Ke Lagalagaʼi Tatou e Te ʼOfa
“ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.”—Mateo 22:37, MN.
1. (a) Koteā te ʼu meʼa ʼaē ʼe fai e he Kilisitiano? (b) Koteā te kalitate faka Kilisitiano ʼaē ʼe maʼuhiga ʼaupito pea koteā tona tupuʼaga?
ʼE LAHI te ʼu meʼa ʼe fai e he Kilisitiano ke liliu ko he minisi faiva. ʼE fakahāhā e te tohi ʼo Tāʼaga Lea te maʼuhiga ʼo te ʼatamai mālama, mo te mahino pea mo te poto. (Tāʼaga Lea 2:1-10) Neʼe palalau ia te ʼapositolo ko Paulo ki te ʼaoga ʼo he tui pea mo he ʼamanaki mālohi. (Loma 1:16, 17; Kolose 1:5; Hepeleo 10:39) ʼE toe ʼaoga mo te faʼa kātaki pea mo te loto lolomi. (Gaue 24:25; Hepeleo 10:36) Kae ʼe ʼi ai te koga kapau ʼe mole maʼu, pea ʼe feala ke ina fakasiʼisiʼi te ʼu meʼa fuli ʼaē, peʼe feala ke ina faka ʼalunoa te ʼu meʼa fuli ʼaia. Ko te koga ʼaia ʼe ko te ʼofa.—1 Kolonito 13:1-3, 13.
2. Neʼe fakahā feafeaʼi e Sesu te maʼuhiga ʼo te ʼofa, pea koteā te ʼu fehuʼi ʼaē ʼe malaga ai?
2 Neʼe fakahā e Sesu te maʼuhiga ʼo te ʼofa ʼi tana ʼui ʼaē: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35, MN ) Mai te ʼaluʼaga ʼaē ko te ʼofa ʼe ko te fakaʼiloga ʼo he Kilisitiano moʼoni, koia ʼe ʼaoga ke tou fai te ʼu fehuʼi ʼaenī, Koteā te ʼofa? He koʼe ʼe maʼuhiga te ʼui ʼaē ʼa Sesu, ʼo laka age ʼi te ʼu kalitate fuli ʼaē, ʼe ko te kalitate ʼaia te fakaʼiloga ʼo tana ʼu tisipulo? E feafeaʼi hatatou gāueʼi te ʼofa? Ko ai ʼaē ʼe tonu ke tou ʼofa tāfito ki ai? Tou vakaʼi age muʼa te ʼu fehuʼi ʼaia.
Koteā Te ʼOfa?
3. Koteā te ʼofa, pea he koʼe koa ʼe fakamaʼua kiai te fakakaukau pea mo te loto?
3 Koʼeni te faka ʼuhiga ʼo te ʼofa, ‘ko te pipiki ki he tahi ʼaki he agaʼofa, ko he ʼofainaʼi lahi ʼo he tahi, ko he leleiʼia ʼaupito ʼo he tahi kehe.’ ʼE ko he kalitate ʼe ina uga te hahaʼi ke nātou fai te meʼa ʼaē ʼe lelei ki te hahaʼi, pea ʼi ʼihi temi ʼe ina fakamaʼua ai kia nātou he ʼu sakilifisio lahi. Ko te ʼofa, ohage ko tona fakamatalatala e te Tohi-Tapu, ʼe ina fakafuafua lelei te fakakaukau pea mo te loto. ʼE maʼuhiga te fakakaukau kia ia ʼaē ʼe ʼofa, koteʼuhi ʼe mahino kia ia totonu ʼo feiā mo te hahaʼi ʼaē ʼe ʼofa ki ai, ʼe ʼi ai tonatou ʼu vaivaiʼaga fuli pea mo tonatou ʼu kalitate ʼe leleiʼia e te hahaʼi. ʼE toe fakamaʼua pe foki te fakakaukau ki te ʼu hahaʼi ʼaē ʼe ʼofa ki ai te Kilisitiano—lagi ʼi ʼihi temi ʼe fakafeagai ki tana ʼu agamāhani— koteʼuhi ʼi tana lau te Tohi-Tapu ʼe ina ʼiloʼi ai ʼe loto e te ʼAtua ke ina fai feiā. (Mateo 5:44; 1 Kolonito 16:14) Kae ko te ʼofa ʼe haʼu tāfito mai te loto. Ko te ʼofa moʼoni ohage ko tona fakahā ʼi te Tohi-Tapu, ʼe mole feala ʼi he temi ke gata pe ʼi te fakakaukau. ʼE fakamaʼua kiai he fakamalotoloto moʼoni pea mo he katoa ʼo te loto.—1 Petelo 1:22.
