Koutou Katoa Pea Mo Koutou Tui Mālohi
Ko Te ʼu Hahaʼi Lototoʼa Mo Agatonu ʼe Nātou Mālo ʼi Te Fakataga Nasi
“KE KE fakapotopoto, Ê toku foha pea mo ke fakafiafia toku loto, ke feala haku tali kia ia ʼaē ʼe manukinuki kia te ʼau.” (Tāʼaga Lea 27:11) Ko te kole manavaʼofa ʼaia ʼe hā ʼaki ai ʼe feala ki te hahaʼi popoto ʼa te ʼAtua ke nātou fakafiafia tona loto, heʼe nātou nonofo agatonu kia te ia. (Sofonia 3:17) Kae ko Satana, te fakahala, ʼe loto ʼaupito ke ina maumauʼi te agatonu ʼa te hahaʼi ʼaē ʼe tauhi kia Sehova.—Sopo 1:10, 11.
Tāfito talu mai te kamataʼaga ʼo te 20 sēkulō, ʼi tona ʼosi lī ifo mai te lagi ki te kele, neʼe ʼita lahi ia Satana ki te hahaʼi ʼa Sehova. (Apokalipesi 12:10, 12) Kae ko te kau Kilisitiano moʼoni neʼe nātou ‘katoa pea mo tui moʼoni’ pea mo nātou nofo agatonu ki te ʼAtua. (Kolose 4:12) Tou vakaʼi fakanounou te faʼifaʼitaki lahi ʼo te nofo agatonu—ko te kau Fakamoʼoni ʼa Sehova ʼo Siamani ʼi muʼa pea ʼi te lolotoga ʼo te Lua Tau Faka Malamanei.
Ko Tanatou Gāue Lahi ʼe Iku Ki Te ʼAhiʼahiʼi ʼo Tanatou Agatonu
ʼI te ʼu taʼu 1920 pea mo te kamata ʼo te ʼu taʼu 1930, neʼe tufa te ʼu tuʼuga tohi faka Tohi-Tapu e te kau Bibelforscher, te higoa ʼaē neʼe foaki ʼi te temi ʼaia ki te kau Fakamoʼoni ʼa Sehova ʼi Siamani. ʼI te taʼu 1919 ʼo aʼu ki te 1933, neʼe fakafuafua neʼe nātou tufa ki te ʼu famili takitahi ʼi Siamani te ʼu tohi, mo te ʼu kaupepa, peʼe ko te ʼu nusipepa e valu.
ʼI te temi ʼaia, neʼe hahaʼi tāfito ʼi Siamani te kau tisipulo fakanofo ʼa Kilisito. ʼI tona fakahagatonu, ʼi te toko 83 941 hahaʼi ʼaē neʼe nātou kai te Taumafa ʼo te ʼAliki ʼi te 1933, neʼe ko te toko 30 ʼi te teau ʼaē neʼe maʼuʼuli ʼi Siamani. Neʼe mole tuai, pea hoko ki te kau Fakamoʼoni ʼaia ʼi Siamani he ʼu ʼahiʼahi fakamataku ʼo tanatou agatonu. (Apokalipesi 12:17; 14:12) Neʼe fakamavae nātou mai tanatou ʼu gāue, mo faʼao tonatou ʼu ʼapi, pea kapu nātou mai te ʼu faleako pea ki muli age, neʼe tā nātou, mo puke pea mo pilisoniʼi. (Paki 1) Koia ʼi te taʼu ʼaē neʼe iku ki te Lua Tau Faka Malamanei, neʼe pilisoniʼi ʼi te ʼu lotoʼā fakamamahi te toko 5 peʼe toko 10 ʼi te teau ʼo te kau Fakamoʼoni ʼa Sehova.
Te Tupuʼaga ʼo Te Fakatagaʼi e Te Kau Nasi Te Kau Fakamoʼoni
He koʼe neʼe tupu te ʼita lahi ʼa te puleʼaga Nasi ki te kau Fakamoʼoni ʼa Sehova? ʼI tana tohi Hitler—1889-1936: Hubris, ʼe tohi ai e te polofesea fai hisitolia ko Ian Kershzw, neʼe fakatagaʼi tāfito te kau Fakamoʼoni he neʼe mole nātou fia “fakalogo katoa ki te puleʼaga Nasi.”
Ko te tohi Betrayal—German Churches and the Holocaust ʼaē neʼe tā e te polofesea fai hisitolia ko Robert P. Ericksen pea mo te polofesea ʼo te ʼu ako Sutea ko Susannah Heschel, neʼe fakamahino ai ko te kau Fakamoʼoni “neʼe mole nātou fia lagolago ki te agamālohi peʼe ki he fakaʼaogaʼi ʼo te mālohi faka solia. . . . Neʼe tui te kau Fakamoʼoni ʼe mole tonu ke nātou kau ki te fai politike, ko tona faka ʼuhiga ʼe mole nātou vote anai maʼa Itilele pea ʼe mole nātou fai anai te ʼalofa kia Itilele.” ʼE toe ʼui e te tohi ʼaia, neʼe tupu ai te ʼita ʼa te kau Nasi pea neʼe feala ai ke gaohi koviʼi te kau Fakamoʼoni he “neʼe mole tali e te Puleʼaga Nasi te fakafisi ʼaia.”
