Koutou Sio Ki Te ʼu ʼAluʼaga ʼAki Te Sio Fakaʼatua
ʼI NEW YORK, ʼi Amelika, ʼi te ʼaho 14 ʼo Sepetepeli 2002, neʼe ko te ʼaho māfana pea mo laʼā. ʼI te ʼaho ʼaia, ko te toko 6 521 hahaʼi mai te malamanei katoa neʼe nātou fakatahitahi ʼi te Faleako ʼo Patterson pea mo te tahi ʼu fale e lua ʼa te kau Fakamoʼoni ʼa Sehova ʼo te koga meʼa. Neʼe nātou fakatahitahi ki te fono ʼaē neʼe tufa ai te ʼu pepa ʼo te 113 kalasi ʼo te Faleako Faka Tohi-Tapu ʼo Kalaate ʼo te Watchtower. Neʼe ʼōmai te kau ako mai te ʼu fenua e 14 pea neʼe nātou teuteu lolotoga māhina e nima ki te selevisi misionea, ke feala hanatou ʼolo ʼo gāue ʼi te ʼu fenua e 19 ʼaē neʼe hinoʼi nātou kiai.
Neʼe pelesita ʼi te fakatahi ʼaia ia Carey Barber, ko tona taʼu 98 pea ʼe kau ki te Kolesi Pule ʼa te kau Fakamoʼoni ʼa Sehova. Neʼe talanoa ki te tofiʼa kua teitei taʼu 60 ʼo te Faleako ʼo Kalaate, ʼaē neʼe ina teuteuʼi te toko lauʼi afe ke nātou ʼolo ʼo gāue faka misionea. Neʼe ʼui fēnei e te Tēhina ko Barber: “ ʼE mole ko he loi ia te ʼui ʼaē neʼe lahi te ʼu fua mai te ako ʼaia. Ko te toko lauʼi teau afe kau agavaivai ʼi te malamanei katoa neʼe nātou foaki tonatou maʼuli kia Sehova, pea mo tali te tauhi moʼoni pea mo tana gāue taputapu tupu ko te gāue ʼa te kau misionea ʼaē neʼe ako.”
ʼI muʼa ʼo tanatou ʼōmai ki Kalaate, tokolahi te kau ako neʼe nātou fakahā tanatou fia fakalahi tanatou minisitelio. Ko te taumatuʼa neʼe nā akoako te lea faka Mandarin, te lea faka Siaina, koteʼuhi ke feala hanā faka mafola ki te hahaʼi kaugamālie ʼo te kau Siaina ʼaē ʼe nonofo ʼi tonā fenua ʼaē ko Kanata. Ko te tahi taumatuʼa neʼe nā kamata ako te lea faka Alepania pea ki muli age neʼe nā mavae ʼi tonā fenua ʼo ʼolo ki Alepania moʼo tokakaga kia nātou ʼaē ʼe nātou fia ʼiloʼi te Tohi-Tapu. Ko ʼihi ʼo te kalasi neʼe ʼōmai mai Hukalia, mo Kuatemala, pea mo République Dominicaine, ko te ʼu fenua ʼaia neʼe nātou ʼolo kiai koteʼuhi neʼe ʼaoga lahi kiai he kau faiako ʼo te Folafola ʼa te ʼAtua.
ʼI te temi nei, ʼi muʼa ʼo tanatou ʼolo ki te ʼu telituale ʼi Afelika, mo te potu Hahake ʼo te Eulopa, mo te lotomalie pea mo te potu Saute ʼo Amelika, pea mo te potu taupotu ʼo te Esite, neʼe fakaloto mālohiʼi te kau maʼu pepa fuli ke nātou manatuʼi te ʼAtua ʼi te ʼu meʼa fuli ʼe nātou fai.
