Koutou Haga Maʼuliʼi Te ʼu Meʼa ʼAē Neʼe Koutou Ako

“Ko mea ae nee koutou ako, mo tali, mo logo pea mo mamata ki ai ia te au, koutou mauliʼi ia mea aia. Pea e afio anai te Atua o te tokalelei mo koutou.”—Filipe 4:9.

1, 2. ʼI te agamāhani, ʼe takitaki koa e te Tohi-Tapu te maʼuli ʼo te hahaʼi ʼaē ʼe nātou ʼui ʼe nātou tauhi lotu fakamalotoloto? Koutou fakamahino.

“ ʼE TUPUTUPU Te Lotu Kae Puli Te Aga ʼAē ʼe Tonu Ke Fai.” Ko te kupu tāfito ʼaia ʼo te sulunale Emerging Trends moʼo fakanounou te ʼu sivi ʼaē neʼe fai ʼi Amelika. ʼE mahino ʼi te fenua ʼaia e tokolahi te hahaʼi ʼaē ʼe kau ki te ʼu misa pea mo nātou ʼui ʼe maʼuhiga te lotu ʼi tonatou maʼuli. Kae ʼe ʼui fēnei e te sulunale: “Logola te lelei ʼo te tuputupu ʼaia, kae ʼe mahino ia ʼe tokolahi te kau Amelika ʼe nātou feʼekeʼaki peʼe feafeaʼi te lotu ki tonatou maʼuli takitokotahi pea mo te sosiete katoa.”

² ʼE mole hoko pe te meʼa ʼaia ʼi te fenua e tahi. ʼI te malamanei katoa, ʼe tokolahi te hahaʼi ʼe nātou tali te Tohi-Tapu pea mo fia tauhi lotu fakamalotoloto, kae ʼe mole nātou tuku ke takitaki tonatou maʼuli e te Tohi-Tapu. (2 Timoteo 3:5) Neʼe ʼui fēnei e te tagata pule ʼo te kūtuga fai kumi: “ ʼE kei mātou faka maʼuhigaʼi te Tohi-Tapu, . . . kae ʼe mole kei mātou lau, mo ako, pea mo maʼuliʼi.”

3. (a) ʼE takitaki feafeaʼi e te Tohi-Tapu te hahaʼi ʼaē kua nātou liliu ko te kau Kilisitiano moʼoni? (b) ʼE maʼuliʼi feafeaʼi e te kau tisipulo ʼa Sesu te tokoni ʼa Paulo ia Filipe 4:9?

³ Kae ʼe mole feiā te kau Kilisitiano moʼoni. Neʼe fetogi tanatou ʼu manatu pea mo tanatou aga ʼi tanatou maʼuliʼi te ʼu tokoni ʼo te Folafola ʼa te ʼAtua. Pea ʼe fakatokagaʼi e te hahaʼi kua fetogi tonatou ʼulugaaga. (Kolose 3:5-10) Maʼa te kau tisipulo ʼa Sesu, ko te Tohi-Tapu ʼe ko he tohi maʼuhiga ʼaupito kia nātou. He neʼe ʼui fēnei e te ʼapositolo ko Paulo ki te kau Kilisitiano ʼo Filipe: “Ko mea ae nee koutou ako, mo tali, mo logo pea mo mamata ki ai ia te au, koutou mauliʼi ia mea aia. Pea e afio anai te Atua o te tokalelei mo koutou.” (Filipe 4:9) ʼE mole tali pe e te kau Kilisitiano te moʼoni ʼo te Folafola ʼa te ʼAtua, kae ʼe nātou maʼuliʼi te ʼu meʼa ʼaē ʼe nātou ako, pea mo haga maʼuliʼi te ʼu tokoni ʼa te Tohi-Tapu—ʼi tonatou maʼuli faka famili, ʼi tanatou gāue, ʼi tonatou ʼu kokelekasio, pea mo te tahi atu ʼu faʼahi ʼo tonatou maʼuli.

