He Koʼe ʼe Tonu Ke Koutou Faikole?
“E KOUTOU kole pea e mole koutou mau, koteuhi e kovi tautou kole . . . Koutou fakaovi ki te Atua pea e fakaovi atu anai kia koutou.” (Sakopo 4:3, 8) Ko te ʼu palalau ʼaia ʼa Sakopo, te tisipulo ʼa Sesu, ʼe ina uga tatou ke tou vakavakaʼi pe koʼe ʼe tou faikole.
ʼE mole tou faikole pe ki te ʼAtua moʼo fakahā age te ʼu meʼa ʼaē ʼe tou loto kiai. ʼI tana Akonaki ʼi te Moʼuga, neʼe ʼui fēnei e Sesu: “[E] iloi e te Atua, tau Tamai, pe ko te mea fea e aoga ke ke mau, i mua o tau kole kia te ia.” Kae neʼe toe ʼui fēnei e Sesu: “Koutou [haga] kole, pea e foaki atu anai kia koutou.” (Mateo 6:8; 7:7) ʼE loto e Sehova ke tou fakahā age te ʼu meʼa ʼaē ʼe tou loto kiai. Kae ʼe mole ko te tupuʼaga pe ʼaia ʼo tatatou faikole.
Ko te ʼu kaumeʼa moʼoni ʼe mole nā fai palalau pe ʼi te temi ʼaē ʼe nā loto ai ki he meʼa. ʼE nā fetokagaʼaki pea ʼe tuputupu tana fakakaumeʼa mokā ʼe nā fefakahāʼaki tana ʼu manatu. ʼO toe feiā mo tatou, ʼaua naʼa tou faikole pe ʼi te temi ʼaē ʼe tou loto ai ki he meʼa. He ko te faikole ʼe ina faka fealagia mai ke tou fakamālohiʼi tatatou ʼu felogoi mo Sehova, ʼo tou fakahā ai tatatou tauhi katoa ʼaē kia te ia.
Ei, neʼe foaki mai e te ʼAtua te pilivilesio ke tou faikole ke feala ai hatatou fakaōvi age kia te ia. ʼE hoki feala ke hoko te faʼahi ʼaia mo kapau ʼe tou fakahā ki te ʼAtua te ʼu meʼa ʼaē ʼe tou logoʼi ʼi totatou loto, kae mole tou lau hoholo he ʼu kole kua tou maʼu fakaʼatamai. ʼE ko he meʼa fakafiafia hatatou palalau mo Sehova ʼi te faikole! Tahi ʼaē meʼa, ʼe ʼui fēnei e te tāʼaga lea ʼi te Tohi-Tapu: “Ko te faikole ʼa te hahaʼi faitotonu, ʼe ko he meʼa fakafiafia kia ia.”—Tāʼaga Lea 15:8.
Neʼe hiva fēnei ia te tagata fai pesalemo ko Asafe: “Kia te ʼau, ʼe ko he meʼa lelei haku fakaōvi ki te ʼAtua.” (Pesalemo 73:28) Kae moʼo fakaōvi ki te ʼAtua, ʼe mole gata ʼaki pe tatatou faikole. Koutou fakatokagaʼi peʼe hā feafeaʼi te faʼahi ʼaia ʼi te fakamatala ʼaenī:
“Nee leaʼage he tahi [ʼi te ʼu] tisipulo [ʼa Sesu] kia te ia: ‘Aliki, fakaʼako matou ki te faikole.’ ” Neʼe tali fēnei age e Sesu: “Ka koutou faikole, koutou lau: ‘Tamai ke tapuha tou huafa, ke aumai tau pule.’ ” (Luka 11:1, 2) ʼE feala koa ke ʼi ai he ʼuhiga ʼo tatatou faikole, mo kapau neʼe mole tou ʼuluaki ako muʼa pe ko ai te huafa ʼo te ʼAtua pea ʼe tāpuha feafeaʼi anai? Pea ʼe feafeaʼi hatatou faikole ʼo mulimuli ki te ʼu palalau ʼaia ʼa Sesu, mo kapau ʼe mole tou mahino pe koteā te Puleʼaga ʼo te ʼAtua? ʼE feala ke tou mahino ki te ʼu faʼahi ʼaia mo kapau ʼe tou ako fakalelei te Tohi-Tapu. Ko te ʼatamai mālama ʼaē ka tou ako ai, ʼe tokoni mai anai ke tou ʼiloʼi ia te ʼAtua pea mo mahino ki tana ʼu ala. Tahi ʼaē meʼa, kapau ʼe tou feʼiloʼi lelei ʼaki mo Sehova ʼAtua, pea ʼe tou fakaʼāsili ōvi pea mo tauhi katoa anai kia te ia. Pea ʼe tokoni mai anai te faʼahi ʼaia ke tou palalau faʼifaʼitaliha kia te ia ʼi tatatou faikole.
