Tou Fakahoko Totatou Maʼua Faka Kilisitiano ʼi Te ’Ǟteaina
“ ʼI te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe nofo ai te ʼāteaina.”—2 Kolonito 3:17.
1. Neʼe foaki kia ai e te kau Fakamoʼoni ʼa Sehova tonatou maʼuli, pea he koʼe ʼe nātou fakaʼaogaʼi he ʼu fakatuʼutuʼu ʼo te lao?
ʼE FAKA tui te kau Fakamoʼoni ʼa Sehova ko tanatou lotu ʼe tuʼu anai ʼo talu ai. Koia, ʼe nātou tauhi ki te ʼAtua “ ʼaki te laumālie pea mo te moʼoni” ke nātou haga fai ʼo talu ai. (Soane 4:23, 24) ʼI tanatou maʼu te loto faʼitaliha, neʼe fakatotonu e te kau Kilisitiano ʼaia ke nātou foaki tonatou maʼuli kia Sehova ʼAtua, pea ʼe nātou lotomālohi ke nātou fakahoko katoa tonatou maʼua ʼaia. Moʼo fai ʼo te faʼahi ʼaia, ʼe nātou falala ki te Folafola ʼa te ʼAtua pea mo tona laumālie maʼoniʼoni. ʼI tanatou fakahoko ʼaki he loto katoa tonatou ʼu maʼua faka Kilisitiano pea mo tanatou fakaʼaogaʼi te ʼāteaina ʼaē neʼe foaki age e te ʼAtua kia nātou, ʼe fakaʼapaʼapa te kau Fakamoʼoni ʼa Sehova ki te tuʼulaga ʼo te ʼu “pule māʼoluga,” pea ʼe nātou fakaʼaogaʼi fakalelei te ʼu fakatuʼutuʼu pea mo te ʼu lao ʼo te sosiete. (Loma 13:1; Sake 1:25) Ohage la, ʼe fakaʼaogaʼi e te kau Fakamoʼoni ʼa Sehova te Sosiete Watch Tower, ko he fakatuʼutuʼu ʼaia ʼo te lao ʼe ina faka fealagia kia nātou ke nātou fakahoko tanatou gāue ʼaē ko te tokoni ki te hahaʼi, kae tāfito ʼi te faʼahi fakalaumālie. Kae ko te kau Fakamoʼoni ʼa Sehova ʼe nātou foaki tonatou maʼuli ki te ʼAtua, ka mole ki he fakatuʼutuʼu ʼo te lao, pea ʼe tologa anai tanatou pipiki ki te ʼAtua ʼo talu ai.
2. He koʼe ʼe leleiʼia e te kau Fakamoʼoni ʼa Sehova te Sosiete Watch Tower pea mo te tahi ʼu fakatuʼutuʼu ʼo te lao?
2 ʼI tonatou ʼuhiga hahaʼi kaugana ʼaē kua foaki ki te ʼAtua, ʼe maʼua ki te kau Fakamoʼoni ʼa Sehova ke nātou mulimuli ki te fakatotonu ʼa Sesu ke nātou “fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo [nātou] akoʼi ia nātou.” (Mateo 28:19, 20) ʼE hoko atu pe anai te gāue ʼaia ʼo aʼu ki te fakaʼosi ʼo te tuʼu ʼo te ʼu faʼahiga meʼa ʼaenī, he neʼe toe ʼui fēnei foki e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai anai te fakaʼosi.” (Mateo 24:3, 14) ʼI te taʼu fuli, ʼaki te ʼu masini tā tohi ʼo te Sosiete Watch Tower pea mo te tahi ʼu kūtuga hahaʼi, ʼe maʼu e te kau Fakamoʼoni ʼa Sehova te ʼu lauʼi miliona Tohi-Tapu, mo te ʼu tohi, mo he ʼu kaupepa, pea mo he ʼu nusipepa ke nātou fakaʼaogaʼi ʼi tanatou gāue faka mafola ʼi te kele katoa. Ko te ʼu fakatuʼutuʼu ʼaia ʼaē ʼe pipiki ki te lao, ʼe maʼuhiga ʼaupito ki te ʼu kaugana ʼa te ʼAtua ke feala hanatou fakahoko tonatou maʼua kia te ia.
3. Koteā te meʼa ʼaē ʼe faka ʼuhiga kiai te kupu “Sosiete” ʼaē neʼe fakaʼaogaʼi e te kau Fakamoʼoni ʼa Sehova ʼi te temi muʼa?
