ʼU Mātuʼa, Koutou Tōkakaga Ki Te ʼu Meʼa ʼAē ʼe ʼAoga Ki Tokotou Famili
“Kapau e i ai he tahi e mole tokaga ki ona kaiga, . . . kua fakafisi ki te tui.”—1 Timoteo 5:8.
1, 2. (a) He koʼe ʼe fakaloto mālohi hatatou sio ki te ʼu famili ʼe ʼōmai fakatahi ki te ʼu fono? (b) Koteā te ʼu ʼaluʼaga ʼaē ʼe hoko ki te ʼu famili ke feala hanatou kau tautonu ki te ʼu fono?
KA KOUTOU sio ki te nofoʼaki ʼi te kokelekasio ʼi muʼa ʼo te kamata ʼo te fono, ʼe lagi koutou sio ki te ʼu tamaliki ʼe nātou heheka iā tafa ʼo tonatou ʼu mātuʼa, pea ʼe nātou maʼa pea mo teuteu lelei. ʼE mole fakafiafia koa hatatou sio ki te ʼofa ʼaē ʼe ʼiloga ʼi te ʼu famili ʼaia—tonatou ʼofa kiā Sehova pea mo tonatou feʼofaniʼaki? Kae ʼe mole lagi tou ʼiloʼi ia te ʼu faiga lahi ʼa te ʼu famili ʼaia ke ʼomai tautonu ki te ʼu fono.
2 ʼE lahi te ʼu famili ko te ʼu mātuʼa ʼe nātou maʼumaʼua ʼaupito ʼi te ʼaho kātoa, pea ʼi te ʼu afiafi fono, ʼe toe lahi mo te ʼu gāue ʼaē ʼe tuʼupou kiai te famili. ʼE tonu ke fakamoho te meʼa kai, mo fai te ʼu gāue ʼo te loto fale, pea mo fakaʼosi te ʼu gāue ʼo te faleako. ʼE mamafa age te kavega ʼaē ʼe ʼamo e te ʼu mātuʼa, heʼe tonu ke nātou tōkakaga ke maʼa tanatou fānau fuli, mo fafaga nātou pea mo teuteuʼi nātou ke nātou tokalelei ki te fono. ʼE moʼoni ʼaki te fānau ʼe feala pe ke hoko he ʼu fihifihia ʼi te ʼu ʼaho ʼaē ʼe fai ai te ʼu fono. ʼE gaoʼi te tamasiʼi lahi ʼo mahae ai tona ʼu mutuʼi meʼa. ʼE mahua te pā meʼa kai ʼa te tamasiʼi muli. ʼE fihi te ʼu fānau ʼo ʼuhiga mo te ʼu kiʼi meʼa noa. (Tāʼaga Lea 22:15) ʼAki te ʼu meʼa ʼaia, ʼe mole feala ke hoko lelei te ʼu fakatuʼutuʼu ʼaē neʼe fai fakalelei e te ʼu mātuʼa. Logola te ʼu ʼaluʼaga ʼaia, kae tuʼumaʼu pe ko te ʼu famili ʼaia ʼe nātou ʼōmai fakatomuʼa ki te Fale ʼo Te Puleʼaga. ʼI meʼa fakaloto mālohi foki hatatou sio kiā nātou ʼi te ʼu fono ʼi te ʼu vāhaʼa fuli, mo te ʼu taʼu fuli, pea mo te lahilahi ake ʼa te fānau ʼo tauhi kiā Sehova!
3. ʼE tou ʼiloʼi feafeaʼi ʼe maʼuhiga ʼaupito kiā Sehova te ʼu famili?
3 Logola ko takotou ʼuhiga mātuʼa ʼe feala ke faigataʼa ʼi ʼihi temi, pea mo fakagaʼegaʼe, kae ke koutou ʼiloʼi papau ʼe maʼuhiga ʼaupito kiā Sehova takotou ʼu faiga. Ko Sehova te Tupuʼaga ʼo te famili. ʼE ʼui ʼi tana Folafola ko te ʼu famili fuli ʼe nātou maʼu “tonatou higoa” mai iā Sehova—ʼe ko Sehova te Tupuʼaga ʼo te ʼu famili fuli. (Efeso 3:14, 15, MN ) Koia ʼu mātuʼa, ka koutou faiga ke koutou fakahoko fakalelei takotou maʼua faka famili, pea ʼe koutou faka maʼuhigaʼi ai te Tuʼi ʼAliki ʼo te ʼatulaulau. (1 Kolonito 10:31) ʼE mole ko he pilivilesio lahi koa ʼaia? Koia ʼe tāu mo feʼauga ke tou vakaʼi te ʼu maʼua ʼaē neʼe foaki e Sehova ki te ʼu mātuʼa. ʼI te alatike ʼaenī, ʼe tou vakaʼi anai tanatou maʼua ʼaē ke nātou tōkakaga ki tonatou famili. Tou vakaʼi te ʼu faʼahi e tolu ʼe fakamaʼua e te ʼAtua ke tokaga kiai te ʼu mātuʼa.
