Tou Faʼu He Famili Ke Mālohi Fakalaumālie
“Koutou haga ako ia nātou ke nātou maʼu te akonaki pea mo te manatu ʼa Sehova.”—Efeso 6:4, MN.
1. Neʼe koteā te fakatuʼutuʼu ʼa te ʼAtua ʼo ʼuhiga mo te famili, kae koteā ʼaē neʼe hoko?
“KOULUA fanaunau, pea koulua liliu ʼo hahaʼi, pea koulua fakafonu te kele.” (Senesi 1:28) ʼI tana palalau ʼaia kia Atama mo Eva, neʼe fakatuʼu te famili e Sehova ʼAtua. (Efeso 3:14, 15) Neʼe lava fakakaukauʼi fakatomuʼa e te ʼuluaki taumatuʼa ʼaia he kele ʼe fakafonu anai e tonā hōloga—ko he famili ʼe faʼufaʼu e te hahaʼi haohaoa pea mo maʼuli fiafia ʼi te palatiso ʼi te kele pea mo nātou tauhi ʼi te logo tahi ki tonatou Tupuʼaga Lahi. Kae neʼe agahala ia Atama pea mo Eva, pea neʼe mole fakafonu te kele e he ʼu hahaʼi faitotonu, ʼe nātou manavasiʼi ki te ʼAtua. (Loma 5:12) Neʼe mole tuai te liliu ʼo kovi ʼo te maʼuli faka famili, pea neʼe maʼu tāfito ai te fehiʼa, mo te agamālohi, pea mole kei ʼi ai te “ofa,” tāfito ʼi te ʼu “aho fakamuli” ʼaenī.—2 Timoteo 3:1-5; Senesi 4:8, 23; 6:5, 11, 12.
2. Koteā te ʼu meʼa ʼaē neʼe lava fai e te hōloga ʼo Atama, kae neʼe koteā ʼaē neʼe tonu ke nātou fai moʼo faʼu he famili ʼe mālohi ʼi te faʼahi fakalaumālie?
2 Neʼe fakatupu ia Atama pea mo Eva ki te paki ʼo te ʼAtua. Logola kua liliu ia Atama ko te tagata agahala, kae neʼe fakagafua e Sehova ke maʼu fānau. (Senesi 1:27; 5:1-4) Ohage pe ko tanatou tāmai, neʼe ʼiloʼi e te hōloga ʼo Atama te aga ʼaē neʼe tonu ke nātou fai, pea neʼe feala hanatou fakakeheʼi te meʼa ʼaē ʼe lelei pea mo te meʼa ʼaē ʼe kovi. Neʼe akoʼi kia nātou peʼe feafeaʼi te tauhi ki tonatou Tupuʼaga, pea mo te maʼuhiga ʼaē ke nātou ʼoʼofa kia te ia ʼaki tonatou loto, mo tonatou nefesi, mo tonatou ʼatamai pea mo tonatou mālohi katoa. (Maleko 12:30; Soane 4:24; Sakopo 1:27) Tahi ʼaē meʼa, neʼe akoʼi kia nātou ke nātou “maʼuliʼi . . . te faitotonu, mo . . . manako ki te finegaloʼofa, pea mo . . . haʼele mo [te] ʼAtua ʼaki he fia mālalo.” (Mikea 6:8) Kae ʼi tonatou ʼuhiga agahala, neʼe tonu ke nātou tokaga tāfito ʼo faʼu he famili ʼe mālohi ʼi te faʼahi fakalaumālie.
Koutou Fakaʼaogaʼi Lelei Te Temi
3. ʼE lava feafeaʼi ki te ʼu mātuʼa ke nātou ‘fakaʼaogaʼi lelei tonatou temi’ moʼo taupau tanatou fānau Kilisitiano?