Koutou Sio Ki Te ʼu ʼAluʼaga ʼAki Te Sio Fakaʼatua
ʼI te ʼosi kamata ʼo te fono, neʼe fakaafe e te Tēhina ko Barber ia Maxwell Lloyd, ʼe kau ki te Komite ʼo Te Filiale ʼo Amelika. Neʼe palalau te tēhina ʼaia ki te kupu tāfito ʼaē “Koutou Sio Ki Te ʼu ʼAluʼaga Fuli ʼAki Te Sio Fakaʼatua.” Neʼe faka maʼuhigaʼi e te Tēhina ko Lloyd ia te ʼu faʼifaʼitaki ʼo Tavite pea mo te ʼAlo ʼo te ʼAtua, ia Sesu. (1 Samuele 24:6; 26:11; Luka 22:42) ʼI tana ʼosi fakamanatuʼi age ki te kau maʼu pepa, ko tanatou ako te Tohi-Tapu lolotoga te ʼu māhina e nima neʼe ina akoako ia nātou ke nātou sio ki te ʼu faʼahiga meʼa kehekehe ʼaki te sio fakaʼatua, neʼe fai leva e te tēhina te fehuʼi ʼaenī: “Ka koutou fai anai he ʼu ako Tohi-Tapu mo te hahaʼi ʼo takotou telituale foʼou, ʼe koutou tokoni age anai koa kia nātou ke nātou fakakaukauʼi te ʼu meʼa ʼaki te sio fakaʼatua?” Pea ʼo ʼuhiga mo te tokoniʼi ʼo ʼihi, koʼeni te tokoni neʼe ina fai ki te kau maʼu pepa: “ ʼAua naʼa koutou ʼui, ‘ ʼI taku manatu, maʼa ʼaku . . .’ Kae, koutou tokoni age kia nātou ke nātou mahino peʼe koteā te manatu ʼa te ʼAtua. Ka koutou fai feiā, ʼe koutou liliu anai ko he tapuakina moʼoni kia nātou ʼaē ʼe koutou fakatahi mo nātou ʼi takotou telituale foʼou.”
Neʼe hoa kiai ia Gerrit Lösch, ʼe kau ki te Kolesi Pule. ʼAki te kupu tāfito ʼaenī “ ʼE ʼAu Nofo Mo Koutou,” neʼe ina fakatokagaʼi te ʼu lakaga ʼaē neʼe ʼui ai e Sehova ki tana ʼu kaugana agatonu, “ ʼE ʼau nofo mo koutou.” (Senesi 26:23, 24; 28:15; Sosue 1:5; Selemia 1:7, 8) ʼI totatou temi, ʼe tou lava maʼu te taʼi falala ʼaia kia Sehova mo kapau ʼe tou haga nofo agatonu. Neʼe faka maʼuhigaʼi fēnei e te Tēhina ko Lösch: “ ʼE koutou tuʼania koa peʼe koutou maʼu anai he ʼu hahaʼi ke koutou ako te Tohi-Tapu mo nātou? Koutou manatuʼi, neʼe ʼui fēnei e Sehova, ‘ ʼE ʼau nofo mo koutou.’ ʼE koutou feʼekeʼaki koa peʼe koutou feʼaugaʼia ʼi te faʼahi fakasino? Neʼe ʼui fēnei e Sehova: ‘E mole au tukunoa anai ia koe, pea e mole au liaki anai koe.’ ” (Hepeleo 13:5) Neʼe fakaʼosi e te Tēhina ko Lösch ʼo ina fakamanatuʼi ki te kau ako, neʼe fakapapauʼi mai e Sesu ʼe nofo anai mo tana kau tisipulo agatonu ki te fakahoko ʼo te gāue ʼaē ko te fai ʼo ni ʼu tisipulo.—Mateo 28:20.
