He Koʼe ʼe Koutou Tauhi Ki Te ʼAtua?

ʼI te tahi ʼaho, ko te hau neʼe manavasiʼi ki te ʼAtua, neʼe ina foaki te tokoni ʼaenī ki tona foha: “Ke ke ʼiloʼi te ʼAtua ʼo tau tāmai pea mo ke tauhi kia te ia ʼaki he loto katoa pea mo he nefesi fiafia.” (1 Fakamatala 28:9) ʼE hā lelei mai, ʼe loto e Sehova ke tauhi tana ʼu kaugana kia te ia ʼaki he loto fakafetaʼi pea mo fiafia.

ʼI TOTATOU ʼuhiga kau Fakamoʼoni ʼa Sehova, ʼe tou fakamoʼoni ki tatatou loto fakafetaʼi lahi, ʼi te temi ʼaē neʼe ʼuluaki fakamahino mai ai kia tatou te ʼu fakapapau ʼa te ʼAtua. ʼI te ʼaho fuli pe, neʼe tou ako te meʼa foʼou ʼo ʼuhiga mo te ʼu fakatuʼutuʼu ʼa te ʼAtua. ʼI te tuputupu ʼo te ʼu meʼa ʼaē neʼe tou ako ʼo ʼuhiga mo Sehova, neʼe toe tuputupu ai mo tatatou fia tauhi kia te ia “ ʼaki he loto katoa pea mo he nefesi fiafia.”

Tokolahi ia nātou ʼaē ʼe liliu ko he kau Fakamoʼoni ʼa Sehova ʼe nātou haga tauhi kia Sehova ʼaki he fiafia lahi ʼi tonatou maʼuli katoa. Ko ʼihi Kilisitiano neʼe nātou kamata lelei, kae ʼaki te temi neʼe mole kei nātou tokagaʼi te ʼu tupuʼaga mālohi ʼaē neʼe nātou uga nātou ke nātou tauhi ki te ʼAtua. Neʼe hoko koa te faʼahi ʼaia kia koutou? Kapau koia, pea ʼaua naʼa koutou lotovaivai, heʼe feala ke koutou toe maʼu takotou loto fiafia. ʼO feafeaʼi?

Koutou Vakaʼi Takotou ʼu Tapuakina

ʼUluaki, koutou metitasio ki te ʼu tapuakina ʼaē ʼe koutou maʼu ʼi te ʼaho fuli mai te ʼAtua. Koutou fakakaukauʼi te ʼu meʼa ʼofa lelei ʼa Sehova: tana ʼu meʼa kehekehe ʼaē neʼe ina fakatupu​—ʼaē ʼe feala ke maʼu e te hahaʼi fuli ʼo te ʼu ʼaluʼaga faka sosiale pea mo faka ekonomika kehekehe—​te meʼa kai pea mo te meʼa ʼinu ʼaē ʼe koutou maʼu ʼi te ʼu meʼa ʼaē neʼe fakatupu, mo te fiafia ʼo takotou maʼuli lelei, mo takotou ʼiloʼi te moʼoni ʼa te Tohi-Tapu, pea ko te meʼa ʼaē ʼe maʼuhiga tāfito, tana meʼa ʼofa ʼaē ko tona ʼAlo. Neʼe teuteuʼi e tona mate te ala ke koutou tauhi ki te ʼAtua ʼaki he leʼo ʼo loto ʼe maʼa. (Soane 3:16; Sakopo 1:17) Kapau ʼe koutou metitasio lahi ki te ʼu lelei ʼa te ʼAtua, pea ʼe tuputupu anai takotou loto fakafetaʼi. Pea ʼe uga anai koutou e tokotou loto ke koutou tauhi kia te ia ʼaki he loto fakafetaʼi lahi ʼuhi ko te ʼu meʼa fuli ʼaē neʼe ina fai. ʼE mahino ia ʼe koutou toe hage anai ko te tagata fai pesalemo, ʼaē neʼe ina tohi fēnei: “Neʼe ke fai te ʼu tuʼuga meʼa, Ê Sehova toku ʼAtua, ei ko tau ʼu gāue fakatalakitupua pea mo tau ʼu manatu kia mātou; ʼe mole he meʼa ʼe feala ke tatau mo koe. . . . Kua liliu ia ʼo kaugamālie age ʼi te ʼu meʼa ʼaē ʼe feala ke ʼau fakamatala.”​—Pesalemo 40:5.