3 ʼI te ʼu temi faigataʼa ʼaenī, ʼe tonu ke tou faiga mālohi ke liliu te fānau ʼo “ ʼoʼofa kia Sehova” pea mo nātou “fehiʼa [moʼoni] ki te meʼa ʼaē ʼe kovi.” (Pesalemo 97:10) Ko te ʼu mātuʼa fakapotopoto ʼe nātou ‘fakaʼaogaʼi lelei tonatou temi’ moʼo fakahoko te maʼua faigataʼa ʼaia. (Efeso 5:15-17) Kapau ʼe koutou maʼu fānau, pea ʼe koutou lava fakahoko feafeaʼi te faʼahi ʼaia? ʼUluaki, koutou fai he ʼu fakatuʼutuʼu, ke koutou tokagaʼi “te ʼu meʼa ʼaē ʼe maʼuhiga tāfito,” ohage ko te akoʼi ʼo takotou fānau. (Filipe 1:10, 11, MN ) Lua, koutou faka faigafua tokotou maʼuli. ʼE lagi tonu ke koutou tuku he ʼu gāue ʼe mole ʼaoga moʼoni. Peʼe lagi tonu anai ke koutou tuku he ʼu koloā ʼe mole ʼaoga moʼoni kia koutou pea ʼe fakapuli temi tonatou taupau. ʼI tokotou ʼuhiga mātuʼa Kilisitiano, ʼe mole koutou fakahemala anai he neʼe koutou faiga ke koutou taupau takotou fānau ke nātou manavasiʼi ki te ʼAtua.—Tāʼaga Lea 29:15, 17.
4. ʼE lava taupau feafeaʼi e he famili te logo tahi?
4 ʼE ʼaoga moʼoni ke koutou faiga ke koutou fakaʼaogaʼi he temi mo takotou fānau, tāfito ki te ʼu meʼa fakalaumālie, pea ʼe ko te puleʼaki lelei ʼaia moʼo taupau te famili ʼi te logo tahi. Koia, koutou fakaʼaogaʼi fakalelei tokotou temi, ʼo koutou fakatuʼutuʼu he ʼu temi ke koutou fakatahi faka famili ai. ʼE mole faka ʼuhiga pe ke koutou fakatahi ʼi tokotou ʼapi, ʼo koutou tahi fai te meʼa ʼaē ʼe koutou loto kiai. ʼE tuputupu lelei te fānau mo kapau ʼe koutou tokakaga kia nātou ʼi te ʼaho fuli. ʼE mole tonu ke koutou fakatātāʼofi te fakahā ʼo tokotou ʼofa pea mo takotou tokaga kia nātou. Māʼia ʼi muʼa ʼo hanatou fia maʼu fānau, ʼe tonu ki te ʼu taumatuʼa ke nātou fakakaukauʼi fakalelei te maʼua maʼuhiga ʼaia. (Luka 14:28) Kapau ʼe nātou fai feiā, pea ʼe mole ko he meʼa fakakinakina anai te taupau ʼo te fānau. Kailoa ia, kae ʼe nātou faka ʼuhiga anai ʼe ko he pilivilesio lahi.—Senesi 33:5; Pesalemo 127:3.
Koutou Akoʼi ʼAki Te Palalau Pea Mo Te Faʼifaʼitaki
5. (a) Moʼo akoʼi ki te fānau te ʼofa kia Sehova, ʼe tonu muʼa ke koutou fai teā? (b) Koteā te tokoni ʼaē ʼe foaki ki te ʼu mātuʼa ia Teutalonome 6:5-7?
5 Moʼo akoʼi ki takotou fānau ke nātou ʼoʼofa kia Sehova, ʼe tonu muʼa ke koutou fakahā ʼe koutou ʼoʼofa kia te ia. Ko takotou ʼofa lahi ki te ʼAtua ʼe ina uga anai koutou ke koutou mulimuli fakalelei ki tana ʼu fakatotonu. ʼE kau kiai takotou pusiaki te fānau ʼi “te akonaki pea mo te manatu ʼa Sehova.” (Efeso 6:4, MN ) ʼE tokoniʼi e te ʼAtua te ʼu mātuʼa ke nātou tuku he faʼifaʼitaki lelei ki tanatou fānau, ke nātou fai palalau mo nātou, pea mo akoʼi nātou. ʼE ʼui fēnei ia Teutalonome 6:5-7: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou mālohi maʼuli katoa. Pea ko te ʼu folafola ʼaenī ʼaē ʼe ʼau fakatotonu atu kia te koe ʼi te ʼaho nei, ʼe tonu anai ke nofo ʼi tou loto; pea ʼe tonu anai ke ke akoʼi ki tou foha pea mo ke talanoa kiai mokā ke heka anai ʼi tou loto fale, mokā ke haʼele anai ʼi te ala, mokā ke takoto anai, pea mokā ke tuʼu ake anai.” Kapau ʼe koutou tokoni pea mo fai liuliuga, pea ʼe feala hakotou akoʼi ki takotou fānau te ʼu fakatotonu ʼa te ʼAtua. Pea ʼe logoʼi anai e takotou fānau tokotou ʼofa kia Sehova, pea ki muli age, ʼe nātou fakatuputupu anai he ʼu felogoi lelei mo Sehova.—Tāʼaga Lea 20:7.
