ʼU Tagata Tauhi Ōvi, Koutou ‘Fakaāva Lahi Tokotou Loto’!

“KO SEHOVA ʼe ko toku Tagata Tauhi ōvi. ʼE mole ʼau masiva anai.” ʼAki te ʼu palalau ʼaia, neʼe fakahā e Tavite tana falala katoa ki tona ʼAtua. ʼI hona ʼaluʼaga fakalaumālie, neʼe taki ia ia e Sehova ki “te ʼu koga meʼa lunaʼia” pea mo “te ʼu mālōlōʼaga ʼe fakapala lelei,” ʼo ina ʼave ia ia “ ʼi te ʼu ala ʼo te faitotonu.” ʼI te temi ʼaē neʼe ʼatakai ia ia e te ʼu hahaʼi fakafeagai, neʼe maʼu e Tavite te tokoni pea mo te fakaloto mālohi, ʼo uga ai ia ia ke ina ʼui fēnei kia Sehova: “ ʼE mole ʼau mataku ki he meʼa kovi, heʼe ke nofo mo ʼau.” ʼAki te Tagata Tauhi Ōvi lahi ʼaia, neʼe fakatotonu ai e Tavite ke ‘nofo ʼi te fale ʼo Sehova ʼi te loaloaga ʼo te ʼu ʼaho.’​—⁠Pesalemo 23⁠:​1-6.

Tahi ʼaē meʼa, ʼaki he lotoʼofa, neʼe toe gaohi fakaleleiʼi e Sehova tona ʼAlo ʼulu tokotahi, pea ʼi tana kei nofo ʼi te kele, neʼe faʼifaʼitakiʼi lelei e Sesu te loto tokaga ʼaia ʼi tana ʼu felogoi mo tana kau tisipulo. Koia, ʼe fakahigoaʼi ia ia e te Tohi-Tapu ko “te tauhiovi agalelei,” “te Tauhiovi lahi,” pea mo “te Aliki tauhiovi.”​—⁠Soane 10⁠:11; Hepeleo 13⁠:20; 1 Petelo 5⁠:​2-4.

ʼE kei hoko atu e Sehova pea mo Sesu Kilisito tanā tauhi te ʼu ōvi ʼaē ʼe ʼoʼofa kia nāua. ʼE nā fakahoko tanā tauhi ōvi ʼaia ʼaki te fakatuʼutuʼu ʼofa ʼaē ke ʼi ai he kau tauhi ōvi ʼo te kokelekasio. Neʼe palalau Paulo ki te kau tauhi ōvi ʼaia ʼi tana ʼui ʼaē: “Koutou tokaga kia koutou mo te fagaovi katoa, kua fakanofo koutou e te Laumalie-Maonioni, ko he kau [tagata taupau], ke koutou tauhi te [kokelekasio] o te Atua aia nee [ina] totogi aki tona taataa.”​—⁠Gaue 20⁠:⁠28.

ʼE mole faigafua te tauhi ʼo te ʼu ōvi ohage ko tona fai e Sehova pea mo Sesu Kilisito, kae ʼe maʼuhiga ʼaupito te gāue ʼaia ʼi te temi nei. Koutou fakakaukauʼi te toko lauʼi miliona kau Fakamoʼoni foʼou ʼaē neʼe nātou papitema ʼi te ʼu taʼu pe ʼaenī e tolu! Ko te hahaʼi foʼou ʼaia, ʼe mole heʼeki nātou katoa ʼi te faʼahi fakalaumālie, koteʼuhi ʼe mole heʼeki lahi tonatou ʼu taʼu gāue. Koutou manatuʼi foki mo te kau Fakamoʼoni ʼaē kei liliki peʼe tūpulaga. ʼE ʼaoga ki te ʼu mātuʼa ʼo feiā mo te kau tauhi ōvi ʼo te kokelekasio ke nātou tokaga kia nātou.