4. He koʼe ʼe faigataʼa te maʼuliʼi ʼo te ʼu lao ʼa te ʼAtua?

⁴ ʼE mole faigafua te maʼuliʼi ʼo te ʼu lao pea mo te ʼu pelesepeto ʼa te ʼAtua. ʼE tou maʼuʼuli nei ʼi te mālama ʼe puleʼi e te mālohi ʼo Satana te Tevolo, ʼaē ʼe fakahigoaʼi e te Tohi-Tapu ko “te atua o te malama-nei.” (2 Kolonito 4:4; 1 Soane 5:19) Koia, ʼe maʼuhiga ai ke tou tokakaga naʼa tou fai he meʼa ʼe ina fakahalaʼi anai tatatou agatonu kia Sehova ʼAtua. ʼE tou lava taupau feafeaʼi ia tatatou agatonu?

Tou Taupau Maʼu “Te Faʼifaʼitaki ʼo Te ʼu Folafola ʼo Te Maʼuli”

5. Koteā te faka ʼuhiga ʼo te ʼui ʼaē e Sesu: “Ke muli tuʼumaʼu ia te ʼau”?

⁵ Ko te tahi faʼahi ʼo te maʼuliʼi ʼo te ʼu meʼa ʼaē neʼe tou ako ko tatatou lagolago agatonu ki te tauhi moʼoni, logola te fakafeagai ʼa te hahaʼi ʼe mole tui. Ko te faʼa kātaki ʼe ina fakamaʼua ke tou faiga lahi. Neʼe ʼui fēnei e Sesu: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” (Mateo 16:24, MN ) Neʼe mole ʼui ʼi henī e Sesu ʼe tou muliʼi anai ia ia ʼi he vāhaʼa, ʼi he māhina, peʼe ko he taʼu. Kae neʼe ina ʼui: “Ke muli tuʼumaʼu ia te ʼau.” ʼE hā mai ʼi tana ʼu palalau, ko tatatou tauhi kia te ia ʼi totatou ʼuhiga tisipulo, ʼe mole tou fai pe ʼi te ʼaho nei pea gata leva ʼapogipogi. Ko te agatonu ʼi te tauhi moʼoni, ko tona faka ʼuhiga ke tou faʼa kātaki ʼo nonofo agatonu ʼi te ala ʼaē neʼe tou fili, tatau aipe pe koteā he ʼu meʼa ʼe feala ke hoko mai kia tatou. ʼE tou lava fakahoko feafeaʼi te faʼahi ʼaia?

6. Koteā te faʼifaʼitaki ʼo te ʼu folafola ʼo te maʼuli ʼaē neʼe akoʼi e Paulo ki te kau Kilisitiano ʼo te ʼuluaki sēkulō?

⁶ Neʼe fakaloto mālohiʼi fēnei e Paulo tona kaugā gāue ko Timoteo: “Haga taupau maʼu te faʼifaʼitaki ʼo te ʼu folafola ʼo te maʼuli ʼaē neʼe ʼau fakahā atu, ʼaki te tui pea mo te ʼofa ʼaē ʼo ʼuhiga mo Kilisito Sesu.” (2 Timoteo 1:13, MN ) Koteā te faka ʼuhiga ʼo te ʼu palalau ʼa Paulo? Ko te kupu faka Keleka ʼaē neʼe fakaliliu ʼaki te kupu “faʼifaʼitaki,” ʼe faka ʼuhiga totonu ki he paki neʼe pena e he tagata fai paki. Logola neʼe mole ina pena te ʼu meʼa fuli, kae neʼe ina pena te ʼu meʼa tāfito, ke feala ki ʼaē ʼe poto ʼi te sioʼi ʼo te paki ke ina leleiʼia. ʼO toe feiā pe, ko te faʼifaʼitaki ʼo te ʼu moʼoni ʼaē neʼe akoʼi e Paulo kia Timoteo pea mo ʼihi, neʼe mole tali fakahagatonu ki te ʼu fehuʼi fuli. Kae neʼe feʼauga te ʼu akonaki ʼaia moʼo takitaki nātou—ohage pe ko he paki—ke feala ki te hahaʼi fakamalotoloto ke nātou ʼiloʼi pe koteā ʼaē ʼe fakamaʼua e Sehova kia nātou. ʼIo ke leleiʼia nātou e te ʼAtua, ʼe tonu anai ke nātou haga taupau maʼu te faʼifaʼitaki ʼo te ʼu moʼoni ʼo nātou maʼuliʼi te ʼu meʼa ʼaē neʼe nātou ako.

