Koutou ʼAlaʼala, Koutou Haʼele Ki Muʼa! ʼAki He Lototoʼa!

Fakamatala ʼo Te ʼu Fono Makehe

ʼE TOU ʼiloʼi fuli ʼe tou lolotoga maʼuʼuli nei ʼi te ʼu “temi faigataa.” ʼI totatou ʼuhiga kau Fakamoʼoni ʼa Sehova, ʼe mole tou hāo mai te ʼu faigataʼaʼia ʼo “te u aho fakamuli.” (2 Timoteo 3:1-5) Kae ʼe mahino kia tatou ʼe tonu ke tou tokoni ki te hahaʼi. ʼE mole nātou mahino ki te ʼuhiga ʼo te ʼu meʼa ʼaē ʼe hoko ʼi te malamanei. ʼE ʼaoga kia nātou he fakafimālie pea mo he ʼamanaki. Koteā tatatou ʼuluaki gāue moʼo tokoni ki te hahaʼi?

ʼE ʼi ai te gāue neʼe tuku mai e te ʼAtua, ko te fagonogono ʼo te logo lelei ʼo te Puleʼaga ʼo te ʼAtua ʼaē kua fakatuʼu. (Mateo 24:14) ʼE tonu ke ʼiloʼi e te hahaʼi ko te Puleʼaga ʼaia ʼi selo ʼe ko te falalaʼaga pe ʼaia e tahi maʼa te malamanei. Kae ʼe mole tali leleiʼi tuʼumaʼu tatatou logo. ʼI ʼihi koga meʼa, ʼe tapuʼi tatatou gāue pea ko ʼotatou ʼu tēhina ʼe fakatagaʼi. Kae ʼe mole tuku ai tatatou gāue. ʼAki tatatou falala katoa kia Sehova, ʼe tou lotomālohi ke tou nonofo ʼalaʼala pea mo haga haʼele mālohi ki muʼa, ʼo tou haga tala te logo lelei.—Gaue 5:42.

Neʼe ʼiloga te lotomālohi ʼaia ʼi te fono makehe neʼe hoko ʼi te māhina ʼo ʼOketopeli 2001. ʼI te Moeaki ʼaho 6 ʼo ʼOketopeli, neʼe fai te fono ʼe hoko ʼi te taʼu fuli ʼo te Watch Tower Bible and Tract Society of Pennsylvania ʼi Jersey City, ʼi New Jersey, ʼi te Fale ʼo te ʼu Fakatahi Lalahi ʼa te kau Fakamoʼoni ʼa Sehova ʼi Amelika.a ʼI te ʼaho ake, neʼe fai te tahi ʼu fono ʼi te ʼu koga meʼa e fā, tolu ʼi Amelika pea tahi ʼi Kanata.b

ʼI tana avahi te fono ʼaē ʼe fai ʼi te taʼu fuli, ko te pelesita, ia Samuel F. Herd, ʼaē ʼe kau ki te Kolesi Pule ʼa te kau Fakamoʼoni ʼa Sehova, neʼe ina fakaʼaogaʼi ia te Pesalemo 92:1, 4 pea neʼe ina ʼui fēnei: “ ʼE tou fia loto fakafetaʼi.” Neʼe ʼiloga te fia fakafetaʼi ʼi te ʼu fakamatala e nima mai te malamanei.

Te ʼu Fakamatala Mai Te ʼu Potu Fuli Pe

Neʼe fakamatala e te Tēhina ko Alfred Kwakye ia te tuputupu ʼo te gāue fai faka mafola ʼi Ghana, ʼaē neʼe higoa ʼāfea atu ko te Matafenua Aulo. Neʼe tapuʼi ai tatatou gāue lolotoga te ʼu taʼu. Neʼe fehuʼi fēnei e te hahaʼi: “He koʼe ʼe tapuʼi takotou gāue? Koteā ʼaē neʼe koutou fai?” Neʼe fakamahino e te Tēhina ko Kwakye, neʼe maʼu ai te ʼu faigamālie ke fai he fagonogono. ʼI te taʼu 1991 ʼi te temi ʼaē neʼe toʼo ai te tapu ʼaia, neʼe maʼu te toko 34 421 kau Fakamoʼoni ʼa Sehova ʼi Ghana. ʼI te māhina ʼo ʼAukusito 2001, neʼe maʼu te toko 68 152—ko he tuputupu ʼe 98 ʼi te teau. ʼE lolotoga fai nei te ʼu plans ke laga he Fale maʼa te ʼu Fakatahi ke maʼu he ʼu hekaʼaga e 10 000. ʼE mahino mai, ʼe fakaʼaogaʼi lelei e totatou ʼu tēhina ʼi Ghana tonatou ʼāteaina faka lotu.