3 ʼE ʼui e ʼihi, ka talanoa te kau Fakamoʼoni ʼa Sehova ki te Sosiete Watch Tower—peʼe ki te “Sosiete”—ʼe hage ʼe nātou faka maʼuhigaʼi fau te fakatuʼutuʼu ʼaia. Kae ʼe mole ko te fakatuʼutuʼu koa la ʼaia ʼaē ʼe ina takitaki tonatou tauhi? ʼE fakamahino lelei mai te faʼahi ʼaia e te tohi Les Témoins de Jéhovah : Prédicateurs du Royaume de Dieu ʼo ina ʼui fēnei: “Ka neʼe palalau Te Tule Leʼo [Fakapilitānia ʼo te ʼaho 1 ʼo Sūnio 1938] ki ‘Te Sosiete,’ neʼe mole ina faka ʼuhiga pe ki te fakatuʼutuʼu ʼaē ʼe pipiki ki te lao, kae neʼe faka ʼuhiga tāfito ki te kūtuga ʼo te kau Kilisitiano fakanofo ʼaē neʼe nātou fakatupu pea mo fakaʼaogaʼi te fakatuʼutuʼu ʼaia.”a Koia neʼe fakaʼaogaʼi te kupu ʼaia moʼo talanoa ki “te tagata kaugana agatonu mo poto.” (Mateo 24:45) ʼE ko te faka ʼuhiga ʼaia ʼa te kau Fakamoʼoni ʼa Sehova mokā nātou fakaʼaogaʼi te kupu “Sosiete.” ʼE mahino papau ia ʼe mole tatau te fakatuʼutuʼu ʼaia ʼo te lao mo te “tagata kaugana agatonu mo poto.” Ko te ʼu tēhina takitaki ʼo te Sosiete Watch Tower, ʼe fili nātou e te ʼu tagata, kae ko te ʼu tēhina ʼo te ‘tagata kaugana agatonu’ ʼe fakanofo ia ʼaki te laumālie maʼoniʼoni ʼa Sehova.
4. (a) Koteā te ʼu palalau ʼaē ʼe fakaʼaogaʼi e te tokolahi ʼo te kau Fakamoʼoni ʼa Sehova ke mole ʼi ai he ʼu femahinohalaʼaki? (b) He koʼe ʼe tonu ke tou aga fakapotopoto ʼo ʼuhiga mo te ʼu kupu ʼaē ʼe tou fakaʼaogaʼi?
4 Ke ʼaua naʼa hoko he ʼu femahinohalaʼaki mo te hahaʼi, ʼe faiga e te kau Fakamoʼoni ʼa Sehova ke nātou vakavakaʼi lelei te ʼu palalau ʼaē ʼe nātou fai. ʼE mole nātou ʼui fēnei “ ʼe ʼui e te Sosiete,” kae ʼe nātou ʼui fēnei, “ ʼe ʼui e te Tohi-Tapu,” peʼe “ko te meʼa ʼaē kua ʼau mahino kiai ʼaki te Tohi-Tapu.” ʼI tanatou fai te ʼu palalau ʼaia, ʼe nātou fakahā ʼaki ai, neʼe fili tonu e te kau Fakamoʼoni takitokotahi ke nātou tali te ʼu akonaki ʼa te Tohi-Tapu, pea ʼe nātou toe fakahā ʼaki ki te hahaʼi, ʼe mole mulimuli fakakinau te kau Fakamoʼoni ʼa Sehova ki te ʼu fakatotonu ʼa he magaʼi lotu. ʼE mahino papau ia, ko te maʼu ʼo he ʼu faʼahiga palalau ʼe lelei ʼe mole tonu ke liliu ko he faʼahi ʼe fakatupu maveuveu. Ke tou manatuʼi, ʼe tonu ke tou fili he ʼu kupu ʼe lelei, ke ʼaua naʼa hoko he ʼu femahinohalaʼaki. ʼE tonu ke tou aga fakapotopoto ʼo ʼuhiga mo te faʼahi ʼaia. ʼE fakaloto mālohiʼi tatou e te Tohi-Tapu ke “ ʼaua naʼa [tou] fefihiʼaki ʼuhi ko he ʼu kupu.” (2 Timoteo 2:14, 15) ʼE toe fakahā foki e te Tohi-Tapu te pelesepeto ʼaenī: “Kapau ʼe mole fai e tokotou ʼalelo he ʼu palalau ʼe mahino lelei, ʼe feafeaʼi anai hakita ʼiloʼi te meʼa ʼaē ʼe lau mai?”—1 Kolonito 14:9.
