“Tapuakiʼi Ia Sehova, Ê Toku Nefesi”

NEʼE ʼui fēnei e Nancy,a “ ʼI te ʼu māhina ʼaenī kua hili, neʼe mole kei ʼau fiafia ʼi te minisitelio.” Lolotoga taʼu e hogofulu, neʼe gāue pionie ʼo ina fakaʼaogaʼi tona temi katoa ki te tala ʼo te logo lelei. Kae neʼe ina toe ʼui fēnei: “ ʼE mole ʼau leleiʼia te meʼa ʼaē ʼe lolotoga hoko kia ʼau. ʼE hage kia ʼau, ʼe mole ʼau fiafia ʼi taku tala te logo ʼo te Puleʼaga, pea ʼe mole ʼau fai ʼaki toku loto katoa. Koteā ʼaē ʼe tonu ke ʼau fai?”

Koutou vakaʼi mo te meʼa ʼaē neʼe hoko kia Keith, ko te tagata ʼāfea ʼi he kokelekasio ʼa te kau Fakamoʼoni ʼa Sehova. Neʼe punamaʼuli ʼi te ʼui age e tona ʼohoana kia ia: “ ʼE ʼau mahalo ʼe ʼi ai he meʼa ʼe ke tuʼania ai. ʼI tau faikole, neʼe ke fakafetaʼi ki te ʼAtua ʼo ʼuhiga mo te meʼa kai, ka ʼe mole ko te temi kai ʼaenī!” Neʼe fakamoʼoni fēnei e Keith: “ ʼE mahino kia ʼau, kua liliu taku ʼu faikole ko he ʼu palalau ʼe ʼau lau liuliuga pe.”

ʼE mahino ia, ʼe mole koutou loto ke liliu takotou ʼu faikole kia Sehova ko he ʼu palalau ʼe mole koutou fai ʼaki tokotou loto katoa peʼe tatau tuʼumaʼu te ʼu meʼa ʼaē ʼe koutou kole ki ai. Kae ʼe koutou fia fai ʼaki tokotou loto katoa, heʼe koutou logoʼi takotou loto fakafetaʼi kia te ia. Kae ko te ʼu meʼa ʼaē ʼe tou logoʼi ʼi totatou loto, ʼe mole ko he ʼu meʼa ʼe feala ke tou ʼai kiai peʼe tou toʼo mai ai ohage ko he kofu ʼe tou tui peʼe tou huʼi. ʼE tonu ke haʼu mai te loto ʼo te tagata. ʼE lava feafeaʼi ke fakafetaʼi tokita loto? ʼE foaki mai e te Pesalemo 103 he ʼu tokoni ʼo ʼuhiga mo te faʼahi ʼaia.

Neʼe tohi te Pesalemo 103 e te hau ʼāfea ʼo Iselaele ko Tavite. Neʼe ina kamata fēnei: “Tapuakiʼi ia Sehova, Ê toku nefesi, pea ko meʼa fuli ʼaē ia te ʼau, ke nātou tapuakiʼi tona huafa maʼoniʼoni.” (Pesalemo 103:1) ʼE ʼui fēnei e te tohi, “Ko te kupu tapuakiʼi, mokā fakaʼaogaʼi ki te ʼAtua, ʼe faka ʼuhiga ki te vikiʼi, pea ʼe pipiki tuʼumaʼu kiai tokita ʼofa ki te ʼAtua, ʼo feiā mo he loto fakafetaʼi.” ʼI tana loto ʼaē ke fakavikiviki kia Sehova ʼaki he loto ʼe fonu ʼi te ʼofa pea mo te fakafetaʼi, neʼe fakaloto mālohiʼi e Tavite tona nefesi​—ia ia totonu​—ke ina “tapuakiʼi ia Sehova.” Kae he koʼe neʼe uga te loto ʼo Tavite ke ʼofa ki te ʼAtua ʼaē neʼe tauhi ki ai?

ʼE hoko atu fēnei e Tavite: “ ʼAua naʼa galo kia koe tana ʼu gāue fuli [ʼa Sehova].” (Pesalemo 103:2) ʼE hā mai, ko tatatou loto fakafetaʼi kia Sehova ʼe tupu mai tatatou metitasioʼi “tana ʼu gāue.” Koteā te ʼu gāue ʼa Sehova ʼaē neʼe manatu kiai Tavite? Kapau ʼe tou mamata ki te ʼu meʼa ʼaē neʼe fakatupu e te ʼAtua, ohage ko te ʼu fetuʼu mokā tuʼu lelei te afiafi, pea ʼe tupu ai hatatou loto fakafetaʼi ki te Tupuʼaga. Ko te ʼu fetuʼu ʼo te lagi neʼe malave ʼaupito kia Tavite. (Pesalemo 8:​3, 4; 19:1) Kae ʼi te Pesalemo 103, ʼe manatuʼi e Tavite te tahi faʼahiga gāue neʼe fai e Sehova.

