Koutou Falala Ki Te Laumālie ʼo Te ʼAtua ʼi Te ʼu Fetogi ʼo Tokotou Maʼuli

“Faiga fakamalotoloto ke ke tuʼu ia muʼa ʼo te ʼAtua ohage ko he tagata kua fakamoʼoni ki ai.”​—2 Timoteo 2:​15, MN.

1. Koteā te ʼu fetogi ʼaē ʼe feala ke ʼahiʼahiʼi ai totatou ʼaluʼaga fakalaumālie?

KO TE malamanei ʼe fetogi tuʼumaʼu. ʼE tou sio ki te haʼele ki muʼa ʼo te poto fakatagata pea mo te ʼu meʼa gāue, kae ʼe tou toe sio foki ki te mole kei mulimuli ʼa te hahaʼi ki te ʼu aga ʼaē ʼe tonu ke fai. Ohage ko te meʼa ʼaē neʼe tou vakaʼi ʼi te ʼuluaki alatike, ʼe tonu ke tauʼi e te kau Kilisitiano te manatu ʼo te malamanei ʼaē ʼe fakafeagai ki te ʼAtua. Kae ʼi te fetogi ʼo te malamanei, ʼe lahi te ʼu ʼaluʼaga ʼe tou toe fetogi ai mo tatou. Neʼe tou liliki pea kua tou lalahi. Neʼe lagi tou maʼu peʼe puli hotatou koloā, mo tou mahahaki pea mo mate he tahi neʼe tou ʼoʼofa ai. ʼE lahi te ʼu fetogi ʼe mole feala ke tou tāʼofi, pea ʼe feala ke ʼahiʼahiʼi lahi ai totatou ʼaluʼaga fakalaumālie.

2. Koteā te ʼu fetogi neʼe hoko ʼi te maʼuli ʼo Tavite?

² ʼE tokosiʼi te hahaʼi ʼaē neʼe hoko ʼi tonatou maʼuli he ʼu fetogi lahi ohage ko Tavite te foha ʼo Sese. Ko Tavite neʼe ko te tama neʼe tauhi ōvi pea neʼe mole ʼiloa. Pea neʼe liliu ko he tama toʼa neʼe ʼiloa ʼi te fenua katoa. Ki muli age, neʼe hola he neʼe tuli ia ia ohage he manu e te hau maheka. Hili ʼaia, neʼe liliu ia Tavite ko he hau pea mo mālo ʼi te ʼu tau. Neʼe ina kātakiʼi te ʼu fua kovi ʼo tana agahala mamafa. Neʼe maʼuli mamahi ʼuhi ko te ʼu tuʼutāmaki pea mo te mavetevete ʼo tona famili. Neʼe maʼu koloā, mo liliu ʼo matuʼa, pea neʼe hoko kia ia te ʼu ʼaluʼaga ʼo te temi matuʼa. Logola te ʼu fetogi lahi ʼi tona maʼuli, kae neʼe falala tuʼumaʼu pe ia Tavite ʼi tona maʼuli katoa kia Sehova pea mo Tona laumālie. Neʼe faiga ke hā ki te ʼAtua “ohage ko he tagata ʼe leleiʼia,” pea neʼe tapuakina ia ia e te ʼAtua. (2 Timoteo 2:​15, MN ) Logola ʼe kehekehe totatou ʼu ʼaluʼaga mo Tavite, kae ʼe feala ke tou tāʼofi he ako mai te fakatokatoka e Tavite te ʼu ʼaluʼaga ʼo tona maʼuli. Ko tona faʼifaʼitaki ʼe feala ke tokoni mai ke tou mahino peʼe lava feafeaʼi hatatou maʼu tuʼumaʼu te tokoni ʼa te laumālie ʼo te ʼAtua mokā hoko mai he ʼu fetogi ki totatou maʼuli.

Ko Te Agavaivai ʼa Tavite ʼe Ko He Faʼifaʼitaki Lelei

3, 4. Ko te fetogi fea ʼaē neʼe hoko kia Tavite mai tona ʼuhiga tagata tauhi ōvi ʼo liliu ko he tahi ʼe ʼiloa?

