“Koutou ʼOfa Ki Te Moʼoni Pea Mo Te Tokalelei”!
“Ko te folafola ʼa Sehova ʼo te ʼatu kautau neʼe toe hoko mai ʼo ina ʼui fēnei: ‘. . . Koutou ʼoʼofa ki te moʼoni pea mo te tokalelei.’ ”—Sakalia 8:18, 19.
1, 2. (a) ʼO ʼuhiga mo te tokalelei, koteā te meʼa neʼe hoko ʼi te hisitolia ʼa te tagata? (b) He koʼe ʼe mole sio anai ʼi he temi te malamanei ʼaenī ki te tokalelei moʼoni?
“NEʼE mole heʼeki maʼu e te malamanei te tokalelei. ʼI ʼihi potu ʼo te kele, neʼe hoko tuʼumaʼu ai te tau—pea ko te meʼa ʼe tau hoko, ʼe lahi te ʼu fenua ʼe hoko ai te ʼu tau ʼi he ʼaho pe e tahi.” Ko te palalau ʼaia ʼo te Polofesea ko Milton Mayer ʼo te univelesitē ʼo Massachusetts, ʼi Amelika. ʼI paki fakaʼofaʼofa leva ʼo te malamanei! ʼE moʼoni, neʼe loto e te tagata ke hoko te tokalelei. Neʼe faigaʼi e te kau tagata politike te ʼu puleʼaki kehekehe moʼo taupau te tokalelei, mai te Pax Romana (te Tokalelei ʼo Loma) ʼo te ʼu temi ʼa te kau Loma ki te meʼa ʼaē ʼe fakahigoaʼi ʼi te lolotoga ʼo te Tau Momoko ko te “hoko moʼoni ʼo tanatou fematehiʼaki.” Kae, ʼe mahino papau ia neʼe mole hoko tanatou ʼu faiga. Ohage ko tona fakahā e Isaia kua hili kiai te ʼu sēkulō, ‘neʼe tagi mamahi te kau tagata ʼave logo ʼo te tokalelei.’ (Isaia 33:7) Koteā tona tupuʼaga?
2 Koteʼuhi ko te hoholo ʼo te tokalelei ʼe mole hoko ʼaki pe te pulihi ʼo te fehiʼa pea mo te mānumānu; ʼe tonu ke fakatafito ki te moʼoni. ʼE mole feala ke fakatafito te tokalelei ki he ʼu loi. Ko te tupuʼaga la ʼaia ʼo te ʼui fēnei e Sehova, ʼi tana fakapapau ʼaē ʼo ʼuhiga mo te toe laga ʼo te Iselaele ʼāfea pea mo tona tokalelei: “Koʼeni, ʼe ʼau folahi kia ia te tokalelei ohage ko he vaitafe pea mo te kolōlia ʼo te ʼu puleʼaga ohage ko he liuʼa ʼe tauopeope.” (Isaia 66:12) Ko te ʼatua ʼo te tuʼu ʼo te faʼahiga meʼa ʼaenī, ia Satana te Tevolo, ʼe ko “he tahi ʼe fai fakapō,” pea ‘ ʼe gutuloi pea ʼe ko te tāmai ʼo te loi.’ (Soane 8:44; 2 Kolonito 4:4) ʼE lava feafeaʼi ki he mālama ʼe puleʼi e te taʼi ʼatua ʼaia ke ina maʼu ʼi he temi te tokalelei?
3. Koteā te meʼa ʼofa fakaofoofo neʼe foaki e Sehova ki tana hahaʼi, logope tanatou maʼuʼuli ʼi he mālama ʼe maveuveu?
3 Kae, meʼa fakaofoofo foki, ʼe foaki e Sehova te tokalelei ki tana hahaʼi, logope tanatou maʼuʼuli ʼi te mālama ʼo Satana ʼaē ʼe hoko ai te ʼu tau. (Soane 17:16) ʼI te ono sēkulō ʼi muʼa ʼo totatou temi, neʼe fakahoko e Sehova tana fakapapau ʼaki ia Selemia pea neʼe ina foaki te “tokalelei pea mo te moʼoni” ki tana puleʼaga makehe, ʼi te temi ʼaē neʼe ina toe fakanofo ai nātou ki tonatou fenua. (Selemia 33:6) Pea ʼi te ʼu ʼaho fakamuli ʼaenī, neʼe ina foaki te “tokalelei pea mo te moʼoni” ki tana hahaʼi ʼi tonatou “fenua,” peʼe ki tonatou ʼaluʼaga fakalaumālie ʼi te kele, logope neʼe nātou maʼuʼuli lolotoga te temi ʼaē neʼe lahi ai te ʼu fihifihia neʼe hoko ʼi te malamanei ʼo aʼu ki te temi nei. (Isaia 66:8; Mateo 24:7-13; Fakahā 6:1-8) ʼI tatatou hoko atu tatatou fai palalau ʼo ʼuhiga mo te kapite 8 ʼo te tohi ʼa Sakalia, ʼe tou maʼu anai he loto fakafetaʼi lahi ʼo ʼuhiga mo te tokalelei ʼaia pea mo te moʼoni ʼaē ʼe foaki mai e Sehova, pea ʼe tou vakaʼi anai te meʼa ʼaē ʼe tonu ke tou fai moʼo taupau ʼo te tokalelei pea mo te moʼoni ʼaia.
