Tou Lagolago Mālohi Ki Te Akonaki Fakaʼatua
“Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ʼe ina fakatonutonu anai tou ʼu ala foufou.”—Tāʼaga Lea 3:5, 6.
1. ʼI te temi nei, kua lahi feafeaʼi tatatou maʼu logo?
IA ʼAHO nei, ʼi te ʼaho fuli, ko teitei nusipepa kehekehe e 9 000 ʼe tufa ʼi te malamanei. ʼI te taʼu fuli, ko tohi foʼou e 200 000 ʼe tā ʼi te fenua pe ʼo Amelika. Neʼe fakafuafua ʼi Malesio 1998, neʼe ko teitei pasina e 275 miliona neʼe feala ke kita lau ʼi te Internet. ʼE ʼui ʼe haga tuputupu te faʼahi ʼaia, heʼe ko pasina e 20 miliona ʼaē ʼe hilifaki kiai ʼi te māhina fuli. ʼO mole hage ko te temi muʼa, kua feala ki te hahaʼi ke nātou maʼu he ʼu logo ʼo ʼuhiga mo meʼa fuli. Logola ʼe ʼi ai tona ʼu faʼahi ʼe lelei, kae ko te ʼu tuʼuga logo ʼaia neʼe tupu ʼaki ai te ʼu fihifihia.
2. Koteā te ʼu fihifihia ʼaē ʼe lava hoko ʼaki te tuʼuga logo ʼaia?
2 Kua fakalogo pe ʼihi ke nātou maʼu he ʼu logo, ʼo nātou holi tuʼumaʼu ke nātou maʼu te ʼu logo fakamuli, kae mole kei nātou tokagaʼi te ʼu meʼa ʼaē ʼe maʼuhiga tāfito. Ko ʼihi ʼe nātou ʼiloʼi fakakoga he logo ʼo ʼuhiga mo te poto fakamālama faigataʼa, pea ʼe nātou manatu ai kua nātou popoto. Pea ʼe lagi nātou fai ai he ʼu puleʼaki maʼuhiga ʼe feala ke fakatupu kovi kia nātou pea mo ʼihi, heʼe nātou falala pe ki tanatou mahino ʼaia ʼaē ʼe mole katoa. Pea ʼe ʼi ai mo te tuʼutāmaki ʼaē ko te lau ʼo he ʼu loi peʼe ko he ʼu logo ʼe mole totonu. ʼI te agamāhani, ʼe mole feala ke vakaʼi peʼe totonu mo fakapotopoto te ʼu tuʼuga logo ʼaia.
3. Koteā te ʼu fakatokaga ʼaē ʼe tou maʼu ʼi te Tohi-Tapu ʼo ʼuhiga mo te kumi ʼo te poto fakatagata?
3 Ko te fia ʼiloʼi meʼa fuli ʼe ko he agaaga kua tou maʼu talu mai fualoa. Neʼe kua mahino ʼi te temi ʼo te Hau ko Salomone ki te tuʼutāmaki ʼaē ko te maumau ʼo he temi loaloaga moʼo kumi he ʼu logo ʼe mole ʼaoga peʼe fakatupu kovi. Neʼe ina ʼui fēnei : “Tokagaʼi te fakatokaga: Ko te faʼu ʼo he ʼu tuʼuga tohi ʼe mole hona gataʼaga, pea ko te tokaga fau kiai ʼe gaʼegaʼe ai te kakano.” (Tagata Tānaki 12:12) Hili kiai te ʼu sēkulō, neʼe tohi fēnei e te ʼapositolo ko Paulo kia Timoteo: “Ê Timoteo, taupau te koloā ʼaē neʼe tuku atu kia te koe, ʼo ke lītuʼa ki te ʼu akonaki noa ʼaē ʼe nātou moamoagaʼi te meʼa ʼaē ʼe maʼoniʼoni, pea mo te ʼu fakafeagai ʼo te meʼa ʼaē ʼe higoaʼi hala ‘ko te ʼatamai mālama.’ Ko ʼihi ʼi tanatou fia hā ʼaki te taʼi ʼatamai mālama ʼaia neʼe nātou hēhē mai te tui.” (1 Timoteo 6:20, 21, MN) Ei, ia ʼaho nei, ʼe mole tonu ke fia lau e te kau Kilisitiano he ʼu manatu ʼe fakatupu kovi anai kia nātou.
