Ko Te Fakahāo Ki He Mālama Foʼou Faitotonu
“ ʼE nātou fiafia moʼoni anai ʼi te mahu ʼo te tokalelei.”—Pesalemo 37:11.
1, 2. (a) Koteā anai te kehekehe ʼo totatou fakahāo ʼaē e Sehova ʼi te temi ʼaenī, pea mo te ʼu fakahāo ʼo te ʼu temi muʼa? (b) Ko he mālama feafeaʼi ʼaē ka foaki mai anai e Sehova ki tana hahaʼi?
KO SEHOVA ʼe ko te ʼAtua ʼaē ʼe ina fakahāo tatou. ʼI te temi muʼa, neʼe ina fakahāo tana hahaʼi ʼi te ʼu lakaga kehekehe. Ko te ʼu fakahāo ʼaia neʼe faka temi pe ia, koteʼuhi ʼi te ʼu lakaga kehekehe ʼaia, neʼe mole fakahoko ʼo talu ai e Sehova tana ʼu fakamāu ki te malamanei katoa ʼo Satana. Kae ʼi totatou temi, ʼe fakahoko anai e Sehova te fakahāo lahi ʼo tana ʼu kaugana fuli. ʼI te temi ʼaia, ʼe ina fakaʼauha anai te ʼu meʼa fuli ʼo te tuʼu ʼa Satana ʼi te malamanei katoa, pea ʼe ina foaki anai ʼo talu ai ki tana ʼu kaugana he mālama faitotonu.—2 Petelo 2:9; 3:10-13.
2 ʼE fakapapau fēnei mai e Sehova: “ ʼE kei toe te kiʼi temi siʼi pe, pea pulihi anai te tagata agakovi . . . Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” (Pesalemo 37:10, 11) ʼO aʼu ki ʼafea? “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.” (Pesalemo 37:29; Mateo 5:5) Kae, ʼi muʼa ʼo te hoko ʼo te ʼu meʼa ʼaia, ʼe ʼiloʼi anai e te mālama ʼaenī he temi maveuveu lahi neʼe mole heʼeki hoko ʼi muʼa atu.
Te “Mamahi Lahi”
3. Neʼe fakamatala feafeaʼi e Sesu te “mamahi lahi”?
3 ʼI te taʼu 1914 neʼe kamata ai “te ʼu ʼaho fakamuli.” (2 Timoteo 3:1-5, 13) ʼI te temi nei, kua taʼu 83 tatatou maʼuʼuli ʼi temi ʼaia, pea kua tou ōvi ki tona fakaʼosi, ʼi te temi ʼaē ka hoko ai anai te meʼa ʼaē neʼe fakakikite fēnei e Sesu: “ ʼE ʼi ai anai te mamahi lahi, ʼe mole hona tatau kua hoko talu mai te kamataʼaga ʼo te malamanei ʼo kaku mai ki te temi nei, kailoa, pea ʼe mole toe hoko anai he tahi mamahi feiā.” (Mateo 24:21) Ei, ko te mamahi lahi ʼaia ʼe kovi age anai ia ʼi te Lua Tau Faka Malamanei, ʼaē neʼe mamate ai te toko 50 miliona hahaʼi. ʼE fakaōvi vave mai te temi maveuveu ʼaia ʼaē ka hoko ʼi te malamanei katoa!