Koutou Tōkakaga Ki Tonatou Maʼuli Fakasino
4. ʼI te famili, ko ai ʼaē neʼe fakatuʼutuʼu e Sehova ke tokaga ʼo foaki te ʼu meʼa ʼaē ʼe ʼaoga ki te fānau?
4 Neʼe tohi fēnei e te ʼapositolo ko Paulo: “Kapau e i ai he tahi e mole tokaga ki ona kaiga, tafito natou o tona lotofale, kua fakafisi ki te tui, pe e koviʼage ia i he tagata pagani.” (1 Timoteo 5:8) ʼI te vaega ʼaia, ko ai ʼaē neʼe manatu ki ai te ʼapositolo ʼi tana ʼui ʼaē ko “he tahi”? Neʼe manatu ki te pule famili, ʼaē ʼi te agamāhani ʼe ko te tāmai. ʼE toe foaki e te ʼAtua ki te fafine te maʼua maʼuhiga ʼaē ke tokoni ki tona ʼohoana. (Senesi 2:18) ʼI te temi ʼo te Tohi-Tapu, neʼe tokoni ʼi ʼihi temi te ʼu fafine ki tonatou ʼohoana moʼo taupau tonatou famili. (Tāʼaga Lea 31:13, 14, 16) Ia ʼaho nei, kua lahi te ʼu famili ʼe ko te tāmai peʼe ko te faʼē ʼaē ʼe ina taupau tokotahi ia te fānau.a ʼE lahi te ʼu tāmai peʼe ko te ʼu faʼē ʼe nātou fakahoko fakalelei ʼaupito tanatou maʼua moʼo taupau tonatou kiʼi famili. ʼE moʼoni ʼe lelei age mo kapau ʼe ko te ʼu mātuʼa toko lua ʼaē ʼe nā taupau tonā loto fale, pea ʼe pule ai te tāmai.
5, 6. (a) Koteā he ʼu faigataʼaʼia ʼe felāveʼi mo nātou ʼaē ʼe nātou faiga ke nātou taupau tonatou famili ʼi te faʼahi fakasino? (b) Koteā te manatu ʼo ʼuhiga mo te gāue ʼe ʼaoga ke maʼu e te ʼu tagata Kilisitiano ke feala hanatou faʼa kātaki?
5 Iā 1 Timoteo 5:8, ko te faʼahiga taupau fea ʼaē neʼe manatu kiai ia Paulo ʼo ʼuhiga mo te ʼu mātuʼa? ʼI te ʼu vaega ki muʼa atu pea ki muli mai, neʼe talanoa ai ʼo ʼuhiga mo te ʼu meʼa fakasino ʼaē ʼe ʼaoga ki te famili. ʼI te malamanei ia ʼaho nei, ʼe lahi te ʼu faigataʼaʼia ʼe feala ke felāvei mo te pule famili moʼo taupau tona famili ʼi te faʼahi fakasino. ʼI te potu fuli pe ʼo te malamanei, ʼe lahi ai te ʼu faigataʼaʼia faka ekonomika, mo te fakamavae ʼa te ʼu hahaʼi ʼi te ʼu fale gāue, te mole lahi ʼo te gāue, pea mo te ʼāsili totogi kovi ʼo te maʼuli. Koteā ʼaē ʼe feala ke tokoni ki te ʼu tāmai ke nātou kātakiʼi ʼi te ʼu faigataʼaʼia ʼaia?
