Te Faʼifaʼitaki Lelei ʼo He Tagata Neʼe Ina Tali Ke Fakatonutonuʼi
“ ʼI ZAMBIE ʼe Kai e Te ʼu Kolokotile Te Toko 30 Hahaʼi ʼi Te Māhina Fuli.” Neʼe fai te fakamatala ʼaia e te nusipepa ʼo Afelika kua hili kiai ni ʼu taʼu. Neʼe ʼui e te tagata sivi manu ʼaē neʼe ina puke te ʼu kolokotile ʼaia moʼo vakavakaʼi tonatou ʼu agaaga, “neʼe tonu ke ʼi ai te ʼu tagata e toko 12 moʼo puke te kolokotile e tahi.” ʼAki tona hiku pea mo tona ʼu kaugao mālohi, ko te kolokotile ʼe ko te manu fakamataku ʼaupito!
Neʼe lagi palalau te Tupuʼaga ki te kolokotile ʼi tana talanoa ki te “Leviata,” pea neʼe ina fakaʼaogaʼi te faʼifaʼitaki ʼaia ʼo te “hau ʼo te ʼu manu fakaofoofo fuli” moʼo fai te ako maʼuhiga ki tana kaugana ko Sopo. (Sopo 41:1, 34) Neʼe hoko te faʼahi ʼaia ia taʼu e 3 500 ki muʼa atu ʼi te fenua ʼo Usa, ʼaē neʼe lagi tuʼu ʼi te potu noleto ʼo Alapi. ʼI tana fakamatala te manu ʼaia, neʼe ʼui e te ʼAtua kia Sopo: “ ʼE mole he tahi ʼe lototoʼa moʼo fakaʼita ia ia. Pea ko ai ʼaē ʼe lava tuʼu ʼi ʼoku muʼa?” (Sopo 41:10) ʼE moʼoni ia! Kapau ʼe tou matataku ʼi te kolokotile, pea ʼe tonu ke lahi age ai tatatou manavasiʼi kia Ia ʼaē neʼe ina fakatupu te manu ʼaia ʼo mole tou palalau fakafeagai ki ai! Neʼe fakahā e Sopo tana loto fakafetaʼi ki te ako ʼaia ʼo ina vete tana hala.—Sopo 42:1-6.
Ka tou palalau kia Sopo, pea ʼe lagi tou manatuʼi tana faʼifaʼitaki lelei ʼi tana kātakiʼi tona ʼu ʼahiʼahi. (Sakopo 5:11) Kae ʼi tona fakahagatonu, neʼe leleiʼia e Sehova ia Sopo ʼi muʼa ʼo te ʼahiʼahiʼi ʼo tana tui. Neʼe fakafuafua e te ʼAtua, ʼi te temi ʼaia neʼe “mole he tahi ʼe tatau mo ia ʼi te kele, ko te tagata ʼe mole hana lākahala pea ʼe totonu ia, ʼe manavasiʼi ki te ʼAtua pea ʼe fakatafa mai te kovi.” (Sopo 1:8) Ko te faʼahi ʼaia ʼe tonu ke ina uga tatou ke tou vakaʼi fakalelei te faʼifaʼitaki ʼo Sopo, heʼe tokoni mai anai ke tou ʼiloʼi peʼe koteā ʼaē ʼe feala ke tou fai ke leleiʼia foki mo tatou e te ʼAtua.
Neʼe Ina Fakamuʼamuʼa Tana Felogoi Mo Te ʼAtua
Neʼe maʼu koloā ia Sopo. ʼO hilifaki ki tana aulo, neʼe toe ʼi ai mo tana faga ōvi e 7 000, mo tana ʼu kamelo e 3 000, mo tana ʼu asino fafine e 500 pea mo tana faga pipi e 1 000, pea neʼe tokolahi tana ʼu kaugana. (Sopo 1:3) Kae neʼe falala ia Sopo kia Sehova, kae mole ki tona ʼu koloā. Neʼe ina fakakaukauʼi fēnei: “Kapau neʼe ʼau falala ki te aulo, pe neʼe ʼau ʼui ki te aulo, ‘ ʼE ʼau falala kia koe!’ Kapau neʼe ʼau fakafiafia ʼi te lahi ʼo toku ʼu koloā, pea ʼi te maʼu e toku nima te ʼu tuʼuga meʼa . . . , pea ko te tahi hala ʼaia ʼe tonu anai ke tokagaʼi e te ʼu tuʼi fakamāu, he neʼe ʼau līaki te ʼAtua moʼoni ʼaē ʼi ʼoluga.” (Sopo 31:24-28) Ohage ko Sopo, ʼe tonu ke tou fakamuʼamuʼa tatatou felogoi mo Sehova ʼAtua ʼi te ʼu meʼa fakasino.