“Ke Mālolohi ʼOkoutou ʼu Nima”
4. Koteā ʼaē neʼe fakaloto mālohiʼi e Sakalia ke fai e Iselaele mo kapau ʼe ina fia maʼu te tokalelei?
4 Ko te tuʼa ono ʼaē ʼi te kapite 8 ʼo te tohi ʼa Sakalia, tatatou logo ki te ʼu palalau fakaofoofo ʼaenī ʼa Sehova: “Koʼeni te meʼa ʼaē neʼe ʼui e Sehova ʼo te ʼatu kautau: ‘Ke mālolohi ʼokoutou ʼu nima, ia koutou ʼaē ʼe koutou fagono ʼi te ʼu ʼaho ʼaenī ki te ʼu folafola ʼaia ʼaē ʼe haʼu mai te gutu ʼo te kau polofeta, ʼi te ʼaho ʼaē neʼe hili ai te tafitoʼaga ʼo te fale ʼo Sehova ʼo te ʼatu kautau, ke laga te fale lotu. Heʼe ʼi muʼa ʼo te ʼu ʼaho ʼaia, neʼe mole ʼi ai he totogi maʼa te hahaʼi, pea ʼo ʼuhiga mo te totogi ʼo te ʼu manu lalata, neʼe mole ʼi ai he meʼa feiā; pea neʼe mole ʼi ai te tokalelei maʼa ia ʼaē neʼe hū ki tuʼa pea mo ia ʼaē neʼe hū ki loto, ʼuhi ko te fili, he neʼe ʼau fai ke fefakafeagaiʼaki te hahaʼi.’ ”—Sakalia 8:9, 10.
5, 6. (a) ʼUhi ko te lotovaivai ʼo te kau Iselaelite, neʼe feafeaʼi te ʼaluʼaga ʼo Iselaele? (b) Koteā te fetogi ʼaē neʼe fakapapau e Sehova ki Iselaele mo kapau ʼe ina fakamuʼamuʼa tana tauhi?
5 Neʼe fai e Sakalia te ʼu palalau ʼaia ʼi te temi ʼaē neʼe toe laga ai te fale lotu ʼi Selusalemi. ʼI muʼa atu, ko te kau Iselaelite ʼaē neʼe toe liliu mai Papiloni, neʼe nātou lotovaivai pea neʼe nātou tuku te gāue ʼo te laga ʼo te fale lotu. ʼUhi he neʼe manatu pe nātou ki tanatou maʼuli fīmālie, neʼe mole tapuakina nātou pea neʼe mole foaki e Sehova te tokalelei kia nātou. Logope neʼe nātou gāueʼi tonatou ʼu kele pea mo tokakaga ki tanatou ʼu fuʼu vite, kae neʼe mole hona fua. (Asea 1:3-6) Neʼe hage neʼe nātou gāue kae neʼe “mole ʼi ai he totogi.”