4. ʼE tou lava fakahā feafeaʼi ʼe tou falala kia Sehova pea mo tana ʼu akonaki?
4 Pea ʼe lelei ke manatuʼi e te hahaʼi ʼa Sehova te ʼu palalau ʼaē ʼe tuʼu ia Tāʼaga Lea 3:5, 6: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ʼe ina fakatonutonu anai tou ʼu ala foufou.” Ko tatatou falala kia Sehova ko tona faka ʼuhiga, ke tou fakafisi ki he ʼu manatu ʼe fakafeagai ki te Folafola ʼa te ʼAtua, ʼaē ʼe tupu mai tatatou ʼu fakakaukau peʼe tupu mai totatou ʼu kaumeʼa. Moʼo puipui tatatou ʼaluʼaga fakalaumālie, ʼe maʼuhiga ke tou ako totatou ʼu fealagia fakakaukau ke feala hatatou ʼiloʼi te ʼu logo ʼaē ʼe fakatupu kovi pea ke tou tekeʼi. (Hepeleo 5:14) Tou vakaʼi te ʼu matapuna ʼo te ʼu faʼahiga logo ʼaia.
Ko He Mālama ʼe Puleʼi e Satana
5. Koteā te tahi matapuna ʼo te ʼu manatu ʼaē ʼe fakatupu kovi, pea ko ai te tupuʼaga ʼo te matapuna ʼaia?
5 Ko te mālama ʼaenī ʼe ko he matapuna lahi ʼo te ʼu manatu ʼaē ʼe fakatupu kovi. (1 Kolonito 3:19) Neʼe faikole fēnei ia Sesu Kilisito ki te ʼAtua ʼo ʼuhiga mo tana kau tisipulo: “E mole au hufaki atu ke ke too kehe natou mai te malama-nei, kae ke ke taupau natou mai te kovi.” (Soane 17:15) Ko te kole ʼa Sesu ke puipui tana kau tisipulo mai “te kovi” neʼe ko te fakamoʼoni ʼaia ki te mālohi ʼa Satana ʼi te mālama. ʼE mole tou hāo ʼi te ʼu fakaneke kovi ʼo te mālama ʼaenī ʼuhi pe he kua tou liliu ko he kau Kilisitiano. Neʼe tohi fēnei e Soane: “E tou iloi ko tatou e ʼa te Atua, kae e mauli te malama-nei katoa i te Kovi.” (1 Soane 5:19) Tāfito lolotoga te koga fakamuli ʼaenī ʼo te ʼu ʼaho fakaʼosi, ʼe fakafonu anai e Satana mo tana kau temonio te mālama ʼaki he ʼu logo ʼe fakatupu kovi kia tatou.
6. ʼAki te ʼu fakafiafia, e feafeaʼi te liliu ʼo te ʼu aga fakalialia ko he ʼu meʼa ʼe mata noa ki te hahaʼi?
6 Tahi ʼaē meʼa, ʼe lagi hage anai ʼe mole faʼa kovi ʼihi ʼo te ʼu logo ʼaia. (2 Kolonito 11:14) Ohage la, koutou fakatokagaʼi te faʼahi ʼo te ʼu fakafiafia, ohage ko te ʼu fakahāhāʼaga ʼaē ʼe fai ʼi te televisio, mo te ʼu ʼata, mo te musika, pea mo te ʼu tohi. Tokolahi ʼe nātou fakamoʼoni kua fakaʼāsili ʼi ʼihi fakafiafia te ʼu aga heʼeʼaoga, ohage ko te ʼu felāveʼi fakasino heʼeʼaoga, mo te agamālohi, pea mo te toloke. ʼE lagi punamaʼuli anai te hahaʼi ʼi tanatou ʼuluaki sio ki he ʼu aga fakalialia ʼi he ʼata. Kae ka tuʼa lahi tanatou sio kiai, pea hage leva ia ʼe mata noa kia nātou. ʼAua naʼa tou tali peʼe tou manatu ʼe mole kovi te ʼu fakafiafia ʼaē ʼe lagolago ki te ʼu manatu ʼaē ʼe fakatupu kovi kia tatou.—Pesalemo 119:37.
