ʼE Lahi Feafeaʼi Tokotou ʼOfa?
“ ʼE tonu ke ke ʼofa ki tou kāiga ohage pe ko koe totonu.”—Mateo 22:39, MN.
1. Kapau ʼe tou ʼofa kia Sehova, he koʼe ʼe tonu ke tou ʼofa foki ki totatou kāiga?
ʼI TE fehuʼi age kia Sesu pe ko te folafola fea ʼaē ʼe lahi tokotahi, neʼe ina tali fēnei: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.” Pea neʼe ina fakaʼaogaʼi te lua folafola ʼaē ʼe tatau mo te ʼuluaki: “ ʼE tonu ke ke ʼofa ki tou kāiga ohage pe ko koe totonu.” (Mateo 22:37, 39, MN ) Ei ko te ʼofa ki te kāiga ʼe ko he fakaʼiloga ʼo he Kilisitiano. ʼE moʼoni, kapau ʼe tou ʼofa kia Sehova, pea ʼe tonu ke tou ʼofa ki totatou kāiga. Koteā tona tupuʼaga? Heʼe tou fakahā totatou ʼofa ki te ʼAtua mokā tou fakalogo ki tana Folafola, pea ʼe fakatotonu mai e tana Folafola ke tou ʼofa ki totatou kāiga. Koia, kapau ʼe mole tou ʼofa ki ʼotatou ʼu tēhina mo tuagaʼane, pea ʼe mole feala ke moʼoni totatou ʼofa ki te ʼAtua.—Loma 13:8; 1 Soane 2:5; 4:20, 21.
2. Ko te faʼahiga ʼofa feafeaʼi ʼaē ʼe tonu ke tou fakahā ki totatou kāiga?
2 ʼI te ʼui ʼa Sesu ke tou ʼofa ki totatou kāiga, neʼe mole palalau ia ki he fakakaumeʼa pe. Pea neʼe palalau ki he ʼofa ʼe kehe ia ʼi te ʼofa ʼaē ʼe maʼu ʼi he ʼu famili peʼe ʼi he tagata mo he fafine. Neʼe palalau ia ki te faʼahiga ʼofa ʼaē ʼe maʼu e Sehova ki tana ʼu kaugana pea mo tonatou ʼofa ʼaē kia te ia. (Soane 17:26; 1 Soane 4:11, 19) Ko te sekelipa—ʼaē neʼe fakatokagaʼi e Sesu, neʼe lea fakapotopoto— neʼe ʼio ki te manatu ʼa Sesu ʼaē ke tou ʼofa ki te ʼAtua “ ʼaki totatou loto katoa pea mo totatou nefesi katoa pea mo totatou laumālie katoa pea mo totatou mālohi katoa.” (Maleko 12:28-34, MN ) Neʼe tonu ʼi te faʼahi ʼaia. Ko te ʼofa ʼaē ʼe fakatupu e he Kilisitiano ki te ʼAtua pea mo te kāiga ʼe fakapipiki kiai te ʼu meʼa ʼaē ʼe tou logoʼi ʼi totatou loto pea mo tatatou fakakaukau. ʼE tou logoʼi ʼi totatou loto pea ʼe takitaki e totatou ʼatamai.
3. (a) Neʼe akoʼi feafeaʼi e Sesu “te tagata ʼaē ʼe poto ʼi te Lao” ke mahino ki te faka ʼuhiga ʼo tona kāiga? (b) ʼE faka ʼuhiga feafeaʼi te lea fakatātā ʼa Sesu ki te kau Kilisitiano ʼi te temi nei?
3 Ohage ko tona fakamatala e Luka, ʼi te ʼui e Sesu ʼe tonu ke tou ʼofa ki totatou kāiga, neʼe fehuʼi age e “te tagata ʼaē ʼe poto ʼi te Lao”: “Ko ai toku kāiga?” Neʼe tali e Sesu kiai ʼaki te lea fakatātā. Neʼe ʼi ai te tagata neʼe tā, pea neʼe kaihaʼa pea tuku ʼi te vaʼe ala kua teitei mate. Neʼe ʼuluaki fakalaka ai te pelepitelo pea hoa kiai te Levite. Kae neʼe nā lītuʼa ki ai. Pea fokifā kua ʼalu ifo te tagata Samalitana, pea sio ki te tagata lavea ʼaia, pea neʼe manavaʼofa lahi ki ai. ʼI te ʼu tagata ʼaenī e tolu ko ai te kāiga ʼo te tagata lavea? Neʼe faigafua te tali ki te fehuʼi ʼaia. (Luka 10:25-37, MN ) Neʼe lagi punamaʼuli te tagata ʼaē ʼe poto ʼi te Lao ʼi te ʼui age e Sesu ʼe lagi kāiga lelei age te tagata Samalitana ʼi te pelepitelo pea mo te Levite. ʼE mahino ia, neʼe tokoni ia Sesu ki te tagata ʼaia ke ina fakalahi tona ʼofa ki tona kāiga. ʼE feiā mo te ʼofa ʼa te kau Kilisitiano. Tou fakatokagaʼi age muʼa te hahaʼi fuli ʼaē ʼe tonu ke ʼofa ki ai te kau Kilisitiano.