³ ʼI tana kei tūpulaga, ko Tavite neʼe mole ko he tahi neʼe maʼuhiga māʼiape la ʼi tona loto fale. ʼI te haʼu ʼa te polofeta ko Samuele ki Petelehemi, neʼe fakahā age e te tāmai ʼa Tavite tona ʼu foha e toko fitu ʼi tona ʼu foha e toko valu. Ko Tavite, te muli, neʼe tuku ke ina leʼoleʼo te ʼu ōvi. Kae neʼe fili e Sehova ia Tavite ke liliu ko te hau ʼo Iselaele. Neʼe pāuiʼi ia Tavite mai te gāueʼaga. Ki muli age, ʼe ʼui fēnei e te Tohi-Tapu: “Neʼe toʼo e Samuele te talaʼi manu ʼaē neʼe ʼuʼutu ʼaki te lolo, pea neʼe ina liligi kia Tavite ʼi te lotolotoiga ʼo tona ʼu tēhina. Pea ko te laumālie ʼo Sehova neʼe kamata gāue aipe kia Tavite ʼi te ʼaho ʼaia.” (1 Samuele 16:12, 13) Neʼe falala ia Tavite ki te laumālie ʼaia ʼi tona maʼuli katoa.

⁴ Mole tuai, pea neʼe liliu te tama tauhi ōvi ʼaia ko he tahi ʼe ʼiloa ʼi tona fenua. Neʼe pāuiʼi ia ia ke tauhi ki te hau pea ke fai mahōlō maʼa ia. Neʼe ina matehi te tagata solia ko Koliate. Neʼe ko te tagata lahi pea neʼe matataku te kau tagata solia ʼo Iselaele ia ia ʼuhi ko tana agamālohi. ʼI te hinoʼi ʼaē ke ina takitaki te kau solia ki te tau, neʼe mālo ia Tavite ʼi te kau Filisitini. Neʼe ʼoʼofa te hahaʼi ia ia. Neʼe nātou fai te ʼu hiva fakavikiviki kia ia. Ki muʼa atu, ko te tagata fai tokoni ʼa te Hau ko Saulo, neʼe ina ʼui ʼo ʼuhiga mo Tavite neʼe ko he tahi neʼe “faiva ʼi te mahōlō” ʼaki te alepa, pea neʼe ina toe ʼui ʼe ko he tahi ʼe “lototoʼa, ko he tagata mālohi pea mo he tagata tau, ʼe poto palalau, pea ko he tagata tūpulaga.”​—1 Samuele 16:18; 17:23, 24, 45-​51; 18:​5-7.

5. Koteā ʼaē neʼe feala ke liliu ai ia Tavite ʼo fialahi, pea ʼe tou ʼiloʼi feafeaʼi neʼe mole feiā?

⁵ Neʼe hage neʼe maʼu e Tavite te ʼu meʼa fuli ʼaē ʼe holi kiai he tahi: te ʼiloa, te lahi, te tūpulaga, te poto ʼi te fai mahōlō, te poto ʼi te tau, pea mo te ʼofa ʼo te ʼAtua. ʼAki te ʼu agaaga fuli ʼaia neʼe feala pe ke liliu ia Tavite ʼo fialahi, kae neʼe mole feiā ia. Koutou tokagaʼi te tali ʼa Tavite ki te Hau ko Saulo, ʼaē neʼe ina foaki tona ʼofafine ke ʼohoanaʼi e Tavite. ʼAki te agavaivai moʼoni, neʼe ʼui fēnei e Tavite: “Ko ai koa ia ʼau pea mo toku famili, te famili ʼo taku tāmai ʼi Iselaele, ke ʼau liliu ai ko te foha ʼo te hau?” (1 Samuele 18:18) ʼO ʼuhiga mo te vaega ʼaia, neʼe tohi fēnei e te tagata poto: “Neʼe fia ʼui e Tavite neʼe mole tupu ko tona poto, peʼe ko tona tuʼulaga, peʼe ko tona haʼuʼaga, ʼaē neʼe feala ai ke fialahi pea mo liliu ko he foha ʼo te hau.”