ʼE Lava Fakatokatoka e Te Faikole Te ʼu Fihifihia
Kapau ʼe tou maʼu he ʼu felogoi lelei mo Sehova, pea ʼe tokoni anai kia tatou ke tou fakatokatoka te ʼu fihifihia. Koutou fakatokagaʼi pe neʼe hoko feafeaʼi te faʼahi ʼaia ʼi te ʼu ʼaluʼaga ʼaenī. ʼE nātou fakahā mai ko nātou ʼaē ʼe faikole ʼe feala ke faka mālohiʼi tanatou ʼu felogoi mo Sehova.
ʼI Pelesile, ko te fafine ʼe higoa ko Maria, neʼe faikole ki te ʼAtua ke tokoni age kia ia. Neʼe fia agatuʼu ki te ʼu talatisio ʼāfea, ʼi tana sio ki te malualoi ʼa te hahaʼi. Neʼe līaki e Maria tona ʼohoana, mo tana fānau, pea mo tona loto fale. Neʼe ina kamata fakaʼaogaʼi mo te toloke. Kae ʼi tana mole maʼu te fiafia, neʼe ina avahi tona loto ki te ʼAtua pea mo faikole ke tokoni age.
Mole tuai, pea neʼe ʼolo age te ʼu Fakamoʼoni ʼa Sehova e lua pea neʼe nā tuku age kia Maria te nusipepa ʼo Te Tule Leʼo, neʼe tā ai te alatike ʼo ʼuhiga mo te maʼuhiga ʼaē ke kita tali te takitaki ʼa te ʼAtua. Neʼe malave ki tona loto, pea ʼi te ʼaho pe ʼaia neʼe kamata tana ako Tohi-Tapu mo te kau Fakamoʼoni. Ki muli age, ʼaki tana ako ʼaia, neʼe ina toe fakatokatoka mo tona maʼuli faka famili. ʼI tana kua ʼiloʼi ia Sehova, neʼe ina fia fakahā leva tona ʼofa kia te ia. Neʼe ʼui fēnei e Maria: “Neʼe ʼau fetogi taku aga. ʼI te kamata, neʼe fakafeagai toku ʼohoana pea mo toku famili ki taku ako Tohi-Tapu. Kae ʼi tanatou sio ki te ʼu fetogi ʼaē neʼe ʼau fai, neʼe nātou kamata fakaloto mālohiʼi ʼau.” Ki muli age, neʼe foaki e Maria tona maʼuli kia Ia ʼaē ʼe ina logoʼi te ʼu faikole.