6. ʼE lava fakaʼaogaʼi lelei feafeaʼi e te ʼu mātuʼa tanatou faʼifaʼitaki moʼo akoʼi tanatou ʼu fānau?
6 ʼE lahi te ʼu meʼa ʼaē ʼe fia ako e te fānau. ʼE nātou fakalogo lelei pea mo nātou sioʼi te ʼu meʼa ʼaē ʼe koutou fai, pea mo nātou faʼifaʼitakiʼi vave. Kapau ʼe nātou sio ʼe mole koutou fia maʼu koloā, pea ʼe tokoni anai te faʼahi ʼaia ke nātou ako peʼe feafeaʼi te mulimuli ki te tokoni ʼa Sesu. ʼE koutou akoʼi age kia nātou ke ʼaua naʼa nātou tuʼania ʼo ʼuhiga mo te ʼu koloā kae ke nātou ‘ ʼuluaki kumi muʼa te Puleʼaga ʼa te ʼAtua.’ (Mateo 6:25-33) Kapau ʼe lelei pea mo fakaloto mālohi takotou fai palalau ʼo ʼuhiga mo te moʼoni, mo te kokelekasio, pea mo te ʼu tagata ʼāfea, pea ʼe koutou akoʼi ai ki takotou fānau ke nātou fakaʼapaʼapa kia Sehova pea ke maʼuhiga kia nātou tanatou ʼu fakatuʼutuʼu fakalaumālie. ʼE tokagaʼi vave e te fānau mokā ʼe ʼi ai he ʼu tōtō, koia ʼe tonu ai ke ʼalutahi takotou aga mo takotou ʼu palalau, ke hā ai tokotou ʼofa lahi ki te ʼu meʼa fakalaumālie. ʼE ko he tapuakina lahi mokā sio te ʼu mātuʼa, ʼaki tanatou faʼifaʼitaki lelei, ʼe liliu ai tanatou fānau ʼo ʼoʼofa kia Sehova ʼaki tonatou loto katoa!—Tāʼaga Lea 23:24, 25.
7, 8. Koteā te faʼifaʼitaki ʼaē ʼe hā ai te maʼuhiga ʼo te akoʼi ia te fānau talu mai tanatou liliki, pea ko ai ʼaē ʼe tupu ai te fua lelei ʼaia?
7 ʼE ʼi ai te faʼifaʼitaki mai Venesuela, ʼe hā ʼaki ai te maʼuhiga ʼaē ke akoʼi ia te fānau talu mai tanatou kei liliki. (2 Timoteo 3:15) ʼE ko te taumatuʼa, ko Félix pea mo Mayerlín. Neʼe nā pionie toko lua. ʼI te tupu ʼo tanā tamasiʼi ko Felito, neʼe nā fia taupau ia ia ke liliu ʼo atolasio moʼoni kia Sehova. Neʼe kamata lautohi leʼolahi ia Mayerlín kia Felito Te Tohi ʼo Te ʼu Hisitolia Faka Tohi-Tapu, neʼe tā e te kau Fakamoʼoni ʼa Sehova. ʼI tana kei veliveli, neʼe ʼiloʼi e Felito ia Moisese pea mo te tahi ʼu hahaʼi ʼaē ʼe tuʼu ʼi te tohi ʼaia.
8 Logola neʼe kei veliveli ia Felito, kae neʼe kamata fai faka mafola. Neʼe ina fakahoko tana fia liliu ʼaē ko he kaugā fagona ʼo te Puleʼaga, pea neʼe papitema ki muli age. ʼAki te temi, neʼe liliu ia Felito ʼo pionie katoa. ʼE ʼui fēnei e tana ʼu mātuʼa: “ ʼI tamā sisio ki te tuputupu ʼo tamā tamasiʼi, neʼe ma ʼiloʼi ai ʼe ko Sehova ʼaē ʼe tupu ai tana tuputupu lelei, pea mo te ʼu meʼa ʼaē neʼe ma akoʼi age.”