7. ʼE lava muliʼi feafeaʼi e te kau Kilisitiano ia te faʼifaʼitaki ʼo te ʼu folafola ʼo te maʼuli?

⁷ ʼI te ʼuluaki sēkulō, ko Imeneo, mo Alikisio, pea mo Fileto neʼe nātou faka mafola te ʼu akonaki neʼe mole ʼalutahi mo “te faʼifaʼitaki ʼo te ʼu folafola ʼo te maʼuli.” (1 Timoteo 1:18-20; 2 Timoteo 2:16, 17) Neʼe lava feafeaʼi ki te kau ʼuluaki Kilisitiano ke nātou tekeʼi te kau ʼaposita? ʼAki tanatou ako fakalelei te ʼu folafola mai te ʼAtua pea mo nātou maʼuliʼi. Ko nātou ʼaē neʼe nātou mulimuli ki te faʼifaʼitaki ʼa Paulo pea mo te tahi kau agatonu, neʼe feala ke nātou ʼiloʼi pea mo līaki ia meʼa fuli ʼaē neʼe mole ʼalutahi mo te faʼifaʼitaki ʼo te ʼu moʼoni ʼaē neʼe kua akoʼi age kia nātou. (Filipe 3:17; Hepeleo 5:14) ʼE mole nātou “mahaki [ʼi] te fiapoto mo te talapoto ki te u kupu,” kae ʼe nātou haʼele hagatonu ʼi tanatou pipiki ki te ʼAtua. (1 Timoteo 6:3-6) ʼE tou fai feiā mokā ʼe tou haga maʼuliʼi te ʼu moʼoni ʼaē neʼe tou ako. ʼE mālohi tatatou tui ʼi tatatou sio ki te ʼu toko lauʼi miliona hahaʼi ʼe nātou tauhi kia Sehova ʼi te malamanei katoa, ʼe nātou taupau maʼu te faʼifaʼitaki ʼo te ʼu moʼoni faka Tohi-Tapu ʼaē neʼe akoʼi age kia nātou.—1 Tesalonika 1:2-5.

Tou Situʼa Ki Te ʼu “Fakamatala Loi”

8. (a) Koteā ʼaē ʼe fai e Satana moʼo maumauʼi tatatou tui ia ʼaho nei? (b) Koteā te fakatokaga ʼa Paulo ʼe tou maʼu ia 2 Timoteo 4:3, 4?

⁸ ʼE faigaʼi e Satana ke ina maumauʼi tatatou agatonu ʼo ina fakatupu he ʼu lotolotolua ia tatou ʼo ʼuhiga mo te ʼu meʼa ʼaē neʼe tou akoʼi. Ohage pe ko te ʼuluaki sēkulō, ko te kau ʼaposita ʼo te temi nei pea mo ʼihi, ʼe nātou fia maumauʼi ia te tui ʼa te hahaʼi ʼaē ʼe mole nātou fai he meʼa ʼe kovi. (Kalate 2:4; 5:7, 8) ʼI ʼihi temi ʼe nātou fakaʼaogaʼi te televisio pea mo te lātio moʼo faka mafola he ʼu loi pea mo he ʼu fasituʼu ʼo ʼuhiga mo he ʼu faʼahiga fakatuʼutuʼu pea mo he ʼu meʼa ʼe fai e te kau Fakamoʼoni ʼa Sehova. Neʼe fakahā e Paulo ko ʼihi ʼe nātou līaki anai te moʼoni. Neʼe ina tohi fēnei: “Heʼe hoko mai anai he temi ʼe mole nātou toe ʼutaki anai ia te akonaki ʼaē ʼe lelei, kae ʼo mulimuli ki tonatou ʼu holi, ʼe nātou tānaki anai he kau faiako maʼa nātou, ke lave lelei ki ʼonatou ʼu taliga; pea ʼe nātou fakahaga kehe anai tonatou ʼu taliga mai te moʼoni, ʼo nātou mafuli anai ki te ʼu fakamatala loi.”—2 Timoteo 4:3, 4, MN.

