Ko He Hahaʼi Kua Fakamaʼa Ki He ʼu Gāue Lelei

“Tou fakamaa ia tatou mai te u otaota fuape o te kakano mo te laumalie, pea tou fakakatoa totatou fakamooni i te teki o te Atua.”—2 Kolonito 7:1.

1. Koteā ʼaē ʼe fakamaʼua e Sehova kia nātou ʼe nātou tauhi kia te ia?

“KO AI anai ʼe feala ke hake ki te moʼuga ʼo Sehova, pea mo feala ke tuʼu anai ʼi tona nofoʼaga maʼoniʼoni?” Neʼe lagaʼi te fehuʼi maʼuhiga ʼaia e Tavite, te Hau ʼo te Iselaele ʼāfea, ʼo ʼuhiga mo te tauhi ʼaē ʼe lelei kia Sehova. Pea neʼe ina tali kiai: “Ko ʼaē ʼe maʼa tona ʼu nima pea mo tona loto, ʼaē neʼe mole meʼa noaʼi Toku nefesi, pea neʼe mole ina fai he fakamoʼoni loi.” (Pesalemo 24:3, 4) Ke leleiʼia tatou e Sehova, ia ia ʼaē ʼe ina fakatātā lelei te maʼoniʼoni, ʼe tonu ke tou maʼa pea mo maʼoniʼoni. ʼI muʼa atu, ko Sehova neʼe ina fakamanatuʼi fēnei age ki te kokelekasio ʼo Iselaele: “ ʼE tonu ke koutou fakamaʼoniʼoniʼi koutou pea mo koutou fakahā ʼe koutou maʼoniʼoni, koteʼuhi ʼe ʼau maʼoniʼoni.”—Levitike 11:44, 45; 19:2.

2. Neʼe fakahā lelei feafeaʼi e Paulo pea mo Sakopo te maʼuhiga ʼaē ke tou maʼa ʼi te tauhi moʼoni?

² ʼI he ʼu sēkulō ki muli age, neʼe faitohi fēnei te ʼapositolo ko Paulo ki te kau Kilisitiano ʼi te kolo māmio kovi ʼo Kolonito: “Koteuhi e tou mau te u fakapapau aeni, u ofaina, tou fakamaa ia tatou mai te u otaota fuape o te kakano mo te laumalie, pea tou fakakatoa totatou fakamooni i te teki o te Atua.” (2 Kolonito 7:1) ʼE toe ʼasi mai ʼi te vaega ʼaia, ka tou fia felogoi lelei mo te ʼAtua pea mo maʼu te ʼu tapuakina ʼaē neʼe ina fakapapauʼi mai, ʼe tonu ke tou maʼa pea mo heʼe mele ʼi te faʼahi fakasino, pea mo te faʼahi fakalaumālie. Pea ʼi tana faitohi ʼo ʼuhiga mo te tauhi ʼaē ʼe leleiʼia e te ʼAtua, neʼe ʼui fēnei e te tisipulo ko Sakopo: “Ko te lotu ʼaē ʼe maʼa pea mo heʼe mele ia muʼa ʼo totatou ʼAtua pea mo Tāmai, ʼe ko ia ʼaenī: ko te taupau ʼo te fānau ʼaē ʼe hala mo tāmai pea mo faʼe, pea mo te ʼu fafine vitua ʼi tonatou ʼu mamahi, pea ke ʼaua naʼa ʼulihi tatou e te malamanei.”—Sakopo 1:27, MN.