ʼE Mole ʼAoga He Tuʼuga Lekula Mokā Maʼu Te Laumālie ʼo Te ʼAtua
5. ʼE tonu ke mahino feafeaʼi kia tatou te koga tohi ʼo 1 Kolonito 10:23?
5 Neʼe ʼui fēnei e te ʼapositolo ko Paulo, “ ʼE fakagafua ia meʼa fuli; kae ʼe mole ʼaoga ia meʼa fuli.” Pea neʼe ina toe ʼui fēnei: “ ʼE fakagafua ia meʼa fuli; kae ʼe mole laga ia meʼa fuli.” (1 Kolonito 10:23) ʼE mahino papau ia, neʼe mole ʼui e Paulo ʼe fakagafua ke tou fai te ʼu meʼa ʼaē ʼe tapuʼi e te Folafola ʼa te ʼAtua. ʼE mole faʼa lahi te ʼu fakatotonu ʼaē ʼe ina takitaki te maʼuli ʼo te kau Kilisitiano, mo kapau ʼe tou fakatatau ki te ʼu lao e 600 ʼaē neʼe foaki ki te kau Iselaelite ʼāfea. Koia, ʼe lahi te ʼu faʼahi ʼo te maʼuli ʼe fakalogo ki te leʼo ʼo loto ʼo te Kilisitiano takitokotahi. Ko he tahi kua ina foaki tona maʼuli kia Sehova, ʼe ina maʼu te ʼāteaina koteʼuhi ʼe takitaki ia ia e te laumālie ʼo te ʼAtua. ʼI tanatou tali te moʼoni, ʼe mulimuli te kau Kilisitiano ki tonatou leʼo ʼo loto ʼaē neʼe akoʼi e te Tohi-Tapu, pea ʼe nātou falala ki te takitaki ʼo nātou e te ʼAtua ʼaki tona laumālie maʼoniʼoni. Ko te faʼahi ʼaia ʼe tokoni kia nātou ke nātou ʼiloʼi pe koteā te meʼa ʼaē ʼe “laga” pea mo “ ʼaoga” kia nātou pea mo te hahaʼi. ʼE mahino kia nātou, ko te ʼu tonu ʼaē ʼe nātou fai ʼe malave anai ki tanatou ʼu felogoi mo te ʼAtua, ʼaē kua foaki tonatou maʼuli kia te ia.
6. ʼI te ʼu fono faka Kilisitiano, ʼe lava feafeaʼi hatatou fakahā kua tou maʼuliʼi te moʼoni?
6 ʼE fakahā e he Fakamoʼoni tana kua maʼuliʼi te moʼoni, ʼo ina fai hana ʼu tali ʼi te ʼu fono faka Kilisitiano. ʼI te kamata, lagi ʼe ina lau pe te ʼu palalau ʼaē ʼe tuʼu ʼi te tohi ʼaē ʼe lolotoga vakaʼi ʼi te fono. Kae ʼaki te temi, ʼe feala anai ke ina fakahā te ʼu akonaki ʼo te Tohi-Tapu ʼaki he ʼu palalau ʼe ina fai e ia totonu. ʼI tana fai te faʼahi ʼaia, ʼe ina fakahā ai kua tuputupu tana ʼu fealagia fakakaukau, ka mole ina toe fai pe te ʼu palalau ʼaē neʼe fai e ʼihi. ʼI tana fakahā tana ʼu manatu ʼaki tana ʼu palalau ʼa ia totonu, pea mo tana fakahā te moʼoni ʼaki tona loto katoa, ʼe fiafia ai anai pea mo fakamoʼoni anai, kua tui papau ki te ʼu meʼa ʼaē ʼe ina tala.—Tagata Tānaki 12:10; vakaʼi ia Loma 14:5b.
