Te Mālohi ʼo Te Faikole
ʼE lolotoga tō te laʼā ʼi te kolo ʼo Nahole, ʼi te fenua Alape. ʼE tau atu ki te vai keli ʼi te tuʼa kolo, te tagata Silia ko Eliesele, mo tana ʼu kamelo e hogofulu. Logope la neʼe kua gaʼegaʼe pea mo fia ʼinu, kae neʼe tuʼania tafito ia Eliesele ki te meʼa ʼaē neʼe ʼaoga ki ʼihi. Neʼe fagona mai te fenua matāpule moʼo kumi he ʼohoana ʼo te foha ʼo tona ʼaliki. Pea tahi ʼaē meʼa, neʼe tonu ke ina maʼu te taʼahine ʼaia ʼi te ʼapi ʼo te kāiga ʼo tona ʼaliki. ʼE ina fakahoko feafeaʼi anai te fekau faigataʼa ʼaia?
ʼE TUI Eliesele ki te mālohi ʼo te faikole. Neʼe mālohi tana tui ohage ko te tui ʼa he tamasiʼi, pea neʼe ina fai te faikole agavaivai ʼaenī: “Sehova, te ʼAtua ʼo toku ʼaliki ko Apalahamo, fakalelei siʼou loto, kae fakahoko te meʼa ʼaia ʼi ʼoku muʼa ʼi te ʼaho ʼaenī pea mo ke manavaʼofa ki toku ʼaliki ko Apalahamo. Koʼeni ʼe ʼau tuʼu ʼi te matapuna vai, pea ʼe hū mai ki tuʼa te ʼu ʼofafine ʼo te ʼu tagata ʼo te kolo moʼo ʼohu vai. Ko te meʼa ʼaē ʼe tonu ke hoko, ko te taʼahine ʼaē ka ʼau ʼui anai ki ai, ‘Fakahifo mai tou hina utu vai, ke ʼau ʼinu,’ pea ka ina ʼui mai anai: ‘ ʼInu, pea ʼe ʼau toe faka ʼinu anai mo tau ʼu kamelo,’ ʼe ko ia ʼaia ʼaē ʼe tonu ke ke fili ki tau kaugana, kia Isaake, pea ʼaki te faʼahi ʼaia, fakahā mai kia te ʼau neʼe ke fai he ʼofa agatonu ki toku pule.”—Senesi 24:12-14.
Neʼe mole vaʼiganoa te falala ʼa Eliesele ki te mālohi ʼo te faikole. Koia, ko te ʼuluaki taʼahine ʼaē neʼe haʼu ki te vai keli neʼe ko te mokopuna ʼo te tēhina ʼo Apalahamo! ʼE higoa ko Lepeka, pea neʼe kei ʼeva, mo taupoʼou, pea mo finemui. Ko te meʼa ʼaē ʼe fakaofoofo, he neʼe ina foaki he meʼa ʼinu kia Eliesele pea mo ina toe faka ʼinu foki mo tana ʼu kamelo fuli. Ki muli age, neʼe fai te talaga faka famili, pea neʼe tali e Lepeka ke ʼalu mo Eliesele ki he fenua mamaʼo, pea ke ʼohoana ai mo Isaake, te foha ʼo Apalahamo. ʼE ko he tali fakaofoofo ʼaia ki te faikole ʼa Eliesele, ʼi he temi neʼe tau fakahoko ai e te ʼAtua te ʼu milakulo.
ʼE lahi te ʼu meʼa ʼe feala ke tou tāʼofi ʼi te faikole ʼa Eliesele. Neʼe hā ai te makehe ʼo tana tui, mo tana agavaivai pea mo tana tuʼania ki te meʼa ʼaē neʼe ʼaoga ki ʼihi. ʼE toe fakahā e te faikole ʼa Eliesele tana fakalogo ki te takitaki ʼa Sehova. ʼE mahino ia neʼe ina ʼiloʼi te ʼofa makehe ʼo te ʼAtua kia Apalahamo, pea mo Tana fakapapau ʼaē ʼe tapuakina anai te hahaʼi fuape ʼaki ia Apalahamo. (Senesi 12:3) Koia neʼe kamata fēnei ai e Eliesele tana faikole: “Sehova te ʼAtua ʼo toku ʼaliki ko Apalahamo.”
