Te Kele He Koʼe Koa Neʼe Fakatupu?

ʼE ʼi ai te fehuʼi ʼe tonu ke koutou fakatokagaʼi: Neʼe fakatupu koa totatou kele matalelei e he tagata poto ʼaki hana fakatuʼutuʼu ʼo ʼuhiga mo te kele pea mo te hahaʼi? Kapau ʼe koutou maʼu he tali lelei ki te fehuʼi ʼaia, pea ʼe feala anai ke koutou ʼiloʼi pe koteā te ka haʼu ʼo totatou kele.

TOKOLAHI te kau tagata popoto ʼaē neʼe lahi te ʼu meʼa ʼaē neʼe nātou ako ʼo ʼuhiga mo te ʼatulaulau pea mo totatou kele, neʼe nātou sio ki te ʼu fakamoʼoni ʼe fakahā ai ʼe ʼi ai te Tupuʼaga, ʼe ko te ʼAtua ʼaē neʼe ina fakatupu ia meʼa fuli. Koutou fakatokagaʼi te meʼa ʼaē neʼe ʼui e te tagata poto:

ʼE ʼui fēnei e te polofesea ko Paul Davies ʼi tana tohi LʼEsprit de Dieu: “ ʼE maʼua ke ʼi ai he ʼu lao pea mo he ʼu ʼaluʼaga makehe, ke tokalelei pea mo fehoahoa lelei ʼaki te ʼatulaulau, pea ke tou maʼu ai te ʼu fakatuʼutuʼu lelei pea mo faigataʼa.”

ʼI tana ʼosi palalau ʼo ʼuhiga mo te lahi ʼo te tuʼuga “meʼa ʼaē ʼe hoko fakatahi” [ʼi te ʼatulaulau], ʼaē neʼe fakatokagaʼi e te hahaʼi ʼaē ʼe nātou sivi te ʼu fetuʼu pea mo ʼihi atu tagata popoto, ʼe toe ʼui fēnei e te polofesea ko Davies: “Ka tou fakatokagaʼi te ʼu meʼa fuli ʼaia ʼaē ʼe hoko fakatahi, pea ʼe nātou fakamoʼoni lahi mai, ko totatou maʼuli ʼe fakalogo tāfito ki te ʼu lao ʼo te physique pea mo te ʼu masses des particules, mo te ʼu rapports entre les forces fondamentales, pea mo te tahi atu ʼu meʼa ʼi te ʼatulaulau, pea ko te ʼu meʼa ʼaia ʼe hage neʼe tupu feiā pe. . . . Kanapaula neʼe tou maʼu te tuʼulaga ʼo te ʼAtua pea mo tou fakafuafua feiā pe te lahi ʼo te ʼu meʼa ʼaia, ʼo tou mioʼi he ʼu boutons, pea ʼe tou mahino ai anai, tatau aipe pe koteā te ʼu boutons ʼaē ʼe tou mioʼi, kae ʼe mole maʼu anai he maʼuli ʼi te ʼatulaulau. ʼI ʼihi lakaga, ʼe hage neʼe tonu ke mioʼi fakalelei te ʼu boutons ʼaia, ke feala ai ke maʼu te maʼuli ʼi te ʼatulaulau. . . . Pea kapau ʼe hoko he ʼu kiʼi fetogi veliveli pe ʼi te ʼu agaaga [ʼo te ʼatulaulau] pea ʼe liliu ai ko he meʼa ʼe mole feala anai hona vakavakaʼi [e te tagata], pea ʼe mahino papau ia ʼe ʼi ai tona ʼuhiga.”