9. Koteā ʼaē neʼe lagi manatuʼi e Paulo ʼi tana talanoa ki te ʼu “fakamatala loi”?

⁹ Ko ʼihi ʼi tanatou mole taupau maʼu te faʼifaʼitaki ʼo te ʼu folafola ʼo te maʼuli, neʼe nātou haga ki te ʼu “fakamatala loi.” Neʼe koteā te ʼu fakamatala loi ʼaia? Lagi ʼi te manatu ʼa Paulo ko te ʼu fagana neʼe faʼu, ohage la ko te ʼu fagana ʼaē neʼe tuʼu ʼi te tohi ʼo Topie,a ʼaē ʼe mole ko he tohi faka Tohi-Tapu. Neʼe lagi maʼu ʼi te ʼu fagana ʼaia te ʼu logo makehe mo loi. Pea tahi, ko ʼihi—“ ʼo mulimuli ki tonatou ʼu holi”—lagi neʼe kākāʼi ai tonatou ʼatamai e te hahaʼi ʼaē neʼe nātou meʼa noaʼi te ʼu lekula ʼa te ʼAtua pe neʼe nātou fatufatuʼi te kau takitaki ʼo te kokelekasio. (3 Soane 9, 10; Suta 4) Tatau aipe pe koteā ʼaē neʼe nātou tūkia ai, kae ʼe mahino ia ko ʼihi neʼe nātou leleiʼia age te ʼu loi ʼi te ʼu moʼoni ʼo te Folafola ʼa te ʼAtua. Mole tuai pea neʼe mole kei nātou maʼuliʼi te ʼu meʼa ʼaē neʼe nātou ako, pea neʼe fua kovi kia nātou ʼi te faʼahi fakalaumālie.—2 Petelo 3:15, 16.

10. Koteā te ʼu faʼahiga fakamatala loi ia ʼaho nei, pea neʼe fakahā feafeaʼi e Soane te maʼuhiga ʼaē ke tou nofo tokaga?

¹⁰ Ia ʼaho nei ʼe feala ke mole tou mulimuli ki te ʼu fakamatala loi ʼaia, mo kapau ʼe tou vakavakaʼi pea mo filifili fakalelei te ʼu meʼa ʼaē ʼe tou fakalogo kiai pea mo lau. Ohage la, ʼe uga tuʼumaʼu e te televisio, te ʼu tohi pea mo te lātio, te hahaʼi ke nātou fai te ʼu felāveʼi fakasino heʼeʼaoga. Tokolahi te hahaʼi ʼe nātou uga ke tou ako te ʼu misitelio ʼo te ʼu lotu peʼe ko te mole tui ki te ʼAtua. Ko te kau tagata sivi Tohi-Tapu popoto neʼe nātou moamoagaʼi te ʼui ʼaē ko te Tohi-Tapu ʼe haʼu mai te ʼAtua. Pea ʼi te temi nei ko te kau ʼaposita ʼe nātou faigaʼi ke nātou fakatupu ʼi te loto ʼo te kau Kilisitiano he ʼu manatu lotolotolua moʼo maumauʼi ʼo tanatou tui. Ko te tuʼutāmaki feiā neʼe hoko ʼi te ʼuluaki sēkulō ʼuhi ko te kau polofeta loi, koia neʼe fai ai e te ʼapositolo ko Soane te fakatokaga ʼaenī: “Kau ʼofaina, ʼaua naʼa koutou tui ki te folafola fuli ʼaē ʼe haʼu mai he laumālie, kae ke koutou ʼahiʼahiʼi te ʼu folafola ʼaē ʼe haʼu mai he laumālie ke koutou ʼiloʼi ai peʼe haʼu moʼoni mai te ʼAtua, heʼe kua tokolahi te kau polofeta loi kua taka ʼi te malamanei.” (1 Soane 4:1, MN ) Koia ʼe tonu ai ke tou nofo tokaga.

