Kua Ovi Mai Totatou Haofaki ʼAē e Te Puleʼaga ʼo Te ʼAtua!
“Ke hoko mai tou puleʼaga. Ke fai tou finegalo ʼi te kele, ohagē ko selō.”—MAT. 6:10.
1. Neʼe koteā ia te kupu tāfito ʼo te akonaki ʼa Sesu?
ʼI TE temi ʼaē neʼe fai ai e Sesu tana Akonaki ʼi te Moʼuga, neʼe talanoa ia ki te faʼahiga faikole ke tou faʼifaʼitaki kiai, pea ʼe talanoa fakanounou ai ki te kupu tāfito ʼo tana akonaki. Neʼe ina akoʼi tana ʼu tisipulo ke natou faikole fēnei ki te ʼAtua: “Ke hoko mai tou puleʼaga. Ke fai tou finegalo ʼi te kele, ohagē ko selō.” (Mat. 6:9-13) “Neʼe ʼalu [ia Sesu] ki te ʼu kolo lalahi pea mo te ʼu kolo liliki, ʼo fai fakamafola pea mo kalagaʼi te logo lelei ʼo te puleʼaga ʼo te ʼAtua.” (Luka 8:1) Neʼe fakalotomālohiʼi fēnei e Kilisito tana ʼu tisipulo: “Ke kotou haga kumi muʼa te puleʼaga pea mo tona faitotonu.” (Mat. 6:33) Kā kotou ako te ʼalatike ʼaenī, kotou fakakaukauʼi ia te ʼu ʼaluʼaga ʼi takotou minisitelio ʼaē ʼe feala ai ke kotou fakaʼaogaʼi te tokoni ʼaenī. Ohagē lā, kotou fakakaukauʼi age muʼa te ʼu tali ʼaē kā kotou fai anai ki te ʼu fehuʼi ʼaenī: He koʼē ʼe maʼuhiga ia te logo ʼo te Puleʼaga? Ko te faʼahi fea ʼaē ʼe ʼaoga ai ke haofaki te mālamanei? Pea ʼe hoko feafeaʼi anai ia te haofaki ʼa te Puleʼaga ʼo te ʼAtua?
2. He koʼē ʼe maʼuhiga ia te logo ʼo te Puleʼaga?
2 Neʼe fakakikite fēnei e Sesu: “Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mat. 24:14) Ko te logo lelei ʼo ʼuhiga mo te Puleʼaga ʼo te ʼAtua ʼe ko he gāue ʼe maʼuhiga ʼaupitō. Heʼe ko te logo pē ʼaia e tahi ʼe maʼuhiga ʼi te mālamanei! ʼI te ʼu kōkelekāsio e 100 000 tupu ʼa te kau Fakamoʼoni ʼa Sehova, ʼe teitei ko te toko fitu miliona kau kaugana ʼa te ʼAtua ʼe natou kau ki te gāue fai fakamafola lahi, ʼo natou tala ki te hahaʼi ko te Puleʼaga kua fakatuʼu. Ko tona kua fakatuʼu ʼe ko he logo lelei, heʼe tou ʼiloʼi ai ko te ʼAtua kua ina fakatuʼu he Puleʼaga ʼi te lagi moʼo takitaki ia te ʼu gāue ʼaē ʼe fai ʼi te kele. ʼE lolotoga fai nei te finegalo ʼo Sehova ʼi te kele ohagē ko tona fai ʼi selō ʼo mulimuli pē ki te takitaki ʼa te Puleʼaga.
3, 4. Kā fai anai te finegalo ʼo te ʼAtua ʼi te kele, koteā anai tona ʼu fua?