Neʼe Faitotonu Mo Tona ʼu Kāiga
Neʼe feafeaʼi te felogoi ʼa Sopo pea mo tana kau kaugana? ʼE hā ʼi te ʼu palalau ʼaenī ʼa Sopo, neʼe nātou manatu ʼe faitotonu pea neʼe faigafua tanatou fakaōvi kia ia: “Kapau neʼe ʼau fakafisi ki te fakamāu ʼo taku tagata kaugana pe ko taku fafine kaugana ʼi tamatou fihi, pea koteā ʼaē ʼe ʼau lava fai mokā tuʼu ake anai te ʼAtua? Pea ʼi tana pāui ki te faka lākatonuʼi, koteā taku tali anai kia te ia?” (Sopo 31:13, 14) Neʼe maʼuhiga kia Sopo te manavaʼofa ʼa Sehova, koia neʼe toe manavaʼofa ai mo ia ki tana kau kaugana. ʼE ko he faʼifaʼitaki lelei ʼaia, tāfito la kia nātou ʼaē ʼe nātou leʼoleʼo te kokelekasio faka Kilisitiano! ʼE toe tonu foki kia nātou ke nātou faitotonu, mo heʼe fakapalatahi pea ke faigafua te ʼolo age ʼa te hahaʼi kia nātou.
Neʼe toe tokagaʼi e Sopo te hahaʼi ʼaē neʼe mole kau ʼi tona loto fale. ʼE ina fakahā mai tana tuʼania ʼo ʼuhiga mo nātou ʼi tana ʼui fēnei: “Kapau neʼe ʼau tāʼofi te fakafiafia mai te kau agavaivai, pea kapau neʼe ʼau fakagaʼegaʼe te mata ʼo te fafine vitua, . . . kapau neʼe ʼau fakaʼalofa ki te tama ʼaē ʼe hala mo tāmai, kae ʼe ʼau sio ʼi te matapā ʼaia ʼe ʼaoga toku tokoni, ke tō te hui ʼo toku fugaʼuma pea ke fasi toku nima mai tona hui ʼaē ʼi ʼoluga.” (Sopo 31:16-22) ʼOfa pe ke tou lototokaga feiā kia nātou ʼaē ʼe tau mo te faigataʼaʼia ʼi te loto kokelekasio.
ʼUhi ko tana lototokaga manavaʼofa ki te hahaʼi, neʼe tali kāiga ia Sopo ki te kau matāpule. Koia neʼe feala ai ke ina ʼui fēnei: “Neʼe mole he matāpule neʼe nofo ʼi tuʼa ʼi te pōʼuli; neʼe tuku ava toku ʼu matapā ʼi te ala foufou.” (Sopo 31:32) ʼE ko he faʼifaʼitaki lelei ʼaia ki te kau kaugana ʼa te ʼAtua ia ʼaho nei! Ka ʼōmai he ʼu hahaʼi foʼou ki te Fale ʼo te Puleʼaga, ʼe tonu ke tou tali kāiga kia nātou, heʼe ko he tokoni ʼaia ki tanatou tuputupu ʼi te faʼahi fakalaumālie. ʼE mahino papau ia, ʼe toe ʼaoga foki ke tou tali kāiga ki te kau taupau feʼoloʼaki pea mo totatou tahi ʼu tēhina mo tuagaʼane.—1 Petelo 4:9; 3 Soane 5-8.
Neʼe toe faitotonu ia Sopo māʼia pe la ki tona ʼu fili. Neʼe mole fakafiafia mokā hoko he malaʼia kia nātou ʼaē neʼe fehiʼa kia ia. (Sopo 31:29, 30) Kae neʼe fia tokoni ki te hahaʼi ʼaia, heʼe hā mai neʼe lotolelei ke ina hūfaki te ʼu tagata fakaloto fīmālie loi e tolu.—Sopo 16:2; 42:8, 9; vakaʼi ia Mateo 5:43-48.