6. He koʼe ʼe tonu ke tou maʼu te agavaivai?

⁶ Neʼe agavaivai ia Tavite he neʼe ina ʼiloʼi ko Sehova ʼe māʼoluga age ʼi te tagata ʼi te ʼu faʼahi fuli. Neʼe ōfo ia Tavite ʼi te tokagaʼi e te ʼAtua ia te tagata. (Pesalemo 144:3) Neʼe toe ʼiloʼi e Tavite neʼe feala ke liliu ʼo lahi ʼuhi pe he neʼe fakahā e Sehova kia ia tana agavaivai, mo tana fia tokoni ʼaē kia ia, pea mo tokaga kia ia. (Pesalemo 18:35) ʼE ko he ako lelei ʼaia maʼa tatou! Ko totatou poto, te ʼu meʼa ʼaē ʼe tou fakahoko, pea mo totatou ʼu pilivilesio ʼe mole tonu ke tupu ai hatatou fialahi. Neʼe tohi fēnei e te ʼapositolo ko Paulo: “Ei, koteā te meʼa neʼe ke maʼu neʼe mole foaki atu? Pea kapau la neʼe foaki atu, he koʼe koa ʼe ke laupisi ohage neʼe mole foaki atu?” (1 Kolonito 4:7, MN ) Ke feala hatatou maʼu te laumālie ʼo te ʼAtua pea mo ina tapuakina ia tatou, ʼe tonu ke tou maʼu pea mo taupau te agavaivai.​—Sakopo 4:6.

“ ʼAua Naʼa Koutou Lagavaka”

7. Koteā te faigamālie neʼe maʼu e Tavite ke ina matehi ai ia te Hau ko Saulo?

⁷ Neʼe mole liliu ia Tavite ʼo fialahi logola tona ʼiloa, kae ko te Hau ko Saulo neʼe maheka ʼaupito, pea neʼe mole kei ina maʼu te laumālie ʼo te ʼAtua. Logola neʼe mole fai e Tavite he meʼa ʼe kovi, kae neʼe hola moʼo hāofaki tona maʼuli pea neʼe ʼalu ʼo nofo ʼi te toafa. ʼI te tahi lakaga, ʼi te hoko atu ʼo te tuli ʼo Tavite, neʼe hū te Hau ko Saulo ki te ʼana. Kae neʼe mole ina ʼiloʼi ko Tavite pea mo tona ʼu kaumeʼa neʼe nātou fenonoʼi ʼi loto. Ko te ʼu tagata ʼa Tavite neʼe nātou uga ia ia ke ina matehi ia Saulo, he neʼe lagi ko he faigamālie ʼaia neʼe tuku age e te ʼAtua. ʼE feala ke tou fakakaukauʼi tanatou nonofo ʼi te loto ʼana ʼi te fakapōʼuli, ʼo fanafana fēnei kia Tavite: “Ko te ʼaho ʼaenī ʼaē ʼe ʼui moʼoni atu e Sehova: ‘Koʼeni! ʼE ʼau foaki atu tou fili ki ʼou nima, pea ʼe tonu ke ke fai kia ia te meʼa ʼaē ʼe ke loto kiai.’ ”​—1 Samuele 24:​2-6.