Te Tokoni Ki Te Fānau Ke Nātou Tuputupu Fakalaumālie
9. He koʼe ʼe tonu ke tou loto fakafetaʼi ki te ako fakalaumālie ʼaē ʼe tou maʼu mai te kalasi ʼo te tagata kaugana agatonu mo fakapotopoto?
9 ʼE lahi te ʼu nusipepa, mo te ʼu tohi, pea mo te ʼu lauʼi afe kumiʼaga ʼi te Internet, ʼe maʼu ai te ʼu tokoni ʼo ʼuhiga mo te taupau fānau. ʼE ʼui fēnei e te alatike ʼo te Newsweek ʼo ʼuhiga mo te fānau: “ ʼE kehekehe te ʼu manatu. ʼE koutou lotomamahi ʼaupito mokā ʼe hala te manatu ʼaē ʼe koutou falala kiai.” ʼE tou loto fakafetaʼi lahi kia Sehova he neʼe ina fai he ʼu fakatuʼutuʼu lahi moʼo akoʼi ke tuputupu te ʼu famili ʼi te faʼahi fakalaumālie! ʼE koutou fakaʼaogaʼi lahi koa te ʼu fakatuʼutuʼu fuli ʼaē neʼe fai ʼaki te kalasi ʼo te tagata kaugana agatonu mo fakapotopoto?—Mateo 24:45-47.
10. ʼE lava fua lelei feafeaʼi ki te ʼu mātuʼa pea mo te fānau ia te ako faka famili ʼo te Tohi-Tapu ʼaē ʼe fai fakalelei?
10 Ko te meʼa ʼaē ʼe maʼuhiga ʼaupito ʼe ko te fai tuʼumaʼu ʼo te ako faka famili ʼo te Tohi-Tapu pea ʼi hona ʼaluʼaga fakafiafia. ʼE tonu ke teuteuʼi fakalelei te ako, ke feala ki te fānau ke nātou tāʼofi he meʼa ʼi te ako ʼaia, mo nātou fiafia pea mo nātou lotomālohi ai. Kapau ʼe faka palalauʼi te ʼu fānau, pea ʼe lava ʼiloʼi ai e te ʼu mātuʼa tonatou loto pea mo tanatou fakakaukau. Moʼo ʼiloʼi peʼe lelei te ako faka famili, koutou sioʼi peʼe fakaʼamu te famili ke hoko mai la te temi ʼo te ako ʼaia.
11. (a) Koteā te ʼu fakatuʼutuʼu ʼaē ʼe lava tokoni ki te ʼu mātuʼa ke fai e tanatou fānau? (b) Koteā te ʼu fua ʼaē neʼe maʼu e te taʼahine Saponia ʼi tana fakatuʼutuʼu?
11 Ko te ʼu fakatuʼutuʼu fakalaumālie ʼe toe tokoni ki te famili ke mālohi ʼi te faʼahi fakalaumālie, pea ʼe feala ke tokoni te ʼu mātuʼa ke fai e tanatou ʼu fānau he ʼu fakatuʼutuʼu. ʼE kau ki te ʼu fakatuʼutuʼu lelei ʼaia ia te lau ʼo te Tohi-Tapu ʼi te ʼaho fuli, te liliu ko he kaugā fagona ʼo te logo lelei, pea mo te tuputupu ʼo aʼu ki te papitema. ʼE toe ʼi ai mo te ʼu fakatuʼutuʼu ʼaē ke kita pionie, peʼe kita Petelite, peʼe kita misionea. ʼI tana kei ʼi te ʼu kalasi liliki, ko te kiʼi taʼahine Saponia ʼe higoa ko Ayumi, neʼe ina fakatuʼutuʼu ke faka mafola ki te ʼu tamaliki fuli ʼo tona kalasi. Moʼo fakatupu te fia logo ʼo tana fafine faiako pea mo tona ʼu kaugā ako, neʼe ina maʼu te fakagafua ʼaē ke ina tuku he ʼu tohi faka Tohi-Tapu ʼi te fale tānakiʼaga tohi. Neʼe ʼi ai tona fua he neʼe ina fai te ʼu ako Tohi-Tapu e 13 ʼi te ʼu taʼu e ono ʼaē neʼe ako ai ʼi te ʼu kalasi liliki. Ko te tokotahi ʼi te kau ako ʼaia ʼo te Tohi-Tapu pea mo ʼihi ʼo tona famili neʼe nātou papitema.
