Tonatou Maʼuli
Neʼe Tokoni Mai Sehova ʼi Te ʼAho Fuli Pe
NEʼE FAKAMATALA ʼE FORREST LEE
Neʼe toʼo e te kau polisi tamatou fakatagi pea mo tamatou ʼu tohi faka Tohi-Tapu. ʼI te hoko ʼo te Lua Tau Faka Malamanei, neʼe maʼu ai e te kau fakafeagai he takuʼaki ke nātou fakalotoʼi te kovana foʼou ʼo Kanata ke ina tapuʼi te gāue ʼa te kau Fakamoʼoni ʼa Sehova. Neʼe hoko te ʼu meʼa ʼaia ʼi te ʼaho 4 ʼo Sūlio 1940.
NEʼE mole mātou lotovaivai ʼi te meʼa ʼaia neʼe hoko, kae neʼe lahi age te ʼu tohi ʼaē neʼe mātou ʼolo ʼo toʼo mai pea mo hoko atu tamatou fai faka mafola. ʼE mole galo anai kia ʼau te ʼu palalau ʼaenī neʼe fai e taku tāmai ʼi te temi ʼaia: “ ʼE mole tou tuku feiā anai te gāue. Neʼe fakatotonu mai e Sehova ke tou fai faka mafola.” ʼI te temi ʼaia, neʼe ʼau taʼu 10. Kae ʼo aʼu mai kia ʼaho nei, ko te lotomālohi ʼo taku tāmai pea mo tana faʼafai ʼi te minisitelio, ʼe kei ina fakamanatuʼi mai kia ʼau ko Sehova ʼAtua ʼe tokoni ki tana hahaʼi agatonu.
ʼI te tahi ʼaho, neʼe tāʼofi mātou e te kau polisi, ʼo nātou toʼo tamatou ʼu tohi, pea mo nātou ʼave mo taku tāmai ki te fale pilisoni, kae nofo tokotahi taku faʼe mo te ʼu toe e toko fā. Neʼe hoko te faʼahi ʼaia ʼi Sepetepeli 1940 ʼi Saskatchewan. Mole fualoa, pea neʼe fakamavae ʼau ʼi te faleako he neʼe ʼau mulimuli ki toku leʼo ʼo loto ʼaē neʼe akoʼi e te Tohi-Tapu pea neʼe mole ʼau tauhi ki te fuka pea mo te hiva ʼo te fenua. Neʼe momoli mai e te faleako te ʼu meʼa ʼaē neʼe tonu ke ʼau ako, pea neʼe mole mamafa ai taku polokalama pea neʼe lahi ai toku temi fai faka mafola.
ʼI te 1948, neʼe fai te pāui ki te kau pionie, te kau minisi temi katoa ʼo te kau Fakamoʼoni ʼa Sehova, ke nātou ʼolo ʼo gāue ʼi te potu esite ʼo Kanata. Koia neʼe ʼau ʼalu ai ʼo pionie ʼi Halifax, ʼi Nouvelle-Écosse, pea ʼi Cape Wolfe, ʼi te Motu ʼo te Prince-Édouard. ʼI te taʼu ʼaē neʼe hoa kiai, neʼe ʼau tali te fakaafe ʼaē ke ʼau gāue vāhaʼa lua ʼi te filiale ʼo te kau Fakamoʼoni ʼa Sehova ʼi Toronto. Neʼe liliu te ʼu vāhaʼa ʼaia e lua ko taʼu e ono, ʼaē neʼe ʼau gāue fiafia ai. Ki muli age, neʼe ʼau felāveʼi mo Myrna, ʼaē neʼe ʼofa mo ia kia Sehova, pea neʼe ma ʼohoana ʼi Tesepeli 1955. Neʼe ma nonofo ʼi Milton, ʼi Ontario, pea mole fualoa neʼe fakatuʼu ai te kokelekasio foʼou. Ko tamā lalo fale neʼe liliu ko te Fale ʼo Te Puleʼaga.