Maʼa te tokolahi, ko te ʼu meʼa ʼaia ʼe nātou fakahā mai, ko totatou kele pea mo te ʼatulaulau neʼe fakatupu e he tahi ʼe ʼi ai tana fakatuʼutuʼu. Kapau koia ʼaia, pea ʼe tonu ke tou ʼiloʼi pe koʼe neʼe ina ʼuluaki faʼu te kele. Tahi ʼaē meʼa, ʼe tonu ke tou ʼiloʼi papau, kapau ʼe feala, pe koteā tana fakatuʼutuʼu ʼo ʼuhiga mo te kele. ʼO ʼuhiga mo te faʼahi ʼaia, ʼe hoko te meʼa faikehe. Logope la kua tokolahi te hahaʼi ʼaē ʼe mole tui ki te ʼAtua, kae ʼe kei ʼi ai te ʼu hahaʼi ʼe nātou tui ʼe ʼi ai te Tupuʼaga poto. ʼE lahi te ʼu ʼēkelesia ʼo te Keletiate ʼe nātou lau ʼe ʼi ai te ʼAtua Māfimāfi pea mo te Tupuʼaga ʼo totatou ʼatulaulau. Kae ʼe mole palalau te ʼu lotu ʼaia ʼaki he loto falala pea mo he tui moʼoni, ki te ka haʼu ʼo te kele ʼi te fakatuʼutuʼu ʼa te ʼAtua.

Koteā ʼAē ʼe ʼUi e Te Tohi-Tapu?

ʼE ko he meʼa fakapotopoto hatatou kumi te ʼu meʼa ʼaē ʼe tou fia ʼiloʼi, ʼi he tohi ʼe tali e te tokolahi ohage ko he tohi ʼe haʼu mai te Tupuʼaga. Ko te tohi ʼaia ʼe ko te Tohi-Tapu. Ko te fakamatala faigafua pea mo matala lelei ʼaē ʼe ʼui e te tohi ʼaia ʼo ʼuhiga mo te ka haʼu ʼo totatou kele, ʼe tou maʼu ia Tagata Tānaki 1:4. ʼE tou lau fēnei ai: “ ʼE fakalaka te taʼiake, pea ʼe haʼu te tahi taʼiake: kae ko te kele ʼe tuʼu ʼo talu ai.” (King James Version) ʼE fakahā fakahagatonu mai e te Tohi-Tapu pe koʼe neʼe fakatupu e Sehova ʼAtua te kele. ʼE ina toe fakahā mai neʼe ina fakatuʼu lelei te kele ʼi te lotolotoiga ʼo te ʼatulaulau pea mo fakavaha lelei mo te laʼā, ke feala hatatou maʼuʼuli. ʼAki tona laumālie, neʼe uga e te ʼAtua Māfimāfi te polofeta ʼāfea ko Isaia ke ina tohi fēnei: “Koʼeni te meʼa ʼaē neʼe ʼui e Sehova, te Tupuʼaga ʼo te lagi, ia Ia ʼaē ko te ʼAtua moʼoni, ia Ia ʼaē neʼe ina faʼu te kele pea mo ina fakatupu, ia Ia ʼaē neʼe ina fakatuʼu mālohi, ʼaē neʼe mole ina fakatupu noa, [kae] neʼe ina faʼu ke nofoʼi: ‘Ko ʼau Sehova, pea ʼe mole he tahi age.’ ”​—Isaia 45:18.

Kae e feafeaʼi ki te ʼu meʼa ʼaē ʼe haga fai e te tagata moʼo maumauʼi te maʼuli fuli pe ʼi te kele? ʼI tona poto ʼaē ʼe mole hona fakatatau, ʼe ʼui e te ʼAtua ʼe ina fai anai he meʼa ʼi muʼa ʼo te fakaʼauha e te hahaʼi te maʼuli fuli pe ʼi totatou kele. Koutou fakatokagaʼi te fakapapau fakaloto fīmālie ʼaē ʼe tou maʼu ia Fakahā, te tohi fakaʼosi ʼo te Tohi-Tapu: “Neʼe ʼiʼita te ʼu puleʼaga, pea neʼe hoko mai tou hāūhāū totonu, mo te temi ʼaē neʼe fakakatofa ke fakamāuʼi ai te kau mate, pea mo foaki te fakapale ʼo tau ʼu kaugana te kau polofeta, pea mo te kau maʼoniʼoni, mo nātou fuli ʼaē ʼe manavasiʼi ki tou huafa, ia nātou liliki mo nātou lalahi, pea mo maumauʼi ia nātou ʼaē ʼe nātou maumauʼi te kele.”​—Fakahā 11:18.