Ko Sehova “ ʼE Ina Fakamolemole Tau ʼu Hala Fuli”

ʼI te pesalemo ʼaia, ʼe fakamanatuʼi e Tavite te ʼu gāue ʼaē neʼe hā ai te lotoʼofa ʼa te ʼAtua. Neʼe hiva fēnei ʼo ʼuhiga mo te lotoʼofa ʼaia: ‘Ko Sehova ʼe ina fakamolemole tau ʼu hala fuli.’ (Pesalemo 103:3) Neʼe mahino kia Tavite tona ʼuhiga agahala. ʼI te ʼosi fakatonutonuʼi e te polofeta ko Natane tana fai feʼauʼaki mo Pati-Sepa, neʼe fakamoʼoni e Tavite: “Kia koe [Sehova], kia koe tokotahi neʼe ʼau agahala, pea neʼe ʼau fai te meʼa ʼaē ʼe kovi ʼi ʼou mata.” (Pesalemo 51⁠:4) ʼI tana kua lotomamahi ʼaupito, neʼe tagi mamahi fēnei ai: “Fakahā mai tou ʼofa, Ê ʼAtua, ʼaki tou finegaloʼofa. ʼAki te lahi ʼo tou ʼu manavaʼofa, molehi taku ʼu talagataʼa. Fufulu katoa ʼau mai taku hala, pea mo fakamaʼa ʼau mai taku agahala.” (Pesalemo 51:​1, 2) Neʼe loto fakafetaʼi ʼaupito ia Tavite ʼi te temi ʼaē neʼe fakamolemole ai tana ʼu hala! ʼI tona ʼuhiga tagata agahala, neʼe ina fai te tahi ʼu hala ʼi tona maʼuli katoa, kae neʼe fakahemala tuʼumaʼu, pea neʼe ina tali tona tokoniʼi, pea neʼe ina fetogi tana aga. ʼI tana fakakaukauʼi te lotoʼofa taulekaleka ʼa te ʼAtua, neʼe uga ai ia Tavite ke ina tapuakiʼi ia Sehova.

ʼE mole tou agahala feiā koa la mo tatou? (Loma 5:​12) Māʼia mo te ʼapositolo ko Paulo neʼe lāuga fēnei: “E au fakafiafia i te lao a te Atua o faipe ki te tagata loto, kae e au mamata ki he lao kehe i oku logoʼagasino e tau fakafehagai ki te lao o toku atamai pea e ina fakapopulaʼi au i te lao a te agahala e nofo i oku logoʼagasino. Tagata fakaofaofa ko au! Pe ko ai ae e ina haofaki anai au mai te sino aeni o te mate?” (Loma 7:​22-​24) ʼE tou fakafetaʼi lahi kia Sehova, heʼe mole ina lau tatatou ʼu hala! ʼE fiafia ʼi tana molehi te ʼu hala ʼaia, mo kapau ʼe tou fakahemala pea mo tou faiga ke fakamolemole mai kia tatou.

Neʼe manatuʼi fēnei e Tavite: “[Ko Sehova] ʼe ina fakamālōlō tou ʼu mahaki fuape.” (Pesalemo 103:3) Ko te fakamālōlō ʼe fai ke toe lelei tokita ʼaluʼaga, koia ʼe mole faka ʼuhiga pe ki te fakamolemole ʼo te ʼu hala ʼaē neʼe kita fai. ʼE toe faka ʼuhiga foki ki te molehi ʼo te ʼu “mahaki”​—pe ko te ʼu fua kovi ʼo te ʼu hala ʼaē neʼe kita fai. ʼI te mālama foʼou ʼaē ka ina fakatuʼu, ʼe molehi anai e Sehova te ʼu fua kovi ʼo te agahala ʼi te faʼahi fakasino, ohage ko te mahaki pea mo te mate. (Isaia 25:8; Apokalipesi 21:​1-4) Kae kua tokoni mai te ʼAtua kia tatou ʼi te temi nei, ʼo ʼuhiga mo totatou ʼu mahaki ʼi te faʼahi fakalaumālie. Ko ʼihi, ʼe lagi hoha tonatou leʼo ʼo loto peʼe lagi kovi tanatou ʼu felogoi mo te ʼAtua. “Aua naʼa galo” kia koutou te ʼu meʼa ʼaē kua fai e Sehova maʼa tatou ʼi te faʼahi ʼaia.