3. Ke leleiʼia tatatou tauhi e te ʼAtua, koteā ʼaē ʼe tonu ke tou mulimuli fakalelei kiai?

³ Kapau ʼi te tauhi moʼoni ʼe maʼuhiga ke tou maʼa, mo maʼoniʼoni, pea mo heʼe mele, pea ko te hahaʼi ʼaē ʼe nātou fia maʼu te ʼofa ʼo te ʼAtua, ʼe tonu anai ke nātou mulimuli fakalelei ki te ʼu fakatuʼutuʼu ʼaia. Koteʼuhi ia ʼaho nei ko te ʼu lekula pea mo te ʼu fakatuʼutuʼu ʼa te hahaʼi ʼe kehekehe ʼo ʼuhiga mo te aga maʼa, koia ʼe tonu ai kia tatou ke tou mahino pea mo mulimuli ki te ʼu meʼa ʼaē ʼe maʼa pea mo leleiʼia e Sehova. ʼE tonu ke tou ʼiloʼi pe koteā ʼaē ʼe fakamaʼua e te ʼAtua ki tana kau atolasio ʼo ʼuhiga mo te faʼahi ʼaia, pea mo te meʼa ʼaē neʼe ina fai moʼo tokoni kia nātou ke nātou maʼa pea mo taupau tonatou maʼa ʼaia, ke tali nātou e te ʼAtua.—Pesalemo 119:9; Taniela 12:10.

Ke Tou Maʼa Ki Te Tauhi Moʼoni

4. Koutou fakamatala te akonaki faka Tohi-Tapu ʼo ʼuhiga mo te aga maʼa.

⁴ Maʼa te tokolahi, ko te aga maʼa ʼe ko hakita fakamaʼa he neʼe tou ʼuli pe neʼe tou pikisia ʼi he mahaki. Kae ʼi te Tohi-Tapu, ʼe lahi te ʼu kupu faka Hepeleo pea mo faka Keleka moʼo fakamahino te aga maʼa, pea ʼe mole faka ʼuhiga pe ke tou maʼa ʼi te faʼahi fakasino, kae ʼi te agamāhani ʼe toe fakapipiki kiai te maʼa ʼi te faʼahi fakalaumālie pea mo te aga ʼaē ʼe tonu ke fai. Koia, ʼe ʼui fēnei e te tohi faka Tohi-Tapu: “ ʼE tahitahiga te fakapikipiki ʼo te ʼu kupu ‘aga maʼa’ pea mo te ‘heʼe maʼa’ ki te ʼu meʼa fakasino, kae ʼe fakapipiki tāfito ki te ʼu meʼa faka lotu. ʼI henī, ko te ‘aga maʼa’ ʼe malave ki te ʼu faʼahi fuli ʼo te maʼuli.”

5. Neʼe feafeaʼi te takitaki e te Lao ʼa Moisese te aga maʼa ʼi te maʼuli ʼo te kau Iselaele?

⁵ ʼI te Lao ʼa Moisese neʼe ʼi ai te ʼu lekula pea mo te ʼu fakatotonu ʼaoga ki te ʼu potu fuli ʼo te maʼuli ʼo te kau Iselaele, ʼe ʼasi lelei ai pe koteā ʼaē ʼe maʼa pea mo leleiʼia e te ʼAtua, pea mo te meʼa ʼaē ʼe heʼe maʼa. Ohage la, ia Levitike kapite 11 ki te 15, ʼe tou lau ai te ʼu fakatotonu kehekehe ʼo ʼuhiga mo te aga maʼa pea mo te aga heʼe maʼa. Ko ʼihi manu neʼe heʼe maʼa, pea neʼe mole tonu ke kai e te kau Iselaele. Ko he fafine neʼe fānau neʼe heʼe maʼa lolotoga he kiʼi temi. Ko te tahi ʼu mahaki ʼo te kili, tāfito la ia te kilia, pea mo te ʼu mahaki fakatagata pea mo faka fafine, neʼe fakatupu heʼe maʼa. Neʼe toe fakahā e te Lao te meʼa ʼaē ʼe tonu ke fai ʼi te ʼu ʼaluʼaga heʼe maʼa ʼaia. Ohage la, ia Faka au 5:2, ʼe tou lau fēnei: “Fakatotonu ki te ʼu foha ʼo Iselaele ke nātou fakamavae ʼi te nofoʼaga te kau kilia fuli, mo te hahaʼi fuli ʼe maligi he meʼa ia nātou, pea mo te hahaʼi fuli neʼe heʼe maʼa ʼuhi ko he nefesi mate.”