3 Koteā ʼaē kā hoko ki te mālamanei mokā fai anai ia te finegalo ʼo te ʼAtua ki te kele? “ ʼE . . . holoholoʼi anai [e Sehova] te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi.” (Fakh. 21:4) ʼE mole toe māhahaki anai te hahaʼi peʼe mo mamate ʼuhi ko te agahala ʼaē neʼe tuku holo mai kiā tātou pea mo te heʼe haohaoa. Ko te hahaʼi ʼaē kua mamate kae ʼe manatuʼi e te ʼAtua, ʼe natou toe māʼuʼuli age anai ʼo heʼegata, heʼe fakapapau fēnei mai ʼi te Tohi-Tapu: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gāue 24:15) ʼE mole toe ʼi anai te tau, mo te mahaki, peʼe ko te pakupaku, pea ʼe liliu anai te kele ko he palatiso. Māʼiapē mo te ʼu manu ʼo te temi nei ʼaē ʼe natou fekai, kae ʼe natou maʼuli tokalelei anai mo te tagata, pea ʼe feagaleleiʼaki te ʼu manu.—Pes. 46:9; 72:16; Isa. 11:6-9; 33:24; Luka 23:43.
4 ʼE tou maʼu anai ia te ʼu tapuakina taulekaleka ʼaia ʼi te takitaki ʼa te Puleʼaga, koia ʼe mole tou punamaʼuli ai ki te fakakikite neʼe fai ʼi te Tohi-Tapu ʼo ʼuhiga mo te maʼuli ʼi te temi ʼaia, ʼaki te ʼu palalau fakalotofīmālie ʼaenī: “Ko te kau agavaivai ʼe natou maʼu anai te kele, pea ʼe natou fiafia moʼoni anai ʼi te mahu ʼo te tokalelei.” Kae ʼe feafeaʼi anai kiā nātou ʼaē ʼe fakatupu maveuveu ʼi te kele? ʼE ʼui fēnei ʼi te Tohi-Tapu: “Kei toe he kiʼi temi siʼipē, pea pulihi anai te tagata agakovi.” Kae “ko nātou ʼaē ʼe falala kiā Sehova ʼe natou maʼu anai te kele.”—Pes. 37:9-11.
5. Koteā ʼaē kā hoko anai ki te tuʼu ʼo te ʼu faʼahiga meʼa ʼaenī?
5 Pea ke hoko te ʼu tapuakina fuli ʼaia, ʼe tonu anai ke fakaʼauha ia te tuʼu ʼo te ʼu faʼahiga meʼa ʼaenī mo tona ʼu puleʼaga ʼaē ʼe fetauʼaki ʼo fēia mo tona ʼu lotu, pea mo tona ʼu kautahi fakakoloa. Pea ko te gāue lā ʼaia ʼaē kā fai anai e te puleʼaga ʼi selō. ʼAki te laumālie māʼoniʼoni neʼe fakakikite fēnei e te polofetā ko Taniela: “ ʼI te ʼu ʼaho ʼo te ʼu hau [ʼo te temi nei] ko te ʼAtua ʼo te lagi ʼe ina fakatuʼu anai he puleʼaga [ʼi selō] ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli [ʼo te temi nei], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.” (Tan. 2:44) Ko te Puleʼaga ʼo te ʼAtua ʼaē ko he puleʼaga foʼou ʼi selō, ʼe pule anai ia ki te hahaʼi foʼou ʼaē kā māʼuʼuli ʼi te kele. ʼE ʼi ai anai “te ʼu lagi foʼou pea mo te kele foʼou ʼaē ʼe tonu ke nofo ai te faitotonu.”—2 Pet. 3:13.
