Ko Te Kau Faka Mafola ʼo Te Puleʼaga ʼe Nātou Fakamatala

Ko Te ʼAtua ʼe Ina Fakatuputupu Te Gāue ʼi Alaska

ʼI TE lalo nive pea mo te ʼaisi, ʼe talitali te kiʼi pulapula ke feala hana lahilahi ake. ʼI te lolotoga ʼo te ʼu kiʼi māhina e tolu ʼo te fasiga taʼu māfana ʼi Alaska, ko te kiʼi pulapula ʼaia ʼo te chou ko tona lahi ʼe ko milimeta pe e tolu, pea ʼe feala ke lahilahi ake ʼo liliu ko te foʼi chou lahi ʼe kilo 40 tona mamafa! ʼIo, ko te fenua momoko ʼaia ʼaē neʼe ʼui ʼi muʼa atu ko he fenua kakā, ʼe feala ke fua ʼo lahi ʼaupito.

ʼE moʼoni tāfito te faʼahi ʼaia ʼi te gāueʼaga fakalaumālie ʼo Alaska. ʼI te fenua ʼaia ʼaē ʼe loaloaga ai te temi nive, ʼe haga to e te kau Fakamoʼoni ʼa Sehova te pulapula ʼo te Puleʼaga ʼa te ʼAtua. Ohage ko tona fai ʼi te tahi ʼu potu ʼo te malamanei, ʼe fakatuputupu e te ʼAtua tana pulapula ʼi te ʼu loto ʼaē ʼe feala ke maʼuli lelei ai.​—1 Kolonito 3:​6, 7.

● ʼI tana lolotoga ʼalu ʼi te kā ʼo te faleako, ko te taʼahine Fakamoʼoni ʼe higoa ko Vanessa neʼe ina sioʼi te tahi taʼahine ʼo te faleako neʼe heka tokotahi tuʼumaʼu, pea ʼe higoa ko Ann. ʼE hage neʼe lotomamahi ia Ann, koia neʼe pāui ai e Vanessa ia Ann ke haʼu ʼo heka mo ia. Neʼe lotomamahi ia Ann, he neʼe mate tana faʼe ʼi te mahaki mafu, pea mole fualoa, pea mate tana tāmai ʼi te kosea. Ko te tupuʼaga la ʼaia ʼo te nofo ʼa Ann ʼi Alaska mo tona ʼu kāiga.

ʼI te tahi Moeaki, neʼe fai faka mafola ia Vanessa pea neʼe ʼalu ki te ʼapi ʼo tona kaumeʼa foʼou, ʼo ina tuku age kia ia te kaupepa ko tona kupu tāfito ʼaenī ʼE Tokaga Moʼoni Koa Te ʼAtua Kia Tatou? ʼI te Mōnite ʼi te faleako, neʼe kumi e Ann te taʼahine Fakamoʼoni. Neʼe lahi te ʼu fehuʼi ʼa Ann ʼo ʼuhiga mo te Tohi-Tapu, pea neʼe tali kiai e Vanessa. Pea neʼe ina kole fēnei age ki ai, “ ʼE koutou fai ʼifea takotou ʼu fono?” ʼI te afiafi pe ʼaia, neʼe kau ia Ann ki tana ʼuluaki fono ʼi te Fale ʼo te Puleʼaga.

Mole tuai, pea ko te taʼahine ʼaia ʼaē neʼe taʼu 17 pea neʼe hala mo tāmai pea mo faʼe, neʼe ina maʼu hana ʼu ‘tāmai’ pea mo hana ʼu ‘faʼe’ ohage ko te meʼa ʼaē neʼe fakapapau e Sesu. (Mateo 19:29) ʼI meʼa fakafiafia leva takita sio kia Ann ʼaē neʼe kua fiafia pea mo malimali, ʼi tana foaki tona maʼuli kia Sehova pea mo papitema ʼi te Fakatahi Faka Tisitilike “Ko Te Kau ʼAve Logo ʼo Te Tokalelei Fakaʼatua”!