Logope te maveuveu faka politike, ko totatou ʼu tēhina ʼi Ilelani ʼe nātou kau mālohi ki te minisitelio, pea ʼe fakaʼapaʼapaʼi nātou ʼuhi ko tanatou mole kau ki te ʼu maveuveu ʼaia. Neʼe ʼui fēnei e te kootinatea ʼo te Komite ʼo te Filiale ko Peter Andrews, ʼe maʼu nei ʼi Ilelani ia kokelekasio e 115 ʼi te ʼu silikosikilipisio e 6. Neʼe fai te fakamatala e te Tēhina ko Andrews ʼo ʼuhiga mo Liam, ko te kiʼi tama ʼe taʼu hogofulu ʼe mole mataku ʼi te fai faka mafola ʼi te faleako. Neʼe tufa e Liam Te Tohi ʼo Te ʼu Hisitolia Faka Tohi-Tapu ki te toko 25 ʼo tana kau ako pea mo tana fafine faiako. Neʼe fia papitema ia Liam, kae neʼe ʼui age e te tahi peʼe mole veliveli fau tona ʼu taʼu ki te faʼahi ʼaia. Neʼe tali fēnei age e Liam: “ ʼE mole ko toku taʼu ʼaē ʼe maʼuhiga kae ko toku ʼofa ʼaē kia Sehova. ʼE fakahā anai e taku papitema toku ʼofa lahi kia ia.” ʼE faigaʼi e Liam ke liliu ko he misionea.

ʼI te taʼu 1968 neʼe ko te toko 5 400 kau fai faka mafola ʼo te logo lelei ʼi Venesuela. Kae ʼe fakatokagaʼi e Stefan Johansson te kootinatea ʼo te komite ʼo te filiale, kua ʼi ai nei te toko 88 000 tupu kau tagata fai faka mafola. Pea ʼe feala pe ke toe lahi age te tuputupu koteʼuhi neʼe ko te toko 296 000 tupu hahaʼi neʼe nātou kau ki te fono ʼo te Fakamanatu ʼo te taʼu 2001. ʼI Tesepeli ʼo te taʼu 1999, ko te ʼu ʼua lalahi neʼe nātou fakatupu ai te holo ifo ʼo te pela ʼo ina matehi ai te toko 50 000 hahaʼi, ʼo kau ai mo te kau Fakamoʼoni. Neʼe ʼi ai te tahi Fale ʼo te Puleʼaga neʼe fonu ai te pela ʼo teitei kaku ki te fuga fale. Neʼe ʼi ai te tahi neʼe ina ʼui ke nātou tuku ai te fale, kae neʼe tali fēnei e te ʼu tēhina: “Kailoa ia! Ko tomatou Fale ʼo te Puleʼaga, pea ʼe mole mātou tuku feiā anai.” Neʼe nātou fai ai te ʼu gāue, ʼo toʼo mai ki tuʼa te pela, mo te ʼu maka, pea mo ʼihi ʼotaʼota. Neʼe toe fakafoʼou te fale, pea kua ʼui e te ʼu tēhina kua laka age tona matalelei ʼi te temi nei, ʼo laka age ia ʼi te temi ʼaē neʼe mole heʼeki hoko ai te tuʼutāmaki!

Neʼe ʼui e te Tēhina ko Denton Hopkinson, te kootinatea ʼo te Komite ʼo te filiale, ʼe maʼu ʼi Filipine lea kehekehe e 87. Lolotoga te taʼu gāue kua hili, neʼe tā katoa te tohi Les Saintes Écritures — Traduction du monde nouveau ki te ʼu lea tāfito ʼo te fenua—te faka Cebuano, mo te faka Iloko, pea mo te faka Tagalog. Neʼe fakamatala e te Tēhina ko Hopkinson te meʼa neʼe hoko ki te kiʼi tama ʼe taʼu hiva, neʼe ina lau te tohi Une bonne nouvelle qui vous rendra heureux, neʼe tā e te kau Fakamoʼoni ʼa Sehova. Neʼe ina maʼu te tahi ʼu tohi mai te filiale, pea neʼe ina toe lau foki mo te ʼu tohi ʼaia logola te fakafeagai kiai ʼo tona famili. Hili kiai te ʼu taʼu neʼe kua ako leva ʼi te faleako ʼa te kau tōketā, pea neʼe toe felogoi mo te filiale pea neʼe ina fakaʼui hana ako faka Tohi-Tapu. Neʼe papitema ʼi te taʼu 1996 pea mole faʼa fualoa kiai pea neʼe kamata gāue pionie. ʼE gāue nei mo tona ʼohoana ʼi te filiale.

Neʼe fakamahino e Ronald Parkin te kootinatea ʼo te Komite ʼo te Filiale, ‘ko Puerto Rico ʼe ko he fenua ʼe ina fetuku tana kau Fakamoʼoni ki te tahi ʼu fenua.’ ʼE maʼu ʼi te motu te toko 25 000 kau fai faka mafola, pea ʼe mole heʼeki toe tuputupu talu mai fualoa. Koteā tona tupuʼaga? ʼE fakafuafua ʼe mavae ʼi Puerto Rico te kau fai faka mafola e toko 1 000 ʼi te taʼu fuli, ʼo ʼolo ki Amelika ʼuhi ko te faʼahi faka ekonomika. Neʼe talanoa te Tēhina ko Parkin ki te fai fakamāu maʼuhiga neʼe fai ʼo ʼuhiga mo Luis, ko he Fakamoʼoni ʼe taʼu 17 neʼe ina maʼu te mahaki ko te leucémie. Neʼe ʼave ia Luis ki te telepinale, ʼuhi ko tana fakafisi ki te toto. Neʼe fia palalau fakahagatonu te fafine tuʼi fakamāu mo ia, koia neʼe ina ʼaʼahi ia Luis ʼi te lopitali. Neʼe fehuʼi age e Luis: “He koʼe koa mo kanapaula neʼe ʼau fai he agakovi mamafa, ʼe koutou fakamāuʼi ia ʼau ohage he tagata lahi, pea ka ʼau fia fakalogo ki te ʼAtua, ʼe koutou gaohi ʼau ohage he kiʼi tamasiʼi?” Neʼe tui papau ai leva te tuʼi fakamāu kua katoa tana fakakaukau, pea kua lava filifili e ia totonu te meʼa ʼaē ʼe ina loto kiai.