6 ʼI te temi ʼaē neʼe kua toe laga ai te fale lotu, neʼe fakaloto mālohiʼi e Sakalia te kau Sutea ke nātou “mālolohi,” ke nātou fakamuʼamuʼa te tauhi kia Sehova, ʼaki he lototoʼa. Koteā anai ka hoko mo kapau neʼe fai e te kau Sutea te faʼahi ʼaia? “ ‘Pea ʼi te temi nei, kia nātou ʼaē ka toe anai ʼi te hahaʼi ʼaia, ʼe mole ʼau hage anai ko te ʼu ʼaho ʼāfea,’ ko te ʼui ʼaia ʼa Sehova ʼo te ʼatu kautau. ‘Heʼe ʼi ai anai te pulapula ʼo te tokalelei; ʼe fua anai te fuʼu vite, pea ʼe fua anai te kele, pea ʼe foaki anai e te ʼu lagi tanatou hahau; pea ko nātou ʼaē ka toe anai ʼi te hahaʼi ʼaia, ʼe nātou maʼu moʼoni anai te ʼu meʼa fuli ʼaia. Pea ʼe hoko moʼoni anai, ohage ko takotou liliu ko he malaʼia ʼi te ʼu puleʼaga, Ê ʼapi ʼo Suta pea mo Iselaele, ʼe ʼau hāofaki anai koutou, pea ʼe tonu anai ke koutou liliu ko he tapuakina. ʼAua naʼa koutou matataku. Ke mālolohi ʼokotou ʼu nima.’ ” (Sakalia 8:11-13) Kapau neʼe gāue ia Iselaele ʼaki he lotomālohi, neʼe liliu ia ʼo fua manuʼia. ʼI muʼa atu, mokā fakaʼaoga e te ʼu puleʼaga he faʼifaʼitaki ʼo ʼuhiga mo he malaʼia, neʼe nātou talanoa ki Iselaele. Kae ʼi te temi leva ʼaia, neʼe kua liliu ia Iselaele ko he faʼifaʼitaki ʼo he fenua neʼe tapuakina. Neʼe ko te tupuʼaga tonu la ʼaia ʼaē neʼe tonu ai ke nātou ‘fakamālohi ʼonatou ʼu nima’!
7. (a) Koteā te ʼu fetogi fakaofoofo ʼaē neʼe maʼu e te hahaʼi ʼa Sehova, ʼo aʼu ki te taʼu gāue 1995? (b) ʼI takotou vakaʼi te tānaki ʼo te taʼu, ko te ʼu fenua fea ʼe koutou sio ai ki he tuputupu lahi ʼi te hahaʼi fai faka mafola, ʼi te ʼu pionie, pea mo te lahi ʼo te ʼu hola ʼi te fai faka mafola?
7 E feafeaʼi ia ʼaho nei? ʼI te ʼu taʼu ʼi muʼa ʼo te taʼu 1919, neʼe mole heʼeki faʼa mālohi te gāue ʼa te hahaʼi ʼo Sehova. Neʼe mole nātou ʼāteaina katoa ʼi te ʼuluaki tau faka malamanei, pea neʼe nātou mulimuli ki te tagata kae mole nātou mulimuli ki tonatou Hau, ia Sesu Kilisito. Ko te meʼa ʼaē neʼe hoko, ko ʼihi neʼe nātou lotovaivavai ʼuhi ko te fakafeagai ʼaē neʼe hoko ʼi tuʼa pea ʼi loto ʼo te kautahi. Koia, ʼi te taʼu 1919, ʼaki te tokoni ʼa Sehova, neʼe nātou fakamālohi ʼonatou ʼu nima. (Sakalia 4:6) Neʼe foaki e Sehova kia nātou te tokalelei, pea neʼe nātou tuputupu ʼaupito ʼi te mālohi. ʼE hā te faʼahi ʼaia ʼi tanatou fakamatala ʼo te ʼu taʼu e 75 ʼaenī kua hili, ʼo aʼu ki te taʼu gāue 1995. ʼI te ʼaluʼaga ʼaē ko nātou ko te hahaʼi ʼa Sehova, ʼe fakamamaʼo te kau Fakamoʼoni ʼa Sehova mai te tauhi faka puleʼaga, mai te nofo agatonu ki te ʼu meʼa ʼo te ʼu telepi, mai te fehiʼa ki te ʼu lanu pea mo ʼihi ʼatu ʼu meʼa ʼe nātou fakatupu te loto fehiʼa. (1 Soane 3:14-18) ʼE nātou tauhi kia Sehova ʼaki he fakamalotoloto moʼoni ʼi tona fale lotu fakalaumālie. (Hepeleo 13:15; Fakahā 7:15) ʼI te taʼu pe ʼaenī kua hili, neʼe nātou fai hola e tahi miliale tupu moʼo palalau ki ʼihi ʼo ʼuhiga mo tanatou Tāmai ʼaē ʼe ʼi selo! ʼI te māhina fuli, ʼe fakafuafua neʼe nātou fai te ʼu ako Tohi-Tapu e 4 865 060. Ko te toko 663 521 neʼe nātou kau ʼi te selevisi pionie. Ka palalau te kau takitaki ʼo te Keletiate ki he faʼifaʼitaki ʼo he ʼu hahaʼi ʼe nātou fakamalotoloto moʼoni ʼi tanatou tauhi, ʼe nātou talanoa ʼi ʼihi temi ki te faʼifaʼitaki ʼa te kau Fakamoʼoni ʼa Sehova.