4. Ko te ʼu ʼaluʼaga fea ʼaē ʼe ʼui ai ko te ʼofa ʼe ko he noʼo mālohi?
4 Ko te hahaʼi ʼaē ʼe nātou manatu pe kia nātou totonu, ʼe tahitahiga hanatou lava felogoi ʼaki he ʼofa moʼoni koteʼuhi ko ia ʼaē ʼe ʼofa ʼe ina lava fakamuʼamuʼa te ʼu meʼa ʼaē ʼe ʼaoga ki he tahi kehe. (Filipe 2:2-4) Ko te ʼu palalau ʼa Sesu ʼaē neʼe ina ʼui “ ʼe lahi age te fiafia ʼi takita foaki, ʼi takita tali” ʼe moʼoni tāfito mokā ʼe foaki ʼaki te ʼofa. (Gaue 20:35, MN ) Ko te ʼofa ʼe ko he noʼo mālohi. (Kolose 3:14) ʼE tau fakapipiki kiai te fakakaumeʼa, kae ko te ʼu noʼo ʼo te ʼofa ʼe maʼuhiga age ia ʼi te ʼu noʼo ʼo te fakakaumeʼa. ʼI ʼihi temi ʼe ʼui ko te manako ʼa he tagata ki tona ʼohoana, ʼe ko te ʼofa, kae ko te ʼofa ʼaē ʼe fakaloto mālohiʼi mai e te Tohi-Tapu ke tou fakatuputupu, ʼe tologa age ʼi te ʼofa ʼa he tagata ki he fafine. Ko he taumatuʼa ʼe nā feʼofamoʼoniʼaki, ʼe nā haga nonofo fakatahi anai tatau aipe peʼe mole kei feala ke nā fakahoko he ʼu felāveʼi fakasino ʼuhi ko te mahaki peʼe tupu ko he mahaki ʼo he tahi ia nāua.
Te ʼOfa—Ko He Kalitate Maʼuhiga
5. He koʼe koa ko te ʼofa ʼe ko he kalitate maʼuhiga ki he Kilisitiano?
5 He koʼe koa ko te ʼofa ʼe ko he kalitate maʼuhiga ki he Kilisitiano? ʼUluaki, he neʼe fakatotonu e Sesu ki tana ʼu tisipulo ke nātou feʼofaniʼaki. Neʼe ina ʼui fēnei: “Ko koutou ko toku ʼu kaumeʼa mo kapau ʼe koutou fai te meʼa ʼaē ʼe ʼau fakatotonu atu kia koutou. Ko te ʼu meʼa ʼaenī ʼe ʼau fakatotonu atu kia koutou, ke koutou feʼofaʼofani.” (Soane 15:14, 17, MN ) Lua, he ko Sehova ʼe ko te faka ʼuhiga tonu ʼaia ʼo te ʼofa, pea ʼi totatou ʼuhiga hahaʼi ʼaē ʼe atolasio kia te ia, ʼe tonu ke tou faʼifaʼitakiʼi ia ia. (Efeso 5:1; 1 Soane 4:16) ʼE ʼui e te Tohi-Tapu ko te ʼiloʼi ʼo Sehova pea mo Sesu ʼe faka ʼuhiga ko te maʼuli heʼegata. E feafeaʼi hatatou lava ʼui ʼe tou ʼiloʼi te ʼAtua mo kapau ʼe mole tou faigaʼi ke tou hage ko ia? Neʼe ʼui fēnei e te ʼapositolo ko Soane: “Ko ʼaē ʼe mole ʼofa neʼe mole ina ako te ʼiloʼi ʼo te ʼAtua, koteʼuhi ko te ʼAtua ʼe ʼofa.”—1 Soane 4:8, MN.
6. ʼE tokoni feafeaʼi te ʼofa ki te fakafuafua lelei ʼo te ʼu koga kehekehe ʼo totatou maʼuli?
