Ko He Maʼuli ʼe Lelei Age—Kua Fakaōvi Mai!

KOUTOU fakakaukauʼi ki he tahi ʼe ina fakahā fakatomuʼa peʼe feafeaʼi anai te temi, pea ko te ʼu meʼa fuli ʼaē ʼe ina fakahā ʼe hoko tuʼumaʼu. Kapau ʼe ina fakahā ʼi te ʼu talalogo ʼo te afiafi ʼe ʼua anai ʼi te ʼapogipogi, ʼe koutou toʼo anai mo koutou tokotou fakamalu ʼi takotou mavae mai takotou ʼapi, ʼi te ʼapogipogi ʼaia. Kua koutou falala kia ia, koteʼuhi neʼe koutou sio ko te ʼu meʼa ʼaē neʼe ina fakahā, neʼe hoko moʼoni. Kua koutou mulimuli ki te ʼu meʼa ʼaē ʼe ina ʼui atu.

ʼI te temi nei, ʼe lava feafeaʼi hatatou tui ki te fakapapau ʼa Sehova ʼo ʼuhiga mo he maʼuli ʼe lelei age ʼi te palatiso ʼi te kele? Koteā ʼaē ʼe fakahā e te ʼu meʼa ʼaē neʼe ina fai ʼi muʼa atu? Ko te fakahoko ʼo te ʼu lea faka polofeta ʼa te Tohi-Tapu ʼe ina fakamoʼoni lelei te ʼu meʼa ʼaē neʼe tohi ʼo ʼuhiga mo Sehova. ʼE ko he ʼAtua ʼe moʼoni papau te ʼu meʼa ʼaē ʼe ina ʼui pea ʼe tau mo te falala. (Sosue 23:14; Isaia 55:11) ʼE hoko moʼoni te ʼu fakapapau ʼa Sehova, koia ʼi ʼihi temi ʼe palalau ai ki te ʼu meʼa ʼaē ka hoko ʼi te temi ka haʼu, ʼo palalau ki te ʼu meʼa ʼaia ohage kua ʼosi hoko moʼoni. Ohage la, ʼi tana ʼosi fakapapau ʼo ʼuhiga mo te mālama foʼou ʼe mole toe ʼi ai anai te mate pea mo te putu, ʼe tou lau fēnei: “Kua hoko te ʼu folafola ʼaia [te ʼu tapuakina ʼaē neʼe fakapapau]!” ʼI te tahi faʼahiga palalau, “Ko he ʼu meʼa moʼoni!”—Fakahā 21:5, 6, vakaʼi te kiʼi nota ʼi te lalo pasina.

Ei, ko te fakahoko ʼo te ʼu fakapapau ʼaē neʼe fai e Sehova ʼi te temi muʼa ʼe ko he meʼa ʼe ina fakatupu ia tatou he loto falala, ʼe ina fakahoko anai tana fakapapau ke ina foaki ki te malamanei he maʼuli ʼe lelei age. Kae ko te temi fea koa ʼaē ka hoko anai te maʼuli lelei ʼaia?

Ko He Maʼuli ʼe Lelei Age—Ko ʼAfea Koa?

Kua tou ʼamanaki ke tou sio ki he maʼuli ʼe lelei age! ʼE feala ke tou tui papau ki te faʼahi ʼaia, koteʼuhi ʼe ʼui e te Tohi-Tapu ʼe hoko anai te ʼatu ʼu meʼa kovi ʼi te kele ʼi muʼa ʼo te fakatuʼu ʼo te Palatiso ki he maʼuli ʼe lelei age. Ko te ʼu meʼa kovi ʼaia ʼe lolotoga hoko nei.