ʼE moʼoni, ko te kau Kilisitiano fuli ʼe nātou tauʼi te ʼu fakaneke ʼo tuʼa, pea mo te ʼu fakaneke ʼa te hahaʼi. Ko tatou fuli ʼe tonu ke tou tauʼi te fakaneke mālohi ʼaē ko te maʼuli faʼitaliha ohage ko te mālama. ʼI ʼihi ʼu fenua, ʼe lagi lotovaivai ʼihi kaugā fai faka mafola ʼo te Puleʼaga ʼuhi ko te mole tali ʼo te logo e te hahaʼi. Tokolahi te ʼu kaugā fai faka mafola ʼe nātou mahahaki kovi. Ko ʼihi ʼe mole kei lagi nātou fakamuʼamuʼa te Puleʼaga, ʼuhi ko te ʼu fihifihia faka paʼaga. ʼI tona fakahagatonu, ʼe ʼaoga pea mo maʼuhiga kia tatou fuli​—⁠ʼo feiā mo nātou ʼaē kua fualoa ʼi te moʼoni​—⁠ke tokoni mai te kau tagata tauhi ōvi ʼofa.

Te Tupuʼaga Lelei ʼo Tanatou Tauhi Ōvi

Neʼe fai te tokoni ʼaenī ki te kau Kilisitiano ʼo te ʼuluaki sēkulō: “Koutou fakaava lahi outou loto!” (2 Kolonito 6⁠:​11-13) ʼE lelei ke mulimuli te kau tagata ʼāfea ki te tokoni ʼaia mokā nātou fakahoko tanatou ʼu gāue faka tauhi ōvi. ʼE nātou lava fakahoko feafeaʼi te faʼahi ʼaia? Pea e feafeaʼi ki te kau tagata faifekau faka minisitelio, ʼaē ʼe tokolahi ia nātou ʼe liliu anai ko he ʼu tagata tauhi ōvi?

Kapau ʼe loto e te kau tagata ʼāfea ke nātou liliu ko he tapuakina ki te faga ōvi, pea ʼe mole tonu ke nātou fakahoko tanatou gāue ʼuhi pe ko honatou maʼua. ʼE fai te tokoni ʼaenī kia nātou: “Koutou tauhi te fagaʼovi a te Atua kua [tuku] atu kia koutou ke koutou leoleo, aua tautou fai uhi kua fakamaua atu, kae koutou fai mo te loto leilei, aua naa koutou fai o uhiga mo te manumanu paaga, kae ke koutou fai mo he loto faafai.” (1 Petelo 5⁠:⁠2) Koia ke fua lelei te gāue ʼa te ʼu tagata tauhi ōvi, ʼe tonu ke nātou tauhi ʼaki he lotolelei pea mo he loto faʼafai. (Soane 21⁠:​15-17) Ko tona faka ʼuhiga, ʼe tonu ke nātou sio ki te ʼu meʼa ʼaē ʼe ʼaoga ki te faga ōvi pea ke nātou foimo foaki he tokoni. Ko tona faka ʼuhiga, mokā nātou felogoi mo te hahaʼi, pea ʼe tonu ke nātou fakahā te ʼu kalitate faka Kilisitiano ʼo te fua ʼo te laumālie ʼo te ʼAtua.​—⁠Kalate 5⁠:​22, 23.

ʼI ʼihi temi, ʼe kau ki te gāue faka tauhi ōvi te ʼaʼahi ʼo te ʼu tēhina.a Kae ko te ʼu tagata tauhi ōvi ʼaē ʼe nātou ‘fakaāva lahi tonatou loto’ ʼe mole nātou gata ai. Ko tona faka ʼuhiga, ʼe mole nātou fai pe te ʼu ʼaʼahi faka tauhi ōvi. Kae ʼe nātou fakaʼaogaʼi te ʼu faigamālie fuli moʼo tauhi te faga ōvi.