Neʼe Aga Fakapoipoi
Neʼe nofo lelei ia Sopo ki tona ʼohoana, he neʼe mole he temi neʼe ina tuku ai tona loto ke manako ki te tahi fafine. Neʼe ʼui fēnei e Sopo: “Neʼe ʼau fai te fuakava mo toku ʼu mata. Koia ʼe lava feafeaʼi anai haku tokagaʼi he taʼahine taupoʼou? Kapau neʼe holi toku loto ki he fafine, pea neʼe ʼau leʼoleʼo te matapā ʼo toku kaumeʼa, ke momosi e toku ʼohoana te pulapula maʼa te tahi tagata pea ke tuʼutuli age te tahi ʼu tagata kia ia. Koteʼuhi ʼe ko he aga heʼeʼaoga anai, pea ʼe ko he hala ʼe ʼave anai ki te ʼu tuʼi fakamāu.”—Sopo 31:1, 9-11.
Neʼe mole tuku e Sopo ke kākāʼi tona loto e te ʼu holi kovi. Kae neʼe ina fai te aga ʼaē ʼe lelei. ʼE tou mahino ai pe koʼe neʼe leleiʼia e Sehova ʼAtua te tagata agatonu ʼaia ʼaē neʼe ina tekeʼi te ʼu holi heʼeʼaoga.—Mateo 5:27-30.
Neʼe Tokaga Ki Te Maʼuli Fakalaumālie ʼo Tona Famili
ʼI ʼihi temi, ko te ʼu foha ʼo Sopo neʼe nātou fai he ʼu kaitahi neʼe kau kiai te ʼu foha pea mo te ʼu ʼofafine fuli ʼo Sopo. ʼI te ʼosi ʼo te ʼu kaitahi ʼaia, neʼe tuʼania ia Sopo naʼa agahala kia Sehova tana fānau. Koia neʼe fai ai e Sopo he fakatuʼutuʼu ohage ko tona ʼui e te fakamatala faka Tohi-Tapu ʼaenī: “ ʼI te ʼosi ʼo te temi ʼo te kaitahi, neʼe fekauʼi e Sopo ke fakamaʼoniʼoniʼi nātou; pea neʼe tuʼu ake ʼi te kei māfoatā ʼo momoli he ʼu holokoseta ʼo mulimuli ki tonatou kaugamālie; he neʼe ʼui fēnei e Sopo, ‘lagi neʼe agahala toku ʼu foha ki te ʼAtua pea mo nātou leakovi kia ia ʼi tonatou loto.’ ” (Sopo 1:4, 5) Neʼe mahino lelei ki te famili ʼo Sopo, neʼe ina loto ke nātou manavasiʼi kia Sehova pea mo nātou haʼele ʼi Tona ʼu ala.
Ia ʼaho nei, ko te ʼu pule famili Kilisitiano ʼe tonu ke nātou akoʼi ki tonatou ʼu famili te Tohi-Tapu, te Folafola ʼa te ʼAtua. (1 Timoteo 5:8) Pea ʼe mahino papau ia, ʼe tau mo feʼauga ke tou hūfaki te ʼu hahaʼi ʼo totatou loto fale.—Loma 12:12.
Neʼe Faʼa Kātaki ʼo Nofo Agatonu ʼi Te ʼu ʼAhiʼahi
ʼE tokolahi te kau lautohi ʼo te Tohi-Tapu ʼe nātou ʼiloʼi te ʼu ʼahiʼahi ʼaē neʼe hoko kia Sopo. Neʼe ʼui e Satana te Tevolo, ʼe leakovi anai ia Sopo ki te ʼAtua mokā hoko anai kia ia he ʼu ʼahiʼahi faigataʼa. Neʼe tali e Sehova ke hoko te ʼu ʼahiʼahi ʼaia, pea fakatō e Satana te ʼu malaʼia kia Sopo. Neʼe mate fuli ai tana faga manu. Kae ko te meʼa ʼaē neʼe fakaʼofaʼofa tāfito, he neʼe mate fuli mo tana ʼu fānau. Mole tuai pea fakahoko e Satana te mahaki kovi kia Sopo, ko he ʼu polo mai tona ʼu vaʼe ki tona ʼulu.—Sopo ʼi te kapite 1 mo te 2.