6 Ko te ʼofa ʼe maʼuhiga ʼuhi ko tupuʼaga e tolu: ʼE tokoni kia tatou ki te fakafuafua lelei ʼo te ʼu koga kehekehe ʼo totatou maʼuli, pea mo fakatupu ia tatou he ʼu fakatuʼutuʼu lelei ki te meʼa ʼaē ʼe tonu ke tou fai. Ohage la, ʼe maʼuhiga ke tou haga ako te Folafola ʼa te ʼAtua. Ki he Kilisitiano, ko te ʼatamai mālama ʼaia ʼe hage ko he meʼa kai. ʼE tokoni ki ai ke tuputupu ʼo kaku ki te ʼuhigaʼi tagata lahi, pea ke ina fai tana aga ʼo mulimuli ki te finegalo ʼo te ʼAtua. (Pesalemo 119:105; Mateo 4:4; 2 Timoteo 3:15, 16) Kae neʼe fakatokaga fēnei e Paulo: “ ʼE fiameʼameʼa te poto kae ko te ʼofa ʼe lagalaga.” (1 Kolonito 8:1, MN ) ʼE mole he meʼa ʼe kovi ʼaki te ʼatamai mālama totonu. Ko te fihifihia ʼe haʼu ia mai ia tatou—heʼe tou agahala. (Senesi 8:21) Kapau ʼe mole ʼi ai te gāue ʼaia ʼo te ʼofa ʼaē ko te fakafuafua lelei, pea ʼe feala pe ke fiameʼameʼa he tahi ʼuhi ko te ʼatamai mālama, ʼo manatu ia ʼe laka age ia ʼi te hahaʼi. ʼE mole hoko anai he faʼahi feiā mo kapau ʼe uga tāfito ia ia e te ʼofa. “Ko te ofa . . . e mole laupisi, e mole fiameamea.” (1 Kolonito 13:4) Ko te Kilisitiano ʼaē ʼe uga e te ʼofa ʼe mole liliu ia ʼo fialahi, tatau aipe peʼe nofo mo he ʼatamai loloto. Ko te ʼofa ʼe ina taupau ia ia ke haga agavaivai pea mo tāʼofi ia ia ke ʼaua naʼa laupisi.—Pesalemo 138:6; Sakopo 4:6.
7, 8. ʼE tokoni feafeaʼi mai te ʼofa ke tou tokagaʼi te ʼu meʼa ʼaē ʼe maʼuhiga tāfito?
7 Neʼe faitohi fēnei ia Paulo ki te kau Filipe: “ ʼE ʼau haga faikole ʼo ʼuhiga mo te potu ʼaenī ʼi ʼaku ʼu faikole: ke ʼāsili tuputupu aipe tokotou ʼofa ʼi he ʼatamai mālama totonu pea mo he fakasiosio totonu ʼe katoa, ke koutou ʼiloʼi te ʼu meʼa ʼaē ʼe maʼuhiga tāfito.” (Filipe 1:9, 10, MN ) Ko te ʼofa faka Kilisitiano ʼe tokoni anai kia tatou ke tou mulimuli ki te fakaloto mālohi ʼaenī, ke tou ʼiloʼi papau te ʼu meʼa ʼaē ʼe maʼuhiga tāfito. Moʼo tuku mai he faʼifaʼitaki, tou tokagaʼi age muʼa te ʼu palalau ʼa Paulo kia Timoteo: “Kapau ʼe loto he tahi ki he gāue faka taupau, ʼe loto ia ki he gāue matalelei.” (1 Timoteo 3:1, MN ) Lolotoga te taʼu gāue ʼo te taʼu 2000, neʼe fakatuʼu te ʼu kokelekasio foʼou e 1 502 ʼi te malamanei katoa, ʼo fakatahiʼi ʼaia ko kokelekasio e 91 487. Koia ʼe ʼaoga ʼaupito ke ʼi ai he ʼu tagata ʼāfea, pea ʼe tou fakavikiviki ia nātou ʼaē ʼe nātou faiga ki te pilivilesio ʼaia.