4. He koʼe ʼe fakahoko te fakamāu ʼa te ʼAtua kia “Papiloni Lahi”?
4 ʼE hoko fakapunamaʼuli anai te “mamahi lahi,” “ ʼi te hola pe ʼe tahi.” (Fakahā 18:10) ʼE kamata anai te mamahi lahi ʼaia ʼaki te fakamāu ʼaē ka fakahoko e te ʼAtua ki te lotu hala, ʼaē ʼe fakahigoaʼi e te Folafola ʼa te ʼAtua ko “Papiloni Lahi.” (Fakahā 17:1-6, 15) Ko te meʼa ʼaē neʼe ʼiloʼi tāfito ʼo ʼuhiga mo te Papiloni ʼĀfea neʼe ko tana lotu hala. Ko te Papiloni ʼo totatou temi ʼe hage ko te Papiloni ʼāfea ʼaia, pea ʼe ina fakatātā te kautahi faka malamanei ʼo te lotu hala. ʼE hage ko he fafine paomutu ʼuhi ko tana ʼu felogoi ʼaē mo te ʼu meʼa faka politike. Neʼe lagolago ki tanatou ʼu tau pea neʼe ina fakatapuʼi te ʼu kautau ʼo te ʼu fenua ʼaē neʼe fetauʼaki, ʼo fetāmateʼi ai te hahaʼi ʼaē ʼe nātou lotu tahi. (Mateo 26:51, 52; 1 Soane 4:20, 21) Neʼe ina tali leleiʼi te ʼu aga heʼemaʼa ʼo tana hahaʼi, pea neʼe ina fakatagaʼi te ʼu Kilisitiano moʼoni.—Fakahā 18:5, 24.
5. ʼE kamata feafeaʼi te “mamahi lahi”?
5 ʼE kamata te “mamahi lahi” ʼi te temi ʼaē ka ʼohofi ai e te ʼu faʼahi faka politike ia “Papiloni Lahi.” ʼE nātou “fehihiʼa anai ki te fafine paomutu pea ʼe nātou fakaliliu anai ia ia ʼo maumau pea mo telefua, pea ʼe nātou kai anai tona ʼu kakano pea mo nātou tutu katoa anai ia ia ʼi te afi.” (Fakahā 17:16) ʼI te hoko ʼo te meʼa ʼaia, ko nātou ʼaē neʼe lagolago kia ia ʼe nātou “fetāgihi anai pea ʼe nātou tuki fatafata anai ʼi tonatou lotomamahi ʼo ʼuhiga mo ia.” (Fakahā 18:9-19) Kae kua fualoa te talitali ʼa te ʼu kaugana ʼa Sehova ke hoko te faʼahi ʼaia, pea ʼe nātou ʼui anai: “Koutou vikiviki kia Sah! . . . He neʼe ina fakahoko te fakamāu ki te fafine paomutu lahi ʼaē neʼe ina fakahehemaʼi te kele ʼaki tana folonikasio, pea kua ina totogi te toto ʼo tana kau kaugana ki te nima [ʼo te fafine ʼaia.]”—Fakahā 19:1, 2.
Te ʼOhofiʼi ʼo Te Kau Kaugana ʼa Te ʼAtua
6, 7. He koʼe ʼe feala ke falala te kau kaugana ʼa Sehova mokā ʼohofiʼi anai ia nātou lolotoga te “mamahi lahi”?
6 ʼI tanatou ʼosi fakaʼauha te lotu hala, ʼe maliu anai te ʼu faʼahi faka politike ko te tauʼi ʼo te ʼu kaugana ʼa Sehova. ʼE ʼui fēnei e Satana, ʼaē ʼe fakahigoa ko Koke ʼo Makoke ʼi te lea faka polofeta: “ ʼE ʼau haʼu anai kia nātou ʼaē ʼe maʼuʼuli ʼi te tokalelei, ʼaē ʼe nonofo ʼi te fīmālie.” ʼI tana manatu ʼaē ʼe faigafua te tauʼi ʼo nātou, ʼe ina ʼohofiʼi nātou ʼaki “te ʼatu mālohi faka solia . . . , ohage ko he ʼu ʼao moʼo ʼaofi te fenua.” (Esekiele 38:2, 10-16) ʼE ʼiloʼi e te hahaʼi ʼa Sehova ʼe mole iku anai te ʼohofi ʼaia, koteʼuhi ʼe nātou falala kia Sehova.