Neʼe koteā tona ikuʼaga? ʼI te fakaneke ʼo tona ʼohoana ke leakovi ki te ʼAtua, neʼe ʼui age e Sopo: “Ohage ko te palalau ʼa te ʼu fafine vavale, ʼe ke toe palalau feiā mo koe. ʼE tou tali pe anai koa mai te ʼAtua moʼoni te meʼa ʼaē ʼe lelei kae mole tou tali tatou te meʼa ʼaē ʼe kovi?” Pea toe ʼui fēnei e te Tohi-Tapu: “Ia meʼa fuli ʼaia, neʼe mole agahala ia Sopo ʼaki tona ʼu laugutu.” (Sopo 2:10) Ei, neʼe faʼa kātaki ia Sopo ʼo nofo agatonu, pea neʼe ina fakamoʼoni ki te gutuloi ʼa te Tevolo. ʼOfa pe ke toe feiā mo tatou, ke tou kātakiʼi tatatou ʼu ʼahiʼahi pea mo tou fakamoʼoni ʼe tou tauhi ki te ʼAtua heʼe tou ʼofa moʼoni kia Sehova.—Mateo 22:36-38.
Neʼe Tali Tona Fakatonutonuʼi ʼAki He Agavaivai
Logola ko Sopo neʼe ko he faʼifaʼitaki lelei ʼi te ʼu faʼahi kehekehe, kae neʼe mole ko he tagata haohaoa. Neʼe ʼui fēnei e ia totonu: “Ko ai ʼaē ʼe feala ke ina fakatupu he tahi ʼe maʼa mai he tahi ʼe heʼemaʼa? Mole he tahi.” (Sopo 14:4; Loma 5:12) Koia ko te ʼui ʼa Sehova ko Sopo neʼe mole hona lākahala, ko tona faka ʼuhiga neʼe ina maʼuliʼi te meʼa fuli ʼaē neʼe fakamaʼua e te ʼAtua ki tana ʼu kaugana heʼe haohaoa pea mo agahala. ʼE ko te fakaloto mālohi ʼaupito ʼaia!
Neʼe kātakiʼi e Sopo tona ʼahiʼahiʼi kae neʼe hā ai tona kiʼi mele. ʼI tanatou maʼu logo ki te ʼu malaʼia ʼaē neʼe hoko kia ia, neʼe ʼōmai te ʼu tagata fakaloto fīmālie e toko tolu. (Sopo 2:11-13) Neʼe nātou ʼui, neʼe tauteaʼi e Sehova ia Sopo he neʼe ina fai te ʼu agahala mamafa. ʼE mahino ia, neʼe lotomamahi ʼaupito ia Sopo ʼi te ʼu tukugakovi hala ʼaia, pea neʼe faiga mālohi ke fakafeagai ki te ʼu palalau ʼaia. Kae neʼe mole fakapotopoto ʼi tana faka lākatonuʼi ia ia, he neʼe hage neʼe ina fia ʼui neʼe faitotonu age ʼi te ʼAtua.—Sopo 35:2, 3.
ʼUhi ko te ʼofa ʼa te ʼAtua kia Sopo, neʼe Ina fakaʼaogaʼi te tūpulaga moʼo fakahā age kia ia tana hala. ʼE ʼui fēnei e te Tohi-Tapu: “Neʼe kakaha te ʼita ʼo Eliu. Neʼe tō tona ʼita kia Sopo koteʼuhi neʼe ina ʼui ʼe faitotonu age tona nefesi ʼi te ʼAtua.” Ohage ko tona fakatokagaʼi e Eliu: “Neʼe ʼui fēnei e Sopo, ‘ ʼE ʼau moʼoni ʼau, kae ko te ʼAtua neʼe ina fakamaliu te fakamāu mai ia te ʼau.’ ” (Sopo 32:2; 34:5) Kae neʼe mole ʼio ia Eliu ki te ʼu palalau ʼa te ʼu “tagata fakaloto fīmālie” e tolu, ʼi tanatou ʼui ʼaē neʼe tauteaʼi e te ʼAtua ia Sopo ʼuhi ko tana ʼu agahala. Kae neʼe fakahā e Eliu tana falala ki te agatonu ʼa Sopo pea neʼe ina fai age te tokoni ʼaenī: “Ko te faifakamāu ʼaia ʼe fai ia muʼa [ʼo Sehova], pea ʼe tonu ke ke atali lelei kia te ia.” Ei, neʼe tonu ke talitali ia Sopo kia Sehova kae ke ʼaua naʼa palalau fakavilivili moʼo faka lākatonuʼi ia ia totonu. Neʼe fakaloto fīmālieʼi e Eliu ia Sopo ʼo ina ʼui fēnei: “[Ko te ʼAtua] ʼe mole ina fakalainoaʼi anai te agatonu pea mo te faitotonu.”—Sopo 35:14; 37:23.
