ʼE Koutou Holi Koa Ke Toe Lahi Age Takotou Tauhi?

“NEʼE ʼau ʼita kia Sehova,” ko te ʼui ʼaia ʼa Laura. “Neʼe ʼau faikole tuʼumaʼu ke tokoni mai kia māua ke ma fakatokatoka tomā ʼu fihifihia ʼi te faʼahi ʼo te paʼaga, ke feala ai ke ʼau hoko atu taku pionie​—kae neʼe mole hona fua. Moʼo fakaʼosi neʼe tonu ke ʼau tuku taku selevisi pionie. ʼE moʼoni, neʼe ʼau toe maheka foki kia nātou ʼaē neʼe feala ke hoko atu tanatou selevisi pionie.”

Tou fakatokagaʼi foki mo te meʼa ʼaē neʼe hoko kia Michael, ko te tagata faifekau faka minisitelio ʼi te kokelekasio ʼo te kau Fakamoʼoni ʼa Sehova. Neʼe fia liliu ko he tagata taupau. (1 Timoteo 3:1) ʼI te mole hoko ʼaē ʼo te meʼa ʼaē neʼe holi kiai talu mai fualoa, neʼe lotomamahi ai, ʼo mole kei fia fai ki te pilivilesio ʼaia. ʼE ina ʼui fēnei: “Neʼe mole ʼau loto ke ʼau toe lotomamahi.”

Neʼe kua hoko koa kia koutou he meʼa feiā? Neʼe tonu koa ke koutou tuku he pilivilesio faka teokalatike neʼe koutou leleiʼia? Ohage la, neʼe tonu koa ke koutou tuku takotou selevisi pionie, takotou fai faka mafola ʼi te temi katoa maʼa te Puleʼaga? Peʼe koutou holi koa ki he ʼu faʼahiga gāue ʼi te kokelekasio neʼe foaki ki ʼihi? Peʼe lagi koutou holi ke koutou gāue ʼi te Petele peʼe koutou misionea, kae mole feala ʼuhi ko tokotou ʼaluʼaga.

ʼE fakamoʼoni fēnei e te tohi ʼo Tāʼaga Lea: “ ʼE mahaki te loto, mokā ʼe mole hoko vave te meʼa ʼaē ʼe ʼamanaki kiai.” (Tāʼaga Lea 13:12) ʼE feala ke hoko tāfito te faʼahi ʼaia mokā maʼu e ʼihi te ʼu pilivilesio ʼaē neʼe koutou ʼamanaki ki ai. ʼE foaki koa e te Folafola ʼa te ʼAtua te fakasiosio tonu, te fakafimālie, pea mo te ʼamanaki kia nātou ʼaē ʼe tau mo te ʼu faʼahiga mamahi ʼaia? Ei. ʼI tona fakahagatonu, neʼe fakahā e te Pesalemo 84 te ʼu meʼa ʼaē neʼe logoʼi e te tagata kaugana ʼa Sehova, ʼaē neʼe holi mo ia ki te ʼu meʼa feiā ʼi te tauhi ʼaē kia Sehova, kae neʼe mole hoko.

Ko Te Loto Fakafetaʼi ʼo Te Levite

Ko nātou ʼaē neʼe nātou tohi te Pesalemo 84 neʼe ko te ʼu foha ʼo Kole, te kau Levite ʼaē neʼe tauhi ʼi te fale lotu ʼa Sehova pea kia nātou, neʼe maʼuhiga ʼaupito tanatou ʼu pilivilesio ʼi te selevisi ʼaia. ʼE ʼui fēnei e te tahi ia nātou ʼaia: “ ʼI matalelei ʼo tou tapenakulo lahi, Ê Sehova ʼo te ʼu kautau! Neʼe fakaʼamu toku nefesi, pea neʼe holi ki te ʼu malaʼe ʼo Sehova. Ko toku loto pea mo toku kakano neʼe nā kalaga fakafiafia ki te ʼAtua maʼuli.”​—Pesalemo 84:​1, 2.

ʼI te holi ʼaupito ʼa te Levite ʼaia ke tauhi ʼi te fale lotu ʼa Sehova, neʼe ko he meʼa matalelei kia ia te meʼa māhani ʼaē neʼe sio kiai ʼi te ala ki Selusalemi. ʼE ina ʼui fēnei: “ ʼI tanatou fakalaka ʼi te telea mālalo ʼo te ʼu paka, ʼe nātou fakaliliu ko he matapuna vai.” (Pesalemo 84:6) Ei, neʼe ko he koga meʼa magemage ia, kae kia ia neʼe hage ko he potu neʼe fakavai lelei.