7 ʼI te temi ʼaē neʼe manatu ai ia Falaone pea mo tana ʼu kautau ʼe mole kei ʼi ai he holaʼaga ʼa te ʼu kaugana ʼa te ʼAtua ʼi te Tai Kula, neʼe fakahāo faka milakulo e Sehova tana hahaʼi pea neʼe ina fakaʼauha te ʼu kautau ʼo Esipito. (Ekesote 14:26-28) Lolotoga te “mamahi lahi,” ʼi te temi ʼaē ka manatu ai te ʼu puleʼaga ʼe mole kei ʼi ai he holaʼaga ʼa te hahaʼi ʼa Sehova, ʼe ina toe hāofaki faka milakulo anai ia nātou: “ ʼI te ʼaho ʼaia, . . . ʼe hake anai toku ʼita ki toku ihu. Pea ʼaki toku mālohi, ʼi te kakaha ʼo toku hāūhāū, ʼe tonu anai ke ʼau palalau.” (Esekiele 38:18, 19) Ko te ikuʼaga ʼo te “mamahi lahi” kua fakaōvi mai!
8. Koteā te ʼu meʼa makehe ʼaē ka hoko ʼi muʼa ʼo te fakaʼauha e Sehova te kau agakovi, pea koteā anai tona ʼu fua?
8 ʼI he tahi lakaga, ʼi te kua kamata ʼo te “mamahi lahi,” kae ʼi muʼa ʼo te fakahoko e Sehova tana fakamāu ki te toe ʼo te mālama ʼaenī, ʼe hoko anai he ʼu meʼa makehe. Koutou fakatokagaʼi te ʼu meʼa ʼaē ka hoko ʼaki te ʼu meʼa ʼaia. “ ʼE hā mai anai ʼi te lagi te fakaʼiloga ʼo te Foha ʼo te tagata, pea ʼe tuki fatafata ai anai mo fetāgihi ia te ʼu telepi fuli ʼo te kele, pea ʼe nātou sisio anai ki te Foha ʼo te tagata [ia Kilisito] ʼe haʼu ʼi te ʼu ʼao ʼo te lagi mo te mālohi pea mo te kolōlia lahi.” (Mateo 24:29, 30) “ ʼE ʼi ai anai te ʼu fakaʼiloga ʼi te laʼā pea mo te māhina pea mo te ʼu fetuʼu, . . . kaʼe matapopō anai te hahaʼi ʼi tonatou matataku pea ʼuhi ko te talitali ʼaē ki te ʼu meʼa ka hoko mai ki te kele katoa.”—Luka 21:25, 26.
“Kua Ōvi Mai Tokotou Fakahāo”
9. He koʼe ʼe feala ke lagaʼi ake e te kau kaugana ʼa Sehova tanatou ʼu ʼulu mokā hoko anai te ʼu meʼa makehe ʼaia?
9 ʼI te temi tāfito ʼaia, ʼe hoko ai anai te lea faka polofeta ʼo Luka 21:28. Neʼe ʼui fēnei e Sesu: “Ka kamata hoko mai anai te ʼu meʼa ʼaia, ke koutou tutuʼu tonu ake pea lagaʼi ake tokotou ʼulu, heʼe kua ōvi mai tokotou fakahāo.” Ko te ʼu fili ʼa te ʼAtua ʼe nātou tetetete anai ʼi tanatou matataku, koteʼuhi ʼe nātou ʼiloʼi anai ʼe ko Sehova ʼaē ʼe ina fakahoko te ʼu meʼa makehe ʼaia. Kae ko te ʼu kaugana ʼa Sehova ʼe nātou fiafia anai koteʼuhi ʼe nātou ʼiloʼi kua ōvi mai tonatou fakahāo.
10. ʼE fakamatala feafeaʼi e te Folafola ʼa te ʼAtua te ikuʼaga ʼo te “mamahi lahi”?