Koutou Akoʼi ʼIhi Ke Nātou Liliu Ko He Kau Tauhi Ōvi

Ko he tēhina, tatau aipe peʼe taʼu fia, kae ʼe “fia fai ki te tuʼulaga tagata taupau, pea ʼe holi ki he gāue lelei.” (1 Timoteo 3⁠:​1, MN ) Tokolahi te kau tagata faifekau faka minisitelio ʼe nātou fakahā ʼe nātou lotolelei ki he tahi ʼu pilivilesio. Koia, ʼe tokoni fakafiafia te kau tagata ʼāfea ki te ʼu tēhina lotolelei ʼaia ke nātou fakahoko te faʼahi maʼuhiga ʼaia, ʼaē ko te “fia fai ki te tuʼulaga tagata taupau.” Ko tona faka ʼuhiga, ʼe nātou akoʼi anai nātou ke nātou liliu ko he ʼu tagata tauhi ōvi lelei.

ʼI tanatou mulimuli fakalelei ki te ʼu lekula māʼoluga ʼa te ʼAtua, neʼe mole fakavaivai te kokelekasio faka Kilisitiano ʼa Sehova e he ʼu tagata tauhi ōvi loi, ohage ko nātou ʼaē ʼe fakamatala ia Esekiele 34⁠:​2-6. Neʼe tonu te fehiʼa ʼa Sehova kia nātou, koteʼuhi neʼe mole nātou fafaga te faga ōvi, kae neʼe nātou fafaga pe ia nātou totonu. Neʼe mole nātou fakaloto mālohiʼi ia ia ʼaē neʼe vaivai, mo fakamālōlō ia ia ʼaē neʼe mahaki, mo haʼihaʼi te ʼu lavea ʼo ia ʼaē neʼe lavea pea neʼe mole nātou fakaliliu mai ia ia ʼaē neʼe hēʼia pe neʼe puli. Neʼe mole nātou hage ko he ʼu tagata tauhi ōvi, kae neʼe nātou hage ko he ʼu lupo, he neʼe nātou gaohi koviʼi te ʼu ōvi. Neʼe mavetevete te ʼu ōvi ʼaē neʼe mole nātou tokaga kiai, pea neʼe nātou hēʼia he neʼe mole he tahi neʼe tokaga kia nātou.​—⁠Selemia 23⁠:​1, 2; Naume 3⁠:18; Mateo 9⁠:⁠36.

ʼO mole hage ko te kau tagata tauhi ōvi heʼe agatonu ʼaia, ko te kau tagata tauhi ōvi Kilisitiano ʼe nātou mulimuli ki te faʼifaʼitaki ʼa Sehova. ʼI hona ʼaluʼaga fakalaumālie, ʼe nātou tokoni ki te taki ʼo te ʼu ōvi ki “te ʼu koga meʼa ʼaē ʼe lunaʼia” pea mo “te ʼu mālōlōʼaga ʼaē ʼe fakapala lelei.” ʼE nātou faiga ke nātou takitaki te ʼu ōvi ʼaia “ ʼi te ʼu ala ʼo te faitotonu,” ʼo tokoni kia nātou ke nātou mahino lelei ki te Folafola ʼa Sehova pea ke nātou tahi maʼuliʼi. ʼE feala ke nātou fai lelei te ʼu faʼahi ʼaia heʼe nātou ‘poto ʼi te faiakonaki.’​—⁠1 Timoteo 3⁠:​2, MN.

ʼE lahi te ʼu meʼa ʼe akoʼi mai e te kau tagata ʼāfea mai muʼa lolotoga te ʼu fono ʼo te kokelekasio. Kae ʼe toe feala foki ke akoʼi e te kau tagata ʼāfea ia tatou takitokotahi. ʼE moʼoni, ko ʼihi ʼe ko he kau faiako lelei mokā nātou fai palalau mo he tahi, pea ko ʼihi ʼe nātou popoto age ʼi te ʼu faiakonaki mai muʼa. Kae kapau ʼe ʼi ai he kiʼi faʼahi ʼi te faiakonaki ʼe mole faʼa poto lelei ai, pea ʼe mole faka ʼuhiga leva ʼe mole feala ke faiakonaki. Ko te kau tagata ʼāfea ʼe nātou fakaʼaogaʼi te ʼu fealagia fuli moʼo akoʼi te hahaʼi, ʼo kau kiai tanatou ʼu gāue faka tauhi ōvi. Ko ʼihi gāue faka tauhi ōvi ʼe mulimuli ki he ʼu meʼa kua talagaʼi, ohage la ko te ʼu ʼaʼahi ʼaē kua fakatuʼutuʼu. Kae ʼe lahi te ʼu gāue faka tauhi ōvi ʼe feala foki ke fai ʼi te ʼu temi faigamālie, pea ʼe toe ʼaoga ʼaupito mo te faʼahi ʼaia.