8. He koʼe neʼe mole lagavaka ia Tavite?

⁸ Neʼe mole fia fai e Tavite he meʼa ʼe kovi kia Saulo. ʼAki tana tui pea mo tana faʼa kātaki, neʼe ina tuku ia meʼa fuli ki te ʼu nima ʼo Sehova. ʼI te ʼosi mavae ʼa te hau ʼi te ʼana, neʼe pāui ia Tavite kia ia pea mo ina ʼui fēnei: “Ke fakamāu e Sehova ia koe pea mo ʼau; ʼe tonu anai ke fakahoko e Sehova he lagavaka maʼaku ʼo ʼuhiga mo koe, kae ʼe mole fāfā anai toku nima kia koe.” (1 Samuele 24:12) Logola tana ʼiloʼi ʼaē neʼe faihala ia Saulo, kae neʼe mole lagavaka ia Tavite kia Saulo, peʼe palalau kovi peʼe fasituʼu kia ia. ʼE lahi te ʼu lakaga neʼe mole matehi ai e Tavite ia Saulo. Neʼe falala kia Sehova ʼe ina fakatokatoka anai te ʼu meʼa ʼaē neʼe hoko.​—1 Samuele 25:32-​34; 26:10, 11.

9. He koʼe ʼe mole tonu ke tou liufaki te kovi mokā fai mai he ʼu fakafeagai kia tatou peʼe fakatagaʼi tatou?

⁹ Ohage ko Tavite, ʼe lagi koutou tau mo he ʼu ʼaluʼaga faigataʼa. Lagi fakafeagai peʼe fakatagaʼi koutou e tokotou ʼu kaugā ako, peʼe ko te ʼu kaugā gāue, peʼe ko te famili peʼe ko ʼihi ʼe mole koutou lotu tahi. ʼAua naʼa koutou tali ʼaki te kovi. Koutou atalitali kia Sehova, ʼo koutou kole tona laumālie maʼoniʼoni ke tokoni atu. ʼAki takotou agalelei, ʼe lagi punamaʼuli anai te hahaʼi heʼe tui ʼaia, pea mo nātou liliu anai ko he hahaʼi ʼe tauhi kia Sehova. (1 Petelo 3:1) Tatau aipe peʼe koteā ʼaē ʼe hoko, kae ke koutou ʼiloʼi papau ko Sehova ʼe sio ki tokotou ʼaluʼaga pea ʼe ina fai anai he meʼa ʼi tona temi totonu. Neʼe tohi fēnei e te ʼapositolo ko Paulo: “ ʼAua naʼa koutou lagavaka, kau ʼofaina, kae koutou tuku ke fakalaka te ʼita; koteʼuhi neʼe tohi fēnei: ‘ ʼE ʼaʼaku te lagavaka; ʼe ʼau liufaki anai, ko te ʼui ʼaia ʼa Sehova.’ ”​—Loma 12:19, MN.

“Koutou Fakalogo Ki Te Akonaki”

10. Neʼe tō feafeaʼi ia Tavite ki te agahala, pea koteā ʼaē neʼe ina fai ʼi tana faiga ʼaē ke ina fufū te agahala ʼaia?

¹⁰ ʼAki te temi, neʼe liliu ia Tavite ko he hau ʼofainaʼi pea mo ʼiloa ʼaupito. ʼAki tana agatonu ʼi tona maʼuli, pea mo tana tohi te ʼu pesalemo matalelei moʼo fakavikiviki kia Sehova, ʼe feala ke tou manatu ko te tagata ʼaia neʼe mole ina fai he agahala mamafa. Kae neʼe hoko kia ia te faʼahi ʼaia. ʼI te tahi ʼaho, neʼe sio te hau ʼaia mai tona fakaheketālaʼa, ki te maʼanu ʼa te fafine finemui. Neʼe ina fia ʼiloʼi peʼe ko ai. ʼI tana ʼiloʼi ʼaē ko te fafine ʼaia ko Pati-Sepa pea ko tona ʼohoana ko Ulia neʼe kau ʼi te tau, neʼe ina ʼaumai te fafine pea neʼe ina fai te ʼu felāveʼi fakasino mo ia. Ki muli age, neʼe faitama te fafine. ʼE mahino ia ʼe hoko anai he toe ufiufi lahi mo kapau ʼe ʼiloʼi te faʼahi ʼaia! ʼI te Lao ʼa Moisese, neʼe matehi ia ia ʼaē neʼe ina fai te agahala ʼaē ko te tono. Neʼe manatu e te hau ʼe feala ke ina fufū te agahala ʼaia. Koia neʼe faitohi ai ki te kautau, ʼo ina fakatotonu ke fakaliliu mai ia Ulia ki Selusalemi. Neʼe ʼamanaki e Tavite ʼe momoe anai ia Ulia mo Pati-Sepa, kae neʼe mole hoko te faʼahi ʼaia. ʼI tana mole kei ʼiloʼi he meʼa ke ina fai, neʼe toe fekauʼi e Tavite ia Ulia ki te tau, pea mo faitohi kia Soape, te kamutoa ʼo te kau solia, ke ina ʼai ia Ulia ʼi he faʼahi ʼaē ʼe feala ke mate ai ʼi te tau. Neʼe fakalogo ia Soape kiai, pea neʼe matehi ia Ulia. ʼI te ʼosi ʼo te temi putu ʼa Pati-Sepa, neʼe ʼohoana ia Tavite pea mo ia.​—2 Samuele 11:​1-​27.