8 Kae ko nātou ʼaia ʼe faiga ki te ʼu pilivilesio ki te gāue faka taupau ʼe nātou taupau anai he fakafuafua lelei mo kapau ʼe nātou manatuʼi tuʼumaʼu te fakatuʼutuʼu ʼo te pilivilesio ʼaia. Ko te maʼu ʼo he tuʼulaga peʼe ko te logona ʼe mole ko te meʼa ʼaia ʼaē ʼe maʼuhiga tāfito. Ko te ʼu tagata ʼāfea ʼaē ʼe nātou fakafiafia ia Sehova ʼe ko nātou ʼaē ʼe uga nātou e tonatou ʼofa ke nātou ʼofa kia te ia mo tonatou ʼu tēhina. ʼE mole nātou faiga ki he tuʼulaga māʼoluga peʼe ke nātou puleʼi ʼihi. ʼI tana ʼosi tokoniʼi te kau tagata ʼāfea ke nātou taupau he aga ʼe lelei, neʼe fakatokagaʼi tāfito age e te ʼapositolo ko Petelo te maʼua ʼaē ke nātou “agavaivai.” Neʼe ina fai te tokoni ʼaenī ki te kokelekasio katoa: “Koutou fiavaivai ifo i te nima mafimafi o te Atua.” (1 Petelo 5:1-6) Ko he tahi ʼe faiga feiā ʼe tonu ke ina tokagaʼi te faʼifaʼitaki ʼa te ʼatu tagata ʼāfea ʼaē ʼe gāue kinakina ʼi te malamanei katoa, ʼe nātou agavaivai, pea ʼe ko he tapuakina ia ki tonatou ʼu kokelekasio.—Hepeleo 13:7.
Ko He Fakatuʼutuʼu Lelei ʼe Tokoni Kia Tatou Ke Tou Faʼa Kātaki
9. He koʼe koa ʼe manatuʼi tuʼumaʼu e te kau Kilisitiano te ʼu tapuakina ʼaē neʼe fakapapau age e Sehova?
9 ʼE ʼiloga ʼi te tahi ʼaluʼaga te maʼuhiga ʼo te uga ʼo kita e te ʼofa. ʼE fakapapau e te Tohi-Tapu he ʼu tapuakina maʼuhiga ʼi te temi nei pea mo te ʼu tapuakina fakaofoofo ʼi te temi ka haʼu, kia nātou ʼaē ʼe nātou faiga ke nātou pikipiki ki te ʼAtua ʼaki te ʼofa. (1 Timoteo 4:8) ʼE lava pipiki mālohi he Kilisitiano ki tana tui, mo kapau ʼe tui mālohi ki te ʼu fakapapau ʼaia pea mo tui papau ko Sehova “ ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:6, MN ) Tokolahi ia tatou ʼe tou loto ke hoko mai la te ʼu fakapapau ʼa te ʼAtua, pea ʼe tou fai te ʼu palalau ʼaē neʼe fai e te ʼapositolo ko Soane: “Ameni! Haʼu, ʼAliki Sesu.” (Apokalipesi 22:20, MN ) ʼIo, ko te metitasio ki te ʼu tapuakina ʼo te temi ka haʼu mo kapau ʼe tou nofo agatonu, ʼe ina fakaloto mālohiʼi tatou ke tou faʼa kātaki, ohage ko te faʼa kātaki ʼa Sesu ʼuhi ko tana manatuʼi “te fiafia ʼaē neʼe fakapapau age kia te ia.”—Hepeleo 12:1, 2, MN.
10, 11. ʼE tokoni feafeaʼi mai te ʼofa ke tou faʼa kātaki?
10 Kae e feafeaʼi la mo kapau ʼe tou tauhi tāfito kia Sehova ʼuhi ko tatatou fia maʼuli ʼi te mālama foʼou? Kapau koia, pea ʼe faigafua anai he puli ʼo tatatou faʼa kātaki, peʼe mole tou fiafia mokā mole hoko te ʼu meʼa ohage ko te meʼa ʼaē neʼe tou ʼamanaki kiai. ʼE feala pe ke tou tau mo te tuʼutāmaki lahi ʼaē ko te tafea ʼi te faʼahi fakalaumālie. (Hepeleo 2:1; 3:12) Neʼe palalau ia Paulo ʼo ʼuhiga mo tona kaugā gāue ʼāfea ko Temasi, ʼaē neʼe lītuʼa ki ai. Koteā tona tupuʼaga? He “neʼe manako ia ki te tuʼu ʼo te ʼu faʼahiga meʼa ʼaenī.” (2 Timoteo 4:10, MN ) Ko he tahi ʼe tauhi ʼaki pe hana ʼu fakatuʼutuʼu ʼa ia, ʼe tau ia mo he tuʼutāmaki feiā. ʼI tanatou mole ʼamanaki ki te ʼu tapuakina ʼo te temi ka haʼu, ʼe feala pe ke nātou holi ki te ʼu faigamālie ʼaē ʼe maʼu ʼi te mālama ʼaenī pea mo mole nātou fia fai he ʼu sakilifisio ʼi te temi ʼaenī.
