Te ʼu Fehuʼi ʼa Te Kau Lautohi

Koteā te manatu ʼa te kau Fakamoʼoni ʼa Sehova ʼo ʼuhiga mo te vote?

ʼE fakahā mai e te Tohi-Tapu te ʼu pelesepeto ʼe mahino lelei, pea ʼe feala ke maʼu ai e te ʼu kaugana ʼa te ʼAtua he manatu fakapotopoto ʼo ʼuhiga mo te faʼahi ʼaia. Kae ʼe mole maʼu ai he pelesepeto ʼe ina tapuʼi te vote. Ohage la, ʼe feala ke fai e he ʼu patolo he vote, ke nātou fai he ʼu tonu maʼuhiga ʼo ʼuhiga mo tanatou gāue. ʼI te ʼu kokelekasio ʼa te kau Fakamoʼoni ʼa Sehova, ʼe tau fai he ʼu vote moʼo fakatuʼutuʼu te ʼu hola ʼo te ʼu fono pea mo te fakaʼaogaʼi ʼo te falā, pea ʼe kole ai kia nātou ʼo te fono ke nātou hiki ʼonatou nima ʼo ʼuhiga mo te ʼu faʼahi ʼaia.

Kae e feafeaʼi ʼo ʼuhiga mo he vote faka politike? ʼE moʼoni, ʼi ʼihi fenua faka temokalatike, ko te teitei vaelua ʼo te hahaʼi ʼe mole nātou ʼolo ʼo vote mokā kole age kia nātou te faʼahi ʼaia. Ko te kau Fakamoʼoni ʼa Sehova, ʼe mole nātou tāʼofi ʼihi ke nātou vote; pea ʼe mole nātou fai he ʼu fakatuʼutuʼu moʼo fakafeagai ki he vote. ʼE nātou fakaʼapaʼapa pea mo fakalogo ki te hahaʼi takitaki ʼaē ʼe fakanofo ʼaki te ʼu vote ʼaia. (Loma 13:​1-7) Kapau ʼe nātou fia vote ki he tahi ʼi te ʼu vote ʼaia ʼe fai, pea ʼe tahi vakaʼi anai e te kau Fakamoʼoni ʼa Sehova te faʼahi ʼaia ʼo mulimuli ki tonatou leʼo ʼo loto ʼaē neʼe akoʼi e te Tohi-Tapu, pea mo tanatou mahino ki tonatou ʼu maʼua ki te ʼAtua pea mo te Puleʼaga. (Mateo 22:21; 1 Petelo 3:​16) Moʼo fai te tonu ʼaia, ʼe ʼi ai te ʼu faʼahi ʼe tonu ke vakaʼi e he Fakamoʼoni ʼa Sehova.

ʼUluaki, neʼe ʼui e Sesu Kilisito ki tana kau tisipulo: “ ʼE mole nātou kau ʼi te malamanei, ohage pe ko ʼau ʼe mole ʼau kau ʼi te malamanei.” (Soane 17:​14, MN) ʼE maʼuhiga te pelesepeto ʼaia ki te kau Fakamoʼoni ʼa Sehova. Mai tona ʼuhiga ʼaē “ ʼe mole nātou kau ʼi te malamanei,” koia ʼe mole nātou kau ʼi te ʼu meʼa faka politike ʼo te malamanei.​—Soane 18:36.

Lua, neʼe ʼui e te ʼapositolo ko Paulo ʼo ʼuhiga mo ia, ʼe ko he tagata “fakafofoga” ʼo Kilisito maʼa te hahaʼi ʼo tona temi. (Efeso 6:​20; 2 Kolonito 5:​20) ʼE faka tui e te kau Fakamoʼoni ʼa Sehova, ko Kilisito Sesu kua fakanofo Hau ʼi te Puleʼaga ʼo selo ʼa te ʼAtua, pea ʼe tonu ke nātou kalagaʼi te faʼahi ʼaia ki te ʼu puleʼaga, ohage ko tona fai e te hahaʼi fakafofoga. (Mateo 24⁠:14; Apokalipesi 11:15) ʼE fakamaʼua ki te hahaʼi fakafofoga ke ʼaua naʼa nātou kau ʼi te ʼu meʼa faka politike ʼo te fenua ʼaē ʼe fekauʼi nātou kiai. ʼI tonatou ʼuhiga hahaʼi fakafofoga ʼo te Puleʼaga ʼo selo ʼa te ʼAtua, ʼe toe fakamaʼua foki ki te kau Fakamoʼoni ʼa Sehova ke ʼaua naʼa nātou kau ʼi te ʼu meʼa faka politike ʼo te fenua ʼaē ʼe nātou nonofo ai.