ʼI te ʼosi ʼo te ʼu fakamatala mai te ʼu fenua mamaʼo, neʼe fakafehuʼi leva e Harold Corkern mai te Komite ʼo te filiale ʼo Amelika, ia te toko fā kaugana ʼa Sehova kua fualoa tanatou nonofo ʼi te moʼoni. Ko Arthur Bonno kua taʼu 51 tana gāue ʼi te selevisi temi katoa pea ʼe lolotoga gāue nei ʼi te Komite ʼo te filiale ʼi Équateur. Ko Angelo Catanzaro kua taʼu 59 tana gāue ʼi te selevisi temi katoa, pea neʼe lahi tāfito te temi ʼaē neʼe ina fai te gāue ko te tagata feʼaluʼaki. Ko Richard Abrahamson neʼe maʼu tona pepa misionea ʼi te faleako ʼo Kalaate ʼi te taʼu 1953, pea neʼe ina fakaʼaluʼalu te gāue faka mafola ʼi Danemark lolotoga taʼu e 26 ʼi muʼa ʼo tana liliu ki te Petele ʼo Brooklyn. Pea moʼo fakaʼosi, neʼe fiafia te hahaʼi fuli ʼi tanatou logo ki te fakafehuʼi ʼa Carey W. Barber ʼaē kua taʼu 96. Neʼe papitema ʼi te taʼu 1921, ʼo gāue te Tēhina Barber ia taʼu e 78 ʼi te selevisi temi katoa, pea kau ki te Kolesi Pule talu mai te taʼu 1978.

Te ʼu Akonaki ʼe Lave Lelei

ʼI te fono ʼaē ʼe fai ʼi te taʼu fuli, neʼe fai ai mo te ʼu akonaki lelei ʼaupito. Neʼe fai te akonaki e te Tēhina ko Robert W. Wallen ko te kupu tāfito ʼaenī: “Ko He Hahaʼi Maʼa Tona Huafa.” Ko tatou ʼe ko te ʼu hahaʼi ʼe nātou fua te huafa ʼo te ʼAtua, pea ʼe tou nonofo ʼi te ʼu fenua e 230 tupu. Neʼe foaki mai e Sehova “he ka haʼu pea mo he ʼamanaki.” (Selemia 29:11) ʼE tonu ke tou haga faka mafola te Puleʼaga ʼo te ʼAtua, moʼo vaevae te logo taulekaleka ʼo te fīmālie. (Isaia 61:1) Neʼe fakaʼosi fēnei e te Tēhina ko Wallen, “ ʼOfa pe ke ʼalutahi totatou maʼuli mo te higoa ʼe tou fua, ʼaē ko te kau Fakamoʼoni ʼa Sehova.”—Isaia 43:10.

Ko te koga fakaʼosi ʼo te polokalama neʼe ko te akonaki koga tolu neʼe fai e te ʼu tēhina ʼo te Kolesi Pule. Neʼe fēnei tona kupu tāfito: “Ko Te Temi ʼAenī Ke Tou Nonofo ʼAlaʼala, Ke tou Nonofo Mālohi, Pea Mo Tou Tuputupu Mālohi.”—1 Kolonito 16:13.

ʼUluaki, neʼe palalau te Tēhina ko Stephen Lett ki te faʼahi ʼaenī: “Tou Nonofo ʼAlaʼala ʼi Te Hola Fakaʼosi ʼAenī.” Neʼe fakamahino e te Tēhina ko Lett, ko te moeʼi ʼo te sino ʼe ko he meʼa ʼofa. ʼE ina toe fakafoʼou totatou mālohi. Kae ko te moe fakalaumālie ʼe mole lelei ia ʼi he temi. (1 Tesalonika 5:6) Kae e feafeaʼi koa hatatou nonofo ʼalaʼala ʼi te faʼahi fakalaumālie? Neʼe faka maʼuhigaʼi e te Tēhina ko Lett te ʼu “faitoʼo” fakalaumālie e tolu: (1) Ke lahi tatatou gāue ʼi te ʼAliki. (1 Kolonito 15:58) (2) Ke tou mahino ki te ʼu meʼa fakalaumālie ʼaē ʼe ʼaoga kia tatou. (Mateo 5:3) (3) Ke tou tali te ʼu tokoni faka Tohi-Tapu ke tou agapoto ai.—Tāʼaga Lea 13:20.