7. Koteā te faʼahiga poto fakatagata ʼaē ʼe feala ke ina pulihi tatatou falala ki te Tohi-Tapu?
7 Tou vakaʼi te tahi matapuna ʼe feala ke maʼu ai he ʼu logo ʼe fakatupu kovi kia tatou—te tuʼuga manatu ʼaē ʼe fai e te kau popoto ʼaē ʼe nātou fakafihiʼi te ʼuhiga moʼoni ʼo te Tohi-Tapu. (Vakaʼi ia Sakopo 3:15.) ʼE tau hā te faʼahi ʼaia ʼi te ʼu nusipepa maʼuhiga pea mo te ʼu tohi ʼaē ʼe lahi tona toʼo e te hahaʼi, pea ʼe feala ke ina pulihi tatatou falala ki te Tohi-Tapu. ʼE laupisi ʼihi mokā feala ke nātou fakalainoaʼi te mālohi ʼo te Folafola ʼa te ʼAtua ʼaki tanatou ʼu tuʼuga manatu fakamahalohalo. Neʼe hoko te tuʼutāmaki ʼaia ʼi te temi ʼo te kau ʼapositolo, ohage ko tona hā lelei ʼi te ʼu palalau ʼaenī ʼo te ʼapositolo ko Paulo: “Koutou tokaga naa hele koutou e he tahi aki te filosofia mo te kaka alunoa e mulimuli ki te u talatuku fakatagata, mo te u malohi o te malama-nei, kae mole kei fai kia Kilisito.”—Kolose 2:8.
Te ʼu Fili ʼo Te Moʼoni
8, 9. ʼE hā feafeaʼi te ʼapositasia ia ʼaho nei?
8 Ko te kau ʼaposita ʼe feala ke nātou fakatupu tuʼutāmaki kia tatou ʼi te faʼahi fakalaumālie. Neʼe fakakikite e te ʼapositolo ko Paulo ʼe tupu ake anai te ʼapositasia ia nātou ʼaē ʼe lau ko he kau Kilisitiano. (Gaue 20:29, 30; 2 Tesalonika 2:3) Neʼe hoko te ʼu palalau ʼaia, heʼe ʼi te ʼosi mate ʼo te kau ʼapositolo, ʼaki te ʼapositasia lahi ʼaia neʼe faʼufaʼu ai te Keletiate. Ia ʼaho nei, ʼe mole maʼu te ʼapositasia lahi ʼi te lotolotoiga ʼo te hahaʼi ʼa te ʼAtua. Kae ko te tokosiʼi neʼe mavae ia tatou, pea ko ʼihi ia nātou ʼaia kua nātou fakatotonu ke nātou laukoviʼi te kau Fakamoʼoni ʼa Sehova, ʼo nātou faka mafola he ʼu loi pea mo he ʼu logo ʼe mole totonu. Ko te tokosiʼi ʼe nātou gāue fakatahi mo te ʼu kūtuga ʼaē ʼe fakafeagai ki te tauhi maʼa. ʼI tanatou fai te faʼahi ʼaia, ʼe nātou lagolago kia Satana, te ʼuluaki ʼaposita.