Kua ʼAoga Lahi Age ʼi Te Temi Nei Ke Fai He Haofaki
6. Koteā te fakamatala ʼe fai ʼi te Tohi-Tapu ʼo ʼuhiga mo te ʼu agakovi ʼaē ʼe hoko ʼi te mālama agakovi ʼaenī?
6 ʼI te temi ʼaē neʼe talagataʼa ai ia Satana, pea mo Atama mo Eva ki te ʼAtua, ʼi tanatou fia faʼifaʼitaliha ki te fai ʼo te meʼa ʼaē ʼe lelei pea mo te meʼa ʼaē ʼe kovi, neʼe ko te kamataʼaga ʼaia ʼo te maʼuli ʼa te mālamanei ʼi te agahala. Iā taʼu e 1 600 ki muli age ʼo te talagataʼa pea ʼi muʼa ʼo te tō ʼo te Tulivio ki te kele kātoa, “ko te agakovi ʼa te tagata [neʼe] kua lahi ʼaupitō [age ia] ʼi te kele pea ko te ʼu fakakaukau fuli ʼo tona loto neʼe kovi tuʼumaʼu pē ia.” (Sen. 6:5) Hili kiai taʼu e 1 300, pea ʼi te sio ʼa Salomone ki te kua kovi age ʼo te maʼuli, neʼe ina ʼui fēnei: “Neʼe au vikiʼi te kau mate ʼaē kua mamate iā nātou ʼaē ʼe kei māʼuʼuli. Kae iā nātou ʼaia, ʼe lelei age ia ia ʼaē ʼe mole heʼeki maʼuli, ʼaē ʼe mole heʼeki sio ki te vaʼiganoa ʼo te gāue ʼaē ʼe fai ʼi te lalo laʼā.” (Tnk. 4:2, 3) Hili kiai taʼu e 3 000, kua tou aʼu mai leva ki totatou temi, ʼe kei hoholo aipē te agakovi ʼa te tagata.
7. He koʼē kua ʼaoga lahi age ʼi te temi nei ke fai he haofaki e te ʼAtua?
7 Ohagē pē ko te hoko moʼoni ʼo te agakovi ʼaia talu mai fualoa, kua toe ʼaoga lahi age ʼi te temi nei ke fai he haofaki e te Puleʼaga ʼo te ʼAtua. ʼI te ʼu taʼu ʼaenī e 100 kua hili, kua lahi age ʼosi te agakovi, pea ʼe kei hoholo pē tona ia kovi. Ohagē lā, ʼe ʼui fēnei e te sivi Worldwatch Institute: “Neʼe lahi ʼaupitō age te hahaʼi ʼaē neʼe mamate ʼi te ʼu tau [ʼo te 20 sēkulō], ʼi te hahaʼi ʼaē neʼe mamate ʼi te ʼu tau ʼaē neʼe hoko ʼi te ʼuluaki sēkulō ʼo totatou temi ʼo aʼu mai ki te taʼu 1899.” Talu mai te taʼu 1914, neʼe ko te toko 100 miliona tupu hahaʼi kua natou mamate ʼi te ʼu tau! ʼE fakafuafua ʼi te tohi neʼe ko te toko 60 miliona tupu hahaʼi neʼe natou mamate ʼi te Lua Tau Fakamālamanei. ʼAki te ʼu mahafu tau nukeleʼea ʼaē kua maʼu e ʼihi puleʼaga, kua feala aipē ki te tagata ke ina pulihi he tokolahi ʼo te hahaʼi ʼi te mālamanei. Kae logolā te kua lahi ʼaē ʼo te poto ʼo te tagata pea mo te kua lelei ʼo te ʼu faitoʼo fakatōketā, kae ʼi te taʼu fuli ʼe kei mamate pē ia te tamaliki e toko nima miliona heʼe natou pakupapaku.—Vakaʼi te kāpite 9 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu?
8. Koteā ʼaē neʼe kua hā lelei ʼi te ʼu taʼu e afe tupu ʼaē neʼe takitaki ai e te tagata ia te mālamanei?
8 Neʼe iku noa te ʼu faiga ʼa te tagata moʼo fakagata ia te agakovi. Neʼe mole feala ʼi he temi ki te ʼu kautahi fakapolitike, fakakoloa, pea mo te ʼu kautahi fakalotu ʼo te mālama ʼaenī ke natou foaki ki te tagata ia te tokalelei, te maʼuli fiafia, pea mo te maʼuli mālōlō. Neʼe mole natou lava fakatokatoka te ʼu fihifihia lalahi ʼaē ʼe tau nei mo te mālamanei, kae neʼe natou fakaʼāsili age te ʼu fihifihia ʼaia. ʼO hā lelei mai ʼo ʼuhiga mo te ʼu taʼu e afe tupu ʼaē neʼe takitaki ai e te tagata te mālamanei, ia te moʼoni ʼo te ʼu palalau ʼaenī: “Ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Sel. 10:23) ʼEī, ko te “tagata ʼe ina puleʼi te tagata ki tona malaʼia.” (Tnk. 8:9) Tahi ʼaē, “ko te ʼu meʼa fuli ʼaē neʼe fakatupu, ʼe natou haga lāuga fakatahi pea mo mamahi fakatahi.”—Loma 8:22.