● ʼI te ʼu koga meʼa mamaʼo ʼo te potu fenua ʼo Alaska ʼaē ʼe ōvi ki te Arctique​—ʼaē ʼe tuʼu mamaʼo ʼaupito ai te ʼu kiʼi kolo ʼi te ʼu toafa lalahi​—neʼe fakaʼaogaʼi te kiʼi vakalele ʼa te Sosiete Watch Tower moʼo to ʼaki te pulapula ʼo te Puleʼaga ʼi te ʼu kiʼi kolo e 150. Kae ʼi te potu ʼaia, kapau ʼe kita loto ke kita tuputupu ʼi te faʼahi fakalaumālie ʼaki he ako Tohi-Tapu ʼe fai tuʼumaʼu, pea ʼe tonu ke kita faitohi tuʼumaʼu. Mai tona ʼuhiga ʼaē ʼe faigataʼa ki ʼihi te faitohi, koia ʼe tonu ai ke faiva te tēhina peʼe ko te tuagaʼane ʼaē ʼe ina fai te ako Tohi-Tapu moʼo taupau te fia logo ʼo ia ʼaē ʼe ako. ʼE lava fakahoko feafeaʼi te faʼahi ʼaia?

Neʼe haʼele lelei te ako Tohi-Tapu ʼaē neʼe fai e Kathy mo Edna, logope la neʼe nā nonofo vaha mamaʼo ia kilometa e 600! Neʼe mole gata ʼaki pe te hiki e Kathy te ʼu fehuʼi ʼaē ʼe ʼi te tohi ʼo te ako, kae neʼe ina toe tohi foki te tahi ʼu fehuʼi ʼi te moʼi pepa, ʼo ina tuku ai te lapalasi ke fai age e Edna hana ʼu tali. ʼI te ʼosi tohi e Edna tana ʼu tali, neʼe toe faitohi foki ia Kathy ʼo ina tohi ki te moʼi pepa ʼaia te ʼu fakamatala ʼaē neʼe ʼaoga moʼo fakamahino ʼo te ʼu puani faigataʼa. ʼE ʼui fēnei e Kathy: “Neʼe ʼau taupau te Feliafā afiafi ki tamā ‘ako,’ pea neʼe ʼau faiga ke ʼau mulimuli ki te fakatuʼutuʼu ʼaia ohage ko taku fai ʼo he ako māhani. Neʼe ʼau toe momoli foki kia Edna he sila ʼe tohi ai toku tuʼasila pea kua ʼai kiai te sitapa. Mai tona ʼuhiga ʼaē ʼe vāhaʼa lua te momoli ʼo te ʼu tohi, koia neʼe hage ai neʼe haʼele māmālie tamā ako.”

Koutou fakakaukauʼi age muʼa te fiafia ʼa Kathy pea mo Edna ʼi tanā fesioʼaki ʼi te fakatahi faka tisitilike ʼi Anchorage, ʼi tanā ʼosi ako te Tohi-Tapu ʼo nā fefaitohiʼaki lolotoga māhina e hogofulu! Neʼe toe fiafia foki mo te kau Fakamoʼoni ʼa Sehova ʼi te ʼōmai mai te ʼu kiʼi kolo mamaʼo ʼo Alaska, te kau ako ʼo te Tohi-Tapu pea mo ʼihi age hahaʼi ʼaē ʼe nātou fia ʼiloʼi te moʼoni.

Logope la ʼe hage ʼi ʼihi temi, ʼe tuai te homo ʼo te meʼa ʼaē neʼe to, kae ʼe homo fakavilivili te tahi ʼu “pulapula” mokā ʼe hā ki te mālama ʼo te moʼoni. ʼI te taʼu fuli, ko te kau atolasio foʼou ʼa Sehova e toko teau tupu ʼe nātou papitema ʼi Alaska! Koia ʼe tou ʼui ai, “Mālo Sehova,” ki tau fakatuputupu te gāue!