ʼE Tali e Te ʼAtua Te Hahaʼi Fuli Pe

ʼI TANA ʼuluaki folau ki Mali, neʼe malave kia John ia te tali kāiga ʼa Mamadou mo tona famili. Neʼe nofo ifo ia John ki te kele pea mole fakameʼameʼa ʼo kai ki tanatou pa kai fakatahi, pea neʼe feʼekeʼaki peʼe feafeaʼi hana vaevae mo tana tagata fai fakaafe ia te meʼa maʼuhiga ʼaupito—te logo lelei ʼo te Puleʼaga mai te Folafola ʼa te ʼAtua, te Tohi-Tapu. Logope ʼe poto ia John ʼi te Fakafalani, ko te lea ʼi Mali, kae neʼe feʼekeʼaki peʼe feafeaʼi anai hana felogoi mo he famili ʼe kehe ʼaupito tana lotu pea mo tana faʼahiga fakakaukau.

ʼE mole tou punamaʼuli ki te manatu ʼa John ki te fakamatala faka Tohi-Tapu ʼo ʼuhiga mo te kolo ʼo Papele. Neʼe fetogi ai e te ʼAtua te lea ʼo te hahaʼi agatuʼu. (Senesi 11:1-9) Koia kua maʼu ʼi te kele te hahaʼi mo te ʼu lea kehekehe, mo te ʼu lotu kehekehe pea mo te ʼu faʼahiga fakakaukau kehekehe. ʼI te temi ʼaenī kua lahi te feʼaluʼaki ʼa te hahaʼi, pea ko te tokolahi, māʼia ʼi tonatou fenua, ʼe nātou tau mo te faigataʼaʼia ʼaē neʼe tau mo John: e feafeaʼi he fakahā ʼo te ʼamanaki faka Tohi-Tapu ki he ʼu hahaʼi ʼe fenua kehe?

Ko He Faʼifaʼitaki ʼo Te Temi ʼĀfea

Ohage ko ʼihi polofeta ʼi Iselaele, neʼe ʼuluaki palalau ia Sonasi ki te kau Iselaele. ʼI te tahi temi neʼe lea fakakikite ki te puleʼaga ʼaposita mo ʼona telepi e hogofulu, ʼaē neʼe nātou fai te ʼu aga fakaufiufi ki te ʼAtua. (2 Hau 14:23-25) Koutou fakakaukau age muʼa ia Sonasi ʼi te ʼui age ki ai te fekau makehe ke mavae ʼi tona fenua pea ke ʼalu ki Asilia ʼo fagonogono ki te hahaʼi ʼo Ninive, ko he ʼu hahaʼi ʼe kehe tanatou lotu mo tanatou agaʼi fenua. Neʼe mole lagi poto lelei ia Sonasi ʼi te lea ʼa te kau Ninive. ʼE hā mai, neʼe faigataʼa kia Sonasi te fekau ʼaē neʼe fakatotonu age ki ai pea neʼe hola ai.—Sonasi 1:1-3.

ʼE mahino ia, neʼe tonu ke ʼiloʼi e Sonasi ko Sehova ʼAtua ʼe mole sio ki te meʼa ʼaē ʼe hā ki tuʼa kae ʼe ina sivisivi te loto. (1 Samuele 16:7) ʼI tana hāofaki faka milakulo ia Sonasi, neʼe toe fakatotonu age e Sehova ke ʼalu ʼo fagonogono ki te hahaʼi ʼo Ninive. Neʼe fakalogo ia Sonasi, pea ko te meʼa ʼaē neʼe hoko, neʼe fakahemala te kau Ninive. Kae neʼe mole maʼu e Sonasi te manatu ʼaē ʼe totonu. ʼAki he ako mālohi, neʼe akoʼi age e Sehova te maʼua ʼaē ke ina fetogi tana aga. Neʼe fehuʼi fēnei age e Sehova kia Sonasi: “ ʼE mole tonu koa la ke ʼau ʼofa mamahi ki Ninive, te kolo lahi ʼaē ʼe nonofo ai te toko teau ʼuafulu afe tupu hahaʼi, ʼaē ʼe mole nātou ʼiloʼi te kehekehe ʼo tonatou nima mataʼu pea mo tonatou nima hema?” (Sonasi 4:5-11) ʼE feafeaʼi kia tatou ʼi te temi nei? E feafeaʼi hatatou tokoni ki te hahaʼi ʼe kehekehe ʼonatou ʼu haʼuʼaga?