Mai tona ʼaluʼaga ʼaē ko te tagata fai pesalemo neʼe ko he Levite neʼe mole tauhi faka pelepitelo, koia neʼe feala ke tauhi ʼi te fale lotu ʼi te vāhaʼa pe e tahi ʼi te ʼu māhina ono fuli. (1 Fakamatala 24:​1-​19; 2 Fakamatala 23:8; Luka 1:​5, 8, 9) Kapau neʼe mole gāue ʼi te fale lotu, pea neʼe nofo ʼi fale, ʼi te tahi kolo ʼi te ʼu kolo ʼo te kau Levite. Koia neʼe hiva fēnei ai: “Māʼia mo te manulele neʼe ina maʼu tona ʼapi, pea mo te kiʼi misi tona fātaʼi, ʼaē neʼe ina ʼai ki ai tona ʼu kiʼi ʼuhi​—tou ʼaletale lahi, Ê Sehova ʼo te ʼu kautau, toku Hau pea mo toku ʼAtua!” (Pesalemo 84:3) Neʼe lagi fiafia ʼaupito te Levite mo kanapaula neʼe hage ko te ʼu manulele ʼaē neʼe nonofo fualoa age ia ia ʼi te fale lotu!

Neʼe lagi faigafua ki te Levite ʼaia ke lotomamahi, he neʼe mole feala ke nofo ʼo tauhi tuʼumaʼu ʼi te fale lotu. Kae, neʼe fiafia ia ʼi te tauhi ʼaē ʼo mulimuli ki te ʼu meʼa ʼaē neʼe feala ke ina fai, pea ʼe mahino papau ia, neʼe mahino kia ia ko te tauhi fakamalotoloto kia Sehova ʼe ʼaoga kiai he ʼu faiga lahi. Koteā ʼaē neʼe tokoni ki te Levite agatonu ʼaia ke nofo fiafia ʼi tona ʼu pilivilesio ʼi te tauhi?

Tou Ako Ke Tou Fiafia ʼi Te ʼu Meʼa ʼAē Kua Tou Maʼu

ʼE ʼui fēnei e te Levite: “Ko he ʼaho e tahi ʼi tou malaʼe ʼe lelei age ia ʼi ni ʼu ʼaho e afe ʼi he tahi faʼahi! Neʼe ʼau fili ke ʼau nofo ʼi te muʼa matapā ʼo toku ʼAtua, ʼi haku feʼaluʼaki ʼi te ʼu falelā ʼo te agakovi.” (Pesalemo 84:10) Neʼe ina ʼiloʼi ko te nofo ʼi te fale ʼa Sehova, tatau aipe pe neʼe ko he ʼaho e tahi, ʼe ko he toe pilivilesio. Pea neʼe mole ʼaho tahi pe te tauhi ʼa te Levite ʼaia ʼi te fale lotu. Ko tona fiafia ʼi te ʼu pilivilesio neʼe ina uga ia ia ke hiva fakafiafia.

E feafeaʼi kia tatou? ʼE tou fiafia koa ʼi te ʼu tapuakina ʼaē kua tou maʼu, peʼe tou tautau galoʼi te ʼu meʼa ʼaē kua tou maʼu ʼi te selevisi ʼa Sehova? ʼUhi ko tanatou tauhi kia te ia, neʼe foaki e Sehova ki tana hahaʼi te ʼu tuʼuga pilivilesio pea mo te ʼu maʼua. ʼE kau kiai te ʼu maʼua mamafa ʼo te tagata taupau, mo te tagata tauhi ōvi, mo te faiako, pea mo te ʼu gāue kehekehe ʼi te selevisi ʼi te temi katoa. Kae ʼe toe kau kiai mo te tahi ʼu meʼa maʼuhiga ʼe pipiki ki te tauhi kia Sehova.