ʼE Ina “Hāofaki Tou Maʼuli”

Neʼe hiva fēnei Tavite: “[Ko Sehova] ʼe ina hāofaki tou maʼuli mai te luo.” (Pesalemo 103:4) Ko “te luo” ʼe faka ʼuhiga ki te faitoka ʼa te hahaʼi fuli pe​—te Seole, pe ko te Hatesi. ʼI muʼa ʼo tana liliu ko te hau ʼo Iselaele, neʼe meihiʼi pe ke mate ia Tavite. Ohage la, ko te hau ʼo Iselaele ko Saulo neʼe fehiʼa ʼaupito kia Tavite, pea neʼe faiga liuliuga ke ina matehi ia ia. (1 Samuele 18:​9-​29; 19:10; 23:​6-​29) Neʼe toe loto foki mo te kau Filisitini ke nātou matehi ia Tavite. (1 Samuele 21:10-​15) Kae ʼi te ʼu lakaga fuli ʼaia, neʼe hāofaki ia ia e Sehova “mai te luo.” ʼE mahino ia, neʼe loto fakafetaʼi ia Tavite ʼi tana manatuʼi te ʼu gāue ʼaia ʼa Sehova!

Kaeā koutou? Kua lagolago koa ia Sehova kia koutou ʼi te ʼu temi ʼaē neʼe koutou lotohoha ai peʼe ʼi te temi neʼe mate ai he tahi neʼe koutou ʼofa mamahi ai? Neʼe koutou logo koa ki te ʼu fakamatala ʼo ʼuhiga mo te kau Fakamoʼoni agatonu ʼo totatou temi ʼaē neʼe hāofaki e Sehova mai te luo ʼo te Seole? Neʼe lagi malave kia koutou takotou lau ʼi te nusipepa ʼaenī te ʼu fakamatala ʼo nātou ʼaē neʼe hāofaki e Sehova. He koʼe ʼe mole koutou toʼo he temi ke koutou metitasioʼi pea mo fakafetaʼi ki te ʼu gāue ʼaia ʼa te ʼAtua moʼoni? Pea ʼe mahino kia tatou fuli, ʼe feala ke tou fakafetaʼi kia Sehova he neʼe ina foaki mai te ʼamanaki ʼo te fakatuʼuake.​—Soane 5:​28, 29; Gaue 24:15.

ʼE foaki mai e Sehova te maʼuli pea mo te ʼu meʼa ʼaē ʼe ʼaoga ke tou maʼuli fiafia ai. ʼE ʼui e te tagata fai pesalemo, ko te ʼAtua “ ʼe ina faka kolona koe ʼaki te lotoʼofa pea mo te ʼu manavaʼofa.” (Pesalemo 103:4) ʼI te temi ʼaē ʼe tou tau ai mo ni ʼu fihifihia, ʼe mole līaki tatou e Sehova, kae ʼe tokoni mai ʼaki tana kautahi pea mo te ʼu tagata ʼāfea, peʼe ko te ʼu tagata tauhi ōvi ʼaē neʼe ina hinoʼi ʼi te kokelekasio. ʼAki te tokoni ʼaia, ʼe feala ke tou tauʼi te ʼu ʼaluʼaga faigataʼa ka mole puli tatatou ʼofa pea mo tatatou fakaʼapaʼapa kia tatou totonu. ʼE tokaga fakamalotoloto te kau tagata ʼāfea Kilisitiano ki te faga ōvi. ʼE nātou fakaloto mālohiʼi ia nātou mahahaki pea mo lotohoha, pea ʼe nātou fai ia meʼa fuli ke toe mālolohi ia nātou ʼaē neʼe vaivavai. (Isaia 32:​1, 2; 1 Petelo 5:​2, 3; Suta 22, 23) Ko te laumālie ʼa Sehova ʼe ina uga te ʼu tagata tauhi ōvi ʼaia ke nātou loto manavaʼofa pea mo lotoʼofa ki te faga ōvi. Ko tana “lotoʼofa pea mo [tana] ʼu manavaʼofa” ʼe hage ko he kolona ʼe ina fakamataleleiʼi tatou, pea ʼe tupu ai totatou fakaʼapaʼapaʼi! ʼI tatatou manatuʼi tuʼumaʼu te ʼu gāue ʼaia ʼa Sehova, tou tapuakiʼi ia ia pea mo tona huafa maʼoniʼoni.