11. Koteā te faʼahiga puleʼaki moʼo ʼahiʼahiʼi ʼo tatou pea mo vakaʼi peʼe tou nonofo ʼi te tui?

¹¹ ʼO ʼuhiga mo te faʼahi ʼaia, neʼe faitohi fēnei ia Paulo: “Koutou haga ʼahiʼahiʼi ia koutou ke koutou ʼiloʼi peʼe koutou nonofo ʼi te tui.” (2 Kolonito 13:5, MN ) Neʼe fakaloto mālohiʼi tatou e te ʼapositolo ke tou haga ʼahiʼahiʼi tatou peʼe tou pipiki koa ki te ʼu akonaki faka Kilisitiano fuli. Kapau ʼe tou fakalogo ki te hahaʼi ʼaē ʼe muhumuhu, pea ʼe tonu ke tou vakavakaʼi ia tatou totonu ʼi te faikole. (Pesalemo 139:23, 24) ʼE tou fia maʼu tuʼumaʼu koa he hala ʼi te hahaʼi ʼa Sehova? Koteā tona tupuʼaga? Neʼe tou mamahi koa ʼuhi ko he ʼu palalau peʼe ko he ʼu aga ʼa he tahi? Kapau ʼe hoko he faʼahi feiā, ʼe tou maʼu anai koa he fakasiosio poto? ʼE faka temi te ʼu mamahi ʼaē ʼe tau mo tatou ʼi te tuʼu ʼaenī. (2 Kolonito 4:17) Tatau aipe peʼe tou felāveʼi mo ni ʼu ʼahiʼahi ʼi te kokelekasio, kae he koʼe ʼe tuku anai tatatou tauhi ki te ʼAtua? Kapau neʼe tou ʼita ki he tahi, ʼe lelei age hatatou fakatokatoka te fihifihia ʼaia pea mo tou tuku ki te ʼu nima ʼo Sehova.—Pesalemo 4:4; Tāʼaga Lea 3:5, 6; Efeso 4:26.

12. Koteā te faʼifaʼitaki lelei neʼe tuku mai e te kau Pelea?

¹² ʼAki te ʼu meʼa ʼaē ʼe tou maʼu mai tatatou ako takitokotahi pea mo te ʼu fono ʼo te kokelekasio, tou haga taupau he faʼahiga sio ʼe lelei ʼi te faʼahi fakalaumālie kae ʼaua naʼa tou fefeka fau. (1 Kolonito 2:14, 15) Pea ʼaua naʼa tou fakafihiʼi te Folafola ʼa te ʼAtua, kae ʼe lelei age ke tou hage ko te kau Pelea ʼo te ʼuluaki sēkulō ʼaē neʼe nātou vakavakaʼi fakalelei ia te Tohi-Tapu! (Gaue 17:10, 11) Koia, tou maʼuliʼi te ʼu meʼa ʼaē ʼe tou ako, tou situʼa ki te ʼu fakamatala loi kae tou pipiki maʼu ki te moʼoni.

13. ʼE lava feafeaʼi hatatou faka mafola he ʼu fakamatala loi?

¹³ ʼE ʼi ai te tahi faʼahiga fakamatala loi ʼe tonu ke tou tokakaga kiai. ʼI te agamāhani, ʼe lahi ʼaupito te ʼu fakamatala mālie ʼe feʼāveʼaki mokā ʼe tou faitohi ʼi te olotinatea. ʼE tonu ke tou tokaga ki te ʼu taʼi fakamatala ʼaia, tāfito la mo kapau ʼe mole tou ʼiloʼi papau peʼe haʼu maifea. Tatau aipe mo kapau ko he hisitolia neʼe fakahā mai e he Kilisitiano ʼe fakapotopoto, kae lagi neʼe mole logo tonu pea mo sio tonu ki te ʼu meʼa ʼaē neʼe hoko. Koia la ʼaē ʼe maʼuhiga ai ke tou tokakaga mokā ʼe tou toe fakamatala peʼe tou fakahā he ʼu logo ʼe mole tou ʼiloʼi papau peʼe moʼoni. ʼE mahino ia ʼe mole tou fia fakamatala “ni ʼu fagana ʼa ni hahaʼi heʼe lotu” peʼe ko “ni ʼu fakamatala loi ʼe nātou moamoagaʼi te meʼa ʼaē ʼe maʼoniʼoni.” (1 Timoteo 4:7; New International Version) ʼE fakamaʼua mai ke tou fepalalauʼaki ʼi te moʼoni, koia ʼe tou aga fakapotopoto anai ʼo tekeʼi ia meʼa fuli ʼe feala ai ke tou faka mafola he meʼa ʼe mole tou ʼiloʼi papau.—Efeso 4:25.

