ʼE ʼi Ai Koa Hakotou ʼAselo Tauhi?

ʼE KOUTOU tui koa ʼe ʼi ai hakotou ʼaselo tauhi? Ko te tokolahi ʼe nātou tui kiai. ʼI te faʼahi ʼaia, ʼe ʼui e te hahaʼi ʼo ʼuhiga mo te fafine ʼi te potu hihifo ʼo Kanata, ʼe feala ke faka felogoi mo te kau ʼaselo. Kapau ʼe koutou fakahā age tokotou higoa katoa pea mo koutou foaki age he falā kia ia, pea ʼe ina fai anai ke koutou faka felogoi mo takotou ʼaselo tauhi. ʼUluaki, ʼe metitasio ʼo ina sioʼi te ulo ʼo te foʼi sela. ʼOsi ʼaia pea ʼe hā te ʼaselo ʼe ina tala age te logo ke ina fakahā atu kia koutou. Tahi ʼaē meʼa, ʼe fakamatala atu e te fafine ʼaia te agaaga ʼo te ʼaselo.

Maʼa ʼihi, ʼe lagi tatau te meʼa ʼaia pea mo te hisitolia ʼo ʼuhiga mo te Hau ʼo Falani ko Louis 9. Neʼe lagi totogi kovi ʼaupito te ʼu fuluʼi moa ʼaē neʼe ina toʼo, he neʼe ʼui neʼe tō mai te ʼu kapakau ʼo te Alekaselo ko Mikaele. Logope la te mole faʼa tui ʼa te hahaʼi ki te fakamatala ʼaia, kae ko te tokolahi ʼe mole nātou lotolotolua ʼo ʼuhiga mo te ʼu meʼa ʼaē ʼe tala e te fafine ʼi Kanata.

ʼE Nātou Fia ʼIloʼi Te Kau ʼAselo

ʼI te ʼu taʼu pe ʼaenī, neʼe lahi te fia ʼiloʼi ʼa te hahaʼi ʼo ʼuhiga mo te kau ʼaselo. ʼI te televisio pea ʼi te ʼu sinema, mo te ʼu tohi, mo te ʼu sulunale, pea mo te ʼu nusipepa, ʼe fakahā mai kia tatou ko te ʼu ʼaselo ʼe nātou fakaloto fīmālie ia nātou ʼaē ʼe mahahaki kovi, mo nātou ʼaē ʼe putu, mo nātou foaki te poto, pea mo nātou hāofaki te hahaʼi mai te mate. ʼI Amelika, ko hahaʼi ʼe teitei toko 20 miliona ʼe nātou sioʼi ʼi te televisio ʼi te vāhaʼa fuli, te ʼu ʼata ʼe hā ai te ʼu meʼa ʼaē ʼe fai e te kau ʼaselo maʼa te hahaʼi. ʼI te lisi ʼo te fale fakatau tohi, ʼe ko tohi e 400 tupu ʼe talanoa tāfito ki te kau ʼaselo.

ʼE fakamatala e te tohi foʼou pe neʼe hāofaki feafeaʼi e te ʼu ʼaselo tauhi te maʼuli ʼo te kau tagata solia ʼi te tau. ʼI te ʼu pepa ʼaē ʼe pulusi ki te ʼu motokā, ʼe tohi ai ko te kau ʼaselo tauhi ʼe nātou puipui te hahaʼi uli motokā. Ko te ʼu kautahi, mo te ʼu fono, pea mo te ʼu seminalio ʼe nātou faka mafola te ako ʼo ʼuhiga mo te kau ʼaselo, pea ʼe nātou tokoni ki te hahaʼi ke nātou felogoi mo te kau ʼaselo ʼaia.

Ko Eileen Freeman neʼe ina tohi te ʼu tohi e tolu ʼo ʼuhiga mo te kau ʼaselo pea mo ina tā te sulunale ʼe talanoa tāfito kia nātou. ʼE ina ʼui fēnei: “ ʼE ʼau tui ko te ʼu ʼaselo fuli ʼaē ʼi selo ʼe ko he ʼu ʼaselo tauhi ʼi te kele, ʼe mole gata ʼaki pe tanatou fakavikiviki ki te ʼAtua ʼi te lagi, kae ʼe nātou tokaga moʼoni ki te puipui ʼa te hahaʼi pea mo ʼihi atu faʼahiga maʼuli ʼi te Kele. ʼE hinoʼi te ʼaselo tauhi kia tatou takitokotahi ʼi te temi ʼaē ʼe tou tutupu ai ʼi te fatu ʼo tatatou faʼe, pea ʼe ina leʼoleʼo tatou ʼi tatatou kei fuafatuʼi, ʼi te ʼaho ʼaē ʼe fānauʼi ai tatou, ʼi totatou maʼuli ʼi te malamanei ʼaenī, ʼo aʼu ki te ʼaho ʼaē ka ina taki ai tatou mai te malamanei ʼaenī ki te lagi faka kolōlia.” ʼE hā lelei ʼaki te ʼu palalau ʼaia pe koteā te manatu ʼa te hahaʼi ʼo ʼuhiga mo te ʼu ʼaselo tauhi.

ʼI te ʼu temi fakatupu lotohoha pea mo faigataʼa ʼaenī, ʼe fakaloto fīmālie ki te hahaʼi hanatou tui ʼe ʼi ai hanatou ʼaselo tauhi ʼe ina puipui nātou. Koteā ʼaē ʼe ʼui e te Folafola ʼa te ʼAtua, te Tohi-Tapu, ʼo ʼuhiga mo te faʼahi ʼaia? ʼE tonu koa ke tou faiga ke tou felogoi mo te kau ʼaselo? ʼE fia ʼiloʼi koa e te kau ʼaselo pe koteā te ʼu aga ʼaē ʼe tou fai, pea mo te ʼu akonaki faka lotu ʼaē ʼe tou tui kiai? Koteā te tokoni ʼaē ʼe feala ke nātou foaki mai? ʼE tali anai te alatike ʼaē ka hoa mai ki te ʼu fehuʼi ʼaia.