7. Koteā te meʼa ʼaē neʼe fakatotonu e te kau kaugana ʼa Sehova ʼi tonatou loto faʼitaliha?
7 Ko te ʼofa ki te ʼAtua pea mo te hahaʼi ʼe ina uga te kau Fakamoʼoni ʼa Sehova. (Mateo 22:36-40) ʼE moʼoni, ʼe nātou logo tahi ʼuhi ko te ʼofa fakatautehina ʼaē ʼe nātou maʼu ʼi tonatou famili faka Kilisitiano ʼi te malamanei katoa. (Kolose 3:14; 1 Petelo 5:9) Kae ʼi tonatou ʼuhiga hahaʼi ʼāteaina, neʼe nātou fakatotonu takitokotahi ke nātou kalagaʼi te logo lelei ʼo te Puleʼaga ʼo te ʼAtua, ke mole nātou kau ʼi te ʼu meʼa faka politike, ke mole nātou fakaʼaogaʼi te toto, ke nātou tekeʼi ʼihi fakafiafia, pea ke nātou maʼuliʼi te ʼu pelesepeto ʼo te Tohi-Tapu. Neʼe mole fakamālohiʼi nātou ke nātou fai te ʼu meʼa ʼaia. Ko te ʼu tonu ʼaia ʼe kau ki he faʼahiga maʼuli ʼe filifili e te hahaʼi, māʼiape la ʼi muʼa ʼo tanatou foaki tonatou maʼuli ki te ʼAtua.
ʼE ʼi Ai Koa Honatou Maʼua Ki Te Kolesi Pule?
8. Koteā te fehuʼi ʼaē ʼe tonu ke tou fakamahino?
8 ʼE fakahā lelei mai e te Tohi-Tapu, ʼe mole fakamālohiʼi te kau Kilisitiano moʼoni ke nātou tauhi ki te ʼAtua. ʼE ina ʼui fēnei mai: “Ko Sehova te Laumālie; pea ʼi te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe nofo ai te ʼāteaina.” (2 Kolonito 3:17) Kae ʼe lava feafeaʼi hatatou faka ʼalutahi te faʼahi ʼaia mo te takitaki ʼo te “tagata kaugana agatonu mo poto” pea mo tona Kolesi Pule?—Mateo 24:45-47.
9, 10. (a) ʼE fakaʼaogaʼi feafeaʼi te pelesepeto ʼo te faipule ki te kokelekasio faka Kilisitiano? (b) ʼI te mulimuli ʼa te kau Kilisitiano ʼo te ʼuluaki sēkulō ki te pelesepeto ʼo te faipule, koteā te meʼa ʼaē neʼe maʼua ke nātou fai?
9 Moʼo tali ki te fehuʼi ʼaia, ʼe tonu ke tou manatuʼi te pelesepeto faka Tohi-Tapu ʼo ʼuhiga mo te faipule. (1 Kolonito 11:3) Ia Efesi 5:21-24, ʼe ʼui ko Kilisito ʼe “pule ki te kokelekasio,” pea ʼe “fakalogo” te kokelekasio kia ia. ʼE mahino ki te kau Fakamoʼoni ʼa Sehova, ko te ʼu tēhina fakalaumālie ʼo Sesu ʼe nātou faʼufaʼu te kalasi ʼo te tagata kaugana agatonu mo poto. (Hepeleo 2:10-13) Neʼe fakanofo te kalasi ʼo te tagata agatonu ʼaia ke nātou foaki ki te hahaʼi ʼa te ʼAtua “te meʼa kai [fakalaumālie] ʼi tona temi totonu.” ʼI te temi fakaʼosi ʼaenī, neʼe fakanofo e Kilisito te tagata kaugana ʼaia “ki ʼana meʼa fuli.” Ko nātou fuli ʼaē ʼe nātou ʼui ko nātou ko te kau Kilisitiano, ʼe tonu ke nātou fakaʼapaʼapa ki tona tuʼulaga ʼaia.
10 Neʼe fakatuʼutuʼu te faipule moʼo taupau te logo tahi pea “ke fai ia meʼa fuli ʼi hona ʼaluʼaga lelei pea ʼi te fakatokatoka.” (1 Kolonito 14:40) Moʼo fakahoko te faʼahi ʼaia ʼi te ʼuluaki sēkulō, neʼe fili ʼihi Kilisitiano fakanofo mai te kalasi ʼo te tagata kaugana agatonu mo poto, ke nātou fakafofoga te kalasi katoa ʼaia. ʼE hā mai ʼi te ʼu meʼa ʼaē neʼe hoko ki muli age, neʼe tapuakinaʼi e Sehova te takitaki ʼa te kolesi pule ʼaia ʼo te ʼuluaki sēkulō. Neʼe tali fakafiafia e te kau Kilisitiano ʼo te ʼuluaki sēkulō ia te fakatuʼutuʼu ʼaia. ʼIo, neʼe nātou tali te fakatuʼutuʼu ʼaia pea mo fakafetaʼi ki te ʼu fua lelei ʼaē neʼe nātou maʼu mai ai.—Gāue 15:1-32.
