Te Matalelei ʼo Te ʼu Meʼa ʼAē Neʼe Fakatupu e Sehova

‘ ʼE Ke Māʼoluga Age Koe ʼi Te ʼu Moʼuga’

ʼE KO he meʼa matalelei ʼaupito hakita sioʼi te hopo ake ʼa te laʼā mai te tumutumu ʼo te Moʼuga ko Fuji. Ko te kula ʼo te laʼā, ʼe ina fakagigila te nive hina pea mo te ʼu maka. ʼI te kamata ʼo te ʼaho, ko te malumalu ʼo te moʼuga ʼe mafola vave ʼi ni ʼu kilometa ʼo aʼu ki te ʼu kiʼi moʼuga liliki pea mo te ʼu mafa.

Ohage ko te Moʼuga ko Fuji​—ʼaē ko tona faka ʼuhiga “ ʼe mole hona tatau”​—ʼe ko he meʼa fakaofoofo tuʼumaʼu mokā tou sisio ki te ʼu moʼuga māʼoluga. Ei, ko tanatou lalahi ʼe ina fakatupu ia tatou he loto fia mālalo. Ko te tokolahi, ʼi tanatou sio ki te māʼoluga ʼo te ʼu moʼuga, neʼe nātou manatu ʼe nonofo te ʼu ʼatua ʼi te tumutumu ʼaē ʼe māʼoluga ʼaupito, ʼaē ʼe ʼaofi e te ʼu ʼao.

Ko te ʼu tumutumu ʼo te ʼu moʼuga, ʼe nātou fakavikiviki ki te ʼAtua moʼoni pe e tahi, tonatou Tupuʼaga, ia Sehova. Ko ia tokotahi ʼaē “ ʼe ina fakatupu te ʼu moʼuga.” (Amosi 4⁠:13) Ko te vahe tahi ʼi te fā ʼo te kele ʼe ko he ʼu moʼuga, pea ʼi te temi ʼaē neʼe fakatupu ai e te ʼAtua totatou kele, neʼe ina fakatuʼu te ʼu mālohi ʼaē neʼe tupu ai te ʼu tumutumu fakaofoofo pea mo te ʼu moʼuga. (Pesalemo 95⁠:⁠4) Ohage la, ʼe ʼui ko te ʼu moʼuga ʼo te Himalaya pea mo te ʼu Andes neʼe fakatupu ʼaki te gugulu lahi ʼi te loto kele pea mo te gaūgaūe ʼo te ʼu kele.

ʼE mole mahino katoa te tagata pe neʼe tupu feafeaʼi te ʼu moʼuga pea koteā tona tupuʼaga. Koia, ʼe mole feala ai ke tou tali ki te ʼu fehuʼi ʼaenī neʼe lagaʼi e te tagata agatonu ko Sopo: “Neʼe ke ʼifea ʼi te temi ʼaē neʼe ʼau [ia Sehova] fakatuʼu ai te kele? . . . Neʼe fakatuʼu kiteā tona ʼu tuʼuʼaga?”​—Sopo 38⁠:​4-6.

Kae ʼe tou ʼiloʼi ʼe fakalogo totatou maʼuli ki te ʼu moʼuga. Neʼe fakahigoaʼi nātou ko te ʼu matapuna vai, koteʼuhi ʼe lahi te ʼu vaitafe ʼe tutupu mai te ʼu vai ʼo te moʼuga pea ko te vaelua ʼo te hahaʼi ʼi te kele ʼe nātou maʼuʼuli ki te ʼu vai ʼaē ʼe haʼu mai te ʼu moʼuga. (Pesalemo 104⁠:13) ʼO mulimuli ki te nusipepa New Scientist, “ ʼi te ʼu moʼuga, ko fuʼu ʼakau e ono ʼi te ʼu fuʼu ʼakau maʼuhiga e 20 ʼe feala ke kai.” ʼI te mālama foʼou ʼaē neʼe fakapapauʼi mai e te ʼAtua, ʼaē ka lelei age ai anai te kele, “ ʼe mahu anai te pulapula ʼi te kele; ʼe tapuke anai ʼi te tumutumu ʼo te ʼu moʼuga.”​—Pesalemo 72⁠:16; 2 Petelo 3⁠:⁠13.