9. Koteā te ʼu ʼaluʼaga ʼe ʼiloʼi e te kau Kilisitiano ʼo ʼuhiga mo te ʼu “ ʼaho fakamuli” ʼaenī?
9 ʼO ʼuhiga mo totatou temi, neʼe fakakikite fēnei ʼi te Tohi-Tapu: “ ʼI te ʼu ʼaho fakamuli ʼe ʼi ai anai te ʼu temi maʼuhiga ʼaupitō mo faigataʼa.” ʼI tana ʼosi fakahā ia te ʼu meʼa ʼaē kā hoko ʼi te ʼu ʼaho fakamuli ʼi te takitaki ʼa te tagata, ʼe ʼui fēnei e te lea fakapolofetā: “Ko te ʼu tagata agakovi pea mo te ʼu hahaʼi kākā ʼe natou tuputupu anai ki te kovi ʼaupitō.” (Lau ia 2 Timoteo 3:1-5, 13.) Ko he ʼu meʼa ia ʼe ʼiloʼi e te kau Kilisitiano heʼe “ko te mālamanei kātoa ʼe takoto ia ʼi te mālohi ʼo te agakovi,” ia Satana. (1 Soa. 5:19) Kae ko te logo ʼaē ʼe lelei heʼe ko te ʼAtua kua ina vave haofaki pē anai ia nātou ʼaē ʼe ʼofa age kiā te ia. ʼE haofaki anai ia nātou mai te mālama ʼaenī, ʼaē ʼe vave pē tana ʼalu ki te meʼa ʼaē ʼe ʼāsili kovi.
Ko Te Falalaʼaga Moʼoni Pē e Tahi ʼo Te Haofaki
10. He koʼē ʼe ko Sehova ia te falalaʼaga moʼoni pē e tahi ʼo te haofaki?
10 Kā kotou fakamafola ia te logo lelei, kotou fakahā ki te hahaʼi ʼe ko Sehova ia te falalaʼaga moʼoni pē e tahi ʼo te haofaki. Ko ia pē ʼe ina maʼu te mālohi pea mo loto ke ina haofaki tana ʼu kaugana mai he faʼahiga ʼaluʼaga kovi ʼe hoko kiā nātou. (Gāue 4:24, 31; Fakh. 4:11) ʼE tou tui papau, ko Sehova ʼe ina haofaki tuʼumaʼu pē anai tana hahaʼi pea mo ina fakahoko tana fakatuʼutuʼu, heʼe ina fakapapau fēnei mai: “ ʼIo ohagē ko te meʼa ʼaē kua au manatu kiai, ʼe hoko anai ia.” Ko tana folafola “ ʼe mole toe liliu mai anai kiā te [ia] kae mole hona ʼu fua.”—Lau ia Isaia 14:24, 25; 55:10, 11.
11, 12. Koteā te fakapapau ʼe fai mai e te ʼAtua ki tana ʼu kaugana?
11 Neʼe fakapapau e Sehova ʼe ina haofaki anai tana ʼu kaugana ʼi te temi ʼaē ʼe ina tauteaʼi ai anai te kau agakovi. ʼI te temi ʼaē neʼe ina fekauʼi ai te polofetā ko Selemia ke lototoʼa ʼo palalau ki te kau agahala, neʼe ʼui fēnei age e te ʼAtua kiā te ia: “ ʼAua naʼa ke mataku.” He koʼē neʼe tonu ke mole mataku? Heʼe ‘nofo anai ia te ʼAtua mo ia, moʼo haofaki ia ia.’ (Sel. 1:8) ʼO toe fēia pē mo te temi ʼaē neʼe ʼamanaki fakaʼauha ai e Sehova ia te kau agakovi ʼo Sotoma mo Komola, neʼe ina fekauʼi te ʼu ʼāselo e toko lua ke nā ʼolo ʼo tokoni kiā Lote mo tona fāmili ke natou mavae ki tuʼa ʼi te kolo. “Pea neʼe fakatō ifo leva e Sehova ki Sotoma mo Komola te ʼua sulifa pea mo te afi.”—Sen. 19:15, 24, 25.