ʼE Tali Te Kau Samalitana Pea Mo Te Kau Senitile

ʼI te ʼuluaki sēkulō, neʼe fakatotonu e Sesu ki tana kau tisipulo ke nātou fai he ʼu tisipulo ʼo te ʼu puleʼaga fuape. (Mateo 28:19) Neʼe mole faigafua kia nātou. Ko te kau tisipulo ʼa Sesu neʼe ko te kau Sutea, pea ohage ko Sonasi, neʼe kua nātou māhani pe ʼi te palalau mo te hahaʼi ʼe fenua tahi mo nātou. ʼE mahino ia, neʼe toe mālohi ia nātou te ʼu aga fakapalatahi ʼo te temi ʼaia. Kae neʼe takitaki e Sehova te ʼu ʼaluʼaga, ʼo mahino māmālie ai tana kau kaugana ki tana fakatuʼutuʼu ʼo ʼuhiga mo nātou.

Ko te ʼuluaki fihifihia ʼaē neʼe tonu ke nātou fakalaka ai, neʼe ko te fakapalatahi ʼa te kau Sutea ki te kau Samalitana. Neʼe mole felogoi te kau Sutea pea mo te kau Samalitana. Kae neʼe kua teuteuʼi e Sesu te kau Samalitana ke nātou tali te logo lelei. Neʼe fakahā e Sesu tana mole fakapalatahi ʼi tana fai palalau mo te fafine Samalitana. (Soane 4:7-26) ʼI te tahi lakaga, ʼaki te lea fakatātā ʼo te tagata Samalitana aga faka kāiga, neʼe fakahā ai e Sesu ki te tagata Sutea, ʼe ʼi ai te hahaʼi, ʼi tuʼa atu ʼo te kau Sutea, ʼe nātou ʼofa faka kāiga. (Luka 10:25-37) ʼI te hoko mai ʼo te temi ke fakahū ai e Sehova te kau Samalitana ki te kokelekasio faka Kilisitiano, ko Filipo, mo Petelo, pea mo Soane—ko te kau Sutea fuli—neʼe nātou fagonogono ki te hahaʼi ʼo Samalia. Neʼe fakatupu e tanatou gāue he toe fiafia lahi ʼi te kolo ʼaia.—Gaue 8:4-8, 14-17.

Kapau neʼe faigataʼa ki te kau Kilisitiano Sutea hanatou ʼoʼofa ki te kau Samalitana, ʼaē neʼe ko te ʼu kāiga mamaʼo ʼa te kau Sutea, ʼe mahino ia neʼe toe faigataʼa age kia nātou hanatou ʼoʼofa faka kāiga kia nātou ʼaē ʼe mole ko he kau Sutea, ia te kau Senitile, ʼaē neʼe fehiʼa ki ai te kau Sutea. Kae ʼi te hili ʼo te mate ʼo Sesu, neʼe pulihi te mole felogoi ʼa te kau Kilisitiano Sutea pea mo te kau Senitile. (Efeso 2:13, 14) Moʼo tokoni kia Petelo ke ina tali te fakatuʼutuʼu foʼou ʼaia, neʼe fakahā age e Sehova te meʼa ke sio kiai, ʼo Ina ʼui age ke “ ʼaua naʼa [ina] ʼui ʼe ʼuli te ʼu meʼa ʼaē kua fakamaʼa e te ʼAtua.” Neʼe taki ia ia e te laumālie ʼa Sehova ki te tagata Senitile ʼe higoa ko Kolonelio. ʼI te mahino leva ʼa Petelo ki te manatu ʼa te ʼAtua—ʼe mole tonu ke ina ʼui ko te tagata ʼaia ʼo te ʼu puleʼaga ʼe ʼuli koteʼuhi kua fakamaʼa ia ia e te ʼAtua—neʼe ina ʼui fēnei: “Kua ʼau mahino ko te ʼAtua ʼe mole fakapulepule, kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali leleiʼi ia ia.” (Gaue 10:9-35, MN ) Neʼe punamaʼuli ia Petelo ʼi te fakahā age e te ʼAtua tana tali ia Kolonelio mo tona famili, ʼo ina folahi ifo kia nātou te laumālie maʼoniʼoni!

Ko Paulo—Ko He Ipu Neʼe Filifili Maʼa Te Puleʼaga

Ko te minisitelio ʼo Paulo ʼe ko he faʼifaʼitaki maʼuhiga ki te teuteuʼi māmālie e Sehova tana kau kaugana ke nātou ʼoʼofa pea mo tokoni ki te hahaʼi fuli pe. ʼI te temi ʼaē neʼe tafoki ai ia Paulo, neʼe ʼui e Sesu ʼe ina fakaʼaogaʼi anai ia Paulo ohage ko he ipu kua filifili moʼo ave ʼo Tona huafa ki te ʼu puleʼaga. (Gaue 9:15) Neʼe ʼalu ia Paulo ki Alape, lagi moʼo metitasio ki te fakatuʼutuʼu ʼo te ʼAtua ke ina fakaʼaogaʼi ia ia moʼo tala te logo lelei ki te ʼu puleʼaga.—Kalate 1:15-17.