ʼE Ma Fia Fakalahi Tomā Minisitelio
ʼI te ʼu taʼu ʼaē neʼe hoa kiai, neʼe ma maʼu tamā ʼu fānau e toko ono, neʼe mole fevāhaʼa mamaʼoʼaki ʼi tanatou ʼu taʼu. Neʼe ʼuluaki tupu tamā taʼahine ko Miriam. Pea hoa kiai ia Charmaine, mo Mark, mo Annette, mo Grant, pea mo te muli ko Glen. ʼI ʼihi temi, ʼi taku haʼu mai taku gāue, neʼe ʼau maʼu atu te ʼu toe ʼe nātou nonofo ia tafa ʼo te afi, pea lau e Myrna te Tohi-Tapu kia nātou, ʼo ina fakamahino age te ʼu fakamatala ʼo te Tohi-Tapu, pea mo fakahū ki tonatou loto te ʼofa moʼoni kia Sehova. ʼAki tana tokoni ʼofa ʼaia, ko tamā ʼu fānau fuli ʼi tanatou kei liliki, neʼe nātou mālama lelei ki te Tohi-Tapu.
Ko te faʼafai ʼo taku tāmai ʼi te minisitelio neʼe malave ʼaupito ki taku fakakaukau pea mo toku loto. (Tāʼaga Lea 22:6) Koia, ʼi te taʼu 1968, ʼi te temi ʼaē neʼe fakaafe ai te ʼu famili Fakamoʼoni ʼa Sehova ke nātou ʼolo ki Amelika Centrale pea mo Saute moʼo tokoni ki te gāue fai faka mafola, neʼe mātou fia tali te pāui ʼaia. ʼI te temi ʼaia, ko tamā ʼu tamaliki neʼe nātou taʼu 5 ʼo aʼu ki te taʼu 13, pea neʼe mole poto he tahi ia mātou ʼi te palalau faka Sepania. ʼO mulimuli ki te ʼu tokoni ʼaē neʼe foaki mai, neʼe ʼau folau ki te ʼu fenua kehekehe ʼaia moʼo vakavakaʼi tonatou faʼahiga maʼuli. ʼI taku toe liliu mai, neʼe mātou vakaʼi te ʼu faʼahi ʼaia ʼi te faikole pea mātou fai ai te tonu ke mātou ʼolo ki Nicaragua.
ʼE Mātou Tauhi ʼi Nicaragua
ʼI ʼOketopeli 1970, neʼe mātou nonofo ʼi tomatou ʼapi foʼou, pea hili vāhaʼa e tolu neʼe tuku mai ke ʼau fai te kiʼi koga veliveli ʼo te polokalama ʼi te fono. ʼI taku fai taku kiʼi akonaki ʼaia, neʼe ʼau faiga fakamalotoloto he neʼe mole heʼeki ʼau lava palalau lelei te faka Sepania, pea neʼe ʼau fakaʼosi ʼo fakaafe te kokelekasio katoa ke ʼōmai ki te cerveza ʼaē ka fai ʼi tamatou ʼapi, ʼi te Moeaki uhu hola 9 vaelua. Neʼe tonu ke ʼau ʼui servicio, te kupu ki te gāue fai faka mafola, kae ʼi tona ʼuhiga moʼoni, neʼe ʼau fakaafe te hahaʼi fuli ke nātou ʼōmai ʼo ʼinu piele. Koia ko te akoako ʼo te lea neʼe ko he meʼa faigataʼa!