10 ʼE fakahoko anai e Sehova te meʼa fakaʼosi ʼaē moʼo fakagata te tuʼu ʼa Satana, heʼe ina ʼui fēnei: “ ʼE ʼau fakamāuʼi anai [ia Koke] ʼaki te mahaki pea mo te toto; pea ʼe ʼau fakatō anai kia ia pea mo te hahaʼi tokolahi ʼaē ʼe fakatahi mo ia, he lovai pea mo he ʼuamaka, mo te afi pea mo te sulifa. . . . pea ʼe mahino papau ia, ʼe nātou ʼiloʼi anai ko ʼau ia Sehova.” (Esekiele 38:22, 23) ʼE fakaʼauha katoa anai te ʼu meʼa ʼaē ka toe ʼi te tuʼu ʼa Satana. ʼE molehi anai te sosiete fakatagata katoa ʼaē ʼe mole nātou fia fai ki te ʼAtua. Ko te ikuʼaga ʼaia ʼo te “mamahi lahi” ʼe ko Halamaketone.—Selemia 25:31-33; 2 Tesalonika 1:6-8; Fakahā 16:14, 16; 19:11-21.
11. He koʼe ʼe fakahāo anai te ʼu kaugana ʼa Sehova ʼi te “mamahi lahi”?
11 ʼI te “mamahi lahi,” ʼe fakahāo anai te toko lauʼi miliona kau atolasio ʼa Sehova ʼo te kele katoa. ʼE nātou faʼufaʼu te “toe hahaʼi tokolahi” ʼaē ʼe ʼōmai “mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.” He koʼe koa ʼe fakahāo nātou ʼi te ʼaho fakamataku ʼaia? Koteʼuhi ʼe nātou foaki kia Sehova “te tauhi fakataputapu ʼi te ʼaho mo te po.” Koia ʼe nātou hāo anai ʼi te fakaʼosi ʼo te mālama ʼaenī, pea mo nātou hū anai ki te mālama foʼou pea mo faitotonu. (Fakahā 7:9-15) Koia, ʼe nātou faka mafola te fakahoko ʼo te fakapapau ʼaenī ʼa Sehova: “Falala kia Sehova pea mo taupau tona ala, pea ʼe ina hikihiki anai koe ke ke maʼu te kele. Ka toʼo kehe anai te hahaʼi agakovi, ʼe ke sio anai ki ai.”—Pesalemo 37:34.
Te Mālama Foʼou
12. Koteā ʼaē ʼe feala ke ʼamanaki kiai ia nātou ʼaē ka hāo anai ʼi Halamaketone?
12 ʼE ko he temi fakafiafia anai—te pulihi ʼo te agakovi pea mo te kamata ʼo te temi faka kolōlia lahi ʼi te hisitolia katoa ʼo te tagata! (Fakahā 20:1-4) ʼE loto fakafetaʼi lahi anai kia Sehova ia nātou ʼaē ka hāo ʼi Halamaketone, ʼi tanatou hū ʼaē ki he mālama matalelei pea mo maʼa neʼe fakatuʼu e te ʼAtua, he mālama foʼou, ʼi he kele ʼe fakaliliu anai ko he palatiso! (Luka 23:43) Pea ʼe mole nātou toe mamate anai! (Soane 11:26) ʼI tona fakahagatonu, ʼo kamata mai te temi ʼaia, ʼe nātou maʼu anai te ʼamanaki fakatalakitupua ʼaē ke nātou maʼuʼuli ʼo heʼegata ohage ko Sehova.
13. Ohage ko te meʼa ʼaē neʼe ina fai ʼi tana kei maʼuli ʼi te kele, ʼe toe fakahoko feafeaʼi anai e Sesu tana gāue ʼaē ko te fakamālōlō ʼo te ʼu mahaki?
