ʼE Kei Maʼuhiga Koa Ia Kilisito ʼi Te Po Tapu?

“Neʼe mole ʼau lava tali te ʼu fakafiafia ʼo te Po Tapu. Kia ʼau, ʼe mole ʼalutahi te ʼu fakafiafia ʼaia mo te maʼuli ʼo Sesu pea mo tana ʼu akonaki.”—Ko Mohandas K. Gandhi.

ʼE TOKOLAHI te hahaʼi ʼe nātou fakafihiʼi anai te palalau ʼaia ʼa Gandhi. ʼE lagi nātou ʼui anai, ‘ ʼE feala koa ke ʼiloʼi moʼoni e he tagata fai politike Inituisi pe koteā te fakafiafia ʼaia ʼa te kau Kilisitiano?’ Kae ʼe tou ʼiloʼi papau kua fai te Po Tapu ʼi te malamanei katoa, pea kua hū ki te ʼu agaʼi fenua kehekehe. ʼI Tesepeli, ʼe hage kua kau te hahaʼi fuli ki te fakafiafia ʼaia.

Ohage la, ko te toko 145 miliona hahaʼi ʼe nātou fai te Po Tapu ʼi Asia, ʼo laka age ʼi te toko 40 miliona ʼi te ʼu taʼu ʼaenī e hogofulu kua hili. Tahi ʼaē meʼa, neʼe talanoa ia Gandhi ki te ʼu “fakafiafia” ʼo lagi manatu ki te fakaʼaogaʼi fakavale ʼa te hahaʼi tanatou falā ʼi te Po Tapu, pea ʼe mahino ia, ʼe ko te faʼahi ʼaia ʼaē ʼe maʼuhiga tāfito ʼi te lafeti ʼaia. ʼE ʼui fēnei e te nusipepa Asiaweek: “Ko te Po Tapu ʼi Asia​—mai te ʼu hila lalahi ʼo te ʼu lafeti ʼi Hong Kong ʼo aʼu ki te ʼu fuʼu ʼakau lalahi ʼo te Po Tapu ʼi te ʼu otele ʼi Beijing, pea mo te fakahā ʼo he kaiʼaga manu ʼi Singapour​—ʼe ko he lafeti ʼe fakaʼaogaʼi tāfito ai te paʼaga (heʼe lahi ai te faifakatau).”

ʼE kei maʼuhiga koa ia Kilisito ʼi te Po Tapu ʼaē ʼe fai ia ʼaho nei? ʼO mulimuli ki te hisitolia, neʼe kamata fai te Po Tapu ʼo te ʼaho 25 ʼo Tesepeli talu mai te fā sēkulō ʼo totatou temi, ʼi te temi ʼaē neʼe fakatuʼutuʼu ai e te ’Ēkelesia Katolika Loma te ʼaho ʼaia moʼo fakamanatu te ʼaho tupu ʼa Sesu. Kae ʼi te sivi neʼe fai ki te hahaʼi ʼi Amelika, ʼe ko te hahaʼi ʼe toko 33 pe ʼi te teau ʼaē neʼe nātou ʼui, ko te meʼa ʼaē ʼe maʼuhiga tāfito ʼi te Po Tapu ʼe ko te tupu ʼa Sesu.

Koteā takotou manatu ki te faʼahi ʼaia? ʼI ʼihi temi, ka koutou sio ki te ʼu fakahāhā ʼaē ʼe fai tuʼumaʼu ʼo ʼuhiga mo te faʼahi ʼaia, mo te totogi fakavale ʼa te hahaʼi he ʼu meʼa ʼofa, mo te teuteuʼi ʼo te ʼu fuʼu ʼakau, mo te fakatuʼutuʼu ʼo he ʼu lafeti, pea mo te femomoliʼaki ʼo he ʼu kiʼi kate​—ʼe mole koutou manatu koa la kua galo ʼosi ki te hahaʼi ia Sesu?

ʼE tokolahi te hahaʼi ʼe nātou manatu, ʼe nātou manatuʼi anai ia Kilisito ʼi te Po Tapu mo kapau ʼe nātou faʼu ʼi tonatou ʼapi he fakatātā ʼo te Nativitate ʼo Sesu. Lagi kua koutou sio pe ki te ʼu fakatātā ʼaia, ʼaē ʼe fakahā ai ia Sesu kei meamea ʼe takoto ʼi te kaiʼaga manu, pea ʼe tutuʼu ʼi ʼona tafa ia Malia, mo Sosefo, pea mo te ʼu tagata tauhi ōvi, mo “te ʼu tagata poto ʼe toko tolu,” peʼe “ko te ʼu hau ʼe toko tolu,” mo he ʼu manu lalata, pea mo ʼihi hahaʼi ʼe nātou sioʼi te kiʼi tamasiʼi. ʼI te agamāhani, ʼe ʼui ko te ʼu fakatātā ʼaia ʼe ʼaoga ki te hahaʼi ke feala hanatou manatuʼi te ʼuhiga moʼoni ʼo te Po Tapu. ʼE ʼui e te nusipepa U.S. Catholic, “ko he fakatātā ʼo te Nativitate ʼe ina fakamatala lelei age te tupu ʼa Sesu ʼi tona fai e te ʼu Evaselio, logope la ʼe ina faka maʼuhigaʼi he ʼu meʼa ʼe mole tuʼu ʼi te ʼu hisitolia ʼo te ʼu tohi ʼaia.”