ʼE fakahā mai e Sehova kia tatou pe koteā tana fakatuʼutuʼu ʼi te kamataʼaga ʼi tana fakatupu te kele, te maka matalelei ʼaia ʼo te ʼatulaulau, ohage ko te ʼui ʼa te astronaute neʼe ina takafoli te kele. Neʼe fakatuʼutuʼu e te ʼAtua ke liliu te kele katoa ko he palatiso, ʼe maʼuli fīmālie ai te hahaʼi​—tagata mo fafine​—pea ʼe nātou maʼuʼuli fuli ʼi te tokalelei pea mo te logo tahi. Neʼe ina fakatuʼutuʼu ke fakafonu māmālie te kele ʼo ina faka fealagia ki te ʼuluaki taumatuʼa ke nā fanaunau. Ke feala ki te ʼuluaki taumatuʼa ke nā maʼuli fiafia, neʼe fakaliliu e Sehova he kiʼi potu veliveli ʼo te kele ko he palatiso. Mai tona ʼuhiga ʼaē ʼe hoko atu anai te fanaunau ʼa te ʼu famili lolotoga ni ʼu taʼu pea mo ni ʼu sēkulō, koia ʼaki te temi ʼe mafola māmālie te ʼōloto ʼo Eteni ʼo aʼu ki te fakahoko ʼo Senesi 1:​28: “Neʼe ʼui maʼa te ʼAtua kia nāua: ‘Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi.’ ”

ʼI te temi nei ʼi tatatou sio ki te kua fakaʼofaʼofa ʼo te kele pea mo te hahaʼi, ko tona faka ʼuhiga koa ʼe mole hoko anai te fakatuʼutuʼu ʼaē neʼe fai e te ʼAtua ʼi te kamata ʼo ʼuhiga mo te kele? Peʼe kua ina fetogi koa tana fakatuʼutuʼu pea mo ina fakatotonu, ʼuhi ko te logogataʼa ʼa te hahaʼi, ʼe ina tuku anai te kele ke maumauʼi katoa pea ina toe faʼu anai, ohage ko te kamataʼaga? Kailoa, ʼe tonu ke tou ʼiloʼi papau ʼe mole hoko anai te ʼu ʼaluʼaga ʼaia. ʼE ʼui mai e te Tohi-Tapu kia tatou, tatau aipe pe koteā te ʼu fakatuʼutuʼu ʼa Sehova kae ʼe hoko moʼoni anai, pea ko he meʼa pe kua ina fakatotonu ke hoko, ʼe mole feala ke tāʼofi e he tahi peʼe ko he meʼa ʼe hoko fakafokifā. ʼE ina fakamoʼoni fēnei mai kia tatou: “ ʼE feiā anai taku folafola ʼaē ʼe mavae atu ʼi toku gutu. ʼE mole toe liliu mai anai kia te ʼau ka mole hona ʼu fua, kae ʼe ina fakahoko moʼoni anai te meʼa ʼaē kua ʼau leleiʼia, pea ʼe hoko moʼoni anai te meʼa ʼaē neʼe ʼau fekauʼi kiai.”​—Isaia 55:11.