12. ʼE lava maʼu feafeaʼi e te fānau te ʼu lelei ʼo te ʼu fono?
12 ʼE toe maʼuhiga foki ke tou kau tuʼumaʼu ki te ʼu fono ke tou mālohi ai ʼi te faʼahi fakalaumālie. Neʼe tokoni te ʼapositolo ko Paulo ki te hahaʼi tui ke ‘mole tuku tanatou ʼu fakatahi, ohage ko te agamāhani ʼa ʼihi.’ Ke ʼaua naʼa liliu te faʼahi ʼaia ko hatatou agamāhani, heʼe ʼaoga lahi ki te kau tūpulaga pea mo te hahaʼi matutuʼa tanatou kau tuʼumaʼu ki te ʼu fono. (Hepeleo 10:24, 25; Teutalonome 31:12) ʼE tonu ke akoʼi ki te fānau ke nātou fakalogo fakalelei. ʼE toe maʼuhiga mo te teuteuʼi ʼo te ʼu fono, heʼe tou maʼu te ʼu fua lelei lahi mo kapau ʼe tou kau kiai pea mo fai hatatou ʼu tali. Logola ʼe feala ki he tamasiʼi hana kamata tali ʼaki he ʼu kiʼi kupu, peʼe ina lau he koga veliveli ʼo he palakalafe, kae ʼe fua lelei age anai mo kapau ʼe akoʼi ki te fānau ke nātou kumi te ʼu tali pea mo nātou tali ʼaki tanatou faʼahiga palalau ʼa nātou totonu. ʼE koutou tuku koa, ʼu mātuʼa, he faʼifaʼitaki lelei ʼo koutou fai tuʼumaʼu he ʼu tali neʼe koutou fakakaukauʼi lelei? ʼE toe lelei foki ke tahi maʼu e te famili hana Tohi-Tapu, he katiko, pea mo te tohi ʼaē ʼe fakaʼaogaʼi.
13, 14. (a) He koʼe ʼe tonu ke kaugā gāue te ʼu mātuʼa mo tanatou fānau ʼi te minisitelio? (b) Koteā ʼaē ka tokoni anai ki te fānau ke lelei maʼa nātou te fai faka mafola pea mo nātou fiafia ai?
13 ʼE faiga anai e te ʼu mātuʼa aga fakapotopoto ke fakaʼaogaʼi e tanatou fānau tonatou mālohi ki te tauhi kia Sehova, ʼo tokoni kia nātou ke liliu te fai faka mafola ko he faʼahi maʼuhiga ʼo tonatou maʼuli. (Hepeleo 13:15) Kapau ʼe kaugā gāue te ʼu mātuʼa mo tanatou ʼu fānau ʼi te minisitelio, pea ʼe nātou lava ʼiloʼi ai peʼe maʼu anai e tanatou ʼu fānau te ako ʼaē ʼe ʼaoga ke feala ai hanatou liliu ko he ʼu minisi “e mole ufiufi, e [nātou] ave fakahagatonu te folafola o te mooni.” (2 Timoteo 2:15) Kae e feafeaʼi ʼo ʼuhiga mo koutou? Kapau ʼe koutou maʼu fānau, pea ʼe koutou tokoni koa kia nātou ke nātou teuteuʼi tanatou fai faka mafola? ʼE koutou tokoni anai ki tanatou fiafia ʼi te minisitelio, ke ʼi ai hona ʼuhiga pea mo he fua lelei kia nātou.