6. He koʼe neʼe fai te ʼu lao ʼo ʼuhiga mo te aga maʼa?

⁶ ʼE mahino ia, ko te ʼu lao ʼaia pea mo ʼihi lao mai ia Sehova neʼe ko he ʼu faitoʼo lelei ki te sino kae neʼe heʼeki nātou mahino kiai ʼi tonatou temi, pea neʼe fua lelei ki te maʼuli ʼo te hahaʼi ʼi tanatou muliʼi ia te ʼu lao ʼaia. Kae neʼe mole foaki te ʼu lao ʼaia ʼuhi pe ke nātou hāo mai te ʼu mahaki peʼe ko he faitoʼo pe maʼa nātou. Ko te ʼu lao ʼaia neʼe pipiki ki te tauhi moʼoni. Ko te ʼu lao ʼaia neʼe nātou takitaki te maʼuli ʼo te hahaʼi ʼi te ʼaho fuli—ohage ko tanatou kakai, tanatou faifānau, mo tanatou ʼu felogoi faka taumatuʼa—neʼe fakahā ʼaki ai ʼe ko Sehova tonatou ʼAtua, pea neʼe ko ia ʼaē neʼe tonu ke ina fakafuafua maʼa nātou te ʼu meʼa ʼaē ʼe totonu peʼe mole totonu ʼi te ʼu potu fuli ʼo tonatou maʼuli, he neʼe nātou foaki tonatou maʼuli katoa maʼa Sehova.—Teutalonome 7:6; Pesalemo 135:4.

7. Kapau neʼe nātou muliʼi te Lao, koteā te tapuakina neʼe lava maʼu e te puleʼaga ʼo Iselaele?

⁷ Neʼe toe puipui e te fuakava ʼo te Lao te kau Iselaele mai te ʼu aga heʼeʼaoga ʼo te ʼu puleʼaga ʼi ʼonatou ʼu tafaʼaki. Kapau neʼe nātou fakalogo fakalelei ki te Lao, mo te ʼu lekula fuli ʼaē ke nātou maʼa ia mata ʼo Sehova, pea neʼe tau mo feʼauga mo te kau Iselaele ke nātou kaugana ki tonatou ʼAtua pea mo maʼu tona ʼofa. Ki te faʼahi ʼaia, neʼe ʼui fēnei e Sehova ki te puleʼaga: “Kapau ʼe koutou fakalogo lelei ki toku leʼo pea mo koutou taupau fakalelei taku fuakava, pea ʼe koutou liliu moʼoni anai ko toku koloā makehe ʼi te lotolotoiga ʼo te ʼu hahaʼi fuli, heʼe ʼaʼaku te kele katoa. Pea ko koutou, ʼe koutou liliu anai maʼaku ko he puleʼaga faka pelepitelo pea ko te puleʼaga maʼoniʼoni.”—Ekesote 19:5, 6; Teutalonome 26:19.

8. He koʼe ʼe tonu ki te kau Kilisitiano ia ʼaho nei ke nātou tokagaʼi te meʼa ʼaē neʼe ʼui ʼi te Lao ʼo ʼuhiga mo te aga maʼa?

⁸ Kapau ko Sehova neʼe ina foaki he ʼu fakatotonu feiā ʼi te Lao moʼo akoʼi te kau Iselaele ke nātou maʼa, mo maʼoniʼoni, pea mo ina leleiʼia nātou, ʼe mole tonu koa la ke toe feiā ki te kau Kilisitiano ia ʼaho nei, ke nātou vakavakaʼi fakalelei peʼe feafeaʼi tanatou fakahoko te ʼu fakamaʼua ʼaia? Logola ʼe mole kei fakalogo te kau Kilisitiano ki te Lao, kae ʼaua naʼa galo ia nātou te faʼahi ʼaia, ohage ko tona ʼui e Paulo, ko meʼa fuli ʼi te Lao neʼe “ko he malumalu o te u mea kahau, kae ko te mooni e ʼa Kilisito.” (Kolose 2:17; Hepeleo 10:1) Kapau ko Sehova ʼAtua ʼaē ʼe ina ʼui “ ʼe mole heʼeki ʼau fetogi,” neʼe ina faka ʼuhiga te aga maʼa pea mo te heʼe mele ʼe ko he faʼahi maʼuhiga ʼo te tauhi moʼoni ʼi te temi ʼaia, pea ʼe tonu ia ʼaho nei ke tou tokaga fakalelei ki te aga maʼa ʼi te faʼahi fakasino, ʼi te ʼu aga ʼaē ʼe tonu ke fai, pea mo te faʼahi fakalaumālie, mo kapau ʼe tou fia maʼu tona ʼofa pea mo tana tapuakina.—Malakia 3:6; Loma 15:4; 1 Kolonito 10:11, 31.

