Te Fetapa Ki Te Fuka, Te Vote Pea Mo Te Gāue Fakasivile

Te fetapa ki te fuka. Maʼa te kau Fakamoʼoni ʼa Sehova, ko te tulolo peʼe ko te fetapa ki te fuka, ʼaē ʼi te agamāhani ʼe fai ai mo te hiva fakapuleʼaga, ʼe ko he tauhi ʼaia ki he ʼatua, ʼe fakamoʼoni ai ʼe ko te Puleʼaga ʼo te fenua peʼe ko tona kau takitaki ʼaē ʼe natou foaki te fakamaʼuli kae mole ko te ʼAtua. (Isaia 43:11; 1 Kolonito 10:14; 1 Soane 5:21) Neʼe ʼi ai te tagata takitaki fēia, neʼe ko Nepukanesa te Hau ʼo Papiloni ʼāfea. ʼI tana fia fakahā ʼaē ki te hahaʼi tona mālohi pea mo tana tauhi fakalotu fakamālotoloto, neʼe fakatuʼu e te hau mālohi ʼaia he toe fakatātā lahi pea mo ina fakamaʼua ki tana hahaʼi ke natou tulolo ʼi ʼona muʼa mokā fakatatagi anai te musika, ohagē ko he hiva fakapuleʼaga. Kae ko te ʼu tama Hepeleo e toko tolu—ia Satalake, mo Mesake pea mo Apeteneko—neʼe mole natou tulolo ʼi te temi ʼaia ki te fakatātā, tatau aipē peʼe matehi ai anai ia nātou.—Taniela, kāpite 3.

Neʼe tohi e te tagata hisitolia ko Carlton Hayes, ʼi totatou temi, “ko te fuka ʼe ina fakatātā te tui pea ko he tafitoʼaga ʼo te tauhi ki te fenua. ʼI te temi ʼaē ʼe fakalaka ai te fuka, pea ʼe toʼo e te hahaʼi tagata tonatou ʼu puloga; pea ʼe tohi e te hahaʼi he ʼu palalau fakatuketuke pea ʼe hiva e te tamaliki he ʼu hiva fakapuleʼaga moʼo vikiʼi ia te fuka.” ʼE ina toe ʼui, ko te tauhi fakavale ki te fenua ʼe ʼi ai tona “ ʼu ʼaho taputapu,” ohagē lā ʼi Amelika ʼe natou fakamaʼuhigaʼi te ʼAho Fā ʼo Sūlio, pea ʼe toe ʼi ai mo tona “kau sagato pea mo hahaʼi toʼa,” pea mo tona “ ʼu fale lotu,” peʼe ko te ʼu koga meʼa taputapu. ʼI te toʼotoʼoga ʼi Pelesile, neʼe ʼui fēnei e te minisi lahi ʼo te ʼu kautau: “ ʼE ʼatolasioʼi te fuka . . . ohagē pē ko te ʼAtolasioʼi ʼo Te Fenua.” Ohagē ko tona ʼui ʼi te tohi (The Encyclopedia Americana): “Ohagē pē ko te koluse, ko te fuka, ʼe taputapu.”

ʼI te tohi pē ʼaia, mole heʼeki faʼa fualoa, neʼe ʼui ai, ko te ʼu hiva fakapuleʼaga “ ʼe ko he tauhi ki te fenua pea ʼi te agamāhani ʼe ko he kole ʼe fai ki te ʼAtua ke ina takitaki pea mo puipui te hahaʼi peʼe ko tanatou kau takitaki.” Koia ko te kau kaugana ʼa Sehova ʼe natou fakapotopoto heʼe natou ʼiloʼi mokā natou sisio ki te ʼu toʼotoʼoga fakafenua ʼaē ʼe fai e te hahaʼi, ʼi tanatou fetapa ki te fuka pea mo te hiva fakapuleʼaga, ʼe ko he tauhi fakalotu ʼaia. ʼO ʼuhiga mo te fakafisi ʼa te ʼu fānau ʼa te kau Fakamoʼoni ʼa Sehova ke natou fetapa ki te fuka peʼe ke natou lagolago ki he ʼu faʼahiga meʼa ʼi te ʼu faleako ʼi Amelika, neʼe ʼui fēnei ʼi te tohi (The American Character): “Kua fakamoʼoni kiai e te Telepinale Lahi ʼi te ʼu fakamāu ʼaē neʼe fai, ko te ʼu toʼotoʼoga ʼaia ʼe fai ʼi te ʼaho fuli ʼe ko he tauhi fakalotu ia.”

Logolā te mole kau ʼa te kau Fakamoʼoni ʼa Sehova ki te ʼu toʼotoʼoga ʼaia heʼe kiā nātou ʼe fakafeagai ki te Tohi-Tapu, kae ʼe natou fakaʼapaʼapa ki te loto ʼo te hahaʼi. ʼE natou toe fakaʼapaʼapa foki ki te ʼu fuka fakapuleʼaga pea mo natou fakamoʼoni ko te ʼu puleʼaga ʼe ko “te ʼu pule māʼoluga” pea ʼe ko “te minisi ʼa te ʼAtua.” (Loma 13:1-4) Koia ʼe mulimuli te kau Fakamoʼoni ʼa Sehova ki te tokoni ʼaē ke natou faikole “ ʼo ʼuhiga mo ni ʼu hau pea mo nātou fuli ʼaē ʼe maʼuhiga.” Kae ʼe tou fai anai te faʼahi ʼaia “ke feala ai hatatou maʼu he maʼuli fīmālie pea mo tokalelei, ʼaki te pipiki ki te ʼAtua pea mo totonu kātoa pē.”—1 Timoteo 2:2.