ʼE hoko atu e Tavite tana fakaloto mālohiʼi ia ia totonu, pea ʼe hiva fēnei: “[Ko Sehova] ʼe ina fakafimālieʼi tou maʼuli ʼaki te meʼa ʼaē ʼe lelei; ʼe fakafoʼou tuʼumaʼu tou tūpulaga ohage ko te akuila.” (Pesalemo 103:5) Ko te maʼuli ʼaē ʼe foaki mai e Sehova, ʼe ko he maʼuli fīmālie pea mo fiafia. ʼE moʼoni, ko tatatou ʼiloʼi ia te moʼoni ʼe ko he toe koloā ʼaia, pea ʼe fakatupu fiafia kia tatou! Tahi ʼaē, tou fakasiosio te gāue fakaloto fīmālie ʼaē neʼe foaki mai e Sehova kia tatou, ke tou fai faka mafola pea mo fai ni ʼu tisipulo. ʼE fakafiafia ʼaupito kia tatou tatatou felāveʼi mo he tahi ʼe ina fia ʼiloʼi te ʼAtua moʼoni, pea mo tou tokoni age kia ia ke ina ʼiloʼi ia Sehova pea mo ina tapuakiʼi ia ia! Kae tatau aipe peʼe fakalogo peʼe kailoa te hahaʼi ʼo totatou telituale, ʼe ko hatatou pilivilesio lahi ke tou kau ʼi he gāue ʼe lagolago ki te fakamaʼoniʼoniʼi ʼo te huafa ʼo Sehova pea mo te faka lākatonuʼi ʼo tona ʼuhiga pule.

Kae ʼi tatatou kātaki ʼo kalagaʼi te Puleʼaga ʼo te ʼAtua, ko ai ia tatou ʼe mole feala ke gaʼegaʼe peʼe lotovaivai? Kae ʼe fakafoʼou tuʼumaʼu e Sehova te mālohi ʼo tana ʼu kaugana, ʼo ina fakaliliu nātou ko he ʼu ‘akuila’ ʼe mālohi ʼonatou kapakau pea mo nātou lele mamaʼo ʼi te lagi. ʼE tou loto fakafetaʼi ʼi te foaki mai e totatou Tāmai ʼi selo tona “mālohi” ke tou agatonu aipe ʼi totatou minisitelio ʼaē ʼe tou fai ʼi te ʼaho fuli!​—Isaia 40:29-​31.

Koʼeni tona faʼifaʼitaki: Ko Clara ʼe gāue temi katoa ki tana patolo pea ʼe fai faka mafola ia hola e 50 ʼi te māhina fuli. ʼE ina ʼui fēnei: “ ʼE ʼau gaʼegaʼe ʼi ʼihi temi, pea ʼe ʼau ʼalu fakakinau ki te fai faka mafola he kua ʼau fakatuʼutuʼu ke ʼau kaugā gāue mo he tahi. Kae ʼi taku ʼosi kamata te gāue, ʼe tuputupu ai toku mālohi.” Mo koutou foki, neʼe lagi koutou logoʼi te mālohi ʼaē ʼe foaki mai e te ʼAtua ʼi tana lagolago ki te minisitelio faka Kilisitiano. ʼOfa pe ke koutou fai te ʼu palalau ʼaē neʼe fai e Tavite ʼi te kamata ʼo tana pesalemo: “Tapuakiʼi ia Sehova, Ê toku nefesi, pea ko meʼa fuli ʼaē ia te ʼau, ke nātou tapuakiʼi tona huafa maʼoniʼoni.”

Ko Sehova ʼe Ina Faka ʼĀteaina Tana Hahaʼi

ʼE toe hiva fēnei te tagata fai pesalemo: “ ʼE fakahoko e Sehova he ʼu gāue faitotonu pea mo he ʼu tonu fakamāu maʼa nātou fuli ʼaē neʼe kākāʼi nātou. Neʼe ina fakahā tana ʼu ala kia Moisese, pea mo tana ʼu gāue ki te ʼu foha ʼo Iselaele.” (Pesalemo 103:​6, 7) ʼE hā mai, neʼe manatuʼi e Tavite te ‘kākāʼi’ ʼo te kau Iselaelite ʼi tonatou fakamamahiʼi e te kau Esipito ʼi te temi ʼo Moisese. ʼE mahino ia neʼe loto fakafetaʼi ia Tavite, ʼi tana metitasioʼi te fakahā e Sehova kia Moisese tana ʼu fakatuʼutuʼu ʼo ʼuhiga mo te faka ʼāteaina ʼa te kau Iselaelite.