ʼI te kamata, neʼe ʼau tohi taku ʼu palalau ʼi toku nima, pea neʼe ʼau lau liuliuga ʼi muʼa ʼo taku aʼu ki te matapā. Neʼe ʼau ʼui fēnei: “ ʼAki te tohi ʼaenī, ʼe ʼau fakaafe koe ke ke ako te Tohi-Tapu.” Ko te tagata ʼaē neʼe ina tali te fakaafe ʼaia, neʼe ina ʼui ki muli age neʼe tonu ia ke haʼu ki tamatou ʼu fono ke mahino lelei ki te ʼu meʼa ʼaē neʼe ʼau faiga ke ʼau fakahā age kia ia. Neʼe liliu te tagata ʼaia ko he Fakamoʼoni ʼa Sehova. ʼE hā lelei mai ʼe ko te ʼAtua ʼaē ʼe ina fakamaʼuli te ʼu pulapula ʼo te moʼoni ʼi te ʼu loto agavaivai, ohage ko tona fakamoʼoni e te ʼapositolo ko Paulo!—1 Kolonito 3:7.
Hili teitei taʼu e lua ʼi tamatou nonofo ʼi te kolo tāfito ko Managua, neʼe kole mai ke mātou ʼolo ki te potu saute ʼo Nicaragua. Neʼe mātou gāue ai mo te kokelekasio ʼo Rivas pea mo te ʼu kūtuga ʼo te koga meʼa ʼaē neʼe nātou fia ʼiloʼi te moʼoni. Neʼe ma kaugā ʼolo mo Pedro Peña, ko he Fakamoʼoni kua matuʼa neʼe nofo agatonu, ʼo ʼaʼahi te ʼu kūtuga ʼaia. Neʼe nonofo te tahi kūtuga ʼi te motu ko te moʼuga afi ʼi te Vaitafe ʼo Nicaragua, ʼaē neʼe ko te famili pe e tahi neʼe ko te ʼu Fakamoʼoni ʼa Sehova.
Logola neʼe mole lahi te ʼu koloā ʼo te famili ʼaia, kae neʼe nātou faiga ʼaupito ke nātou fakahā tanatou fiafia ʼi tamā ʼaʼahi. ʼI te po ʼaē neʼe ma tau atu kiai, neʼe kua ʼosi teuteuʼi te meʼa kai maʼa māua. Neʼe ma nonofo ai ʼi te vāhaʼa katoa, pea ko te tokolahi ʼo te hahaʼi agalelei ʼaē neʼe nātou ʼoʼofa ki te Tohi-Tapu pea neʼe nātou vaevae mo māua tanatou meʼa kai. Neʼe ma fiafia ʼaupito he neʼe ʼōmai te toko 101 hahaʼi ki te akonaki ʼo te ʼAhotapu.
Neʼe ʼau sio ki te mālohi ʼo te tokoni ʼa Sehova, ʼi te temi ʼaē neʼe ma ʼaʼahi ai te kūtuga ʼaē neʼe nātou fia logo ki te moʼoni, ʼi te ʼu moʼuga ʼaē ʼe tuʼu ōvi ki te tuʼakoi ʼo Costa Rica. ʼI te ʼaho ʼaē neʼe tonu ke ma mavae ai, neʼe haʼu Pedro ʼo kumi ʼau, kae neʼe ʼau takoto he neʼe ʼau maʼu te malaria. Neʼe ʼau ʼui age fēnei: “ ʼE mole ʼau lava ʼalu Pedro.” Neʼe ina hili tona nima ki toku laʼe, pea ina tali fēnei: “ ʼE kovi tou fiva, kae ʼe tonu ke ke haʼu! ʼE talitali mai te ʼu tēhina.” Pea neʼe ina fai te kole fakamalotoloto neʼe mole heʼeki ʼau logo ki he faikole feiā ʼi muʼa atu.
Hili ʼaia, pea neʼe ʼau ʼui fēnei age: “ ʼAlu ʼo ʼinu hau fresco (ko te huʼa foʼi ʼakau mata). ʼE ʼau tokalelei anai ia teitei minuta e hogofulu.” Ko famili e lua ʼaē neʼe nonofo ʼi te koga meʼa ʼaē neʼe ma ʼaʼahi, pea neʼe nātou gaohi fakaleleiʼi māua. ʼI te ʼaho ake, neʼe ma fai faka mafola mo nātou, logola neʼe kei ʼau vaivai ʼuhi ko toku fiva. Neʼe ma lotomālohi ʼaupito ʼi tamā sio ʼaē neʼe ko te toko teau tupu hahaʼi ʼaē neʼe kau ki tamatou fono ʼi te ʼAhotapu!