8. ʼE lava feafeaʼi ke fua lelei te “pulapula ʼo te tokalelei” ki he Kilisitiano?
8 ʼUhi ko tanatou fakamalotoloto, ʼe foaki e Sehova ki tana hahaʼi “te pulapula ʼo te tokalelei.” Ko he tahi ʼe ina gāueʼi te pulapula ʼaia, ʼe sio anai ki te tuputupu ʼo te tokalelei ʼi tona loto pea mo tona maʼuli. Ko te Kilisitiano ʼaē ʼe ina kumi te tokalelei mo Sehova pea mo te kau Kilisitiano, ʼe kau ki te moʼoni pea mo te tokalelei ʼo te hahaʼi ʼaē ʼe nātou fua te huafa ʼa Sehova. (1 Petelo 3:11; vakaʼi ia Sake 3:18.) ʼE mole koa la ko he faʼahi fakatalakitupua ʼaia?
“ ʼAua Naʼa Koutou Matataku”
9. Koteā te fetogi ʼaē neʼe fakapapau e Sehova ʼo ʼuhiga mo tana hahaʼi?
9 ʼI te temi nei ʼe tou lau te palalau tuʼa fitu ʼaē ʼe haʼu mai ia Sehova. Koteā te palalau ʼaia? “Koʼeni te meʼa ʼaē neʼe ʼui e Sehova ʼo te ʼatu kautau: ‘Ohage ko taku fakatuʼutuʼu ʼaē ke ʼau fakahoko he malaʼia kia koutou ʼuhi he neʼe ʼau ʼita ki takotou ʼu kui,’ ko te ʼui ʼaia ʼa Sehova ʼo te ʼatu kautau, ‘pea neʼe mole ʼau fakahemala, ʼo toe feiā aipe, ʼe ʼau toe fakatuʼutuʼu anai ʼi te ʼu ʼaho ʼaenī, ke ʼau fai te meʼa ʼaē ʼe lelei kia Selusalemi pea mo te ʼapi ʼo Suta. ʼAua naʼa koutou matataku.’ ”—Sakalia 8:14, 15.
10. Koteā te ʼu meʼa neʼe hoko ki te kau Fakamoʼoni ʼa Sehova ʼe hā ʼaki ai neʼe mole nātou matataku?
10 Logope pe neʼe mavetevete te hahaʼi ʼa Sehova ʼi tona ʼuhiga fakalaumālie, lolotoga te ʼuluaki tau faka malamanei, kae ʼi tonatou loto neʼe nātou fia fai te meʼa ʼaē neʼe totonu. Koia, ʼi tana ʼosi fakatonutonuʼi ʼo nātou, neʼe ina fetogi tana ʼu faʼahiga felogoi mo nātou. (Malakia 3:2-4) Ia ʼaho nei, ʼe tou toe manatuʼi pea mo tou fakamālo lahi kia Sehova ʼo ʼuhiga mo te ʼu meʼa ʼaē neʼe ina fai. ʼE moʼoni, kua tou ‘liliu ko he ʼu meʼa ʼe fehiʼaʼinaʼi e te ʼu puleʼaga.’ (Mateo 24:9) Tokolahi neʼe pilisoniʼi, pea ko ʼihi neʼe mamate ʼuhi ko tanatou tui. ʼE tou felāveʼi tuʼumaʼu mo te fehiʼa ʼa te hahaʼi pea mo tanatou agakovi. Kae ʼe mole tou matataku. ʼE tou ʼiloʼi ʼe mālohi age Sehova ʼi te ʼu fakafeagai ʼaē ʼe tou sio kiai peʼe ko te ʼu fakafeagai ʼaē ʼe fakapulipuli. (Isaia 40:15; Efesi 6:10-13) ʼE tou taupau tuʼumaʼu anai te ʼu palalau ʼaenī: “Falala kia Sehova, ke ke lotomālohi, pea ke mālohi tou loto.”—Pesalemo 27:14.
“Koutou Fepalalauʼaki ʼAki Te Moʼoni”
11, 12. Koteā te ʼu meʼa ʼaē ʼe tonu ke tou manatuʼi mo kapau ʼe tou fia kau katoa ki te ʼu tapuakina ʼaē ʼe foaki e Sehova ki tana hahaʼi?