11. ʼE tonu ke tou faka ʼuhiga feafeaʼi te Kolesi Pule ʼo te temi ʼaenī?
11 ʼE kei ʼaoga ia ʼaho nei te taʼi fakatuʼutuʼu ʼaia. ʼI te temi ʼaenī, ʼe faʼufaʼu te Kolesi Pule ʼa te kau Fakamoʼoni ʼa Sehova e te kau Kilisitiano fakanofo e toko hogofulu, ʼaē kua fualoa tanatou maʼuliʼi te moʼoni. ʼE nātou takitaki te kau Fakamoʼoni ʼa Sehova ʼi te faʼahi fakalaumālie, ohage ko tona fai e te kolesi pule ʼo te ʼuluaki sēkulō. (Gāue 16:4) Ohage ko te kau ʼuluaki Kilisitiano, ʼe kumi tokoni te kau Fakamoʼoni ki te ʼu tēhina fakapotopoto ʼaia ʼo te Kolesi Pule, ke nātou maʼu ai he takitaki mai te Tohi-Tapu ʼo ʼuhiga mo tanatou tauhi. Logope la ko te ʼu tēhina ʼo te Kolesi Pule ʼe ko he ʼu kaugana ʼa Sehova pea mo Kilisito, ohage ko te kau Kilisitiano fuli, ʼe fakatotonu fēnei mai e te Tohi-Tapu kia tatou: “Koutou fakalogo kia nātou ʼaē ʼe nātou takitaki koutou, pea mo koutou talagafua, heʼe nātou leʼoleʼo tuʼumaʼu ʼokotou ʼu nefesi, ohage ko he ʼu tagata ʼe nātou huʼi maʼua anai; koteʼuhi ke nātou fai fakafiafia te faʼahi ʼaia kae ke ʼaua naʼa nātou fai ʼaki he lāuga, heʼe fakatupu kovi anai kia koutou.”—Hepeleo 13:17.
12. Ko ai ʼaē ʼe tonu ke huʼi maʼua ki ai te kau Kilisitiano takitokotahi?
12 Mai tona ʼuhiga ʼaē ʼe ʼui e te Tohi-Tapu ʼe tonu ke takitaki tatou e te Kolesi Pule, ko tona faka ʼuhiga koa, ʼe tonu ki te kau Fakamoʼoni ʼa Sehova takitokotahi ke nātou huʼi maʼua ki te kolesi ʼaia? Kailoa, he neʼe ʼui fēnei e Paulo ki te kau Kilisitiano ʼaē neʼe nonofo ʼi Loma: “He koʼe koa ʼe ke fakamāuʼi tou tēhina? Pe koʼe koa ʼe ke toe manukiʼi tou tēhina? Heʼe tou tutuʼu fuli anai ia muʼa ʼo te fakamāuʼaga ʼa te ʼAtua . . . ʼE tou tahi huʼi maʼua anai ki te ʼAtua maʼa tatou takitokotahi.”—Loma 14:10-12.
13. He koʼe ʼe fai e te kau Fakamoʼoni ʼa Sehova he ʼu tānaki ʼo tanatou gāue fai faka mafola?
13 Kae ʼe mole maʼua koa la ki te kau Fakamoʼoni ʼa Sehova ke nātou fakahā te tānaki ʼo tanatou gāue fai faka mafola? ʼE moʼoni, kae ko te fakatuʼutuʼu ʼo te faʼahi ʼaia ʼe fakahā lelei ʼi te tahi tohi ʼa te kau Fakamoʼoni ʼa Sehova ʼaē ʼe ina ʼui fēnei: “Ko te kau ʼuluaki tisipulo ʼa Sesu Kilisito neʼe nātou fia ʼiloʼi pe neʼe feafeaʼi te tuputupu ʼo tanatou gāue fai faka mafola. (Maleko 6:30) Neʼe tuputupu te gāue, pea neʼe tānaki te kaugamālie ʼo te hahaʼi ʼaē neʼe maʼu ʼi te gāue, ʼo kau ai mo te ʼu fakamatala ʼo te ʼu meʼa ʼaē neʼe hoko kia nātou ʼaē neʼe nātou faka mafola te logo lelei. . . . (Gāue 2:5-11, 41, 47; 6:7; 1:15; 4:4) . . . Neʼe fakaloto mālohi ki te kau Kilisitiano agatonu ʼaia, tanatou logo ki he ʼu fakamatala ʼo ʼuhiga mo te gāue ʼaē neʼe fai! . . . ʼO toe feiā aipe ia ʼaho nei, ʼe faiga e te kautahi ʼa Sehova ke ina sivisivi lelei te gāue ʼaē ʼe fai ʼo mulimuli kia Mateo 24:14.”