Te ʼOfa ʼi Te Loto Fale
4. ʼE ʼuluaki fakahā ʼifea ia te ʼofa e he Kilisitiano?
4 ʼE ʼoʼofa te kau Kilisitiano ki te ʼu hahaʼi ʼo tonatou famili—ʼe ʼoʼofa te ʼu fafine ʼohoana ki ʼonatou ʼu ʼohoana, ʼe ʼoʼofa te ʼu tagata ʼohoana ki ʼonatou ʼu ʼohoana, pea ko te ʼu mātuʼa ʼe nātou ʼoʼofa ki tanatou ʼu fānau. (Tagata Tānaki 9:9; Efeso 5:33; Tito 2:4) ʼE moʼoni, ʼe lahi te ʼu famili ʼe maʼu ai te ʼofa ʼaia. Kae ʼe fakahā e te ʼu sivi, ʼe tau te ʼu famili mo te ʼu faigataʼaʼia ʼi te temi nei, ʼuhi ko te ʼu mavete ʼohoana, mo te gaohi koviʼi ʼo te ʼu fafine ʼohoana, mo te līʼakina ʼo te tamaliki peʼe ko te fakaʼalikiʼi ʼo nātou, pea ʼe mole kei feʼauga te mālohi ʼo te ʼu noʼo faka famili moʼo fakatahiʼi te ʼu famili. (2 Timoteo 3:1-3) Ke fiafia moʼoni tonatou maʼuli faka famili, ʼe ʼaoga ki te kau Kilisitiano ke nātou maʼuliʼi ia te faʼahiga ʼofa ʼaē ʼe maʼu e Sehova pea mo Sesu.—Efeso 5:21-27.
5. Ko ai ʼaē ʼe kumi tokoni ki ai te ʼu mātuʼa ʼo ʼuhiga mo te taupau ʼo tanatou fānau, pea koteā te ʼu fua ʼaē ʼe maʼu e te ʼu mātuʼa tokolahi?
5 ʼE faka ʼuhiga e te ʼu mātuʼa Kilisitiano tanatou fānau ohage ko he tofiʼa mai ia Sehova pea ʼe nātou haga ki ai moʼo kumi tokoni ki te taupau ʼo te fānau. (Pesalemo 127:3-5; Tāʼaga Lea 22:6) ʼAki tona fai ʼaia, ʼe nātou fakatuputupu te ʼofa faka Kilisitiano, ʼaē ʼe tokoni kia nātou ke nātou puipui tanatou fānau mai te ʼu hala ʼaē ʼe feala ke tō kiai te kau tūpulaga. Ko te meʼa ʼaē neʼe hoko ai, neʼe kaugamālie te ʼu mātuʼa neʼe nātou maʼu te fiafia ʼaē neʼe logoʼi e te faʼe ʼi Holani. ʼI tana ʼosi sio ki te papitema ʼo tana tama—neʼe kau ʼi te toko 575 kau papitema ʼi Holani ʼi te taʼu kua hili— neʼe ina tohi fēnei: “ ʼI te temi ʼaenī, kua ʼau sio ki te fua ʼo taku gāue ʼaē neʼe ʼau fai ʼi te ʼu taʼu e 20 kua hili. ʼE mole kei ʼau lau te ʼu temi fuli pea mo te mālohi—ʼo feiā mo te kinakina, mo te ʼu faiga, pea mo te ʼu lotomamahi— ʼaē neʼe ʼau fakaʼaogaʼi kiai.” Neʼe fiafia ʼi te filifili tonu e tana tama ke tauhi kia Sehova. ʼI te toko 31 089 kau fai faka mafola ʼi Holani ʼi te taʼu kua hili, tokolahi ia nātou neʼe akoʼi age e tanatou ʼu mātuʼa ia te ʼofa ʼaē kia Sehova.
6. ʼE lava tokoni feafeaʼi ia te ʼofa faka Kilisitiano ki te fakamālohiʼi ʼo te ʼu noʼo ʼo te nofo ʼohoana?