11 Ke tou maʼu katoa te ʼu tapuakina ʼaē ʼe haʼu mai ia Sehova, ʼe ʼi ai te ʼu meʼa ʼe tonu ke tou manatuʼi. ʼE ʼui fēnei e Sakalia: “ ‘Koʼeni te ʼu meʼa ʼaē ʼe tonu ke koutou fai: Koutou fepalalauʼaki ʼaki te moʼoni. Koutou faifakamāu ʼi tokotou ʼu matapā, ʼaki te moʼoni pea mo te fakamāu ʼo te tokalelei. Pea ʼaua naʼa koutou fefakatuʼutuʼuʼaki ʼi tokotou loto he fakatuʼutuʼu kovi, pea mo ʼaua naʼa koutou ʼoʼofa ki he fakapapau loi, heʼe ko te ʼu meʼa fuli ʼaia ʼaē ʼe ʼau fehiʼa ki ai,’ ko te ʼui ʼaia ʼa Sehova.”—Sakalia 8:16, 17.
12 ʼE uga tatou e Sehova ke tou palalau ʼaki te moʼoni. (Efesi 4:15, 25) ʼE mole fagono ia ki te ʼu faikole ʼa nātou ʼaē ʼe nātou fakatuʼutuʼu he ʼu meʼa ʼe kovi, ia nātou ʼaē ʼe nātou fufū te moʼoni ke fua lelei pe kia nātou, peʼe ko nātou ʼaē ʼe nātou fai he ʼu fakapapau loi. (Tāʼaga Lea 28:9) ʼI tana fehiʼa ki te ʼapositasia, ʼe loto e Sehova ke tou pipiki ki te moʼoni ʼa te Tohi-Tapu. (Pesalemo 25:5; 2 Soane 9-11) Pea tahi ʼaē, ohage ko te kau tagata ʼāfea ʼi te ʼu matapā ʼo te kolo ʼo Iselaele, ʼe tonu ki te kau tagata ʼāfea mokā nātou fai he komite faifakamāu, ke nātou fakatafito tanatou ʼu tonu ki te moʼoni ʼa te Tohi-Tapu, kae mole fakatafito ki tanatou ʼu manatu fakatagata. (Soane 17:17) ʼE loto e Sehova ke nātou fai te “fakamāu ʼi te tokalelei,” ʼo nātou faiga, ohage ko ni ʼu tagata tauhi ōvi Kilisitiano, ke nātou fakatokatoka lelei ia nātou ʼaē ʼe tokakovi, pea mo tokoni kia nātou ʼaē neʼe agahala pea kua fakahemala, ke nātou toe maʼu te tokalelei mo Sehova. (Sake 5:14, 15; Suta 23) ʼI te temi pe ʼaia, ʼe nātou taupau te tokalelei ʼo te kokelekasio, ʼo nātou fakamavae ʼaki he lototoʼa ia nātou ʼaē ʼe nātou pulihi te tokalelei ʼaia, ʼi tanatou haga fai te meʼa ʼaē ʼe kovi.—1 Kolonito 6:9, 10.
“Ko He Fakafiafia”
13. (a) Koteā te fetogi ʼaē neʼe fakakikite e Sakalia ʼo ʼuhiga mo te temi ʼaukai? (b) Koteā te ʼaukai neʼe fai ʼi Iselaele?
13 ʼI te temi nei, ʼe tou logo ki te palalau tuʼa valu ʼaenī: “Koʼeni te meʼa ʼaē neʼe ʼui e Sehova ʼo te ʼatu kautau: ‘Ko te ʼaukai ʼo te māhina fā, pea mo te ʼaukai ʼo te māhina nima, pea mo te ʼaukai ʼo te māhina fitu, pea mo te ʼaukai ʼo te māhina hogofulu, ʼe nātou liliu anai ko he fakafiafia maʼa te ʼapi ʼo Suta, pea ko he ʼu temi ʼo te fakafiafia. Koia, koutou ʼoʼofa ki te moʼoni pea mo te tokalelei.’ ” (Sakalia 8:19) ʼI te Lao ʼa Moisese, neʼe ʼaukai te kau Iselaelite ʼi te ʼAho ʼo te ʼu Faifakalelei, moʼo fakahā ʼe nātou fakahemala ki te ʼu agahala ʼaē neʼe nātou fai. (Levitike 16:29-31) Ko te fā ʼaukai ʼaē neʼe talanoa kiai ia Sakalia, ʼe hage neʼe nātou tagi mamahi moʼo fakamanatuʼi te ʼohofiʼi ʼo Selusalemi pea mo tona fakaʼauha. (2 Hau 25:1-4, 8, 9, 22-26) Kae, ʼi te temi leva ʼaia, neʼe kua toe laga te fale lotu pea kua toe fakahahaʼi ia Selusalemi. Neʼe kua liliu te ʼu tagi mamahi ko he ʼu fakafiafia, pea kua liliu te ʼu temi ʼaukai ko he ʼu temi fakafiafia.