Neʼe tonu ke fakatonutonuʼi te manatu ʼa Sopo. Koia neʼe fai age e Sehova te ako ʼo ʼuhiga mo te mālalo ʼo te tagata mokā fakatatau ki te ʼalikisia ʼo te ʼAtua. Neʼe fakatokagaʼi e Sehova kia Sopo te kele, mo te tai, mo te ʼu fetuʼu ʼo te lagi, mo te ʼu manu, pea mo te tahi ʼu meʼa taulekaleka ʼaē neʼe ina fakatupu. Moʼo fakaʼosi, neʼe palalau te ʼAtua ki te Leviata—te kolokotile. ʼAki he agavaivai neʼe tali e Sopo te fakatonutonuʼi ʼaia, pea ʼe ina tuku mai ai te tahi faʼifaʼitaki lelei.
Logope la ʼe tou tauhi lelei kia Sehova, kae ʼi ʼihi temi ʼe tou fai anai he ʼu hala. Kapau ʼe tou fai he hala mamafa, pea ʼe feala ke fakatonutonuʼi tatou e Sehova. (Tāʼaga Lea 3:11, 12) ʼE lagi manatuʼi anai e totatou leʼo ʼo loto he vaega faka Tohi-Tapu. ʼE lagi tou lau anai Te Tule Leʼo pe ko te tahi tohi ʼo te Sosiete Watch Tower pea ʼe ina fakahā mai anai tatatou hala. Peʼe lagi ko hotatou tēhina ʼaē ka ina fakatokagaʼi mai kia tatou neʼe mole tou maʼuliʼi he pelesepeto faka Tohi-Tapu. ʼE tou tali feafeaʼi anai te fakatonutonuʼi ʼaia? Neʼe loto fakahemala ia Sopo he neʼe ina ʼui fēnei: “ ʼE ʼau fakahemala ki ʼaku palalau, pea ʼe ʼau fakahemala ʼi te efu pea mo te lefulefu.”—Sopo 42:6.
Neʼe Fakapale e Sehova
Neʼe fakapale e Sehova ia Sopo ʼo ina tuku ke hoko atu te maʼuli ʼo tana kaugana ia taʼu e 140. ʼI te lolotoga ʼo te temi ʼaia, neʼe lahi age te ʼu meʼa ʼaē neʼe ina maʼu ʼi te ʼu meʼa ʼaē neʼe toʼo ia ia. Pea logope la neʼe mate ia Sopo, kae ʼe tou ʼiloʼi papau, ʼe fakatuʼuake anai ia ʼi te mālama foʼou ʼa te ʼAtua.—Sopo 42:12-17; Esekiele 14:14; Soane 5:28, 29; 2 Petelo 3:13.
ʼE toe feala foki kia tatou ke tou tui papau ʼe leleiʼia anai tatou e te ʼAtua, pea ʼe ina tapuakina anai tatou mo kapau ʼe tou tauhi agatonu kia te ia pea mokā tou tali ke fakatonutonuʼi tatou ʼaki te Tohi-Tapu. Ko tona ikuʼaga, ʼe tou maʼu anai te ʼamanaki ʼaē ke tou maʼuli ʼi te mālama foʼou ʼa te ʼAtua. Kae ko te meʼa ʼaē ʼe maʼuhiga age, heʼe tou fakavikiviki anai ki te ʼAtua. ʼE fakapale anai tatatou agatonu pea ʼe ko te tahi fakamoʼoni ʼaia ko tana hahaʼi ʼe nātou tauhi kia te ia heʼe nātou ʼofa fakamalotoloto, kae mole ʼuhi ko tanatou fia maʼu he ʼu meʼa lelei mai te ʼAtua. ʼE tou loto fakafetaʼi ʼaupito heʼe feala ke tou fakafiafia te loto ʼo Sehova, ohage ko te tagata agatonu ko Sopo, ʼaē neʼe ina tali tona fakatonutonuʼi ʼaki he agavaivai!—Tāʼaga Lea 27:11.
[Paki ʼo te pasina 26]
Neʼe ʼofa Sopo ki te tamaliki ʼaē neʼe hala mo tāmai, mo te ʼu fafine vitua pea mo te tahi ʼu hahaʼi
[Paki ʼo te pasina 28]
Neʼe fakapale lahi ia Sopo he neʼe ina tali tona fakatonutonuʼi ʼaki he agavaivai