Ko Sesu Kilisito neʼe ko te hāko ʼo Apalahamo pea ʼaki ia ia ʼe tapuakina anai te hahaʼi fakalogo fuli. (Senesi 22:18) Kapau ia ʼaho nei ʼe tou fia maʼu he tali ki tatatou ʼu faikole, pea ʼe tonu ke tou tali ʼaki he agavaivai ke takitaki tatou e te ʼAtua ʼaki tona ʼAlo. Neʼe ʼui fēnei e Sesu Kilisito: “Kapau e koutou nonofo ia te au pea e nofo mo aku folafola ia koutou, ko he meape e koutou fia kole mai pea e fakahoko atu anai kia koutou.”—Soane 15:7.
Ko te ʼapositolo ko Paulo neʼe ko he tisipulo ʼa Sesu neʼe sio tonu ki te moʼoni ʼo te ʼu palalau ʼaia ʼa Sesu. ʼE mahino ia neʼe mole vaʼiganoa tana tui ki te mālohi ʼo te faikole. Neʼe ina fakaloto mālohiʼi te kau Kilisitiano ke nātou faikole ki te ʼAtua moʼo fakahā tanatou ʼu tuʼania fuli, pea neʼe ina fakamoʼoni fēnei: “E au fealagia te meafuape ia Ia ae e ina fakamalohi au.” (Filipe 4:6, 7, 13) Ko tona faka ʼuhiga koa ko meʼa fuli pe ʼaē neʼe kole e Paulo ʼi tana ʼu faikole neʼe tali age e te ʼAtua? Tou vakaʼi te faʼahi ʼaia.
ʼE Mole Tali Te ʼu Kole Fuli
Neʼe fai e Paulo tona minisitelio ʼaki he loto faka sakilifisio, pea neʼe tau mo te mamahi ʼe ina ʼui ʼe ko “he foto i toku kakano.” (2 Kolonito 12:7) Neʼe lagi hoha tona ʼatamai pea mo tona loto ʼuhi ko te hahaʼi ʼaē neʼe fakafeagai kia ia pea mo “te u tehina lohi.” (2 Kolonito 11:26; Kalate 2:4) Pe neʼe lagi mahaki tona foʼi mata. (Kalate 4:15) Tatau aipe pe koteā te fihifihia ʼaē neʼe tau mo ia, kae neʼe gaʼegaʼe Paulo ʼi te ‘foto [ʼaia] ʼi te kakano.’ Neʼe ina tohi fēnei: “Nee au faikole tua tolu ki te Aliki ke ina fakamamao maià te au.” Kae neʼe mole tali e te ʼAtua te kole ʼaia ʼa Paulo. Neʼe ina fakamahino age kia Paulo, neʼe kua feʼauga mo ia te ʼu tapuakina fakalaumālie ʼaē kua ina foaki age, ohage la ko te mālohi ʼaē neʼe feala ai ke ina kātakiʼi te ʼu ʼahiʼahi. Pea tahi ʼaē meʼa, neʼe ʼui fēnei e te ʼAtua: “E katoa te gaue o toku mafimafi i te vaivai.”—2 Kolonito 12:8, 9.
Koteā ʼaē ʼe tou tāʼofi ʼi te ʼu faʼifaʼitaki ʼo Eliesele pea mo Paulo? Kua mahino kia tatou ʼe fagono moʼoni ia Sehova ʼAtua ki te ʼu faikole ʼa te hahaʼi ʼaē ʼe nātou faiga ʼaki he agavaivai ke nātou tauhi kia te ia. Kae ʼe mole faka ʼuhiga leva, ʼe tali tuʼumaʼu e te ʼAtua tanatou ʼu kole, koteʼuhi ʼe sio mamaʼo ki te ʼu meʼa ʼaē ka hoko. ʼE ina ʼiloʼi lelei age te ʼu meʼa ʼaē ka ʼaoga kia tatou. Kae tāfito, ʼe ina fai te ʼu meʼa ʼo mulimuli tuʼumaʼu ki tana fakatuʼutuʼu ʼaē ʼe tuʼu ʼi te Tohi-Tapu.