Ko He ʼu Tagata Tauhi Ōvi Mo Faiako ʼi Te Temi Fuli Pe

Moʼo fakahoko lelei tana gāue, ʼe tonu ki he tōketā ke ina ʼiloʼi te ʼu meʼa ʼaē ʼe tonu ke ina fai pea ke māhani ʼi tana gāue. Kae ʼe leleiʼia e te hahaʼi tana gāue mo kapau ʼe ina fai ʼaki he lotoʼofa, mo he loto mahino pea mo tokaga moʼoni kia nātou. ʼE tonu ke ina maʼu te ʼu kalitate ʼaia. ʼE toe maʼua ke maʼu e he tagata faiako pea mo tauhi ōvi lelei te ʼu kalitate ʼaia, ʼi te temi fuli. Ko he tagata faiako ʼe tonu anai ke nofo teuteu moʼo akoʼi te hahaʼi ʼi te temi fuli pe ʼaē ʼe ʼaoga kiai. ʼE ʼui fēnei ia Tāʼaga Lea 15⁠:23: “ ʼE ko he meʼa lelei te fai ʼo he palalau ʼi tona temi totonu!” Ko te “temi totonu” ʼe feala ke faka ʼuhiga ki te temi ʼaē ʼe palalau ai mai ʼoluga, peʼe ʼi tana fai faka mafola ʼi te ʼu ʼapi, peʼe ka fai palalau mo he tahi ʼi te Fale ʼo te Puleʼaga peʼe ʼi te telefoni. Pea ko he tagata tauhi ōvi lelei ʼe faiga ke ina fakahā he ʼu kalitate lelei ʼi te temi fuli pe, kae mole ko te temi pe ʼaē ʼe ina fai ai te ʼu ʼaʼahi faka tauhi ōvi. ʼI tana ‘fakaāva lahi tona loto,’ ʼe ina fakaʼaogaʼi lelei anai te ʼu temi faigamālie fuli moʼo tauhi ki te ʼu ōvi, ʼo tokaga kia nātou ʼi tona temi totonu. Kapau ʼe fai feiā, pea ʼe ʼofainaʼi anai e te ʼu ōvi.​—⁠Maleko 10⁠:⁠43.

Ko Wolfgang, ʼaē kua tagata ʼāfea ʼi te temi nei, ʼe ina manatuʼi te ʼaʼahi ʼo tona famili e te tēhina faifekau faka minisitelio pea mo tona ʼohoana. ʼE ina ʼui fēnei: “Neʼe leleiʼia ʼaupito e tamā ʼu toe te loto tokaga ʼaē neʼe ina fakahā age kia nātou pea mo tamatou fakatahi fakafiafia mo nāua. ʼE kei nātou talanoa pe kiai.” Ei, neʼe fakahā e te tēhina faifekau faka minisitelio ʼaia tana loto tokaga; neʼe ina ‘fakaāva lahi tona loto.’