11. Koteā te fakamatala ʼaē neʼe fai e Natane kia Tavite, pea neʼe feafeaʼi ia Tavite?

¹¹ Neʼe hage neʼe hoko te fakatuʼutuʼu ʼaē neʼe loto kiai ia Tavite, logola tana ʼiloʼi ʼaē neʼe mole he meʼa neʼe ū kia Sehova. (Hepeleo 4:​13) Hili te ʼu māhina pea neʼe tupu te tamasiʼi. Pea ʼaki te takitaki ʼa te ʼAtua, neʼe haʼu te polofeta ko Natane kia Tavite. Neʼe fakamatala e te polofeta ki te hau te hisitolia ʼo te tagata maʼu koloā pea mo tana ʼu tuʼuga ōvi, kae neʼe ina toʼo pea mo matehi te kiʼi ōvi pe e tahi pea mo ʼofainaʼi ʼa te tagata masiva. ʼI tana logoʼi te hisitolia ʼaia, neʼe mahino kia Tavite te heʼe faitotonu ʼa te tagata ʼaia, kae neʼe mole ina ʼiloʼi ʼe ʼi ai tona faka ʼuhiga. Neʼe tauteaʼi atu aipe e Tavite te tagata maʼu koloā. ʼI tana ʼita lahi, neʼe ina ʼui fēnei kia Natane: “Ko te tagata ʼaē neʼe ina fai te meʼa ʼaia ʼe tonu ke matehi!”​—2 Samuele 12:​1-6.

12. Koteā te fakamāu neʼe fai e Sehova kia Tavite?

¹² Neʼe tali fēnei e te polofeta: “Ko koe te tagata ʼaia!” Neʼe faka lākahalaʼi pe e Tavite ia ia totonu. ʼE mahino papau ia, ko te ʼita ʼa Tavite neʼe liliu ko he toe ufiufi lahi pea mo he lotomamahi lahi. Neʼe punamaʼuli ai Tavite, pea neʼe fakalogo ki te fakahā age e Natane te fakamāu ʼa Sehova. Neʼe mole ina fai age he ʼu palalau moʼo fakafimālieʼi ia ia, koteʼuhi neʼe meʼa noaʼi e Tavite te folafola ʼa Sehova ʼi tana fai te meʼa ʼaē ʼe kovi. Neʼe ina matehi ia Ulia ʼaki te heletā ʼa te fili. ʼE mole mamaʼo anai te heletā mai te loto fale ʼo Tavite. Neʼe ina fai fakafūfū he ʼu felāveʼi fakasino mo te ʼohoana ʼo Ulia. ʼE toe hoko pe anai te agakovi ʼaia kia ia, ʼe mole fai fakafūfū anai kae ʼe ʼiloʼi anai e te hahaʼi fuli.​—2 Samuele 12:​7-​12.