ʼE Mātou Toe ʼOlo
ʼI te taʼu 1975, neʼe tupu tamā fitu tamasiʼi, ia Vaughn. ʼI te taʼu ʼaē neʼe hoa mai kiai, neʼe mātou toe liliu ki Kanata ʼuhi ko te ʼu fihifihia faka paʼaga. Neʼe mole faigafua tamatou mavae ʼaē ʼi Nicaragua, he neʼe mātou logoʼi moʼoni te mālohi ʼo te tokoni ʼa Sehova kia mātou ʼi tamatou nonofo ai. ʼI te temi ʼaē neʼe mātou mavae ai, neʼe ko hahaʼi e toko 500 tupu ʼi te telituale ʼo tamatou kokelekasio neʼe ʼōmai ki te ʼu fono.
ʼI muʼa atu, ʼi taku liliu mo toku ʼofafine ko Miriam ʼo pionie makehe ʼi Nicaragua, neʼe kole fēnei mai e Miriam: “Papa, kapau ʼe tonu ʼi he ʼaho ke tou toe liliu ki Kanata, ʼe ke tuku anai ʼau ke ʼau nofo ʼi henī?” Neʼe mole ʼau manatu ʼe mātou mavae anai ʼi he temi, koia neʼe ʼau tali fēnei: “Ei!” Koia, ʼi tamatou mavae, neʼe nofo Miriam ʼo hoko atu tana minisitelio ʼi te temi katoa. Ki muli age, neʼe ʼohoana mo Andrew Reed. ʼI te 1984, neʼe nā kau ki te 77 kalasi ʼo Kalaate, te faleako ki te ʼu misionea ʼo te kau Fakamoʼoni ʼa Sehova, ʼaē neʼe tuʼu ʼi Brooklyn, ʼi New York. ʼE gāue nei Miriam mo tona ʼohoana ʼi te République Dominicaine, ʼo ina fakahoko ai tana holi ʼaē neʼe ina maʼu mai te kau misionea lelei ʼaupito ʼo Nicaragua.
Lolotoga te temi ʼaia, neʼe kei malave lahi ʼi toku loto te ʼu palalau ʼo toku tāmai, “ ʼe mole tou tuku feiā anai te gāue.” ʼI te 1981, neʼe feʼauga te falā ʼaē neʼe mātou tānaki ke mātou toe liliu ki Amelika Centrale, ʼo mātou toe ʼolo ai leva ki Costa Rica. ʼI tamatou gāue ai, neʼe fakaafe māua ke ma tokoni ki te laga ʼo te ʼu pilō foʼou ʼo tanatou filiale. Kae ʼi te 1985, neʼe mahamahaki tamā tama ko Grant, pea neʼe ma toe liliu ai ki Kanata. Neʼe nofo ia Glen ʼi Costa Rica ʼo gāue ʼi te laga ʼo te filiale, pea ko Annette pea mo Charmaine neʼe nā pionie makehe. ʼI tamatou nonofo ʼi Costa Rica, neʼe mole mātou manatu ʼi he temi, ʼe mātou toe mavae anai.