14, 15. (a) He koʼe neʼe liliu te ʼaho ʼo te Fakamanatu ko he meʼa fakatupu fiafia lahi, pea koteā ʼaē ʼe fakamanatuʼi mai kia tatou e te faʼahi ʼaia? (b) ʼI takotou vakaʼi te tānaki ʼo te taʼu, ko te ʼu fenua fea ʼaē neʼe lahi ʼaupito ai ia nātou ʼaē neʼe kau ki te ʼaho ʼo te Fakamanatu?
14 Ia ʼaho nei, ʼe mole tou fai te ʼu ʼaukai ʼaē neʼe talanoa kiai ia Sakalia peʼe ko te ʼaukai ʼaē neʼe fakatotonu e te Lao. Talu te foaki e Sesu tona maʼuli maʼa tatatou ʼu agahala, ʼe tou maʼu te ʼu tapuakina ʼo te ʼAho lahi ʼo te ʼu Faifakalelei, ʼaē ʼe tonu ke fakamolemole ai tatatou ʼu agahala, ʼo mole fakamolemole faka temi pe, kae ʼe fakamolemole ʼo talu ai. (Hepeleo 9:6-14) ʼO mulimuli ki te fakatotonu ʼa te Pelepitelo Lahi ʼaē ʼe ʼi te lagi, ia Sesu Kilisito, ʼe tou fai te Fakamanatu ʼo tona mate ohage ko te fakafiafia maʼuhiga pe ʼaia e tahi ʼi te kaletalio ʼa te kau Kilisitiano. (Luka 22:19, 20) ʼE mole tou “fiafia” koa la ʼi tatatou fakatahi ʼi te taʼu fuli ki te fakamanatu ʼaia?
15 ʼI te taʼu ʼaenī kua hili, ko te toko 13 147 201 neʼe nātou kau ki te ʼaho ʼo te Fakamanatu, ʼo laka age ʼi te toko 858 284 ʼi te taʼu 1914. ʼE ko he toe hahaʼi tokolahi ʼaupito! Koutou fakakaukauʼi te fiafia ʼaē neʼe maʼu e te ʼu kokelekasio e toko 76 620 ʼa te kau Fakamoʼoni ʼa Sehova, ʼi tanatou sisio ʼaē ki toe kaugamālie ʼo te ʼu ōvi ʼaē neʼe nātou fakafonu tonatou ʼu Fale ʼo te Puleʼaga ʼi te ʼaho ʼaia. ʼE mahino papau ia, ko nātou fuli ʼaē neʼe kau ʼi te ʼaho ʼaia neʼe uga nātou ke nātou “ ʼofa ki te moʼoni pea mo te tokalelei,” ʼi tanatou fakamanatuʼi te mate ʼo Ia ʼaē “ko te ala, pea mo te moʼoni, pea mo te maʼuli” pea ʼi te temi nei kua nofo hau ʼi tona ʼuhiga ‘ ʼAliki lahi ʼo te Tokalelei’ ʼaē neʼe fili e Sehova! (Soane 14:6; Isaia 9:6) Ko te ʼaho ʼaia ʼe ʼi ai tona faka ʼuhiga makehe kia nātou ʼaē ʼe nātou fai te fakamanatu ʼaia ʼi te ʼu fenua ʼaē ʼe nātou felāveʼi mo ni ʼu mamahi ʼuhi ko te ʼu tokakovi pea mo te tau. Ko ʼihi ʼi totatou ʼu tēhina, neʼe nātou sisio ki te ʼu meʼa fakalialia lolotoga te taʼu 1995. Kae, ‘ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, neʼe ina taupau tonatou ʼu loto pea mo tonatou ʼu ʼatamai ʼaki ia Kilisito Sesu.’—Filipe 4:7.
‘Tou Fakamalūlū Te Fofoga ʼo Sehova’
16, 17. ʼE leva feafeaʼi ki te hahaʼi ʼo te ʼu puleʼaga ke nātou “fakamalūlū te fofoga ʼo Sehova”?