13. Neʼe feafeaʼi te aga ʼa Tavite ʼi tona fakatonutonuʼi e Sehova?

¹³ Neʼe fakamoʼoni ia Tavite ki tana agahala. Neʼe mole ʼita ki te polofeta ko Natane. Neʼe mole ina tukugakoviʼi ʼihi peʼe ina kumi ke ina faka lākatonuʼi te meʼa ʼaē neʼe ina fai. ʼI te fakahā age ʼo tana ʼu agahala, neʼe fakamoʼoni kiai ia Tavite, ʼo ina ʼui fēnei: “Kua ʼau agahala kia Sehova.” (2 Samuele 12:13) ʼE fakahā ʼi te Pesalemo 51 tana lotohoha ʼi tana agahala pea mo tana fakahemala fakamalotoloto. Neʼe ina kole mamahi fēnei kia Sehova: “ ʼAua naʼa ke līaki ʼau ʼi ʼou muʼa; pea ʼaua naʼa ke toʼo ia te ʼau tou laumālie maʼoniʼoni.” Neʼe ina faka tui ko Sehova, ʼi tona loto manavaʼofa, ʼe mole fehiʼa anai ki “he loto lavea” neʼe agahala. (Pesalemo 51:11, 17) Neʼe haga falala pe ia Tavite ki te laumālie ʼo te ʼAtua. Logola neʼe mole puipui e Sehova ia Tavite mai te ʼu fua kovi ʼo tana agahala, kae neʼe ina fakamolemole kia ia.

14. ʼE tonu ke tou tali feafeaʼi mokā fakatonutonuʼi tatou e Sehova?

¹⁴ Ko tatou fuli ʼe tou agahala. (Loma 3:​23) ʼI ʼihi temi ʼe feala ke tou fai he agahala mamafa, ohage ko Tavite. Ohage ko te fakatonutonuʼi e he tāmai ʼofa tana fānau, ko Sehova ʼe ina fakatonutonuʼi te hahaʼi ʼaē ʼe nātou fia tauhi kia te ia. Logola ʼe ʼaoga te fakatonutonuʼi, kae ʼe mole faigafua tona tali. ʼI tona fakahagatonu, ʼi ʼihi temi ʼe “fakaloto mamahi.” (Hepeleo 12:​6, 11) Kae kapau ʼe tou “fakalogo ki te fakatonutonuʼi,” ʼe feala ke tou fakatokatoka tatatou tokakovi mo Sehova. (Tāʼaga lea 8:​33) Kapau ʼe tou loto ke tapuakina tuʼumaʼu tatou e Sehova ʼaki tona laumālie, ʼe tonu ke tou tali mokā fakatonutonuʼi tatou pea ke tou gāue ke tali tatou e te ʼAtua.

ʼAua Naʼa Tou Falala Ki He ʼu Koloā ʼe Fakalākilua

15. (a) ʼE fakaʼaogaʼi feafeaʼi e ʼihi tonatou ʼu koloā? (b) Koteā ʼaē neʼe fia fai e Tavite ʼaki tona ʼu koloā?

¹⁵ ʼE mole fakahā mai pe neʼe maʼu tuʼulaga ia Tavite peʼe maʼu koloā tona famili. Kae lolotoga tona temi hau, neʼe lahi ʼaupito te ʼu koloā ʼaē neʼe maʼu e Tavite. ʼE koutou ʼiloʼi ko te tokolahi ʼe nātou tānaki tanatou ʼu koloā, heʼe nātou kumi ke nātou fakatuputupu, peʼe nātou fakaʼaogaʼi maʼa nātou. Ko ʼihi ʼe nātou fakaʼaogaʼi tanatou paʼaga moʼo faka kolōliaʼi ʼo nātou. (Mateo 6:2) Neʼe fakaʼaogaʼi e Tavite tona ʼu koloā ki te tahi faʼahi. Neʼe ina fia faka kolōliaʼi ia Sehova. Neʼe fakahā e Tavite kia Natane ʼe ina fia laga he fale lotu maʼa Sehova, ke ʼai kiai te aleka ʼo te fuakava, ʼaē neʼe tuku ʼi Selusalemi “ ʼi te lotolotoiga ʼo te ʼu falelā.” Neʼe fiafia ia Sehova ʼi te ʼu meʼa ʼaē neʼe fia fai e Tavite. Kae ʼaki ia Natane, neʼe ina ʼui age ʼe ko Salomone, tona foha ʼaē ka ina laga anai te fale lotu.​—2 Samuele 7:​1, 2, 12, 13.