ʼE Hoko Te Meʼa Fakaloto Mamahi
ʼI te ʼaho 17 ʼo Sepetepeli 1993, neʼe ko te ʼaho neʼe lāulelei. Ko ʼau mo toku foha lahi ko Mark, neʼe ma gaohi te ʼato. Neʼe ma gāue feōvi pea ohage ko te agamāhani, neʼe ma fai palalau ʼo ʼuhiga mo te ʼu manatu fakalaumālie. Mole ʼau ʼiloʼi pe neʼe feafeaʼi, kae neʼe ʼau toka pea mo teka ifo mai te ʼato. ʼI taku toe ʼala ake, neʼe ʼau sio pe ki te ʼu hila pea mo te hahaʼi teu hina. Neʼe tuku ʼau ʼi te lopitali, ʼi te kogafale ʼaē ʼe leletakiʼi ki ai te hahaʼi mahahaki peʼe lāvevea.
ʼUhi ko te meʼa ʼaē ʼe ʼui e te Tohi-Tapu, neʼe fēnei taku ʼu ʼuluaki palalau: “Mole ʼau tali te toto, mole ʼau tali te toto!” (Gaue 15:28, 29) Neʼe ʼau fīmālie ʼi taku logo ki te ʼui fēnei ʼa Charmaine: “Tuku tau tuʼania Papa. ʼE mātou ʼi henī fuli.” Neʼe ʼau ʼiloʼi ki muli age, neʼe sio te ʼu tōketā ki taku pepa faitoʼo, pea neʼe mole he fihifihia ʼo ʼuhiga mo te toto. Neʼe fasi toku kia, pea neʼe ʼau palalisia katoa, ʼo faigataʼa ai taku mānava tokotahi.
Neʼe mole feala ke ʼau gaūgaūe, koia neʼe ʼaoga lahi kia ʼau te tokoni ʼa Sehova. Neʼe tafa toku kia ke ʼai he tuio ke ʼau mānava ai, ʼo mole kei ʼalu ai te ʼaele ki te ʼu ivi ʼo te moga. Neʼe mole kei ʼau lava palalau. Neʼe tonu ke sioʼi e te hahaʼi toku ʼu laugutu ke feala hanatou mahino ki te meʼa ʼaē neʼe ʼau faiga ke ʼau ʼui.
Neʼe lahi tamatou ʼu maʼua ke huʼi. Neʼe kau toku ʼohoana pea mo te tokolahi ʼo taku fānau ʼi te minisitelio katoa, koia neʼe ʼau feʼekeʼaki ai peʼe tonu koa ke nātou tuku te selevisi ʼaia moʼo tokaga ki te ʼu maʼua faka paʼaga ʼaia. Kae neʼe maʼu e Mark tana gāue, ʼo feala ai ia māhina pe e tolu, ke lahi tana tokoni ki te huʼi ʼo te ʼu maʼua. ʼO feala ai kia nātou fuli ke nātou hoko atu tanatou minisitelio temi katoa, gata pe kia ʼau pea mo toku ʼohoana.
Ko te ʼu kate pea mo te ʼu tohi ʼe lauʼi teau mai te ʼu fenua kehekehe e ono, neʼe pulusi ʼi te ʼu kaupā ʼo toku kogafale ʼi te lopitali. Neʼe tokoni moʼoni mai ia Sehova. Neʼe toe tokoni te kokelekasio ki taku famili, ʼo nātou foaki he ʼu meʼa kai lolotoga te ʼu māhina e nima vaelua ʼaē neʼe tonu ke tokaga lahi ai kia ʼau. ʼI te ʼaho fuli, neʼe nofo te tagata ʼāfea mo ʼau ʼi te hili hoʼatā, ʼo ina lau mai te Tohi-Tapu pea mo te ʼu tohi faka Tohi-Tapu, pea mo ina fakamatala mai te ʼu faʼifaʼitaki fakaloto mālohi. Ko te toko lua ʼo taku famili neʼe nā teuteu te ʼu fono mo ʼau, koia neʼe ʼau maʼu te meʼa kai fakalaumālie ʼi te temi fuli pe.