Ohage la, ko te minisitelio faka Kilisitiano. ʼE fakatatau e te ʼapositolo ko Paulo totatou pilivilesio ʼaē ko te faka mafola ʼo te logo lelei, ki hatatou maʼu ʼo he “ ʼu koloā . . . ʼi te ʼu ipu kele.” (2 Kolonito 4:7) ʼE koutou faka ʼuhiga koa te selevisi ʼaia ohage ko he koloā maʼuhiga? Ko Sesu Kilisito, ʼaē neʼe ina kamata fakahoko te gāue fai faka mafola ʼo te Puleʼaga, neʼe ina faka ʼuhiga feiā tana gāue, ʼo ina tuku mai he faʼifaʼitaki kia tatou. (Mateo 4:​17) Neʼe ʼui fēnei e Paulo: “ ʼI tatatou maʼu te minisitelio ʼaia . . . , ʼaua naʼa tou līaki.”​—2 Kolonito 4:1.

Ko te ʼu fono faka Kilisitiano ʼe ko he fakatuʼutuʼu taputapu ʼe mole tonu ke tou meʼa noaʼi. ʼI tatatou ʼu fono, ʼe tou maʼu te ako maʼuhiga pea ʼe tou maʼu te ʼu hahaʼi ʼe ʼaoga ke tou fakakaugā mo nātou. Tahi ʼaē meʼa, ʼi te ʼu fono ʼe feala ke tou fakahā ʼi muʼa ʼo te kaugamālie tatatou tui pea mo tatatou ʼamanaki, ʼo tou tali tuʼumaʼu pea mo tou kau ki te ʼu polokalama ʼi he tahi ʼu ʼaluʼaga. (Hepeleo 10:23-​25) Ko tatatou ʼu fono ʼe ko he fakatuʼutuʼu ʼe tonu ke maʼuhiga kia tatou!

Ko Michael, ʼaē neʼe tou talanoa kiai ʼi te kamata, neʼe maʼuhiga ʼaupito kia ia te ʼu tapuakina ʼaia pea mo ina leleiʼia ʼaupito. Kae ko tana lotomamahi ʼi te mole feala ʼaē ke tagata ʼāfea neʼe ina fakasiʼisiʼi faka temi tana leleiʼia ia te ʼu meʼa ʼaia. ʼI tana toe vakavakaʼi te ʼu meʼa ʼaia, neʼe ina toe maʼu he manatu fakapotopoto pea mo faʼa kātaki ʼo falala kia Sehova.

ʼE mole tonu ke tou ʼita heʼe mole tou maʼu he faʼahiga pilivilesio, kae ʼe lelei age tatatou toe vakavakaʼi te ʼu ʼaluʼaga ʼaē ʼe tapuakina ai tatou e Sehova, ohage ko te ʼu meʼa ʼaē neʼe ina fai maʼa te tagata fai pesalemo.a Kapau ʼe mole tou sio ki te ʼu tapuakina lahi ʼaia, pea ʼe tonu ke tou toe vakaʼi, ʼo tou kole kia Sehova ke tokoni kia tatou ke tou sio ki tatatou ʼu pilivilesio, pea mo te ʼu ʼaluʼaga ʼaē ʼe ina tapuakina ai tatou pea mo ina fakaʼaogaʼi ai tatou ke tou fakavikiviki kia te ia.​—Tāʼaga Lea 10:22.

ʼE toe maʼuhiga ke tou mahino ko te ʼu pilivilesio makehe, ohage ko te gāue faka taupau, ʼe ʼi ai tona ʼu fakamaʼua tāfito. (1 Timoteo 3:​1-7; Tito 1:​5-9) Koia, ʼe ʼaoga ke tou vakavakaʼi ia tatou totonu, ke tou kumi he ʼu faʼahi ʼe tonu ke tou gāueʼi, pea mo tou faiga lahi ke tou hikihiki te ʼu faʼahi ʼaia.​—1 Timoteo 4:​12-​15.

ʼAua Naʼa Koutou Lotovaivai

Kapau ʼe mole tou maʼu he faʼahiga pilivilesio ʼi te selevisi, ʼe mole tonu leva ke tou manatu ʼe lahi age te ʼofa ʼa Sehova kia nātou ʼaē ʼe nātou maʼu te pilivilesio ʼaia, peʼe mole ina maʼu he meʼa ʼe lelei ia tatou. ʼE mahino ia, ʼe mole tonu ke tou ʼui ʼaki he loto maheka, ko nātou ʼaia neʼe nātou maʼu tonatou ʼu pilivilesio ʼaia ʼaē ʼe mole tau mo nātou, ʼuhi ko te fakapalatahi ʼa te tagata kae mole ko he fakatuʼutuʼu faka teokalatike. Ko te taupau ʼo te ʼu taʼi manatu ʼaia, ʼe feala ke iku ki he loto maheka, mo he ʼu kē, pea ʼe feala ke tou līaki ia meʼa fuli.​—1 Kolonito 3:3; Sake 3:14-16.