9 Ko ʼihi ʼaposita kua lahi tanatou fakaʼaogaʼi ia te ʼu meʼa gāue ohage ko te Internet, moʼo faka mafola ai te ʼu loi ʼo ʼuhiga mo te kau Fakamoʼoni ʼa Sehova. Koia ka fai e te hahaʼi fakamalotoloto he ʼu kumi ʼo ʼuhiga mo tatatou ʼu akonaki, pea ʼe feala ke nātou maʼu ai te ʼu logo ʼaē ʼe faka mafola e te kau ʼaposita. Māʼia mo ʼihi Fakamoʼoni, logola neʼe mole nātou loto kiai, kae neʼe nātou lau te ʼu logo fakatupu kovi ʼaia. ʼO hilifaki kiai, ʼi ʼihi temi ʼe hā te kau ʼaposita ʼi te ʼu polokalama televisio peʼe nātou palalau ʼi te lātio. Koteā te aga fakapotopoto ʼaē ʼe tonu ke tou maʼu ʼo ʼuhiga mo te faʼahi ʼaia?
10. Koteā te aga fakapotopoto ʼaē ʼe tonu ke tou maʼu ʼo ʼuhiga mo te ʼu logo faka ʼaposita?
10 Neʼe fakatotonu e te ʼapositolo ko Soane ki te kau Kilisitiano, ke ʼaua naʼa nātou tali te kau ʼaposita ʼi tonatou ʼu ʼapi. Neʼe ina tohi fēnei: “Kapau e alu atu he tahi kia koutou, pea e mole ina avatu te akonaki, aua tautou tali iaʼia i toutou api, pea e au tala atu, aua tautou fakaʼalofa ki ai. Ko ae e ina talitali iaʼia, e ina vaevae mo ia tana u gaue kovi.” (2 Soane 10, 11) ʼE tou puipui anai tatou mai tanatou ʼu akonaki fakahehema, mo kapau ʼe mole tou palalau mo te kau ʼaposita ʼaia. Kapau ʼe tou lau peʼe tou fakalogo ki te ʼu akonaki ʼa te kau ʼaposita, pea ʼe fakatupu kovi anai kia tatou ohage pe ko hatatou tali te kau ʼaposita ʼi totatou ʼapi. ʼE mole tonu ke tou tuku tatatou fia ʼiloʼi meʼa fuli ke ina fakahiga tatou ki te taʼi aga fakatupu kovi ʼaia!—Tāʼaga Lea 22:3.
ʼI Te Kokelekasio
11, 12. (a) ʼI te kokelekasio ʼo te ʼuluaki sēkulō, koteā te meʼa ʼaē neʼe fakatupu kovi kia nātou? (b) Koteā ʼaē neʼe fai e ʼihi Kilisitiano ʼe hā ai tanatou mole lagolago mālohi ki te ʼu akonaki fakaʼatua?
11 Koutou fakatokagaʼi te tahi matapuna ʼe feala ke maʼu ai he ʼu manatu ʼe fakatupu kovi kia tatou. Logola ʼe mole loto anai e he Kilisitiano kua papitema ke ina akoʼi he ʼu loi, kae ʼe feala ke ina fakatuputupu te agamāhani ʼaē ko te palalau vale. (Tāʼaga Lea 12:18) ʼUhi ko totatou ʼuhiga heʼe haohaoa, ko tatou fuli ʼi ʼihi temi ʼe tou agahala ʼi tatatou ʼu palalau. (Tāʼaga Lea 10:19; Sakopo 3:8) ʼE mahino papau ia, ʼi te temi ʼo te ʼapositolo ko Paulo, neʼe ʼi ai ʼihi ʼi te kokelekasio neʼe mole nātou lava tātāʼofi tanatou palalau pea nātou fetalanoaʼaki ai ʼo ʼuhiga mo he ʼu kupu. (1 Timoteo 2:8, MN) Neʼe ʼi ai ʼihi neʼe nātou faka maʼuhigaʼi fau tanatou ʼu manatu, pea mo nātou fakafifihi ki te ʼuhiga takitaki ʼa Paulo. (2 Kolonito 10:10-12) Neʼe tupu ʼaki ai te ʼu kē neʼe mole hona ʼaoga.