6 ʼE tonu ke manatuʼi e te tāmai ʼe ina fakahoko te maʼua neʼe tuku age e Sehova. Ko te ʼu palalau ʼaē neʼe fai e Paulo ʼe hā ai ko te tagata ʼaē ʼe feala ke mulimuli ki te fakatotonu ʼaia kae ʼe fakafisi kiai, ʼe hage ia ko he tahi “kua fakafisi ki te tui.” ʼE faiga anai e he Kilisitiano ke mole ina fai te aga ʼaia iā muʼa ʼo tona ʼAtua. Kae meʼa fakaʼofaʼofa foki, tokolahi ʼi te malamanei ia ʼaho nei ʼe nātou “heeʼofa.” (2 Timoteo 3:1, 3) Tokolahi te ʼu tāmai ʼe nātou fakafisi ki tonatou ʼu maʼua, ʼo nātou līʼakina tonatou famili. ʼE mole feiā te aga ʼa te kau tagata Kilisitiano pea ʼe mole nātou meʼa noaʼi te taupau ʼo tonatou famili. ʼO mole hage ko tanatou kau kaugā gāue, ko te ʼu tagata Kilisitiano ʼe nātou faka ʼuhiga anai tanatou gāue, māʼiape la mo te gāue ʼaē ʼe mole faʼa maʼuhiga, ʼe ko he gāue maʼuhiga, ʼe ina fakafiafia ia Sehova ʼAtua, heʼe feala ʼaki te gāue ʼaia ke nātou taupau tonatou famili.
7. He koʼe ʼe lelei ki te ʼu mātuʼa ke nātou vakaʼi te faʼifaʼitaki ʼa Sesu?
7 ʼE ʼaoga anai ki te ʼu pule famili te faʼifaʼitaki haohaoa ʼa Sesu. Koutou manatuʼi, ʼi te Tohi-Tapu, neʼe ʼui ʼi te lea faka polofeta ʼo ʼuhiga mo Sesu, ʼe ko totatou “Tāmai Heʼegata.” (Isaia 9:6, 7) ʼI tona ʼuhiga “Atama muli,” neʼe fetogi moʼoni e Sesu “te uluaki tagata, ia Atama,” ʼo liliu ai ko te tāmai ʼo te hahaʼi tui ʼi te malamanei. (1 Kolonito 15:45) ʼO mole hage ko Atama, ʼaē neʼe ko he tāmai neʼe manatu pe kiā ia, ko Sesu ʼe ko he tāmai ʼe lelei ʼaupito. ʼE ʼui fēnei ʼi te Tohi-Tapu ʼo ʼuhiga mo ia: “Aki te mea aeni kua tou iloi te ofa: iaʼia, Sesu, nee ina foaki tona mauli o uhiga mo tatou.” (1 Soane 3:16) Ei, neʼe lotolelei e Sesu ke ina foaki tona maʼuli maʼa te hahaʼi. Pea ʼi te ʼaho fuli pe, ʼi he ʼu ʼaluʼaga neʼe mole maʼuhiga, neʼe ʼuluaki tokaga ki te ʼu meʼa ʼaē neʼe ʼaoga ki te hahaʼi. ʼE fua lelei anai kiā koutou ʼu mātuʼa mo kapau ʼe koutou faʼifaʼitakiʼi te taʼi manatu faka sākilifisio ʼaia.
8, 9. (a) Koteā te ako ʼe lava tāʼofi e te ʼu mātuʼa ʼo ʼuhiga mo te tokaga lelei ʼa te ʼu manu lele ki tonatou ʼu fagauna? (b) ʼE fakahā feafeaʼi e te tokolahi ʼo te ʼu mātuʼa Kilisitiano ia te loto faka sakilifisio?
8 ʼE lahi te ʼu meʼa ʼe lava ako e te ʼu mātuʼa ʼo ʼuhiga mo te ʼofa faka sākilifisio ʼaia, ʼaki te ʼu palalau ʼaē neʼe fai e Sesu ki te hahaʼi ʼaē neʼe agatuʼu ki te ʼAtua. Neʼe ina ʼui fēnei: “Ko te tuà fia taku fakaamu ke au fakamaopoopo au fanau, o hage ko te fakamaopoopo e te matuamoa tona fagauna ki ona lalo kapakau.” (Mateo 23:37) ʼE fakaʼoagaʼi ʼi henī e Sesu te fakatātā ʼo te matuʼa moa ʼe ina fakatahitahiʼi tona fagaunaʼaki tana ʼu kapakau. ʼE mahino ia ʼe feala ke tāʼofi e te ʼu matuʼa te ako mai te mātuʼa moa ʼaē ʼe ina fia puipui tona fagauna, pea mo tana tali ke tuʼutāmakiʼia moʼo puipui tona fagauna. Kae ʼe toe fakaofoofo tatatou sio ki te ʼu meʼa ʼaē ʼe fai ʼi te ʼaho fuli e te ʼu manu lele. Tuʼumaʼu pe ʼe nātou ʼolo ʼo kumi he meʼa kai. Māʼiape la mokā nātou gaʼegaʼe, ʼe nātou fafaga tanatou ʼu fagauna, kae ʼi te agamāhani, ʼe ʼosi atu pe tanatou māʼaga, pea nātou tagi ke toe ʼavage hanatou tahi meʼa kai. Tokolahi te ʼu manu ʼaē neʼe faʼu e Sehova ʼe nātou “popoto” ʼi te tokaga ki te ʼu meʼa ʼaē ʼe ʼaoga ki tanatou ʼu kiʼi ʼuhi.—Tāʼaga Lea 30:24.
