ʼU Tūpulaga—ʼE Koutou Tuputupu Koa ʼi Te Faʼahi Fakalaumālie?
“ ʼI TANA manatuʼi te ʼu ʼaho neʼe kei ako ai ʼi te kolesi, ʼe ʼui fēnei e Hideo: “Neʼe ʼau kau ki te ʼu fono faka Kilisitiano, kae neʼe mole ʼau fia tauhi kia Sehova. ʼI taku manatu, neʼe ʼau fakaʼamu tuʼumaʼu ke ʼiloa ʼau mo toku ʼu kaugā ako, pea neʼe ʼau fia haʼele fia tagata ʼi te ala mo he taʼahine ʼe ma fakatahi. Neʼe mole lelei te ʼu meʼa ʼaē neʼe ʼau fakaʼamu kiai, pea neʼe mole ʼau fia tuputupu ʼi te faʼahi fakalaumālie.” Tokolahi te kau tūpulaga ohage ko Hideo, ʼe mole nātou fakakaukauʼi tonatou ka haʼu, heʼe mole nātou fia fai ni ʼu fakatuʼutuʼu ʼe ʼaoga peʼe mole nātou fia tuputupu ʼi te faʼahi fakalaumālie.
Kapau ʼe kei koutou tūpulaga, ʼe lagi koutou fiafia mokā ʼe koutou kau ki ni ʼu faigaoʼi peʼe ko ni ʼu meʼa ʼe koutou manako kiai. Kae ʼo ʼuhiga mo te ʼu gāue fakalaumālie, ʼe lagi mole koutou fiafia ai. ʼE feala koa ke koutou fiafia mokā koutou fai ni ʼu fakatuʼutuʼu fakalaumālie? Koutou fakatokagaʼi te ʼu palalau ʼa te tagata fai pesalemo ʼaenī: “Ko te fakamanatu ʼa Sehova ʼe tāu mo te falala, ʼo ina fakaliliu ke poto ia ia ʼaē ʼe vale . . . Ko te fakatotonu ʼa Sehova ʼe maʼa, pea ʼe ina fakagigila te ʼu mata.” (Pesalemo 19:7, 8) Ko te Folafola ʼa te ʼAtua ʼe feala ke ina takitaki “ia ia ʼaē ʼe vale” ke poto, ‘ ʼo ina fakagigila tona ʼu mata.’ Ei, ʼe koutou lava fiafia mokā ʼe koutou fai ni ʼu gāue fakalaumālie. Kae koteā ʼaē ʼe tonu ke koutou fai moʼo logoʼi te fiafia ʼaia? Koteā ʼuluaki ʼaē ʼe tonu ke koutou fai?
Koutou Fakatuputupu ʼi Tokotou Loto Ia Te Fia Tauhi Ki Te ʼAtua
ʼUluaki, ʼe tonu ke koutou fia fai ki te faʼahi ʼaia. Koutou fakatokagaʼi te faʼifaʼitaki ʼa te Hau tūpulaga ko Sosiasi ʼo Suta. ʼI te temi ʼaē neʼe maʼu ai te tohi ʼo te Lao ʼa Sehova ʼi te fale lotu, neʼe lau e Sosiasi te Lao pea neʼe lotomamahi ʼaupito ʼi te ʼu meʼa ʼaē neʼe logo kiai. Pea “neʼe toʼo kehe leva e Sosiasi te ʼu meʼa fakalialia fuli mai te ʼu fenua katoa ʼaē neʼe maʼu e te ʼu foha ʼo Iselaele.” (2 Fakamatala 34:14-21, 33) Ko te lau ʼo te Folafola ʼa te ʼAtua neʼe ina uga ia Sosiasi ke ina fai he tahi age ʼu meʼa moʼo lagolago ki te tauhi maʼa.
ʼE feala pe foki mo koutou ke koutou fakatuputupu ʼi tokotou loto takotou fia tauhi kia Sehova, mo kapau ʼe koutou lau tuʼumaʼu ia te Tohi-Tapu pea mo metitasioʼi te ʼu meʼa ʼaē ʼe koutou lau. Neʼe ko te faʼahi ʼaia neʼe ina uga ia Hideo ke ina fai he ʼu gāue. Neʼe kamata kaumeʼa lelei mo he pionie katoa, ko he minisi gāue temi katoa ʼa te kau Fakamoʼoni ʼa Sehova. Ko te pionie neʼe ina ako tuʼumaʼu te Tohi-Tapu, pea neʼe faiga ke ina maʼuliʼi te ʼu meʼa ʼaē ʼe ina akoʼi. ʼI tana lotomālohi ʼaki te faʼifaʼitaki ʼa te pionie, neʼe kamata ako feiā mo Hideo, pea neʼe kamata tuputupu ai tana fia tauhi ki te ʼAtua pea mo te hahaʼi. Neʼe ʼi ai leva te ʼuhiga moʼoni ʼo tona maʼuli ʼaki tana tuputupu fakalaumālie.
