“ ʼE ʼAu Nofo Agatonu Anai!”
1 ʼE hā mai ʼi te ʼu palalau ʼaia ʼa te Kilisitiano agatonu, ʼaē neʼe hāo mai te ʼu lotoʼā fakamamahi, neʼe lotomālohi te toko lauʼi afe kau Fakamoʼoni—kei maʼuʼuli peʼe kua mamate—ke nātou mulimuli ki tanatou tui logola te agakovi ʼa te kau Nasi. (Ef. 6:11, 13) ʼE fakamatala te hisitolia ʼo tonatou lototoʼa pea mo tonatou mālo ʼi te foʼi fime viteo faka malave loto ʼaē ko te La fermeté des Témoins de Jéhovah face à la persécution nazie. Koia ʼe fakaloto mālohiʼi ia koutou fuli ʼo te kokelekasio ke koutou sioʼi, pea ke koutou fakahā pe koteā takotou manatu ki te foʼi fime ʼaia.
2 Koutou fakakaukauʼi te ʼu fehuʼi ʼaenī: (1) He koʼe neʼe fakafeagai mālohi te kau Fakamoʼoni ʼa Sehova ki te kau Nasi? (2a) Neʼe koteā te ʼu manatu kehekehe ʼaē neʼe maʼu ʼo ʼuhiga mo te hiki ʼo te nima, pea koteā tona tupuʼaga? (2b) Neʼe koteā tona ʼu fua ki te ʼu famili ʼa te kau Fakamoʼoni ʼa Sehova? (3) Ko te tokofia ʼo te kau Fakamoʼoni neʼe ʼave ki te ʼu lotoʼā fakamamahi, pea koteā tonatou fakaʼiloga, pea neʼe gaohi feafeaʼi nātou e te Gestapo? (4) Koteā ʼaē neʼe fakafisi kiai totatou ʼu tēhina ʼo ʼuhiga mo tonatou faka ʼāteaina? (5a) Neʼe feafeaʼi pea ko te temi fea ʼaē neʼe palalau fakahagatonu ai te kau Fakamoʼoni ʼa Sehova ʼo ʼuhiga mo te ʼu aga fakapō ʼo te puleʼaga ʼa Itilele? (5b) Koteā ʼaē neʼe fai e Itilele? (6) Ko te logo tahi ʼa te hahaʼi ʼa Sehova, neʼe ina hāofaki feafeaʼi ia nātou pea mo te hahaʼi, ʼi te faʼahi fakasino pea mo te faʼahi fakalaumālie? (7) Ko te katiko fea ʼaē neʼe tohi ʼi te lotoʼā fakamamahi? (8) Ko ai te ʼu faʼifaʼitaki tagata, mo fafine, pea mo tūpulaga agatonu, ʼaē ʼe ina uga ke koutou agatonu kia Sehova, tatau aipe pe koteā ʼaē ʼe lava hoko kia koutou? (Vakaʼi mo te Annuaire 1999, pasina 144 ki te 147.) (9) ʼI tokotou ʼuhiga Fakamoʼoni ʼa Sehova, ʼe uga feafeaʼi koutou e te foʼi fime viteo ʼaia ke mole koutou kau ki te malamanei?
3 Ko te faʼifaʼitaki lelei ʼa te kau Fakamoʼoni ʼa Sehova ʼaē ʼe tuʼu ʼi te foʼi fime viteo Fermeté ʼe lava tokoni ki te kau tūpulaga, ʼo feiā mo nātou ʼaē ʼe mole ko he kau Fakamoʼoni, ke nātou lava kātakiʼi te fakapalatahi, te ʼu fakaneke ʼo te tamaliki, pea mokā ʼahiʼahiʼi tonatou leʼo ʼo loto. Kapau ko koutou ko he kau tūpulaga ʼe koutou ako ʼi te kolesi peʼe ʼi te lisē, ʼe koutou lava kole age koa ki takotou ʼu hahaʼi faiako ke nātou fakaʼaogaʼi te foʼi fime viteo ʼaia ʼi te faleako? Lagi ʼe koutou lava tuku age kia nātou te foʼi fime ʼaia, pea mo koutou fakamahino age ʼe fakamatala ai te faʼahi neʼe hoko ʼi te hisitolia, kae ʼe mole faʼa ʼiloʼi lelei e te hahaʼi, peʼe koutou ʼui age ʼe ko he ʼata ʼe ina akoʼi mai kia tatou te aga ʼaē ʼe tonu ke tou fai.
4 Ko te foʼi fime viteo Fermeté ʼe ko he meʼa gāue lelei moʼo fakahā, ʼaki te ako fakaʼatua ʼe tou maʼu ai te mālohi fakalaumālie moʼo fakafiafia te ʼAtua, heʼe tou nonofo agatonu moʼo fai te meʼa ʼaē ʼe lelei. (1 Ko. 16:13) Koutou fakahā te foʼi fime ʼaia ki te hahaʼi fuli ʼaē ʼe nātou leleiʼia te moʼoni.