9 ʼO toe feiā pe, ʼi te malamanei kātoa, ko te ʼu mātuʼa Kilisitiano ʼe nātou maʼu te loto faka sākilifisio. ʼE koutou tali mamahi anai moʼo hāofaki takotou fānau. Pea ʼe koutou tali ke koutou fai he ʼu sākilifisio ʼi te ʼaho fuli moʼo taupau tokotou famili. Tokolahi ia koutou ʼe koutou ʼaʼala māfoatā moʼo fai takotou ʼu gāue fakakinakina pea mo fakatupu gaʼegaʼe. ʼE koutou gāue kinakina moʼo fafaga tokotou famili. ʼE koutou faiga mālohi ke maʼu e takotou fānau he ʼu mutuʼi meʼa maʼa, he ʼapi ʼe lelei, pea ke akoʼi fakalelei nātou. Pea ʼe koutou haga tokaga ki te ʼu faʼahi ʼaia ʼi te ʼaho fuli pea mo te taʼu fuli. ʼE mahino ia ʼe fiafia ia Sehova ʼi te ʼu sākilifisio ʼaia pea mo takotou faʼa kātaki! (Hepeleo 13:16) Kae ʼe tonu ke koutou manatuʼi ʼe ʼi ai te tahi ʼu faʼahi maʼuhiga ʼe tonu ke koutou foaki ki tokotou famili.
Koutou Tokaga Ki Te Maʼuli Fakalaumālie ʼo Tokotou Famili
10, 11. Koteā ʼaē ʼe maʼuhiga tāfito ki te tagata, pea koteā ʼaē ʼe tonu ke ʼuluaki fai e te ʼu mātuʼa ke feala hanatou foaki te meʼa maʼuhiga ʼaia ki tanatou fānau?
10 ʼE maʼuhiga tāfito ia te maʼuli fakalaumālie ʼo te famili ʼi tonatou maʼuli fakasino. Neʼe ʼui fēnei e Sesu: “Ko te tagata ʼe mole tonu ke maʼuli ʼaki pe te pane, kae ʼaki te folafola fuli pe ʼe haʼu mai te gutu ʼo Sehova.” (Mateo 4:4, MN; 5:3) ʼU mātuʼa, koteā ʼaē ʼe koutou lava fai moʼo tokaga ki te maʼuli fakalaumālie ʼo tokotou famili?
11 ʼO ʼuhiga mo te faʼahi ʼaia, ʼe tau fakaʼaogaʼi ia te vaega Tohi-Tapu ʼo Teutalonome 6:5-7. Koutou ʼavahi takotou Tohi-Tapu pea mo lau te ʼu vaega ʼaia. Koutou tokagaʼi ʼe ʼui ki te ʼu mātuʼa ke nātou ʼuluaki tokaga ki tonatou maʼuli fakalaumālie ʼo nātou totonu, ʼo nātou ʼoʼofa kiā Sehova pea mo ʼoʼofa ki tana ʼu folafola. Koia ʼe tonu ke koutou ako fakalelei te Folafola ʼa te ʼAtua, ʼo koutou lau tuʼumaʼu te Tohi-Tapu pea mo metitāsioʼi, ke koutou mahino lelei pea mo ʼofa ki te ʼu gāue ʼaē ʼe fai e Sehova, mo tana ʼu pelesepeto, pea mo tana ʼu lao. ʼE fonu anai tokotou loto ʼi te ʼu moʼoni ʼo te Tohi-Tapu, pea ʼe nātou uga anai koutou ke koutou fiafia ʼo ʼuhiga mo Sehova, mo fakaʼapaʼapa pea mo ʼoʼofa kiā te ia. ʼE lahi anai te ʼu meʼa lelei ʼe feala ke koutou foaki ki takotou fānau.—Luka 6:45.