13 Ko Sesu, ʼaē neʼe fakanofo e Sehova ke Hau ʼi selo, ʼaē ka ina takitaki anai te foaki ʼo te ʼu tapuakina faka milakulo kia nātou ʼaē neʼe fakahāo. ʼI te temi ʼaē neʼe kei maʼuli ai ʼi te kele, neʼe ina fakaāva te ʼu mata ʼo te ʼu kivi, mo te ʼu taliga ʼo te kau tuli pea neʼe ina fakamālōlō “ia te ʼu faʼahiga mahaki pea mo te ʼu faʼahiga māʼimoa kehekehe.” (Mateo 9:35; 15:30, 31) ʼI te mālama foʼou, ʼe ina toe fai anai te gāue fakamālōlō lahi ʼaia, ʼo fai ʼi te kele katoa. ʼE fakaʼaogaʼi anai ia ia e te ʼAtua moʼo fakahoko te fakapapau ʼaenī: “ ʼE holoholoʼi anai [e te ʼAtua] te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” (Fakahā 21:4) ʼE mole toe ʼaoga anai kia tatou ni ʼu tōketā peʼe ko nātou ʼaē ʼe gāue ʼi te ʼu tānuma!—Isaia 25:8; 33:24.
14. Koteā te fakahāo ʼaē ka hoko anai ki te kau kaugana ʼa Sehova ʼaē kua mamate?
14 ʼE toe fakahāo anai mo te ʼu kaugana agatonu fuli ʼa te ʼAtua ʼaē neʼe mamate ʼi te temi muʼa. ʼI te mālama foʼou, ʼe toe fakatuʼuake anai nātou mai te faitoka. ʼE fakapapau fēnei mai e Sehova: “ ʼE ʼi ai anai he toe fakatuʼuake ʼo te kau faitotonu pea mo te kau heʼe faitotonu.” (Gāue 24:15) ʼE mahino ia, ko te kau “faitotonu” ʼaē ka ʼuluaki fakatuʼuake, pea ʼe nātou kau anai ki te folahi ʼo te Palatiso. ʼI meʼa fakaofoofo leva kia nātou ʼaē ka hāo ʼi Halamaketone, hanatou logo ki te ʼu fakamatala ʼaē ka fai anai e nātou ʼaē neʼe mamate agatonu talu mai fualoa, pea kua toe maʼuʼuli leva ʼi te moʼi temi ʼaia!—Soane 5:28, 29.
15. Koutou fakamatala te ʼu ʼaluʼaga ʼaē ka maʼu anai ʼi te mālama foʼou.
15 Ko nātou fuli ʼaē ka maʼuʼuli anai ʼi te temi ʼaia, ʼe hoko anai kia nātou te meʼa ʼaē neʼe ʼui e Sehova: “ ʼE ke avahi tou nima pea ʼe ke fakafimālie te loto ʼo te meʼa maʼuli fuli pe.” (Pesalemo 145:16) ʼE mole toe ʼi ai he pakupaku: ʼE fakafoʼou anai te kele ʼi te faʼahi faka ekolosike, pea ʼe mahu anai te meʼa kai. (Pesalemo 72:16) ʼE maʼu anai e te hahaʼi fuli hanatou ʼapi: “ ʼE mahino papau ia, ʼe nātou laga anai ni ʼu fale pea ʼe nātou nofoʼi anai,” pea ʼe nātou tahi heka anai “ ʼi tona lalo fuʼu vite pea ʼi tona lalo fuʼu fiku, pea ʼe mole toe ʼi ai anai he tahi ʼe ina fakamatakuʼi ia nātou.” (Isaia 65:21, 22; Mikea 4:4) ʼE mole toe matataku anai te hahaʼi: ʼE mole toe ʼi ai he tau, he agamālohi, pe ko he fai fakapō. (Pesalemo 46:8, 9; Tāʼaga Lea 2:22) “Ko te kele katoa kua malūlū ifo, kua ina toe maʼu te tokalelei. Kua kalaga fakafiafia te hahaʼi.”—Isaia 14:7.