11 Logope ʼe lelei hatatou holi ke tou maʼu he ʼu tapuakina ʼi te temi ka haʼu pea mo he ʼamanaki ke hāofaki tatou mai te ʼu ʼahiʼahi, kae ʼe lagalagaʼi e te ʼofa te meʼa ʼaē ʼe tonu ke tou faka maʼuhigaʼi tāfito ʼi totatou maʼuli. Ko te meʼa ʼaē ʼe maʼuhiga ʼe ko te finegalo ʼo Sehova, kae mole ko te meʼa ʼaē ʼe tou loto kiai. (Luka 22:41, 42) ʼE moʼoni, ʼe lagalaga te ʼofa. ʼE ina fakatupu fiafia ia tatou ke tou fakatalitali ki totatou ʼAtua ʼaki he faʼa kātaki, ʼo fakafeauga ki te ʼu tapuakina ʼaē ka ina foaki mai anai pea mo tou falala ʼe tou maʼu anai ʼi tona lakaga tonu ia meʼa fuli ʼaē neʼe ina fakapapauʼi mai—peʼe laka atu pe la ia. (Pesalemo 145:16; 2 Kolonito 12:8, 9) Kae ʼo fakatalitali ki te temi ʼaia, ʼe tokoni mai te ʼofa ke tou haga tauhi ʼo mole tou tauhi ʼaki pe he manatu kia kita, koteʼuhi “ko te ʼofa . . . ʼe mole ina kumi pe te meʼa ʼaē ʼe ʼaoga kia te ia.”—1 Kolonito 13:4, 5, MN.
Ko Ai ʼAē ʼe Tonu Ke ʼOfa Ki Ai Te Kau Kilisitiano?
12. Maʼa Sesu, ko ai ʼaē ʼe tonu ke tou ʼofa ki ai?
12 Neʼe foaki e Sesu te lekula tāfito ʼo ʼuhiga mo te ʼu hahaʼi ʼaē ʼe tonu ke tou ʼofa ki ai ʼi tana talanoa ki te ʼu folafola e lua ʼo te Lao ʼa Moisese. Neʼe ina ʼui fēnei: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa” pea, “ ʼE tonu ke ke ʼofa ki tou kāiga ohage pe ko koe totonu.”—Mateo 22:37-39, MN.
13. E feafeaʼi hatatou ako te ʼofa kia Sehova, tatau aipe peʼe mole tou sio kia te ia?
13 ʼI te ʼu palalau ʼa Sesu, ʼe mahino lelei mai, ko te potu tāfito ʼe tonu ke tou ʼofa kia Sehova. Kae neʼe mole tou tutupu ake ʼaki he ʼofa katoa kia Sehova. ʼE ko he meʼa ʼe tonu ke tou fakatuputupu. ʼI tatatou ʼuluaki logo ʼo ʼuhiga mo ia, neʼe tou ʼofa ki ai ʼuhi ko te ʼu meʼa ʼaē neʼe tou logo kiai. ʼAki te temi, neʼe tou ako tana faʼahiga teuteuʼi ʼo te kele maʼa te hahaʼi. (Senesi 2:5-23) Neʼe tou ako ai pe neʼe feafeaʼi tana ʼu faʼahiga felogoi mo te hahaʼi, ʼo mole lītuʼa kia tatou ʼi te ʼuluaki hū ʼo te agahala ki te maʼuli ʼa te tagata, kae neʼe ina fai te ʼu fakatuʼutuʼu moʼo totogi ʼo tatou. (Senesi 3:1-5, 15) Neʼe felogoi lelei mo nātou ʼaē neʼe agatonu, pea hoko ai mo tana momoli ifo tona ʼAlo ʼulu tokotahi moʼo fakamolemole ʼo totatou ʼu agahala. (Soane 3:16, 36) Ko tatatou mahino lahi ki te ʼu meʼa ʼaia neʼe ina fakatuputupu ai totatou ʼofa kia Sehova. (Isaia 25:1) Neʼe ʼui e te Hau ko Tavite neʼe ʼofa kia Sehova ʼuhi ko Tana agaʼofa kia ia. (Pesalemo 116:1-9) ʼI te temi nei, ʼe taupau tatou e Sehova, mo takitaki tatou, mo fakamālohiʼi tatou, pea mo fakaloto mālohiʼi tatou. Ka lahi te ʼu meʼa ʼaē ʼe tou ako ʼo ʼuhiga mo ia, pea ʼe lesili ai totatou ʼofa mamahi kia te ia.—Pesalemo 31:23; Sofonia 3:17; Loma 8:28.