12. ʼE lava mulimuli feafeaʼi te ʼu mātuʼa ki te faʼifaʼitaki ʼa Sesu ʼo ʼuhiga mo te akoʼi ʼo te ʼu moʼoni faka Tohi-Tapu ki tanatou fānau?
12 Ko te ʼu mātuʼa ʼāe ʼe mālolohi ʼi te faʼahi fakalaumālie, ʼe feala ke nātou mulimuli ki te tokoni ʼaē ʼe tuʼu iā Teutalonome 6:7, ke nātou “akoʼi” ki tanatou ʼu fānau, te ʼu folafola ʼa Sehova ʼi te ʼu temi faigamālie fuli. Ko te “akoʼi” ko tona faka ʼuhiga ke akoʼi ki he tahi, pea mo fai liuliuga ke feala hana taupau maʼu. ʼE ʼiloʼi lelei e Sehova ko tatou fuli—kae tāfito te fānau—ʼe ʼaoga ke akoʼi liuliuga mai ke feala hatatou mahino. Koia, neʼe faka liuliuga e Sesu tana ʼu palalau ʼi tana minisitelio. Ohage la, ʼi tana akoʼi tana kau tisipulo ke nātou agavaivai kae ke mole nātou fiatuʼu pea mo fakataupiepie, neʼe ina fakahā liuliuga te pelesepeto ʼaia ʼaki he ʼu faʼifaʼitaki kehekehe. Neʼe ina akoʼi nātou ke nātou fakakaukauʼi te ʼu meʼa ʼaē ʼe ina akoʼi age, mo fai te ʼu lea fakatātā, pea mo ina tuku e ia totonu he faʼifaʼitaki. (Mateo 18:1-4; 20:25-27; Soane 13:12-15) Kae neʼe mole he temi neʼe fiu ai Sesu. ʼO toe feiā aipe, ʼe ʼaoga ki te ʼu mātuʼa ke nātou kumi he ʼu ʼaluʼaga kehekehe moʼo akoʼi ki tanatou fānau te ʼu moʼoni, ʼo nātou faʼa kātaki ʼo fakahā liuliuga te ʼu pelesepeto ʼa Sehova ʼo aʼu ki te mahino kiai ʼo tanatou fānau pea mo nātou maʼuliʼi.
13, 14. Ko te ʼu lakaga fea ʼaē ʼe feala ai ki te ʼu mātuʼa ke nātou akoʼi te ʼu moʼoni ʼo te Tohi-Tapu ki tanatou fānau, pea ko te ʼu tohi fea ʼaē ʼe feala ke nātou fakaʼaogaʼi?
13 Ko te ʼu ako faka famili, ʼe ko te ʼu lakaga lelei ʼaia moʼo akoʼi ʼo nātou. Koia ʼe maʼuhiga ki te maʼuli fakalaumālie ʼo te famili ke tuʼumaʼu he ako faka Tohi-Tapu ʼa te famili ʼe fakaloto mālohiʼi pea mo fakafiafia. ʼI te malamanei kātoa, ʼe leleiʼia e te ʼu famili Kilisitiano ia te ʼu ako ʼaia, ʼo nātou fakaʼoagaʼi te ʼu tohi ʼaē ʼe tufa mai e te kautahi ʼa Sehova, pea mo talanoa ʼi te ʼu ako ʼaia ki te ʼu meʼa ʼaē ʼe ʼaoga ki te fānau. Ko te tohi Écoute le grand Enseignant ʼe ko he tohi lelei ʼaupito ʼaia ki te ako faka famili ʼo feiā mo te tohi Les jeunes sʼinterrogent — Réponses pratiques.b Kae ʼe mole gata pe te akoʼi ʼa te fānau ʼi te ako faka famili.