Ohage la, neʼe fakakikite e Sesu Kilisito ʼe hoko anai te ʼu tau lalahi. Neʼe ina ʼui fēnei: “ ʼE tuʼu anai he fenua ki he tahi fenua pea mo he puleʼaga ki he tahi puleʼaga.” (Mateo 24:7) Neʼe hoko moʼoni te lea faka polofeta ʼaia. Lolotoga te taʼu 1914 ʼo aʼu ki te taʼu 1945, neʼe hoko te ʼu tau faka malamanei e lua, pea neʼe hoko ai mo te tahi ʼu tau, neʼe fetauʼaki ai te ʼatu ʼu fenua. “ ʼI te taʼu fuli, ko te lahi ʼo te kau mamate lolotoga te temi ʼaia [talu mai te Lua Tau Faka malamanei] neʼe laka age ʼo tuʼa lua ʼi te kau mamate ʼo te 19 sēkulō pea mo lahi age ʼo tuʼa fitu ʼi te kau mamate ʼo te 18 sēkulō.”—World Military and Social Expenditures 1993.

Ko te mafola ʼo te mahaki ʼe ko he tahi ʼaia fakamoʼoni ʼo te kua ōvi ʼo he maʼuli ʼe lelei age ʼi te Palatiso. Neʼe fakakikite e Sesu ʼe ʼi ai anai ‘te ʼu mahaki ʼi he potu ki he tahi potu.’ (Luka 21:11) Neʼe hoko moʼoni koa te lea faka polofeta ʼaia? Ei. ʼI te hili ʼo te ʼuluaki tau faka malamanei, ko te taʼi mahaki faka Sepania neʼe ina matehi te ʼu hahaʼi e 20 miliona tupu. Talu mai ai, ko te kosea, te mahaki mafu, te malaria, te SITA, pea mo ʼihi age ʼu mahaki neʼe nātou matehi te lauʼi miliona hahaʼi. ʼI te ʼu fenua ʼaē ʼe haʼele lelei ai te ʼu gāue, ko te ʼu mahaki ʼaē ʼe tupu ʼuhi ko te ʼuli ʼo te vai (ʼo kau mo te ʼu mahaki ohage ko te liligi pea mo te gākau popo) ʼe mamate ai ʼi te taʼu fuli te lauʼi miliona hahaʼi.

Neʼe toe ʼui fēnei e Sesu: “ ʼE ʼi ai anai mo te ʼu hoge.” (Mateo 24:7) Ohage ko te meʼa ʼaē neʼe tou fakatokagaʼi ʼi te ʼuluaki alatike, ko te kau māsisiva ʼo te malamanei ʼe mole feʼauga tanatou meʼa kai. Ko te tahi fakamoʼoni ʼaia, ʼe hā ʼaki ai te kua fakaōvi mai ʼo he maʼuli ʼe lelei age ʼi te Palatiso.

Neʼe ʼui fēnei e Sesu: “ ʼE ʼi ai anai te ʼu mafuike lalahi.” (Luka 21:11) Neʼe toe hoko moʼoni mo te faʼahi ʼaia ʼi totatou temi. Talu mai te taʼu 1914 ko te ʼu maumau ʼaē neʼe hoko ʼuhi ko te ʼu mafuike, neʼe mamate ai te ʼu lauʼi teau hahaʼi.

ʼE toe ʼui e te Tohi-Tapu ko “te ʼu ʼaho fakamuli” ʼe fakaʼiloga anai ʼaki te fetogi ʼa te hahaʼi. ʼE nātou ‘kaumeʼa anai mo nātou totonu’ pea mo nātou “kaumeʼa mo te paʼaga,” pea ko te fānau ʼe “talagataʼa anai ki te ʼu mātuʼa.” Ko te hahaʼi ʼe nātou “kaumeʼa anai mo te ʼu fakafiafia kae mole kaumeʼa mo te ʼAtua.” (2 Timoteo 3:1-5) ʼE mole koutou fakamoʼoni koa la kiai, ko te tokolahi ʼi te hahaʼi ʼe nātou hage ko te meʼa ʼaia ʼaē ʼe talanoa kiai te vaega?