12 Ko Sehova ʼe ina lava haofaki foki ia nātou ʼaē ʼe natou fai tona finegalo ʼi te kele kātoa. ʼI te temi ʼaē neʼe ina fakaʼauha ai te mālama agakovi ʼāfea ʼaki te Tulivio, neʼe ina “haofaki ia Noe, tagata fakamafola faitotonu, mo te toko fitu.” (2 Pet. 2:5) ʼE toe haofaki pē anai e Sehova te kau faitotonu ʼi te temi ʼaē kā ina fakaʼauha ai anai te mālama agakovi ʼaenī. Koia, ʼi tana Folafola ʼe ʼui fēnei mai: “Kotou kumi ia Sehova, ia koutou fuli, kau agavaivai ʼo te kele. . . . Kotou kumi te faitotonu, kotou kumi te agavaivai. Pea ʼe mahalo pē ʼe fufū anai koutou ʼi te ʼaho ʼo te hauhau ʼo Sehova.” (Sofo. 2:3) Kā fakaʼauha leva te mālama ʼaenī, ‘ko te hahaʼi agatonu ʼe natou nonofo anai ʼi te kele, kae ki te hahaʼi kākā ʼe taʼaki anai nātou mai ai.’—Taag. 2:21, 22.
13. ʼE haofaki feafeaʼi anai e Sehova ia tana ʼu kaugana ʼaē kua mamate?
13 Kae tokolahi te ʼu kaugana ʼa te ʼAtua kua natou mamate ʼi te mahaki, te fakataga, pea ʼi te tahi age pē ʼu tupuʼaga. (Mat. 24:9) Koia ko nātou fuli ʼaia, ʼe haofaki feafeaʼi anai nātou? Ohagē ko te manatu neʼe kua tou talanoa pē kiai ʼi te palakalafe 3, “ ʼe ʼi ai anai te fakatuʼuake ʼo te kau faitotonu.” (Gāue 24:15) ʼI meʼa fakafiafia hata ʼiloʼi ʼe mole ʼi ai anai he meʼa ʼe ina tāʼofi ia Sehova ke ina haofaki tana ʼu kaugana!
Ko He Puleʼaga ʼe Faitotonu
14. He koʼē ʼe tou falala ko te Puleʼaga ʼo te ʼAtua ʼe faitotonu?
14 ʼI takotou minisitelio, kotou fakamahino ki te hahaʼi ko te Puleʼaga ʼo Sesu ʼaē ʼi selō ʼe faitotonu. ʼE moʼoni te faʼahi, heʼe gāue te puleʼaga ʼaia ʼaki te ʼu kalitātē taulekaleka ʼo te ʼAtua, ohagē lā ko te faitotonu, mo te agatonu pea mo te ʼofa. (Teu. 32:4; 1 Soa. 4:8) Kua foaki age e te ʼAtua ia te Puleʼaga kiā Sesu Kilisito, ʼaē ʼe tuha mo ia ke ina takitaki te kele. Neʼe toe fakatuʼutuʼu e Sehova ke filifili mai te kele ia te ʼu Kilisitiano fakanofo e toko 144 000 ke natou ʼolo ʼo māʼuʼuli ʼi selō, ʼo kaugā hau mo Kilisito ki te takitaki ʼo te ʼu gāue ʼo ʼuhiga mo te kele.—Fakh. 14:1-5.