14 Ohage ko tona fakahā iā Teutalonome 6:7, ʼe lahi te ʼu lakaga ʼe feala ai kiā koutou ʼu mātuʼa, ke koutou palalau mo takotou fānau ki te ʼu meʼa fakalaumālie. Peʼe koutou folau fakatahi, peʼe koutou gāue fakatahi, peʼe koutou mālōlō fakatahi, ʼe feala pe ke koutou maʼu he ʼu faigamālie ke koutou foaki ai te ʼu meʼa ʼaē ʼe ʼaoga ki takotou fānau ʼi te faʼahi fakalaumālie. ʼE mahino ia ʼe mole ʼaoga anai ke koutou palalau tuʼumaʼu pe ki takotou fānau ʼo ʼuhiga mo te ʼu moʼoni ʼo te Tohi-Tapu. Kae koutou faiga ke koutou fai palalau mo tokotou famili ki he ʼu manatu fakalaumālie fakaloto mālohi. Ohage la, ʼe tou maʼu ʼi te Réveillez-vous ! he ʼu tuʼuga alatike kehekehe. ʼE feala ke fakatafito kiai te ʼu fai palalau ʼo ʼuhiga mo te ʼu manu ʼaē neʼe fakatupu e Sehova, te ʼu koga meʼa matalelei ʼi te malamanei, pea mo te ʼu agaʼi fenua pea mo te faʼahiga maʼuli taulekaleka pea mo kehekehe ʼo te hahaʼi. Ko te ʼu fai palalau ʼaia ʼe feala ke nātou uga te kau tūpulaga ke lahi age tanatou lau ia te ʼu tohi ʼaē ʼe foaki e te kalasi ʼo te tagata kaugana agatonu mo poto.—Mateo 24:45-47.
15. ʼE lava tokoni feafeaʼi te ʼu mātuʼa ki tanatou fānau ke nātou faka ʼuhiga te minisitelio ʼe ko he gāue lelei pea mo fakafiafia?
15 Ko takotou fai palalau mo takotou fānau ki he ʼu manatu fakalaumālie ʼe toe tokoni atu anai ke koutou foaki te tahi meʼa ʼe ʼaoga kiā nātou ʼi te faʼahi fakalaumālie. ʼE tonu ke koutou akoʼi ki takotou fānau ke nātou popoto ʼi te palalau ki te hahaʼi ʼo ʼuhiga mo tanatou tui. Kapau ʼe koutou palalau ki he ʼu manatu lelei ʼo Te Tule Leʼo pea mo te Réveillez-vous !, ʼe feala ke koutou kumi he ʼu faigamālie ke koutou fakapipiki te ʼu manatu ʼaia mo te minisitelio. Ohage la, ʼe feala ke koutou fai te fehuʼi ʼaenī: “ ʼI tau manatu, ʼe lelei koa ke ʼiloʼi e te hahaʼi ia te faʼahi ʼaenī ʼo ʼuhiga mo Sehova? Koteā te ʼu palalau ʼe feala ke tā fai ke feala ki he tahi ke ina fia lau ia te alatike ʼaenī?” Ko te ʼu fai palalau ʼaia ʼe ʼaoga anai ki te kau tūpulaga ke feala hanatou fia fakahā ki te hahaʼi te ʼu meʼa ʼaē ʼe nātou ako. Pea ka kaugā ʼolo takotou fānau mo koutou ʼi te minisitelio, ʼe nātou sisio anai peʼe feafeaʼi takotou fakaʼaogaʼi te ʼu manatu ʼaē neʼe koutou fai palalau kiai. ʼE lagi nātou toe ako ai ko te minisitelio ʼe ko he gāue lelei pea mo fakafiafia.—Gaue 20:35.
16. Koteā ʼaē ʼe feala ke ako e te fānau mo kapau ʼe nātou logo ki te ʼu faikole ʼo tanatou ʼu mātuʼa?
16 ʼE toe foaki e te ʼu mātuʼa te ʼu meʼa ʼaē ʼe ʼaoga ki tanatou fānau ʼi te faʼahi fakalaumāie mokā nātou faikole. Neʼe akoʼi e Sesu ki tana kau tisipulo peʼe tonu ke feafeaʼi tanatou faikole, pea neʼe lahi te ʼu lakaga ʼaē neʼe faikole ai mo nātou. (Luka 11:1-13) Koutou fakakaukauʼi muʼa te ako maʼuhiga ʼaē neʼe nātou maʼu ʼi tanatou faikole fakatahi mo te ʼAlo totonu ʼo Sehova! ʼO toe feiā, ʼe maʼuhiga ke logo takotou fānau ki takotou ʼu faikole. Ohage la, ʼe feala ke nātou ako ʼe loto e Sehova ke tou palalau faʼifaʼitaliha kiā te ia ʼo ʼuhiga mo te ʼu meʼa ʼaē ʼe ʼi totatou loto, ʼo tou palalau age kiā te ia ʼo ʼuhiga mo he faigataʼaʼia ʼe feala ke tau mo tatou. ʼE moʼoni, ʼe feala ke tokoni takotou ʼu faikole ki takotou fānau ke nātou ako te moʼoni fakalaumālie maʼuhiga ʼaenī: ʼE feala ke nātou felogoi mo tanatou Tāmai ʼaē ʼe ʼi selo.—1 Petelo 5:7.