Neʼe fai e te Tēhina ko Theodore Jaracz te akonaki maʼuhiga ko tona kupu tāfito: “Tou Tuʼu Mālohi ʼi Te ʼAhiʼahi.” ʼI tana toʼo ia Apokalipesi 3:10, neʼe fehuʼi fēnei e te Tēhina ko Jaracz: “Koteā koa ‘te hola ʼo te ʼahiʼahi’?” ʼE hoko mai te ʼahiʼahi ʼaia “i te aho o te Aliki,” ʼaenī ʼe tou lolotoga ai. (Apokalipesi 1:10) ʼE hoko te ʼahiʼahi ʼo ʼuhiga mo te fehuʼi maʼuhiga—peʼe tou kau koa ki te Puleʼaga ʼo te ʼAtua ʼaē kua fakatuʼu peʼe tou kau ki te tuʼu agakovi ʼo te ʼu faʼahiga meʼa ʼa Satana? ʼE hoko kia tatou te ʼu fihifihia pea mo te ʼu faigataʼaʼia, ʼo aʼu ki te fakaʼosi ʼo te hola ʼaia ʼe hoko ai te ʼahiʼahi. ʼE tou nonofo agatonu anai koa kia Sehova mo tana kautahi? Neʼe ʼui fēnei e te Tēhina ko Jaracz, ‘ ʼE tonu anai ke tou fakahā tatatou agatonu takitokotahi.’

Moʼo fakaʼosi, neʼe palalau leva te Tēhina ko John E. Barr ki te kupu tāfito ʼaenī: “Tou Tuputupu Mālohi ʼi Totatou ʼUhiga Tagata Fakalaumālie.” ʼI tana toʼo ia Luka 13:23-25, neʼe ina fakatokagaʼi ʼe tonu ke tou faigaʼi mālohi ke tou “hu i te matapa faa siʼi.” Tokolahi ʼe mole nātou lavaʼi anai koteʼuhi ʼe mole nātou faiga fakalelei ke nātou tuputupu mālohi. Ke tou liliu ko he ʼu Kilisitiano kua katoa totatou ʼuhigaʼi tagata, ʼe tonu ke tou ako ia te maʼuliʼi ʼo te ʼu pelesepeto faka Tohi-Tapu ʼi totatou maʼuli katoa. Neʼe fai e te Tēhina ko Barr te fakaloto mālohi ʼaenī: “ ʼE ʼau ʼiloʼi papau ʼe koutou ʼio anai mo ʼau ki te ʼui ʼaē ʼe ko te temi ʼaenī (1) ke tou fakamuʼamuʼa ia Sehova; (2) ke tou tuputupu mālohi; pea (3) ke tou uga ia tatou ki te fai ʼo te finegalo ʼo Sehova. ʼAki tatatou fai feiā, ʼe tou lava fakalaka anai ʼi te matapā fā siʼisiʼi ʼaē ʼe ina taki ki te maʼuli taulekaleka pea mo heʼegata.”

ʼI te vave fakaʼosi ʼo te fono, neʼe ʼi ai te tahi fehuʼi neʼe mole heʼeki tali kiai: Koteā te koga tohi ʼo te taʼu gāue 2002? Ko te fehuʼi ʼaia neʼe hoki tali ʼi te ʼaho ake.

Ko Te Tahi Fono

ʼI te ʼAhotapu uhu, neʼe lahi te ʼu meʼa neʼe fakatalitali kiai te hahaʼi ʼi te kamata ʼo te tahi fono. Neʼe kamata ʼaki te vakaʼi ʼo te alatike ako ʼo Te Tule Leʼo ʼo te vāhaʼa, pea neʼe hoa kiai te tala fakanounou ʼo te ʼu puani maʼuhiga ʼo te fono ʼaē ʼe fai ʼi te taʼu fuli. Neʼe fiafia fuli te hahaʼi ʼi tanatou logo ki te akonaki ʼaē neʼe fakatafito ki te koga tohi ʼo te taʼu 2002: “[Koutou] omai kia te au, . . . pea e au fakafimalieʼi anai koutou.” (Mateo 11:28) Ko te akonaki ʼaia neʼe fakatafito ki te ʼu alatike ako ʼo Te Tule Leʼo ʼo te ʼaho 15 ʼo Tesepeli 2001.

Hili ʼaia, pea ko nātou ʼaē neʼe nātou kau ki te ʼu Fakatahi makehe “Te Kau Faiako ʼo te Folafola ʼa te ʼAtua” ʼaē neʼe hoko ʼi Falani pea mo Italia ʼi te māhina ʼo ʼAukusito 2001, neʼe nātou fakahā tanatou manatu ʼo ʼuhiga mo te ʼu fakatahi ʼaia.c Pea ko te koga maʼuhiga ʼo te polokalama ʼo te ʼaho, neʼe ko te ʼu akonaki fakaʼosi ʼaē neʼe fai e te ʼu tagata faiakonaki mai te Petele ʼo Brooklyn.