Ko Laura, ʼaē neʼe tou talanoa kiai ʼi te kamata, neʼe mole tuʼu ai tana manatu. Ki muli age, neʼe ina fakatokatoka tona ʼita pea mo tona maheka. Neʼe faikole tuʼumaʼu ia Laura ki te ʼAtua, ke tokoni kia ia ke ina tauʼi tana aga ʼaē neʼe mole lelei, ʼuhi ko te mole feala ʼaē ke pionie. Tahi ʼaē meʼa, neʼe kumi tokoni ki te ʼu tagata popoto ʼo te kokelekasio, pea neʼe tui papau ai ʼe ʼofa te ʼAtua kia ia. Neʼe ina ʼui fēnei: “Neʼe foaki mai e Sehova te tokalelei ʼo te ʼatamai. Logope la ko ʼau mo toku ʼohoana ʼe mole feala ke ma pionie ʼi te temi nei, kae ʼe maʼuhiga kia māua te temi ʼaē neʼe ma pionie ai, pea ko te ʼu meʼa ʼaē neʼe hoko kia māua ʼi te selevisi, ʼe nātou fakaloto mālohiʼi māua. ʼE ma toe tokoni foki ki tamā tama lahi ʼi tana selevisi pionie.” ʼI tona fiafia, ʼe kua feala kia Laura ʼi te temi nei ke “fakafiafia mo te hahaʼi ʼaē ʼe fiafia” ʼi tanatou selevisi pionie.​—Loma 12:15.

Tou Fakatuʼutuʼu He ʼu Meʼa ʼe Feala Ke Tou Fakahoko

Ko totatou fiafia ʼi te temi nei ʼi totatou ʼu pilivilesio ʼi te selevisi, ʼe mole faka ʼuhiga ʼaki ai ke ʼaua naʼa tou fai he tahi age ʼu fakatuʼutuʼu faka teokalatike ki te temi ka haʼu. ʼI tana talanoa ʼo ʼuhiga mo te fakatuʼuake ki selo, neʼe ʼui e Paulo ʼe “haga ki te ʼu meʼa ʼaē ʼe ʼi muʼa.” Neʼe ina toe ʼui fēnei: “Logope he faʼahi kua tou aʼu ki ai ʼi ʼatatou ʼu faiga, tou haga haʼele fakalelei ʼi te fai pe ʼaia.” (Filipe 3:​13-​16) Ko he ʼu fakatuʼutuʼu faka teokalatike ʼe feala ke tokoni mai kia tatou ke tou haga ki te ʼu meʼa ʼaē ʼi muʼa. Kae ko te meʼa ʼaē ʼe faigataʼa ʼe ko te fai ʼo he ʼu fakatuʼutuʼu ʼe mole faʼa lahi fau.

Ko he ʼu fakatuʼutuʼu ʼe mole faʼa lahi fau ʼe ko he fakatuʼutuʼu fakapotopoto pea ʼe feala ke tou fakahoko. (Filipe 4:5) ʼE mole faka ʼuhiga leva, ʼe mole fakapotopoto he fakatuʼutuʼu, mo kapau ʼe tonu ke kita gāue kinakina lolotoga ni ʼu taʼu moʼona fakahoko. Ko te taʼi fakatuʼutuʼu loaloaga ʼaia ʼe feala ke fakahoko, ʼo tou fai he tahi ʼu fakatuʼutuʼu ʼe tokoni anai kia tatou ke feala, ʼaki te temi, ke tou fakahoko te fakatuʼutuʼu ʼaia. ʼE feala ke ʼaoga te ʼu meʼa ʼaia moʼo fakaʼiloga tatatou tuputupu ʼi te faʼahi fakalaumālie. Ko te fakahoko māmālie ʼo te ʼu faʼahi ʼaia, ʼe ina foaki anai kia tatou he fiafia kae mole ko he lotomamahi.