6 Neʼe fakahigoaʼi e Paulo ia te ʼofa “ko he noʼo haohaoa ia ki te logo tahi,” pea ʼe feala ke ina hāofaki he nofo ʼohoana tatau aipe peʼe felāveʼi mo he ʼu temi faigataʼa. (Kolose 3:14, 18, 19; 1 Petelo 3:1-7, MN ) ʼI Rurutu, ko he motu veliveli ʼe vaha mo Tahisi ia kilometa e 700, ʼi te kamata ako ʼo te Tohi-Tapu e te tagata mo te kau Fakamoʼoni ʼa Sehova, neʼe fakafeagai ʼaupito tona ʼohoana kiai. Pea neʼe ʼave e te fafine tanā fānau ki Tahisi, kae nātou tuku ia ia. Kae neʼe fakahā aipe e te tagata tona ʼofa ʼo ina momoli tuʼumaʼu te falā ki tona ʼohoana pea mo fai telefoni ki ai moʼo fakalavelave peʼe ʼi ai he ʼu meʼa ʼe ʼaoga ki ai peʼe ki tanā fānau. Neʼe ina fai ia meʼa fuli moʼo fakahoko ʼo tona ʼu maʼua faka Kilisitiano. (1 Timoteo 5:8) Neʼe faikole tuʼumaʼu ke toe fakatahi mo tona famili pea ke toe liliu mai tona ʼohoana. ʼI te temi ʼaē neʼe toe liliu mai ai, neʼe ina fakahā ki ai “te ofa, te kataki mo te agamalu.” (1 Timoteo 6:11) ʼI te 1998, neʼe papitema ai pea ki muli age neʼe fiafia ʼaupito he neʼe tali e tona ʼohoana ke fai hana ako Tohi-Tapu. Neʼe kau te ako ʼaia ʼi te ʼu ako e 1 351 ʼaē neʼe fai ʼi te taʼu kua hili, ʼi te telituale ʼo te filiale ʼo Tahisi.
7. Ohage ko tona ʼui e te tagata ʼi Siamani, koteā ʼaē neʼe ina fakamālohiʼi tana nofo ʼohoana?
7 ʼI Siamani neʼe fakafeagai te tagata ki tona ʼohoana ʼaē neʼe fia fai ki te ʼu moʼoni faka Tohi-Tapu, heʼe ʼi tana manatu ko te kau Fakamoʼoni ʼa Sehova ʼe nātou fia kākāʼi ia ia. Kae ki muli age, neʼe faitohi te tagata ki te fafine Fakamoʼoni ʼaē neʼe ʼuluaki felāveʼi mo tona ʼohoana ʼo ina ʼui fēnei: “ ʼE ʼau fakamālo atu ki tau fakahū toku ʼohoana ki te kau Fakamoʼoni ʼa Sehova. ʼI te kamata, neʼe ʼau tuʼania koteʼuhi neʼe lahi te ʼu meʼa kovi ʼaē neʼe lau ʼo ʼuhiga mo koutou. Kae ʼi te temi nei, kua ʼau kau ki te ʼu fono mo toku ʼohoana, pea kua mahino kia ʼau neʼe ʼau faihala ʼaupito. ʼE ʼau ʼiloʼi kua ʼau nofo nei ʼi te moʼoni, pea kua ina toe fakamālohiʼi age tamā nonofo faka taumatuʼa.” Ko te toko 162 932 kau Fakamoʼoni ʼa Sehova ʼaē ʼi Siamani—pea mo te toko 1 773 ʼi te ʼu motu ʼaē ʼe gāueʼi e te filiale ʼo Tahisi— ʼe nātou kau ki te ʼu famili tokolahi ʼaē ʼe nātou logo tahi ʼi te ʼofa fakaʼatua.
Tou ʼOfa Ki ʼOtatou ʼu Tēhina Kilisitiano
8, 9. (a) Ko ai ʼaē ʼe ina akoʼi tatou ke tou ʼofa ki ʼotatou ʼu tēhina, pea ko te ʼofa ʼe ina uga tatou ke tou fai teā? (b) Fakahā he faʼifaʼitaki peʼe lava tokoni feafeaʼi ia te ʼofa ki te ʼu tēhina ke nātou felagolagoʼaki.