16 Kae, ʼe ʼōmai maifea te ʼu lauʼi miliona hahaʼi ʼaia ʼaē neʼe kau ʼi te ʼaho ʼo te Fakamanatu? ʼE fakamahino fēnei e te palalau tuʼa hiva ʼaenī ʼa Sehova: “Koʼeni te meʼa ʼaē neʼe ʼui e Sehova ʼo te ʼatu kautau: ‘ ʼE mahino anai ia ʼe ʼōmai anai ni ʼu hahaʼi pea mo nātou ʼaē ʼe nonofo ʼi te ʼu kolo ʼe tokolahi; pea ʼe mahino papau ia, ʼe ʼolo anai te ʼu hahaʼi ʼo te tahi kolo kia nātou ʼo te tahi kolo, ʼo ʼui maʼa nātou: “Tou ʼolo fakatahi ʼo fakamalūlū te fofoga ʼo Sehova pea mo kumi ia Sehova ʼo te ʼatu kautau. ʼE ʼau ʼalu anai mo ʼau.” Pea ko te ʼu hahaʼi tokolahi pea mo te ʼu puleʼaga mālohi ʼe nātou ʼōmai moʼoni anai ʼo kumi ia Sehova ʼo te ʼatu kautau ʼi Selusalemi pea mo nātou fakamalūlū te fofoga ʼo Sehova.’ ”—Sakalia 8:20-22.
17 Ko te hahaʼi ʼaē neʼe kau ʼi te ʼaho ʼo te Fakamanatu neʼe nātou fia “kumi ia Sehova ʼo te ʼatu kautau.” Tokolahi ia nātou ʼaē neʼe kau ki te ʼaho ʼaia, ʼe ko te ʼu kaugana ʼa Sehova kua nātou foaki tonatou maʼuli kia te ia, pea kua nātou papitema. Ko ʼihi lauʼi miliona hahaʼi ʼaē neʼe kau ki te fakatahi ʼaia ʼe mole heʼeki nātou fai nātou te ʼu faʼahi ʼaia. ʼI ʼihi fenua, ko te lahi ʼo te hahaʼi ʼi te ʼaho ʼo te Fakamanatu neʼe tuʼa fā peʼe tuʼa nima age tona lahi ʼi te ʼu kau fai faka mafola ʼo te Puleʼaga. Tokolahi ʼi te ʼu hahaʼi ʼaia ʼaē ʼe nātou fia ʼiloʼi te moʼoni, ʼe ʼaoga kia nātou he tokoni ke nātou tuputupu. Tou akoʼi nātou ke nātou fakafiafia ʼi te ʼiloʼi ʼaē neʼe mate Sesu ʼuhi ko totatou ʼu agahala, pea ʼe lolotoga hau ʼi te temi nei ʼi te Puleʼaga ʼa te ʼAtua. (1 Kolonito 5:7, 8; Fakahā 11:15) Pea tou fakaloto mālohi nātou ke nātou foaki ia nātou totonu kia Sehova ʼAtua, pea ke nātou fakalogo ki tana Hau ʼaē neʼe ina fakanofo. Kapau ʼe nātou fai te faʼahi ʼaia, pea ʼe nātou “fakamalūlū anai te fofoga ʼa Sehova.”—Pesalemo 116:18, 19; Filipe 2:12, 13.
“Ko Te ʼu Tagata e Toko Hogofulu Mai Te ʼu Lea Kehekehe ʼo Te ʼu Puleʼaga”
18, 19. (a) ʼI te fakahoko ʼo Sakalia 8:23, ko ai ia ʼaho nei, “te tagata Sutea”? (b) Ko ai, ia ʼaho nei, te “toko hogofulu tagata” ʼaē ʼe nātou ‘puke te tapaʼi kofu ʼo te tagata Sutea’?
18 ʼE tou lau fakaʼosi fēnei ʼi te kapite valu ʼo te tohi ʼa Sakalia: “Koʼeni te meʼa ʼaē neʼe ʼui e Sehova ʼo te ʼatu kautau.” Koteā te ʼu palalau fakaʼosi ʼa Sehova? “ ʼE hoko anai ʼi te ʼu ʼaho ʼaia, ko te ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou puke anai te tapaʼi kofu ʼo te tagata Sutea, ʼo nātou ʼui fēnei: ‘ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.’ ” (Sakalia 8:23) ʼI te ʼu ʼaho ʼo Sakalia, ko te Iselaele ʼo te kakano neʼe ko te puleʼaga ʼaē neʼe fili e te ʼAtua. Kae, ʼi te ʼuluaki sēkulō, neʼe līaki e Iselaele te Mesia ʼa Sehova. Koia, neʼe fili e totatou ʼAtua te “Sutea”—te Iselaele foʼou—ohage ko hana hahaʼi makehe, “te Iselaele ʼo te ʼAtua” ʼaē ʼe faʼufaʼu e te kau Sutea fakalaumālie. (Kalate 6:16; Soane 1:11; Loma 2:28, 29) Ko te lahi ʼo nātou ʼaia ko te toko 144 000, neʼe fili mai te malamanei ke nātou hau fakatahi mo Sesu ʼi tona Puleʼaga ʼi selo.—Fakahā 14:1, 4.