Ko He Manatu Fakapotopoto

Kae ʼe maʼuhiga ke tou ʼiloʼi, ʼe mole feala ke tou maʼu te tahi ʼu pilivilesio ʼuhi ko totatou ʼu ʼaluʼaga pea mo totatou ʼu tuʼakoi. Kapau ʼe tou fakatuʼutuʼu ke tou maʼu te ʼu pilivilesio ʼaia, pea ʼe tou lotovaivai anai pea mo lotomamahi. Ko te ʼu fakatuʼutuʼu ʼaia ʼe tonu ke tuku ki he tahi temi, ʼo aʼu ki te hoko mai ʼo tona temi totonu. Ko te fai ʼo te faʼahi ʼaia ʼe mole faigataʼa anai, mo kapau ʼe tou faikole ki te ʼAtua ke tou fakafeauga ki te ʼu meʼa ʼaē kua tou maʼu, pea mo tou fakamuʼamuʼa tāfito te fai ʼo te finegalo ʼo Sehova ko te meʼa tāfito ʼaia ʼaē ʼe tou tokakaga kiai. ʼI te temi ʼaē ʼe tou maʼu ai te ʼu pilivilesio, ko te kolōlia ʼo Sehova ʼaē ʼe maʼuhiga, kae mole ko te ʼu meʼa ʼaē neʼe tou fai. (Pesalemo 16:​5, 6; Mateo 6:​33) Koia la ʼaē ʼe ʼui mai ai e te Tohi-Tapu kia tatou: “Tuku tau ʼu gāue kia Sehova totonu, pea ko tau ʼu fakatuʼutuʼu ʼe tuʼu mālohi anai.”​—Tāʼaga Lea 16:3.

ʼI tatatou vakaʼi te Pesalemo 84, ʼe tou sio ai ko te tagata fai pesalemo neʼe ina maʼu te manatu ʼaia ʼo ʼuhiga mo tona ʼu pilivilesio ʼi te tauhi, pea neʼe lahi tona tapuakina e Sehova. Tahi ʼaē meʼa, ko te pesalemo ʼaia ʼe kei ʼaoga ki te hahaʼi ʼa Sehova, ʼo aʼu mai ki te temi ʼaenī.

Kapau ʼe koutou faikole ʼaki he loto falala kia Sehova, ʼe feala ke koutou fakafuafua lelei takotou holi ki he tahi ʼu pilivilesio mo takotou fakafeauga ki te ʼu pilivilesio ʼaē ʼe koutou maʼu ʼi te temi ʼaenī. ʼAua naʼa koutou tuku takotou holi ʼaē ke lahi te ʼu meʼa ʼaē ʼe koutou fai ke ina pulihi tokotou fiafia ʼi te ʼu meʼa ʼaē kua koutou maʼu ʼi te temi nei, pea mo te fiafia ʼi te tauhi kia Sehova ʼo talu ai. Tou falala kia Sehova, heʼe tou fiafia ai, ohage ko tona fakahā e te ʼu palalau ʼaenī ʼa te Levite: “Ê Sehova ʼo te ʼu kautau, ʼe manuʼia te tagata ʼaē ʼe falala kia te koe.”​—Pesalemo 84:⁠12.

[Nota ʼi te lalo pasina]

[Talanoa ʼo te pasina 11]

Te ʼu Fakatuʼutuʼu ʼe Feala Ke Tou Fai

Tou lau te tohi-tapu ʼi te ʼaho fuli.​—sosue 1:8; Mateo 4:4

Tou hikihiki totatou fealagia ki te fakakaukau ʼaki te ako ʼo te Tohi-Tapu.​—Hepeleo 5:​14

Tou fakatuputupu he ʼu vāhaʼa lelei mo te ʼAtua.​—Pesalemo 73:⁠28

Tou maʼuliʼi te ʼu fua ʼo te laumālie.​—Kalate 5:​22, 23

Tou fakahikihiki te lelei ʼo tatatou ʼu faikole.​—Filipe 4:​6, 7

Ke lelei age tatatou fai faka mafola pea mo tatatou faiako.​—1 Timoteo 4:​15, 16

Tou lau pea mo metitasioʼi te ʼu alatike ʼo te ʼu nusipepa ʼo Te Tule Leʼo pea mo te Réveillez-vous!​—Pesalemo 49:3

[Paki ʼo te pasina 9]

Kapau ʼe tou fai hatatou ʼu fakatuʼutuʼu, tou fakamuʼamuʼa te fai ʼo te finegalo ʼo te ʼAtua