12 ʼI ʼihi temi, ko te ʼu tokakovi ʼaia neʼe liliu ko “he ʼu fihi mālohi ki he ʼu meʼa noa pe,” ʼo puli ai te tokalelei ʼo te kokelekasio. (1 Timoteo 6:5, MN; Kalate 5:15) ʼO ʼuhiga mo nātou ʼaē neʼe nātou fai te ʼu palalau ʼaia, neʼe tohi fēnei e Paulo: “Kapau e kehe te akonaki a he tahi pea e mole tapiki ki te u folafola totonu o totatou Aliki ko Sesu Kilisito, pea e mole fai ki te akonaki a te lotu, ko he tahi kua kivi i tona lotolahi, e mole mahino ia ki he mea. Kae e ina mau te mahaki o te fiapoto mo te talapoto ki te u kupu, aia e mau ai te maheka, te fihi, te u laukovi, te u mahalohalo kovi.”—1 Timoteo 6:3, 4.
13. Neʼe feafeaʼi te aga ʼa te tokolahi ʼo te kau Kilisitiano ʼo te ʼuluaki sēkulō?
13 Meʼa fakafiafia foki, heʼe ʼi te temi ʼo te kau ʼapositolo, ko te tokolahi ʼo te kau Kilisitiano neʼe nātou agatonu pea mo haga tokaga tāfito ki te gāue ʼaē ko te tala ʼo te logo lelei ʼo te Puleʼaga ʼa te ʼAtua. Neʼe nātou maʼumaʼua ʼi te tokagaʼi ʼo “te ʼu fānau ʼaē ʼe hala mo tāmai pea mo faʼe, mo te kau fafine vitua ʼi tonatou ʼu mamahi,” pea mo nātou haga nofo “ ʼāteaina ʼi te mele fuli pe ʼo te mālama,” ʼo mole nātou puli temi ʼi he ʼu fai palalau noa ki he ʼu kupu. (Sakopo 1:27, MN) Neʼe nātou tekeʼi “te u fakakauga ae e kovi” ʼaē neʼe toe lava maʼu foki ʼi te kokelekasio, moʼo hāofaki tonatou maʼuli fakalaumālie.—1 Kolonito 15:33; 2 Timoteo 2:20, 21.
14. Kapau ʼe mole tou tokakaga, ʼe lava liliu feafeaʼi tatatou fevaevaeʼaki ʼo he ʼu manatu ko he ʼu meʼa fakatupu kovi?
14 ʼO toe feiā pe, ko te ʼu ʼaluʼaga ʼaē ʼe fakamatala ʼi te palakalafe 11, ʼe mole hoko tuʼumaʼu ʼi te ʼu kokelekasio ʼo te kau Fakamoʼoni ʼa Sehova ʼo te temi ʼaenī. Kae ʼe lelei ke tou ʼiloʼi ʼe lava hoko te ʼu fai palalau noa ʼaia. ʼE mahino ia, ʼe tonu ke tou fai palalau ki te ʼu fakamatala ʼo te Tohi-Tapu, peʼe tou feʼekeʼaki ki he ʼu agaaga ʼo te mālama foʼou ʼaē neʼe fakapapau mai pea mole heʼeki fakamahino mai. Pea ʼe mole kovi hatatou fevaevaeʼaki ʼo he ʼu manatu, ohage la ko he ʼu manatu ʼo ʼuhiga mo te ʼu mutuʼi meʼa pea mo te gaohi ʼo totatou ʼulu peʼe ko te filifili ʼo te ʼu fakafiafia. Kae kapau ʼe tou tui papau ʼe moʼoni tatatou ʼu manatu pea mo tou ʼiʼita mokā fakafihiʼi e he tahi, ʼe feala ki ʼamuli ke liliu te kokelekasio ʼo mavetevete ʼuhi ko te ʼu kiʼi meʼa noa ʼaia. Ko te ʼu kiʼi fai palalau ʼaē ʼe mole faʼa maʼuhiga ʼi te kamata, ʼe lava liliu moʼoni ki ʼamuli ko he meʼa fakatupu kovi.