ʼE Tou Lava Fakahā Feafeaʼi Totatou ʼOfa?
14. Ko te ʼu potu fea ʼaē ʼe tou lava fakahā ai ʼe tou ʼofa moʼoni ki te ʼAtua?
14 ʼE mahino ia, tokolahi te hahaʼi ʼi te malamanei ʼe nātou lau ʼe nātou ʼofa ki te ʼAtua, kae ʼe mole ʼalutahi tanatou aga mo tanatou felau ʼaia. E feafeaʼi hatatou ʼiloʼi ʼe tou ʼofa moʼoni kia Sehova? ʼE feala hatatou palalau ki ai ʼi te faikole pea mo tou tala age ki ai te ʼu meʼa ʼe tou logoʼi ʼi totatou loto. Pea ʼaki tatatou aga, ʼe feala hatatou fakahā ai totatou ʼofa. Neʼe ʼui fēnei e te ʼapositolo ko Soane: “Ko ʼaē ʼe ina taupau [te] folafola [ʼa te ʼAtua], ʼe kua katoa moʼoni ia te ia te ʼofa ʼo te ʼAtua. ʼI te meʼa ʼaia ʼe tou ʼiloʼi ai ʼe tou fakatahi mo ia.” (1 Soane 2:5; 5:3, MN ) Tahi ʼaē meʼa, ʼe ʼui mai e te Folafola ʼa te ʼAtua ke tou fefakatahiʼaki pea mo tou maʼuli maʼa. ʼE tou lītuʼa ki te malualoi, ʼo tou palalau ʼi te moʼoni, pea mo tou taupau tatatou ʼu fakakaukau ke maʼa. (2 Kolonito 7:1; Efeso 4:15; 1 Timoteo 1:5; Hepeleo 10:23-25) ʼE tou fakahā totatou ʼofa ʼo tou tokoni ʼi te faʼahi fakakoloa kia nātou ʼaē ʼe ʼaoga kiai. (1 Soane 3:17, 18) Pea ʼe mole tou fakatātāʼofi ʼi te palalau ki te hahaʼi ʼo ʼuhiga mo Sehova. ʼE kau kiai te faka mafola ʼo te logo lelei ʼo te Puleʼaga, ʼaē ʼe hoko ʼi te malamanei katoa. (Mateo 24:14; Loma 10:10) Ko tatatou fakalogo ki te Folafola ʼa te ʼAtua ʼi te ʼu potu ʼaia ʼe ina fakahā lelei totatou ʼofa moʼoni kia Sehova.
15, 16. ʼI te taʼu kua hili, neʼe malave feafeaʼi ia te ʼofa ʼaē kia Sehova ki te maʼuli ʼo te tokolahi?