Ko te ʼuluaki akonaki neʼe ko tona kupu tāfito: “Tou Falala Mālohi kia Sehova Lolotoga Te ʼu Temi Maʼuhiga ʼAenī.” Neʼe fakamatalatala e te tagata faiakonaki te ʼu puani maʼuhiga ʼaenī: (1) Ko te falala mālohi kia Sehova ʼe maʼuhiga tuʼumaʼu ki te hahaʼi ʼa te ʼAtua. ʼE maʼu ʼi te Tohi-Tapu te ʼu faʼifaʼitaki lahi ʼo nātou ʼaē neʼe nātou lotomālohi pea mo tui logola te fakafeagai. (Hepeleo 11:1–12:3) (2) ʼE foaki mai e Sehova te tupuʼaga mālohi ke tou falala katoa ai kia te ia. ʼE fakamoʼoni mai e te tana ʼu gāue pea mo tana Folafola ʼe tokaga ki tana ʼu kaugana, pea ʼe mole ina galoʼi anai ia nātou ʼi he temi. (Hepeleo 6:10) (3) ʼE ʼaoga tāfito te lotomālohi pea mo te falala ʼi te temi nei. Neʼe fakakikite e Sesu, ʼe tou liliu anai ko “he ʼu meʼa ʼe fehiʼaʼinaʼi.” (Mateo 24:9, MN ) Ke feala hatatou kātakiʼi, ʼe ʼaoga ke tou falala ki te Folafola ʼa te ʼAtua, ke tou falala ʼe nofo tona Laumālie mo tatou, pea ke tou lotomālohi ʼo haga kalagaʼi te logo lelei. (4) ʼE fakahā e te ʼu faʼifaʼitaki ʼe tou lolotoga tau nei mo te fakafeagai. Neʼe malave ʼaupito kia nātou fuli ʼaē neʼe kau ki te fakatahi, te fakamatala ʼa te tagata faiakonaki ʼo ʼuhiga mo te ʼu meʼa ʼaē ʼe kātakiʼi e totatou ʼu tēhina ʼi Arménie, ʼi Falani, ʼi Géorgie, ʼi Kazakhstan, ʼi Lusia, pea mo Turkménistan. Ei, ʼi te temi nei ʼe tonu ai ke tou lotomālohi pea mo falala kia Sehova!

Neʼe palalau te tagata faiakonaki fakaʼosi ki te kupu ʼaenī “Tou Haʼele Fakatahi Ki Muʼa Mo Te Kautahi ʼa Sehova.” Neʼe palalau te akonaki ki te ʼu puani ʼe ʼaoga lelei ki totatou temi. (1) ʼE fakatokagaʼi te haʼele ki muʼa ʼo te hahaʼi ʼa Sehova ʼi te malamanei katoa. Ko tatatou gāue fai faka mafola pea mo tatatou ʼu fakatahi lalahi ʼe tokagaʼi e te hahaʼi. (2) Neʼe fakatuʼu e Sehova te kautahi ʼe logo tahi. ʼI te taʼu 29 ʼo totatou temi, neʼe fakanofo ia Sesu e te laumālie maʼoniʼoni ke tokaga ki “te meafuape”—kia nātou ʼaē ka maʼuʼuli ʼi selo pea mo nātou ʼe nātou ʼamanaki ki he maʼuli ʼi te kele—ʼi te famili ʼa te ʼAtua ʼaē ʼe logo tahi. (Efeso 1:8-10) (3) Ko te ʼu fakatahi lalahi ʼe ko he fakahā ʼaia ʼo te logo tahi faka malamanei. Neʼe ʼiloga tāfito te koga ʼaia ʼi te ʼu fakatahi makehe ʼaē neʼe hoko ʼi Falani pea mo Italia ʼi te māhina ʼo ʼAukusito. (4) Neʼe fai te fakatotonu maʼuhiga ʼi Falani pea mo Italia. Neʼe fakahā e te tagata faiakonaki te ʼu koga ʼo te fakatotonu maʼuhiga ʼaia. ʼE tuʼu katoa te fakatotonu ʼaia ʼi lalo ifo.

ʼI te fakaʼosi ʼo te akonaki fakamuli, neʼe lau e te tagata fai akonaki ia te ʼu logo mai te Kolesi Pule. Neʼe ʼui fēnei ai: “Kua hoko mai te temi ke tou nonofo ʼalaʼala pea mo nofo tokaga, mo mahino kia tatou te fakaʼaluʼalu ʼo te ʼu meʼa ʼe hoko ʼi te malamanei. . . . ʼE fia fakahā atu te tuʼania ʼa te Kolesi Pule kia koutou pea mo te hahaʼi fuli ʼa te ʼAtua. ʼOfa pe ke ina tapuakina koutou ʼi takotou fai tona finegalo ʼaki tokotou loto katoa.” Kua fakatotonu e te hahaʼi ʼa Sehova ke nātou nonofo ʼalaʼala pea ke nātou haʼele mālohi ki muʼa ʼaki te kautahi ʼa Sehova ʼaē ʼe logo tahi.

[Kiʼi nota]

[Talanoa ʼo te pasina 29-31]

Te Fakatotonu

ʼI te māhina ʼo ʼAukusito 2001, neʼe fai te ʼu fakatahi lalahi makehe ʼi Falani pea mo Italia, pea koʼeni tona kupu tāfito “Te Kau Faiako ʼo Te Folafola ʼa Te ʼAtua.” ʼI te ʼu fakatahi ʼaia, neʼe tala ai te fakatotonu maʼuhiga. Koʼeni te fakatotonu ʼaē neʼe fai.

“ ʼI TOTATOU ʼuhiga kau Fakamoʼoni ʼa Sehova, ko tatou fuli ʼaenī ʼe kau ki te Fakatahi ‘Te Kau Faiako ʼo te Folafola ʼa te ʼAtua’ neʼe akoʼi tatou ki te ako ʼe ʼaoga ʼaupito. Kua tou ʼiloʼi lelei te haʼuʼaga ʼo te akonaki ʼaia. ʼE mole ko he akonaki fakatagata. ʼE haʼu mai ia Ia ʼaē ʼe ʼui e te polofeta ko Isaia ʼe ko tatatou ‘Faiakonaki Lahi.’ (Isaia 30:20) Koutou tokagaʼi te fakamanatu ʼaē ʼe tuʼu ia Isaia 48:17: ‘Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.’ ʼE ina fakahoko feafeaʼi te faʼahi ʼaia? ʼE ina fai tāfito ʼaki te tohi kua lahi ʼaupito tona fakaliliu mo tona tufa ʼi te malamanei, ia te Tohi-Tapu, ʼaē ʼe ʼui fakahagatonu ai: ‘Ko te Tohi-Tapu katoa ʼe haʼu mai te ʼAtua pea ʼe ʼaoga.’—2 Timoteo 3:16, MN.