Koutou Tōkakaga Ki Te ʼu Meʼa ʼo Tonatou Loto
17, 18. (a) ʼE fakahā feafeaʼi ʼi te Tohi-Tapu te maʼuhiga ʼaē ke fakahā te ʼofa ki te fānau? (b) ʼE tonu ke faʼifaʼitakiʼi feafeaʼi e te ʼu tāmai ia Sehova moʼo fakahā tonatou ʼofa ki tanatou fānau?
17 ʼE mahino ia ʼe toe logoʼi e te fānau te ʼu meʼa ʼi tonatou loto. ʼE fakahā ʼi te Folafola ʼa te ʼAtua ʼe maʼuhiga ʼaupito ki te ʼu mātuʼa ke nātou tōkakaga ki te faʼahi ʼaia. Ohage la, ʼe fakaloto mālohiʼi te ʼu fafine kei finemui ke nātou “ofa ki . . . anatou fanau.” Neʼe ko te ʼu faʼē ʼaē kei finemui ʼaē neʼe tonu ke nātou fai te faʼahi ʼaia, neʼe fakamanatuʼi age ke nātou aga fakapotopoto. (Tito 2:4) Koia ʼe maʼuhiga te fakahā ki te fānau ʼe kita ʼofa ki ai, heʼe ako ai e te fānau te ʼofa ki te hahaʼi pea ʼe fua lelei fualoa anai ki tonatou maʼuli. ʼI te tahi age faʼahi, ʼe mole ko he aga fakapotopoto te mole fakahā ʼo te ʼofa ki te fānau, heʼe hoko ai te toe mamahi lahi pea ʼe mole ko he faʼifaʼitakiʼi ʼaia ʼo Sehova, ʼaē ʼe ʼofa lahi kiā tatou logola tatatou ʼu agahala.—Pesalemo 103:8-14.
18 Neʼe ko Sehova ʼaē neʼe ina ʼuluaki fakahā tona ʼofa ki tana fānau ʼi te kele, ohage ko tona ʼui iā 1 Soane 4:19, “nee uluaki ofa ia kia tatou.” Ko koutou tāfito ʼu tāmai ʼaē ʼe tonu ke koutou faʼifaʼitakiʼi ia Sehova, ʼo koutou ʼuluaki feʼofaniʼaki mo takotou fānau. ʼE uga ʼi te Tohi-Tapu te ʼu tāmai ke ʼaua naʼa nātou fakatupu ʼita ki tanatou fānau, “naa natou lotovaivai.” (Kolose 3:21) ʼE ʼiʼita te fānau mo kapau ʼe hage kiā nātou ʼe mole ʼofainaʼi peʼe meʼa noaʼi nātou e tanatou ʼu mātuʼa. Ko te ʼu tāmai ʼaē ʼe mole nātou fakahā tonatou ʼofa ʼe tonu ke nātou manatuʼi te faʼifaʼitaki ʼo Sehova. Neʼe palalau ifo Sehova mai te lagi moʼo fakahā tana tapuakina pea mo tona ʼofa ki tona ʼAlo. (Mateo 3:17; 17:5) ʼE mahino ia neʼe maʼu ai e Sesu he fakaloto mālohi lahi! ʼO toe feiā pe, ko te ʼu fānau ʼe nātou maʼu ia te mālohi pea mo te faʼa kātaki ʼi te faʼifaʼitaki moʼoni pea mo fonu ʼi te ʼofa ʼo tanatou ʼu mātuʼa.