ʼO feiā mo tatou, ʼe feala ke tou loto fakafetaʼi mo kapau ʼe tou fakakaukauʼi te ʼu felogoi ʼa Sehova pea mo te kau Iselaelite. ʼE tonu ke tou metitasioʼi te ʼu fakamatala ʼo te maʼuli ʼo ʼihi kaugana ʼa Sehova ʼo te temi ʼaenī, ohage ko te talanoa ʼi te kapite 29 mo te 30 ʼo te tohi Les Témoins de Jéhovah : Prédicateurs du Royaume de Dieu. Ko te ʼu fakamatala ʼaē ʼe tuʼu ai pea mo te tahi ʼu tohi ʼa te Sosiete Watch Tower, ʼe tokoni mai kia tatou ke tou ʼiloʼi pe neʼe tokoni feafeaʼi ia Sehova ki tana hahaʼi ʼo te temi ʼaenī ke nātou kātakiʼi tonatou pilisoniʼi, tonatou gaohi koviʼi e te ʼu kūtuga agamālohi, mo te tapuʼi ʼo tanatou gāue, mo te ʼu lotoʼā fakamamahi, pea mo te ʼu nofoʼaga ʼaē neʼe gāue fakakinau ai te hahaʼi. Neʼe hoko te ʼu ʼahiʼahi lahi ʼi te ʼu fenua ʼaē ʼe hoko ai te tau, ohage ko Burundi, mo Lipelia, mo Rwanda, pea mo te Iukoselavia ʼāfea. ʼI te temi fuli pe ʼaē neʼe hoko ai te ʼu fakataga, neʼe lagolago tuʼumaʼu ia Sehova ki tana ʼu kaugana agatonu. Kapau ʼe tou metitasioʼi te ʼu gāue ʼaia ʼe fai e totatou ʼAtua lahi ko Sehova, pea ʼe fakaloto mālohiʼi anai tatou, ohage ko te meʼa ʼaē neʼe hoko kia Tavite ʼi tana manatuʼi te fakamatala ʼo te faka ʼāteaina ʼo Iselaele mai Esipito.

Koutou toe fakakaukauʼi foki peʼe faka ʼāteaina feafeaʼi tatou e Sehova mai te agahala. Neʼe ina foaki “te taataa o Kilisito” moʼo “fakamaa ai otatou loto mai te u gaue mate.” (Hepeleo 9:​14) Ka tou fakahemala ʼo ʼuhiga mo tatatou ʼu agahala pea mo tou loto ke fakamolemole ʼaki te taʼataʼa ʼa Kilisito, pea ʼe fakamamaʼo e te ʼAtua tatatou hala mai ia tatou​—“ohage ko te mamaʼo ʼo te potu hahake pea mo te potu hihifo”​—pea ʼe ina toe tali ai tatou. Tahi ʼaē, tou manatuʼi te ʼu fakatuʼutuʼu ʼaē neʼe fai e Sehova ʼo ʼuhiga mo te ʼu fono faka Kilisitiano, mo te ʼofa fakatautehina, mo te ʼu tagata tauhi ōvi ʼi te kokelekasio, pea mo te ʼu tohi faka Tohi-Tapu ʼaē ʼe tou maʼu ʼaki “te kaugana agatonu mo fakapotopoto.” (Mateo 24:​45) Ko te ʼu gāue fuli ʼaia ʼa Sehova, ʼe mole nātou fakamālohiʼi koa la tatatou ʼu felogoi mo ia? ʼE ʼui fēnei e Tavite: “Ko Sehova ʼe agaʼofa pea mo fakamolemole gafua, tuai ʼi te ʼita pea mo mohu ʼi te lotoʼofa. . . . Neʼe mole ina fai he meʼa kia tatou ʼo mulimuli ki ʼatatou ʼu agahala; pea neʼe mole ina fakahoko kia tatou te tautea ʼaē ʼe tau mo tatou ʼo mulimuli ki ʼatatou ʼu hala.” (Pesalemo 103:​8-​14) Kapau ʼe tou metitasioʼi te agaʼofa ʼa Sehova, pea ʼe uga ai anai tatou ke tou faka kolōliaʼi ia ia pea mo tou vikiʼi tona huafa maʼoniʼoni.