ʼE Tou Fakahā Tatatou Aga Maʼa ʼi Te Faʼahi Fakasino

9, 10. (a) He koʼe ʼe maʼuhiga te maʼa fakasino ki he Kilisitiano? (b) Koteā te ʼu palalau ʼe tau fai ʼo ʼuhiga mo te ʼu fakatahi ʼa te kau Fakamoʼoni ʼa Sehova?

⁹ ʼE kei maʼuhiga koa te maʼa fakasino ʼi te tauhi moʼoni? Logola ko te maʼa fakasino ʼe mole feʼauga ke ʼui ko he tahi ʼe atolasio moʼoni ki te ʼAtua, kae ʼe tonu ke maʼa mo kapau ʼe feala te faʼahi ʼaia. Tāfito la ia ʼaho nei kua tokolahi te hahaʼi ʼe mole nātou tokaga ke maʼa tonatou ʼu mutuʼi meʼa, peʼe ko tonatou ʼapi, kae ʼi te agamāhani ʼe tokagaʼi e te hahaʼi ia nātou ʼaē ʼe nātou aga maʼa. ʼE lava maʼu ai te ʼu fua lelei, ohage ko tona ʼui e Paulo ki te kau Kilisitiano ʼo Kolonito: “ ʼE mole mātou fai he meʼa ke fakatupu higa ki he tahi, ke ʼaua naʼa fatufatuʼi tamatou minisitelio. Kae ʼi te meʼa fuape, ʼe mātou fakahā ko mātou ko te ʼu minisi ʼo te ʼAtua.”—2 Kolonito 6:3, 4, MN.

¹⁰ Neʼe tuʼa lahi te vikiʼi ʼo te kau Fakamoʼoni ʼa Sehova e te hahaʼi ʼo te puleʼaga ʼo ʼuhiga mo tanatou aga maʼa, mo tanatou aga fakatokatoka, pea mo tanatou faiteuteu, ʼaē ʼe fakatokagaʼi tāfito ʼi tanatou ʼu fakatahi lalahi. Ohage la, ʼi te fakatahi neʼe fai ʼi te palokia ʼo Savona, ʼi Italia, neʼe ʼui fēnei e te sulunale La Stampa: “Ko te meʼa ʼaē ʼe fakatokagaʼi tāfito e he tahi mokā ʼalu ki te ʼu fakatahi ʼaia, ko te hahaʼi ʼaē ʼe kau ai ʼe nātou aga maʼa pea mo fakatokatoka.” ʼI te ʼosi ʼo te fakatahi ʼa te kau Fakamoʼoni ʼa Sehova ʼi São Paulo, ʼi Pelesile, neʼe ʼui fēnei e te tagata pule ʼo te malaʼe ki te tagata ʼaē ʼe ina takitaki te kau gāue ʼo te fakamaʼa: “ ʼI te temi nei ʼe tou fakamaʼa anai ohage ko tona fai e te kau Fakamoʼoni ʼa Sehova.” Ko te tahi tagata pule ʼo te malaʼe pe ʼaia, neʼe ina ʼui fēnei: “Ka fakaʼui mai e te kau Fakamoʼoni ʼa Sehova ke nātou lue te malaʼe faigaoʼi, ʼe mātou tuʼaniaʼi pe te ʼu ʼaho ʼaē ke ava ai te malaʼe, ke nātou fai tanatou fakatahi. Kae ʼe mole he tahi age meʼa ʼe mātou tuʼaniaʼi.”