Ko He Temi Ki Te Fakamālōlō Fakalaumālie
ʼE fakapapau mai e te ʼAtua ʼe ina fakamālōlō anai te hahaʼi mai te ʼu mahaki fuli pe ʼi te faʼahi fakasino, ʼi tanatou fakakaukau, pea mo tonatou loto, lolotoga te ʼAfio ia Taʼu e Afe ʼaē ka takitaki ai te kele e tona ʼAlo. (Apokalipesi 20:1-3; 21:3-5) ʼE atalitali te kau Kilisitiano fakamalotoloto ki te temi ʼaē ka hoko ai te fakapapau ʼaia, pea ʼe nātou tui ʼe feala ki te ʼAtua ke ina fakahoko te fakapapau ʼaia. Logope la ʼe mole nātou ʼamanaki ke hoko faka milakulo he fakamālōlō ʼi te temi nei, kae ʼe nātou kole ki te ʼAtua ke lagolago kia nātou pea ke ina foaki age he mālohi ke nātou tauʼi te ʼu fihifihia. (Pesalemo 55:22) Tahi ʼaē meʼa, ka nātou mahahaki, pea ʼe nātou faikole ke takitaki nātou e Sehova, ke nātou maʼu te faitoʼo ʼaē ʼe lelei pea mo totogi lelei kia nātou.
Ko ʼihi lotu ʼe nātou fakaloto mālohiʼi ia ia ʼaē ʼe mahaki ke faikole ke fakamālōlō neinei, ʼo nātou talanoa tāfito ki te ʼu fakamālōlō faka milakulo ʼaē neʼe fai e Sesu pea mo tana kau ʼapositolo. Kae neʼe ʼi ai te fakatuʼutuʼu makehe ʼo te ʼu milakulo ʼaia. Neʼe ko he ʼu fakamoʼoni ʼaia neʼe ko Sesu Kilisito te Mesia moʼoni, pea neʼe nātou fakahā kua toʼo e te ʼAtua tona ʼofa mai te puleʼaga Sutea kae ina foaki ki te kokelekasio faka Kilisitiano. ʼI te temi ʼaia, neʼe ʼaoga te ʼu milakulo moʼo fakaloto mālohiʼi te tui ʼo te kokelekasio faka Kilisitiano ʼaē neʼe hoki fakatuʼu. ʼI te kua tuʼu lelei pea mo mālohi ʼa te kokelekasio foʼou ʼaia, neʼe “maumauʼi” ai leva te ʼu milakulo.—1 Kolonito 13:8, 11.
ʼI te temi faigataʼa ʼaenī, ʼe takitaki e Sehova ʼAtua tana hahaʼi tauhi ke nātou fakahoko te gāue ʼaē ʼe maʼuhiga tāfito, te fakamālōlō fakalaumālie. ʼE kei maʼu te temi ki te hahaʼi ke nātou tali ki te pāui ʼaenī: “Koutou kumi ia Sehova, ʼi te temi ʼaē ʼe kei feala ai tona maʼu. Koutou pāui kia te ia, ʼi te temi ʼaē ʼe kei ōvi mai ai. Ke mavae te tagata agakovi ʼi tona ala pea mo te tagata kovi ʼi tana ʼu manatu; pea ke liliu mai kia Sehova, ʼaē ka manavaʼofa anai kia te ia, pea ki totatou ʼAtua, heʼe ina fakamolemole lahi anai.”—Isaia 55:6, 7.
ʼE fakahoko te fakamālōlō fakalaumālie ʼaia ʼo te hahaʼi agahala ʼaē ʼe fakahemala, ʼaki te faka mafola ʼo te logo lelei ʼo te Puleʼaga ʼa te ʼAtua. (Mateo 24:14) ʼE foaki e Sehova ʼAtua tona mālohi ki tana ʼu kaugana moʼo fakahoko te gāue ʼaē ko te hāofaki ʼo te hahaʼi, pea ʼe tokoni ki te ʼu lauʼi miliona hahaʼi mai te ʼu puleʼaga fuli, ke nātou fakahemala ki tanatou agahala pea ke nātou felogoi lelei mo ia ʼi muʼa ʼo te fakaʼosi ʼo te tuʼu agakovi ʼaenī. ʼE tali anai e te ʼAtua te ʼu kole ʼa nātou fuli ʼaē ʼe nātou faikole fakamalotoloto ke hoko te fakamālōlō fakalaumālie ʼaia, pea mo nātou fuli ʼaē ʼe nātou faikole ke tokoni age moʼo fakahoko te gāue fakamālōlō ʼaia.
[Haʼuʼaga ʼo te paki pasina 3]
Eliezer and Rebekah/The Doré Bible Illustrations/Dover Publications