8 Neʼe ʼui fēnei e Paulo ki te kau Kilisitiano ʼo Tesalonika: “ ʼE akoʼi ia koutou totonu e te ʼAtua ke koutou feʼofaniʼaki.” (1 Tesalonika 4:9, MN ) Ei, ko te hahaʼi ʼaē “ ʼe akoʼi e Sehova” ʼe nātou feʼofaniʼaki. (Isaia 54:13) ʼE maʼuli tonatou ʼofa, ohage ko tona fakahā e Paulo ʼi tana ʼui ʼaē: “ ʼAki te ʼofa, koutou fetauhiʼaki ia koutou ohage ko he ʼu kaugana.” (Kalate 5:13; 1 Soane 3:18, MN ) Ohage la, ʼe nātou fai te potu ʼaia mokā nātou ʼaʼahi te ʼu tēhina mo te ʼu tuagaʼane ʼaē ʼe mahahaki, mo fakaloto mālohiʼi ia nātou ʼe lotomamahi, pea mo tokoni kia nātou ʼaē kua vaivavai. (1 Tesalonika 5:14) ʼE tokoni totatou ʼofa faka Kilisitiano moʼoni ki te tuputupu ʼo totatou palatiso fakalaumālie.
9 ʼI te kokelekasio ʼo Ancón—ʼe kau ki te ʼu kokelekasio e 544 ʼi Équateur— neʼe fakahā lelei e te ʼu tēhina tonatou ʼofa. Neʼe hoko te lakilisi pea neʼe mole ʼi ai hanatou gāue pea mo hanatou falā, koia neʼe fakatotonu ai e te kau fai faka mafola ke nātou maʼu hanatou falā, ʼo nātou fakatau meʼa kai ki te hahaʼi gelu mokā nātou liliu kiō nātou ʼi tanatou ʼosi gelu pōʼuli. Neʼe kau fuli kiai ki te fakatuʼutuʼu ʼaia te ʼu tēhina mo tuagaʼane ʼo feiā mo te tamaliki. Neʼe tonu ke nātou kamata ʼi te hola 1 māfoatā ke tokalelei te meʼa kai ki te hola 4 māfoatā mokā liliu mai te hahaʼi gelu. Ko te falā ʼaē neʼe maʼu e te ʼu tēhina neʼe nātou fevaevaeʼaki ʼo mulimuli ki te meʼa ʼe ʼaoga kia nātou. Neʼe fakahā e te fetokoniʼaki ʼaia te ʼofa faka Kilisitiano moʼoni.
10, 11. E feafeaʼi hatatou fakahā totatou ʼofa ki te ʼu tēhina ʼaē ʼe mole tou ʼiloʼi lelei?
10 Kae ʼe mole faka tuʼakoi pe totatou ʼofa ki te kau Kilisitiano ʼaē ʼe tou ʼiloʼi lelei. Neʼe ʼui fēnei e te ʼapositolo ko Petelo: “Koutou ʼoʼofa ki te famili katoa ʼo te ʼu tēhina.” (1 Petelo 2:17, MN ) ʼE tou ʼoʼofa ki ʼotatou ʼu tēhina pea mo tuagaʼane fuli koteʼuhi ʼe nātou tauhi fuli kia Sehova ʼAtua. ʼE feala pe ʼi te ʼu temi lakilisi ke tou maʼu ai he faigamālie moʼo fakahā te ʼofa ʼaia. Ohage la, lolotoga te taʼu gāue 2000, neʼe hoko te ʼu lōmaki ʼi Mozambique, pea ko te tokolahi neʼe nātou māsisiva ʼuhi ko te tau fakafenua ʼaē neʼe hoko ʼi Angola. Tokolahi ʼi te ʼu tēhina e toko 31 725 ʼi Mozambique pea mo te toko 41 222 ʼi Angola neʼe nātou faigataʼaʼia ʼuhi ko te ʼu faʼahi ʼaia. Koia neʼe momoli e te ʼu tēhina ʼo te vāhaʼa fenua mo te Potu Saute ʼo Afelika te ʼu tuʼuga meʼa kai moʼo fakamaʼamaʼa te mamahi ʼo tonatou ʼu tēhina ʼi te ʼu fenua ʼaia. Neʼe ʼiloga tonatou ʼofa he neʼe nātou lotolelei ʼo foaki ki ʼonatou ʼu tēhina ʼaē neʼe ʼaoga tāfito kiai, te “ ʼu koloā ʼaē ʼe mole ʼaoga tāfito kia [nātou].”—2 Kolonito 8:8, 13-15, 24, MN.