14, 15. (a) Koteā te ʼaoga ʼo te koga tohi ʼo 2 Kolonito 1:24 ki te Kolesi Pule? (b) Ko te kau Kilisitiano, ʼe tonu ke nātou fakatafito kiteā te ʼu tonu ʼaē ʼe nātou fai takitokotahi, pea koteā te meʼa ʼaē ʼe nātou ʼiloʼi?
14 Ko te Kolesi Pule ʼe ko he fakatuʼutuʼu ʼofa ʼaia, pea ʼe tonu ke tou faʼifaʼitakiʼi te agatonu ʼo te ʼu tēhina ʼaia. (Filipe 3:17; Hepeleo 13:7) ʼI tanatou pipiki ʼaē kia Kilisito pea mo tanatou mulimuli ki tona faʼifaʼitaki, ʼe feala hanatou fai te ʼu palalau ʼaē neʼe fai e Paulo: “ ʼE mole mātou pule ki takotou tui, kae ʼe mātou kaugā gāue mo koutou ki takotou fakafiafia, heʼe ʼaki takotou tui ʼe koutou tutuʼu maʼu.” (2 Kolonito 1:24) ʼI tana sivisivi te ʼu meʼa ʼaē ʼe lolotoga hoko, ʼe fakahā e te Kolesi Pule te ʼaoga ʼaē ke tou mulimuli ki te ʼu tokoni faka Tohi-Tapu, mo ina fai he ʼu tokoni ke tou maʼuliʼi te ʼu lao pea mo te ʼu pelesepeto ʼa te Tohi-Tapu, mo ina fakatokagaʼi tatou ki te ʼu tuʼutāmaki ʼaē ʼe mole hā, pea mo ina fakaloto mālohiʼi tana ʼu “kaugā gāue.” ʼE ina fakahoko tona maʼua ʼaē ko te tauhi ki te kokelekasio faka Kilisitiano, mo tokoni ki te kau Kilisitiano ke nātou taupau tonatou fiafia, pea mo ina fakamālohiʼi tanatou tui ke nātou nonofo agatonu.—1 Kolonito 4:1, 2; Tito 1:7-9.
15 Kapau ʼe fai e he Fakamoʼoni he ʼu fakatuʼutuʼu ʼo fakatafito ki te ʼu tokoni faka Tohi-Tapu ʼaē ʼe fai e te Kolesi Pule, ʼe ina fai te faʼahi ʼaia he neʼe ina fili e ia totonu, koteʼuhi kua ina ʼiloʼi papau ʼaki tana ako takitokotahi ia te Tohi-Tapu, ʼe tāu mo feʼauga ke ina fai te ʼu fakatuʼutuʼu ʼaia. Ko te kau Fakamoʼoni ʼa Sehova takitokotahi, ʼe uga nātou e te Folafola ʼa te ʼAtua ke nātou mulimuli ki te ʼu tokoni fakapotopoto ʼaē ʼe fai age e te Kolesi Pule, ʼi tanatou ʼiloʼi ʼaē ko te ʼu meʼa ʼaē ʼe nātou fakatotonu ke nātou fai, ʼe malave anai ki tanatou ʼu felogoi takitokotahi mo te ʼAtua, ia ia ʼaē kua nātou foaki ki ai tonatou maʼuli.—1 Tesalonika 2:13.
Ko He Kau Ako Pea Mo He Kau Solia
16. Logope la ko te ʼu tonu ʼo ʼuhiga mo te aga ʼaē ʼe kita fai ʼe ko he meʼa ʼe kita fili takitokotahi, kae he koʼe ʼe fakamavae ʼihi?