ʼI te tuputupu ʼo te fai e te hahaʼi te ʼu meʼa ʼaē ʼe mole lelei, ʼe tuputupu te manukinukiʼi ʼo te lao. Neʼe toe fakakikite foki mo te faʼahi ʼaia. Ohage ko te meʼa ʼaē ʼe ʼui ia Mateo 24:12, neʼe talanoa ia Sesu ki te ‘ ʼāsilisili ʼo te manukinukiʼi ʼo te lao.’ ʼE koutou fakamoʼoni anai kua ʼāsili age te fai fakapō ʼi te temi nei, ʼi te ʼu taʼu kua hili. Ko te hahaʼi ʼi te faʼahi fuli ʼe nātou matataku naʼa kaihaʼa tanatou ʼu meʼa, naʼa kākāʼi nātou, peʼe gaohi koviʼi nātou ʼi he faʼahiga ʼaluʼaga.

Ko te ʼu tau, te mafola ʼo te mahaki, te ʼu hoge, te ʼu mafuike, te tuputupu ʼo te fai fakapō, pea mo te kua ʼāsili kovi ʼo te ʼu felogoi ʼa te hahaʼi—ko te ʼu meʼa fuli ʼaia kua hoko moʼoni ʼi te temi nei, ohage pe ko tona fakakikite e te Tohi-Tapu. Kae e lagi feala ke koutou ʼui fēnei: ‘Kae ko te ʼu meʼa ʼaia neʼe mole koa la ko he ʼu meʼa neʼe hoko māhani ʼi te hisitolia ʼo te tagata? Koteā ʼaē ʼe kehe age ʼi totatou temi?’

ʼE ʼi ai te ʼu faʼahi ʼe hoko ia ʼaho nei, ʼe maʼuhiga age ia. ʼE mole ʼui e te Tohi-Tapu ʼe ʼi ai he koga e tahi, ohage ko te ʼu hoge, ʼe ina fakamoʼoni anai kua tou maʼuʼuli ʼi te temi fakaʼosi pea kua fakaōvi mai he maʼuli ʼe lelei age. Ko te ʼu lea faka polofeta ʼo te Tohi-Tapu ʼo ʼuhiga mo te temi fakaʼosi, neʼe tonu ke hoko ki he taʼiake ʼe mole aga faka lotu.—Mateo 24:34-39; Luka 17:26, 27.

Pea tahi foki, ʼe mole ko he meʼa māhani te hoko ia ʼaho nei ʼihi ʼu koga ʼo te lea faka polofeta ʼa Sesu—tāfito te ʼu hoge pea mo te mafola ʼo te mahaki. Koteā tona tupuʼaga? Koteʼuhi neʼe mole heʼeki fakahoko e te kau tagata popoto he ʼu gāue lalahi feiā. Ko te ʼatamai mālama ʼo te kau tōketā pea mo te ʼu faʼahiga faitoʼo neʼe mole heʼeki laka feiā ki muʼa peʼe lahi feiā. Gata pe ki te ʼAtua neʼe feala ke ina fakahā fakatomuʼa ʼi tana Folafola, te Tohi-Tapu, ko te temi ʼaenī, ʼe fakaʼāʼāsili anai te ʼu mahaki, ka mole ʼataʼata anai ia.

Kapau kua hoko fuli te ʼu lea faka polofeta ʼo te Tohi-Tapu ʼo ʼuhiga mo te temi fakaʼosi, peʼe ko “te ʼu ʼaho fakamuli,” koteā ʼaē ʼe feala ke tou ʼui? Ko he maʼuli ʼe lelei age kua fakaōvi mai! Kae ʼe hoko feafeaʼi anai te meʼa ʼaia?

Ko He Maʼuli ʼe Lelei Age—ʼE Lava Feafeaʼi?

ʼE koutou manatu koa ʼe feala ki te tagata ke ina fakatuʼu te Palatiso? ʼI te lolotoga ʼo te hisitolia ʼo aʼu ki te temi ʼaenī, neʼe haheaʼi ʼaupito te ʼu hau ʼo te ʼu puleʼaga fakatagata. Ko ʼihi neʼe nātou faiga fakamalotoloto ke nātou foaki te ʼu meʼa ʼaē ʼe ʼaoga ki te hahaʼi. Kae ko te ʼu faigataʼaʼia ʼe ʼāsili kovi age ia. ʼI te ʼu fenua ʼaē ʼe koloaʼia pea mo te ʼu fenua ʼaē ʼe māsisiva, ʼe faigaʼi e te ʼu puleʼaga ke nātou tauʼi te toloke, te ʼu nofoʼaga fakaʼofaʼofa, te maʼuli masiva, te fai fakapō, te mole maʼu gāue, pea mo te tau.