15 Ko te ʼofa ʼaē kia Sehova ʼe tokoni ki te hahaʼi tokolahi ke nātou fai he ʼu tonu lelei. ʼI te taʼu kua hili, ko te toko 288 907 hahaʼi neʼe uga nātou e te taʼi ʼofa ʼaia ke nātou foaki tonatou maʼuli kia te ia, pea ke nātou fakahā te potu ʼaia ʼi tanatou papitema. (Mateo 28:19, 20) Neʼe maʼuhiga ʼaupito tonatou foaki ʼo tonatou maʼuli. Neʼe ko he fakaʼiloga ʼaia ʼo te kua fetogi ʼo tonatou maʼuli. Koʼeni te faʼifaʼitaki, ko Gazmend neʼe logona ʼi Alepania ʼi te faigaoʼi basket-ball. Lolotoga te ʼu taʼu, ko ia mo tona ʼohoana neʼe nā ako te Tohi-Tapu, pea logope te ʼu faigataʼaʼia kae neʼe nā liliu ko te ʼu kaugā fagona ʼo te Puleʼaga. ʼI te taʼu kua hili, neʼe papitema ia Gazmend, ʼo kau ʼi te toko 366 ʼaē neʼe papitema ʼi Alepania ʼi te taʼu gāue 2000. Neʼe tā e te nusipepa te alatike ʼo ʼuhiga mo ia pea neʼe ʼui fēnei ai: “Kua ʼi ai te fakatuʼutuʼu ʼo tona maʼuli, pea ʼaki te faʼahi ʼaia, ko ia mo tona famili kua nātou maʼu te fiafia lahi. Maʼa ia, ʼe mole kei maʼuhiga ia peʼe feafeaʼi hana maʼuli lelei, kae ʼi te temi nei ʼe ina fia fakaʼaogaʼi tāfito tona temi moʼo tokoni ki te hahaʼi.”
16 ʼO toe feiā pe, neʼe ʼui age ki te tuagaʼane foʼou ke ina fakakaukauʼi peʼe fia fai ki te faʼahiga tuʼulaga gāue ʼi te sosiete ʼe gāue ki te penisini. ʼI tana ʼosi maʼu tuʼulaga lolotoga te ʼu taʼu, kua tuku age leva ki ai te faigamālie ʼaē ke liliu ko te ʼuluaki fafine ʼaē ʼe hoa ki te patolo talu te tuʼu ʼo te sosiete ʼaia. Kae kua ina foaki tona maʼuli kia Sehova. ʼI tana ʼosi fai palalau ki te ʼaluʼaga ʼaia mo tona ʼohoana, neʼe fakafisi te tuagaʼane ki te tuʼulaga pea neʼe ina fai te puleʼaki ke gāue vaeluaʼi temi ke feala hana liliu ko he pionie. Ko tona ʼofa kia Sehova neʼe ina uga ia ia ke ina filifili ke gāue pionie ʼi hana faiga ki te ʼu koloā ʼo te mālama ʼaenī. ʼI tona fakahagatonu, ko te toko 805 205 ʼi te malamanei katoa neʼe uga nātou e te taʼi ʼofa ʼaia ke nātou kau ki te ʼu koga kehekehe ʼo te gāue pionie ʼi te taʼu gāue 2000. Neʼe fakahā e te kau pionie ʼaia tonatou ʼofa pea mo tanatou tui!
Neʼe Uga Nātou Ke Nātou ʼOʼofa Kia Sesu
17. Koteā te faʼifaʼitaki lelei ʼaē neʼe tuku mai e Sesu ʼo ʼuhiga mo te ʼofa?
17 Ko Sesu ʼe ko he faʼifaʼitaki taulekaleka ʼo he tahi neʼe uga e te ʼofa. ʼI tana maʼuli ʼi te lagi, neʼe ʼofa ki tana Tāmai pea neʼe ʼofa ki te malamanei. ʼI tana fakatā tonu te poto, neʼe ina ʼui fēnei: “Neʼe ʼau liliu ʼi ʼona tafa ko he tufuga faiva pea neʼe ʼau liliu ko he tahi neʼe ʼofa tāfito ia ki ai ʼi te ʼaho mo te ʼaho, ʼo ʼau fiafia ʼi ʼona muʼa ʼi te temi fuli pe, pea mo fakafiafia ʼo ʼuhiga mo te kele maʼuli ʼo tona kele, pea ko te ʼu meʼa ʼaē neʼe ʼau ʼofa kiai neʼe ko te ʼu meʼa ʼaē neʼe nofo mo te ʼu foha ʼo te tagata.” (Tāʼaga Lea 8:30, 31) Ko te ʼofa ʼa Sesu neʼe ina uga ia ia ke lītuʼa ki tona nofoʼaga ʼaē ʼi selo kae ke haʼu ʼo tupu ko he kiʼi tamasiʼi. Neʼe faʼa kātaki pea mo agalelei ki te hahaʼi agavaivai, pea mo te hahaʼi mālalo pea mo nātou ʼaē neʼe maʼuʼuli mafasia ʼi te ʼu fili ʼa Sehova. Ki muli age, neʼe mate ʼi te pou fakamamahi maʼa te malamanei katoa. (Soane 3:35; 14:30, 31; 15:12, 13; Filipe 2:5-11) ʼE ko he faʼifaʼitaki lelei ʼo he fakatuʼutuʼu lelei!