ʼI taku kei nofo ʼi lopitali, neʼe fai te fakatuʼutuʼu ke ʼau kau ki te polokalama ʼo te fakatahi makehe ʼaho tahi. Neʼe fakatuʼutuʼu e te lopitali ke ʼi ai he fafine afilimie pea mo he tahi fafine afilimie ʼe tokaga ki taku mānava, ke nā kaugā nonofo mo ʼau ʼi te ʼaho katoa ʼaia. Neʼe ʼau fiafia lahi ʼi taku toe fakatahi mo toku ʼu tēhina mo tuagaʼane Kilisitiano! ʼE mole ʼau galoʼi anai taku sio ʼaē ki te fakaʼatu ʼa te toko lauʼi teau hahaʼi, ʼo talitali ke nātou ʼalofa mai.
ʼE ʼAu Mālohi ʼi Te Faʼahi Fakalaumālie
Hili te lagi taʼu katoa ʼi te meʼa ʼaia neʼe hoko, neʼe kua feala leva ke ʼau toe liliu ki toku ʼapi ʼo fakatahi mo toku famili, logola ʼe kei tonu ke leʼoleʼo ʼau ʼi te ʼaho fuli ʼuhi ko taku ʼu faitoʼo. Neʼe gaohi tāfito te motokā ke feala haku ʼalu ki te ʼu fono, ʼaē neʼe tahitahiga taku tō ai. Kae ʼe ʼau ʼui fakahagatonu atu, neʼe mole ko he meʼa faigafua taku ʼalu ki te ʼu fono ʼaia. Talu taku toe liliu ki fale, neʼe ʼau kau ki te ʼu fakatahi faka tisitilike fuli.
Ki muli age, ʼi Fepualio 1997, neʼe feala haku toe palalau veliveli pe. Ko ʼihi ʼi te ʼu afilimie ʼe nātou fakalogo lelei mokā ʼau vaevae mo nātou taku ʼamanaki ʼaē ʼe fakatafito ki te Tohi-Tapu. Ko te afilimie neʼe ina lau katoa mai te tohi Les Témoins de Jéhovah : Prédicateurs du Royaume de Dieu pea mo te tahi ʼu tohi ʼo te Sosiete. Neʼe ʼau faitohi ki te hahaʼi ʼo ʼau fakaʼaogaʼi te kiʼi moʼi koga ʼakau moʼo tā te olotinatea. Neʼe ʼau gaʼegaʼe ʼaupito ʼi taku faʼahiga tā olotinatea ʼaia, kae neʼe ko he fakapale lahi taku lava kau ki te minisitelio.
ʼE ʼau kau ʼi te mahaki ʼo te ʼu ʼua makini. Kae ʼi te temi ʼaē ʼe ʼau vaevae ai te moʼoni ʼo te Tohi-Tapu mo te hahaʼi peʼe ʼau logo ki tanatou lautohi maʼa ʼaku, pea ʼe ʼau logo fīmālie ai. ʼI ʼihi temi, ʼe ʼau fai faka mafola ʼi te ala ʼaki te tokoni ʼo toku ʼohoana, ʼaē ʼe ina fakamahino maʼa ʼaku mokā ʼaoga ke tokoni mai. ʼI ʼihi temi, neʼe ʼau pionie vaeluaʼi temi. Neʼe ʼau fiafia ʼi toku ʼuhiga tagata ʼāfea, tāfito mokā ʼōmai te ʼu tēhina kia ʼau ʼi te ʼu fono peʼe nātou ʼaʼahi ʼau ʼi fale pea mo ʼau tokoni pea mo fakaloto mālohi nātou.