Neʼe tohi te ʼu palalau ʼaia e Tavite, ʼaē neʼe tau mo te ʼu fihifihia lahi ʼi tona maʼuli. ʼI tana kei tūpulaga, neʼe lahi te temi ʼaē neʼe feholaʼaki ai, he neʼe kumi ia ia e te Hau agakovi ko Saulo pea mo tana ʼu tagata ke nātou matehi ia ia. (1 Samuele 23:7, 8, 19-23) Neʼe toe tauʼi e Tavite tona ʼu vaivaiʼaga. Neʼe ina fakamoʼoni ki te ʼu meʼa ʼaia ʼi te Pesalemo 40: “Neʼe ʼatakai ʼau e te ʼu tuʼutāmaki ʼo aʼu ki taku mole kei lava lau tonatou lahi. Neʼe lahi age taku ʼu hala ʼaē neʼe hoko mai, ʼi taku ʼu hala ʼaē neʼe ʼau lava sio kiai; neʼe nātou lahi age ʼi te ʼu lauʼulu ʼo toku ʼulu.” (Pesalemo 40:12) Ei, neʼe tau Tavite mo te ʼu fihifihia, kae neʼe mole taʼomia katoa ʼi te faʼahi ʼaia. Neʼe ina tokagaʼi te ʼu faʼahi ʼaē neʼe tapuakina ai ia ia e Sehova, logola tona ʼu fihifihia, pea neʼe manatu ʼe maʼuhiga age te ʼu tapuakina ʼaia ʼi tona ʼu malaʼia.

Ka lahi fau takotou ʼu fihifihia peʼe koutou lotovaivai, pea ʼe lelei ke koutou fai ohage ko Tavite, ke ʼai hakotou kiʼi tuʼu pea mo koutou fakakaukauʼi te ʼu tapuakina ʼaē ʼe koutou maʼu. ʼE mahino ia ko takotou loto fakafetaʼi ki te ʼu tapuakina ʼaia ʼe ina uga ai koutou ke koutou foaki tokotou maʼuli kia Sehova; ko te ʼu manatu ʼaia, ʼe toe lava tokoni atu ke koutou toe maʼu te fiafia ʼaē neʼe puli pea mo tokoni atu ke koutou tauhi ki te ʼAtua ʼaki he loto fakafetaʼi.

ʼE Lava Tokoni Mai Te ʼu Fono

ʼO hilifaki ki tatatou metitasio tokotahi ki te ʼu lelei ʼa Sehova, ʼe tonu ke tou fakatahi mo totatou ʼu kaumeʼa Kilisitiano. ʼE ko he meʼa fakaloto mālohi te fakatahitahi tuʼumaʼu mo he ʼu tagata, mo he ʼu fafine, pea mo he kau tūpulaga ʼe nātou ʼoʼofa ki te ʼAtua pea ʼe nātou fia tauhi kia te ia. Ko tanatou faʼifaʼitaki ʼe feala ke ina uga tatou ke tou gāue ʼaki totatou nefesi katoa ʼi te tauhi kia Sehova. Pea ʼe toe feala foki ke tou fakaloto mālohiʼi nātou mokā tou kau ki te ʼu fono ʼaē ʼe fai ʼi te Fale ʼo te Puleʼaga.

ʼE moʼoni, ka tou liliu ki fale ʼi tatatou ʼosi gāue kinakina ʼi te ʼaho katoa, peʼe kapau ʼe tou lotovaivai ʼuhi ko he faigataʼaʼia peʼe ko hotatou vaivaiʼaga, pea ʼe lagi faigataʼa tatatou manatu ke tou ʼolo ʼo fono ʼi te Fale ʼo te Puleʼaga. ʼI te ʼu lakaga feiā, ʼe tonu ke tou lolomi ia tatou, ʼi hona ʼaluʼaga fakatātā, ke tou ‘tukipalaʼi totatou sino,’ ke feala hatatou mulimuli ki te fakatotonu ʼaē ke tou fakatahi mo te kau Kilisitiano.​—1 Kolonito 9:26, 27; Hepeleo 10:23-25.