16 Kae kapau ʼe kita fili e kita totonu te aga ʼaē ʼe kita fai, he koʼe koa ʼe fakamavae ʼihi kau Fakamoʼoni ʼa Sehova? ʼE mole he tahi ʼe ina fakatotonu ʼo mulimuli pe ki tana manatu, ʼe maʼua ke fakamavae he Kilisitiano koteʼuhi neʼe agahala. Kae ko te fakamavae ʼo kita ʼe ko he meʼa ʼe hoki fakamaʼua mai e te Tohi-Tapu mokā fai e he tahi ʼi te kokelekasio he ʼu agahala mamafa ohage ko te ʼu agahala ʼaē ʼe talanoa kiai ia 1 Kolonito kapite 5, kae mole fakahemala. Koia, logope la ʼe feala ke fakamavae he Kilisitiano he neʼe folonikasio, kae ʼe hoki hoko te faʼahi ʼaia mo kapau ʼe fakafisi ki te tokoni ʼaē neʼe fai age e te ʼu tagata ʼāfea agaʼofa. Tahi ʼaē meʼa, ʼe mole gata pe ki te kau Fakamoʼoni ʼa Sehova te mulimuli ki te fakatuʼutuʼu faka Kilisitiano ʼaia. ʼE ʼui fēnei e te tohi The Encyclopedia of Religion: “Ko te ʼu kautahi fuli ʼe nātou loto ke puipui nātou mai te ʼu hahaʼi ʼaē ʼe feala ke nātou fakatupu tuʼutāmaki ki te maʼuli ʼo te hahaʼi ʼo te kautahi. ʼI te ʼu lotu, ko te fealagia ʼaia ke fakamavae he tahi neʼe liliu ko he faʼahi maʼuhiga, koteʼuhi neʼe tui te hahaʼi, ko te fakatūʼa ʼo kita [ʼaē ko te fakamavae] ʼe fakatupu kovi ki tokita tuʼulaga ia muʼa ʼo te ʼAtua.”
17, 18. ʼE lava feafeaʼi hatatou fakahā te ʼaoga ʼo te fakamavae ʼo he tahi ʼaki he faʼifaʼitaki?
17 Ko te kau Fakamoʼoni ʼa Sehova ʼe ko he kau ako ʼo te Tohi-Tapu. (Sosue 1:8; Pesalemo 1:2; Gāue 17:11) Ko te polokalama ako ʼaē ʼe foaki mai e te Kolesi Pule, ʼe feala pe ke fakatātā ki te polokalama ako ʼo he faleako, ʼaē ʼe teuteuʼi e te komite ʼo te kau polofesea. Logope la ʼe mole ko te kau polofesea totonu ʼaē neʼe nātou fai te ʼu tohi ʼaē ka vakaʼi anai ʼi te faleako, kae ʼe ko nātou ʼaē ʼe nātou fakatuʼutuʼu te ako ʼaia, mo fili te faʼahiga ako ʼaē ka fai ki te tamaliki ako, pea mo fai te ʼu fakatuʼutuʼu ʼaē ʼe ʼaoga ki te fakahaʼele ʼo te ako. Kapau ʼe mole fia mulimuli he tahi ʼe ako ki te ʼu lekula ʼo te faleako, peʼe ina fakatupu he ʼu fihifihia ki te tahi kau tamaliki ako, peʼe ina maumauʼi te matagafua ʼo te faleako, pea ʼe feala ke fakamavae ia ia. ʼE fakagafua ai ki te hahaʼi takitaki ʼaia ke nātou fai te fakatuʼutuʼu ʼaia ki te lelei ʼo te tamaliki ako fuli.