ʼE ʼau ʼui fakahagatonu atu, neʼe faigafua pe haku lotovaivai. Kae ʼi te temi ʼaē neʼe ʼau logo vaivai ai, neʼe ʼau faikole atu aipe ke ʼau maʼu te fiafia. ʼI te po mo te ʼaho ʼe ʼau faikole ke haga tokoni mai Sehova kia ʼau. ʼE ʼau fiafia tuʼumaʼu mokā faitohi mai he tahi peʼe ka ʼaʼahi mai ʼau. Ko taku lau Te Tule Leʼo peʼe ko te Réveillez-vous ! ʼe ina toe fakafonu toku ʼatamai ʼaki he ʼu manatu ʼe fakaloto mālohi. ʼI ʼihi temi, ko te ʼu afilimie kehekehe ʼe nātou lau mai te ʼu nusipepa ʼaia. Talu mai te meʼa ʼaē neʼe hoko, neʼe ʼau fakalogo tuʼa fitu te lau ʼo te Tohi-Tapu katoa ʼi te ʼu foʼi fime. ʼE ko te ʼu faʼahi kehekehe ʼaia ʼaē neʼe tokoni mai Sehova kia ʼau.—Pesalemo 41:3.
ʼAki te ʼu ʼaluʼaga foʼou ʼaia, kua ʼau maʼu he temi lahi ke ʼau metitasio ai peʼe akoʼi feafeaʼi tatou e totatou Faiako Lahi, ko Sehova. ʼE ina foaki mai te ʼatamai mālama ʼo ʼuhiga mo tona finegalo pea mo tana fakatuʼutuʼu, mo he minisitelio maʼuhiga, mo he ʼu tokoni ki te kalavi ʼo te manuʼia faka famili, pea mo te fakasiosio tonu ke tou ʼiloʼi te meʼa ʼaē ʼe tonu ke fai ʼi te ʼu temi faigataʼaʼia. Neʼe tapuakina ʼau e Sehova he neʼe ina foaki mai he ʼohoana agatonu pea mo agalelei ʼaupito. Neʼe toe lagolago agatonu kia ʼau taku fānau, pea ʼe ʼau fiafia lahi ʼi tanatou kau fuli ki te minisitelio temi katoa. ʼI te ʼaho 11 ʼo Malesio 2000, ko tamā tama ko Mark pea mo tona ʼohoana, ko Allyson, neʼe nā maʼu pepa ʼi te 108 kalasi ʼo te Faleako ʼo Kalaate, pea neʼe fekauʼi nāua ki Nicaragua. Ko ʼau mo toku ʼohoana neʼe ma kau ki te ʼaho ʼaē neʼe foaki ai tanā ʼu pepa. ʼE ʼau ʼui moʼoni atu, ko te ʼu faigataʼaʼia neʼe nātou fetogi toku maʼuli kae neʼe mole nātou fetogi toku loto.—Pesalemo 127:3, 4.
ʼE ʼau fakafetaʼi kia Sehova ʼo ʼuhiga mo te poto ʼaē neʼe ina tuku mai ke feala haku foaki ki toku famili te tofiʼa fakalaumālie ʼaē neʼe tuku mai. ʼE ʼau lotomālohi ʼi taku sio ʼaē ki taku ʼu fānau ʼe nātou tauhi ki tonatou Tupuʼaga ʼaki te manatu ʼaē neʼe maʼu e taku tāmai, ʼaē neʼe ina ʼui, “ ʼE mole tou tuku feiā anai te gāue. Neʼe fakatotonu mai e Sehova ke tou fai faka mafola.” Koia, neʼe tokoni mai Sehova kia ʼau pea mo toku famili ʼi te ʼu ʼaho fuli pe.
[Paki ʼo te pasina 24]
Ko ʼau mo taku tāmai, mo toku ʼu tēhina lahi, pea mo toku taʼokete, ʼe mātou tutuʼu ōvi ki tamatou motokā neʼe mātou maʼuʼuli ai pea neʼe fakaʼaogaʼi ki te gāue pionie. ʼE ʼau tuʼu ʼi te faʼahi mataʼu
[Paki ʼo te pasina 26]
Ko ʼau mo toku ʼohoana, ia Myrna
[Paki ʼo te pasina 26]
Ko te paki foʼou ʼo toku famili
[Paki ʼo te pasina 27]
ʼE kei ʼau faitohi pe moʼo fai faka mafola