Kapau ʼe tonu ke tou fai te faʼahi ʼaia, pea ʼe fakahā ai koa ʼe mole tou ʼofa moʼoni kia Sehova? Kailoa. Ko te kau Kilisitiano fakapotopoto ʼo te temi muʼa ʼaē neʼe nātou ʼofa moʼoni ki te ʼAtua, neʼe tonu ke nātou faiga mālohi moʼo fai te finegalo ʼa te ʼAtua. (Luka 13:24) Neʼe kau te ʼapositolo ko Paulo ki te kau Kilisitiano ʼaia. Neʼe ina fakahā lelei fēnei tana manatu: “Koteuhi e au iloi, e mole he mea lelei e nofo ia te au, ko tona uhiga, i toku kakano; e au loto ki te lelei e tuʼu mai i oku mua, kae e mole au fai ia, koteuhi e mole au fai te lelei e au loto ki ai, kae ko te kovi ae e mole au loto ki ai, e au mauliʼi.” (Loma 7:18, 19) Pea neʼe ina ʼui fēnei ki te kau Kolonito: “Koteuhi, kapau e au fagonogono te Evaselio, e mole ko he mea ke au fialahi ai, he ko te maua kua hilifaki mai kia te au. . . . Kapau e au fai te mea aia i toku loto, pea e au mau ai hoku totogi; kae nee mole ko hoku loto, ko te fekau nee fakafalala mai kia te au.”​—1 Kolonito 9:16, 17.

Ohage ko te tokolahi ia tatou, neʼe maʼu e Paulo te ʼu holi ki te agahala ʼaē neʼe fakafeagai ki tana holi ʼaē ke ina fai te meʼa ʼaē ʼe lelei. Kae neʼe ina tauʼi mālohi te ʼu holi ʼaia pea ʼi te teitei temi fuli pe, neʼe mālo ai. ʼE mahino ia neʼe mole fakahoko e Paulo te faʼahi ʼaia ʼaki pe tona mālohi. Neʼe ina tohi fēnei: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.” (Filipe 4:13, MN ) Ko Sehova, ʼaē neʼe ina foaki te mālohi kia Paulo, ʼe ina toe foaki atu anai te mālohi ke koutou fai te meʼa ʼaē ʼe totonu, mo kapau ʼe koutou kole ke tokoni atu. (Filipe 4:6, 7) Koia koutou “tau mālohi ʼo ʼuhiga mo te tui,” pea ʼe tapuakina anai koutou e Sehova.​—Suta 3, MN.

ʼE mole koutou tokotahi ʼi takotou tau ʼaia. ʼI te kokelekasio ʼa te kau Fakamoʼoni ʼa Sehova, ʼe fia tokoni atu anai te kau tagata ʼāfea kua fakapotopoto, ʼaē ʼe nātou haga kātakiʼi te “tau . . . ʼo ʼuhiga mo te tui.” Kapau ʼe koutou ʼolo ki he tagata ʼāfea ke tokoni atu, pea ʼe faiga anai ke ina fai atu he ʼu “palalau fakaloto fīmālie.” (1 Tesalonika 5:14, MN ) ʼE ina loto anai ke liliu ko “he nonoʼaga mokā matagi pea ko he holaʼaga mokā afā.”​—Isaia 32:2.

“Ko te ʼAtua ʼe ʼofa,” pea ʼe loto ke tauhi tana kau kaugana kia te ia ʼaki te ʼofa. (1 Soane 4:8, MN ) Kapau ʼe tonu ke koutou toe maʼu tokotou ʼofa ki te ʼAtua, pea koutou fai te ʼu meʼa ʼaē ʼe ʼaoga kiai, ohage ko tona fakahā lelei ʼi muʼa atu. ʼE lahi anai takotou fiafia.