16. Koteā ʼaē neʼe teuteuʼi e Tavite ki te laga ʼo te fale lotu?

¹⁶ Neʼe tānaki e Tavite te ʼu meʼa gāue moʼo fakaʼaogaʼi ki te toe gāue lahi ʼaia. Neʼe ʼui fēnei e Tavite kia Salomone: “Neʼe ʼau teuteuʼi maʼa te fale ʼo Sehova te teau afe taleta aulo pea mo te miliona taleta siliva, pea ko te kapa pea mo te ukamea ʼe mole feala ke fua, heʼe lahi ʼaupito; neʼe ʼau teuteuʼi te ʼu papa pea mo te ʼu maka, kae ʼe ke toe hilifaki anai kiai.” ʼAki tona ʼu koloā, neʼe ina foaki taleta aulo e 3 000 pea mo taleta siliva e 7 000.a (1 Fakamatala 22:14; 29:​3, 4) Ko te loto fia foaki ʼaia ʼo Tavite, neʼe mole ko hana fakahāhā koloā, kae neʼe ko he fakahā ʼaia ʼo tana tui pea mo tana tauhi fakamalotoloto kia Sehova ʼAtua. ʼI tana ʼiloʼi te Matapuna ʼo tona ʼu koloā, neʼe ina ʼui fēnei kia Sehova: “Ko meʼa fuli ʼe haʼu mai ia te koe, pea ʼe haʼu mai tou nima totonu te meʼa ʼaē ʼe mātou foaki atu kia te koe.” (1 Fakamatala 29:14) Ko te loto fia foaki ʼa Tavite neʼe ina uga ia ia ke ina fai ia meʼa fuli moʼo lagolago ki te tauhi maʼa.

17. ʼE lava feafeaʼi kia ia ʼaē ʼe maʼu koloā pea mo ia ʼaē ʼe masiva, ke nā maʼuliʼi te tokoni ʼa 1 Timoteo 6:​17-​19?

¹⁷ ʼO toe feiā pe, ʼe feala ke tou fakaʼaogaʼi totatou ʼu koloā moʼo fai te meʼa ʼaē ʼe lelei. ʼE mole tou faiga ʼi totatou maʼuli ke tou maʼu koloā, kae ʼe tou faiga ke tou maʼu te ʼofa ʼo te ʼAtua, pea ʼe tou maʼu ai te poto pea mo te fiafia moʼoni. Neʼe tohi fēnei e Paulo: “Fakatotonu kia nātou ʼaē ʼe maʼu meʼa ʼi te tuʼu ʼo te ʼu faʼahiga meʼa ʼaenī, ke ʼaua naʼa nātou fia hā, ke ʼaua naʼa nātou fakatafito tanatou falala ki he ʼu koloā ʼe fakalākilua, kae [ke nātou falala] ki te ʼAtua ʼaē ʼe ina foaki lahi mai kia tatou ia meʼa fuli pe ke tou fiafia ai; ke nātou gāue ki te meʼa ʼaē ʼe lelei, ke nātou maʼu meʼa ʼi he ʼu gāue matalelei, ke nātou agaʼofa, ke nātou loto fia vaevae, ʼo nātou tānaki pea mo hāofaki maʼa nātou, he fakatafito taulekaleka ki te temi ka haʼu, koteʼuhi ke nātou puke maʼu te maʼuli moʼoni.” (1 Timoteo 6:​17-​19, MN ) Tatau aipe peʼe koteā totatou ʼaluʼaga faka ekonomika, kae ʼe tonu ke tou falala ki te laumālie ʼo te ʼAtua pea mo tou haga kumi ke tou “maʼu koloā ki te ʼAtua.” (Luka 12:21, MN ) Ko te meʼa ʼaē ʼe maʼuhiga tāfito, ko te ʼofainaʼi ʼo tatou e tatatou Tāmai ʼofa ʼaē ʼe ʼi selo.