Ko te tolu puani ʼaē ʼe feala ke tou vakaʼi, ko nātou ʼaē ʼe nātou vote ke fakanofo he tahi, ʼe feala ke tukugakoviʼi mo nātou ʼo ʼuhiga mo te ʼu meʼa kovi ʼaē ka ina fai. (Vakaʼi ia 1 Timoteo 5:​22) ʼE tonu ke fakakaukauʼi fakalelei e te kau Kilisitiano peʼe nātou fia lagolago feiā ki he tahi.

Fā puani, ʼe maʼuhiga ki te kau Fakamoʼoni ʼa Sehova tanatou logo tahi. (Kolose 3:​14) Ka kau te ʼu lotu ki te ʼu meʼa faka politike, pea ʼe tau fakatupu maveuveu ki tanatou hahaʼi. ʼI tanatou faʼifaʼitaki kia Sesu Kilisito, ʼe mole kau te kau Fakamoʼoni ʼa Sehova ki te ʼu meʼa faka politike, pea ʼe nātou taupau ai tanatou logo tahi.​—Mateo 12:25; Soane 6:​15; 18:36, 37.

Ko te puani fakaʼosi, ʼi te mole kau ʼa te kau Fakamoʼoni ʼa Sehova ki te ʼu meʼa faka politike, ʼe feala hanatou palalau faʼifaʼitaliha mo te hahaʼi ʼo te ʼu faʼahi faka politike fuli ʼo ʼuhiga mo te logo maʼuhiga ʼo te Puleʼaga.​—Hepeleo 10:35.

ʼI tanatou vakaʼi te ʼu pelesepeto faka Tohi-Tapu ʼaē ʼi ʼoluga, ʼe lahi te ʼu fenua ʼaē neʼe fakatotonu ai e te kau Fakamoʼoni ʼa Sehova ke ʼaua naʼa nātou kau ki te ʼu vote faka politike, pea ʼe fakagafua e te lao ʼo tonatou fenua ke nātou fai te faʼahi ʼaia. Kae e feafeaʼi mo kapau ʼe fakamaʼua mai e te lao ke vote te hahaʼi fuli? ʼI te taʼi ʼaluʼaga ʼaia, ʼe tonu ki te kau Fakamoʼoni ʼa Sehova takitokotahi ke nātou fai he tonu ʼo mulimuli ki te Tohi-Tapu, ke feala hanatou maʼu he puleʼaki ki te ʼaluʼaga ʼaia. Kapau ʼe kita fakatotonu ke kita ʼalu ki te fale vote, pea ʼe ko te tonu ʼaia ʼa kita totonu. Ko te meʼa ʼaē ka kita fai ʼi te kiʼi kogafale vote, ʼe ʼiloʼi pe anai e kita pea mo Sehova. Ko ʼihi neʼe nātou ʼai ki tonatou sila he kiʼi pepa hina. Ko ʼihi neʼe nātou tohi he meʼa ki te pepa moʼo fakahā tanatou manatu. Tatau aipe pe koteā te meʼa ʼaē ʼe nātou fai, kae ʼe mahino ki te kau Kilisitiano agatonu, ʼe maʼuhiga ʼaupito ke ʼaua naʼa nātou maumauʼi tanatou agatonu faka Kilisitiano pea mo tonatou leʼo ʼo loto ʼaē neʼe akoʼi e te Tohi-Tapu.