Tatau aipe peʼe feala anai ki te ʼu puleʼaga ke nātou fakatokatoka ʼihi ʼu fihifihia ʼi te ʼu fihifihia ʼaia, kae ʼe mole feala anai ʼi he temi ke nātou foaki he ʼāteaina katoa mai te mahaki; ʼe mole feala anai ʼi he temi ke nātou fakagata te matutuʼa pea mo te mate. ʼE mahino ia, ʼe mole feala anai ki te tagata ke ina fakaliliu te kele ʼaenī ko he Palatiso.

Koia ʼe ʼui fakapotopoto mai e te Tohi-Tapu: “ ʼAua naʼa ke tuku tau falala ki te kau ʼaliki, peʼe ki te foha ʼo te tagata ʼaē neʼe toʼo mai te kele, ia ia ʼaē ʼe mole maʼu ai te fakamaʼuli.” Kae ʼe tonu ke tou falala kia ai? ʼE tali e te Tohi-Tapu ʼo ina ʼui fēnei: “Manuʼia ia ia ʼaē ko tona tokoni ko te ʼAtua ʼo Sakopo, pea ko tona falalaʼaga ko Sehova, tona ʼAtua.” (Pesalemo 146:3, 5) Kapau ʼe tou falala kia Sehova, ʼe mole tou lotomamahi anai ʼi he temi.

ʼE mahino papau ia, ko Ia ʼaē ʼe ina maʼu te poto pea mo te mālohi ke ina faʼu te kele, te laʼā, pea mo te ʼu fetuʼu, ʼe toe feala foki ke ina fakaliliu te kele ko he Palatiso. ʼE feala ke ina faka fealagia ki te hahaʼi ke nātou maʼu he maʼuli ʼe lelei age. Ko meʼa fuli ʼaē ʼe fakatuʼutuʼu e Sehova ke ina fai, ʼe feala ke ina fai. ʼE ʼui fēnei e tana Folafola: “Ki te ʼAtua ʼe mole he meʼa ʼe faigataʼa kia te ia.” (Luka 1:37) Kae ʼe foaki feafeaʼi anai e te ʼAtua he maʼuli ʼe lelei age?

ʼE foaki anai e Sehova ki te malamanei he maʼuli ʼe lelei age ʼaki tona Puleʼaga. Pea koteā te Puleʼaga ʼo te ʼAtua? Ko te puleʼaga moʼoni ʼaki te Pule neʼe fakanofo e te ʼAtua, ia Sesu Kilisito. Ko te Puleʼaga ʼo te ʼAtua ʼe tuʼu ʼi te lagi, kae ʼe mole kei tuai pea ʼe ina foaki anai he ʼu tapuakina fakatalakitupua pea mo he maʼuli ʼe lelei age kia nātou ʼaē ka nonofo ʼi te Palatiso ʼi te kele.—Isaia 9:6, 7.

E lagi koutou ʼiloʼi lelei te faʼifaʼitaki ʼaē neʼe tuku mai e Sesu ʼo ʼuhiga mo te faikole ʼaē ʼe tou maʼu ʼi te Tohi-Tapu ia Mateo 6:9-13. ʼE ʼui fēnei e te tahi koga ʼo te faikole ʼaia ki te ʼAtua: “Ke hoko mai tou puleʼaga! Ke fai tou finegalo ʼi te kele, ohage ko selo!” ʼO mulimuli ki te faikole ʼaia, ʼe “hoko mai” anai te Puleʼaga ʼo te ʼAtua moʼo fakahoko te fakatuʼutuʼu ʼa Sehova ʼAtua ʼo ʼuhiga mo te kele. Pea neʼe ina fakatuʼutuʼu ke liliu te kele ko he palatiso.