“ ʼI te temi nei, kua ʼaoga ʼaupito te taʼi ako ʼaia ki te hahaʼi. Koteā tona tupuʼaga? Koteā ʼaē ʼe fakamoʼoni kiai te hahaʼi popoto mokā nātou tokagaʼi te ʼaluʼaga ʼo te malamanei, ʼaē ʼe fetogitogi tuʼumaʼu pea fakatupu lotolotolua? ʼE nātou fakamoʼoni ki te faʼahi ʼaenī: Logope neʼe fai ki te lauʼi miliona hahaʼi te faʼahiga ako ʼo te mālama, kae ʼe mole mahino te hahaʼi ki te ʼu meʼa ʼaē ʼe maʼuhiga ʼo te maʼuli, pea ʼe mole nātou popoto ʼi te fakakehekeheʼi te meʼa ʼaē ʼe lelei pea te meʼa ʼaē kovi. (Isaia 5:20, 21) ʼE kaugamālie ʼaupito ia nātou ʼe mole mālama ki te Tohi-Tapu. ʼAki te poto ʼa te tagata, ʼe tou maʼu te ʼu tuʼuga logo ʼaki te fakaʼaogaʼi ʼo te olotinatea, kae ʼe maʼu ʼifea te ʼu tali ki te ʼu faʼahiga fehuʼi maʼuhiga ohage ko te fehuʼi ʼaenī, Koteā te ʼuhiga ʼo te maʼuli? ʼE tou mahino feafeaʼi ki te ʼu meʼa ʼe hoko ʼi totatou temi? ʼE ʼi ai koa he ʼamanaki kua tukupau ʼo ʼuhiga mo te ka haʼu? ʼE liliu anai koa te tokalelei mo te maʼuli fīmālie ko he ʼu meʼa moʼoni ʼi he temi? Pea tahi ʼaē meʼa, ʼi te ʼu tānakiʼaga tohi ʼe maʼu ai te ʼu tuʼuga tohi maʼuhiga ʼe teitei palalau ki te ʼu gāue fuli ʼa te tagata. Logola te faʼahi ʼaia, kae ʼe toe fai pe e te tagata te ʼu hala neʼe kua ina fai ʼi te temi kua hili. Kua lēsili te fai fakapō. Ko te ʼu mahaki neʼe ʼui kua puli kua toe hā, pea ko ʼihi mahaki, ohage ko te Sita, kua fakamataku tona mafola. Kua tahi ʼalu te maʼuli faka famili. Kua maumau te nofoʼaga ʼa te tagata ʼuhi ko te ʼulihi ʼo te kele. ʼE mole feala ia ke fakatuʼu te tokalelei pea mo te maʼuli fīmālie, ʼuhi ko te ʼu fai fakapō fakamatakutaku pea mo te ʼu mahafu ʼaē ʼe nātou matehi he ʼu hahaʼi kaugamālie. Kua lahi ʼaupito te ʼu fihifihia ʼe mole ʼi ai he puleʼaki kiai. Koteā tatatou gāue moʼo tokoni ki ʼotatou tatau ʼi te ʼu temi maʼuhiga ʼaenī? ʼE ʼi ai koa he akonaki ʼe ina fakamahino te tupuʼaga ʼo te maʼuli mamahi ʼa te tagata, pea ʼe mole ina fakahā pe te ala ki he faʼahiga maʼuli lelei, kae ʼe ina toe fakahā foki mo te ʼamanaki taulekaleka pea mo tukupau ki te ka haʼu?

“Koʼeni te fakatotonu neʼe tuku mai kia tatou ke ‘tou ʼolo, pea mo tou fai ni ʼu tisipulo ʼi te hahaʼi ʼo te ʼu fenua fuli pe, ʼo akoʼi ia nātou ke nātou mulimuli ki te ʼu meʼa fuli pe ʼaē neʼe fakatotonu mai e Kilisito.’ (Mateo 28:19, 20) Neʼe ko te fakatotonu ʼaia mai ia Sesu Kilisito, ʼi tana ʼosi mate pea mo tona fakatuʼuake, ʼi te temi ʼaē neʼe kua tuku katoa age ki ai te pule ʼi te lagi pea mo te kele. Ko te gāue ʼaia ʼe maʼuhiga age ʼi te ʼu gāue fuli neʼe fakatuʼutuʼu e te tagata. ʼI te manatu ʼa te ʼAtua, ʼe tonu ke takimuʼa te fakatotonu mai ʼaia kia tatou, ʼaē ke fakamuʼamuʼa te ʼu meʼa fakalaumālie ʼaē ʼe ʼaoga kia nātou ʼe nātou holi ki te faitotonu. Koia ohage ko tona ʼui e te Tohi-Tapu, ʼe tonu ke tou fakahoko fakalelei te fekau ʼaia.