Ko te lau ʼo te Tohi-Tapu ʼi te ʼaho fuli ʼe feala ke ina uga ai te kau tūpulaga. ʼE fakamahino fēnei e Takahiro: “Ka ʼau ʼalu ʼo moe, pea ka ʼau manatuʼi neʼe heʼeki ʼau lau taku koga Tohi-Tapu ʼo te ʼaho, ʼe ʼau toe tuʼu ki ʼaluga ʼo lau. ʼOsi ʼaia, pea ʼau logoʼi te takitaki ʼa te ʼAtua. ʼE tou tuputupu ʼi te faʼahi fakalaumālie mokā ʼe tou lau te Tohi-Tapu ʼi te ʼaho fuli. ʼI taku fia fakalahi taku ʼu gāue kia Sehova, ʼosi pe taku maʼu pepa mai te faleako neʼe ʼau toʼo taku selevisi pionie katoa. Pea ʼe ʼau fiafia ʼaupito ʼi taku selevisi ʼaia.”
ʼO hilifaki ki takotou lau ia te Tohi-Tapu, koteā te tahi age meʼa ʼe feala ke tokoni atu moʼo fakaloto mālohiʼi takotou fia fakavikiviki kia Sehova? Neʼe ko te faʼe ʼa Tomohiro ʼaē neʼe ina akoʼi kia ia te ʼu moʼoni ʼo te Tohi-Tapu. ʼE ina ʼui fēnei: “Neʼe hoki malave kia ʼau te ʼofa ʼo Sehova pea mo te sakilifisio faitotogi ʼa Sesu, ʼi taku akoʼi fakalelei ʼi toku taʼu 19 ia te tohi La vie a bien un but. Ko taku fakafetaʼi ʼaia ki te ʼofa ʼo te ʼAtua, neʼe ina uga ia ʼau ke lahi age taku ʼu gāue maʼa Sehova.” (2 Kolonito 5:14, 15) Tokolahi te kau tūpulaga ohage ko Tomohiro, ʼi te temi ʼaē neʼe nātou fakatuʼutuʼu ai ke nātou fai hanatou ako takitokotahi ʼo te Tohi-Tapu, neʼe nātou lotomālohi ke nātou tuputupu ʼi te faʼahi fakalaumālie.
Kae e feafeaʼi mo kapau ʼe kei koutou logoʼi ʼe mole koutou fia tauhi kia Sehova? ʼE ʼi ai koa he tahi ʼe feala ke koutou kumi tokoni ki ai? Neʼe tohi fēnei e te ʼapositolo ko Paulo: “Heʼe ko te ʼAtua . . . ʼe gāue ʼi ʼokotou loto koteʼuhi ke koutou fia fai pea mo koutou gāue ai.” (Filipe 2:13, MN ) Kapau ʼe koutou kole tokoni kia Sehova, ʼe ina foaki noa atu anai tona laumālie maʼoniʼoni, ʼaē ka ina faka mālohiʼi anai koutou ke koutou “gāue” pea mo koutou toe “fia fai” ai. Ko tona faka ʼuhiga ko te laumālie maʼoniʼoni ʼe ina hikihiki anai takotou fia fai te meʼa ʼaē ʼe lelei ki te selevisi ʼa Sehova, pea mo tokoni atu anai ke koutou tuputupu ʼi te faʼahi fakalaumālie. Ia meʼa fuli, koutou falala ki te mālohi ʼa Sehova pea mo koutou fakaloto mālohiʼi tokotou loto!
Koutou Fai Hakotou ʼu Fakatuʼutuʼu
Kapau kua koutou fakatotonu ke koutou tauhi katoa kia Sehova, ʼe tonu ke koutou fai hakotou ʼu fakatuʼutuʼu takitokotahi ke feala ai hakotou tuputupu ʼi te faʼahi fakalaumālie. Ko Mana, ko te kiʼi finemui Kilisitiano, neʼe ina ʼui fēnei: “Ko taku ʼu fakatuʼutuʼu neʼe tokoni ʼaupito kia te ʼau. Pea neʼe mole ʼau holomuli ʼi taku ʼu fakatuʼutuʼu ʼaia, kae neʼe ʼau lototoʼa ʼo fakahoko. ʼI taku fakakaukauʼi taku ʼu fakatuʼutuʼu, neʼe ʼau faikole fakamalotoloto kia Sehova ke ina takitaki ʼau, pea neʼe feala ai ke ʼau tuputupu fakalelei.”