11 ʼE toe ʼiloga te ʼofa mokā ʼe lagolago te ʼu tēhina mai te ʼu fenua kehekehe ki te ʼu fenua ʼaē ʼe faigataʼaʼia ʼi te faʼahi faka ekonomika moʼo laga ʼo te ʼu Fale ʼo Te Puleʼaga pea mo te ʼu Fale ʼo te ʼu Fakatahi. Koʼeni tona faʼifaʼitaki ʼi te ʼu motu ʼo Salomone. Logope la te ʼu tokakovi ʼo te fenua, kae neʼe tuputupu te kau fai faka mafola ʼo aʼu ki te 6 ʼi te teau, ʼo fakatahiʼi ʼaia ko te toko 1 697 kau fai faka mafola. Neʼe nātou fakatuʼutuʼu ke nātou laga he Fale ki te ʼu Fakatahi. Logope te feholaki ʼa te hahaʼi tokolahi mai te ʼu motu, kae neʼe ʼōmai te ʼu hahaʼi mai Ositalalia moʼo tokoni ki te laga ʼo te fale ʼaia. ʼAki te temi neʼe tonu ai ke mavae mo nātou ʼaia neʼe ʼōmai, kae neʼe nātou akoako muʼa te ʼu tēhina ʼo te ʼu motu ke nātou fakaʼosi te fakatuʼu ʼo te ʼu tafito ʼo te fale. Neʼe teuteuʼi fakatomuʼa te ʼu koga ʼo te fale ʼaē neʼe fai ʼaki pe te ʼu ukamea pea neʼe ʼaumai vaka mai Ositalalia, pea ko te fakaʼosi ʼo te fale tauhi matalelei ʼaia—ʼaē ʼe fai ʼi he temi kua tuku fakakoga ai ʼihi laga fale— ʼe ko he fakamoʼoni lelei anai ki te huafa ʼo Sehova pea mo te ʼofa ʼo te ʼu tēhina.
Ohage Ko Te ʼAtua, ʼe Tou ʼOfa Ki Te Malamanei
12. E feafeaʼi ʼo hatatou faʼifaʼitakiʼi ia Sehova ʼi tatatou aga ʼaē ki te hahaʼi ʼaē ʼe mole manatu tahi mo tatou ʼo ʼuhiga mo te tui?
12 ʼE gata pe koa totatou ʼofa ki totatou famili pea mo totatou ʼu tēhina mo tuagaʼane? Kailoa ia, mo kapau ʼe tou faʼifaʼitakiʼi ia te ʼAtua. Neʼe ʼui fēnei e Sesu: “Ko te ʼAtua, ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kae ke ina maʼu te maʼuli heʼegata.” (Efeso 5:1; Soane 3:16, MN ) Ohage ko Sehova ʼAtua, ʼe tou agaʼofa ki te hahaʼi fuli—ʼo kau ai mo nātou ʼaē ʼe mole ko ʼotatou ʼu tēhina ʼi te tui. (Luka 6:35, 36; Kalate 6:10) Koia tāfito ʼaē ʼe tou faka mafola ai te logo lelei ʼo te Puleʼaga pea mo tala ki te hahaʼi ia te ʼofa lahi ʼaupito ʼo te ʼAtua kia nātou. ʼAki te faʼahi ʼaia ʼe lava hāofaki ai ia nātou ʼaē ʼe fakalogo.—Maleko 13:10; 1 Timoteo 4:16.
13, 14. Koteā te ʼu meʼa ʼaē neʼe fai e te ʼu tēhina neʼe nātou fakahā ai tonatou ʼofa ki te hahaʼi ʼaē ʼe mole ko he kau Fakamoʼoni, tatau aipe pe neʼe mole ko he meʼa fakafimālie kia nātou?
13 Tou fakatokagaʼi age muʼa te kau pionie makehe e toko fā ʼi Népal. Neʼe hinoʼi nātou ke nātou gāue ʼi te kolo ʼi te potu saute-uesite ʼo te fenua, pea lolotoga taʼu e nima, neʼe nātou fakahā tonatou ʼofa ʼo nātou kātaki aipe ʼo fai faka mafola ʼi te kolo lahi pea mo te ʼu kolo liliki ʼaē ʼe tuʼu mamaʼo. Moʼo gāueʼi tonatou telituale, neʼe nātou tau ʼolo lelue lolotoga te ʼu hola loaloaga ʼi te vevela ʼaē ʼe fakalaka ʼi te 40°C. Neʼe fua leva tonatou ʼofa pea mo tanatou “faʼa kātaki ʼi he gāue ʼe lelei,” he neʼe fakatuʼu leva te kiʼi ako tohi ʼi te kolo veliveli. (Loma 2:7, MN ) ʼI Malesio 2000, ko te toko 32 hahaʼi neʼe ʼōmai ʼo fakalogo ia te akonaki ʼaē neʼe fakahoko ki te hahaʼi e te taupau faka silikosikilipisio. ʼI Népal, neʼe maʼu te kau fai faka mafola e toko 430 ʼi te taʼu kua hili—ko tona tuputupu ko te 9 ʼi te teau. ʼE mahino ia ʼe tapuakina e Sehova te faiga pea mo te ʼofa ʼo te ʼu tēhina ʼo te fenua ʼaia.
