Ko Te Manu Faiva ʼo Te Mata Moʼuga

NEʼE tuʼu te kolo ʼāfea pea mo te toafa ʼaē ʼe fakahigoaʼi ko Ene-keti ʼi te loaloaga ʼo te matatai ʼo te potu hihifo ʼo te Tai Mate. ʼUhi ko tona ʼu kiʼi ala fāveliveli ʼi te maka pea mo tona ʼu mata mato, ʼe ko he nofoʼaga lelei ʼaia maʼa te tao ʼo te ʼu moʼuga ʼo te kele ʼo te fakapapau, ʼaē ʼe tatau mo te ʼu tao ʼaē ʼe koutou sio kiai ʼi te paki.

Ko te manu ʼaia ʼe kau ki te ʼu manu fakatalakitupua ʼaē neʼe fakatupu e te ʼAtua. Tou avahi te Tohi-Tapu pea mo tou vakaʼi te manu fakaofoofo ʼaia.

“Ko Te ʼu Moʼuga Māʼoluga ʼe ʼa Te ʼu Tao ʼo Te ʼu Moʼuga”

Neʼe feiā te hiva ʼaē neʼe fai e te tagata fai pesalemo. (Pesalemo 104⁠:18) ʼE maʼu e te ʼu tao ʼo te moʼuga te ʼu meʼa ʼaē ʼe ʼaoga kia nātou ke nātou nonofo ʼi te ʼu potu māʼoluga! ʼE nātou faiva ʼaupito ʼi tanatou ʼu feʼoloʼaki fakavilivili ʼi te mata moʼuga tokakovi, ʼo mole nātou tuʼania ki he meʼa. ʼE feala te faʼahi ʼaia ʼuhi ko te faʼahiga faʼu ʼo tonatou ʼu vaʼe. Ko te mamafa ʼo te tao, ʼe ina faka fealagia ke folahi tona ʼu kauʼi vaʼe, ʼo feala ai tana tuʼu mālohi pea mo tana feʼaluʼaki ʼi te kiʼi ala fāveliveli ʼo te moʼuga.

ʼE toe fakaofoofo mo te fakafuafua lelei ʼo te haʼele ʼo te tao ʼo te ʼu moʼuga. ʼE feala ke hopo mamaʼo pea mo tō ki te maka ʼe feʼauga tonu ke tuʼu ai tona ʼu vaʼe. Ko te Polofesea ʼe ina sivisivi te ʼu meʼa maʼuli, ko Douglas Chadwick, neʼe ina sioʼi te tahi faʼahiga tao ʼe ina fakafuafua lelei tana haʼele ke ʼaua naʼa efihia ʼi te kiʼi ala fāveliveli, ʼe mole feala hana maliu ʼi ai. Neʼe ina ʼui fēnei: “ ʼI tana sio ki te maka ʼaē ʼe tuʼu ʼi lalo ia meta e 120, neʼe ina fakatuʼu mālohi tona ʼu vaʼe ʼaē ʼi muʼa pea mo ina hiki māmālie tona ʼu vaʼe ʼaē ʼi muli ki ʼoluga ʼi te fuga maka. Neʼe ʼau tāʼofi taku mānava, neʼe haga mafuli te tao ʼo aʼu ki te fakatō ʼoʼona vaʼe muli, ʼo haga ki te ala ʼaē neʼe haʼu ai.” Ko te tupuʼaga la ʼaia ʼo te fakahigoaʼi ʼo te tao ʼo te ʼu moʼuga ko “te manu faiva ʼo te mata moʼuga!”

‘ ʼE Koutou ʼIloʼi Koa Te Temi Tonu ʼAē ʼe Fānau Ai Te ʼu Tao ʼo Te Moʼuga?’

ʼE nofo ū te ʼu tao ʼo te ʼu moʼuga. ʼE nātou leleiʼia tanatou nonofo mamaʼo ʼi te tagata. ʼIo, ʼe faigataʼa ki te hahaʼi hanatou fakaōvi ki te ʼu manu ʼaia moʼo vakavakaʼi tanatou aga hehegi. Koia neʼe tonu te fehuʼi ʼaē neʼe fai e Ia ʼaē ʼaʼana “te ʼu manu ʼi te ʼu moʼuga e afe” ki te tagata ko Sopo: “Kua ke ʼiloʼi te temi tonu ʼaē ʼe fānau ai te ʼu tao ʼo te moʼuga?”​—Pesalemo 50:10; Sopo 39:1.

Ko te poto ʼaē neʼe tuku e te ʼAtua ki te tao fafine, ʼe ina fakahā kia ia pe ko te temi fea ʼaē ʼe tonu ke faifānau ai. ʼE ina kumi he potu ʼe tokalelei pea ina fānauʼi ai he kiʼi ʼuhi e tahi peʼe lua, pea ʼi te agamāhani, ʼe hoko te faʼahi ʼaia ʼi te fakaʼosi ʼo Maio peʼe ko Sūnio. Hili kiai ni ʼu kiʼi ʼaho, pea kua poto leva te ʼu kiʼi ʼuhi ʼi te haʼele.

“Te Tia Fafine Agaʼofa Pea Mo Tao Fafine Matalelei ʼo Te ʼu Moʼuga”

Neʼe fakaloto mālohiʼi fēnei te kau tagata ʼohoana e te Hau poto ko Salomone: “Ke ke fiafia mo tou ʼohoana ʼo tou temi tūpulaga, te tia fafine agaʼofa pea mo te tao fafine matalelei ʼo te ʼu moʼuga.” (Tāʼaga Lea 5:​18, 19) Neʼe mole ko he fakamālaloʼi ia ʼo te hahaʼi fafine. Neʼe lagi fakapipiki e Salomone te ʼuhiga ʼo te hahaʼi fafine ki te matalelei, mo te hoihoifua pea mo te tahi ʼu kalitate fakaofoofo ʼo te ʼu manu ʼaia.

Ko te tao ʼo te ʼu moʼuga ʼe kau ki te ʼatu “nefesi maʼuli” ʼaē ʼe nātou fakamoʼoni ki te poto ʼo te Tupuʼaga. (Senesi 1:​24, 25) ʼE mole tou fiafia koa la ʼi te fakatupu e te ʼAtua te ʼatu manu fakaofoofo ʼaia?

[Haʼuʼaga ʼo te paki pasina 24]

Courtesy of Athens University