ʼE toe feala ke ‘fakaāva lahi tokotou loto,’ mokā koutou ʼaʼahi te kau mahahaki, peʼe koutou faitohi moʼo fakaloto mālohiʼi nātou, peʼe koutou telefoni kia nātou​—⁠ke nātou ʼiloʼi ai ʼe koutou tokaga kia nātou! Koutou foaki takotou tokoni ʼi te temi ʼaē ʼe ʼaoga ai. Kapau ʼe nātou fia fai palalau, pea koutou fakalogo fakalelei. Koutou fakamatala he ʼu meʼa fakaloto mālohi pea mo fakafiafia neʼe hoko ʼi te kokelekasio pea ʼi te tahi ʼu koga meʼa. Koutou tokoni kia nātou ke nātou manatu tāfito ki te ka haʼu faka kolōlia ʼaē ka maʼu anai e te hahaʼi ʼaē ʼe ʼoʼofa kia Sehova.​—⁠2 Kolonito 4⁠:​16-18.

ʼO Hilifaki Ki Te ʼu ʼAʼahi Faka Tauhi Ōvi

Kapau ʼe koutou manatuʼi te fakatuʼutuʼu ʼo te gāue faka tauhi ōvi, pea ʼe koutou mahino anai ko te ʼu ʼaʼahi faka tauhi ōvi ki te ʼu loto fale ʼo te ʼu tēhina, logola tonatou maʼuhiga, ʼe ko he koga pe ia ʼo te gāue ʼaia. Ko he tagata tauhi ōvi ʼofa ‘ ʼe ina fakaāva lahi tona loto’ ke feala ke ʼolo age kia ia te hahaʼi ʼi te ʼu ʼaluʼaga fuli pe pea ʼi te temi fuli pe. ʼAki tana ʼu felogoi ʼofa ʼaē ʼe ina maʼu mo te ʼu tēhina, ʼe nātou ʼiloʼi papau ai ka hoko he ʼu temi faigataʼaʼia, pea ʼe mole ʼaoga ke nātou tuʼania heʼe nātou ʼiloʼi ko tonatou tēhina ʼofa, te tagata Kilisitiano tauhi ōvi, ʼe tokaga kia nātou.​—⁠Pesalemo 23⁠:⁠4.

Ei, ko koutou fuli kau tagata tauhi ōvi faka Kilisitiano, koutou ‘fakaāva lahi ʼokotou loto.’ Koutou fakahā ʼe koutou ʼofa moʼoni ki tokotou ʼu tēhina​—⁠koutou fai ia meʼa fuli ʼaē ʼe koutou lavaʼi moʼo tokoni kia nātou, mo fakamokomoko tonatou loto, pea mo fakaloto mālohiʼi nātou ʼi te faʼahi fakalaumālie. Koutou tokoni kia nātou ke nātou tutuʼu maʼu ʼi te tui. (Kolose 1⁠:23) ʼE maʼu anai e te ʼu ōvi ia meʼa fuli pe ʼaē ʼe nātou loto kiai, heʼe tapuakina nātou ʼaki te ʼu tagata tauhi ōvi ʼe nātou ‘fakaāva lahi ʼonatou ʼu loto.’ ʼE nātou fakatotonu mālohi anai, ohage ko Tavite, ke nātou nonofo ʼi te ʼapi ʼo Sehova ʼi te loaloaga ʼo te ʼu ʼaho. (Pesalemo 23⁠:​1, 6) Ei ko te meʼa ʼaia ʼaē ʼe fia fai tāfito anai e he tagata tauhi ōvi ʼofa.

[Kiʼi nota]

[Paki ʼo te pasina 30]

Ko Te Kau Tagata Tauhi Ōvi Kilisitiano

• ʼE nātou tauhi ʼaki he lotolelei pea mo he loto faʼafai

• ʼE nātou fafaga pea mo tokakaga ki te faga ōvi

• ʼE nātou tokoni ki ʼihi ke nātou liliu ko he ʼu tagata tauhi ōvi

• ʼE nātou ʼaʼahi ia nātou ʼaē ʼe mahaki pea mo tokaga kia nātou

• ʼE nātou fia tokoni ki tonatou ʼu tēhina ʼi te temi fuli pe

[Paki ʼo te pasina 31]

Ko te kau tagata ʼāfea ʼe ko he ʼu tagata tauhi ōvi ʼi te temi fuli pe, ʼi te fai faka mafola, ʼi te ʼu fono, pea mokā nātou fai palalau mo te hahaʼi