Te ʼu Fua Lelei Mokā ʼe Tou Maʼuliʼi Te Moʼoni

14. Koteā te ʼu fua lelei ʼe tou maʼu ʼi tatatou maʼuliʼi te ʼu meʼa ʼaē neʼe tou ako mai te Folafola ʼa te ʼAtua?

¹⁴ ʼE lahi anai te ʼu fua lelei ʼe tou maʼu mo kapau ʼe tou maʼuliʼi te ʼu meʼa ʼaē neʼe tou ako ʼi tatatou ako takitokotahi te Tohi-Tapu pea mo tatatou kau ki te ʼu fono. Ohage la, ʼe tou tokagaʼi anai ʼe tuputupu tatatou ʼu felogoi mo totatou ʼu tēhina pea mo tuagaʼane ʼaē ʼi te tui. (Kalate 6:10) ʼE lelei age anai tatatou faʼahiga fakakaukau mokā ʼe tou maʼuliʼi te ʼu pelesepeto faka Tohi-Tapu. (Pesalemo 19:8) Tahi ʼaē, ka tou maʼuliʼi te ʼu meʼa ʼaē ʼe tou ako, ʼe tou ‘fakamataleleiʼi te akonaki ʼa te ʼAtua’ pea ʼe mahino ia ʼe tou taki mai anai niʼihi ki te tauhi moʼoni.—Tito 2:6-10.

15. (a) Neʼe fakahā feafeaʼi e te kiʼi finemui tana lototoʼa ʼo fagonogono ʼi te faleako? (b) Koteā te ako neʼe koutou maʼu mai te faʼifaʼitaki ʼaia?

¹⁵ ʼE lahi te kau tūpulaga ʼi te kau Fakamoʼoni ʼa Sehova ʼe nātou maʼuliʼi te ʼu meʼa ʼaē neʼe nātou ako takitokotahi ʼi te Tohi-Tapu pea mo tanatou ako te ʼu tohi faka Tohi-Tapu, ʼo feiā mo tanatou kau tuʼumaʼu ki te ʼu fono. ʼAki tanatou agapoto ʼe ko he faka mafola mālohi ʼaia ki te kau faiako pea mo tonatou ʼu kaugā ako ʼi te faleako. (1 Petelo 2:12) Koutou fakatokagaʼi ia Leslie, ko te kiʼi taʼahine e taʼu 13 ʼi Amelika. ʼE ina fakahā fakahagatonu, ki muʼa atu neʼe faigataʼa kia ia hana palalau ki tona ʼu kaugā ako ʼo ʼuhiga mo tana tui, kae ʼi te tahi ʼaho neʼe fetogi tana fakakaukau. “Neʼe palalau te kalasi ki te hahaʼi ʼaē ʼe nātou faigaʼi ke nātou fakatau tanatou ʼu meʼa. Neʼe hiki te nima ʼo te tahi kiʼi taʼahine pea neʼe ina toʼo age te faʼifaʼitaki ʼo te kau Fakamoʼoni ʼa Sehova.” ʼI tona ʼuhiga Fakamoʼoni, neʼe feafeaʼi ia Leslie ʼi te temi ʼaia? ʼE ina ʼui fēnei: “Neʼe ʼau fakahā taku tui, ʼo punamaʼuli ai te tokolahi, heʼe ʼi te agamāhani ʼe ʼau nofo fakalogologo ʼi te faleako.” Neʼe koteā tona fua ia te lototoʼa ʼaia ʼa Leslie? ʼE ʼui e Leslie: “Neʼe feala ai ke ʼau tuku te kaupepa lahi pea mo te kiʼi pepa lotu ki toku kaugā ako fafine he neʼe ʼi ai tana tahi ʼu fehuʼi.” ʼE ko he meʼa fakafiafia kia Sehova mokā ʼe maʼuliʼi e te kau tūpulaga te ʼu meʼa ʼaē neʼe nātou ako pea mo lototoʼa ʼo fagonogono ʼi te faleako!—Tāʼaga Lea 27:11; Hepeleo 6:10.