Tou Taupau Te Meʼa ʼAē Neʼe Tuku Mai
15. E feafeaʼi te fakatupu kovi ʼa te “akonaki a te u temonio” kia tatou ʼi te faʼahi fakalaumālie, pea koteā te tokoni ʼaē ʼe tuku mai e te Tohi-Tapu?
15 ʼE fakatokaga fēnei e te ʼapositolo ko Paulo: “E tala fakahaha e te Laumalie: e fakafisi anai ihi ki te tui i te u temi fakamuli, e natou fakalogo anai he u laumalie hala pea mo te u akonaki a te u temonio.” (1 Timoteo 4:1) Ei, ʼe tou lava tuʼutāmaki moʼoni ʼaki te ʼu manatu fakatupu kovi ʼaia. Kua mahino kia tatou pe koʼe neʼe kole fēnei e Paulo ki tona kaumeʼa ko Timoteo: “Ê Timoteo, taupau te koloā ʼaē neʼe tuku atu kia te koe, ʼo ke lītuʼa ki te ʼu akonaki noa ʼaē ʼe nātou moamoagaʼi te meʼa ʼaē ʼe maʼoniʼoni, pea mo te ʼu fakafeagai ʼo te meʼa ʼaē ʼe fakahigoaʼi hala ‘ko te ʼatamai mālama.’ Ko ʼihi ʼi tanatou fia hā ʼaki te taʼi ʼatamai mālama ʼaia neʼe nātou hēhē mai te tui.”—1 Timoteo 6:20, 21, MN.
16, 17. Koteā ʼaē neʼe tuku mai e te ʼAtua, pea ʼe tonu ke tou taupau feafeaʼi te faʼahi ʼaia?
16 ʼE ʼaoga feafeaʼi kia tatou ia ʼaho nei te fakatokaga ʼofa ʼaia? Neʼe foaki kia Timoteo te meʼa maʼuhiga ke tokaga kiai pea mo ina puipui. Neʼe koteā te meʼa ʼaia? ʼE fakamahino fēnei e Paulo: “Too faifaitakiaga maia folafola mauli nee ke logo ki ai maià te au, i te tui mo te ofa e ia Kilisito Sesu. Taupau te koloa taulekaleka aki te Laumalie-Maonioni iaʼia e afio ia tatou.” (2 Timoteo 1:13, 14) Ei, neʼe foaki kia Timoteo te ‘folafola maʼuli,’ “te akonaki ʼaē ʼe ʼalutahi mo te pipiki fakamalotoloto ki te ʼAtua.” (1 Timoteo 6:3, MN) ʼO mulimuli ki te ʼu palalau ʼaia, ʼe lotomālohi te kau Kilisitiano ia ʼaho nei ke nātou taupau tanatou tui pea mo te moʼoni katoa ʼaē neʼe tuku age kia nātou.
17 Moʼo taupau te koloā ʼaia ʼaē neʼe tuku mai, ʼe tonu ke tou maʼu he ʼu agamāhani lelei, ohage ko te ako ʼo te Tohi-Tapu, pea mo te kātaki ʼi te faikole, ʼo tou fai “te lelei ki te tagata fuape, kae tafito ia te lelei o te kaiga o te tui.” (Kalate 6:10; Loma 12:11-17) ʼE toe fai e Paulo te fakatotonu ʼaenī: “Tulikaki te faitotonu, te lotu mooni, te tui, te ofa, te kataki mo te agamalu. Tau mo te tau lelei o te tui, puke te mauli heegata nee pauiʼi koe ki ai, nee ke fakamooni pea nee matalelei tau fai ia mua o he hahai fakamooni tokolahi.” (1 Timoteo 6:11, 12) Neʼe fakaʼaogaʼi e Paulo te ʼu kupuʼi palalau “tau mo te tau lelei” pea mo “puke,” ʼo hā ʼaki mai ʼe tonu ke tou gāue pea mo tou lotomālohi ʼo tauʼi te ʼu fakaneke fakalaumālie kovi.