14 He koʼe ʼe lelei ke kaugā gāue te ʼu mātuʼa mo tanatou fānau ʼi te minisitelio? Heʼe feala ki te fānau ke nātou sio ki te faʼifaʼitaki ʼo tanatou ʼu mātuʼa pea mo nātou mulimuli kiai. Pea ʼi te lakaga ʼaia, ʼe feala ai ki te ʼu mātuʼa ke nātou vakavakaʼi te manatu, mo te aga pea mo te poto ʼo tanatou fānau. Koutou kaugā ʼolo mo takotou ʼu fānau ʼi te ʼu agaaga kehekehe ʼo te minisitelio. Kapau ʼe feala, pea ke tahi maʼu e takotou fānau hana kato fai faka mafola, pea koutou akoʼi kia ia ke ina taupau lelei pea mo maʼa. ʼAki he ako ʼe fai tuʼumaʼu pea mo he fakaloto mālohi, ʼe feala anai ki te fānau ke nātou leleiʼia moʼoni ia te minisitelio, pea ʼe nātou mahino anai ko te gāue fai faka mafola ʼe ko he ʼaluʼaga moʼo fakahā tanatou ʼofa ki te ʼAtua pea mo te kāiga.—Mateo 22:37-39; 28:19, 20.
Koutou Nonofo Mālohi ʼi Te Faʼahi Fakalaumālie
15. Mai tonu ʼuhiga ʼaē ʼe maʼuhiga ʼaupito ke mālohi tuʼumaʼu te famili ʼi te faʼahi fakalaumālie, koteā ʼaē ʼe feala ke koutou fai?
15 ʼE maʼuhiga ke mālohi tuʼumaʼu te famili ʼi te faʼahi fakalaumālie. (Pesalemo 119:93) Moʼo fakahoko te faʼahi ʼaia, ʼe feala ʼi te ʼu temi faigamālie fuli, ke koutou fai palalau mo tokotou famili ki te ʼu meʼa fakalaumālie. ʼE koutou fai palalau koa mo nātou ki te vaega faka Tohi-Tapu ʼo te ʼaho? ‘Ka koutou haʼele ʼi te ala,’ ʼe ko hakotou agamāhani koa te fakamatala ia te ʼu meʼa ʼaē neʼe hoko ʼi te fai faka mafola, peʼe ko te ʼu manatu ʼo Te Tule Leʼo pea mo te Réveillez-vous ! fakamuli? ‘Ka koutou takokoto pea mo tutuʼu ake,’ ʼe koutou manatuʼi koa ke koutou faikole ʼo fakafetaʼi kia Sehova ki te maʼuli ʼi te ʼaho fuli pea mo te ʼu meʼa taulekaleka ʼaē ʼe ina fai maʼa tatou? (Teutalonome 6:6-9) Ka sio takotou fānau ʼe koutou ʼofa ki te ʼAtua ia meʼa fuli pe ʼaē ʼe koutou fai, pea ʼe lava tokoni te faʼahi ʼaia ke nātou tali ia te moʼoni.
16. He koʼe ʼe maʼuhiga ke fakaloto mālohiʼi te fānau ke nātou fai he ʼu kumi e nātou totonu?
16 ʼI ʼihi temi, ʼe ʼaoga anai he takitaki ki te fānau ke nātou lava tauʼi te ʼu faigataʼaʼia peʼe ko he ʼu ʼaluʼaga ʼe feala ke hoko. ʼAua naʼa koutou fakahā tuʼumaʼu age te ʼu meʼa ʼaē ʼe tonu ke nātou fai, kae koutou fakahā age peʼe feafeaʼi hanatou kumi te manatu ʼa te ʼAtua ʼo ʼuhiga mo te faʼahi ʼaia, ʼo koutou fakaloto mālohi nātou ke nātou fai he ʼu kumi. Koutou akoʼi ki takotou fānau ke nātou popoto lelei ʼi te fakaʼaogaʼi ia te ʼu tohi fuli ʼaē ʼe foaki mai e te ‘kaugana agatonu,’ heʼe tokoni anai te faʼahi ʼaia kia nātou ke nātou fakatuputupu he ʼu felogoi lelei mo Sehova. (1 Samuele 2:21b) Pea ka nātou vaevae tanatou ʼu kumi faka Tohi-Tapu mo te hahaʼi ʼo te loto fale, pea ʼe toe mālohi ai te famili ʼi te faʼahi fakalaumālie.
Koutou Falala Katoa Kia Sehova
17. He koʼe ʼe mole tonu ke lotovaivai ia nātou ʼaē ʼe nātou taupau tokotahi tanatou ʼu fānau ke nātou liliu ko he kau Kilisitiano?