“Koutou Tapuakiʼi Ia Sehova, Koutou Fuli ʼAē Ko Tana ʼu Gāue”

Kapau ʼe fakatatau mo te maʼuli tuputupua ʼo Sehova, te “ ʼAtua ʼo te heʼegata,” ko te ʼu “ ʼaho” ʼo te “tagata agahala” ʼe nounou pe​—“ ʼe hage ko te ʼu ʼaho ʼo te luna.” Kae ʼe fakafetaʼi fēnei Tavite: “Ko te lotoʼofa ʼa Sehova ʼe tuʼu mai te ʼu temi heʼegata ʼo aʼu ki he ʼu temi heʼegata kia nātou ʼaē ʼe manavasiʼi kia te ia, pea ko tona faitotonu ki te ʼu foha ʼo te ʼu foha, kia nātou ʼaē ʼe nātou taupau tana fuakava pea mo nātou ʼaē ʼe nātou manatuʼi tana ʼu fakatotonu ke nātou mulimuli kiai.” (Senesi 21:33, kiʼi nota ʼi te lalo pasina; Pesalemo 103:15-​18) ʼE mole galoʼi e Sehova ia nātou ʼaē ʼe manavasiʼi kia te ia. ʼI te temi ʼaē kua ina fakakatofa, ʼe ina foaki anai kia nātou te maʼuli heʼegata.​—Soane 3:​16; 17:3.

ʼI tana fakahā tona loto fakafetaʼi ki te ʼuhiga hau ʼa Sehova, ʼe ʼui fēnei e Tavite: “Ko Sehova totonu kua ina fakatuʼu tona hekaʼaga faka hau ʼi selo; pea ko tona ʼuhiga hau neʼe pule kia meʼa fuli.” (Pesalemo 103:19) Logope la neʼe sio faka temi te hahaʼi ki te ʼuhiga hau ʼa Sehova ʼi te temi ʼaē neʼe fakanofo ai te ʼu hau ʼi Iselaele, kae ko tona hekaʼaga faka hau ʼe tuʼu moʼoni ʼi selo. ʼUhi ko ia ko te Tupuʼaga ʼo meʼa fuli, koia ko Sehova ʼe ko te Tuʼi ʼAliki ʼo te ʼatulaulau, pea ʼe ina fakahoko tona finegalo ʼi selo pea ʼi te kele ʼo fai pe ki tana ʼu fakatuʼutuʼu.

ʼOsi ʼaia, pea ʼe fakaloto mālohiʼi e Tavite te ʼu ʼaselo ʼo te lagi. Neʼe hiva fēnei: “Koutou tapuakiʼi ia Sehova, ia koutou ʼaē ko tana kau ʼaselo, ʼaē ʼe lahi ʼi te mālohi, ʼaē ʼe koutou fakahoko tana folafola, ʼo koutou fakalogo ki te leʼo ʼo tana folafola. Koutou tapuakiʼi ia Sehova, ia koutou fuli ko tana kautau, ia koutou ko tana ʼu minisi ʼaē ʼe koutou fai tona finegalo. Koutou tapuakiʼi ia Sehova, ia koutou fuli ʼaē ko tana ʼu gāue, ʼi te ʼu potu fuli ʼe ina puleʼi. Tapuakiʼi ia Sehova, Ê toku nefesi!” (Pesalemo 103:20-​22) ʼE mole tonu koa la ke tou loto fakafetaʼi mo tatou kia Sehova ki tana ʼu gāue lotoʼofa? ʼE mahino ia! Pea ʼe feala hatatou tui papau, ʼe logo anai te ʼAtua ʼe tou hiva fakavikiviki kia te ia, tatau aipe peʼe fai fakatahi mo te kaugamālie ʼaē ʼe nātou hiva fakavikiviki, ʼo kau ai mo te ʼu ʼaselo agatonu. ʼOfa pe ke tou fakavikiviki ʼaki te loto katoa ki tatatou Tāmai ʼaē ʼi selo, ʼo tou fai he ʼu palalau lelei ʼo ʼuhiga mo ia. Koia, tou manatuʼi te ʼu palalau ʼaenī ʼa Tavite, “Tapuakiʼi ia Sehova, Ê toku nefesi.”

[Nota ʼi te lalo pasina]

[Paki ʼo te pasina 23]

Neʼe metitasioʼi e Tavite te ʼu gāue lotoʼofa ʼa Sehova. Kaeā koutou?