15. Koteā ʼaē ʼe kehekehe ai te takitaki ʼa te Puleʼaga ʼo te ʼAtua pea mo ʼaē ʼa te tagata?
15 Ko te pule ʼa Sehova pea mo te toko 144 000 ʼe kehekehe ia mo te pule ʼa te ʼu tagata agahala! Ko te kau takitaki ʼo te tuʼu ʼaenī, ʼi te agamāhani ʼe natou aga fefeka pea mo taki tanatou ʼu hahaʼi fakalogo ki te ʼu tau, ʼo mamate ai te ʼu toko lauʼi miliona hahaʼi. Koia ʼe tokoniʼi ai tātou e te Tohi-Tapu ke ʼaua naʼa tou falala ki te tagata “ ʼaē ʼe mole ʼa ia te fakamaʼuli.” (Pes. 146:3) Kae ko te takitaki ʼa Kilisito, ʼe fai anai ia ʼaki te ʼofa! Neʼe ʼui fēnei e Sesu: “Kotou ʼomai kiā te au, ia koutou fuli ʼaē ʼe kinakina pea mo mafasia, pea ʼe au fakafīmālie anai koutou. Kotou toʼo kiā koutou taku ʼakau ʼamo pea ke kotou ako iā te au, heʼe au agamalū pea mo loto agavaivai, pea ʼe kotou maʼu anai he fīmālie ki ʼokotou nefesi. Heʼe ko taku ʼakau ʼamo ʼe malu pea ko taku kavega ʼe maʼamaʼa.”—Mat. 11:28-30.
Kua Vave ʼOsi Te ʼu ʼAho Fakamuli!
16. ʼE fakaʼosi feafeaʼi anai te ʼu ʼaho fakamuli ʼaenī?
16 Talu mai te taʼu 1914, kua maʼuli nei te mālamanei ʼi te ʼu ʼaho fakamuli peʼe ʼi “te fakaʼosi ʼo te tuʼu ʼo te ʼu faʼahiga meʼa ʼaenī.” (Mat. 24:3) Kua vave hoko mai te “mamahi lahi” ʼaē neʼe talanoa kiai Sesu. (Lau ia Mateo 24:21.) Ko te mamahi ʼaia ʼaē ʼe mole ʼi ai hona fakatatau, ʼe ina fakagata anai te tuʼu kātoa ʼa Satana. Kae ʼe kamata feafeaʼi anai ia te mamahi lahi? Pea ʼe hoko feafeaʼi anai tona fakaʼosi?
17. Koteā ʼaē ʼe fakahā ʼi te Tohi-Tapu ʼe hoko anai ʼi te kamataʼaga ʼo te mamahi lahi?
17 ʼE hoko fakapunamaʼuli anai ia te mamahi lahi. ʼIo, ko te “ ʼaho ʼo Sehova” ʼe hoko fakapunamaʼuli anai ʼi te temi ʼaē “kā natou ʼui anai: ‘Tokalelei pea mo fīmālie!’ ” (Lau ia 1 Tesalonika 5:2, 3.) Ko te mamahi ʼaē neʼe kua fakakikite mai, ʼe kamata anai ʼi te temi ʼaē kā manatu ai te ʼu puleʼaga kua natou lava fakatokatoka he tahi ʼu fihifihia ʼi te ʼu fihifihia ʼaē ʼe tau mo nātou. ʼE punamaʼuli anai te mālamanei ki te fakaʼauha fakafokifā ʼaē kā hoko kiā “Papiloni Lahi” ia te kautahi fakamālamanei ʼo te ʼu lotu hala. Ko te ʼu hau pea mo ʼihi ʼe natou punamaʼuli anai ki te tautea ʼaē kā hoko kiā Papiloni Lahi.—Fakh. 17:1-6, 18; 18:9, 10, 15, 16, 19.