Te vote moʼo fakanofo he takitaki fakapolitike. ʼE fakaʼapaʼapa te kau Fakamoʼoni ʼa Sehova ki te fealagia ʼaē ʼe maʼu e te hahaʼi ke natou vote. ʼE mole natou fakafeagai anai ki te ʼu fai vote, pea ʼe natou fakalogo ki te ʼu pule ʼaē ʼe filifili ʼi te ʼu vote ʼaia. Kae ʼe natou fakatotonu ke mole natou kau ki te ʼu gāue fakapolitike ʼo te ʼu fenua. (Mateo 22:21; 1 Petelo 3:16) Koteā ʼaē ʼe tonu ke fai e he Kilisitiano mokā ʼe fakamaʼua ʼi tona fenua ke vote te hahaʼi , peʼe mokā ʼiʼita te hahaʼi kiā nātou ʼaē ʼe mole vote? Kapau ko he Kilisitiano ʼe tatau tona ʼaluʼaga pea mo te ʼaluʼaga ʼo Satalake, mo Mesake, pea mo Apeteneko, ʼe lagi ʼi tona leʼo ʼo loto ʼe feala pē hana ʼalu ki te pilo vote he neʼe ʼolo pē lā ia te ʼu tama Hepeleo ʼaia ki te mafa ʼo Tula. Kae ʼe tokaga anai ia naʼa kau ki he faʼahi fakapolitike. ʼE tonu anai ke ina manatuʼi ia te ʼu pelesepeto e ono ʼaenī:

1. Ko te ʼu tisipulo ʼa Sesu “ ʼe mole [natou] kau ʼi te mālamanei.”—Soane 15:19.

2. ʼE fakafofoga e te kau Kilisitiano ia Kilisito pea mo tona Puleʼaga.—Soane 18:36; 2 Kolonito 5:20.

3. Ko te kōkelekāsio Fakakilisitiano ʼe logotahi ʼi te tui, pea ʼe logotahi te kau Kilisitiano ʼaki te ʼofa ʼaē neʼe maʼu e Kilisito.—1 Kolonito 1:10; Kolose 3:14.

4. Ko nātou ʼaē ʼe natou vote maʼa he tagata, ʼe natou lagolago ki te ʼu gāue ʼaē kā ina fai.—Kotou tokagaʼi ia te ʼu pelesepeto ʼaē ʼe kotou maʼu iā 1 Samuele 8:5, 10-18 pea mo 1 Timoteo 5:22.

5. Kiā Sehova, ko te loto ʼaē ʼa Iselaele ki hanatou pule tagata neʼe ko he fakahā ʼaia ʼo tanatou liʼaki ia Ia.—1 Samuele 8:7.

6. ʼE tonu ke fakahagatonu te kau Kilisitiano mokā natou palalau ki te hahaʼi ki te ʼu akonaki ʼo ʼuhiga mo te Puleʼaga ʼo te ʼAtua.—Mateo 24:14; 28:19, 20; Hepeleo 10:35.

Te gāue fakasivile. ʼI ʼihi fenua, ʼe fakamaʼua e te Puleʼaga kiā nātou ʼaē ʼe mole sōlia ke natou fai he ʼu gāue maʼa te puleʼaga lolotoga he temi. Kā fai he tonu ʼo ʼuhiga mo te faʼahi ʼaia, ʼe tonu ke tou palalau ki te faʼahi ʼaia ʼi te faikole, ʼe feala ke tou fai palalau mo he Kilisitiano kua fakapotopoto, pea ʼosi leva ʼaia, pea tou fai he tonu ʼaki he leʼo ʼo loto kua mahino lelei ki te ʼu faʼahi ʼaia.—Tāʼaga Lea 2:1-5; Filipe 4:5.

ʼE ʼui mai ʼi te Folafola ʼa te ʼAtua ke tou “fakalogo ki te ʼu puleʼaga pea mo te kau takitaki ʼi tonatou ʼuhiga ʼaē ko he ʼu pule, pea mo [tou] nonofo teuteu ki te gāue lelei fuli pē, . . . ke [tou] fakapotopoto.” (Tito 3:1, 2) ʼAki te manatu ʼaia, ʼe feala ke tou fai te ʼu fehuʼi ʼaenī: ‘Ko te gāue fakasivile ʼaenī kā au fai, ʼe tupu ai anai koa haku kau ki he ʼu gaohi meʼa fakapolitike peʼe tupu ai anai haku kau ki te lotu hala?’ (Mikea 4:3, 5; 2 Kolonito 6:16, 17) ‘Kapau ʼe au fai te gāue ʼaenī, ʼe faigataʼa ai anai koa haku fakahoko toku ʼu maʼua Fakakilisitiano peʼe tāʼofi au ke mole au fakahoko te ʼu maʼua ʼaia?’ (Mateo 28:19, 20; Efesi 6:4; Hepeleo 10:24, 25) ‘Tahi ʼaē meʼa, ʼi taku fai ia te gāue fakasivile ʼaia ʼe feala ai anai koa ke au fai haku fakatuʼutuʼu ke lahi age taku ʼu gāue fakalaumālie, ohagē lā ke au pioniē kātoa?’—Hepeleo 6:11, 12.

Kapau ʼi te manatu ʼa he Kilisitiano ʼe ina leleiʼia age hana fai ʼo he gāue fakasivile kae mole ʼalu ʼo pilisoni, pea ʼe tonu ke fakaʼapaʼapa tona ʼu tehina ki te tonu ʼaia neʼe ina fai. (Loma 14:10) Kae kapau ʼe ina logoʼi ʼe mole feala ke ina fai ia te gāue ʼaia, pea ʼe tonu ke toe fakaʼapaʼapa tona ʼu tehina ki te tonu ʼaia.—1 Kolonito 10:29; 2 Kolonito 1:24.