“Omai Kia Te Au, . . . Pea e Au Fakafimalieʼi Anai Koutou”
“Koutou Tauhi Te Fagaʼovi a Te Atua”
“ ʼE koutou nonofo tuʼumaʼu pe ʼi henī moʼo fakalogo mai pea mo vaevae he ʼu palalau mai te Tohi-Tapu ʼe ina fakaʼalaʼala tomatou laumālie.”—Pamela.
“ ʼE fakamālo atu kia koutou fuli ki takotou tokakaga kia mātou fuli. ʼE malave ʼaupito kia mātou.”—Robert.
KO PAMELA mo Robert neʼe nā fia tohi te ʼu palalau ʼaia moʼo fakahā tanā fakafetaʼi ki te ʼu tagata ʼāfea ʼo tanā ʼu kokelekasio. ʼE ʼi ai ʼihi ʼo te kau kaugana ʼa te ʼAtua ʼi te malamanei katoa, ʼe nātou fakafetaʼi mo nātou ki te tokoni mo te lagolago ʼe nātou maʼu tuʼumaʼu mai ia nātou ʼaē ʼe nātou “tauhi te fagaʼovi a te Atua.” (1 Petelo 5:2) ʼI tona fakahagatonu, ʼe fakafetaʼi ia te hahaʼi ʼa Sehova ki te ʼu tuʼuga meʼa ʼe fai e te kau tagata ʼāfea maʼa nātou pea mo te faʼahiga fakahoko ʼo te ʼu meʼa ʼaia.
‘ ʼE Lahi Tanatou Gāue’
ʼE lahi te ʼu maʼua neʼe tuku age ki te kau tagata ʼāfea. (Luka 12:48) ʼE nātou teuteuʼi te ʼu akonaki maʼa te ʼu fono ʼo te kokelekasio pea ʼe nātou kau ki te fai faka mafola ʼo te logo lelei ʼo te Puleʼaga ʼo te ʼAtua. ʼE nātou fai mo te ʼu ʼaʼahi faka tauhi ōvi ki ʼonatou ʼu tēhina. ʼE foaki e te kau tagata ʼāfea tonatou temi kia nātou ʼaē ʼe ʼaoga tāfito kiai—ia nātou kua matutuʼa pea mo nātou ʼe ʼaoga kiai—kae mole nātou lītuʼa ki te maʼuli fakalaumālie pea mo te maʼuli fakasino ʼo tonatou ʼu famili totonu. (Sopo 29:12-15; 1 Timoteo 3:4, 5; 5:8) Ko ʼihi tagata ʼāfea ʼe tokoni ki te laga ʼo te ʼu Fale ʼo Te Puleʼaga. Ko ʼihi ʼe gāue ʼi te ʼu komite felogoi tahi mo te lopitali peʼe nātou kau ki te ʼu kūtuga ʼe nātou ʼaʼahi te kau Fakamoʼoni ʼaē ʼe mahahaki. Pea tokolahi ia nātou ʼe nātou kau ki te kau gāue loto lelei ʼe tokoni ki te ʼu gāue ʼi te ʼu fakatahi lalahi. Ei, ko te kau tagata ʼāfea ʼe ‘lahi tanatou gāue ʼi te ʼAliki.’ (1 Kolonito 15:58) Koia ʼe mole tou punamaʼuli ai ki te leleiʼia ʼaupito ʼo te kau tagata ʼāfea ʼaia ʼaē ʼe gāue kinakina e nātou ʼaē ʼe fakahoko kiai ia te taʼi tokaga ʼaia!—1 Tesalonika 5:12, 13.
Ko te kau tagata ʼāfea ʼaē ʼe nātou tautau ʼaʼahi tonatou ʼu tēhina ʼi tonatou ʼu ʼapi moʼo fakaloto mālohiʼi ʼo nātou ʼi te faʼahi fakalaumālie, ʼe ko he ʼu fakaloto mālohi moʼoni ia. Neʼe ʼui fēnei e Thomas ʼaē neʼe hala mo tāmai: “Kanaʼaua te tokoni ʼofa mo te fakaloto mālohi ʼa te kau tagata ʼāfea, ʼe mole ʼau ʼiloʼi peʼe ʼau tauhi nei maʼa Sehova ʼi toku ʼuhiga pionie ʼi te temi nei.” ʼE lahi te kau tūpulaga ʼaē ʼe maʼuʼuli ʼi te ʼu famili ʼe taupau pe e te tokotahi ʼo te ʼu mātuʼa, ʼe nātou fakamoʼoni ko te tokaga ʼaē neʼe fai age e te kau tagata ʼāfea neʼe tokoni kia nātou ke nātou fakatuputupu ai hanatou ʼu felogoi mo te ʼAtua.