Ko te fehuʼi e tahi ʼe kei toe: Koteā ʼaē ʼe tonu ke koutou fai ke koutou maʼu ai te maʼuli ʼaē ʼe lelei age ʼi te Palatiso ʼaē ka haʼu?

Koteā ʼAē ʼe ʼAoga Ke Koutou Fai

ʼAki tona ʼofa, ʼe foaki e Sehova ʼAtua te ʼamanaki ʼo he maʼuli ʼe lelei age ʼi te Palatiso kia nātou fuli ʼaē ʼe nātou fai tona finegalo. ʼE ʼui fēnei mai e te Tohi-Tapu kia tatou: “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.” (Pesalemo 37:29) Kae koteā ʼaē ʼe liliu ai he tahi ʼo mata faitotonu ia muʼa ʼo te ʼAtua?

Ke leleiʼia tatou e Sehova ʼe tonu ke tou ako te tahi ʼu meʼa ʼo ʼuhiga mo te meʼa ʼaē ʼe ina loto ke tou fai. Kapau ʼe tou maʼu te ʼatamai mālama ʼo ʼuhiga mo te ʼAtua pea mo tou maʼuliʼi te ʼatamai mālama ʼaia, ʼe feala anai ke tou maʼuʼuli ʼo heʼegata. ʼI tana faikole ki te ʼAtua, neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, ʼaē ko te ʼAtua moʼoni pe e tahi pea mo ia ʼaē neʼe ke fekauʼi mai, ia Sesu Kilisito.”—Soane 17:3.

Ko te tohi ʼaē ʼe talanoa ʼo ʼuhiga mo Sehova ʼAtua pea mo Sesu Kilisito ʼe ko te Folafola ʼa te ʼAtua, te Tohi-Tapu. ʼE ko he meʼa ʼofa maʼuhiga ʼaia ʼi te ʼu meʼa ʼaē neʼe foaki mai e Sehova. ʼE hage te Tohi-Tapu ko he tohi mai he tāmai ʼofa ki tana fānau. ʼE talanoa mai te Tohi-Tapu ʼo ʼuhiga mo te fakapapau ʼa te ʼAtua ke ina foaki he maʼuli ʼe lelei age ki te malamanei pea ʼe ina fakahā mai peʼe lava feafeaʼi hatatou maʼu te maʼuli ʼaia. ʼE fakatokagaʼi mai e te Tohi-Tapu te meʼa ʼaē neʼe fai e te ʼAtua ʼi te ʼu temi muʼa pea mo te ʼu meʼa ʼaē ka ina fai ʼi te temi ka haʼu. ʼE ina toe foaki mai foki kia tatou he ʼu tokoni ʼe ʼaoga ke feala ai hatatou tauʼi totatou ʼu fihifihia ʼi te temi nei. ʼIo, ʼe akoʼi mai e te Folafola ʼa te ʼAtua peʼe feafeaʼi hatatou maʼu he faʼahiga fiafia logope la tatatou maʼuʼuli ʼi te mālama maveuveu ʼaenī.—2 Timoteo 3:16, 17.

ʼE lotolelei anai te kau Fakamoʼoni ʼa Sehova ke nātou fai hakotou ako faka Tohi-Tapu. Koutou ako peʼe lava feafeaʼi hakotou maʼuli fiafia ʼi te temi nei, ʼaki te ʼamanaki ʼaē ki he maʼuli ʼe lelei age ʼi te temi ka haʼu ʼaē kua ōvi mai.

[Paki ʼo te pasina 5]

ʼE fakahā mai e te ʼu lea faka polofeta ʼa te Tohi-Tapu kua fakaōvi mai te maʼuli ʼaē ʼe lelei age?

[Paki ʼo te pasina 7]

Ko te Puleʼaga ʼo te ʼAtua ʼe ina fakatuʼu anai he maʼuli ʼe lelei age maʼa te malamanei