaē neʼe hoko ki muli age. Neʼe ina ʼui fēnei: “Neʼe hage ko he foʼi tagata lahi neʼe ina haga ʼo humuki ʼau mai muli. Neʼe ʼau tō kehe mai te ala ʼo te saliote afi pea neʼe ʼau tō ifo ki te ʼu mamala ʼaē ʼe tuku ʼi te ʼu tafaʼaki ʼo te ala ukamea ʼo te saliote afi.” Neʼe mole lavea kovi ia Marilynn, koia neʼe tuʼu ake ai moʼo fakamālo kia ia ʼaē neʼe ina hāofaki ia ia—kae neʼe mole sio pe la ki he tahi! Koteā tana ʼui ʼo ʼuhiga mo te meʼa ʼaia neʼe hoko? “Ko toku ʼaselo tauhi ʼaē neʼe ina hāofaki ʼau,” ko te ʼui ʼaia ʼa Marilynn. “Ko ai he tahi neʼe feala ke ina fai te meʼa ʼaia?”
KO TE mālama heʼe ʼamanaki ʼaenī, kua lahi tana talanoa ʼo ʼuhiga mo te ʼu ʼaselo. ʼI te ʼu taʼu ʼaenī, neʼe talanoa ʼi te televisio, ʼi te ʼu sinema, ʼo toe feiā mo te ʼu gaoʼi ʼaē ʼe fai ʼi Broadway ki te ʼu meʼa ʼaē ʼe maʼuʼuli ʼi te lagi. Ko te ʼu tohi ʼaē ʼe talanoa ki te ʼu ʼaselo, ʼe kau ki te ʼu tohi lotu ʼaē ʼe haʼele lelei tona fakatau. ʼE ʼi ai te ʼu kautahi, mo te ʼu seminalio ʼe nātou tauhi ki te kau ʼaselo, pea mo te ʼu nusipepa ʼe nātou talanoa ki ai. Neʼe faʼufaʼu te ʼu kūtuga moʼo tokoni kia koutou—ohage ko te ʼui ʼa te alatike—“ke koutou maʼu ‘te tokoni ʼa te kau ʼaselo tauhi.’ ”
Ko te ʼu meʼa ʼaē ʼe fai moʼo fakahāhā te ʼu meʼa ʼo ʼuhiga mo te kau ʼaselo, ʼe nātou faka fealagia ki te hahaʼi faifakatau ke nātou fakatau tanatou ʼu tuʼuga meʼa kehekehe. “Ko te ʼu meʼa fuli ʼaē ʼe tuʼu ai he paki ʼo he ʼaselo, ʼe ko he ʼu meʼa ʼe fakatau lelei,” ko te ʼui ʼaia ʼa te fafine ʼo te fale koloā ʼi Amelika. ʼE ina fakatau te ʼu tuʼuga tohi ʼo ʼuhiga mo te kau ʼaselo, pea mo “te ʼu fakatātā ʼo te kau ʼaselo, te ʼu kiʼi meʼa ʼe fakapipiki ki te ʼu kofu, te ʼu kiʼi pepe, te ʼu kofu sino, te ʼu paki pea mo te ʼu kate fai fakaafe”—ko te ʼu meʼa fuli ʼaia ʼe higoaʼi e te tagata fai sulunale ko “te ʼu lelei faka selo.”
Kae ʼe ʼui e te hahaʼi ʼaē ʼe tauhi ki te kau ʼaselo, ko te ʼu meʼa ʼaē ʼe nātou fai ʼe mole ko he ʼu meʼa ʼe nātou fai feiā pe. Moʼo fakamoʼoni ʼo tanatou ʼu palalau, ʼe nātou fakahā te ʼu meʼa neʼe hoko moʼoni kia nātou—te ʼu felāveʼi “moʼoni” mo te kau ʼaselo. Ko ʼihi ʼe nātou ʼui neʼe nātou sisio ki te ʼu ʼaselo ʼe nātou hā ʼi te ʼu sinoʼi tagata. Ko ʼihi neʼe nātou sio ki te mālama, mo logo ki te leʼo, ohage ʼe nātou logoʼi he tahi ʼi ʼonatou tafa, peʼe hage ko te ʼu meʼa ʼaē ʼe nātou ʼui, neʼe uga nātou e te kau ʼaselo. Tokolahi, ohage ko Marilynn, ʼe nātou ʼui ko te ʼaselo ʼaē neʼe ina hāofaki nātou.
Koteā te meʼa ʼaē ʼe hoko? “ ʼI taku manatu kua toe manako te hahaʼi ki te ʼu meʼa fakalaumālie,” ko te ʼui ʼaia ʼa Joan Wester Anderson, ʼaē neʼe ina tā te ʼu tohi e lua ʼo ʼuhiga mo te ʼu fetaulaki “mo te ʼu meʼa fakalaumālie.” Ko Alma Daniel, ʼaē neʼe tokoni ki te fai ʼo te tahi tohi, ʼe lahi age te ʼu meʼa neʼe talanoa kiai. ʼE ina ʼui ko te kau ʼaselo “ ʼe nātou faiga nei ke ʼiloʼi nātou e te hahaʼi e tokolahi. Neʼe lahi te ʼu meʼa neʼe tou sio kiai ʼo ʼuhiga mo nātou, koteʼuhi ʼe nātou loto ke hoko feiā te ʼu meʼa. ʼE ko nātou ʼaē ʼe nātou fai te ʼu meʼa ʼaia.”
Kae ʼe moʼoni koa te ʼu meʼa ʼaia? Peʼe ʼi ai koa he tahi age meʼa ʼe ina fakatupu te manako ʼaia ʼa te hahaʼi ki te kau ʼaselo? Ke tou maʼu he tali kiai, ʼe tonu ke tou vakaʼi te Folafola ʼa te ʼAtua. ʼE tou vakaʼi anai, ʼe fakahā mai e te Tohi-Tapu te moʼoni ʼo ʼuhiga mo te kau ʼaselo, ohage ko te meʼa ka tou vakaʼi.