16. He koʼe ʼe maʼu anai te faitotonu ʼi te mālama foʼou?
16 ʼI te mālama foʼou, ʼe mole toe maʼu ai anai te ʼu manatu kovi ʼa Satana. Kae, “ ʼe ko te faitotonu ʼaē ka ako moʼoni anai e te ʼu hahaʼi ʼo te kele maʼuli.” (Isaia 26:9; 54:13) ʼAki he ako fakalaumālie lelei ʼi te taʼu fuli, “ ʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.” (Isaia 11:9) ʼE maʼu anai e te hahaʼi he ʼu manatu mo he ʼu aga ʼe fakatuputupu ʼi te faʼahi fakalaumālie. (Filipe 4:8) Koutou fakakaukauʼi age muʼa, ko he hahaʼi ʼi te malamanei katoa ʼe mole nātou fai fakapō, mole nātou manatu pe kia nātou, pea mole maheka—ko he fale tautēhina ʼi te ʼu fenua katoa, ʼe maʼuliʼi ai e te hahaʼi fuli te ʼu fua ʼo te laumālie ʼa te ʼAtua. Ei, ʼi te temi nei ʼe maʼuliʼi te ʼu kalitate ʼaia e te toe hahaʼi tokolahi.—Kalate 5:22, 23.
He Koʼe ʼe Talitali Fualoa Ia Sehova?
17. He koʼe neʼe talitali fualoa ia Sehova ʼi muʼa ʼo tana fakagata te agakovi?
17 Kae, he koʼe koa ʼe talitali fualoa ia Sehova moʼo pulihi ʼo te agakovi pea mo ina fakahāo tana hahaʼi ke nātou hū ki te mālama foʼou? Tou vakaʼi te ʼu meʼa ʼaē ʼe tonu ke fakahoko. Ko te meʼa ʼaē ʼe maʼuhiga tāfito, ʼe ko te faka lākatonuʼi ʼo tana pule faʼitaliha, te maʼua ʼaē ke pule ki te hahaʼi. ʼI tana tuku ʼaē ke hoholo te temi, neʼe ina fakahā lelei ai ko te takitaki ʼaē ʼe fai e te tagata kae mole fakalogo ki tana pule, ʼe ko he toe tuʼutāmaki ia. (Selemia 10:23) Koia, ʼi te temi nei kua feala ke fetogi e Sehova te pule ʼa te tagata, ʼaki te Puleʼaga ʼaē ʼe ʼi selo ʼaē ʼe hau ai ia Kilisito.—Taniela 2:44; Mateo 6:9, 10.
18. Ko te temi fea ʼaē neʼe maʼu ai e te hākoga ʼo Apalahamo te fenua ʼo Kanaane?
18 Ko te ʼu meʼa ʼaē neʼe hoko ʼi te ʼu sēkulō fuli ʼaia, ʼe tatau mo te meʼa ʼaē neʼe hoko ʼi te temi ʼo Apalahamo. Neʼe ʼui e Sehova kia Apalahamo ʼe maʼu anai e tona hākoga te fenua ʼo Kanaane—kae neʼe tonu ke hili kiai taʼu e fāgeau “koteʼuhi neʼe mole heʼeki katoa te hala ʼo te kau Amolite.” (Senesi 12:1-5; 15:13-16) ʼI henī, ko te kupu “Amolite” (neʼe ko he telepi mālohi) ʼe mahino ia ʼe faka ʼuhiga ki te hahaʼi katoa ʼo Kanaane. Ko teitei taʼu e fāgeau ʼaē neʼe tonu ke fakalaka ʼi muʼa ʼo te faka fealagia ʼaē e Sehova ki tana hahaʼi ke nātou maʼu ia Kanaane. Pea ʼi te lolotoga ʼo te temi ʼaia, neʼe tuku e Sehova ke fakatuputupu e te ʼu fenua ʼaē ʼi Kanaane tanatou ʼu sosiete. Koteā te meʼa ʼaē neʼe hoko?