14 ʼI Colombie, neʼe ʼolo te ʼu pionie makehe faka temi ʼo faka mafola ki te kau Initia Wayuu. Moʼo fakahoko te faʼahi ʼaia, neʼe tonu ke nātou ako te lea, kae ko tanatou faiga ʼaē neʼe fai ʼaki te ʼofa, neʼe ʼi ai tona fua koteʼuhi logope te ʼua lalahi, kae neʼe kau te toko 27 ki te akonaki ʼaē ʼe fai maʼa te hahaʼi fuli. Ko te taʼi ʼofa ʼaia neʼe fakahā e te kau pionie neʼe tokoni ki te tuputupu, ko te 5 ʼi te teau, ʼi Colombie pea ko ʼona kau fai faka mafola e toko 107 613. ʼI Danemark neʼe fia kau te tuagaʼane kua finematuʼa ki te fai faka mafola mo ʼona ʼu tēhina, kae neʼe mahamahaki. ʼAki tona lotomālohi, neʼe faitohi ʼo faka mafola ki te hahaʼi ʼaē neʼe nātou lotolelei kiai. ʼI te temi nei, kua fefaitohiʼaki mo te toko 42 hahaʼi pea ko ʼana ʼu ako Tohi-Tapu e 11. ʼE kau ʼi te toko 14 885 kau fai faka mafola ʼo Danemark ʼo te taʼu kua hili.
Tou ʼOfa Ki ʼOtatou ʼu Fili
15, 16. (a) Maʼa Sesu, ʼe tonu ke lahi feafeaʼi totatou ʼofa? (b) ʼAki te ʼofa neʼe feafeaʼi te felogoi ʼa te ʼu tēhina takitaki mo te tagata ʼaē neʼe ina fai te ʼu tukugakoviʼi hala ʼo ʼuhiga mo te kau Fakamoʼoni ʼa Sehova?
15 Neʼe ʼui e Sesu ki te tagata ʼaē neʼe poto ʼi te Lao neʼe feala pe ke ina faka ʼuhiga te tagata Samalitana ʼe ko hona kāiga. ʼI tana Akonaki ʼi te Moʼuga, neʼe loloto age te manatu ʼa Sesu ʼi tana ʼui fēnei: “Neʼe koutou fagono neʼe ʼui fēnei: ‘ ʼE tonu ke ke ʼofa ki tou kāiga ka ke fehiʼa ki tou fili.’ Kaʼe ʼau tala atu ʼau kia koutou: Ke koutou haga ʼofa ki ʼokotou fili pea mo hūfaki ia nātou ʼe nātou fakataga koutou; koteʼuhi ke koutou gali ai ko he ʼu foha ʼo takotou Tāmai ʼaē ʼe ʼi selo.” (Mateo 5:43-45, MN ) Tatau aipe peʼe fakafeagai mai he tahi kia tatou, kae tou faigaʼi ke tou “haga mālo aipe ʼi te agakovi ʼaki te agalelei.” (Loma 12:19-21, MN ) Kapau ko he meʼa ʼe fealagia, tou fakahā age ki ai totatou tofiʼa maʼuhiga ʼaupito, ʼaē ko te moʼoni.
16 ʼI Ukraine neʼe talanoa te alatike ʼi te nusipepa Kremenchuk Herald ʼo ʼuhiga mo te kau Fakamoʼoni ʼa Sehova ʼo ina ʼui ʼe ko he magaʼi lotu fakamataku. Neʼe ko he meʼa neʼe mole tonu ke tukunoaʼi feiā koteʼuhi ʼi te Eulopa ko ʼihi ʼe nātou palalau feiā ʼo ʼuhiga mo te kau Fakamoʼoni ʼa Sehova moʼo fakalotoʼi te hahaʼi ke faka tuʼakoi peʼe tapuʼi te gāue ʼa te kau Fakamoʼoni. Koia, neʼe ʼolo ai te ʼu tēhina ki te tagata ʼaē neʼe ina tā te alatike ʼaia ʼo kole age ke ina tā he fakatonutonuʼi ʼo te alatike ʼaia. Neʼe ina tali, kae neʼe ina tā te faʼahi ʼaia mo te tahi alatike ʼe ina fakamoʼoni ki te ʼu meʼa ʼaē neʼe ina fakamatala. Neʼe toe ʼolo ai te ʼu tēhina takitaki ki te tagata ʼaia ʼaki te tahi ʼu fakamatala. ʼI te mahino leva ʼa te tagata ki te mole moʼoni ʼo te alatike ʼaē neʼe ina toʼo mai ai tana ʼu fakamatala, neʼe ina tā ai leva te alatike ʼe ina fakahā ai tana faihala. Koia, moʼo fakatokatoka te ʼaluʼaga ʼaia, neʼe tonu ke fai he felogoi agalelei pea mo fakahagatonu, pea neʼe ko he fakatuʼutuʼu ʼofa ʼaia pea neʼe fua lelei.