19 Tokolahi ʼi te kau 144 000 ʼaia kua ʼosi mamate agatonu pea kua ʼosi nātou maʼu tonatou fakapale ʼi te lagi. (1 Kolonito 15:51, 52; Fakahā 6:9-11) ʼE kei toe te tokosiʼi ʼi te kele pea ko nātou ʼaia ʼe nātou fiafia ʼi tanatou sisio ʼaē ko te “toko hogofulu tagata” ʼaē neʼe nātou fili ke nātou ʼolo fakatahi mo te “Sutea” neʼe ko “te toe hahaʼi tokolahi . . . mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.”—Fakahā 7:9; Isaia 2:2, 3; 60:4-10, 22.
20, 21. ʼI te kua ōvi mai ʼo te fakaʼosi ʼo te mālama ʼaenī, ʼe lava feafeaʼi hatatou nonofo tokalelei mo Sehova?
20 ʼI te hoko mai ʼo te fakaʼosi ʼo te mālama ʼaenī, ʼe hage te Keletiate ko Selusalemi ʼi te temi ʼo Selemia, ʼaē neʼe nātou ʼui fēnei: “Neʼe mātou ʼamanaki ki te tokalelei, kae neʼe mole hoko mai he meʼa ʼe lelei; pea mo te temi ʼo te fakamālōlō, pea koʼeni ko te mataku ia ʼaē ʼe hoko!” (Selemia 14:19) Ko te mataku ʼaia ʼe aʼu anai ki te temi ʼaē ka mafuli ai te ʼu puleʼaga ki te lotu hala pea mo ina fakaʼauha. Hili kiai he kiʼi temi nounou, ʼe fakaʼauha anai te ʼu puleʼaga ʼi te tau fakaʼosi ʼa te ʼAtua, ʼi Halamaketone. (Mateo 24:29, 30; Fakahā 16:14, 16; 17:16-18; 19:11-21) Ko he temi ʼe hoko ai anai he ʼu maveuveu lahi!
21 Ka hoko te ʼu meʼa fuli ʼaia, ʼe puipui anai e Sehova ia nātou ʼaē ʼe nātou ʼoʼofa ki te moʼoni pea mo nātou gāueʼi “te pulapula ʼo te tokalelei.” (Sakalia 8:12; Sofonia 2:3) Koia, tou nonofo fīmālie ʼi te fenua ʼo tana hahaʼi, ʼo tou fakavikiviki fakamalotoloto ia ia ʼi muʼa ʼo te hahaʼi pea, ʼi te ʼu meʼa fuli ʼaē ʼe feala ke tou fai, ke tou tokoni ke “fakamalūlū te fofoga ʼo Sehova.” Kapau ʼe tou fai te faʼahi ʼaia, ʼe tou fiafia tuʼumaʼu anai ʼi te tokalelei ʼaē ʼe foaki mai e Sehova. Ei, “ ʼe foaki anai e Sehova totonu te mālohi ki tana hahaʼi. Ko Sehova totonu ʼe ina tapuakina anai tana hahaʼi ʼaki te tokalelei.”—Pesalemo 29:11.
ʼE Feala Koa Hakotou Fakamatala?
◻ Neʼe fakamālohiʼi feafeaʼi e te hahaʼi ʼo te ʼAtua ʼonatou ʼu nima ʼi te temi ʼo Sakalia? Pea ia ʼaho nei?
◻ ʼE tou tali feafeaʼi te ʼu fakataga, te agakovi, pea mo te fehiʼa ʼa te hahaʼi kia tatou?
◻ Koteā ʼaē ʼe pipiki ki tatatou ‘fepalalauʼaki ʼaki te moʼoni’?
◻ ʼE lava feafeaʼi ki he tahi ke ina “fakamalūlū te fofoga ʼo Sehova”?
◻ Koteā te tupuʼaga lahi ʼo te fakafiafia ʼaē ʼe hā ʼi te fakahoko ʼo Sakalia 8:23?
[Paki ʼo te pasina 18]
ʼI te taʼu ʼaenī kua hili, neʼe fakaʼaogaʼi e te kau Fakamoʼoni ʼa Sehova ia hola e 1 150 353 444 moʼo palalau ki te hahaʼi ʼo ʼuhiga mo te Puleʼaga ʼa te ʼAtua