“ ʼE ʼAu Kau Ki Te Tokolahi ʼAē Neʼe Ke Fakahā Ki Ai Te Moʼoni”
ʼI SANUALIO ʼo te taʼu 1996, ko Carol neʼe kau ʼi te kosea ʼo te ʼuto. Neʼe ko tona taʼu 60 tupu, pea ʼo aʼu ki te temi ʼaia, neʼe ko he fafine neʼe fiafia tuʼumaʼu, mo mālohi pea neʼe fakaloto mālohi tana ʼu palalau ʼaē neʼe ina fai ki te hahaʼi fuli. Kae ʼi te temi ʼaia neʼe faigaʼi e te kau tōketā ke nātou tauʼi tona mahaki ʼaē kua kovi. ʼI tana lolotoga tau mo te mahaki ʼaia, neʼe maʼu e Carol te tohi ʼaenī:
“Kia Carol:
“ ʼE ʼau lotomamahi ʼo ʼuhiga mo tou mahaki. Kae meʼa fakafiafia foki, heʼe tou maʼu te ʼamanaki ʼaē ʼe tokoni mai ia te Tohi-Tapu ke tou ʼiloʼi pea ke tou ʼofa kiai. Ko te ʼamanaki ʼaia ʼe ko te ʼamanaki ʼaē ke puleʼi te kele e te Puleʼaga ʼo Sehova, ke feala hatatou maʼuli ʼi he palatiso, pea ʼe ko he temi ʼe tou fakaʼamu fuli ke hoko mai la.
“ ʼE ʼau loto ke ke ʼiloʼi, ko tau gāue fai faka mafola neʼe ina hāofaki te tokolahi mai te mate heʼegata. ʼE ʼau kau ʼi te hahaʼi ʼaia. ʼE mole ʼau ʼiloʼi papau peʼe kei ke manatuʼi tatā ʼuluaki felāveʼi. Neʼe ʼau taʼu 20 ʼi te temi ʼaia. Neʼe ʼau lauʼulu loloa pea neʼe ʼau fakatau te toloke, pea neʼe ʼau taka haʼele mo he kūtuga neʼe agamālohi. Neʼe ʼi ai tamatou ʼu fana pea neʼe mole mātou ʼofa ki te hahaʼi, gata pe kia mātou totonu.
“Neʼe ke fisifisi ki toku matapā mo te tahi Fakamoʼoni, pea neʼe ke fakahā mai kia ʼau Te Tule Leʼo pea mo te Réveillez-vous! Neʼe ʼau fia foaki atu kia koe he foʼi tola, kae neʼe mole ʼau fia toʼo te ʼu nusipepa. Neʼe ke fakamahino mai kia ʼau neʼe mole ke fai tau gāue ke ke maʼu ai hau falā. Neʼe ke fakahā mai kia ʼau neʼe ke fai te gāue ʼaia moʼo tokoni ki te hahaʼi ke nātou lau te Tohi-Tapu. ʼE mole ʼau ʼiloʼi papau pe neʼe ʼau toʼo te ʼu nusipepa pea mo lau. Kae neʼe ke to te pulapula ʼo te moʼoni ʼi toku maʼuli.
“Hili kiai ni ʼu taʼu, ko te tahi Fakamoʼoni ko tona higoa ko Gary neʼe haʼu ki te ʼapi ʼo taku faʼe, pea neʼe ʼau ʼi ai ʼi te ʼaho ʼaia. Neʼe ʼau fakahā age ki ai neʼe ke ʼaʼahi ʼau kua hili kiai ni ʼu taʼu. Neʼe ma ako fualoa te Tohi-Tapu mo Gary ʼo aʼu ki te temi ʼaē neʼe ʼau papitema ai ʼi te taʼu 1984. ʼI te temi nei, ʼe ʼau akoʼi ki taku ʼu fānau te moʼoni ʼo te Puleʼaga ʼo te ʼAtua.
“ ʼE ʼau ʼiloʼi papau, ʼe ʼau kau ki te tokolahi ʼaē neʼe ke fakahā ki ai te moʼoni ʼi te ʼu taʼu ʼo tau selevisi agatonu. Pea ʼaki te lotoʼofa ʼaia, neʼe ke faka fealagia kia ʼau pea mo toku famili ke mātou ʼiloʼi te ʼAtua Lahi ko Sehova, pea mo tona ʼAlo ko Sesu Kilisito. ʼE ʼau fakaʼamu ki te ʼaho ʼaē ka ʼau toe sio ai anai kia koe ʼi te tuʼu ʼo te ʼu faʼahiga meʼa foʼou, ʼaē ka holoholoʼi ai e Sehova te ʼu loʼimata fuli pe ʼi ʼotatou mata, pea puli ai te mate.—Fakahā 21:4.
“Kae ko ʼau pea mo toku famili, ʼe mātou fiafia heʼe mātou maʼu te fealagia ʼaē ke mātou feʼiloʼiʼaki mo koe, pea ʼe mātou kau kia nātou ʼaē neʼe ke faka mafola ki ai. Mālo.
“ ʼAki he ʼofa fakatautehina,
Ko ʼau Peter”
ʼOsi ʼaia tona mahaki ia māhina e ono, pea mate ia Carol ʼi te māhina ʼo Malesio 1996, kae kua ina to ʼaki he lototoʼa te ʼu tuʼuga pulapula ʼo te moʼoni lolotoga taʼu e 35 ʼo tona maʼuli faka evaselio. Neʼe mahino kia ia, ʼe mole he tahi ʼe feala ke ina ʼiloʼi peʼe ko te temi fea ʼaē ka fua ai anai te ʼu pulapula, māʼiape la peʼe kua hili kiai ni ʼu taʼu.—Mateo 13:23.