Lolotoga tana ʼu ʼuluaki folau faka misionea, neʼe mālohi te fagonogono ʼa Paulo ki te hahaʼi ʼaē neʼe mole Sutea. (Gaue 13:46-48) Neʼe tapuakina e Sehova ia te gāue ʼa Paulo, ʼo fakamoʼoni ai ko te ʼapositolo ʼaia neʼe ina fai tana ʼu gāue ʼo mulimuli ki te fakatuʼutuʼu ʼa Sehova. Neʼe fakahā e Paulo tana mahino katoa ki te manatu ʼa Sehova ʼi tana fakatonutonuʼi ia Petelo, ʼaē neʼe aga fakapulepule, he neʼe mole fia fakatahi mo tona ʼu tēhina Senitile.—Kalate 2:11-14.

ʼE ʼi ai te tahi fakamoʼoni neʼe takitaki e te ʼAtua ia te ʼu faiga ʼa Paulo: ʼi tana lua folau faka misionea, neʼe tāʼofi ia Paulo e te laumālie maʼoniʼoni ke ʼaua naʼa fai faka mafola ʼi te koga fenua Loma ʼo Pitinia. (Gaue 16:7) ʼE mahino ia neʼe mole heʼeki hoko mai te temi ʼaē neʼe tonu ke fai ai te gāue ʼaia. Kae ki muli age, neʼe liliu ʼihi hahaʼi ʼo Pitinia ko te kau Kilisitiano. (1 Petelo 1:1) Neʼe ʼi ai te meʼa neʼe hā kia Paulo, ʼe sio ai ki te tagata Masetonia ʼe ina kole mamahi age: “Fakalaka mai ki Masetonia o tokoni mai kia matou.” Pea neʼe manatu ai e Paulo ʼe tonu ke ina fetogi tana fagona, kae ʼalu ʼo tala te logo lelei ʼi te koga fenua Loma ʼaia.—Gaue 16:9, 10.

ʼI tana fai faka mafola ʼi Atena, neʼe ʼahiʼahiʼi te fealagia ʼa Paulo ke mulimuli ki te ʼaluʼaga kehekehe ʼaē ʼe hoko kia ia. Neʼe tapuʼi e te lao Keleka pea mo Loma te fakahū ʼo he ʼu ʼatua kehe pea mo he ʼu aga faka lotu foʼou. Neʼe ʼiloga te ʼofa ʼa Paulo ʼi tana fia ʼiloʼi te agaaga ʼo tanatou ʼu naunau faka lotu. ʼI Atena neʼe ina tokagaʼi te aletale ʼe tohi ai “ki te Atua Hee Ilo.” Neʼe ina fakaʼaogaʼi te koga ʼaia ʼi tana fagonogono. (Gaue 17:22, 23) Neʼe ko he faʼahiga fai ʼaia moʼo tala tana logo ʼaki he aga fakaʼapaʼapa pea mo he agalelei!

ʼE mahino ia neʼe fiafia ia Paulo ki te ʼu fua ʼo tana gāue ʼi tona ʼuhiga ʼapositolo ʼo te ʼu puleʼaga! Neʼe lahi te ʼu kokelekasio neʼe tokoni kiai ki tona fakatuʼu, ko he ʼu kokelekasio neʼe kaugamālie ai te kau Kilisitiano ʼe mole ko he kau Sutea ʼi Kolonito, mo Filipe, mo Tesalonika, pea mo te ʼu kolo ʼo Kalate. Neʼe tokoni ki te ʼu tagata mo te ʼu fafine tui ohage ko Tamalisi, mo Tenisio, mo Selesio Paulo, pea mo Tito. Neʼe ko he pilivilesio ia te sio ki he ʼu hahaʼi neʼe mole nātou ʼiloʼi ia Sehova peʼe ko te Tohi-Tapu, ʼe nātou tali te moʼoni ʼo ʼuhiga mo te Lotu Faka Kilisitiano! ʼO ʼuhiga mo tana tokoni ki te ʼu hahaʼi ʼe mole ko he kau Sutea ke nātou maʼu te ʼatamai mālama ʼo te moʼoni, neʼe tala fēnei e Paulo: “Ei, neʼe ʼau faigaʼi feiā ke ʼaua naʼa ʼau fagonogono te logo lelei ʼi te potu ʼaē kua puʼaki ai te huafa ʼo Kilisito, . . . kae ohage ko tona tohi: ‘ ʼE sisio anai ia nātou ʼaē neʼe mole heʼeki fagonogono age kia nātou, pea ko nātou ʼaē neʼe mole logo, ʼe nātou logo anai.’ ” (Loma 15:20, 21, MN ) ʼE tou lava tala koa te logo lelei ki he ʼu hahaʼi ʼe mole fenua tahi mo tatou?

