Koutou Katoa Pea Mo Koutou Tui Mālohi

Ko Te Ako ʼi Tona Lakaga Tonu Maʼa Te Kau Tūpulaga

KO EPAFALASE ia te Kilisitiano ʼo te ʼuluaki sēkulō neʼe folau ki Loma. Kae neʼe manatu pe ia ki tona ʼu tēhina ʼi Kolose, ko te kolo ʼi Asie Mineure. Neʼe ina faka mafola ai te logo lelei pea lagi neʼe tokoni ai ki ʼihi kau Kolose ke nātou liliu ko ni ʼu tisipulo ʼa Sesu Kilisito. (Kolose 1:7) Neʼe manatuʼi ʼaupito e Epafalase tona ʼu kaugā fagona ʼi Kolose, koia mai Loma neʼe faitohi ai te ʼapositolo ko Paulo kia nātou, ʼo ina ʼui fēnei: “Ko Epafalase . . . ʼe fakaʼalofa atu kia koutou, ʼe faiga mālohi tuʼumaʼu ʼo ʼuhiga mo koutou ʼi tana ʼu faikole, ke koutou katoa pea mo koutou tui mālohi ʼo ʼuhiga mo te finegalo katoa ʼo te ʼAtua.”—Kolose 4:12, MN.

ʼO feiā mo te temi nei, ko te ʼu tāmai pea mo te ʼu faʼe Kilisitiano ʼe nātou hūfaki fakamalotoloto te maʼuli ʼo tanatou ʼu fānau ʼi te faʼahi fakalaumālie. ʼE faiga e te ʼu mātuʼa ʼaia ke nātou fakahū ki te loto ʼo tanatou ʼu fānau te ʼofa ki te ʼAtua ke feala ai hanatou liliu ʼo mālohi ʼi te tui.

Tokolahi te kau Kilisitiano tūpulaga neʼe nātou kole tokoni ʼo ʼuhiga mo te ʼu fihifihia ʼaē ʼe felāveʼi mo nātou ʼi te faleako pea mo ʼihi atu ʼu faʼahi. Neʼe ʼui fēnei e te kiʼi finemui e taʼu 15: “Kua ʼāsili age tomatou ʼu fihifihia. ʼE fakamataku te maʼuli. ʼE ʼaoga kia mātou he tokoni!” Neʼe tali koa ki te ʼu kole ʼaia ʼa te kau tūpulaga pea mo te ʼu faikole ʼa te ʼu mātuʼa ʼaē ʼe pipiki ki te ʼAtua? Ei! He neʼe foaki e te “kaugana agatonu mo fakapotopoto” te ako ʼe fakatafito ki te Tohi-Tapu. (Mateo 24:45) ʼE fakahā ʼi te alatike ʼaenī te ʼu tohi neʼe tokoni ki te toko lauʼi afe teau kau tūpulaga ke nātou “katoa pea mo . . . tui mālohi.” Tou vakaʼi ʼihi ʼo te ʼu tohi ʼaia.

“Koutou Sisio, Ki Te Toko 15 000 . . . Kau Fakamoʼoni Foʼou!”

ʼI te māhina ʼo ʼAukusito 1941, neʼe fakatahi ʼi St. Louis, Missouri, ʼi Amelika te hahaʼi ʼe toko 115 000 ʼi te foʼi fakatahi lahi ʼa te kau Fakamoʼoni ʼa Sehova neʼe fai ʼi te taʼu ʼaia. ʼI te ʼaho fakaʼosi ʼo te fakatahi—“Te ʼAho ʼo Te Fānau”—ko te kau tūpulaga e toko 15 000 neʼe nātou heheka ʼi muʼa ʼo te tēhina faiakonaki ʼo fakalogo lelei ki te akonaki ʼa Joseph F. Rutherford ʼaē neʼe palalau ʼo ʼuhiga mo te ʼu “Fānau ʼo te Hau.” ʼI te fakaʼosi ʼo tana akonaki, ko Rutherford ʼaē kua taʼu 71, neʼe palalau fēnei age kia nātou ohage ko he tāmai:

“Koutou fuli . . . fānau ʼaē kua koutou tali . . . ke koutou fakalogo ki te ʼAtua pea mo tana Hau, fakalelei kae ke koutou tutuʼu ake ki ʼoluga.” Neʼe tutuʼu ki ʼoluga te kau tūpulaga fuli. Neʼe ʼui fēnei e te Tēhina ko Rutherford: “Koutou sisio, ki te toko 15 000 tupu kau fakamoʼoni foʼou maʼa te Puleʼaga!” Neʼe pasipasi fuli ai ia nātou ʼi te fakatahi. Neʼe toe ʼui e te tēhina: “Koutou fuli, ʼaē ʼe koutou faiga anai ke koutou fakahā ki ʼihi te Puleʼaga ʼo te ʼAtua, koutou tali Ei.” Neʼe tali leʼo lahi te kau tūpulaga “Ei!” Pea neʼe ina fakahā te tohi foʼou Enfants, ʼaē neʼe tali fakafiafia ʼi te fakatahi ʼaki te ʼu pasipasi fualoa.

ʼI te ʼosi ʼo te akonaki fakatupu lotomālohi ʼaia, neʼe ko te foʼi ʼatu loa ʼo te kau tūpulaga ʼo aʼu ki te Tēhina ko Rutherford ʼaē neʼe ina fakatoʼo age kia nātou te tohi foʼou. Neʼe fakatupu fia tagi te meʼa ʼaē neʼe sio kiai te fakatahi. Neʼe ʼui fēnei e te tagata neʼe sio ki te meʼa ʼaia: “Gata pe ki he tahi ʼe loto fefeka neʼe mole malave kia ia ʼi tana sio ki te fakahā ʼaē e te kau tūpulaga tanatou falala pea mo tanatou tui katoa ki tonatou ʼAtua ko Sehova.”

ʼI te fakatahi maʼuhiga ʼaia, ko te kau tūpulaga e toko 1 300 neʼe papitema ai moʼo fakahā ʼo tanatou foaki tonatou maʼuli kia Sehova. Tokolahi ia nātou ʼaia neʼe nātou mālohi ʼi tanatou tui ʼo aʼu mai ki te temi nei. ʼE nātou lagolago ki tonatou ʼu kokelekasio, ʼe nātou gāue ʼi te ʼu Petele, peʼe nātou misionea ʼi te tahi ʼu fenua. ʼIo neʼe malave mālohi “Te ʼAho ʼo Te Fānau” pea mo te tohi Enfants ki te loto ʼo te kau tūpulaga ʼaia!

“Neʼe Mātou Maʼu ʼi Tona Lakaga Tonu”

Lolotoga te ʼu taʼu 1970, ko te ʼu tohi e tolu neʼe tā e te kau Fakamoʼoni ʼa Sehova ke lave ki te loto ʼo te toko lauʼi teau afe kau tūpulaga. Ko te ʼu tohi ʼe ko tonatou ʼu kupu ʼaenī, Écoutez le grand Enseignant, Votre jeunesse—Comment en tirer le meilleur parti, pea mo Te Tohi ʼo Te ʼu Hisitolia Faka Tohi-Tapu. ʼI te Réveillez-vous ! ʼo te 1982 neʼe kamata tā ai te ʼu alatike ʼi te kupu tāfito ʼaenī “Les jeunes sʼinterrogent . . .” Neʼe malave te ʼu alatike ʼaia ki te loto ʼo te kau tūpulaga ʼe nātou taʼu kehekehe. Neʼe ʼui fēnei e te tūpulaga e taʼu 14: “ ʼI te po fuli ʼe ʼau fakamālo ki te ʼAtua ʼi tana tā te ʼu taʼi alatike ʼaia.” Neʼe ʼui fēnei e te tūpulaga e taʼu 13: “ ʼE ʼau leleiʼia te ʼu alatike, neʼe mātou maʼu ʼi tona lakaga tonu.” Ko te ʼu mātuʼa pea mo te ʼu tagata ʼāfea ʼe nātou fakamoʼoni ko te ʼu alatike ʼaia neʼe tō tonu mai pea mo fua lelei.