11, 12. (a) Koteā te ʼu pelesepeto faka Tohi-Tapu ʼe tonu ke tou manatuʼi ʼo ʼuhiga mo tatatou aga maʼa takitokotahi? (b) Koteā te ʼu fehuʼi ʼe tou lava fai ʼo ʼuhiga mo tatatou ʼu fai teuteu pea mo totatou faʼahiga maʼuli?

¹¹ Kapau ʼe vikiʼi te ʼAtua ʼaē ʼe tou tauhi ki ai ʼuhi ko tatatou aga maʼa pea mo tatatou aga fakaʼapaʼapa ʼi totatou ʼu koga meʼa fakatahi, ʼe mahino papau ia ʼe toe maʼuhiga ke tou fakahā te ʼu kalitate ʼaia ʼi totatou maʼuli takitokotahi. Kae ʼi totatou loto fale, lagi ʼe tou faʼifaʼitaliha anai pea mo fai te meʼa ʼaē ʼe tou loto kiai. Pea ʼo ʼuhiga mo tatatou faʼahiga teuteu, ʼe lagi ʼe tou filifili anai te ʼu meʼa ʼaē ʼe tou leleiʼia pea mo matalelei ai! Logola te ʼāteaina ʼaia kae ʼe ʼi ai tona ʼu tuʼakoi. Koutou manatuʼi te fakatokaga neʼe fai e Paulo ki tona ʼu kaugā fagona Kilisitiano ʼo ʼuhiga mo te ʼu meʼa ʼaē ʼe nātou kai: “Koutou tokaga naʼa liliu toutou ateaina ko he higaʼaga kia natou e vaivai.” Pea neʼe ina tala te pelesepeto maʼuhiga ʼaenī: “E gafua te mea fuli, kae ko mea fuli e mole aoga; e gafua te mea fuli, kae e mole laga e te mea fuli.” (1 Kolonito 8:9; 10:23) Koteā totatou pikipikiga mo te tokoni ʼaenī ʼa Paulo ʼo ʼuhiga mo te aga maʼa?

¹² ʼE ʼamanaki te hahaʼi ʼe ko he minisi ʼa te ʼAtua, ʼe aga maʼa pea mo fakatokatoka ʼi tona maʼuli. Koia ʼe tonu ai ke tou tokaga naʼa laukovi he tahi ki totatou ʼuhiga minisi ʼo te Folafola ʼa te ʼAtua ʼuhi ko te mole maʼa ʼo totatou ʼapi pea mo totatou malaʼe. Koteā te ʼu meʼa ʼaē ʼe lau e te hahaʼi ʼo ʼuhiga mo tatou pea mo tatatou lotu, mokā nātou sio ki totatou ʼapi? ʼE sio koa te hahaʼi ʼe tou holi mālohi ki he mālama foʼou faitotonu ʼe maʼa pea mo fakatokatoka? (2 Petelo 3:13) ʼO toe feiā mo tatou totonu—peʼe tou mālōlō peʼe tou ʼi te minisitelio—ʼe feala pe ʼi te ʼu temi ʼaia ke tou hikihiki peʼe tou fakasiʼisiʼi te lelei ʼo te logo ʼaē ʼe tou faka mafola. Ohage la, tou fakatokagaʼi te fakamatala neʼe fai ʼi te nusipepa ʼi Mekesike: “ ʼIo ʼe lahi ʼaupito te kau tūpulaga ʼi te kau Fakamoʼoni ʼa Sehova, pea ko te meʼa ʼaē ʼe tou fakatokagaʼi ko te kosi ʼo tonatou lauʼulu, mo tanatou aga maʼa, pea mo tanatou teuteu lelei.” ʼI meʼa fakafiafia hatatou maʼu he ʼu tūpulaga feiā ia tatou!

13. Koteā te meʼa ʼe tou lava fai ke tou ʼiloʼi papau peʼe maʼa pea mo fakatokatoka te ʼu potu fuli ʼo totatou maʼuli ʼi te ʼaho fuli?