Koʼeni te kupu tāfito ʼo te akonaki neʼe fai e te tagata faiako ʼo Kalaate ko Lawrence Bowen: “ ʼE Koutou Maʼu Anai Koa Te Fīmālie ʼi Te ʼu ʼAhiʼahi Faigataʼa ʼAupito?” Neʼe ina ʼui, ʼaki te ʼu fehuʼi ʼaē neʼe lagaʼi ʼi Eteni, ko nātou fuli ʼaē ʼe nātou fia pipiki ʼāteaina pe kia Sehova ʼe nātou tau mo te ʼu faigataʼaʼia, pea ʼi ʼihi temi ʼe ko te ʼu ʼahiʼahi faigataʼa ʼaupito. Neʼe ina fakaloto mālohi te kau maʼu pepa ke nātou mulimuli ki te faʼifaʼitaki ʼa Sesu, ʼaē neʼe ina maʼu te fīmālie ʼaki tana falala katoa kia Sehova pea mo ina tali te ʼu ʼahiʼahi faigataʼa ʼaupito ʼaē neʼe faka fealagia e Sehova ke feala ke katoa ai te fakalogo ʼo tona Foha. (Hepeleo 5:8, 9) ʼE feala ke fakatatau ia Sehova ki he tagata fakamaʼa aulo, ʼe ina ʼiloʼi lelei te vela ʼaē ʼe feʼauga moʼo toʼo ʼo te ʼu meʼa ʼaē ʼe ʼuli. ʼE mahino ia, ko te tui ʼaē neʼe ʼahiʼahiʼi e te afi ʼe lahi age hatatou falala kiai ʼi te aulo ʼaē neʼe fakamaʼa. Koteā tona tupuʼaga? Neʼe ʼui fēnei e te Tēhina ko Bowen: “Koteʼuhi ko te tui ʼaē kua fakamaʼa ʼe ina lava kātakiʼi te ʼahiʼahi kehekehe pea ʼe ina teuteuʼi tatou ke tou kātaki fuli ʼo aʼu ki ‘te fakaʼosi.’ ”—Mateo 24:13.
Ko te tahi tēhina faiako ʼo Kalaate ko Mark Noumair, neʼe ina fehuʼi fēnei: “ ʼE Leleiʼia Anai Ia Koutou?” Neʼe fakatafito tana kupu tāfito ki te ʼu palalau ia 1 Samuele 2:26, ʼaē ʼe palalau ai ʼo ʼuhiga mo Samuele ko he tahi neʼe “leleiʼia e Sehova pea mo te hahaʼi.” ʼI tana ʼosi palalau ki te faʼifaʼitaki ʼa Samuele, neʼe tala fēnei e te Tēhina ko Noumair, ʼaē neʼe gāue misionea lolotoga taʼu e hogofulu tupu ʼi Afelika: “ ʼE lava leleiʼia ʼaupito koutou e Sehova mo kapau ʼe koutou haga pipiki maʼu pea mo nofo agatonu ʼi te gāue ʼaē neʼe tuku atu e te ʼAtua ke koutou fai. Neʼe ina foaki atu kia koutou te gāue faka misionea maʼuhiga.” Pea neʼe fakaloto mālohiʼi e te Tēhina ko Noumair ia te kau ako ke nātou faka ʼuhiga tanatou gāue ohage ko he meʼa taputapu neʼe foaki age ʼaki te loto falala e te ʼAtua pea ke nātou taupau te manatu ʼa te ʼAtua ʼi tanatou fakahoko tonatou ʼu gāue.
ʼI te temi ʼaē neʼe nātou nonofo ai ʼi te Faleako ʼo Kalaate, neʼe maʼu e te kau ako te ʼu tuʼuga faigamālie ʼi te ʼu fakaʼosi vāhaʼa ke nātou vaevae mo te hahaʼi ʼo te kolo ia “te ʼu gāue fakaʼofolele ʼa te ʼAtua” ʼaē ʼe tuʼu ʼi te Tohi-Tapu. (Gaue 2:11, MN ) ʼI tona fakahagatonu, neʼe nātou lava palalau ki te ʼu meʼa ʼaia ia lea kehekehe e hogofulu. Ko Wallace Liverance, te tahi tēhina faiako ʼo Kalaate, neʼe ina fakafehuʼi te kau ako ke nātou fakamatala te ʼu meʼa neʼe hoko kia nātou ʼi te akonaki ʼaē ko tona kupu tāfito ʼaenī “ ‘Te ʼu Gāue Fakaʼofolele ʼa Te ʼAtua’ ʼe Ina ʼEke Te Hahaʼi Ke Nātou Gaūgaūe.” Neʼe ina ʼui fēnei: “Neʼe uga e te laumālie ia nātou ʼaē neʼe nonofo ʼi te kogafale fata ke nātou palalau ki ‘te gāue fakaʼofolele ʼa te ʼAtua.’ Ko te laumālie pe ʼaia ʼe gāue ʼi te temi nei ʼi te kau kaugana agatonu fuli ʼa te ʼAtua.” Ko ʼihi neʼe hake ia nātou te fia ako ʼo he ʼu lea foʼou ke feala ai hanatou fai faka mafola ki he hahaʼi tokolahi.