19. He koʼe ʼe maʼuhiga te fakatonutonuʼi, pea koteā ʼaē ʼe tonu ke fakafuafua lelei e te ʼu mātuʼa Kilisitiano?
19 ʼE moʼoni, ko te ʼofa ʼa te ʼu mātuʼa ʼe mole gata ʼaki pe he ʼu palalau. ʼE fakahā tāfito ia te ʼofa ʼaki he ʼu gāue. Ko te tokaga ʼaē ki te faʼahi fakasino pea mo fakalaumālie ʼa te fānau ʼe feala ko he fakahā ʼaia ʼo te ʼofa ʼa te ʼu mātuʼa, tāfito la mokā fakahā e te ʼu mātuʼa ki tanatou fānau ʼe nātou fai te faʼahi ʼaia heʼe nātou ʼoʼofa kiā nātou. Tahi ʼaē meʼa, ko te fakatonutonuʼi ʼo te fānau ʼe ko he fakahā maʼuhiga ʼaia ʼo te ʼofa ʼo te ʼu mātuʼa. “Ko ae e ofa ai te Aliki, e ina fakatonutonu.” (Hepeleo 12:6) ʼI te tahi age faʼahi, ʼe mole ko he agaʼofa ʼa te ʼu mātuʼa mo kapau ʼe mole nātou fakatonutonuʼi tanatou fānau. (Tāʼaga Lea 13:24) Ko Sehova ʼe ina fakafuafua lelei tuʼumaʼu tana fai fakatonutonu, “ ʼo fakaʼutaʼuta lelei.” (Selemia 46:28) ʼE mole faigafua tuʼumaʼu ki te ʼu mātuʼa heʼe haohaoa hanatou maʼu te fakapotopoto. Kae ʼe fua lelei anai takotou faiga ʼaē ke koutou maʼu te fakapotopoto. Ko he fakatonutonu ʼe mālohi kae ʼe fai ʼaki te ʼofa, ʼe tokoni ai ki te tamasiʼi ke tuputupu, ʼo maʼuli fiafia pea mo fua manuʼia tona maʼuli. (Tāʼaga Lea 22:6) ʼE mole ko te faʼahi koa la ʼaia ʼe loto e te ʼu mātuʼa Kilisitiano fuli ki tanatou fānau?
20. ʼE lava foaki feafeaʼi e te ʼu mātuʼa ki tanatou fānau te faigamālie ʼaē ke nātou “fili te maʼuli”?
20 ʼU mātuʼa, ka koutou fakahoko te maʼua maʼuhiga ʼaē neʼe foaki atu e Sehova—ke koutou tokaga ki takotou fānau ʼi te faʼahi fakasino, fakalaumālie pea mo te ʼu meʼa ʼi tonatou loto—pea ʼe lahi anai te ʼu fakapale ʼe koutou maʼu. ʼE koutou foaki ai ki takotou fānau te faigamālie ke nātou “fili te maʼuli” pea ki muli age ke nātou ‘māʼuʼuli.’ (Teutalonome 30:19) Ko te ʼu fānau ʼaē ʼe nātou fili ke nātou tauhi kiā Sehova pea ʼi tanatou lalahi ake ʼe nātou mulimuli ki te ala ʼo te maʼuli, ʼe nātou fakafiafia ʼaupito tanatou ʼu mātuʼa. (Pesalemo 127:3-5) Ko te fiafia ʼaia ʼe heʼegata anai! Kae ʼe lava feafeaʼi ki te kau tūpulaga hanatou fakavikiviki kiā Sehova ia ʼaho nei? ʼE vakaʼi anai te faʼahi ʼaia ʼi te alatike ʼaē ka hoa mai.
[Kiʼi nota]
a ʼI te alatike ʼaenī, ko te taupau ʼo te famili ʼe faka ʼuhiga tāfito anai ki te tagata. Kae ʼe toe ʼaoga tatau te ʼu pelesepeto mo kapau ʼe ko he ʼu fafine Kilisitiano ʼaē ʼe nātou taupau tāfito tana kiʼi fānau.
b Neʼe tā e te kau Fakamoʼoni ʼa Sehova.
ʼE Koutou Tali Feafeaʼi Anai?
Koteā ʼaē ʼe feala ke fai e te ʼu mātuʼa moʼo taupau tanatou fānau:
• ʼi te faʼahi fakasino?
• ʼi te faʼahi fakalaumālie?
• ʼi te ʼu meʼa ʼaē ʼi tonatou loto?
[Paki ʼo te pasina 18]
ʼE lahi te ʼu manu lele ʼe nātou faiga mālohi moʼo fafaga tanatou ʼu fagauna
[Paki ʼo te pasina 20]
ʼE tonu ki te ʼu mātuʼa ke nātou ʼuluaki tōkakaga ki tonatou maʼuli fakalaumālie ʼo nātou totonu
[Paki ʼo te pasina 21]
ʼE lahi te ʼu lakaga ʼe lava akoʼi ai e te ʼu mātuʼa ki tanatou fānau peʼe ko ai tonatou Tupuʼaga
[Paki ʼo te pasina 22]
ʼE maʼu e te fānau te lotomālohi pea mo te lototoʼa mokā ʼofainaʼi nātou e tanatou ʼu mātuʼa