Ki te tokolahi, ka nātou logo ki te palalau ʼo ʼuhiga mo te ʼu moʼuga, ʼe nātou manatuʼi ai te ʼu Alpes ʼi Eulopa. Ko te ʼu tumutumu ʼaia, ʼo kau ai mo te Moʼuga ko Civetta ʼaē ʼe fakahā ʼi henī, ʼe nātou fakamoʼoni lelei ai ki tonatou Tupuʼaga. (Pesalemo 98⁠:⁠8) ʼE nātou fakavikiviki kia Sehova, ia ia ʼaē “neʼe ina fakatuʼu mālohi ʼaki tona mālohi.”​—Pesalemo 65⁠:⁠6.a

ʼE fakatupu manavahe te matalelei ʼo te ʼu Alpes, ʼaki te nive ʼaē ʼe ina ʼaofi te ʼu tumutumu, mo te ʼu mata hake, mo tonatou ʼu mafa mo te ʼu vaitafe, pea mo te ʼu kele vaoa. Neʼe fakahā e te Hau ko Tavite ko Sehova ʼaē “neʼe ina fai ke fakahomo ake te luna ʼi te ʼu moʼuga.”​—Pesalemo 147⁠:⁠8.

Ko te ʼu kiʼi moʼuga liliki​—ohage ko te ʼu kiʼi moʼuga ʼi Guilin, ʼi Siaina​—ʼe lagi mole fakaofoofo age ʼi te ʼu Alpes, kae ʼe nātou matalelei ʼaupito. Ko te ʼu kiʼi moʼuga ʼaia ʼe tuʼu ʼi te loaloaga ʼo te Vaitafe ko Li pea ʼe ōfo ai te hahaʼi ʼuhi ko tonatou matalelei. Ka kita sioʼi te tafe ʼo te ʼu vai mai te ʼu kiʼi moʼuga ʼaia, ʼe lagi tou manatuʼi ai te ʼu palalau ʼaenī ʼa te tagata fai pesalemo: “ ʼE ina fakaʼalu te ʼu matavai ki te ʼu luo, pea ʼe nātou tafe ʼi te vaha ʼo te ʼu moʼuga.”​—Pesalemo 104⁠:⁠10.

ʼE tou ōfo ʼi te ʼu moʼuga, heʼe tou ʼiloʼi ʼe ko te koga matalelei ʼaia ʼo te ʼu meʼa ʼaē neʼe foaki fakaʼofa mai e te Tupuʼaga ke feala ai ki te hahaʼi ke maʼuʼuli lelei pea mo maʼuʼuli fiafia. Kae logola te fakaofoofo ʼo te ʼu moʼuga kae ʼe mole nātou tatau mo te māfimāfi ʼo Sehova. ʼE “māʼoluga age ʼi te ʼu moʼuga.”​—Pesalemo 76⁠:⁠4.

[Kiʼi nota]

[Talanoa ʼo te pasina 9]

Ko hahaʼi e hogofulu ʼi te teau ʼe nātou maʼuʼuli ʼi te ʼu moʼuga. Kae ʼe mole he meʼa ʼe ina tāʼofi te kau fai faka mafola ʼo te logo lelei ʼo te Puleʼaga ʼa te ʼAtua ke nātou kaku kia nātou. ʼE lahi te ʼu gāue ʼa te kau minisi Kilisitiano ʼaia ʼi te ʼu potu māʼoluga ʼaia. Pea “ ʼi te ʼu moʼuga, ʼe matalelei te ʼu vaʼe ʼo ia ʼaē ʼe ina ʼave te logo lelei, ia ia ʼaē ʼe ina tala te tokalelei, ia ia ʼaē ʼe ina ʼave te ʼu logo lelei ʼo he meʼa ʼe lelei age, ia ia ʼaē ʼe ina tala te hāofaki.”​—Isaia 52⁠:⁠7.

Neʼe hiva fēnei te tagata fai pesalemo: “Ko te ʼu moʼuga māʼoluga ʼe ko te nofoʼaga ʼo te tao ʼo te moʼuga.” (Pesalemo 104⁠:18) Ko te ʼu tao ʼo te moʼuga ohage ko te tao tala lua matalelei ʼaē ʼe higoa ko te bouquetin de Nubie, ʼe nātou kau ʼi te ʼu manu tokolahi ʼaē ʼe maʼuʼuli ʼi te ʼu moʼuga. ʼE nātou haʼele ʼi te ʼu mata hake ʼaē ʼe hage ʼe mole feala hakita haʼele ai. Ko te tao ʼaia ʼe ina maʼu te ʼu fealagia fuli ke maʼuli ʼi te ʼu koga meʼa ʼaē ʼe mole feala hatatou ʼolo kiai. ʼE feala te faʼahi ʼaia tupu tāfito ko te faʼu ʼo tona ʼu vaʼe. ʼAki te mamafa ʼo te tao, ʼe ava lua tona ʼu vaʼe, ʼo feala ai ki te manu ʼaia ke tuʼu mālohi mokā haʼele ʼi te mata hake. ʼE moʼoni, ko te tao ʼaia ʼe ko he fakatupu matalelei.

[Paki ʼo te pasina 9]

Te Moʼuga ko Fuji, ʼi Honshu, ʼi Saponia