Kae he koʼe ʼe feala ke tou ʼui ko te ʼu meʼa ʼaē ʼe fakahā ʼi te ʼu fakatātā ʼo te Nativitate ʼe mole tuʼu ʼi te ʼu hisitolia ʼo te ʼu Evaselio? ʼE tonu ke tou tala fakahagatonu, ko te ʼu kiʼi fakatātā ʼaē ʼe fakahā ai, neʼe toʼo mai he ʼu fagana ʼo ʼuhiga mo te tupu ʼa Kilisito. Neʼe ʼuluaki fai te fakatātā ʼaia e te monike ʼo te 13 sēkulō, pea ko te fakatātā ʼaē neʼe ina faʼu moʼo fakahā ʼaki te tupu ʼa Sesu neʼe ko he meʼa faigafua. Ia ʼaho nei, ohage ko te ʼu meʼa fuli ʼaē ʼe pipiki ki te Po Tapu, kua liliu te ʼu fakatātā ʼaia ko he ʼu meʼa ʼe maʼuhiga ki te faifakatau. ʼI Naples, ʼi Italia, lolotoga te taʼu katoa ʼe fakahā e te ʼu fale koloā te ʼu tuʼuga kiʼi fakatātā, peʼe ko te ʼu presepi, moʼo fakaʼaogaʼi ki te ʼu fakatātā ʼo te Nativitate. Ko te ʼu fakatātā ʼaē ʼe fakatau, ʼe mole ko he ʼu fakatātā ʼo te hahaʼi ʼaē ʼe talanoa kiai te ʼu Evaselio, kae ʼe ko te hahaʼi ʼiloa ʼo te temi ʼaenī, ohage ko te Fineʼaliki ko Diana, pea mo te Taupoʼou ko Thérésa, pea mo te tagata fai mutuʼi meʼa ko Gianni Versace. ʼI ʼihi potu, ʼe faʼu te ʼu presepi ʼaia ʼaki te sokola, pe ko te nui, pe ko te ʼu figota. Kua lagi koutou mahino leva, pe koʼe ʼe mole tuʼu te ʼu meʼa fuli ʼaia ʼi te hisitolia.

Koia, he koʼe ʼe ʼui e ʼihi ko te ʼu fakatātā ʼaia ʼe nātou “fakamatala lelei age te tupu ʼa Sesu ʼi tona fai e te ʼu Evaselio”? Ko tona faka ʼuhiga koa ʼe mole moʼoni te ʼu meʼa ʼaē ʼe tuʼu ʼi te ʼu Evaselio? Māʼiape la mo nātou ʼaē ʼe tuigataʼa ʼe nātou fakamoʼoni, ko Sesu neʼe ko te tagata neʼe maʼuli moʼoni, pea ʼe fakamoʼoni kiai te hisitolia. Koia, neʼe tonu ke tupu moʼoni ko he kiʼi tamasiʼi ʼi he koga meʼa moʼoni. ʼE tonu ke ʼi ai he tahi puleʼaki moʼo ʼiloʼi pe neʼe feafeaʼi te tupu ʼa Sesu, pea ʼe lelei age ʼi hakita mamata pe ki he ʼu fakatātā!

ʼE ʼi ai te puleʼaki. Ko te ʼu tagata tohi hisitolia ʼe toko lua neʼe nā fai te ʼu fakamatala e lua ʼo ʼuhiga mo te tupu ʼa Sesu. Kapau ʼi ʼihi temi, ʼe koutou manatu ʼe meʼa noaʼi e te hahaʼi ia Kilisito ʼi te Po Tapu, pea ʼe lelei ke koutou lau te ʼu fakamatala ʼaia. ʼE mole koutou maʼu ai anai he ʼu fagana, kae ko he fakamatala ʼe fakaofoofo ʼaupito​—ʼe ko te hisitolia moʼoni ʼo te tupu ʼa Kilisito.

[Haʼuʼaga ʼo te paki pasina 3]

Border on pages 3-6, 8, and 9: Fifty Years of Soviet Art