“ ʼE fakamaʼua ai kia tatou ke takimuʼa te gāue ʼaia ʼi totatou maʼuli. ʼAki te tapuakina pea mo te tokoni ʼa te ʼAtua, ʼe fakahoko anai te gāue ʼaia, tatau aipe peʼe lahi he ʼu meʼa ʼe nātou fakalelu ki tatatou gāue, peʼe ko he ʼu fihifihia, peʼe ko he ʼu fakafeagai faka lotu peʼe faka politike, neʼe fakatuʼutuʼu moʼo tāʼofi te tuputupu ʼo te polokalama ako faka malamanei ʼaia. ʼE tou falala pea mo tou tui ʼe haga hoko atu anai te tuputupu ʼo te gāue ʼaia ʼo kaku ki tona gataʼaga. He koʼe ʼe feala ke tou tui papau ki te faʼahi ʼaia? Koteʼuhi neʼe fakapapau mai e te ʼAliki ko Sesu Kilisito, ʼe lagolago anai kia tatou ʼi te minisitelio ʼaē neʼe foaki mai e te ʼAtua, ʼo aʼu ki te fakaʼosi ʼo te tuʼu ʼo te ʼu faʼahiga meʼa ʼaenī.

“Kua fakaōvi mai te hola fakaʼosi ʼo te mālama maʼuli mamahi ʼaenī. ʼE tonu ke tou fakahoko te fakatotonu ʼaē neʼe fai mai kia tatou ʼi muʼa ʼo te hoko mai ʼo te fakaʼosi. Koia, ʼi totatou ʼuhiga kau Fakamoʼoni ʼa Sehova, ʼe tou fai te fakatotonu ʼaenī:

“ ʼUluaki: ʼI totatou ʼuhiga kau minisi kua tou foaki ia tatou ki te ʼAtua, ʼe tou fakatotonu ke tou haga fakamuʼamuʼa te ʼu meʼa ʼo te Puleʼaga ʼi totatou maʼuli pea mo tou haga tuputupu ʼi te faʼahi fakalaumālie. Koia, ʼe ʼalutahi tatatou ʼu faikole mo te ʼu palalau ia Pesalemo 143:10: ‘Akoʼi ʼau ke ʼau fai tou finegalo, heʼe ko koe toku ʼAtua.’ ʼE tonu ai ke tou ako fakalelei, ke tou faigaʼi ke tou lau te Tohi-Tapu ʼi te ʼaho fuli, ke tou fai he ako takitokotahi pea mo he ʼu kumi. Ke hā tatatou tuputupu ki te hahaʼi fuli, ʼe tou faigaʼi fakapotopoto anai ke tou teuteu pea ke ʼaoga katoa kia tatou te ako faka teokalatike ʼe maʼu ʼi te ʼu fono ʼo te kokelekasio, mo te ʼu fakatahi faka silikosikilipisio, mo te ʼu fakatahi faka tisitilike pea mo te ʼu fakatahi faka malamanei.—1 Timoteo 4:15; Hepeleo 10:23-25.

“Lua: Ke akoʼi tatou e te ʼAtua, ʼe tou kakai pe anai ʼi tona laupapa pea mo tou fakalogo fakalelei ki te fakatokaga faka Tohi-Tapu ʼo ʼuhiga mo te ʼu akonaki kākā ʼa te kau temonio. (1 Kolonito 10:21; 1 Timoteo 4:1) ʼE tou tokakaga anai ke tou fakamamaʼo mai te ʼu meʼa fakatupu tuʼutāmaki ʼe kau ai te ʼu akonaki faka lotu hala, mo te ʼu fakakaukau vaʼiganoa, mo te ʼu aga fakalialia pea mo fakaufiufi, mo te ʼu paki ʼo te ʼu felāveʼi fakasino fakalialia, mo te ʼu fakafiafia heʼemaʼa, pea mo te ʼu meʼa fuli ʼe mole ‘ ʼalutahi mo te akonaki ʼo te maʼuli.’ (Loma 1:26, 27; 1 Kolonito 3:20; 1 Timoteo 6:3; 2 Timoteo 1:13, MN ) Moʼo fakahā tatatou tokagaʼi ‘te ʼu meʼa ʼofa ko he ʼu tagata,’ ʼaē ʼe nātou maʼu te ʼu kalitate moʼo akoʼi te meʼa ʼaē ʼe haohaoa, ʼe tou fakaʼapaʼapa fakamalotoloto anai ki tanatou ʼu faiga pea mo tou gāue fakatahi mo nātou ʼaki totatou loto katoa ki te taupau ʼo te lekula ʼo te Folafola ʼa te ʼAtua ʼo ʼuhiga mo te agamaʼa, mo te aga faitotonu ʼaē ʼe tonu ke fai, mo te ʼu lekula fakalaumālie.—Efeso 4:7, 8, 11, 12; 1 Tesalonika 5:12, 13; Tito 1:9, MN.

“Tolu: ʼI totatou ʼuhiga mātuʼa Kilisitiano, ʼe tou faigaʼi anai ʼi totatou loto katoa ke tou akoʼi tatatou ʼu fānau, mole gata pe ʼi te ʼu palalau kae tou toe tuku foki mo he faʼifaʼitaki ʼi tatatou aga. Ko te koga ʼe tou tokakaga ʼuluaki anai kiai, ʼe ko te tokoniʼi ʼo nātou talu mai tanatou kei veliveli, ke nātou ‘ako te ʼu tohi taputapu, ʼaē ʼe feala ke nātou fakaliliu ia nātou ʼo popoto ki te fakamaʼuli.’ (2 Timoteo 3:15, MN ) ʼE tou manatuʼi anai ʼe ko te akoʼi ʼo nātou ki te akonaki pea mo te fakatokaga ʼa Sehova, ʼaē ka ina faka fealagia anai ke hoko kia nātou te fakapapau fakaʼatua ʼaē ‘ke fua lelei kia nātou pea ke nātou maʼuʼuli fualoa ʼi te kele.’—Efeso 6:1-4, MN.