17 E feafeaʼi ki te tāmai peʼe ko te faʼe ʼaē ʼe ina taupau tokotahi tana fānau? ʼE ʼi ai te tahi ʼu fihifihia ʼe hoko kia nātou moʼo taupau tanatou fānau. Kae ʼaua naʼa koutou lotovaivai! ʼE koutou lavaʼi anai, heʼe tokolahi te ʼu tāmai peʼe ko te ʼu faʼe feiā, neʼe nātou falala ki te ʼAtua, mo nātou mulimuli fakalelei ki tana ʼu tokoni, pea neʼe nātou maʼu ai te ʼu fānau lelei, pea mo mālohi ʼi te faʼahi fakalaumālie. (Tāʼaga Lea 22:6) ʼE moʼoni, ko te ʼu Kilisitiano ʼaē ʼe nātou taupau tokotahi tanatou fānau, ʼe tonu ke nātou falala katoa kia Sehova. ʼE tonu ke nātou tui ʼe tokoni anai kia nātou.—Pesalemo 121:1-3.
18. Koteā te ʼu meʼa ʼe tonu ke tokakaga kiai te ʼu mātuʼa ʼo ʼuhiga mo te ʼatamai pea mo te sino ʼa te fānau, kae koteā ʼaē ʼe tonu ke fakamuʼamuʼa?
18 ʼE ʼiloʼi e te ʼu mātuʼa fakapotopoto ‘ ʼe ʼi ai he temi moʼo kata pea mo he temi moʼo gaoʼi.’ (Tagata Tānaki 3:1, 4) ʼE maʼuhiga ki te ʼatamai pea mo te sino ʼa te fānau he ʼu temi fakafiafia ʼe fakafuafua lelei pea mo ʼaoga kia nātou. Ko te musika lelei pea tāfito te ʼu hiva moʼo fakavikiviki ki te ʼAtua, ʼe tokoni anai ki he tamasiʼi ke ina fakatuputupu he manatu lelei, ʼaē ʼe feala ke ʼaoga moʼo fakamālohiʼi tana ʼu felogoi mo Sehova. (Kolose 3:16) Pea ko te temi tūpulaga ʼe lelei moʼo teuteuʼi he tahi ke liliu ko he tagata peʼe ko he fafine ʼe manavasiʼi ki te ʼAtua, ke feala hana maʼu te maʼuli heʼegata ʼi te palatiso ʼi te kele.—Kalate 6:8.
19. He koʼe ʼe feala ke falala te ʼu mātuʼa ʼe tapuakina anai e Sehova tanatou faiga moʼo taupau tanatou fānau?
19 ʼE loto e Sehova ki te ʼu famili Kilisitiano fuli ke nātou mālolohi ʼi te faʼahi fakalaumālie, pea mo nātou logo tahi. Kapau ʼe tou ʼofa moʼoni ki te ʼAtua pea mo tou faiga ke tou mulimuli ki tana Folafola, pea ʼe ina tapuakina anai tatatou ʼu faiga pea mo ina foaki mai anai te mālohi ʼaē ʼe ʼaoga moʼo mulimuli ki tana takitaki. (Isaia 48:17; Filipe 4:13) Koutou manatuʼi, ko te fealagia ʼaē ʼe koutou maʼu ʼi te temi nei moʼo akoʼi takotou fānau ʼe faka tuʼakoi pea ʼe mole toe hoko anai. Koutou faiga fakamalotoloto ke koutou maʼuliʼi te tokoni ʼo te Folafola ʼa te ʼAtua, pea ʼe tapuakina anai e Sehova takotou ʼu faiga ke koutou faʼu he famili ʼe mālohi ʼi te faʼahi fakalaumālie.
Koteā ʼAē Neʼe Tou Ako?
• He koʼe ʼe maʼuhiga ʼaupito ke fakaʼaogaʼi lelei te temi moʼo akoʼi te fānau?
• He koʼe ʼe ʼaoga ke tuku e te ʼu mātuʼa he faʼifaʼitaki lelei?
• Koteā ʼihi meʼa maʼuhiga ʼe feala ke fai moʼo tokoni ki te fānau ke nātou tuputupu ʼi te faʼahi fakalaumālie?
• ʼE lava taupau feafeaʼi te mālohi fakalaumālie ʼa te famili?
[Paki ʼo te pasina 24]
Ko te ʼu famili ʼaē ʼe mālolohi fakalaumālie ʼe nātou ako te Folafola ʼa te ʼAtua, kau ki te ʼu fono, pea mo fai faka mafola fakatahi