16. Neʼe fua lelei feafeaʼi te Ako ʼo Te Minisitelio Faka Teokalatike ki te Fakamoʼoni tūpulaga?

¹⁶ Ko te tahi faʼifaʼitaki ko Elizabeth. Neʼe ina kamata fai te faʼahi ʼaia ʼi tona taʼu fitu pea mo te ʼu taʼu fuli ʼaē neʼe ako ai ʼi te ʼu kalasi liliki, neʼe ina fakaafe tana kau faiako ki te Fale ʼo Te Puleʼaga mokā neʼe ʼi ai hana kiʼi fai palalau ʼi te Ako ʼo Te Minisitelio Faka Teokalatike. Kapau neʼe mole feala ki hana faiako ke haʼu ki te fono, pea neʼe ina fai tana kiʼi fai palalau ʼi muʼa ʼo tana faiako mokā hili te ako. ʼI te taʼu fakaʼosi ʼo tana ako ʼi te kolesi, neʼe fai e Elizabeth te tohi e pasina hogofulu, ʼe ina fakamatala ai te ʼu fua lelei ʼo te Ako ʼo Te Minisitelio Faka Teokalatike pea mo ina fai te kiʼi akonaki ʼi muʼa ʼo te kau faiako e toko fā. Neʼe toe fakaafe mo ia ke ina fakahā he kiʼi faʼifaʼitaki ʼo te ʼu fai palalau ʼaia ʼi te Ako ʼo Te Minisitelio Faka Teokalatike, pea neʼe ina fili te kupu tāfito ʼaenī “He koʼe koa ʼe fakagafua e te ʼAtua te agakovi?” Neʼe maʼu e Elizabeth te ʼu fua lelei ʼo te polokalama ako ʼaē neʼe fai e te kau Fakamoʼoni ʼa Sehova ʼi te Ako ʼo Te Minisitelio Faka Teokalatike. ʼE mole ko ia tokotahi pe kae tokolahi te kau Kilisitiano tūpulaga ʼe nātou fakavikiviki kia Sehova ʼaki tanatou maʼuliʼi te ʼu meʼa ʼaē neʼe nātou ako mai tana Folafola.

17, 18. (a) Koteā te tokoni ʼe foaki mai e te Tohi-Tapu ʼo ʼuhiga mo te agatonu? (b) Neʼe malave feafeaʼi ki te tagata ia te agatonu ʼa te Fakamoʼoni ʼa Sehova?

¹⁷ ʼE fakaloto mālohiʼi te kau Kilisitiano e te Tohi-Tapu ke nātou agatonu ia meʼa fuli. (Hepeleo 13:18) Ko te aga fakakākā ʼe ina lava maumauʼi tatatou ʼu felogoi mo ʼihi, kae tāfito mo Sehova. (Tāʼaga Lea 12:22) ʼAki tatatou agatonu moʼoni ʼe ko he fakamoʼoni ʼaia ʼe tou maʼuliʼi te ʼu meʼa ʼaē ʼe tou ako, pea neʼe uga ai te tokolahi ke nātou fakaʼapaʼapa lahi ki te kau Fakamoʼoni ʼa Sehova.