¹³ ʼE moʼoni, ʼe faigafua tatatou ʼui ke tou tokaga ki tatatou faiteuteu, mo tatatou ʼu meʼa, pea mo totatou ʼapi, kae ʼe faigataʼa tona fai. Ko te meʼa ʼaē ʼe ʼaoga kiai, ʼe mole ko he ʼu tuʼuga meʼa peʼe ko he ʼu masini faigataʼa pea mo totogi kovi, kae ko he polokalama lelei pea ʼe fai tuʼumaʼu. ʼE tonu ke tou tuku he temi moʼo fakamaʼa totatou sino, totatou ʼu mutuʼi meʼa, totatou ʼapi, tatatou motokā pea mo te tahi age ʼu meʼa. Ko tatatou maʼumaʼua ʼi te minisitelio, mo kau ki te ʼu fono, pea mo fai tatatou ako takitokotahi—ʼo toe feiā pe ki ʼihi ʼu maʼua ʼo totatou maʼuli ʼi te ʼaho fuli—ʼe mole ko he ʼu takuʼaki ʼaia ke mole tou maʼa pea mo fai te meʼa ʼaē ʼe lelei kia mata ʼo te ʼAtua pea mo te tagata. Ko te pelesepeto ʼiloa ʼaē ʼe ina ʼui “kia meʼa fuli ʼe ʼi ai tona temi kua fakakatofa,” ʼe toe ʼaoga ki te faʼahi ʼaia ʼo totatou maʼuli.—Tagata Tānaki 3:1.

Ko He Loto ʼe Maʼa

14. He koʼe ʼe feala ke tou ʼui ʼe maʼuhiga age tatatou maʼa ʼi te aga ʼaē ʼe tonu ke fai pea mo te faʼahi fakalaumālie ʼi tatatou maʼa fakasino?

¹⁴ Ohage pe ko te maʼuhiga ʼaē ke tou maʼa ʼi te faʼahi fakasino, ʼe toe maʼuhiga age ke tou tokaga ki tatatou maʼa ʼi te ʼu aga ʼaē ʼe tou fai pea mo te faʼahi fakalaumālie. Kua mahino kia tatou, ko te puleʼaga ʼo Iselaele neʼe līaki e Sehova koteʼuhi neʼe ʼuli ʼi te ʼu aga ʼaē neʼe ina fai pea mo te faʼahi fakalaumālie, kae neʼe mole līaki nātou he neʼe nātou uli ʼi te faʼahi fakasino. ʼAki te polofeta ko Isaia, neʼe ʼui age e Sehova, ʼuhi ko nātou ko te “puleʼaga agahala, ko te hahaʼi kua mafasia ʼi te agakovi,” ko tanatou ʼu sakilifisio, mo tanatou ʼu toʼotoʼoga ʼo te māhina foʼou, pea mo te sapato, ei, tatau aipe mo tanatou ʼu faikole kua liliu ʼo mamafa kia te ia. Koteā ʼaē neʼe tonu ke nātou fai ke nātou toe maʼu te ʼofa ʼo te ʼAtua? Neʼe ʼui fēnei e Sehova: “Koutou fufulu ia koutou; koutou fakamaʼa ia koutou; koutou līaki ʼi ʼoku muʼa te agakovi ʼo takotou ʼu aga; koutou tuku te fai ʼo te meʼa ʼaē ʼe kovi.”—Isaia 1:4, 11-16.

15, 16. Koteā ʼaē neʼe ʼui e Sesu ʼe ina ʼulihi te tagata, pea koteā te ako ʼe tou maʼu mai te ʼu palalau ʼaia ʼa Sesu?