19, 20. Neʼe koteā te faʼahiga maʼuli ʼa te kau Kanaane?
19 Ko te tohi Bible Handbook ʼaē neʼe tohi e Henry Halley, ʼe ina ʼui ʼi Mekito, neʼe maʼu e te kau alekeolosia te ʼu toega ʼo te fale lotu ʼo Aschtoreth, te ʼatua fafine pea ko te ʼohoana ʼo Paale. ʼE ina tohi fēnei: “ ʼE ōvi mai ki te fale lotu ʼaia te tānuma, neʼe maʼu ai te ʼu maka neʼe ʼai ai te ʼu toega sino ʼo te ʼu tamaliki ʼaē neʼe faka sakilifisio ʼi te fale lotu ʼaia . . . Neʼe ko te gāue ʼa te ʼu polofeta ʼo Paale pea mo Aschtoreth ke nātou matehi te ʼu tamaliki liliki.” “Ko te tahi aga fakalialia ʼaē neʼe fai neʼe [ko te meʼa] ʼaē neʼe nātou higoaʼi ko ‘te ʼu sakilifisio ʼo te tafitoʼaga.’ Ka laga he fale, neʼe sakilifisioʼi he tamasiʼi, pea neʼe ʼai tona sino ki te kaupā.”
20 ʼE ʼui fēnei e Halley: “Ko te tauhi kia Paale, mo Aschtoreth, pea mo ʼihi ʼatu ʼu ʼatua Kanaane neʼe fai ai te ʼu fakafiafia fakavalevale; ko tonatou ʼu fale lotu neʼe fai ai te ʼu aga fakalialia. . . . Ko te tauhi ʼa te kau Kanaane neʼe fai ʼaki te ʼu aga heʼeʼaoga, . . . pea mo nātou matehi tanatou ʼu fānau ʼuluaki-tupu, ko he sakilifisio ki te ʼu ʼatua ʼaia. ʼE hage ia, ʼi hona ʼaluʼaga lahi, neʼe liliu te fenua ʼo Kanaane ohage ko Sotoma pea mo Komola ʼi te fenua katoa. . . . Neʼe tonu koa ke tuku ke hoko fualoa atu te taʼi sivilisasio aga heʼeʼaoga pea mo agamālohi ʼaia? . . . ʼE punamaʼuli te hahaʼi alekeolosia ʼaē ʼe nātou fai te ʼu kumi ʼi te ʼu toega ʼo te ʼu kolo ʼo Kanaane, ki te mole haga ʼa te ʼAtua ʼo foimo maumauʼi te ʼu kolo ʼaia ʼi muʼa atu.”—Vakaʼi ia 1 Hau 21:25, 26.
21. Koteā te ʼu meʼa ʼaē neʼe fai e te kau Kanaane ʼe tatau mo te ʼaluʼaga ʼaē ʼe hoko ʼi totatou temi?
21 Neʼe kua “katoa” te agakovi ʼa te kau Amolite. Koia ʼi te temi ʼaia neʼe kua feala ai leva kia Sehova ke ina fakaʼauha ia nātou. ʼE toe feiā ʼi te temi ʼaenī. Ko te mālama ʼaenī kua fonu ʼi te agamālohi, mo te aga heʼeʼaoga, pea mo te fehiʼa ki te ʼu lao ʼa te ʼAtua. Pea ʼi tatatou mamahi ʼi te ʼu sakilifisio fakalialia ʼo te ʼu tamaliki ʼaē neʼe fai ʼi te Kanaane ʼāfea, e feafeaʼi ki te lauʼi hogofulu miliona kau tūpulaga ʼaē ʼe sakilifisioʼi ʼi te ʼu tau ʼo te mālama ʼaenī, ʼo kovi age ʼi te ʼu meʼa ʼaē neʼe fai ʼi Kanaane? ʼE mahino ia, kua feala ʼi te temi nei ke fakahoko e Sehova te fakaʼauha ʼo te tuʼu ʼo te ʼu faʼahiga meʼa ʼaenī.