Logola neʼe ʼohoana José mo te fafine finemui, pea neʼe lelei tana gāue ʼi Polivia, kae neʼe mole fiafia. Neʼe mavete mo tona ʼohoana, he neʼe faiʼaga ia José mo te tahi fafine. Neʼe lahi tana ʼinu kava pea neʼe manatu ia ʼe mole kei ʼi ai hona ʼaoga. ʼE ʼui fēnei e José: “Neʼe ʼau kamata faikole ʼaki toku loto katoa, pe koteā te meʼa ʼaē ʼe tonu ke ʼau fai moʼo fakafiafia ʼo te ʼAtua. Mole fualoa, pea neʼe ʼōmai te kau Fakamoʼoni ʼa Sehova ki te koga meʼa ʼaē ʼe ʼau gāue ai, ʼo nātou fakaafe te hahaʼi ke nātou ako te Tohi-Tapu, kae neʼe ʼau kapu nātou. Neʼe hoko tuʼa tolu te meʼa ʼaia. ʼI te temi fuli pe ʼaē neʼe ʼau faikole ai ke ʼau maʼu he tokoni, neʼe ʼōmai te kau Fakamoʼoni. Ki muli age, neʼe ʼau fakatotonu leva ke ʼau fakalogo mokā nātou toe ʼōmai. Neʼe ʼau lau katoa te Tohi-Tapu pea neʼe lahi taku ʼu fehuʼi, pea neʼe lelei tuʼumaʼu tanatou ʼu tali. ʼI taku ʼiloʼi ia Sehova, neʼe fetogi ai te fakatuʼutuʼu ʼo toku maʼuli, pea ko toku ʼu kaumeʼa ʼi te kau Fakamoʼoni neʼe ko he ʼu faʼifaʼitaki fakaloto mālohi! Neʼe ʼau mavete mo te fafine ʼaē neʼe ma nonofo pea mo toku ʼu kaumeʼa ʼaē neʼe mātou ʼinu kava fakatahi. Mole tuai, pea neʼe ʼau toe liliu ki toku ʼohoana pea mo taku fānau. Neʼe ʼau papitema ʼi te kamata ʼo te taʼu 1999.”
ʼI Italia, neʼe tokakovi ia Tamara mo tona ʼohoana, pea neʼe faikole ke ina maʼu te poto. Neʼe liliu te fafine ʼaia ʼo agamālohi, heʼe ʼi tona taʼu 14 neʼe tā ia ia pea mo kapu e tona famili. ʼE ʼui fēnei e Tamara: “Neʼe ʼau maʼu te Tohi-Tapu pea neʼe ʼau kamata lau. ʼI te tahi po, neʼe ʼau lau ko ‘te maʼu ʼo te poto ʼe hage ko te maʼu ʼo he ʼu koloā maʼuhiga neʼe fufū.’ Pea neʼe ʼau faikole ke ʼau maʼu te poto ʼaia. (Tāʼaga Lea 2:1-6) ʼI te uhu ake, neʼe ʼōmai te kau Fakamoʼoni ʼa Sehova. Neʼe ʼau kamata ako te Tohi-Tapu mo nātou, kae neʼe ʼaoga he temi ke ʼau maʼuliʼi te ʼu meʼa ʼaē neʼe ʼau ako. Ki muli age, neʼe ʼau fakatotonu ke ʼau muliʼi te maʼuli faka Kilisitiano pea neʼe ʼau papitema. ʼI te temi nei, ko toku ʼohoana pea mo ʼau, ʼe ma tokoni ki te hahaʼi ke nātou maʼu te ʼu lelei mai te poto ʼo te ʼAtua.”
Ko Beatriz neʼe kau ʼi te hahaʼi maʼuhiga ʼo Caracas, ʼi Venezuela. Kae neʼe mavete mo tona ʼohoana pea neʼe lotomamahi ai. ʼI tana mole kei ʼiloʼi he puleʼaki, neʼe faikole lolotoga te ʼu hola. ʼI te uhu ake, neʼe fakatatagi tona matapā. Neʼe ʼita ai, pea neʼe ina fakasiosio ʼi te kiʼi pu ʼo tona matapā pea neʼe sio ki te toko lua mo tana ʼu kato. Neʼe mole ina avahi te matapā kae ʼi muʼa ʼo te mavae ʼa te taumatuʼa, neʼe nā ʼai te kiʼi pepa lotu ʼi tona lalo matapā. Ko tona kupu tāfito: “Koutou Ako Te Tohi-Tapu.” Neʼe feala koa ke ʼi ai he pikipikiga ʼo tanā ʼōmai ʼaia, pea mo te ʼu faikole ʼaē neʼe ina fai ʼanapō? Neʼe ina toe pāui nāua. Mole tuai pea fai tana ako Tohi-Tapu pea mo papitema ki muli age. Kua fiafia nei ia Beatriz pea ʼe ina akoʼi ki te hahaʼi peʼe feafeaʼi te maʼu ʼo te fiafia.