¹⁵ Ke lahi age tatatou mahino ki te maʼa ʼi te faʼahi ʼo te aga ke fai pea mo te faʼahi fakalaumālie, tou tokagaʼi te meʼa ʼaē neʼe ʼui e Sesu ki te kau Faliseo pea mo te kau sekelipa ʼi tanatou ʼui ʼaē ʼe heʼe maʼa tana kau tisipulo he neʼe mole nātou fufulu tonatou ʼu nima ʼi muʼa ʼo tanatou kai. Neʼe fakatonutonuʼi nātou e Sesu, ʼo ʼui maʼana: “E mole ko te mea e hu i te gutu e ina ulihi te tagata, kae ko te mea ae e mavae ki tuà mai te gutu, ko te mea aia e ina fakaʼulihi.” Pea toe fakamahino age e Sesu: “Ko mea e mavae mai te gutu e haù ia mai te loto, pea ko mea aia e ina ulihi te tagata. Koteuhi e mavae mai te loto: te u fakakaukau kovi, te u fakapo, te u tono, te u folonikasio, te u kaihaa, te u fakamooni lohi mo te u fasituu. Koena ia mea e uli ai te tagata; kae e mole uli te tagata i te kai kae heeki mo fanofano ia.”—Mateo 15:11, 18-20.

¹⁶ Koteā te ako ʼe tou maʼu mai te ʼu palalau ʼa Sesu? Neʼe fakahā e Sesu ko te ʼu gāue agakovi, mo heʼeʼaoga, pea mo heʼe maʼa ʼe haʼu mai te ʼu holi ʼo he loto ʼe agakovi, ʼe holi ki he ʼu aga heʼeʼaoga pea mo heʼe maʼa. Ohage ko te ʼui ʼa te tisipulo ko Sakopo: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tona holi.” (Sakopo 1:14, 15, MN ) Koia kapau ʼe mole tou fia higa ki te ʼu agahala mamafa ʼaē neʼe talanoa kiai Sesu, pea ʼe tonu ke tou toʼo ʼi totatou loto te ʼu holi kovi fuli ʼaia. Ko tona faka ʼuhiga ʼe tonu ke tou tokaga fakalelei ki te ʼu meʼa ʼaē ʼe tou lau, mo sioʼi pea mo fakalogo kiai. Ia ʼaho nei, kua faʼifaʼitaliha te hahaʼi ʼi tanatou ʼu palalau pea mo te ʼu meʼa ʼaē ʼe nātou tohi, ko te ʼu matani gāue publicitaires kua lahi te ʼu meʼa ʼe nātou fai ke logo pea mo sio kiai te hahaʼi, moʼo fakaneke tanatou ʼu holi ki te ʼu meʼa ʼaē ʼe kovi. ʼE tonu ke tou faiga mālohi ke mole aka te ʼu taʼi manatu ʼaia ʼi totatou loto. Ko te meʼa ʼaē ʼe maʼuhiga tāfito ke leleiʼia tatou e te ʼAtua, pea ʼe tonu ke tou nofo tokaga tuʼumaʼu ke maʼa pea mo heʼe mele totatou loto.—Tāʼaga Lea 4:23.

Kua Tou Maʼa Ki He ʼu Gāue Lelei

17. He koʼe neʼe fakamaʼa e Sehova tana hahaʼi?

¹⁷ ʼE ko he pilivilesio maʼuhiga pea ʼe ko he puipui, heʼe ʼaki te tokoni ʼa Sehova, ʼe tou lava maʼa ʼi ʼona muʼa. (2 Kolonito 6:14-18) Kae ʼe tou toe mahino ko Sehova neʼe ina fakamaʼa tana hahaʼi heʼe ʼi ai tana fakatuʼutuʼu. Neʼe ʼui e Paulo kia Tito ko Kilisito Sesu “nee ina tukuʼage iaʼia o uhiga mo tatou, koteuhi ke ina haofaki tatou mai te agahala fuape, pea mo fakamaʼa he hahai maʼana, e natou faʼafai i te u gaue lelei.” (Tito 2:14) ʼI totatou ʼuhiga hahaʼi kua fakamaʼa, koteā te ʼu gāue ʼaē ʼe tonu ke tou gāue mālohi kiai?

18. ʼE tou lava fakahā feafeaʼi ʼe tou gāue mālohi ki he ʼu gāue lelei?