ʼE leleiʼia ʼaupito te ʼu ʼaʼahi faka tauhi ōvi e nātou ʼaē kua matutuʼa ʼi te kokelekasio. ʼI te hili ʼo te ʼaʼahi ʼo nāua e te ʼu tagata ʼāfea e toko lua, neʼe tohi fēnei e te taumatuʼa misionea ʼaia kua nā taʼu 80 tupu: “ ʼE ma fia fakahā atu tomā loto fakafetaʼi ki takolua ʼaʼahi ʼaē neʼe tō lelei. ʼI takolua ʼosi mavae, neʼe ma toe lau ia te ʼu vaega ʼaē neʼe tou vakaʼi fakatahi. ʼE mole galo anai ia māua takolua ʼu palalau fakaloto mālohi.” Neʼe tohi fēnei e te vitua kua taʼu 70 ki te kau tagata ʼāfea: “Neʼe ʼau faikole kia Sehova ke tokoni mai, pea neʼe ina fekauʼi mai ia koulua, te ʼu tagata ʼāfea ke koulua ʼōmai ki toku ʼapi. Ko takolua ʼaʼahi neʼe ko te tapuakina mai ia Sehova!” Neʼe kua ʼaʼahi koa la ia koutou e he kau tagata ʼāfea ʼo tokotou kokelekasio ʼi te ʼu ʼaho ʼaenī? ʼE mahino ia, ko tatou fuli ʼe tou leleiʼia tanatou ʼu faiga ʼaē ke nātou tauhi fakalelei te faga ōvi ʼaē neʼe tuku age ke nātou taupau!
Ko He Kau Tauhi Ōvi ʼe Nātou Faʼifaʼitakiʼi Te ʼAtua Pea Mo Kilisito
Ko Sehova ʼe ko he Tauhi Ōvi agalelei. (Pesalemo 23:1-4; Selemia 31:10; 1 Petelo 2:25) Mo Sesu Kilisito foki ʼe ko he Tauhi Ōvi ʼe tokaga ki te ʼu meʼa fakalaumālie ʼaē ʼe ʼaoga kia tatou. ʼI tona fakahagatonu, ʼe fakahigoaʼi ia ia ko “te tauhiovi agalelei,” “te Tauhiovi lahi,” pea ko “te Aliki tauhiovi.” (Soane 10:11; Hepeleo 13:20; 1 Petelo 5:4) Neʼe tokaga feafeaʼi ia Sesu kia nātou ʼaē neʼe nātou fakaʼamu ke nātou liliu ko tana ʼu tisipulo? Neʼe ina fai age kia nātou te fakaafe fakaloto māfana ʼaenī: “Ke omai kia te au, ia natou fuape e mamahi pea mo natou e mafasia i te fua kavega, pea e au fakafimalieʼi anai koutou.”—Mateo 11:28.
ʼE feiā mo te kau tagata ʼāfea ʼi te temi nei ʼe nātou faiga ke nātou liliu ko he fakafimālie pea mo he puipuiʼaga ʼo te faga ōvi. Ko te faʼahiga tagata ʼaia ʼe “liliu ko he nonoʼaga mokā matagi pea ko he holaʼaga mokā afā, ohage ko he ʼu kiʼi vaitafe ʼi he potu moamoa, ohage ko te malumalu ʼo he mata maka ʼi he kele kakā.” (Isaia 32:2) Ko te faʼahiga tagata ʼaia ʼe ko he ʼu puipui ʼe nātou fakafimālie, pea ʼe fakaʼapaʼapaʼia ia nātou e te faga ōvi, pea ʼe ʼofainaʼi nātou e te ʼAtua.—Filipe 2:29; 1 Timoteo 5:17.