Ko He Meo Faka Malamanei Pea Mo He ʼOhofi Fakamataku
ʼI te ʼaho 9 ʼo Fepualio 1934, ko te tagata ʼave logo makehe ko Joseph F. Rutherford, ʼaē neʼe ina takitaki te gāue ʼi te temi ʼaia, neʼe ina momoli kia Itilele te tohi neʼe meo ai ʼo ʼuhiga mo te agakovi ʼa te kau Nasi. (Paki 2) ʼI te ʼaho 7 ʼo ʼOketopeli 1934, ʼo hoa ki te tohi ʼa Rutherford, neʼe momoli kia Itilele te ʼu tohi e 20 000 ʼa te kau Fakamoʼoni ʼa Sehova mai ia fenua e 50, ʼo kau ai mo Siamani.
Ko te meʼa ʼaē neʼe fai e te kau Nasi ko tanatou fakaʼāsili tanatou fakataga. ʼI te ʼaho 1 ʼo ʼApelili 1935, neʼe tapuʼi te kau Fakamoʼoni ʼi te fenua katoa. Pea ʼi te ʼaho 28 ʼo ʼAukusito 1936, neʼe kamata e te Gestapo tanatou ʼohofi fakamataku. Kae ki te kau Fakamoʼoni, ʼe ʼui e te tohi Betrayal—German Churches and the Holocaust, neʼe “hoko atu tanatou tufa te ʼu nusipepa pea mo nātou taupau tanatou tui.”
Ohage la, logola te leʼoleʼo ʼa te Gestapo, kae ʼi te ʼaho 12 ʼo Tesepeli 1936, ko te toko 3 500 kau Fakamoʼoni neʼe nātou tufa te ʼu pepa ʼe lauʼi hogofulu afe neʼe tā ai tanatou manatu ʼo ʼuhiga mo tonatou gaohi koviʼi ʼaia. ʼO ʼuhiga mo te gāue ʼaia, neʼe ʼui fēnei e Te Tule Leʼo: “Neʼe ko he mālo lahi pea mo he fakamataku ki te fili, kae neʼe fiafia lahi ʼaupito te kau gāue agatonu.”—Loma 9:17.
ʼE Mole Iku Te Fakataga
Neʼe hoko atu te kumi ʼa te kau Nasi ia te kau Fakamoʼoni ʼa Sehova. ʼI te 1939, ko te toko ono afe neʼe pilisoniʼi, pea ko te toko afe neʼe ʼave ki te ʼu lotoʼā fakamamahi. (Paki 3) Neʼe feafeaʼi te ʼaluʼaga ʼi te fakaʼosi ʼo te Lua Tau Faka Malamanei? Neʼe mamate te toko 2 000 kau Fakamoʼoni ʼaē neʼe pilisoni, pea neʼe matehi te toko 250 tupu. Kae neʼe tohi fēnei e te ʼu Polofesea ko Ericksen pea mo Heschel: “Logola te ʼu tokakovi ʼaia, kae neʼe taupau fakalelei e te kau Fakamoʼoni ʼa Sehova tanatou tui.” Koia, ʼi te temi ʼaē neʼe tō ai te pule ʼa Itilele, ko te lauʼi afe kau Fakamoʼoni neʼe mālo pea neʼe nātou hāo mai te ʼu lotoʼā fakamamahi.—Paki 4; Gaue 5:38, 39; Loma 8:35-37.
Neʼe maʼu koa maifea e te hahaʼi ʼa Sehova te mālohi ke nātou kātakiʼi te fakataga? Ko te tēhina neʼe hāo ʼi te ʼu lotoʼā fakamamahi, ko Adolphe Arnold, neʼe ina fakamahino fēnei: “Tatau aipe peʼe koutou veliveli ʼaupito, kae ʼe sio ia Sehova kia koutou, ʼe ina ʼiloʼi te meʼa ʼaē ʼe koutou kātakiʼi, pea ʼe ina foaki atu anai te mālohi ʼaē ʼe ʼaoga kia koutou ke koutou lavaʼi te ʼaluʼaga ʼaē ʼe hoko kia koutou pea mo koutou nofo agatonu. ʼE mole nounou fau tona nima.”
ʼE faka ʼuhiga lelei te ʼu palalau ʼa te polofeta ko Sofonia ki te kau Kilisitiano agatonu ʼaia, heʼe ina tala fēnei: “Ko Sehova, tou ʼAtua, ʼe ʼi tou lotolotoiga. ʼI tona ʼuhiga ʼAtua mālohi, ʼe ina hāofaki anai. ʼE fiafia anai kia te koe.” (Sofonia 3:17) Tou fakaʼamu ke faʼifaʼitakiʼi e te kau atolasio fuli ʼa te ʼAtua moʼoni te tui ʼa te kau Fakamoʼoni agatonu ʼaia, ʼaē neʼe nātou nofo agatonu ʼi te ʼu fakataga ʼa te kau Nasi pea mo nātou fakafiafia te loto ʼo Sehova.—Filipe 1:12-14.
[Haʼuʼaga ʼo te paki pasina 8]
Państwowe Muzeum Oświȩcim-Brzezinka, courtesy of the USHMM Photo Archives