Moʼo Fakahoko He Tahi Age Meʼa
22. Koteā ʼaē ʼe hoko ʼaki te faʼa kātaki ʼa Sehova ʼi totatou temi?
22 ʼE faʼa kātaki ia Sehova ʼi te ʼu ʼaho fakamuli ʼaenī moʼo fakahoko te tahi meʼa. ʼE ina tuku he temi moʼo tānaki pea mo akoʼi te toe hahaʼi tokolahi, ʼaē kua lau ko te toko nima miliona tupu. ʼAki te takitaki ʼa Sehova, ʼe akoʼi nātou ʼi te kautahi ʼe tuputupu. ʼE akoʼi te hahaʼi tagata, mo te hahaʼi fafine, pea mo te kau tūpulaga ke nātou ako ki te hahaʼi te ʼu moʼoni ʼo te Tohi-Tapu. ʼAki tanatou ʼu fono pea mo tanatou ʼu tohi faka Tohi-Tapu, ʼe nātou ako te ʼu gāue ʼofa ʼa te ʼAtua. (Soane 13:34, 35; Kolose 3:14; Hepeleo 10:24, 25) Pea tahi ʼaē meʼa, ʼe nātou fakatuputupu tanatou popoto ʼi te laga ʼo he ʼu fale, ʼi te fai hila, mo te tā tohi, pea mo te tahi ʼu faʼahi moʼo lagolago ki te fai faka mafola ʼo te “logo lelei.” (Mateo 24:14) ʼE mahino ia ko te poto ʼaia ʼi te faiako pea mo te laga fale ʼe lahi anai tona fakaʼaogaʼi ʼi te mālama foʼou.
23. He koʼe ʼe ko he pilivilesio tatatou maʼuli ʼi te temi ʼaenī?
23 Ei, ʼi te temi nei ʼe teuteuʼi e Sehova tana ʼu kaugana, ke feala hanatou hāo ʼi te “mamahi lahi,” pea mo nātou hū ki te mālama foʼou ʼaē ʼe faitotonu. ʼI te mālama foʼou ʼaia, ʼe mole nātou toe tauʼi anai ia Satana pea mo tana mālama agakovi, ʼe mole toe ʼi ai anai te mahaki, mo te lotomamahi, pea mo te mate. ʼAki he loto fiafia, ʼe fakahoko anai e te hahaʼi ʼa te ʼAtua te gāue fakafiafia ʼaē ko te fakatuʼu ʼo te palatiso, pea ʼi te ʼaho fuli, ʼe ko he “fiafia lahi” anai. ʼE ko he toe pilivilesio tatatou maʼuʼuli ʼi te temi maʼuhiga ʼaenī, tatatou ʼiloʼi ia Sehova pea mo tauhi kia te ia, pea mo tatatou ʼiloʼi kua ōvi mai te temi ʼaē ka tou ‘lagaʼi ake ai totatou ʼulu, heʼe kua ōvi mai totatou fakahāo.’—Luka 21:28; Pesalemo 146:5.
Te ʼu Fehuʼi Fakamanatu
◻ Koteā te “mamahi lahi,” pea ʼe kamata feafeaʼi?
◻ He koʼe ʼe mole iku anai ia te ʼohofi ʼaē ʼa Koke te ʼu kaugana ʼa Sehova?
◻ ʼE fakaʼosi feafeaʼi te “mamahi lahi”?
◻ Koteā te ʼu fua lelei ʼaē ka tou maʼu anai ʼi te mālama foʼou?
◻ He koʼe neʼe talitali fualoa ia Sehova ʼi muʼa ʼo tana fakaʼauha te tuʼu ʼaenī?
[Paki ʼo te pasina 16]
ʼE fetogi anai te kele katoa ʼo liliu ko he palatiso