Te ʼu Tokoni ʼAoga Ke Nātou Sio Ki Te ʼu ʼAluʼaga ʼAki Te Sio Fakaʼatua
ʼI te ʼosi ʼo te ʼu ʼuluaki akonaki, ko Gary Breaux mo William Young, ʼe nā kau toko lua ki te famili ʼo te Petele ʼo Amelika, neʼe nā fakafehuʼi te ʼu tēhina mai te ʼu komite ʼo te ʼu filiale kehekehe ʼo te ʼu fenua ʼe nātou lolotoga gāue misionea ai pea mo te taumatuʼa kua taʼu 41 tanā kau ki te gāue faka misionea. Neʼe fakatokagaʼi fēnei e te tahi: “Ko nātou ʼaē mole faʼa hoha ke nātou fīmālie ʼi te faʼahi faka koloā, ʼe fuafualoa tanatou nonofo. ʼE nātou tokakaga tāfito ki te tupuʼaga ʼo tanatou nonofo ʼi te fenua. ʼE nātou ʼiloʼi neʼe nātou ʼōmai ko te faka mafola ʼo te logo lelei pea mo tokoni ki te hahaʼi ke nātou ʼiloʼi ia Sehova.”
Ko David Splane, ʼe kau mo ia ki te Kolesi Pule, neʼe ina fai te akonaki fakaʼosi neʼe ko tona kupu tāfito ʼaenī “ ʼE Mole Koutou ʼOlo Mamaʼo!” Neʼe koteā te faka ʼuhiga ʼo tana ʼu palalau, kae ʼe ʼamanaki ʼolo te kau maʼu pepa ki te ʼu fenua ʼi te malamanei katoa? Neʼe ina fakamahino fēnei: “ ʼI he potu pe ʼe koutou nonofo ai ʼi te kele, ʼe koutou nonofo tuʼumaʼu anai ʼi te ʼapi ʼo te ʼAtua mokā ʼe koutou haga agatonu.” Ei, ko te kau Kilisitiano agatonu fuli, ʼe mole lauʼia te koga meʼa ʼe nātou nonofo ai, kae ʼe nātou gāue ʼi he potu pe ʼo te fale lotu fakalaumālie ʼo te ʼAtua, peʼe ko tona ʼapi, ʼaē neʼe tupu ake ʼi te temi ʼaē neʼe papitema ai ia Sesu ʼi te ʼuluaki sēkulō. (Hepeleo 9:9) Ko he meʼa fakaloto mālohi kia nātou ʼaē neʼe kau ki te fono ʼaia hanatou ʼiloʼi ko Sehova ʼe ōvi ki tana ʼu kaugana agatonu fuli ʼi te kele! Ohage pe ko te tokaga ʼa Sehova kia Sesu ʼi te temi ʼaē neʼe nofo ai ʼi te kele, ʼe toe tokaga mai kia tatou fuli pea mo tatatou tauhi kia te Ia, ʼo mole lauʼia te koga meʼa ʼe tou nonofo ai. Koia ʼo ʼuhiga mo te tauhi, ʼe mole feala ia ke tou femamaʼoʼaki ia tatou pea ke tou mamaʼo mai ia Sehova pea mo Sesu.
ʼI te ʼosi fakahā te ʼu fakaʼalofa mai te malamanei katoa, mo te ʼu telituale ʼaē ka ʼolo kiai te kau ako, pea mo lau te tohi fakafetaʼi ʼo te kalasi ki te ako neʼe nātou maʼu ʼi Kalaate, neʼe fakaʼosi e te pelesita ia te fono ʼaki tana fakaloto mālohi ki te kau misionea ke nātou haga fai tanatou gāue lelei pea mo haga fakafiafia ʼi tanatou selevisi kia Sehova.—Filipe 3:1.
[Talanoa ʼo te pasina 23]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 14
ʼE nātou ʼolo ki te ʼu fenua e: 19
Ko te kau ako e: 46
Te fakafuafua ʼo tonatou ʼu taʼu: 35
Te fakafuafua ʼo tonatou ʼu taʼu ʼi te moʼoni: 17,2
Te fakafuafua ʼo tonatou ʼu taʼu ʼi te gāue temi katoa: 13,7
[Paki ʼo te pasina 24]
Ko Te 113 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.