Neʼe faikole Carmen ke ina lava tauʼi tona ʼaluʼaga fakaʼofaʼofa. Neʼe ko tana ʼu tamaliki e hogofulu pea ko tona ʼohoana, ia Rafael, neʼe ko te tagata ʼinu. Neʼe ʼui fēnei e Carmen: “Neʼe ʼau fai te ʼu fō ʼa te hahaʼi ke maʼu ai haku falā.” Kae neʼe ʼāsili te ʼinu kava ʼa Rafael. “Neʼe kamata fetogi toku ʼohoana ʼi tamā ako te Tohi-Tapu mo te kau Fakamoʼoni ʼa Sehova. Neʼe ma ako te fakapapau ʼaē ʼo ʼuhiga mo te Puleʼaga—ʼe kua vave pulihi e Sehova te masiva pea mo te maʼuli taʼomia ʼi te malamanei. Neʼe tali e te ʼAtua taku ʼu faikole!” Ko tana ako te ʼu ala ʼa Sehova neʼe tokoni kia Rafael ke ina tuku tana ʼinu, pea neʼe ina kofuʼi te ʼuhiga “tagata foou.” (Efeso 4:24) Ko ia pea mo tona famili neʼe nātou hikihiki ai leva te ʼaluʼaga ʼo tonatou maʼuli. ʼE ʼui fēnei e Rafael: “Logola ʼe mole mātou maʼu koloā, pea ʼe mole ʼa mātou totonu te ʼapi, kae ʼe mātou maʼu te ʼu meʼa ʼaē ʼe ʼaoga tāfito ki tomatou maʼuli, pea ʼe mātou fiafia ai.”
Te Temi ʼAē Ka Tali Ai Te ʼu Faikole Fuli
Neʼe maʼu koa e te hahaʼi ʼaia he ʼu fua lelei ʼi tanatou faikole? Ei! Pea neʼe koutou fakatokagaʼi koa, tokolahi ia nātou ʼaia neʼe tali tanatou ʼu faikole, ʼi te temi ʼaē neʼe tokoniʼi ai nātou e he tahi ʼi te kokelekasio faka Kilisitiano, ke nātou fakaōvi kia Sehova ʼAtua ʼaki te ako ʼo te Tohi-Tapu?—Gaue 9:11.
Koia ʼe lelei ke tou faikole. Mole kei tuai, pea ʼe maʼu anai he tali ʼo te faikole ʼaē ke hoko mai te Puleʼaga ʼa te ʼAtua, pea mo fakahoko tona finegalo ʼi te kele. (Mateo 6:10) Ka ʼosi pulihi anai e te ʼAtua ʼi te kele ia nātou ʼaē ʼe fakafeagai kia te ia, pea ʼe “fonu moʼoni anai te kele ʼi te ʼatamai mālama ʼo ʼuhiga mo Sehova.” (Isaia 11:9) Pea ko nātou fuli ʼaē ʼe ʼoʼofa kia Sehova ʼe nātou maʼu anai “te ʼāteaina faka kolōlia ʼo te fānau ʼa te ʼAtua”—pea ʼe maʼu moʼoni anai he tali ʼo tanatou ʼu faikole.—Loma 8:18-21, MN.
[Paki ʼo te pasina 7]
ʼE koutou ʼiloʼi koa pe koʼe ʼe tonu ke tou faikole?