ʼE Tou Lava Fakatuputupu Feafeaʼi Ia Te ʼOfa?
17. Koteā ʼaē ʼe hā ai ʼe mole faigafua tuʼumaʼu te felogoi mo te hahaʼi ʼaki te ʼofa?
17 Ka tupu he kiʼi tamasiʼi, ʼe ʼofa atu aipe tana ʼu mātuʼa ki ai. Kae ko te felogoi mo te hahaʼi lalahi ʼe mole fai atu aipe ʼaki te ʼofa. ʼE lagi ko te tupuʼaga la ʼaia ʼo te ʼui tuʼumaʼu mai e te Tohi-Tapu ke tou feʼofaniʼaki—heʼe ko he meʼa ʼe tonu ke tou fakatuputupu. (1 Petelo 1:22; 4:8; 1 Soane 3:11) Neʼe ʼiloʼi e Sesu ʼe ʼahiʼahiʼi anai totatou ʼofa ʼi tana ʼui ʼaē ʼe tonu ke tou fakamolemole ki totatou tēhina “tuʼa fitugofulu-ma-fitu.” (Mateo 18:21, 22, MN ) Neʼe toe uga tatou e Paulo ke tou “fe’katakiʼaki.” (Kolose 3:12, 13) ʼE mole tou punamaʼuli ʼi te ʼui mai kia tatou: “Koutou fekumi ia te ofa”! (1 Kolonito 14:1) ʼE tou lava fakahoko feafeaʼi ia te potu ʼaia?
18. Koteā ʼaē ka tokoni anai kia tatou ke tou fakatuputupu ia te ʼofa ki te hahaʼi?
18 ʼUluaki, ʼe feala pe ke tou manatuʼi tuʼumaʼu te ʼofa ʼaē ʼe tonu ke tou fakahā kia Sehova ʼAtua. Ko te ʼofa ʼaia ʼe ko he fakaloto mālohi ke tupu ʼaki ai hotatou ʼofa ki totatou kāiga. Koteā tona tupuʼaga? Mai tona ʼaluʼaga ʼaē ʼe tou fakahoko te potu ʼaia, koia ʼe fua lelei ai ki tatatou Tāmai ʼe ʼi selo, pea ʼe fakatupu ai he faka kolōlia pea mo he fakavikiviki kia te ia. (Soane 15:8-10; Filipe 1:9-11) Lua, ʼe feala hatatou faiga ke tou manatu ohage ko Sehova. ʼI te temi fuli pe ʼaē ʼe tou agahala ai, ʼe tou agahala kia Sehova; kae ʼi te temi fuli pe ʼe ina fakamolemole mai kia tatou pea ʼe haga ʼofa kia tatou. (Pesalemo 86:5; 103:2, 3; 1 Soane 1:9; 4:18) Kapau ʼe tou fakatuputupu te faʼahiga manatu ʼa Sehova, pea ʼe tou lava ʼofa ai ki te hahaʼi pea mo fakamolemole ki tanatou ʼu hala ʼaē ʼe nātou fai mai kia tatou. (Mateo 6:12) Tolu, ʼe tou fai te aga ʼaē ʼe tou loto ke fai mai e te hahaʼi kia tatou. (Mateo 7:12) Mai tona ʼaluʼaga ʼaē ʼe tou heʼe haohaoa, koia ʼe ʼaoga lahi ke fakamolemole mai kia tatou. Ohage la, mokā tou fai he ʼu palalau ʼe lave kovi ki niʼihi, ʼe tou fakaʼamu ke nātou manatuʼi ko tatou fuli ʼi ʼihi temi ʼe tou tautau agahala ai mokā tou palalau. (Sakopo 3:2) Kapau ʼe tou loto ke ʼofa mai te hahaʼi kia tatou, pea ʼe tonu mo tatou ke tou ʼofa kia nātou.
19. ʼE tou lava kumi feafeaʼi ia te tokoni ʼo te laumālie maʼoniʼoni moʼo gāueʼi te ʼofa?