18 Tahi ʼaē meʼa, ko te kau Fakamoʼoni ʼa Sehova ʼe mole ko he kau ako pe, kae ʼe ko he kau solia ʼa Sesu Kilisito, pea neʼe fakatotonu kia nātou ke nātou “tauʼi te tau matalelei ʼo te tui.” (1 Timoteo 6:12; 2 Timoteo 2:3) ʼE mahino papau ia, ko he tahi ʼe ina haga fai he ʼu aga ʼe mole tāu mo feʼauga ke fai e he solia faka Kilisitiano, ʼe feala ke hoko kia ia te fakatūʼa ʼa te ʼAtua. ʼI tonatou ʼuhiga hahaʼi ʼaē ʼe nātou maʼu te loto faʼitaliha, ʼe filifili e te kau Kilisitiano te meʼa ʼaē ʼe nātou loto kiai, kae ʼe tonu foki ke nātou tali te ʼu fua ʼo te meʼa ʼaē neʼe nātou fili. ʼE manatu fēnei ia Paulo: “ ʼE mole he tagata solia, ʼe kau ki te ʼu gāue fakatau koloā ʼo te maʼuli, ke feala hona leleiʼia e ia ʼaē neʼe ina fakahū ia ia ki te foʼi solia. Tahi ʼaē meʼa, kapau ʼe ʼi ai he tahi ʼe tautakao ʼi te ʼu malaʼe faigaoʼi, ʼe hoki fakapale ia ia, mo kapau neʼe tautakao ʼo mulimuli ki te ʼu lekula.” (2 Timoteo 2:4, 5) Ko te kau Kilisitiano ʼaē kua popoto ʼi te faʼahi fakalaumālie, ʼo feiā mo nātou ʼo te Kolesi Pule, ʼe nātou lotolelei ke fakaʼaogaʼi nātou e tonatou Takitaki, ko Sesu Kilisito, ʼo nātou mulimuli ki te ʼu “lekula,” ke feala hanatou maʼu te fakapale ʼaē ko te maʼuli heʼegata.—Soane 17:3; Fakahā 2:10.
19. ʼI tatatou ʼosi vakaʼi te ʼuhiga moʼoni ʼo te foaki e te kau Kilisitiano tonatou maʼuli ki te ʼAtua, koteā te meʼa ʼaē kua tou ʼiloʼi papau?
19 ʼI tatatou vakaʼi te ʼu faʼahi fuli ʼaia, ʼe mole hā mai koa la, ʼe kaugana te kau Fakamoʼoni ʼa Sehova ki te ʼAtua ka mole ki te tagata? ʼI tonatou ʼuhiga kau Kilisitiano ʼaē ʼe nātou maʼu te ʼāteaina ʼaē neʼe faka ʼāteaina kiai nātou e Kilisito, ʼe nātou tuku ke takitaki tonatou maʼuli e te laumālie ʼo te ʼAtua pea mo tana Folafola, ʼi tanatou tauhi ʼi te logo tahi mo tonatou ʼu tēhina ʼi te kokelekasio ʼa te ʼAtua. (Pesalemo 133:1) ʼI te tanatou ʼiloʼi suppʼo te faʼahi ʼaia, kua nātou ʼiloʼi papau pe ko ai te matapuna ʼo tonatou mālohi. Ohage ko te tagata fai pesalemo, ʼe nātou hivaʼi fēnei: “Ko Sehova ʼe ko toku mālohi pea mo toku meʼa tali tau. Neʼe falala toku loto kia te ia, pea neʼe tokoni mai kia te ʼau, ʼo fiafia ai toku loto, pea ʼe ʼau fakavikiviki anai kia te ia ʼaki taku hiva.”—Pesalemo 28:7.
[Nota ʼi te lalo pasina]
a Neʼe tā ʼi te taʼu 1993 e te Watchtower Bible and Tract Society of New York, Inc.
ʼE Feafeaʼi Anai Hakotou Tali?
◻ ʼE tokoni feafeaʼi te Sosiete Watch Tower pea mo te tahi ʼu fakatuʼutuʼu ʼo te lao ki te kau Fakamoʼoni ʼa Sehova?
◻ Koteā te ʼaoga ʼo te Kolesi Pule ʼa te kau Fakamoʼoni ʼa Sehova ki te kau Kilisitiano?
◻ He koʼe ʼe fai e te kau Fakamoʼoni ʼa Sehova he ʼu tānaki ʼo tanatou gāue fai faka mafola?
◻ Koteā te ʼu faʼahiga ʼaluʼaga ʼaē ʼe tāu mo feʼauga ke fakamavae ai he Kilisitiano?
[Paki ʼo te pasina 19]
Neʼe taupau e te kolesi pule ʼo te ʼuluaki sēkulō ke ʼalutahi te ʼu akonaki faka Kilisitiano
[Paki ʼo te pasina 23]
ʼI te malamanei katoa, ʼe fiafia te kau Fakamoʼoni ʼa Sehova ʼi tanatou maʼu te ʼāteaina ʼaē neʼe faka ʼāteaina kiai nātou e Sesu Kilisito