ʼE tonu ke fakapotopoto pea mo faigafua takotou ʼu fakatuʼutuʼu. Kapau ʼe koutou lau ʼi te ʼaho fuli he kapite ʼo te Tohi-Tapu, ʼe ko he fakatuʼutuʼu fakapotopoto. ʼE toe feala pe foki ke koutou fai hakotou ʼu kumi. Koutou fakaʼaogaʼi ki te faʼahi ʼaia he tohi ʼi te lea Fakafalani, ʼe feala anai ke koutou ako ai te ʼu kalitate ʼo Sehova ʼaē ʼe tuʼu ʼi lalo ʼo te kupu “Te ʼu Kalitate ʼo Sehova” ʼo te kupu tāfito “Sehova” ʼi te ʼu tohi Index des publications de la Société Watch Tower. ʼE lagi ko kupu tāfito e 40 ʼe feala ke koutou vakaʼi, pea ʼe mahino ia ko takotou ʼu kumi ʼe ina fakaōvi anai koutou kia Sehova pea mo uga koutou ke lahi age takotou ʼu gāue maʼa ia.
Kapau ʼe mole heʼeki koutou kau ki te Ako ʼo Te Minisitelio Faka Teokalatike, ʼe lagi ko he fakatuʼutuʼu ke koutou fai. Kua koutou fai faka mafola koa? Kapau ʼe mole heʼeki koutou fai faka mafola, ʼe lagi feala ke koutou faigaʼi ke koutou liliu ko he kaugā fagona. Ko he tahi fakatuʼutuʼu lelei ke koutou fai, koutou vakavakaʼi fakalelei takotou ʼu felogoi mo Sehova pea koutou foaki tokotou maʼuli kia te ia. Tokolahi te kau tūpulaga ʼe nātou faiga ke nātou agatonu ki te kua foaki ʼo tonatou maʼuli kia Sehova, ʼo nātou fakatuʼutuʼu ke nātou kau ki te minisitelio temi katoa.
ʼE lelei ke koutou fai hakotou ʼu fakatuʼutuʼu ʼi tokotou maʼuli, kae koutou tokakaga naʼa koutou fakatatau takotou ʼu gāue mo niʼihi. ʼE koutou fiafia lahi anai ʼi te ʼu meʼa ʼaē ʼe koutou fai mo kapau ʼe mole koutou fakatatau mo niʼihi.—Kalate 5:26; 6:4.
Lagi ʼi takotou manatu ʼe mole koutou lavaʼi te faʼahi ʼaia pea mo faigataʼa fau kia koutou he ʼu fakatuʼutuʼu fakapotopoto. Pea koutou muliʼi te tokoni faka Tohi-Tapu ʼaenī: “Falele tou taliga pea mo fagono ki te ʼu palalau ʼa te kau popoto.” (Tāʼaga Lea 22:17) Koutou kumi tokoni ki takotou ʼu mātuʼa peʼe ko he tahi age ʼu Kilisitiano kua fakapotopoto. ʼIo, ko te ʼu mātuʼa pea mo ʼihi, ʼe tonu ki te faʼahi ʼaia ke nātou fakapotopoto pea mo fakaloto mālohi. ʼE feala ke puli te fiafia ʼa te kau tūpulaga mo kapau ʼe nātou logoʼi ʼe fakakinauʼi fau nātou ʼe niʼihi ke nātou fai ni ʼu fakatuʼutuʼu, pea ʼe lagi feala ke mole fua te ʼu fakatuʼutuʼu ʼaia. Neʼe hoko te meʼa ʼaia kia Akiko. ʼE ʼui fēnei e te kiʼi finemui: “Neʼe lahi te ʼu fakatuʼutuʼu neʼe kua fai maʼaku e taku ʼu mātuʼa. Ohage la neʼe nā tohi ʼau ke ʼau kau ki te Ako ʼo Te Minisitelio Faka Teokalatike, ke ʼau kau ki te gāue fai faka mafola, ke ʼau papitema, pea ke ʼau pionie. Neʼe ʼau gāue kinakina moʼo fakahoko te ʼu fakatuʼutuʼu fuli ʼaia. Pea ka kua ʼau fakahoko he gāue, neʼe mole nā fai mai he fakamālo ki taku gāue ʼaia, kae neʼe nā foaki mai he tahi gāue ke ʼau fai. ʼAki tanā fai ʼaia, neʼe ʼau logoʼi tuʼumaʼu ʼe fakakinauʼi ʼau ke ʼau fai te ʼu fakatuʼutuʼu ʼaia. Neʼe ʼau gaʼegaʼe pea neʼe hage kia ʼau neʼe mole ʼau fakahoko he meʼa.” Koteā ʼaē neʼe mole fiafia ai? Neʼe lelei te ʼu fakatuʼutuʼu fuli ʼaia, kae neʼe mole ko tana ʼu fakatuʼutuʼu ʼa ia totonu. Ke fua lelei, ʼe tonu ko koutou totonu ʼaē ʼe koutou fai te ʼu fakatuʼutuʼu.