Te ʼAoga ʼo Te Fakasiosio Tonu
18. ʼE lava feafeaʼi kia tatou Kilisitiano ke tou fakafuafua lelei te ʼu logo ʼo te mālama?
18 ʼE mahino papau ia, moʼo fai te tau lelei ʼo te tui, ʼe ʼaoga kia tatou te fakasiosio tonu. (Tāʼaga Lea 2:11; Filipe 1:9) Ohage la, ʼe mole ko he aga fakapotopoto anai hatatou fakafisi ki te ʼu logo fakamālama fuli pe. (Filipe 4:5; Sakopo 3:17) ʼE mole fakafeagai te ʼu manatu fakatagata fuli ki te Folafola ʼa te ʼAtua. Neʼe ʼui e Sesu ʼe ʼaoga ki te hahaʼi mahahaki ke nātou ʼolo ki he tōketā—ʼaē ko he gāue ia ʼa te mālama. (Luka 5:31) Logope la neʼe mole faʼa lelei te ʼu faitoʼo ʼi te temi ʼo Sesu, kae neʼe ina fakamoʼoni ʼe ʼaoga te tokoni ʼa te tōketā. Ia ʼaho nei, ʼe fakasiosio lelei te kau Kilisitiano ki te ʼu logo ʼo te mālama, kae ʼe nātou tekeʼi te ʼu logo ʼaē ʼe feala ke fakatupu kovi kia nātou ʼi te faʼahi fakalaumālie.
19, 20. (a) ʼE fakahā feafeaʼi e te kau tagata ʼāfea te fakasiosio tonu mokā nātou tokoniʼi ia nātou ʼaē ʼe mole fakakaukauʼi tanatou ʼu palalau? (b) Koteā ʼaē ʼe tonu ke fai e te kokelekasio kia nātou ʼaē ʼe nātou haga faka mafola he ʼu akonaki loi?
19 ʼE toe maʼuhiga foki ke maʼu e te kau tagata ʼāfea te fakasiosio tonu mokā nātou tokoniʼi ia nātou ʼaē ʼe mole nātou fakakaukauʼi tanatou ʼu palalau. (2 Timoteo 2:7) ʼI ʼihi temi, ʼe feala ki ʼihi ʼi te kokelekasio ke nātou fihi ki he ʼu meʼa noa pea mo nātou lau he ʼu meʼa ʼe mole ʼiloʼi peʼe moʼoni. Moʼo puipui te logo tahi ʼo te kokelekasio, ʼe tonu ke foimo fakatonutonuʼi e te kau tagata ʼāfea te ʼu fihifihia ʼaia. Pea ʼe nātou toe faiga foki ke mole nātou mahalohalo kovi ʼo ʼuhiga mo tonatou ʼu tēhina, pea mo nātou tomuʼa ʼui ʼe ko he kau ʼaposita.
20 Neʼe fakahā e Paulo te faʼahiga fai ʼo te tokoni ʼaia. Neʼe ina ʼui fēnei: “ ʼU tēhina, kapau ʼe ʼi ai he tagata ʼe fai hana lākahala ia muʼa ʼo hana ʼiloʼi, ko koutou ʼaē ʼe koutou maʼu ia te ʼu kalitate fakalaumālie, koutou faigaʼi te fakatonutonuʼi ʼo te tagata ʼaia ʼaki he agamālū.” (Kalate 6:1, MN) ʼI tana talanoa tāfito ʼo ʼuhiga mo te kau Kilisitiano ʼaē ʼe lotolotolua, neʼe tohi fēnei e Suta: “Pea kia natou e lotolotolua, koutou oʼofa kia natou. Koutou haofaki natou i tautou toʼo natou ki tuà mai te afi.” (Suta 22, 23) ʼE mahino ia, kapau kua tuʼa lahi tanatou tokoniʼi he tahi kae hoko atu pe tana faka mafola ʼo he ʼu akonaki loi, pea ʼe tonu anai ki te kau tagata ʼāfea ke nātou fai he puleʼaki moʼo puipui te kokelekasio.—1 Timoteo 1:20; Tito 3:10, 11.