Koutou Tutuʼu Ia Muʼa ʼo Te ʼAtua Ohage Ko He Tahi ʼe Fakamoʼoni Ki Ai

18. Koteā te faʼifaʼitaki lelei neʼe tuku e Tavite ki te kau Kilisitiano?

¹⁸ ʼI tona maʼuli katoa, neʼe faigaʼi e Tavite ke leleiʼia ia ia e Sehova. ʼI tana hiva, neʼe tagi fēnei: “Fakahā mai he lotoʼofa, Ê ʼAtua, fakahā mai he lotoʼofa, heʼe ʼau loto ke ke hāofaki toku maʼuli.” (Pesalemo 57:1) Neʼe mole vaʼiganoa tana falala ʼaē kia Sehova. Neʼe liliu ia Tavite ʼo matuʼa, pea mo “fiafia ʼi tona ʼu ʼaho.” (1 Fakamatala 23:1) Logola neʼe fai e Tavite te ʼu agahala mamafa, kae ʼe tou manatuʼi ʼe ko he tagata ʼe kau ʼi te ʼu fakamoʼoni e tokolahi ʼa te ʼAtua ʼaē neʼe nātou fakahā te tui lahi.​—Hepeleo 11:32.

19. ʼE lava feafeaʼi hatatou hā ki te ʼAtua ko he ʼu hahaʼi ʼe ina leleiʼia?

¹⁹ Kapau ʼe hoko he ʼu fetogi ʼi tokotou maʼuli, pea koutou manatuʼi ko Sehova neʼe tokoni, mo ina fakaloto mālohiʼi pea mo fakatonutonuʼi ia Tavite. ʼE feala ke Ina toe fai feiā kia koutou. Ohage ko Tavite, neʼe hoko te ʼu tuʼuga fetogi ʼi te maʼuli ʼo te ʼapositolo ko Paulo. Kae neʼe toe nofo agatonu mo ia ʼo falala ki te laumālie ʼo te ʼAtua. Neʼe ina tohi fēnei: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.” (Filipe 4:​12, 13, MN ) Kapau ʼe tou falala kia Sehova, pea ʼe tokoni mai anai ke tou mālo. ʼE ina loto ke tou mālo. Kapau ʼe tou fakalogo kia te ia pea mo fakaōvi kia te ia, pea ʼe ina foaki mai anai te mālohi ke tou fai tona finegalo. Pea kapau ʼe tou haga falala ki te laumālie ʼo te ʼAtua, pea ʼe feala anai ke ‘tou tutuʼu ia muʼa ʼo te ʼAtua ohage ko he ʼu hahaʼi kua ina fakamoʼoni kia nātou’ ʼi te temi nei pea mo talu ai.​—2 Timoteo 2:​15.

[Kiʼi nota]

ʼE Koutou Tali Feafeaʼi Anai?

• Koteā ʼaē ʼe feala ke tou fai ke mole tou fialahi?

• He koʼe ʼe mole tonu ke tou lagavaka?

• Koteā te manatu ʼe tonu ke tou maʼu ʼo ʼuhiga mo te fakatonutonuʼi?

• He koʼe ʼe tonu ke tou falala ki te ʼAtua kae mole tou falala ki te ʼu koloā?

[Paki ʼo te pasina 16]

Neʼe falala ia Tavite ki te laumālie ʼo te ʼAtua pea neʼe ina faigaʼi ke ina tali lelei ia ia. ʼE koutou fai feiā koa?

[Paki ʼo te pasina 18]

“Ko meʼa fuli ʼe haʼu mai ia te koe, pea ʼe haʼu mai tou nima totonu te meʼa ʼaē ʼe mātou foaki atu kia te koe”