Tou Tokoni Ki Te Hahaʼi Fuli ʼo Te Kele

Neʼe faikole ia Salomone kia Sehova ʼo ʼuhiga mo te hahaʼi ʼaē ʼe mole Sutea ʼaē ka ʼōmai anai ʼo tauhi ʼi te fale lotu ʼi Selusalemi. Neʼe ina kole fēnei: “ ʼOfa pe ke ke fakalogo mai te lagi, ia te potu tonu ʼaia ʼo tou ʼafioʼaga, pea ʼe tonu anai ke ke fai ʼo mulimuli ki te ʼu meʼa fuli ʼaē ʼe kole atu e te matāpule; ke ʼiloʼi ai tou huafa e te hahaʼi fuli ʼo te kele.” (1 Hau 8:41-43) Ko te lauʼi afe kau fai faka mafola ʼo te Puleʼaga ʼe nātou logologo te ʼu palalau ʼaia ʼi te ʼu fenua kehekehe. ʼE nātou felāveʼi mo te ʼu hahaʼi ʼe nātou hage ko te kau Ninive, ʼaē ʼi te faʼahi fakalaumālie, ‘ ʼe mole nātou ʼiloʼi te kehekehe ʼo tonatou nima mataʼu pea mo tonatou nima hema.’ Pea ʼe fiafia te kau fai faka mafola ʼo te Puleʼaga ʼi te kau ki te fakahoko ʼo te ʼu lea faka polofeta ʼo ʼuhiga mo te tānaki ʼo te kau tauhi moʼoni mai te ʼu fenua kehekehe.—Isaia 2:2, 3; Mikea 4:1-3.

Ohage pe ko te hahaʼi mai te Keletiate ʼe nātou tali te logo ʼo te Tohi-Tapu, ʼo feiā mo te ʼu hahaʼi mai te tahi ʼu lotu. ʼE tonu ke malave feafeaʼi te potu ʼaia kia koutou? Koutou sivisivi fakalelei ia koutou. Kapau ʼe koutou logoʼi ʼe ʼi ai he faʼahiga fakapalatahi ʼe tauʼaka loloto ia koutou, koutou fetogi ʼaki te ʼofa.a ʼAua naʼa koutou lītuʼa ki he ʼu hahaʼi ʼe tali lelei e te ʼAtua.—Soane 3:16.

Koutou teuteuʼi tokotou ʼatamai ʼi muʼa ʼo takotou palalau mo he ʼu hahaʼi kehe. Koutou ʼiloʼi lelei muʼa te ʼu meʼa ʼe nātou tui kiai, mo te ʼu meʼa ʼe nātou hoha kiai, mo tanatou faʼahiga fakakaukau; ʼosi ʼaia pea koutou kumi he meʼa ke koutou felogoi tahi kiai. Koutou agalelei pea mo manavaʼofa ki te hahaʼi. ʼAua naʼa koutou fihi, kae ke koutou agamālū pea mo taupau he aga ʼe lelei. (Luka 9:52-56) Kapau ʼe koutou fai feiā, pea ʼe koutou fakafiafia anai ia Sehova, “ ʼaē ʼe ina loto ke hāofaki te faʼahiga tagata fuape pea ke nātou aʼu ki te ʼatamai mālama totonu ʼo te moʼoni.”—1 Timoteo 2:4, MN.

Ko he meʼa fakafiafia ke maʼu ʼi tatatou ʼu kokelekasio he ʼu hahaʼi mai te ʼu haʼuʼaga kehekehe! (Isaia 56:6, 7) Ko he meʼa fakaloto māfana hatatou logo ki he ʼu higoa, ʼi tuʼa atu ʼo te higoa ʼo Malia, mo Male, mo Soane, pea mo Petelo, kae ko te ʼu higoa ohage ko Mamadou, mo Jegan, mo Reza, pea mo Chan! Ei, “kua avahi mai [kia tatou] te matapā lahi ki te gāue.” (1 Kolonito 16:9, MN ) ʼOfa pe ke tou fakaʼaogaʼi te ʼu faigamālie fuli ke tou faka mafola te fakaafe ʼa Sehova, te ʼAtua heʼe fakapulepule, ʼaē ʼe ina tali fakafiafia te hahaʼi fuli pe!

[Kiʼi nota]

[Paki ʼo te pasina 23]

Neʼe poto ia Paulo ʼi te palalau ki te logo lelei ki te hahaʼi ʼi te potu fuli pe

. . . ʼi Atena

. . . ʼi Filipe

. . . ʼi tana ʼu folau