Tou Fakafonu Totatou ʼAtamai ʼAki Te ʼu Meʼa Lelei
21, 22. Koteā ʼaē ʼe tonu ke tou filifili lelei, pea koteā ʼaē ʼe tonu ke tou fakafonu ʼaki totatou ʼatamai?
21 ʼE mole tali e te kokelekasio faka Kilisitiano te ʼu palalau fakatupu kovi ʼaē ʼe ‘mafola ohage he papala.’ (2 Timoteo 2:16, 17; Tito 3:9) ʼE moʼoni te faʼahi ʼaia mokā ʼe hā ʼi te ʼu palalau ʼaia te “poto” fakamālama ʼaē ʼe ina fakahiga tatou, peʼe ko te ʼu manatu ʼaē ʼe faka mafola e te kau ʼaposita, peʼe ko he ʼu palalau vale ʼe fai ʼi te kokelekasio. Logope la ʼe ʼaoga kia tatou te ʼiloʼi ʼo he ʼu meʼa foʼou, kae kapau ʼe mole tou tātāʼofi tatatou fia ʼiloʼi meʼa fuli, pea ʼe feala ke tou tali he ʼu manatu ʼe fakatupu kovi. ʼE mole puli kia tatou te ʼu kākā ʼa Satana. (2 Kolonito 2:11) ʼE tou ʼiloʼi ʼe faiga lahi anai ke ina fakahēʼi tatou ke vaivai ai tatatou tauhi ki te ʼAtua.
22 ʼI totatou ʼuhiga minisi lelei, tou lagolago mālohi ki te akonaki fakaʼatua. (1 Timoteo 4:6) ʼOfa pe ke tou fakaʼaogaʼi fakapotopoto totatou temi, ʼo tou filifili lelei te ʼu logo ʼaē ʼe tou fia vakaʼi. Pea ʼe mole tou higa gafua anai ʼi te ʼu logo ʼaē ʼe faka mafola e Satana. Ei, “ko meafuape e mooni, ko meafuape e fakaʼapaʼapaʼia, ko meafuape e tonu, ko meafuape e maa, ko meafuape e tuha mo te ofa, ko meafuape e lelei tona palalaui, kapau e ko he vilitute pea kapau e ko he mea e vikivikiʼia,” ke tou haga taupau te ʼu meʼa ʼaia. Kapau ʼe tou fakafonu totatou ʼatamai pea mo totatou loto ʼaki te ʼu meʼa ʼaia, pea ko te ʼAtua ʼo te tokalelei ʼe nofo anai mo tatou.—Filipe 4:8, 9.
Koteā ʼAē Neʼe Tou Ako?
• ʼE lava feafeaʼi ki te poto ʼo te mālama ke fakatupu tuʼutāmaki kia tatou ʼi te faʼahi fakalaumālie?
• Koteā ʼaē ʼe feala ke tou fai moʼo puipui tatou mai te ʼu logo fakatupu kovi ʼa te kau ʼaposita?
• Koteā te ʼu faʼahiga palalau ʼaē ʼe tonu ke tou tekeʼi ʼi te kokelekasio?
• ʼE lava feafeaʼi ki he Kilisitiano ke aga fakapotopoto ʼo ʼuhiga mo te ʼu tuʼuga logo ʼo te temi ʼaenī?
[Paki ʼo te pasina 9]
ʼE lahi te ʼu nusipepa pea mo te ʼu tohi ʼaē ʼe leleiʼia e te hahaʼi ʼe fakafeagai ki tatatou ʼu akonaki faka Kilisitiano
[Paki ʼo te pasina 10]
ʼE feala ke fevaevaeʼaki e te kau Kilisitiano tanatou ʼu manatu kae ʼe mole nātou loto anai ke tuʼu tanatou manatu