“Fā: Ka tou tuʼania ki he ʼu faʼahiga meʼa peʼe tou felāveʼi mo he ʼu fihifihia faigataʼa, ʼe tonu muʼa ke tou ‘fakahā tatatou ʼu kole ki te ʼAtua,’ ke tou ʼiloʼi papau ai ʼe hāofaki anai tatou e ‘te tokalelei ʼa te ʼAtua ʼaē ʼe fakalaka ʼi te manatu fakatagata fuli pe.’ (Filipe 4:6, 7) ʼE tou maʼu anai he fīmālie mo kapau ʼe tou toʼo te ʼakau toho ʼa Kilisito. ʼE tou ʼiloʼi ʼe tokaga mai te ʼAtua kia tatou, koia ʼe mole tou fakameʼameʼa anai tatatou tuku age kia te ia te ʼu meʼa ʼaē ʼe tou hoha kiai.—Mateo 11:28-30; 1 Petelo 5:6, 7.

“Nima: ʼI tatatou fia fakahā totatou loto fakafetaʼi kia Sehova ki te pilivilesio ʼaē ko tatatou liliu ko he kau faiako ʼo tana Folafola, ʼe tou toe faiga anai ke tou ‘fakaʼaogaʼi lelei tana folafola ʼo te moʼoni,’ pea ke tou ‘fakahoko katoa tatatou minisitelio.’ (2 Timoteo 2:15; 4:5) ʼI tatatou mahino ki te ʼu koga ʼe pipiki kiai, ʼe tou faiga fakamalotoloto anai ke tou kumi ia nātou ʼe tāu mo te koga ʼaia, pea ke tou tokakaga ki te pulapula ʼaē neʼe to. Pea tahi ʼaē meʼa, ʼe tou hikihiki anai te lelei ʼo tatatou ʼu faʼahiga fai ʼo te ʼu ako faka Tohi-Tapu. Ko te faʼahi ʼaia ʼe ina taki anai tatou ke tou mulimuli ki te finegalo ʼo te ʼAtua ʼaē ‘ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.’—1 Timoteo 2:3, 4, MN.

“Ono: Lolotoga te sēkulō kua hili ʼo aʼu mai ki te temi nei, neʼe tau te kau Fakamoʼoni ʼa Sehova mo te ʼu fakafeagai pea mo te ʼu fakataga. Kae neʼe fakahā tuʼumaʼu e Sehova tana lagolago kia tatou. (Loma 8:31) ʼE fakamoʼoni mai kia tatou e tana Folafola ʼaē ʼe mole hala, ‘ko te mahafu fuape ʼe faʼu’ moʼo tāʼofi tatou, moʼo fakamāmālie peʼe fakagata tatatou gāue fai faka mafola ʼo te Puleʼaga, ʼe mole lava anai. (Isaia 54:17) Peʼe tou nonofo ʼi te temi faigamālie peʼe ko he temi fihifihia, ʼe mole tuku anai tatatou palalau ki te moʼoni. Kua tou fakatotonu ke tou foimo fakahoko tatatou fai faka mafola pea mo tatatou faiako. (2 Timoteo 4:1, 2) ʼE tou fakatuʼutuʼu ke mālohi tatatou fakahā ia te logo lelei ʼo te Puleʼaga ʼo te ʼAtua ki te hahaʼi fuli pe. Koia ʼe nātou haga maʼu anai te faigamālie ke nātou ako te fakatuʼutuʼu ʼo ʼuhiga mo te maʼuli heʼegata ʼi he mālama foʼou faitotonu. ʼI totatou ʼuhiga kau faiako logo tahi ʼo te Folafola ʼa te ʼAtua, ʼe tou faigaʼi anai ke tou haga muliʼi te faʼifaʼitaki ʼo te Faiako Lahi, ia Sesu Kilisito pea ke ʼiloga ia tatou tana ʼu kalitate fakaʼatua. Ko te ʼu koga fuli ʼaia, ʼe tou fai anai moʼo faka maʼuhigaʼi pea mo fakavikiviki ki tatatou Tagata Faiakonaki Lahi pea mo te Matapuna ʼo te Maʼuli, ia Sehova ʼAtua.

“Ko koutou fuli ʼaē ʼe kau ki te fakatahi lahi ʼaenī, kapau ʼe koutou fia taupau te fakatotonu ʼaenī, ke koutou ʼIO kiai!”

ʼI te fai ʼo te fehuʼi fakaʼosi ki te toko 160 000 ʼaē neʼe fakatahi ʼi te ʼu fakatahi e tolu neʼe hoko ʼi Falani pea mo te toko 289 000 ʼi te ʼu koga meʼa e hiva ʼi Italia, ko he “ ʼIo” leʼo lahi neʼe fai ʼi te ʼu lea kehekehe e nātou ʼaē neʼe kau ki te ʼu fakatahi ʼaia.