18. (a) E feafeaʼi hatatou fakatuputupu te ʼofa kia Sesu? (b) E feafeaʼi hatatou fakahā ʼe tou ʼofa kia Sesu?
18 Ka lau e nātou ʼaē ʼe lelei tonatou loto te ʼu fakamatala ʼo te maʼuli ʼa Sesu ʼi te ʼu Evaselio pea mo metitasio ki te ʼu tuʼuga tapuakina ʼaē ʼe nātou maʼu mai tana nofo agatonu, ʼe fakatupu ai hanatou fia fakatuputupu tonatou ʼofa mamahi kia te ia. ʼE tou hage ʼi te temi nei ko nātou ʼaē neʼe palalau ki ai ia Petelo ʼi tana ʼui fēnei: “Logola neʼe mole heʼeki koutou sisio kia [Sesu], ʼe koutou ʼoʼofa kia te ia.” (1 Petelo 1:8, MN ) ʼE ʼiloga totatou ʼofa mokā tou tui kia te ia pea mo faʼifaʼitaki tona maʼuli faka sakilifisio. (1 Kolonito 11:1; 1 Tesalonika 1:6; 1 Petelo 2:21-25) ʼI te ʼaho 19 ʼo ʼApelili 2000, neʼe fakamanatuʼi e te toko 14 872 086 te ʼu tupuʼaga ʼo totatou ʼofa kia Sesu, ʼo nātou kau ki te Fakamanatu ʼo tona mate ʼaē ʼe fai ʼi te taʼu fuli. Neʼe ko he toe kaugamālie! Pea ʼe ko he meʼa fakaloto mālohi te ʼiloʼi ʼaē ʼe kaugamālie ʼaupito te hahaʼi ʼe nātou loto ke hāofaki nātou ʼaki te sakilifisio ʼa Sesu! ʼE moʼoni, ʼe lagalagaʼi tatou e te ʼofa ʼa Sehova pea mo Sesu kia tatou, pea mo totatou ʼofa kia nāua.
19. Koteā te ʼu fehuʼi ʼe hoki talanoa anai kiai te alatike ʼaē ʼe hoa mai?
19 Neʼe ʼui e Sesu ʼe tonu ke tou ʼofa kia Sehova ʼaki totatou loto katoa pea mo totatou nefesi katoa pea mo totatou laumālie katoa pea mo totatou mālohi katoa. Kae neʼe ina toe ʼui pe foki ʼe tonu ke tou ʼofa ki totatou kāiga ohage pe ko tatou totonu. (Maleko 12:29-31) Ko ai koa te kāiga ʼaia? Pea ʼe tokoni feafeaʼi mai te ʼofa ki te kāiga ke tou taupau he fakafuafua lelei pea mo he fakatuʼutuʼu ʼe lelei? ʼE tali anai ki te ʼu fehuʼi ʼaia te alatike ʼaē ʼe hoa mai.
Kei Koutou Manatuʼi Koa?
• He koʼe koa ko te ʼofa ʼe ko he kalitate maʼuhiga?
• E feafeaʼi ʼo hatatou ako te ʼofa kia Sehova?
• ʼE fakamoʼoni feafeaʼi e tatatou aga ia totatou ʼofa ʼaē kia Sehova?
• ʼE tou fakamoʼoni feafeaʼi ʼe tou ʼofa kia Sesu?
[Paki ʼo te pasina 10]
ʼE tokoni mai te ʼofa ke tou kātaki ʼo fakatalitali ki te hāofaki
[Paki ʼo te pasina 12]
ʼE uga tatou e te sakilifisio lahi ʼa Sesu ke tou ʼofa kia te ia