Neʼe Fakagata Faka Temi Te Fakatuʼutuʼu ʼa Te ʼAtua, Kae Neʼe Mole Fetogi

ʼI te mole nofo agatonu ʼa Atama mo Eva pea mo tonā kapu ʼi te ʼōloto ʼo Eteni, neʼe kua ʼiloʼi papau ʼe mole nā kau anai ki te fakahoko ʼo te fakatuʼutuʼu ʼa te ʼAtua ʼaē ko te fakaliliu ʼo te kele ko he palatiso. Kae ʼi te lakaga ʼaia neʼe fakahā e Sehova ko ʼihi ʼi tonā hōloga ʼe nātou fakahoko anai te fakapapau ʼaē neʼe ina fai ʼi te kamataʼaga. ʼE moʼoni, ʼe ʼaoga anai kiai he temi loaloaga, māʼia mo he ʼu sēkulō, kae tatau aipe pe neʼe hoko atu te maʼuli haohaoa ʼa Atama mo Eva, kae neʼe mole fakahā peʼe ko temi e fia ʼaē ka ʼaoga moʼo fakahoko te fakapapau ʼaē neʼe ina fai ʼi te kamata. Kae ʼi te fakaʼosi ʼo te ʼAfio ʼa Sesu Kilisito ia Taʼu e Afe, ʼe mafola anai te ʼu ʼaluʼaga ʼo te Palatiso ʼo Eteni ki te kele katoa pea ʼe nofoʼi anai e te hōloga ʼo te ʼuluaki taumatuʼa, ʼi te tokalelei mo te fiafia. Koia, ʼe faka lākatonuʼi anai ʼo talu ai te fealagia ʼa Sehova ke ina fakahoko moʼoni tana ʼu fakapapau!

Pea ʼe hoko anai te ʼu lea faka polofeta fakafiafia ʼaē neʼe fakahā e te ʼAtua talu mai muʼa. ʼE hoko anai ʼi hona ʼaluʼaga faka kolōlia te vaega ʼaenī ʼo Isaia 11:​6-9: “Ko te lupo ʼe nofo faka temi anai mo te akeno tagata, pea ko te leopa ʼe takoto fakatahi anai mo te ʼuhiʼi tao, pea ko te ʼuhiʼi pipi, pea mo te laione mui pea mo te manu ʼaē neʼe fafaga lelei, ʼe nātou fakatahi fuli anai; pea ʼe takitaki anai nātou e he kiʼi tama veliveli. Pea ko te pipi pea mo te uluso ʼe kakai fakatahi anai; ʼe takokoto fakatahi anai tanā ʼu kiʼi ʼuhi. Pea māʼia mo te laione ʼe ina kai anai te luna ohage ko te vitulo. Pea ko te kiʼi tamasiʼi ʼaē kei huhu ʼe gaoʼi anai ʼi te luo ʼo te gata; pea ko te kiʼi tamasiʼi ʼaē kei meamea, ʼe ina ʼai anai tona nima ki te luo ʼo te gata kafo kona. ʼE mole nātou fai anai he meʼa kovi pea ʼe mole fakatupu anai he maumau ʼi toku moʼuga maʼoniʼoni katoa; heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.”

ʼE mole toe ʼi ai anai te ʼu mahaki māhani pea mo te ʼu mahaki ʼaē ʼe mole hona faitoʼo, ʼo feiā mo te mate. ʼE ʼi ai koa he tahi age fakamatala ʼe matala lelei age ʼi te ʼu fakamatala ʼaē ʼe tou maʼu ʼi te tohi fakaʼosi ʼo te Tohi-Tapu? “Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko tana ʼu hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.”​—Fakahā 21:​3, 4.

Ei, ʼe feala ke tou lotomālohi​—ʼe mole fakaʼauha anai totatou kele matalelei. ʼOfa pe ke koutou maʼu te pilivilesio ʼaē ke koutou hāo mokā pulihi anai te tuʼu ʼo te ʼu faʼahiga meʼa agakovi ʼaenī, pea mo tana ʼu gāue ʼaē ʼe nātou maumauʼi te kele. Kua fakaōvi mai te temi ʼaē ka fakatuʼu e te ʼAtua te mālama foʼou pea mo maʼa. Pea ʼaki te milakulo ʼo te fakatuʼuake, ʼe toe tutuʼu ake anai te kau mate ʼaē ʼe tou ʼoʼofa ai. (Soane 5:​28, 29) ʼE moʼoni, ʼe mole pulihi anai totatou kele, pea ʼe feala ke tou maʼuʼuli ai pea mo fiafia ai.