ʼI te Réveillez-vous ! ʼo te 1989 neʼe tā ai te ʼu alatike e 200 ʼi te kupu tāfito “Les jeunes sʼinterrogent . . .” ʼI te Fakatahi Faka Tisitilike ʼo te taʼu ʼaia, ko tona kupu tāfito “La Piété,” neʼe fakahā ai te tohi Les jeunes sʼinterrogent—Réponses pratiques. Neʼe tokoni koa te tohi ʼaia ki te kau tūpulaga ke nātou mālohi ʼi tanatou tui? Neʼe tohi fēnei e te ʼu tūpulaga e toko tolu: “Neʼe ko he tohi lelei ʼaia kia mātou ke mātou mahino ki tomatou ʼu fihifihia pea mo ʼiloʼi peʼe feafeaʼi hona tauʼi. ʼE mātou fakamālo ki takotou tokaga ki tomatou maʼuli fīmālie.” ʼE fakamoʼoni kiai te kau tūpulaga e tokolahi neʼe nātou lau te tohi ʼaia ʼi te malamanei.

“Neʼe Ina Fakafimālieʼi Mātou ʼi Te Faʼahi Fakalaumālie”

ʼI te 1999, neʼe fai e te kau Fakamoʼoni ʼa Sehova te tahi meʼa lelei moʼo ako te kau tūpulaga—ko te foʼi fime viteo Young People Ask—How Can I Make Real Friends? Neʼe tali fakafiafia te foʼi viteo ʼaia. Neʼe ʼui fēnei e te tūpulaga e taʼu 14: “Neʼe malave mālohi kia ʼau te foʼi fime viteo ʼaia.” Neʼe ʼui fēnei e te faʼe ʼe maʼuli tokotahi: “ ʼE liliu anai te foʼi fime viteo ʼaia ko hamatou meʼa kai māhani ʼi tomatou maʼuli fakalaumālie.” Neʼe ʼui fēnei e te fafine kei finemui: “ ʼE ko he meʼa fakaloto fiafia hakita ʼiloʼi ko totatou Kaumeʼa lelei, ia Sehova, ʼe ʼofa moʼoni pea mo tokaga ki te kau tūpulaga ʼi tana kautahi faka malamanei.”

Koteā ʼaē neʼe hoko ʼaki te foʼi fime viteo ʼaia? ʼE ʼui fēnei e te kau tūpulaga: “Neʼe tokoni mai ke ʼau nofo tokaga ʼo ʼuhiga mo taku ʼu fakatahi, ʼe toe tokoni mai ke ʼau fakalahi taku ʼu felogoi ʼaē ʼi te kokelekasio, pea ke ʼau faiga ke liliu ia Sehova ko toku kaumeʼa.” “Neʼe tokoni mai ke ʼaua naʼa ʼau mulimuli ki te kau tūpulaga ʼi te faleako.” “Neʼe ina fakaloto mālohiʼi ʼau ke ʼau kaugana fakalelei kia Sehova.” Pea neʼe tohi fēnei e te taumatuʼa: “ ʼE ma fakafetaʼi ki te ‘meʼa kai’ ʼaia neʼe koutou foaki mai. Neʼe ina fakafimālieʼi mātou ʼi te faʼahi fakalaumālie.”

ʼO mulimuli pe ki tana gāue ʼaē mai te ʼAtua, neʼe foaki e te “kaugana agatonu mo fakapotopoto” te meʼa kai fakalaumālie ʼi tona lakaga tonu kia nātou fuli ʼaē ka nātou tali anai. Pea ʼe ko he meʼa fakafiafia hakita sio pe neʼe tokoni feafeaʼi te ako faka Tohi-Tapu ʼaia ki te kau tūpulaga ia ʼaho nei ke nātou “katoa pea mo . . . tui mālohi ʼo ʼuhiga mo te finegalo katoa ʼo te ʼAtua”!