Ko Te Tule Leʼo Fakapilitānia ʼo te ʼaho 15 ʼo Novepeli 1950, ʼi te pasina 445 mo te 446, neʼe ina ʼui fēnei: “ ʼI te ʼu fenua ʼaē ʼe fakamaʼua ai e Sesale ke vote te hahaʼi . . . ʼe feala [ki te kau Fakamoʼoni ʼa Sehova] ke nātou ʼolo ki te ʼu fale vote pea mo hū kiai. ʼE ko te potu ʼaia ʼaē ka fakamaʼua ai kia nātou ke nātou ʼai he pepa ki te sila peʼe nātou tohi ai te meʼa ʼaē ʼe nātou loto kiai. Ko nātou ʼaē ka nātou vote, ʼe nātou faʼitaliha anai ki te fakaʼaogaʼi ʼo te sila. ʼI te sioʼi ʼo nātou e te ʼAtua, ʼe ko te lakaga ʼaia ʼaē ka tonu ai ke fai e te kau Fakamoʼoni he tonu ʼo mulimuli ki te ʼu fakatotonu ʼa te ʼAtua pea mo tanatou tui. ʼE mole ʼa tatou te fakatotonu age pe koteā ʼaē ʼe tonu ke nātou fai mo tanatou sila.”

E feafeaʼi ki he fafine Kilisitiano ʼe fakamaʼua age e tona ʼohoana ʼaē ʼe mole tui, ke ʼalu ʼo vote? ʼE tonu ke fakalogo ki tona ʼohoana, ohage pe ko te fakalogo ʼa te kau Kilisitiano ki te ʼu puleʼaga. (Efeso 5:​22; 1 Petelo 2:​13-​17) Kapau ʼe fakalogo ki tona ʼohoana ʼo ʼalu ki te fale vote, pea ʼe ʼa ia pe tona vakaʼi. ʼE mole he tahi ʼe tonu ke ina valokiʼi te meʼa ʼaē ʼe ina fai.​—Vakaʼi ia Loma 14:4.

E feafeaʼi ki te ʼu fenua ʼaē ʼe mole fakamaʼua ai e te lao ke vote te hahaʼi, kae ʼe fehiʼaʼinaʼi ia nātou ʼaē ʼe mole nātou fai te faʼahi ʼaia​—ʼo lagi feala ke gaohi koviʼi nātou e te hahaʼi? Peʼe feafeaʼi kia nātou ʼaē, logope la ʼe mole fakamaʼua age ke nātou vote, kae ʼe feala ke fai kia nātou he ʼu fakatūʼa mamafa mo kapau ʼe mole nātou ʼolo ki te fale vote? ʼI te ʼu ʼaluʼaga ʼaia, ʼe ʼa te Kilisitiano takitokotahi te vakaʼi ʼo tana tonu ki te faʼahi ʼaia. “E tahi fua’pe anai e te tagata tana kavega totonu.”​—Kalate 6:5.

ʼE lagi punamaʼuli te hahaʼi ʼi tanatou sio ʼaē ki ʼihi Fakamoʼoni ʼa Sehova ʼi tonatou fenua ʼe nātou ʼolo ki te fale vote, kae mole ʼolo ʼihi. ʼE lagi nātou ʼui anai, ‘ ʼE mole tatau fuli te kau Fakamoʼoni ʼa Sehova.’ Kae ʼe tonu ke mahino ki te hahaʼi ʼaia, ko te tonu ʼaia ʼe kita fai ʼaki tokita leʼo ʼo loto, koia e tahi vakaʼi e te kau Kilisitiano te faʼahi ʼaia ia muʼa ʼo Sehova ʼAtua.​—Loma 14:12.

Tatau aipe pe koteā te ʼu tonu ʼaē ʼe fai e te kau Fakamoʼoni ʼa Sehova ʼi te ʼu ʼaluʼaga kehekehe ʼaia, kae ʼe nātou faiga ke nātou taupau tanatou agatonu faka Kilisitiano pea mo tanatou palalau faʼitaliha mo te hahaʼi. ʼI te ʼu tonu fuli ʼaē ʼe nātou fai, ʼe nātou falala kia Sehova ʼAtua ke ina fakamālohiʼi nātou, mo foaki age he poto, pea mo tokoni age ke ʼaua naʼa nātou maumauʼi tanatou tui. ʼI tanatou fai te faʼahi ʼaia, ʼe nātou fakahā ai tanatou falala ki te ʼu palalau ʼaenī ʼa te tagata fai pesalemo: “Ko koe ko toku maka pea mo toku tule mālohi; pea ʼe ke ʼaveʼave anai ʼau pea mo taki anai ʼau ʼuhi ko tou huafa.”​—Pesalemo 31:⁠3.