¹⁸ ʼUluaki pea mo maʼuhiga ʼaupito, ʼe tonu ke tou tala te logo lelei ʼo te Puleʼaga ʼo Te ʼAtua ki te hahaʼi fuli. (Mateo 24:14) Ka tou fai te faʼahi ʼaia, ʼe tou foaki ki te hahaʼi te ʼamanaki ke nātou maʼuʼuli heʼegata ʼi te kele ka pulihi ai anai te ʼu faʼahiga meʼa heʼe maʼa kehekehe. (2 Petelo 3:13) ʼI tatatou ʼu gāue lelei ʼe tonu foki ke tou fakahā te ʼu fua ʼo te laumālie maʼoniʼoni ʼo te ʼAtua ʼi totatou maʼuli ʼi te ʼaho fuli, ʼo tou faka kolōlia ai totatou Tāmai ʼe ʼi selo. (Kalate 5:22, 23; 1 Petelo 2:12) Pea ʼe mole galo kia tatou ia nātou ʼe mole nonofo ʼi te moʼoni ʼaē ʼe lagi tau mo he ʼu tuʼutāmaki faka natula peʼe ko he ʼu mamahi. ʼE tou haga manatuʼi te tokoni ʼaenī ʼa Paulo: “Koia leva, i tatatou kei mau te temi, tou fai ia te lelei ki te tagata fuape, kae tafito ia te lelei o te kaiga o te tui.” (Kalate 6:10) Ko te ʼu gāue fuli ʼaia ʼe leleiʼia e te ʼAtua he neʼe fai ʼaki te loto ʼe maʼa pea ʼaki he ʼu manatu ʼe lelei.—1 Timoteo 1:5.

19. Koteā te ʼu tapuakina ʼe tou maʼu anai mo kapau ʼe tou aga maʼa—ʼi te faʼahi fakasino, ʼi te ʼu aga ʼaē ʼe tonu ke fai, pea mo te faʼahi fakalaumālie?

¹⁹ ʼI totatou ʼuhiga kaugana ʼo te Māʼoluga, ʼe tou tokagaʼi te ʼu palalau ʼaenī ʼa Paulo: “Koia, e au tagi atu kia koutou, u tehina, aki te u ofa o te Atua, momoli outou sino ko he sakilifisio mauli mo maonioni pea mo taau ki te Atua, ko tautou tauhi fakapotopoto aia.” (Loma 12:1) ʼOfa pe ke tou haga leleiʼia totatou fakamaʼa e Sehova pea mo tou faiga katoa ke tou maʼa ʼi te faʼahi fakasino, mo maʼa ʼi te ʼu aga ʼaē ʼe tonu ke fai, pea mo maʼa ʼi te faʼahi fakalaumālie. Kapau ʼe tou fai feiā, ʼe tou fakaʼapaʼapa pe kia kita totonu pea mo maʼuli fakafeauga ʼi te temi nei, pea ʼe tou sio anai ki te molehi ʼo te ʼu meʼa ʼāfea—te tuʼu agakovi ʼaenī pea mo tona mālama heʼe maʼa—mokā “fai ia mea foou fuape” e te ʼAtua.—Apokalipesi 21:4, 5.

ʼE Kei Koutou Manatuʼi Koa?

• He koʼe neʼe foaki ki te kau Iselaele te ʼu tuʼuga lao ʼo ʼuhiga mo te aga maʼa?

• ʼE faka maʼuhigaʼi feafeaʼi e te fakamaʼa fakasino ia te logo ʼaē ʼe tou faka mafola?

• He koʼe ʼe maʼuhiga age te maʼa ʼi te ʼu aga ʼaē ʼe tonu ke fai pea mo te faʼahi fakalaumālie ʼi te maʼa fakasino?

• ʼE tou lava fakahā feafeaʼi ʼe tou ‘gāue mālohi ki he ʼu gāue lelei’?

[Paki ʼo te pasina 21]

ʼE hikihiki e te aga maʼa te logo ʼaē ʼe tou faka mafola

[Paki ʼo te pasina 22]

Neʼe fakatokaga e Sesu ʼe iku te ʼu manatu kovi ki te ʼu aga ʼe kovi

[Paki ʼo te pasina 23]

ʼI totatou ʼuhiga hahaʼi fakamaʼa, ko te kau Fakamoʼoni ʼa Sehova ʼe nātou gāue mālohi ki he ʼu gāue lelei