Koutou manatuʼi ia Sesu Kilisito. ʼI te temi ʼaē neʼe haʼu ai ki te kele, neʼe ina ʼiloʼi peʼe koteā te meʼa ʼaē neʼe loto kiai tana Tāmai, ia Sehova ke ina fai. Maʼa Sesu, ko te fai ʼo te finegalo ʼo Sehova, neʼe mole ko he fakatuʼutuʼu, kae neʼe ina faka ʼuhiga ko he gāue ʼe tonu ke ina fakahoko. Neʼe feafeaʼi kia Sesu tana gāue? Neʼe ina ʼui fēnei: “Ko taku meakai e ko taku fai te finegalo o ia ae nee ina fekaui au pea mo au fakakatoa tana gaue.” (Soane 4:34) Neʼe fiafia Sesu ʼi te fai ʼo te finegalo ʼo Sehova pea neʼe ina fai ia meʼa fuli neʼe loto kiai tana Tāmai. Neʼe hage kia Sesu ko hana meʼa kai—neʼe ina leleiʼia pea mo fiafia ʼi te fakahoko ʼo te gāue ʼaē neʼe fakatotonu age ke ina fai. (Hepeleo 10:5-10) ʼE toe feala foki ke koutou fiafia mokā ʼe koutou fai ʼaki he loto ʼe lelei, te ʼu meʼa ʼaē ʼe fakaloto mālohiʼi koutou e takotou ʼu mātuʼa ke koutou fai.
Koutou Haga Fai Te Meʼa ʼAē ʼe Lelei
Kapau kua koutou ʼiloʼi te fakatuʼutuʼu ʼaē ke koutou fai, koutou faigaʼi ke koutou fakahoko. ʼE ʼui ia Kalate 6:9: “Aua naa tou lotovaivai i te fai o te lelei, koteuhi e tou utu anai moka hoko mai tona temi, kapau foki e mole tou lotovaivai.” ʼAua naʼa koutou falala pe ki tokotou mālohi tokotahi peʼe ki tokotou ʼu fealagia. ʼE lagi koutou felāveʼi anai mo ni ʼu fihifihia pea ʼi ʼihi temi ʼe lagi hage anai kia koutou ʼe mole he fua ʼo takotou ʼu faiga. Kae ʼe fakapapau fēnei mai e te Tohi-Tapu: “ ʼI tou ʼu ala fuli tokagaʼi ia [te ʼAtua], pea ko ia, ʼe ina fakatonutonuʼi anai tou ʼu ala foufou.” (Tāʼaga Lea 3:6) ʼE tokoni atu anai ia Sehova kia koutou mo kapau ʼe koutou gāue mālohi moʼo fakahoko takotou ʼu fakatuʼutuʼu fakalaumālie.
Ei, kapau ʼe koutou fakatuputupu takotou fia tauhi kia Sehova, pea mo faigaʼi ke koutou fakahoko takotou ʼu fakatuʼutuʼu fakalaumālie, ʼe feala anai ke ‘ ʼiloga takotou ʼu faiga ki te hahaʼi fuli.’ (1 Timoteo 4:15) Pea ʼe koutou maʼu anai he ʼuhiga moʼoni ʼi te gāue ki te ʼAtua.
[Paki ʼo te pasina 9]
Ko te lau ʼo te Tohi-Tapu pea mo te metitasioʼi ʼo te meʼa ʼaē neʼe koutou lau, ʼe ina uga anai koutou ke koutou tauhi kia Sehova
[Paki ʼo te pasina 10]
Neʼe fakahoko e Sesu te ʼu meʼa fuli ʼaē neʼe loto kiai tana Tāmai