18. Koteā ʼaē kā fai e Sehova ʼo ʼuhiga mo te ʼohofiʼi e Satana ia Tana hahaʼi?
18 ʼI tona temi maʼuhiga, ʼe ʼi ai anai “te ʼu fakaʼiloga ʼi te laʼā pea mo te māhina pea mo te ʼu fetuʼu,” pea “ ʼe hā mai anai ʼi te lagi te fakaʼiloga ʼo te Foha ʼo te tagata.” Kua feala leva ke tou ‘tuʼu tonu ake heʼe kua ovi mai totatou haofaki.’ (Luka 21:25-28; Mat. 24:29, 30) Ko Satana, peʼe ko Koke ʼe ina fakahaga anai tona ʼu mālohi moʼo fakafeagai ki te hahaʼi ʼa te ʼAtua. Kae ʼo ʼuhiga mo nātou ʼaē kā natou ʼohofi tana ʼu kaugana agatonu, ʼe ʼui fēnei e Sehova: “Ko ʼaē ʼe ala kiā koutou ʼe ala ia ki toku kanoʼi mata.” (Sakl. 2:8) Koia ʼaē, ʼe mole fua anai te ʼohofi ʼaē kā fai e Satana. Koteā tona tupuʼaga? Koteʼuhi ko te Tuʼi ʼAliki ko Sehova ʼe foimo tokaga mai anai ʼo haofaki tana ʼu kaugana.—Esk. 38:9, 18.
19. He koʼē ʼe tou falala ʼe fakaʼauha anai e te ʼu kautahi mālohi ʼa te ʼAtua ia te tuʼu kātoa ʼa Satana?
19 ʼI te temi ʼaē kā haga ai te ʼAtua ki te puleʼaga, ʼe natou ‘ ʼiloʼi ai anai ko ia ko Sehova.’ (Esk. 36:23) ʼE ina fekauʼi mai anai tana ʼu kautau mālohi—te lauʼi miliate ʼāselo kā takitaki e Kilisito Sesu—moʼo fakaʼauha ia te toe ʼo te tuʼu ʼa Satana ʼi te kele. (Fakh. 19:11-19) Tou manatuʼi te temi ʼaē neʼe ina fakaʼaogaʼi ai te ʼāselo ʼi te pō pē e tahi moʼo “matehi ia te toko teau valugofulu-mā-nima afe tagata” ʼo te ʼu fili ʼo te ʼAtua, ʼe tou toe falala aipē ʼe faigafua pē anai ki te foʼi kautau ʼāselo hanatou fakaʼauha ia te ʼu naunau fuli ʼo te tuʼu ʼa Satana ʼaē ʼi te kele mokā hoko mai anai te mamahi lahi ʼo iku ki te tau ʼo Halamaketone. (2 Hau 19:35; Fakh. 16:14, 16) ʼE lī anai ia Satana pea mo tana kau temonio ki te vanu iā taʼu e afe. Ki muli age, ʼe fakaʼauha anai ia nātou.—Fakh. 20:1-3.
20. Koteā ʼaē kā fai anai e Sehova ʼaki te Puleʼaga?
20 ʼI te temi leva ʼaia, kua maʼa anai te kele, pea kua māʼuʼuli leva ʼo heʼegata ia te hahaʼi faitotonu ʼi te kele. ʼE fakahā anai e Sehova ʼe ko ia te Haofakiʼaga Lahi. (Pes. 145:20) ʼAki te Puleʼaga, ʼe ina fakalakatonuʼi anai tona pule faʼitaliha, mo fakatapuhā tona huafa māʼoniʼoni, pea mo fakahoko ia tana fakatuʼutuʼu lahi ʼaē ki te kele. ʼOfa pē ke kotou fiafia lahi ʼi takotou minisitelio mokā kotou tala te logo lelei ʼaia pea mo tokoni kiā nātou ʼaē ʼe natou “lotolelei ki te maʼuli heʼegata” ke natou mahino kua ovi mai te haofaki ʼa te Puleʼaga ʼo te ʼAtua!—Gāue 13:48.
ʼE Kei Kotou Manatuʼi Koa?
• Neʼe fakahā feafeaʼi e Sesu ia te maʼuhiga ʼo te Puleʼaga?
• He koʼē kua ʼaoga lahi age ʼi te temi nei ke fai he haofaki?
• Koteā te ʼu meʼa ʼe tou ʼamanaki ʼe hoko mai anai lolotoga te mamahi lahi?
• ʼE fakahā feafeaʼi anai e Sehova ʼe ko ia te Haofakiʼaga Lahi?
[Paki ʼo te pasina 18]
Ohagē ko te haofaki e Sehova ia Noe pea mo tona fāmili, ʼe feala ke ina haofaki mo tātou