Ko He Lagolago Maʼuhiga Mai ʼOnatou ʼu ʼOhoana
Ko te hahaʼi ʼa te ʼAtua ʼe nātou fakafetaʼi ki te kau tagata ʼāfea pea mo te lagolago ʼofa ʼe maʼu e te ʼu tagata ʼaia mai ʼonatou ʼu ʼohoana. ʼE tau fakamaʼua ki te ʼu fafine ʼaia ke nātou fai he ʼu sakilifisio. Ko te meʼa ʼe tautau hoko, ʼe nonofo te ʼu fafine ʼohoana ʼi ʼonatou ʼu ʼapi kae maʼumaʼua tonatou ʼu ʼohoana ki te ʼu meʼa ʼo te kokelekasio peʼe nātou fai he ʼu ʼaʼahi faka tauhi ōvi. ʼI ʼihi temi, ko te ʼu fakatuʼutuʼu neʼe kua faʼufaʼu fakalelei kua fetogi ʼuhi ko he fihifihia ʼe hoko ʼi te kokelekasio ʼe tonu ke foimo fakatokatoka. Neʼe ʼui fēnei e Michelle: “Ka ʼau sio ki te maʼumaʼua ʼo toku ʼohoana ki te teuteuʼi ʼo te ʼu fono peʼe ina fai he ʼu ʼaʼahi faka tauhi ōvi, ʼe ʼau ʼui ʼi toku loto ʼe ina fai te gāue ʼa Sehova, pea ʼe ʼau faiga ke ʼau lagolago lelei ki ai ʼo mulimuli ki toku fealagia.”
Neʼe tala fēnei e Cheryl, ʼe ʼohoana ki te tagata ʼāfea: “ ʼE ʼau ʼiloʼi ʼe loto e te ʼu tēhina mo te ʼu tuagaʼane ke nātou palalau mo te kau tagata ʼāfea, pea ʼe ʼau fia fakahā age kia nātou ʼe feala hanatou ʼōmai ʼo palalau mo toku ʼohoana ʼi he temi pe ʼe ʼaoga ai kia nātou.” Ko te taʼi fafine ʼaia ʼe lagolago lelei, ohage ko Michelle mo Cheryl, ʼe nātou lotolelei ke nātou fai he ʼu sakilifisio ke feala ai ki tonatou ʼu ʼohoana ke nātou tokakaga ki te ʼu ōvi ʼo te ʼAtua. ʼE fakafetaʼi ia ki te ʼu fafine ʼohoana ʼa te kau tagata ʼāfea ki tanatou lagolago lelei.
Kae ʼe mole tonu ki he tagata ʼāfea ʼe maʼumaʼua ke ina meʼa noaʼi te ʼu meʼa ʼe ʼaoga ki tona ʼohoana mo tana fānau ʼi te faʼahi fakalaumālie mo te tahi ʼu faʼahi. Ko he tagata ʼāfea kua ʼohoana ʼe tonu ke “mole fai ki ai he tukugakoviʼi, ʼe ʼohoana mo he fafine e tahi, ʼe ʼi ai hana fānau ʼe tui pea [ʼe] mole tukugakoviʼi nātou ʼo ʼuhiga mo he māmio kovi pe ko he talagataʼa.” (Tito 1:6, MN ) ʼE tonu ke tokaga ki tona famili ʼo mulimuli ki te ʼu fakamaʼua faka lotu ʼo te Tohi-Tapu ʼo ʼuhiga mo te ʼu tagata taupau faka Kilisitiano.—1 Timoteo 3:1-7.
Ki he tagata ʼāfea ʼe maʼumaʼua, ko he fafine ʼohoana ʼe lagolago lelei ʼe maʼuhiga ʼaupito! ʼE manatu feiā te kau tagata ʼāfea ʼaē kua ʼohoana. ʼE hage ko tona ʼui e te Tohi-Tapu: “Kua maʼu koa e he tahi hona ʼohoana ʼe lelei? Kua ina maʼu ia te meʼa lelei.” (Tāʼaga Lea 18:22) ʼE fakahā e te kau tagata ʼāfea tanatou fakafetaʼi fakamalotoloto ki ʼonatou ʼu ʼohoana ʼaki te palalau mo te aga. ʼO hilifaki atu ki te faikole fakamalotoloto mo he ako fakafiafia fakatahi, ʼe tuku keheʼi e te ʼu taumatuʼa Kilisitiano ʼaia he temi ke nātou fai he ʼu meʼa ohage ko te haʼele fakatahi ʼi he matatai, peʼe ko he ʼeva ʼi te ʼu vao matuʼa, peʼe ʼi he lotoʼā. Ei, ʼe maʼu e te kau tagata ʼāfea ia te fiafia ʼaki tanatou tokakaga ki ʼonatou ʼu ʼohoana ʼaki te ʼofa.—1 Petelo 3:7.
Ko te kau tagata ʼāfea ʼaē ʼe nātou tauhi te faga ōvi ʼa te ʼAtua kae mole nātou manatu kia nātou totonu, ʼe ko he fakafimālie fakalaumālie ki te hahaʼi ʼa Sehova. Ko nātou ʼe ko “he ʼu meʼa ʼofa ko he ʼu tagata,” ko he tapuakina ki te kokelekasio!—Efeso 4:8, 11-13, MN.