¹⁸ Tou vakaʼi te meʼa neʼe hoko ki te tagata solia ko Phillip. Neʼe ina sinie tana seki kae neʼe mole ina tohi peʼe ko te fia, pea neʼe hoki ina ʼiloʼi te meʼa ʼaia ʼi tana maʼu te tohi. Neʼe maʼu tana seki e te Fakamoʼoni ʼa Sehova, pea neʼe ina liufaki ʼuhi ko tana lotu. Neʼe punamaʼuli ia Phillip. Neʼe ina ʼui fēnei: “Neʼe feala pe ke ina kaihaʼa taku ʼu tola e 9 000!” Kae ʼi te tahi faʼahi neʼe lotomamahi he neʼe kaihaʼa tona puloga ʼi te ʼēkelesia. ʼE mahino ia neʼe ko hona kaumeʼa ʼaē neʼe ina toʼo tona puloga, kae ko te tagata kehe ia ʼaē neʼe ina liufaki age tana seki ʼaē neʼe feala ke ina tohi kiai te ʼu lauʼi afe tola! ʼE mahino ia ko te agatonu ʼa te kau Kilisitiano ʼe ina fakavikiviki ia Sehova ʼAtua!

Koutou Haga Maʼuliʼi Te ʼu Meʼa Neʼe Koutou Ako

19, 20. ʼE fua lelei feafeaʼi anai kia tatou mokā ʼe ʼalutahi totatou maʼuli mo te ʼu meʼa ʼaē ʼe tou ako ʼi te Tohi-Tapu?

¹⁹ Ko te hahaʼi ʼaē ʼe nātou maʼuliʼi te ʼu meʼa neʼe nātou ako ʼi te Folafola ʼa te ʼAtua, ʼe nātou utu anai te ʼu fua lelei ʼaupito. Neʼe tohi fēnei e te tisipulo ko Sakopo: “Ko ia ʼaē ʼe sio loloto ki te lao haohaoa ʼo te ʼāteaina, pea mo haga nofo ai, ko te tagata ʼaia ʼe fiafia anai ʼi tona maʼuliʼi, koteʼuhi ʼe mole ko he tagata fagono ʼe loto galogalo, kae ko he tahi ʼe ina fai te gāue.” (Sakopo 1:25, MN ) Ei, kapau ʼe ʼalutahi totatou maʼuli mo te ʼu meʼa ʼaē ʼe tou ako ʼi te Tohi-Tapu, ʼe tou fiafia moʼoni anai pea ʼe feala anai ke tou tauʼi te ʼu fihifihia ʼo te maʼuli. Kae tāfito ʼe tou maʼu anai te tapuakina ʼa Sehova pea mo te ʼamanaki ʼaē ki te maʼuli heʼegata!—Tāʼaga Lea 10:22; 1 Timoteo 6:6.

²⁰ Koia koutou haga ako te Folafola ʼa te ʼAtua. Koutou fakatahi tuʼumaʼu mo te kau atolasio ʼa Sehova, pea mo koutou tokaga ki te ʼu akonaki ʼaē ʼe fai ʼi te ʼu fono. Koutou haga maʼuliʼi te ʼu meʼa ʼaē ʼe koutou ako, pea “e afio anai te Atua o te tokalelei mo koutou.”—Filipe 4:9.

[Kiʼi nota]

Kei Koutou Manatuʼi Koa?

• Koteā “te faʼifaʼitaki ʼo te ʼu folafola ʼo te maʼuli,” pea e feafeaʼi hatatou haga taupau maʼu?

• Koteā te ʼu “fakamatala loi” ʼaē ʼe tonu ke tou tekeʼi?

• Koteā te ʼu fua lelei ʼe maʼu e nātou ʼe nātou maʼuliʼi te ʼu meʼa ʼe nātou ako mai te Folafola ʼa te ʼAtua?

[Paki ʼo te pasina 17]

Neʼe lava tekeʼi feafeaʼi e te kau ʼuluaki Kilisitiano te kau ʼaposita?

[Paki ʼo te pasina 18]

ʼE feala ke fakatupu he ʼu manatu lotolotolua e te lātio mo te televisio, mo te ‘Internet’, pea mo te ʼu ʼaposita ʼo te temi nei

[Paki ʼo te pasina 19]

ʼE mole ko he aga fakapotopoto hatatou fakamatala he ʼu logo neʼe mole tou logo tonu kiai

[Paki ʼo te pasina 20]

ʼE maʼuliʼi e te kau Fakamoʼoni ʼa Sehova te ʼu meʼa ʼaē ʼe nātou lau ʼi te Folafola ʼa te ʼAtua, ʼi tanatou gāue, ʼi te faleako, pea mo te tahi ʼu faʼahi