19 Fā, ʼe tou lava kumi te tokoni ʼa te laumālie maʼoniʼoni koteʼuhi ko te ʼofa ʼe ko he koga ʼo te fua ʼo te laumālie. (Kalate 5:22, 23) Ko he fakakaumeʼa, mo he ʼu felogoi faka famili pea mo he ʼofa fakalaukau ʼe ko he ʼu meʼa neʼe tou tutupu ake mo ia. Kae ʼe ʼaoga kia tatou te tokoni ʼo te laumālie ʼo Sehova moʼo fakatuputupu te ʼofa ʼaē ʼe maʼu e Sehova, te ʼofa ʼaē ʼe ko he noʼo haohaoa ʼo te fakatahi. ʼE tou lava kumi te tokoni ʼa te laumālie maʼoniʼoni mokā tou lau ia te Tohi-Tapu. Ohage la, ka tou ako te maʼuli ʼa Sesu, ʼe tou sio ai ki tana faʼahiga felogoi mo te hahaʼi, pea ʼe feala hatatou ako ke tou faʼifaʼitakiʼi ia ia. (Soane 13:34, 35; 15:12) Tahi ʼaē meʼa, ʼe tou lava kole ia te laumālie maʼoniʼoni ʼa Sehova, tāfito ʼi te ʼu ʼaluʼaga ʼaē ʼe faigataʼa ai tatatou fai he faʼahiga gāue ʼaki te ʼofa. (Luka 11:13) Pea ʼe feala ke tou maʼuliʼi te ʼofa ʼo tou fakatahi mo te kokelekasio faka Kilisitiano. Moʼo gāueʼi ʼo te ʼofa, ʼe lava tokoni mai kia tatou tatatou fakatahi mo ʼotatou ʼu tēhina mo tuagaʼane agaʼofa.—Tāʼaga Lea 13:20.
20, 21. Neʼe fakahā feafeaʼi e te kau Fakamoʼoni ʼa Sehova he ʼofa lahi lolotoga te taʼu gāue 2000?
20 ʼI te taʼu kua hili, neʼe ko te toko 6 035 564 kau fai faka mafola ʼo te logo lelei ʼi te malamanei katoa. Neʼe fai e te kau Fakamoʼoni ʼa Sehova te ʼu hola gāue e 1 171 270 425 moʼo kumi ʼo te hahaʼi ke tala age kia nātou te logo lelei ʼaia. Neʼe ko te ʼofa ʼaē neʼe ina faka fealagia age kia nātou ke nātou kātakiʼi te vevela, mo te ʼua, pea mo te momoko moʼo fakahoko ʼo te gāue ʼaia. Neʼe ko te ʼofa ʼaē neʼe ina uga nātou ke nātou palalau ki ʼonatou ʼu kaugā ako, mo tanatou ʼu kaugā gāue pea ke nātou palalau mo he ʼu hahaʼi ʼe mole nātou feʼiloʼiʼaki ʼi te ʼu ala pea mo ʼihi koga meʼa age. ʼI te ʼu hahaʼi ʼaē neʼe ʼaʼahi e te kau Fakamoʼoni, tokolahi neʼe mole nātou fia logo pea tokosiʼi neʼe nātou fakafeagai. Kae neʼe ʼi ai te ʼu hahaʼi neʼe nātou fia logo, koia neʼe fai te ʼu ʼaʼahi e 433 454 049, pea neʼe fai te ʼu ako Tohi-Tapu e 4 766 631.a
21 Neʼe fakahā e te kau Fakamoʼoni ʼa Sehova he ʼofa lahi ki tonatou ʼAtua pea mo tonatou kāiga! ʼE mole feala ia ke fakavaivai te ʼofa ʼaia ʼi he temi. ʼE tou falala ai ko te taʼu gāue 2001 ʼe lagi toe fakahoko ai anai he fakamoʼoni lahi ki te malamanei. ʼOfa pe ke hoko atu te tapuakina ʼa Sehova ki tana kau tauhi agatonu pea mo faiva ʼaē ʼe nātou ‘fai tanatou ʼu gāue fuli ʼaki pe te ʼofa’!—1 Kolonito 16:14, MN.
[Kiʼi nota]
a ʼO ʼuhiga mo he tahi ʼu koga ʼo te Tānaki ʼo te Taʼu Gāue 2000, koutou vakaʼi ʼi te pasina 18 ki te 21.
ʼE Feala Hakotou Fakamahino?
• Ko ai ʼaē ʼe tou faʼifaʼitaki ki ai mokā tou ʼofa ki totatou kāiga?
• ʼE tonu ke lahi feafeaʼi totatou ʼofa?
• Koteā he ʼu faʼifaʼitaki ʼe hā ai ia te ʼofa faka Kilisitiano?
• ʼE tou lava fakatuputupu feafeaʼi ia te ʼofa faka Kilisitiano?
[Paki ʼo te pasina 15]
ʼE feala ke fakatahi tuʼumaʼu he famili ʼuhi ko te ʼofa faka Kilisitiano
[Paki ʼo te pasina 17]
ʼE uga tatou e te ʼofa ke tou vaevae tatatou ʼamanaki mo te hahaʼi